1-3. Chuma muka chevwishile Ezekele kupihya kumuchima, kaha vamuhwiminyinyine asoneke ika?

OMU kapolofweto Ezekele ahetesele myaka 6 muufunge, * evwilenga lika kupihya chikuma kumuchima omu ashinganyekelenga havilinga vyavipi valingilenga vamyangana mulifuchi lyaYuta muze afumine. Ezekele amwenenga omu vamyangana vakulisezaseza vayulilenga muYuta.

² Ezekele asemukile halwola Mwangana wakushishika Yoshiya apwile nakuyula. Atela Ezekele awahililile chikuma hakwivwa mulimo azachile Yoshiya wakunongesa makombelo akusonga nakukindulwisa kulemesa chamuchano muYuta. (Miji. 2, 34:1-8) Numba tuhu Yoshiya azachile nangolo hakukindulwisa kulemesa chamuchano, oloze chuma kana kachatwalililehoko, mwomwo vamyangana vavavulu vaze vakavangijileho vatwalilileho lika kulemesa makombelo. Vamyangana kanava vavilinga vyavipi valingishile vatu vaputuke kulinga vyuma vyavipi nakujiha usoko wavo naYehova. Uno echi chasolwele nge kakweshi kukapwa cheka mwangana wakushishika uze mwakakindulwisa kulemesa chamuchanoko tahi? Nduma.

³ Yehova ahwiminyinyine kapolofweto kenyi wakushishika Ezekele asoneke upolofweto watete wakutalisa kuli Meshiya uze mwakapwa  Mwangana kulutwe kaha nawa Kafunga. Ou Mwangana ikiye mwakakindulwisa kulemesa chamuchano nakuzakama kanawa mikoko jaYehova. Shikaho nachipwa chamwaza kukekesa kanawa upolofweto kanou, mwomwo kutesamo chaupolofweto kana chakwata hakuyoya chetu chahaya myaka yosena. Tushimutwilenu jino upolofweto uwana wakuvuluka Meshiya uze watwama mumukanda waEzekele.

4. Upolofweto muka ahanjikile Ezekele, kaha Yehova ajimbwile ngachilihi upolofweto kana?

⁴ Kafwe mumwaka wa 612 B.C.E., “Yehova ahanjikile” kuli Ezekele, kaha amulwezele upolofweto uze walumbunwine chiyulo chaMeshiya novyo vatu vatela kufwelela muWangana wenyi. Yehova ajimbwile upolofweto kana hakulweza Ezekele ahanjike kuli vakwavo vafunge kashimutwiji kaze kasolwele nge vamyangana javaYuta kavapwile vakushishikako, novyo kwapwililile nakusakiwila Mwangana wakwoloka wauMeshiya.—Ezeke. 17:1, 2.

5. Uno kashimutwiji valwezele Ezekele kahanjikile ika?

⁵ Tangenu Ezekele 17:3-10. Tuchitalenu hakashimutwiji kana. Kashimutwiji kana kamba ngwavo, “ngonga wamunene” avatwile muketengo wahelu wamushitale nakuya nakuuhaka “munganda yavaka-kusekasana.” Uze ngonga ambachile nawa “mbuto yimwe yamulifuchi” nakuyitumba hamavu awilo kuze kwapwile “meya amavulu.” Yize mbuto yasokele nakukola nakupwa ‘muvinyo waunene.’ Kufumaho kwasolokele cheka “ngonga” mukwavo “wamunene.” Jino miji yamuvinyo ‘yatanjile’ nakuya kuli uze ngonga wamuchivali mangana autumbulule nakuutumba kuchihela cheka kuze kwapwile meya amavulu. Yehova evwile kupihya chikuma hakukola chou muvinyo, kusolola nge miji yawo navakayiteta, kahou muvinyo ‘naukoma chau.’

6. Uno kashimutwiji kana kalumbunwine ika?

⁶ Uno kashimutwiji kana kalumbunwine ika? (Tangenu Ezekele 17:11-15.) Mu 617 B.C.E., Mwangana waMbavilone Nevukataneza (“ngonga wamunene” wakulivanga) ahakile Yelusalema muchingombela. Afumishile Mwangana wavaYuleya Yehoyakine (“muketengo wahelu”) halitanda nakumutwala kuMbavilone (“munganda yavaka-kusekasana”). Nevukataneza ahakile Zetekiya (“mbuto yimwe yamulifuchi” kulumbununa mutu wakutanga yawangana) halitanda muYelusalema. Ou mwangana wamuhya wavaYuta vamulwezele alishinge mulijina lyaKalunga ngwenyi, mwalinganga vyosena vize mwamulwezanga mwangana Nevukataneza. (Miji. 2, 36:13) Oloze Zetekiya kalamine lushiko lwenyiko. Ngocho alikangile kuli mwangana waMbavilone nakuya jino kuli Fwalo, mwangana waEjipitu (“ngonga wamunene” wamuchivali) mangana amuhane maswalale vamukafwe kulwa jita navaMbavilone, oloze kahashile kuvafungululako. Yehova ahungile chikuma vilinga vyavipi vyamwangana Zetekiya mwomwo ahokwele lushiko lwenyi. (Ezeke. 17:16-21) Kufumaho, Zetekiya vamufumishile halitanda, kaha afwililile mukamenga muMbavilone.—Yele. 52:6-11.

7. Vishina muka natulinangula kuli aka kashimutwiji?

 ⁷ Vishina muka natulinangula kuli aka kashimutwiji? Chatete, etu vaka-kulemesa Kalunga vamuchano twatela kutesamo jishiko jetu. Yesu ambile ngwenyi: “Lizu lyenu lyakwamba ngwenu ‘Eyo’ lipwenga vene eyo, kaha ‘Nduma,’ lipwenga vene nduma.” (Mateu 5:37) Chakutalilaho, nge natulishinga kuli Kalunga ngwetu natuhanjika muchano hakuhana unjiho muzango yakusopela, kaha twatela kutesamo lushiko kana. Chamuchivali, twatela kufwelela Yehova muchishishisa chakufwelela vatu. Mwomwo Mbimbiliya yatuhuhumuna ngwayo: “Kanda namufwelela vilolo, chipwe muli mwanamutu uze keshi kuhasa kumilwilako.”—Samu 146:3.

8-10. Yehova alumbunwine ngachilihi Muka-kuyula wauMeshiya, kaha upolofweto kana unakutesamo ngachilihi? (Talenu nawa lipwata lyakwamba ngwavo “Upolofweto waKuvuluka Meshiya—Mutondo waMushitale Waunene”)

⁸ Kwatwama muka-kuyula umwe kaha uze twatela kufwelela. Hanyima yakulweza Ezekele ahanjike kashimutwiji kamuketengo uze vatumbulwile, Yehova azachishile kashimutwiji kana hakulumbununa chishina chakupandama kuli Muka-kuyula wauMeshiya.

⁹ Tutalenu omu wahanjika upolofweto kana. (Tangenu Ezekele 17:22-24.) Upolofweto kana wasolola ngwawo Yehova ivene ikiye azachile mulimo kana keshi vaze vangonga vavaneneko. Avatwile muketengo ‘wahelu wamushitale nakuutumba hapili yayisuku.’ Muketengo kana naukakola nakupwa “mushitale waunene” nakulingisa “tujila vamiyachi yosena” vakatwame mwishi yawo. Kaha “mitondo yamuchipapa yosena” nayikatachikiza ngwayo Yehova ikiye nalingisa mutondo kana ukole.

¹⁰ Kutesamo chaupolofweto kana. Yehova avatwile Mwanenyi, Yesu Kulishitu kufuma kutanga yawangana waNdavichi (“muketengo wahelu wamushitale”) nakumutumba haPili Zeyone yamwilu (“hapili yayisuku”). (Samu 2:6; Yele. 23:5; Kuso. 14:1) Shikaho Yehova ahakile Mwanenyi uze vamwene kupwa “mutu wamokomoko chikuma” kuli vaka-kole jenyi, “[ha]litanda lyakakuluka yenyi Ndavichi.” (Ndanye. 4:17; Luka 1:32, 33) Ngana mwamutondo waunene wamushitale, Yesu Kulishitu uze apwa Mwangana wauMeshiya ikiye mwakapwa wakulitulaho hamavu hosena kaha mwakakisula vatu jenyi. Ngocho, Yesu Kulishitu apwa hiMwangana uze vatu vosena vatela kufwelela chikuma. Muchiyulo chenyi, vatu vakwononoka ‘navakapwanga vakukingiwa. Navakatwamanga mukuunda, chakuzeneka kwivwa woma wavihuli.’—Vishi. 1:33.

11. Chishina muka chachilemu natulinangula kuupolofweto wakuvuluka “muketengo” uze wakolele nakupwa “mushitale waunene”?

¹¹ Chishina natulinangula kuupolofweto kana. Upolofweto wakuvuluka “muketengo” uze wakolele nakupwa “mushitale waunene” watukafwa tukumbulule chihula chachilemu chakwamba ngwavo: Iya twatela kufwelela? Chapwa hiuleya kufwelela jifulumende javatu hamwe kaha namaswalale javo vangolo. Hakusaka tupwenga namukingo wamwenemwene, twatela kufwelela chikuma Yesu Kulishitu uze apwa Mwangana wauMeshiya. Fulumende yamwilu yize mwakayulanga Yesu yikiko kaha nayikakumisa ukalu wosena wavatu.—Kuso. 11:15.

12. Yehova asolwele ngachilihi ngwenyi kavulyamine lushiko alishikile naNdavichiko?

¹² Ezekele evwishishile kanawa omu Kalunga alumbunwine kashimutwiji kakuvuluka vangonga vavali. Atachikijile ngwenyi mwangana wakuhona kushishika Zetekiya wakutanga yawangana waNdavichi, navakamufumisa halitanda kuli vaka-kole jenyi nakumutwala muundungo muMbavilone. Atela Ezekele alihulishile ngwenyi, ‘Vyuma muka navisoloka kulushiko luze Kalunga alishikile naNdavichi lwakwamba ngwenyi, mutu umwe wakutanga yaNdavichi mwakapwa mwangana haya myaka yosena?’ (Samwe. 2, 7:12, 16) Nge Ezekele alihulishile chihula kana, kaha kahahichile shimbu nakuwana mwakukumbulwila chihula kanako. Kafwe mu 611 B.C.E., mumwaka wakusokesa 7 uze vaYuleya vatwamine muufunge, halwola luze mwangana Zetekiya apwile nakuyula muYuta, “Yehova ahanjikile kuli” Ezekele. (Ezeke. 20:2) Yehova amulwezele nawa ahanjike upolofweto ukwavo wakutalisa kuli Meshiya. Upolofweto kana wasolwele nge Kalunga kavulyamine lushiko lwenyi alishikile naNdavichiko. Upolofweto kana wasolwele nge Muka-kuyula wauMeshiya mwakafuma mutanga yaNdavichi, kaha navakamuhana lisesa lyakuyula.

13, 14. Upolofweto muka vasoneka hamukanda waEzekele 21:25-27, kaha watesamo ngachilihi?

 ¹³ Tutalenu omu wahanjika upolofweto kana. (Tangenu Ezekele 21:25-27.) Yehova ahuhumwine hatoma “mwata waIsalele wakuhuka” kuhichila muli Ezekele ngwenyi, lwola lwakumuzangamisa lunahete. Yehova alwezele ou muka-kuyula wakuhuka ngwenyi “lihina” lyenyi “namuchama,” (vize vyemanyinako ngolo jakuyula) navamutambulavyo. Kaha viyulo vize ‘venyishile’ navakavizezula, kaha vize “vazezwile” navakavinyisa. Viyulo vize vazezwile navitwalaho lika kuyula “palanga nomu mwakeza ou vahana lisesa,” kaha Yehova mwakamuhana Wangana.

¹⁴ Kutesamo chaupolofweto kana. Omu vanongesele Yelusalema mu 607 B.C.E., wangana waYuta uze wapwile ‘wakuzezuka’ vawinyishile kuli vaMbavilone omu vanongesele nganda yaYelusalema nakufumisa Mwangana Zetekiya halitanda nakumutwala muufunge. Halwola luze kakwapwile mwangana wakutanga yawangana waNdavichi apwile nakuyula muYelusalemako. Ngocho, Vaka-mafuchi eka vaze ‘venyishile’ vavazezwile nakuvahana ngolo jakuyula hamavu hosena hakatando kakandende. Kaha “lwola vatongola lwavaka-mafuchi eka” lwakumine mu 1914, omu Yehova ahanyine wangana kuli Yesu Kulishitu. (Luka 21:24) Hakuwana nge Yesu afumine kutanga yaNdavichi, ngocho apwile chikupu ‘nalisesa’ lyakupwa Mwangana waWangana wauMeshiya. * (Kupu. 49:10) Yehova ashikile Ndavichi  kumuhana mwangana wakutanga yenyi uze mwakayulanga haya myaka yosena. Kaha Yehova ateselemo lushiko kana omu ahanyine wangana kuli Yesu.—Luka 1:32, 33.

15. Mwomwo ika twatela kufwelela Mwangana Yesu Kulishitu?

¹⁵ Chishina natulinangula kuupolofweto kana. Tunahase kufwelela chikuma Yesu Kulishitu uze vatongola kupwa Mwangana. Mwomwo ika? Mwomwo ikiye kapwa ngana mwavaka-kuyula vahamavu vaze veji kusakulanga kuli vatu chipwe vaze veji kuyanga hachiyulo kuzachisa kaha ngolo javoko, oloze ikiye vamusakwile kuli Yehova, kaha ‘vamuhanyine wangana’ nakumwitavisa kuyula. (Ndanye. 7:13, 14) Chikupu vene twatela kufwelela Mwangana uze vatongola kuli Yehova.

16. Uno Yehova azakama ngachilihi mikoko jenyi, kaha chuma muka valingilenga ‘tufunga twavaIsalele’ vamumakumbi aEzekele?

¹⁶ Hakuwana nge Yehova apwa Kafunga Wakulitulaho, ngocho eji kuzakamanga chikuma mikoko jenyi chipwe ngwetu vaka-kumulemesa vahamavu. (Samu 100:3) Kahomu Yehova eji kuhananga tufunga mulimo wakuzakama mikoko jenyi, eji kuvatalanga amone omu veji kuzakaminangamo mikoko jenyi. Achishinganyekenu kupihya evwile hali “tufunga twavaIsalele” vamumakumbi aEzekele. Tufunga kana ‘vayulilenga mujila yautenu naukenya.’ Kahechi chalingishile mikoko vavavulu vayande nakuseza kulemesa chamuchano.—Ezeke. 34:1-6.

17. Yehova ayowele ngachilihi vangamba jenyi?

¹⁷ Chuma muka alingile Yehova kuli vaze tufunga? Yehova avalwezele ngwenyi: “Mikoko jami nanguvehula kuli [enu].” Kaha ambile nawa ngwenyi: “Nangupululula mikoko jami.” (Ezeke. 34:10) Lwola lwosena Yehova eji kutesangamo vyuma eji kuhanjikanga. (Yoshu. 21:45) Mu 607 B.C.E., Yehova azachishile vaMbavilone vafumise tufunga twavaIsalele vakuhuka hachiyulo. Kahomu mwahichile myaka 70, asokwele vangamba jenyi muMbavilone nakuvakindulwisa kulifuchi lyavo mangana vakakindulwise kulemesa chamuchano. Chipwe ngocho, vangamba jaYehova kavapwile nou wakuvakingako mwomwo vapwilenga lika nakuvayula kuli vaka-mafuchi eka. Mbimbiliya yamba ngwayo namukahita myaka yayivulu numba “lwola vatongola lwavaka-mafuchi eka” lukakume.—Luka 21:24.

18, 19. Upolofweto muka ahanjikile Ezekele mu 606 B.C.E.? (Talenu muvwimbimbi wakulivanga.)

¹⁸ Mu 606 B.C.E, omu mwahichile kafwe mwaka umwe kufuma hakunongesa Yelusalema kaha nawa kuchinasale myaka yayivulu numba vasokole vaIsalele muufunge muMbavilone, Yehova ahwiminyinyine Ezekele ahanjike upolofweto wakusolola omu Kafunga Wakulitulaho eji kuzakamanga mikoko jenyi, kaha asaka vakayoye haya myaka yosena. Upolofweto kana walumbununa omu Meshiya mwakafunganga mikoko jaYehova.

¹⁹ Tutalenu omu wahanjika upolofweto kana. (Tangenu Ezekele 34:22-24.) Kalunga ahanjikile ngwenyi: “Nanguvatongwela kafunga umwe” uze avulukile ngwenyi “ngamba yami Ndavichi.” Mazu akwamba ngwavo “kafunga umwe” nalizu lyakwamba ngwavo  “ngamba,” alumbununa nge kuchisaka chaNdavichi nakukafuma Mwangana umwe uze mwakayulanga wangana kana haya myaka yosena. Ou Kafunga Wakulitulaho mwakalisanga mikoko jaKalunga nakupwa “mwata wavo.” Kaha Yehova ‘mwakalishika navo lushiko lwakuunda.’ Kaha “jikisu najikanoka nge vula [hali vakiko].” Ngocho navakapwanga vakukingiwa, kaha nawa navakafukilanga. Vatu natunyama navakatwamanga mukuunda.—Ezeke. 34:25-28.

20, 21. (a) Uno upolofweto wakwamba ngwavo “ngamba yami Ndavichi” watesamo ngachilihi? (b) Uno mazu ahanjikile Ezekele akuvuluka “lushiko lwakuunda” nawakatesamo ngachilihi kulutwe?

²⁰ Kutesamo chaupolofweto kana. Kalunga hakuvuluka ou Muka-kuyula ngwenyi “ngamba yami Ndavichi,” apwile nakuvuluka Yesu uze apwa wakutanga yaNdavichi uze vahana lisesa lyakuyula. (Samu 89:35, 36) Omu Yesu apwile hano hamavu, asolwele chikupu ngwenyi apwile “kafunga wamwenemwene,” kaha ‘echele mwono wenyi hali mikoko jenyi.’ (Yowa. 10:14, 15) Oloze oholyapwa ali jino Kafunga mwilu. (Hepe. 13:20) Mu 1914, Kalunga aswanyishile Yesu halitanda, kaha amuhanyine mulimo wakufunga nakulisa mikoko jaKalunga hamavu. Kaha kuheta mu 1919, ou Mwangana wamuhya atongwele “ndungo wakushishika wakuzangama,” mangana alise “vaka-kuzata kuzuvo” kulumbununa vaka-kulemesa Kalunga vakushishika vaze vatwama nalutalililo lwamwilu navaze navakayoyela hano hamavu. (Mateu 24:45-47) Ou ndungo wakushishika chatwalaho lika kulisa mikoko jaKalunga kulya chakushipilitu hakumutwaminyina kuli Kulishitu. Kulya kanechi chili nakuvakafwanga mangana vatwame mukuunda nakupwa vakukingiwa mupalachise yakushipilitu.

²¹ Uno mazu ahanjikile Ezekele akuvuluka “lushiko lwakuunda” najikisu jize najikanoka nge vula nawakatesamo ngachilihi kulutwe? Mukaye kakahya kaze kali nakwiza, vaka-kulemesa Yehova vamuchano hano hamavu navakalivwisa kuwaha vyuma vyamwaza mwomwo “[ya]lushiko lwakuunda.” Mupalachise, vatu vakushishika navakalivwisa kuwaha kuyoya mwomwo kakweshi kukapwa cheka jijita, uhwanga, zala, misongo chipwe tunyama vaukenyako. (Isa. 11:6-9; 35:5, 6; 65:21-23) Uno kamweshi nakwivwa kuwaha hakupwa nalutalililo lwakukayoya haya myaka yosena mupalachise hano hamavu haze vatu jaKalunga “navakapwanga vakukingiwa, kaha naumwe wauchi mwakavevwisa” womako tahi?—Ezeke. 34:28.

22. Yesu eji kuzakamanga ngachilihi mikoko, kaha tulama vatela kumulondezeza ngachilihi?

²² Chishina natulinangula kuupolofweto kana. Yesu eji kuzakamanga chikuma mikoko ngana mwaIse. Ou Mwangana asaka kulisa mikoko jaIse kulya chakushipilitu, kaha nawa asaka vatwame mukuunda nakupwa vakukingiwa mupalachise yakushipilitu. Twawahilila chikuma hakupwa naTwamina wamuchima wamwaza ngana. Tulama vatela kuzakama kanawa mikoko ngana muze eji kulinganga Yesu. Tulama vatela “kulisuula” kufunga utanga “mukulisakila” nakuhana chakutalilaho chamwaza kuli mikoko chize vatela kukavangiza. (Petu. 1, 5:2, 3) Tulama kavatela kuyanjisa mikoko  jaYehovako. Vatela kwanuka mazu ahanjikile Yehova kuli tufunga vamumakumbi aEzekele akwamba ngwenyi: “Mikoko jami nanguvehula kuli [enu].” (Ezeke. 34:10) Kafunga Wakulitulaho eji kumonanga omu tulama veji kulamanga mikoko jenyi, kahomu mukiko eji kulinganga naMwanenyi.

23. Lushiko muka ashikile Yehova kutalisa kukuwanyisa muyachi waIsalele, kaha aluteselemo ngachilihi?

²³ Yehova asaka vaka-kumulemesa vamuzachile mukulinunga. Muupolofweto wakuvuluka kulinunga chamiyachi yavaIsalele, Kalunga ashikile ngwenyi mwakakungulula vatu jenyi vamuwangana waYuta wamiyachi yivali, navamuwangana waIsalele wamiyachi 10. Kaha mwakavawanyisa hamwe kupwa “muyachi umwe” kwijiva nge ali nakulingisa “vitondo” vivali, ‘kupwa chitondo chimwe’ mulivoko lyenyi. (Ezeke. 37:15-23) Kalunga ateselemo upolofweto kana hakuwanyisa muyachi waIsalele nakuvaneha muLifuchi lyaLushiko mu 537 B.C.E. * Oloze kulinunga kana chemanyinyineko kulinunga chivene chize nachikapwako kulutwe. Omu Yehova alingile hanashiki lyehi vyakununga hamwe vaIsalele, alwezele Ezekele upolofweto wakusolola omu Muka-Kuyula wakulutwe mwakalingisa kulemesa chamuchano chikatande hamavu hosena, nakulingisa nawa vatu vakalinunge hamwe haya myaka yosena.

24. Yehova alumbunwine ngachilihi Muka-kuyula wauMeshiya, kaha chiyulo chenyi nachikapwa ngachilihi?

 ²⁴ Tutalenu omu wahanjika upolofweto kana. (Tangenu Ezekele 37:24-28.) Yehova avulukile cheka Muka-kuyula wauMeshiya ngwenyi, “ngamba yami Ndavichi,” “kafunga umwe” kaha nawa “mwata.” Yehova avulukile nawa ou vashika ngwenyi “mwangana.” (Ezeke. 37:22) Uno chiyulo chenyi nachikapwa ngachilihi? Nachikapwa chahaya myaka yosena. Mazu akwamba ngwavo “haya myaka yosena,” asolola nge ou Mwangana mwakakisula vatu haya myaka yosena. * Kaha muchiyulo chenyi vatu navakapwa vakulinunga. Vatu vakulyononona mwakayula ou “mwangana” navakakavangizanga ‘mazu enyi akuyula,’ kaha ‘navakatwamanga hamwe mulifuchi.’ Chiyulo chenyi nachikalingisa vatu vaze mwakayula vakapandame kuli Yehova Kalunga. Yehova mwakalishika “lushiko lwakuunda” navatu kana. Kaha Yehova mwakapwa Kalunga kavo, kaha vakiko navakapwanga vatu jenyi. Chihela chenyi chajila nachikapwa ‘muli vakiko haya myaka yosena.’

25. Uno upolofweto wakuvuluka Mwangana wauMeshiya unatesamo ngachilihi?

²⁵ Kutesamo chaupolofweto kana. Mu 1919, vaka-Kulishitu vawavisa vavawanyishile hamwe nakuvatwaminyina kuli “kafunga” kavo, Mwangana wauMeshiya, Yesu Kulishitu. Kufumaho “liyongomena lyalinene” lyakufuma “kumafuchi osena, nakumiyachi yosena, nakuvatu veka naveka vosena, nakumalimi osena” lyalinungile hamwe navaka-Kulishitu vawavisa. (Kuso. 7:9) Vosena vanapu jino “utanga umwe, nakafunga umwe.” (Yowa. 10:16) Numba vapwa nalutalililo lwamwilu chipwe lwahamavu, vosena veji  kukavangizanga mazu aYehova akuyula chipwe ngwetu jishimbi jenyi. Ngocho valinunga hamwe navandumbwavo mupalachise yakushipilitu mukaye kosena. Yehova navakafwe vatwame mukuunda, nakuvaneha mukulemesa chamuchano chize chapwa chihela chenyi chajila. Yehova ikiye Kalunga kavo, kaha veji kuwahililanga chikuma hakumuzachila oholyapwa nahaya myaka yosena.

26. Vyuma muka mwatela kulinga mangana mukundwize kulinunga chize chatwama mupalachise yakushipilitu?

²⁶ Chishina natulinangula kuupolofweto kana. Twatokwa chikuma kulinunga hamwe navandumbwetu mukaye kosena nakulemesa Yehova mujila yamuchano. Oloze tuvosena twatela kuzata nangolo mangana tupwenga lika vakulinunga. Shikaho, tuvosena tuzatenu nangolo mangana tupwenga nalufwelelo lwolumwe navilinga vyovimwe. (Koli. 1, 1:10) Nge natulinga ngocho, kaha natulyanga kulya chochimwe chakushipilitu, nakukavangiza jishimbi jojimwe jamuMbimbiliya, nakuzata mulimo woumwe waulemu wakwambulula mujimbu waWangana nakutunga tumbaji. Chuma chachilemu nachitukafwa tulinunge shina zangi. Shikaho nge natusololanga zangi, nakeke, nakutetela, nakukonekelanga vakwetu, kaha natupwa vakulinunga. Mbimbiliya yamba ngwayo: “Zangi . . . yeji kununganga vatu hamwe mujila yakukupuka.”—Kolo. 3:12-14; Koli. 1, 13:4-7.

27. (a) Mweji kwivwanga ngachilihi haupolofweto wakuvuluka Meshiya vasoneka mumukanda waEzekele? (b) Vyuma muka natukashimutwila mutupetulu navakavangizaho?

²⁷ Twawahilila chikuma hakutachikiza upolofweto wakuvuluka Meshiya uze vasoneka mumukanda waEzekele. Nge natutanganga nakushinganyeka haupolofweto kana, kaha natutachikiza ngwetu Mwangana wetu Yesu Kulishitu asaka tumufwelele, ikiye atwama nalisesa lwakuyula, ikiye eji kutufunganga mujila yamwaza, kaha mwatukafwa tupwenga vakulinunga haya myaka yosena. Twatokwa chikuma hakutuyula kuli Mwangana wauMeshiya. Twatela kwanuka ngwetu ou upolofweto wakuvuluka Meshiya wakundwiza chihande chakukindulwisa kulemesa chamuchano vavuluka mumukanda waEzekele. Yehova azachisa Yesu mangana akungulule vatu nakuvaneha mukulemesa chamuchano. (Ezeke. 20:41) Mutupetulu navakavangizaho, natukashimutwila hachihande chakukindulwisa kulemesa chamuchano nomu vachilumbununa mumukanda waEzekele.