1-3. Hadia mbörö wa abu dödö Hezekieli, ba hadia nisurania aefa daʼö?

ME LUO daʼö önö fakhe no teʼoloiʼö * Hezekieli ba mbanua saröu si hauga ngaotu kilometer moroi ba Yehuda, banua si tumbu ia. Abu sibai dödönia woʼangeragö famatörö salua ba Yehuda. Iʼotarai ba waʼide-ide, no iʼila wa tefalali-lali ndra samatörö ba Yehuda.

² No ara mamatörö Razo Yosia fatua lö si tumbu nasa Hezekieli. Tatu omuso sibai dödö Hezekieli börö me mofozu Yosia ba wangohori adu irege tebohouni wamosumange satulö ba Yehuda. (2 Ng. 34:1-8) Hizaʼi, lö anau gölö nifalua Yosia andrö börö me ato razo sanömba adu me no aefa mamatörö ia. Lua-luania, itugu lö sökhi wamatira hegöi amuatara. Hadia so wanötönara? So!

³ Iʼogunaʼö ndra samaʼeleʼö khönia Yehowa ba wanura famaʼeleʼö soʼamakhaita ba dötönafö. Famaʼeleʼö si oföna manandrösa khö Mesia. Börö me Kubalo ia ba Samatörö, ifangawuli dania wamosumange satulö sagötö faʼara ba ihaogö wondrorogö biri-biri Yehowa. Datafahaʼö ita ba zi öfa ngawalö wamaʼeleʼö  sanandrösa khö Mesia nisura Hezekieli, börö me moʼamakhaita nösinia khöda ba zi so miföna.

4. Hadia nifaʼeleʼö Hezekieli, hizaʼi hadia niwaʼö Yehowa khönia fatua lö ifalua daʼö?

⁴ Te me döfi 612 SM, ifuli zui fahuhuo Yehowa khö Hezekieli. Mamaʼeleʼö Hezekieli sanandrösa ba wamatörö Mesia ba moguna sibai enaʼö taʼodaligö Wamatörönia. Hizaʼi fatua lö daʼö, ifarou Hezekieli Yehowa ba wanutunö dahö-dahö sanandrösa khö ndra samatörö Yehuda si no faröi. Dahö-dahö göi andre zangoromaʼö hadia mbörö wa moguna tohare Mesia, Samatörö satulö.​—Hez. 17:1, 2.

5. Tutunö dahö-dahö nibeʼe Hezekieli.

⁵ Baso Hezekieli 17:3-10. Daʼa dahö-dahönia: So ”moyo sebua” samatö badö-badö geu eresi ba ibeʼe daʼö ”ba mbanua niha sogale”. Aefa daʼö, ihalö ”mato hauga ngawua danömö zinanö” ba itanö ba danö satabö sinanö ba ”zinga nidanö sabölö-bölö”. Moliwiö danömö daʼö ba tobali ”tanömö nagu sanana ba danö”. Aefa daʼö, me tohare ”moyo sebua tanö böʼö”, ”iʼanemaiʼö ifanana waʼania tanömö nagu daʼö ba gamaudu” wofo andrö. Omasi danömö andrö na ifazawa ia moyo ba nahia tanö böʼö ba zoya idanö. Daʼa zi lö omasi Yehowa. Iwaʼö Yehowa wa hasambalö mudöni danömö nagu andrö irugi ba waʼania ba ’sindruhu-ndruhu oköli’.

6. Tutunö geluaha dahö-dahö andrö.

⁶ Hadia geluaha dahö-dahö andrö? (Baso Hezekieli 17:11-15.) Me 617 SM, ifaʼuʼu Yeruzalema Nebukanesa razo Mbabilona (”moyo sebua” si oföna). Iheta dadaoma Yoyakhi razo Yehuda (ʼbadö-badö ndraha geuʼ) ba iʼohe daʼö ba Mbabilona (ʼbanua niha sogaleʼ). Aefa daʼö ifataro Zedekia (sambua moroi ba ”danömö zinanö ba mbanua daʼö”, yaʼia ngaʼötö razo) enaʼö tobali razo niha Yehuda ba Yeruzalema. No fahölu Zedekia ba döi Lowalangi wa lö faröi ia tobali razo barö wamatörö Nebukanesa. (2 Ng. 36:13) Hizaʼi, lö ifalua hölunia andrö. Mamadaö ia ba Mbabilona ba iʼandrö wanolo khö ndra saradadu moroi khö Waraʼo Miserai (”moyo sebua” si dua). Zaya-zaya gölö fefu daʼö. Lö omasi Yehowa khö Zedekia börö me faröi ia ba isawö hölunia. (Hez. 17:16-21) Ba gafuriata, lakalaisi Zedekia, lakuru ia ba Mbabilona ba mate ia ba daʼö.​—Yer. 52:6-11.

7. Hadia wamahaʼönia khöda moroi ba dahö-dahö andrö?

⁷ Hadia wamahaʼö khöda moroi ba dahö-dahö andrö? Si oföna, dozi ita samalua famosumange satulö, moguna tafalua hadia zi no tawaʼö. Imane Yesu, ”Na mohedeʼö ’Yaʼia’ na yaʼia, ’Tenga’ na tenga.” (Mat. 5:37) Tenga si famai-mai na fahölu ita föna Lowalangi ba wangumaʼö sindruhu, duma-dumania na laʼohe ita föna ndra sanguhuku. Si dua, moguna  mangelama ita ba wotatugöi haniha nifaduhusida tödö. Ifangelama ita Sura Niʼamoniʼö, ”Böi faduhusi tödö ndra samatörö mazui niha si tebai mameʼe fangorifi.”​—Si. 146:3.

8-10. Hewisa Yehowa woʼamaedolagönia Mesia si tobali Samatörö, ba hewisa waʼalua wamaʼeleʼö daʼö? (Faigi göi kotak ”Famaʼeleʼö Sanandrösa khö Mesia​—Eu Eresi Fondrege zi Sökhi”.)

⁸ Sindruhunia, so sambua wamatörö si tola mufaduhusi tödö ba muʼodaligö. Me no aefa ibeʼe dahö-dahö sanandrösa ba danömö nifawuʼa, itohugö dahö-dahönia Yehowa ba woʼamaedolagö Mesia si tobali Samatörö.

⁹ Hadia wamaʼeleʼönia? (Baso Hezekieli 17:22-24.) Ba zi sakali daʼa, tenga saʼae moyo sebua zamalua daʼö, hizaʼi Yehowa samösa. Idöni dania mbadö-badö ’moroi ba mbutelai fondrege zalawa ba geu eresi salawa ba itanö ba zuzu hili fondrege zalawa’. Badö-badö daʼa tobali ia ”eu eresi fondrege zi sökhi”, ba molombase ”ngawalö wofo” ba lumö ndrahania ba toröi ira ba daʼö. Aefa daʼö ”fefu geu si so ba mbenua” dania aboto ba dödöra wa ha Yehowa zamatumbu liwiö tobali eu eresi fondrege zi sökhi.

¹⁰ Hewisa waʼaluania? Amaedola no idöni Nononia Yesu Keriso andrö Yehowa moroi ba ngaʼötö Razo Dawido (ʼeu eresi salawaʼ) ba itanö ba Hili Ziona ba zorugo (”zuzu hili fondrege zalawa”). (Si. 2:6; Yer. 23:5; Fam. 14:1) Daʼö mbörö wa iʼalawaʼö Yesu andrö Yehowa ba ibeʼe khönia ”dadaoma duania Dawido”, hewaʼae ba wamaigi zi faʼudu khönia yaʼia andrö ”niha fondrege zi numana”. (Dan. 4:17; Luk 1:32, 33) Simane eu eresi fondrege zi sökhi, Razo Mesia mazui Yesu Keriso, mamatörö dania ia ba zorugo hegöi ba gulidanö ba ifahowuʼö fefu nono mbanuania. Daʼa Zamatörö si tola taʼodaligö. Barö Wamatörönia dania ’lö ametaʼuö si göna niha soloʼö yaʼia, ba lö ataʼu ira na so wamakao’.​—Amd. 1:33.

11. Hadia wamahaʼö sabölö moguna nisöndrada moroi ba wamaʼeleʼö sanandrösa ba ”liwiö sawuyu-wuyu” hegöi ”eu eresi fondrege zi sökhi”?

¹¹ Hadia wamahaʼönia? Me no aefa mututunö wamaʼeleʼö sadöni dödö sanandrösa ba ’liwiö sawuyu-wuyu’ si tobali ”eu eresi fondrege zi sökhi” andre, tola tabeʼe wanema li ba zinofu daʼa: Haniha dania niʼodaligöda? Fondrege zi bodo na so zangodaligö famatörö niha mazui faʼabölö ndra saradadu. Hizaʼi, no fondrege waʼatua-tua na taʼodaligö Razo Mesia, Yesu Keriso. Famatörönia moroi ba zorugo daʼö wanötöna saro ba niha gulidanö.​—Fam. 11:15.

12. Hewisa wangoromaʼö Yehowa wa lö olifu ia mbuʼusa linia khö Dawido?

¹² Moroi ba nitutunö Lowalangi sanandrösa ba dahö-dahö andrö, aboto ba dödö Hezekieli wa no faröi Zedekia, razo moroi ba ngaʼötö Dawido, ba teʼoloiʼö ia ba Mbabilona. Te mangera-ngera zamaʼeleʼö andre, ’Hadia tenga no ifabuʼu Lowalangi khö Dawido wa so samösa dania ba ngaʼötönia zi tobali  razo sagötö faʼara?’ (2 Sa. 7:12, 16) Hewaʼae simane daʼö wangera-ngera Hezekieli, lö ara aefa daʼö itema wanema linia me ifuli mohede khönia Yehowa te me döfi 611 SM. (Hez. 20:2) Me luo daʼö, no arakhagö fitu fakhe teʼoloiʼö Hezekieli ba lö si tebulö mamatörö Zedekia ba Yehuda. Ifatenge Hezekieli Yehowa ba wamaʼema famaʼeleʼö tanö böʼö sanandrösa khö Mesia, sangoromaʼö wa lö olifu Lowalangi mbuʼusa linia khö Dawido. Famaʼeleʼö daʼa zangoromaʼö wa Mesia andrö zindruhu zokhö börö me yaʼia ngaʼötö Dawido.

13, 14. Tutunö wamaʼeleʼö si so ba Hezekieli 21:25-27, ba hewisa waʼaluania?

¹³ Hadia wamaʼeleʼönia? (Baso Hezekieli 21:25-27.) Iʼogunaʼö Hezekieli andrö Yehowa ba wahuhuosa khö ”zondröniaʼö iraono Gizaraʼeli si lö sökhi”, si lö ara tö tehuku. Iwaʼö Yehowa wa tehalö dania moroi khönia ”mböbö högö” ba ’takula’ zondröniaʼö andrö (eluahania famatörönia). Aefa daʼö, teʼalawaʼö dania zamatörö ’side-ide’ ba tehöndrögö zamatörö ’si no alawa’. Lö tebulö mamatörö zondröniaʼö niʼalawaʼö andrö, hizaʼi ha ofeta ”tohare zindruhu zokhö”. Aefa daʼö, awena dania ibeʼe khönia Wamatörö andrö Yehowa.

 ¹⁴ Hewisa waʼaluania? Tedudugö Yeruzalema me 607 SM ba tehöndrögö wamatörö Yehuda ’si no alawa’ si so ba Yeruzalema. Idudugö mbanua daʼö Babilona, ba iheta dadaoma waʼarazo khö Zedekia ba laʼoloiʼö ia. Iʼotarai daʼö, lö hadöi ngaʼötö Dawido si tobali razo ba Yeruzalema. Andrö, teʼalawaʼö zamatörö ’side-ide’ moroi ba soi böʼö mazui mamatörö ia ba gulidanö ba zi lö arara. Aefa daʼö me 1914, yaʼia me ifataro Yesu Keriso Yehowa tobali Razo, awai saʼae ”ginötö si no mutatugöi ba soi böʼö”. (Luk. 21:24) Börö me Yesu andrö ngaʼötö Dawido, ”yaʼia zindruhu zokhö” ba wangokhögö Famatörö Mesia. * (1 Mo. 49:10) Me no ifataro Yesu, ba daʼö oroma wa ifalua mbuʼusa linia Yehowa khö Dawido ba wombaliʼö ngaʼötönia tobali Razo sagötö faʼara.​—Luk. 1:32, 33.

15. Hana wa afönu waʼafaduhu dödöda khö Razo sotöi Yesu Keriso?

¹⁵ Hadia wamahaʼönia khöda? Afönu waʼafaduhu dödöda khö Yesu Keriso si tobali Razo. Hadia mbörö? Wa tola mamatörö niha ba gulidanö andre börö me niha zamili yaʼia mazui börö me no ikalaisi zamatörö fatua lö mamatörö ia. Hizaʼi, Yehowa  zamili Yesu ba ’tebeʼe khönia wamatörö’, börö me sinangea itema daʼö. (Dan. 7:13, 14) Tatu faduhu dödöda khö Razo nifili Yehowa!

16. Hewisa dödö Yehowa ba nono mbiri-birinia, hizaʼi hewisa ndra ”kubalo ndraono Gizaraʼeli” ba götö Hezekieli ba hadia nifaluara?

¹⁶ Ha Yehowa Gubalo Fondrege zi Sökhi, iʼameʼegö tödö mbiri-birinia, yaʼia daʼö ono mbanuania ba gulidanö. (Si. 100:3) No ifaduhusi tödö nono mbiri-birinia khö ndra kubalo si so ba gulidanö, hizaʼi inehe-nehegö hewisa ndra kubalo andrö ba wamatörö ono mbiri-birinia. Khalaigö atö hewisa dödö Yehowa khö ndra ”kubalo ndraono Gizaraʼeli” si lö faʼaila ba götö Hezekieli. Lö sökhi wamatöröra ba lö khöra faʼahakhö dödö. Börö gamuatara andrö, ato nono mbiri-biri si göna famakao hegöi sondröi famosumange satulö.​— Hez. 34:1-6.

17. Hewisa Yehowa ba wangefaʼö biri-birinia?

¹⁷ Hadia dania nifalua Yehowa? Imane sanandrösa khö ndra samatörö si lö sökhi ba ndraono Gizaraʼeli, ”Khöra usugi.” Aefa daʼö fawuʼu li ia, ”Uʼefaʼö mbiri-birigu.” (Hez. 34:10) Hasambalö itörö zi no ifabuʼu Yehowa. (Yos. 21:45) Me 607 SM, iʼogunaʼö ndra saradadu Mbabilona ba wangefaʼö biri-birinia moroi khö ndra kubalo sangalui tana khöra andrö. Ba 70 fakhe aefa daʼö, iʼefaʼö nono mbanuania moroi ba Mbabilona ba ifuli iʼohe ira ba danö si tumbu yaʼira enaʼö tola labohouni wamosumange satulö ba daʼö. Hizaʼi, lö faʼabölöra. Sagötö ba zi hauga abad, lö tebulö so ira barö wamatörö niha gulidanö ”irugi inötö si no mutatugöi ba soi böʼö”.​—Luk. 21:24.

18, 19. Hadia wamaʼeleʼö nifaʼema Hezekieli me döfi 606 SM? (Faigi gambara ba wamobörö wamahaʼö.)

¹⁸ Ba zilalö, me 606 SM, mato döfi me no tedudugö Yeruzalema, ba ngafulu fakhe fatua lö teʼefaʼö ndraono Gizaraʼeli moroi ba Mbabilona, iʼogunaʼö Hezekieli Yehowa ba wamaʼeleʼö hadia dania nifalua Mesia si tobali Samatörö ba wokubaloi biri-biri Yehowa. Famaʼeleʼö daʼa zangoromaʼö wa Yehowa Gubalo Fondrege zi Sökhi, soʼameʼegö tödö ono mbiri-birinia ba omasi ia na lasöndra waʼohahau dödö sagötö faʼara.

¹⁹ Hadia wamaʼeleʼönia? (Baso Hezekieli 34:22-24.) Lowalangi dania ’zamataro khöra samösa gubalo’ ifotöi ia ”enonigu Dawido”. Ngawua wehede ”samösa gubalo” ba ”enonigu”, tenga ’ira enonigu’, eluahania Samatörö nifabuʼu andre lö ifuli itohugö wamatörö ndra razo-razo ngaʼötö Dawido, hizaʼi yaʼia zi lö tebulö wangokhögö dadaoma waʼarazo Dawido. Börö me yaʼia Gubalo ba Samatörö, yaʼia göi zameʼe gö nono mbiri-biri Lowalangi ba ”yaʼia zondröniaʼö yaʼira”. No ”fawuʼu li khöra [Yehowa] ba waʼatulö”. Ba ’tefaduwa khöra howu-howu simane teu’. Lasöndra waʼahono dödö, faʼafahöna ba faʼomuso  dödö. Tola fahuwu ira ba nawöra niha hegöi ba gurifö!​—Hez. 34:25-28.

20, 21. (a) Hewisa waʼalua zi no tefaʼeleʼö sanandrösa khö ’genonigu Dawido’? (b) Hewisa wehede Hezekieli sanandrösa ba ’mbuʼusa li ba waʼatulö’ alua ia ba zi so miföna?

²⁰ Hewisa waʼaluania? Me ifotöi Zamatörö andre ”enonigu Dawido”, sindruhunia khö Yesu ifanandrösa wamaʼeleʼö daʼa Lowalangi, ngaʼötö Dawido zindruhu zokhö. (Si. 89:35, 36) Me so Yesu ba gulidanö ba daʼö oroma wa ’kubalo si sökhi ia’ ba ’itehegö nosonia salahi mbiri-birinia’. (Yoh. 10:14, 15) Iadaʼa ba zorugo so ia, ba tobali göi ia Kubalo si sökhi. (Heb. 13:20) Me 1914, no ifataro ia Lowalangi tobali Razo ba tebeʼe khönia halöwö ba wokubaloi hegöi ba wameʼe gö mbiri-biri Lowalangi si so ba gulidanö. Lö ara aefa daʼö, me döfi 1919 Razo si bohou andre ifataro göi ”zawuyu si lö faröi ba satua-tua” ba wameʼe gö ndra ”sohalöwö ba nomonia”, yaʼia daʼö samosumange Lowalangi si lö faröi ba sanötöna faʼauri ba zorugo hegöi ba gulidanö. (Mat. 24:45-47) Laʼoʼö fefu wanuturu lala ira sawuyu si lö faröi andre moroi khö Keriso ba lö laböhöli ba wangehenaigö ö wamati ba nono mbiri-biri Lowalangi. Buania, teʼasogö waʼatulö ba faʼahono dödö ba waradaiso wamati si tedou faʼasökhi.

²¹ Hewisa waʼalua wehede Hezekieli ba zi so miföna sanandrösa ba ’mbuʼusa li ba waʼatulö’ hegöi ’fanuwagö howu-howu’? Ba gulidanö si bohou dania, ono mbanua Yehowa samalua famosumange satulö ba gulidanö, sindruhu-ndruhu latema howu-howu moroi ba ’mbuʼusa li ba waʼatulö’ andrö. Na tobali faradaiso gulidanö andre maʼasagörö, ono mbanua Lowalangi si lö faröi lö saʼae larasoi waʼataʼu börö wasuwöta, faʼalösökhi, faʼolofo, fökhö mazui urifö samuʼi. (Yes. 11:6-9; 35:5, 6; 65:21-23) Hadia lö omuso dödöu ba wanöndra faʼauri si lö aetu ba gulidanö dania na teʼosambuaʼö nono mbanua Lowalangi ba toröi ira si fao faʼohahau dödö ba si lö ametaʼuö?​—Hez. 34:28.

22. Hewisa dödö Yesu ba nono mbiri-biri Lowalangi, ba hewisa ndra satua sokubaloi woloʼö yaʼia?

²² Hadia wamahaʼönia? Simane Amania, omasi sibai Yesu ba iʼameʼegö tödö mbiri-biri Lowalangi enaʼö ohahau dödöra. Razo hegöi Kubalo daʼa, itatugöi enaʼö lö faʼambö ira ba gö wamati ba larasoi waʼatulö hegöi faʼahono dödö ba waradaiso wamati. Tatu tasöndra waʼahono dödö me simane daʼö Zamatörö yaʼita! Moguna göi lafalua zimane daʼö ira satua sokubaloi. Lakubaloi mbiri-biri ”si fao faʼaoha gölö” ba ”faʼowölö-ölö”, ba tobali ira duma-duma. (1 Fe. 5:2, 3) Tatu manö lö omasi ndra satua sokubaloi na lö sökhi wamatöröra biri-biri Yehowa. Törö tödöu wehede Yehowa sanandrösa khö ndra kubalo sagamuʼi ba götö Hezekieli: ”Khöra usugi.” (Hez. 34:10)  Kubalo Fondrege zi Sökhi andre hegöi Ononia, lahaogö wamaigi-maigi hewisa wamatöröra ono mbiri-biri.

23. Hadia mbuʼusa li Yehowa sanandrösa ba soi Gizaraʼeli, ba hewisa wamaluania daʼö?

²³ Omasi Yehowa na hasara dödö nono mbanuania ba wamosumange yaʼia. Ba zi sambua famaʼeleʼö ba wamohouni, ifabuʼu Lowalangi wa iʼowuloi nono mbanuania. Iʼowuloi ösa niha moroi ba zi dua mado ba Yehuda hegöi moroi ba zi fulu mado ndraono Gizaraʼeli tobali ”sambua soi ira”, hulö na iʼorodugö ziʼo si dua rozi enaʼö ”hatö sara” ba dangania. (Hez. 37:15-23) Alua wamaʼeleʼö andrö me döfi 537 SM, ba ginötö ifangawuli ndraono Gizaraʼeli si no iʼosambuaʼö Lowalangi ba Danö Amabuʼula. * Hizaʼi, fangosambuaʼö simane daʼö ha duma-duma side-ide moroi ba wahasara dödö salua dania ba zi so miföna sagötö faʼara. Me no aefa fawuʼu li ia ba wangosambuaʼö iraono Gizaraʼeli, ibeʼe Yehowa wamaʼeleʼö khö Hezekieli hewisa Zamatörö si no mufabuʼu andrö dania ba wangosambuaʼö ono mbanua Lowalangi ba zi sagörö ulidanö sagötö faʼara.

24. Hadia manö döi nibeʼe Yehowa khö Mesia, ba hewisa dania wamatörö Razo andrö?

²⁴ Hadia wamaʼeleʼö andrö? (Baso Hezekieli 37:24-28.) Ifuli zui iwaʼö Yehowa wa Mesia andrö Samatörö si no mufabuʼu,  mufotöi göi ia ”enonigu Dawido”, ’samösa sokubaloi’ ba ’sondröniaʼö’. Aefa daʼö, ibeʼe nasa döi böʼö yaʼia daʼö ”razo”. (Hez. 37:22) Hewisa wamatörö Razo andrö? Mamatörö ia sagötö faʼara. Ngawua wehede ”sagötö faʼara” zangoromaʼö wa lö tebulö so howu-howu moroi ba wamatörönia. * Famatörönia dania zangaʼasogö fahasara dödö. Barö wamatörö ’zi samösa razo’ andre, ono mbanuania si lö faröi hasambalö laʼoʼö ”gangetula huku” si fagölö ba ha sambua nahiara waʼatoröi. Itugu ahatö nono mbanuania khö Lowalangi Yehowa. Ifazökhi Yehowa khöra ’mbuʼusa li ba waʼatulö’. Tobali Lowalangira dania Yehowa, ba ono mbanuania ira. Baero daʼö, so ba gotaluara ”naha niʼamoniʼö andrö [khö Lowalangi] sagötö faʼara”.

25. Hewisa waʼalua zi no tefaʼeleʼö sanandrösa khö Mesia si tobali Razo?

²⁵ Hewisa waʼaluania? Me 1919, iʼosambuaʼö niha nibayoini si lö faröi andrö si ’samösa kubalo’ yaʼia daʼö Yesu Keriso, Mesia si tobali Razo. Ba gafuriata, ”ngawawa sato” moroi ba ”ngawalö soi, mado, banua, hegöi li” teʼosambuaʼö ira khö ndra talifusöra si no tebayoini. (Fam. 7:9) Yaʼira andrö ”ha sambawa nikubaloi ba ha samösa gubalo”. (Yoh. 10:16) Gofu hezo auri ira he ba zorugo mazui ba gulidanö, dozi ira laʼoʼö goroisa Yehowa. Buania, toröi ira ba waradaiso wamati ba larasoi  waʼafatalifusöta ba zi sagörö ulidanö. Ibeʼe Yehowa khöra waʼomuso dödö. So ba gotaluara wamosumange satulö si no amaedola naha niʼamoniʼö. Yehowa zi tobali Lowalangira ba omuso dödöra ba wamosumange yaʼia götö-götö waʼara!

26. Hadia nifaluamö enaʼö aro wahasara dödö ba waradaiso wamati?

²⁶ Hadia wamahaʼönia khöda? No sambua töi sebua khöda börö me teʼosambuaʼö ita ba waʼafatalifusöta ba zi sagörö ulidanö ba wamalua famosumange satulö khö Yehowa. Hizaʼi, moʼömö göi ita ba wangaʼaroʼö faʼafatalifusöta andre. Moguna so khöda wahasara dödö ba tafaduhusi tödö wamahaʼö si fagölö. (1 Ko. 1:10) Börö daʼö, terou dödöda ba wemanga gö wamati si fagölö, taʼoʼö goi-goi Zura Niʼamoniʼö ba tafalua halöwö si tohude yaʼia daʼö ba wanuriaigö Famatörö Lowalangi hegöi ba wombaliʼö nifahaʼö. Hewaʼae simanö, faʼomasi zi tola mangosambuaʼö yaʼita. Tola aro wahasara dödö ba gotaluada na lö taböhöli wamalua hegöi ba wangoromaʼö faʼomasi, duma-dumania tatöfaigö ba dödöda hadia nirasoi niha böʼö, taforomaʼö waʼahakhö dödö hegöi fangefaʼö sala. Imane Sura Niʼamoniʼö, ”Faʼomasi andrö wamaböbö soʼahonoa.”​—Kol. 3:12-14; 1 Ko. 13:4-7.

27. (a) Hewisa dödöu sanandrösa ba wamaʼeleʼö khö Mesia ba mbuku Hezekieli? (b) Hadia nifatunöda ba faza aefa daʼa?

²⁷ Taʼandrö sibai saohagölö börö me taʼila wamaʼeleʼö sanandrösa khö Mesia moroi ba mbuku Hezekieli! Na tabaso ba taʼangerönusi ia, awena aboto ba dödöda wa tola muʼodaligö Razo niʼomasiʼöda yaʼia daʼö Yesu Keriso, ba no sindruhu zokhö ia ba ikubaloi ita si fao faʼomasi ba iʼosambuaʼö ita sagötö faʼara. No töi si sökhi khöda me tobali ita ono mbanuania! Törö tödöu, famaʼeleʼö sanandrösa khö Mesia no faosatö moroi ba duho famohouni nitutunö ba mbuku Hezekieli. Iʼogunaʼö Yesu andrö Yehowa ba wangowuloi ono mbanuania hegöi ba wamohouni famosumange satulö ba gotaluara. (Hez. 20:41) Ba faza aefa daʼa, taʼila dania hewisa mbuku Hezekieli ba wanutunö tuho sadöni dödöda andre.