1-3. Fu san ede Esekièl e sari èn san Yehovah e meki a skrifi?

 ESEKIÈL de siksi yari kaba leki katiboman na ini Babilon. a A profeiti e sari te a e prakseri fa den kownu e tiri Yuda, a kondre fu en. Difrenti kownu tiri Yuda na ini a ten fu Esekièl.

² Esekièl gebore na ini a ten di Kownu Yosia ben e tiri. A kownu disi ben e dini Yehovah nanga en heri ati èn Esekièl ben musu fu breiti di a yere taki Yosia pori den popki di sma ben e anbegi èn taki a seti a tru anbegi baka na ini Yuda (2 Kron. 34:1-8). Ma sani no tan so fu di furu fu den kownu di ben e tiri baka Yosia tan dini falsi gado. A fasi fa den kownu disi ben e tiri a kondre, meki taki moro nanga moro sma bigin anbegi falsi gado èn den bigin du moro ogri. A situwâsi ben o tan so? Nôno!

³ Yehovah meki a profeiti skrifi wan tu profeititori di abi fu du nanga a Mesias di ben o de Tiriman nanga Skapuman. A Mesias ben o seti a tru anbegi èn a ben o sorgu taki a tan fu têgo. Boiti dati, a ben o sorgu bun gi den skapu fu Yehovah.  A bun fu studeri den profeititori disi fu di den abi fu du nanga a tamara fu wi. Meki wi go luku den fo profeititori di Esekièl skrifi èn di e taki fu a Mesias.

4. Sortu profeititori Esekièl ben musu fruteri a pipel èn san a ben musu du fosi a fruteri den a profeititori?

⁴ Na ini 612 Fosi Krestes, Yehovah fruteri Esekièl wan profeititori di ben sori taki a Mesias ben o tiri heri grontapu. A ben sori tu taki a prenspari fu frutrow tapu a Kownukondre fu en. Fosi Yehovah meki Esekièl skrifi a profeititori, a meki a fruteri den Israelsma di ben de katiboman wan agersitori. Na agersitori disi ben o sori taki den tiriman fu Yuda no gi yesi na Yehovah èn taki den ben abi a Mesias Kownu fanowdu di ben o tiri na wan reti fasi.​—Esek. 17:1, 2.

5. Sortu agersitori Esekièl fruteri?

⁵ Leisi Esekièl 17:3-10. Disi na a agersitori: Wan „bigi aka” e broko na ede fu wan sedrebon, dan a e tyari en go prani „na ini wan foto pe bisnisman de”. Na aka e teki „siri fu a kondre”, dan a e sai den na wan gron di bun fu sai siri. A sai den na sei „wan bigi liba”. A siri bigin gro èn a e kon tron „wan moi fatu droifibon”. Baka dati wan tra „bigi aka” e frei kon. A droifibon e „langa den rutu fu en go” na a di fu tu aka fu di a wani taki a tyari en go prani na wan tra presi di lai watra. Yehovah no lobi a sani disi di a droifibon du èn dati meki a e taki dati sma o rutu en puru èn taki a o „drei gowe krinkrin”.

6. Fruteri san na agersitori wani taki.

⁶ San na agersitori wani taki? (Leisi Esekièl 17:11-15.) Na ini 617 Fosi Krestes, Kownu Nebukadnesar (a fosi „bigi aka”) kon feti nanga Yerusalem. A puru Yoyakin („na ede fu a sedrebon”) leki kownu fu Yuda èn a tyari en go na Babilon („wan foto pe bisnisman de”). Nebukadnesar poti Sedekia (wan fu den „siri fu a kondre”) leki kownu na Yerusalem. A nyun Kownu disi fu Yuda ben musu sweri na ini Gado nen taki a ben o du ala san a kownu fu Babilon ben o taigi en (2 Kron. 36:13). Ma Sedekia no hori ensrefi na a sweri di a meki. A opo ensrefi teige Babilon èn a go suku yepi na a kownu fu Egepte (a di fu tu „bigi aka”) nanga a legre fu en. Ma dati no tyari wini kon gi en. Yehovah no ben breiti nanga a sani di Sedekia du (Esek. 17:16-21). Bakaten den puru Sedekia leki kownu èn a dede na ini strafu-oso na Babilon.​—Yer. 52:6-11.

7. San wi kan leri fu na agersitori?

⁷ San wi kan leri fu na agersitori disi? A fosi sani na taki wi leki anbegiman fu Yehovah musu du san wi pramisi. Yesus ben taki: „Te unu taki ’iya’, dan meki a tan iya. Te unu taki ’nôno’,  dan meki a tan nôno” (Mat. 5:37). Efu wi musu sweri na fesi Gado taki wi o taki san tru, fu eksempre na wan krutubangi, dan wi musu si dati leki wan seryusu sani. A di fu tu sani na taki wi musu luku bun tapu suma wi e frutrow. Bijbel e taki: „No poti un frutrow na tapu heihei sma, noso na tapu iniwan libisma, bika den no man frulusu unu.”​—Ps. 146:3.

8-10. San Yehovah meki Esekièl skrifi fu a Mesias Kownu èn fa a profeititori disi kon tru? (Luku sosrefi a faki di nen „Wan profeititori di e taki fu a Mesias​—A bigi sedrebon”.)

⁸ Ma wan tiriman de di wi kan frutrow nanga wi heri ati. Baka di Yehovah fruteri Esekièl na agersitori fu na ede fu a yongu taki, a gebroiki wan srefi sortu agersitori fu taki fu a Mesias Kownu di ben o kon ete.

⁹ San a profeititori e taki? (Leisi Esekièl 17:22-24.) Na ini a profeititori disi na Yehovah srefi o du wan sani, a no den bigi aka. A o broko wan safu pisi „fu na ede fu wan bigi sedrebon”, dan a o prani en „na tapu wan bigi hei bergi”. A taki disi o tron „wan bigi sedrebon” èn „ala sortu fowru” o kon libi na ini a bon disi. „Ala den tra bon na ini a gron” o sabi taki na Yehovah srefi meki a bigi bon disi gro.

¹⁰ Fa a profeititori kon tru? Yehovah teki en Manpikin Yesus Krestes di ben de wan bakapikin fu Kownu David (a „bigi sedrebon”) èn a prani en na hemel na tapu Sion-bergi („wan bigi hei bergi”) (Ps. 2:6; Yer. 23:5; Openb. 14:1). Aladi den feanti fu Yesus ben si en leki a „moro mofinawan fu grontapu”, toku Yehovah hei en èn a gi en „a kownusturu fu en papa David” (Dan. 4:17; Luk. 1:32, 33). Leki wan bigi sedrebon a Mesias Kownu, Yesus Krestes, o tiri heri grontapu komoto fu hemel èn a o tyari blesi kon gi ala sma. En na trutru wan Tiriman di wi kan frutrow. Te Yesus o tiri leki kownu, „sani o waka bun” gi den sma na grontapu di e gi yesi na en èn den ’no o abi fu frede taki ogri o miti den’.​—Odo 1:33.

11. Sortu prenspari sani wi e leri fu a profeititori fu a ’safu pisi fu wan yongu taki’ di tron „wan bigi sedrebon”?

¹¹ San wi kan leri fu a profeititori? Soleki fa wi si, dan a profeititori e taki fu wan „safu pisi” fu wan yongu taki di e tron „wan bigi sedrebon”. A profeititori disi e piki wan prenspari aksi gi wi: Tapu suma wi o frutrow? A de wan don sani fu frutrow tapu libisma regering èn tapu den legre fu den. Efu wi wani taki sani waka bun gi wi, dan wi musu poti ala wi frutrow tapu a Mesias Kownu, Yesus Krestes. A Kownukondre fu en di de na hemel na a wan-enkri regering di man lusu den problema fu libisma.​—Openb. 11:15.

12. Fa Yehovah sori taki a no ben frigiti a frubontu di a ben meki nanga David?

¹² Na agersitori fu den tu aka meki Esekièl frustan taki den ben o puru na ogri kownu Sedekia, wan bakapikin fu David,  èn taki den ben o tyari en go na Babilon leki katiboman. Kande a profeiti ben aksi ensrefi san ben o pasa nanga a frubontu di Gado ben meki nanga David. Gado ben pramisi David taki wan bakapikin fu en ben o tiri leki kownu fu têgo (2 Sam. 7:12, 16). Efu Esekièl ben aksi ensrefi a sani disi, dan a no wakti langa fu kisi wan piki. Na ini a yari 611 Fosi Krestes Yehovah fruteri en wan tra profeititori (Esek. 20:2). Na a ten dati Esekièl ben de seibi yari kaba na ini katibo èn Sedekia ben de kownu ete. A profeititori dati ben taki tu fu a Mesias èn a ben sori taki Gado no ben frigiti a frubontu di a ben meki nanga David. A profeititori ben sori taki a Mesias Kownu ben o abi a reti fu sidon na tapu a kownusturu fu David.

13, 14. Sortu profeititori skrifi na Esekièl 21:25-27, èn fa a kon tru?

¹³ San a profeititori e taki? (Leisi Esekièl 21:25-27.) Yehovah e sori na „ogri tiriman fu Israel” krin fa a e denki fu en èn a e sori en taki a ten doro taki a o kisi strafu. Yehovah e taigi na ogri tiriman taki a musu puru en „tai-ede” nanga en „kownu-ati” (den sani disi ben sori taki a ben de wan  kownu). Baka dati a taki dati den regering di ben lagi ben o kon hei èn taki „den heiwan” ben o kon lagi. Den regering di ben kon hei ben o tiri teleki „a sma kon di abi a reti fu” tron kownu. Yehovah o gi a sma dati a Kownukondre.

¹⁴ Fa a profeititori kon tru? Na ini 607 Fosi Krestes di Yerusalem kisi pori, a kownukondre fu Yuda di ben „hei” ben kon lagi. Den Babilonsma pori a foto, den puru Sedekia leki kownu èn den tyari en gowe leki strafuman. Baka dati nowan bakapikin fu David ben e tiri leki kownu na ini Yerusalem. Dati meki den tiriman fu tra kondre di ben lagi fosi ben kon hei èn den ben tiri grontapu. Fu wan pisi ten Yehovah no ben abi wan kownu di ben e tiri na grontapu. Bijbel e kari a pisi ten disi „a reti ten fu den trakondre sma” (Luk. 21:24). A ten disi ben kon na wan kaba na ini 1914 di Yehovah poti Yesus Krestes leki kownu. Fu di Yesus ben de wan bakapikin fu Kownu David, meki a ben „abi a reti fu kisi” a Mesias Kownukondre (Gen. 49:10). b Sobun, Yehovah du san a pramisi fu di a  poti Yesus, wan bakapikin fu David fu tiri leki kownu fu têgo.​—Luk. 1:32, 33.

15. Fu san ede wi kan frutrow wi Kownu Yesus Krestes?

¹⁵ San wi kan leri fu a profeititori? Wi kan frutrow wi Kownu Yesus Krestes nanga wi heri ati. Fu san ede? Fu di Yesus no de leki den tiriman fu grontapu di libisma poti fu tiri noso di e teki a makti abra. Na Yehovah poti Yesus fu tiri èn a gi en „wan kownukondre” (Dan. 7:13, 14). A de krin taki wi kan frutrow a Kownu di Yehovah srefi poti.

16. Fa Yehovah e si den skapu fu en èn san „den skapuman fu Israel” na ini a ten fu Esekièl ben du nanga a pipel?

¹⁶ Yehovah, wi Moro Bigi Skapuman e broko en ede nanga den skapu fu en, dati na den anbegiman fu en na grontapu (Ps. 100:3). A ben poti sma fu tiri a pipel fu en èn den ben musu de leki skapuman di ben sorgu en pipel. Yehovah ben si san den ben e du nanga en pipel. Sobun, prakseri fa Yehovah ben denki fu „den skapuman fu Israel” na ini a ten fu Esekièl. Den tiriman disi ben pina a pipel èn den ben kwinsi den. A bakapisi ben de taki furu fu den no ben anbegi Yehovah moro.​—Esek. 34:1-6.

17. Fa Yehovah frulusu en pipel?

¹⁷ San Yehovah ben o du? A ben taigi den ogri tiriman fu Israel: ’Mi o puru mi skapu na un anu.’ A ben taki tu: „Mi o frulusu mi skapu” (Esek. 34:10). Ala ten Yehovah e du san a pramisi (Yos. 21:45). Na ini 607 Fosi Krestes, a frulusu en pipel. A gebroiki den Babilonsma fu puru den ogri tiriman disi leki kownu. Seibitenti yari baka dati, a puru en pipel na ini katibo na Babilon èn a tyari den go baka na a kondre fu den fu seti a tru anbegi baka. Ma toku ogri ben kan miti den ete fu di kownu fu tra kondre ben o tan tiri den. Hondrohondro yari langa dati ben o de so.​—Luk. 21:24.

18, 19. Sortu profeititori Esekièl kisi na ini 606 Fosi Krestes? (Luku a prenki na a bigin fu a kapitel.)

¹⁸ Na ini 606 Fosi Krestes, wán yari baka di Yerusalem kisi pori èn omeni tenti yari fosi den Israelsma drai go baka na den kondre, Yehovah meki Esekièl skrifi wan profeititori. A profeititori ben e sori o furu a Moro Bigi Skapuman lobi den skapu fu en. A e leri wi fa a Mesias Kownu o sorgu den skapu fu Yehovah.

¹⁹ San a profeititori e taki? (Leisi Esekièl 34:22-24.) Gado „o poti wán skapuman” di a e kari „mi futuboi David”. Den wortu „wán skapuman” nanga „mi futuboi” e sori taki a no difrenti bakapikin fu David ben o tron kownu, ma wán nomo ben o tiri fu têgo leki kownu. A Kownu disi o sorgu den skapu fu Gado èn a o tron „wan edeman na den mindri”. Yehovah o „meki wan frubontu fu freide” nanga den skapu fu en.  „Den blesi fu [en] o furu leki a watra fu wan bigi alen.” Sani o waka bun gi den èn den no o frede noti. Iya, freide o de na mindri libisma èn freide o de tu na mindri libisma nanga meti.​—Esek. 34:25-28.

20, 21. (a) Fa a profeititori di e taki fu „mi futuboi David” kon tru? (b) Fa den sani di Esekièl taki fu „wan frubontu fu freide” o kon tru na ini a ten di e kon?

²⁰ Fa a profeititori kon tru? Yehovah kari a Kownu disi „mi futuboi David”. Sobun, a ben taki fu Yesus, a bakapikin fu David, di abi a reti fu tiri (Ps. 89:35, 36). Di Yesus ben de na grontapu a sori taki en na „a moro bun skapuman” di gi en libi „gi den skapu” fu en (Yoh. 10:14, 15). Ma now a Skapuman disi de na hemel (Hebr. 13:20). Na ini 1914 Gado poti Yesus leki Kownu èn a gi en a frantwortu fu sorgu den skapu fu Gado na grontapu èn fu gi den leri. Syatu baka dati, na ini 1919 a Kownu disi poti „a koni srafu di de fu frutrow” fu gi „den futuboi” nyanyan. Den futuboi disi na den anbegiman fu Gado di abi a howpu fu libi na hemel noso na grontapu (Mat. 24:45-47). Krestes yepi a srafu fu gi den skapu fu Gado „nyanyan”, noso leri fu Bijbel. A leri disi e yepi den fu libi na ini freide nanga makandra èn fu de mati fu Yehovah.

²¹ Esekièl ben taki fu „wan frubontu fu freide” èn fu blesi di furu leki a watra fu wan bigi alen. Fa a profeititori disi o kon tru na ini a ten di e kon? Na ini a nyun grontapu den anbegiman fu Yehovah o ondrofeni ala den blesi fu a „frubontu fu freide”. Na ini a paradijs na grontapu feti no o de, nowan sma o du ogri, angriten no o de, siki no o de èn ogri meti no o de (Yes. 11:6-9; 35:5, 6; 65:21-23). A no de fu taki dati yu breiti taki yu o man libi fu têgo na ini wan paradijs na grontapu pe den anbegiman fu Gado ’no o frede no wan sani. Nowan sma o meki den frede.’​—Esek. 34:28.

22. Fa Yesus e denki fu den skapu èn fa den owruman kan teki na eksempre fu en?

²² San wi kan leri fu a profeititori? Neleki en Papa, Yesus e broko en ede nanga den skapu. A e sorgu taki den skapu fu en Papa e kisi leri fu Yehovah èn taki den e libi na ini freide nanga makandra. A de wan trowstu gi wi taki wi abi so wan lobi-ati Tiriman! Den brada di Gado poti leki skapuman na ini den gemeente musu sorgu gi den skapu neleki Yesus. Owruman musu luku den skapu „nanga prisiri”, den musu de klariklari fu dini den èn den musu de bun eksempre gi den (1 Petr. 5:2, 3). Noiti wan owruman musu du wan hati sani nanga wan fu den skapu fu Yehovah! Prakseri san Yehovah taigi den ogri-ati skapuman fu Israel na ini a ten fu Esekièl: ’Mi o puru mi skapu na un anu’ (Esek. 34:10). A Moro Bigi Skapuman nanga en Manpikin e luku bun fa den skapuman e libi nanga den skapu fu en.

23. San Yehovah pramisi fu du nanga a pipel Israel èn fa a du dati?

²³ Yehovah wani taki den anbegiman fu en dini en na ini wánfasi. Na ini wan profeititori Gado ben pramisi taki a ben o tyari en pipel kon na wán. Dati na sma fu a tu-lo kownukondre fu Yuda èn sma fu a tin-lo kownukondre fu Israel. Den sma disi ben o tron „wán pipel”. A ben o de neleki Gado tyari tu „tiki” kon na makandra fu tron „wán tiki” na ini en anu (Esek. 37:15-23). A profeititori disi kon tru di Gado tyari en pipel Israel kon na wán na ini a Pramisi Kondre na ini a yari 537 Fosi Krestes. c Ma Yehovah o du wan moro bigi sani na ini a ten di e kon. Baka di a pramisi taki a ben o meki wánfasi de baka na ini Israel, a gi Esekièl wan tra profeititori di e sori fa a Mesias Kownu ben o meki taki wánfasi de na mindri ala den anbegiman fu Yehovah na grontapu fu têgo.

24. Fa Yehovah e kari a Mesias èn fa sani o de te a Mesias o tiri?

²⁴ San a profeititori e taki? (Leisi Esekièl 37:24-28.) Na ini a profeititori disi tu Yehovah e kari a Mesias „mi futuboi David”, „wán skapuman” nanga „edeman”. Ma disi leisi a e kari en „kownu” tu (Esek. 37:22). Fa sani o de te a Kownu disi o tiri? A o tiri fu têgo. Den wortu „fu ala ten” e sori  taki a Kownu disi o blesi libisma fu têgo. d Te Yesus o tiri wánfasi o de. „Wán kownu” o de, ala sma o gi yesi na den srefi ’wèt nanga komando’ èn „den o tan na ini a kondre” na ini wánfasi. Te Yesus o tiri a o yepi sma fu kon krosibei na Yehovah Gado. Yehovah o meki „wan frubontu fu freide” nanga den sma disi. Yehovah o de den Gado èn den o de en pipel. A santa presi fu en o de ’na den mindri fu ala ten’.

25. Fa a profeititori fu a Mesias Kownu kon tru?

²⁵ Fa a profeititori kon tru? Na ini 1919 den salfuwan ben tyari kon na wán na ondro „wán skapuman”, dati na a Mesias Kownu, Yesus Krestes. Bakaten „wan bigi ipi sma” fu „ala kondre, lo, pipel, nanga tongo” kon dini Gado makandra nanga den salfuwan (Openb. 7:9). Makandra den tron „wán ipi di abi wán skapuman” (Yoh. 10:16). Awinsi den abi a howpu fu libi na ini hemel noso na grontapu, den alamala e gi yesi na den wet fu Yehovah. Dati meki den de na ini wan agersi paradijs, den abi wánfasi èn den e libi leki brada nanga sisa na heri grontapu. Fu di Yehovah blesi den, meki den e libi na ini freide nanga makandra èn a santa presi fu en de na den mindri. A santa presi disi e sori taki den e anbegi Gado  na a fasi di a feni bun. Yehovah na den Gado èn fu ala ten den o si en leki wan grani fu anbegi en.

26. Fa yu kan sorgu taki wánfasi de na mindri Gado pipel?

²⁶ San wi kan leri fu a profeititori? A de wan grani taki wi de na ini a tru anbegi, taki wi abi brada nanga sisa na heri grontapu èn taki wánfasi de na wi mindri. Ma wi abi a frantwortu fu sorgu taki wánfasi tan. Sobun, wi alamala musu denki soleki fa Gado e denki èn wi musu tyari wisrefi soleki fa Yehovah wani (1 Kor. 1:10). Dati meki wi alamala e teki a leri di wi e kisi fu na organisâsi fu Yehovah, wi e tyari wisrefi soleki fa wi leri na ini Bijbel, wi alamala e preiki fu a Kownukondre èn wi e yepi sma fu tron disipel. Ma a moro prenspari sani di e yepi wi fu abi wánfasi, na lobi. Te wi e meki muiti fu sori lobi, dan wi e sorgu taki wánfasi de na wi mindri. Wi e firi gi trawan, wi e sori sari-ati èn wi e gi makandra pardon. Bijbel e taki: „Lobi e meki sma kon de wán trutru.”​—Kol. 3:12-14; 1 Kor. 13:4-7.

27. (a) Fa yu feni den profeititori di Esekièl skrifi fu a Mesias? (b) San wi o luku na ini den kapitel di e kon?

²⁷ Wi breiti nanga den profeititori di Esekièl skrifi fu a Mesias! Te wi e leisi den profeititori disi èn te wi e denki dipi fu den, dan wi o si taki wi kan frutrow wi lobi-ati Kownu, Yesus Krestes. Wi o si tu taki a abi a reti fu tiri, taki a e sorgu bun gi wi èn taki a e yepi wi fu abi wánfasi fu têgo. A de wan bigi grani fu saka wisrefi na ondro a Mesias Kownu! A buku Esekièl e sori fa a tru anbegi ben o seti baka. Sobun, den profeititori di Esekièl skrifi fu a Mesias e taki fu a srefi tori disi. Yehovah e gebroiki Yesus fu tyari en pipel kon na wán èn fu dini Yehovah na a yoisti fasi (Esek. 20:41). Na ini den kapitel di e kon wi o si fa a Bijbel buku Esekièl e sori fa a tru anbegi o seti baka.