1-3. Kay ano nga nabibido hi Ezekiel, ngan ano an iginparekord ha iya han Dios?

 IKAUNOM na ka tuig han pagkadistyero ni Ezekiel. * Nabibido hiya ha maraot nga paagi han pagmando ha Juda, an iya hinigugma nga natawohan nga tuna nga ginatos ka kilometro an kahirayo. Pipira na nga hadi an nagmando ha iya panahon.

² Natawo hi Ezekiel ha kabutngaan han paghadi han matinumanon nga hi Josias. Sigurado nga nalipay hiya han iya hinbaroan an kampanya ni Josias nga bungkagon an inukit nga mga imahen ngan ipahiuli an putli nga pagsingba ha Juda. (2 Cron. 34:1-8) Pero temporaryo la nga pagbag-o an resulta han paningkamot ni Josias, kay an kadam-an nga hadi nga sumunod ha iya padayon nga nagbuhat hin idolatriya. Salit ha pagmando hinin magraot nga hadi, nagtikaraot pa gud an espirituwalidad ngan moralidad han nasud. Waray na ba paglaom? May-ada pa!

³ Gin-giyahan ni Jehova an iya matinumanon nga propeta nga igrekord an siyahan han pipira nga tagna mahitungod han Mesias, an tiabot nga Magmarando ngan Paraataman nga magpapahiuli han putli nga pagsingba ha kadayonan ngan mahigugmaon nga mag-aataman  han Iya mga karnero. Usisahon naton ito hin maopay, kay an katumanan hito may epekto ha aton waray kataposan nga kabubuwason. Salit hisgotan naton an upat nga tagna mahitungod han Mesias ha libro han Ezekiel.

4. Ano an igintagna ni Ezekiel, ngan paonan-o ito ginpatikangan ni Jehova?

⁴ Han mga 612 B.C.E., “an pulong ni Jehova” inabot kan Ezekiel, ngan may igintagna hiya nga nagpapakita han lukop han pagmando han Mesias ngan han panginahanglan nga sumarig ha iya Ginhadian. Basi tikangan an tagna, ginsugo ni Jehova hi Ezekiel nga mag-istorya ha iya mga igkasi-distyero hin patigo nga nagpapakita han kawaray-pagtoo han mga magmarando han Juda ngan nagpapabug-at nga ginkikinahanglan an matadong nga Mesianiko nga Magmarando.​—Ezek. 17:1, 2.

5. Ano an sumaryo han patigo?

⁵ Basaha an Ezekiel 17:3-10. Ini an sumaryo han patigo: Ginbanggi hin “daku nga agila” an pinakahitaas nga saringsing han usa nga kahoy nga sedro ngan iginbutang ito ha “syudad han mga negosyante.” Katapos, nagkuha ini hin ‘binhi han tuna’ ngan igintanom ito ha matambok nga uma “ha ligid han abunda nga katubigan.” Tinubo ito ngan nagin “nagkakanap nga tanom nga ubas.” Sunod, inabot an ikaduha nga “daku nga agila.” “Igin-unat gud” han tanom nga ubas an mga gamot hito ngadto ha ikaduha nga agila kay karuyag hito nga maibalhin ha iba nga lugar nga abunda an tubig. Ginkondenar ni Jehova an ginbuhat han tanom nga ubas ngan nagsiring nga gagabuton an mga gamot hito ngan “mauuga gud” ito.

6. Isaysay an kahulogan han patigo.

⁶ Ano an kahulogan han patigo? (Basaha an Ezekiel 17:11-15.) Han 617 B.C.E., ginlikosan ni Hadi Nabucodonosor han Babilonya (an siyahan nga “daku nga agila”) an Jerusalem. Gintangtang niya hi Hadi Jehoiakin han Juda (an “pinakahitaas nga saringsing”) ngan gindara ha Babilonya (“syudad han mga negosyante”). Ginhimo niya hi Zedekias (usa han hadianon nga ‘binhi han tuna’) nga hadi ha Jerusalem. An bag-o nga hadi han Juda ginpasumpa ha ngaran han Dios, salit obligado hiya nga magin maunungon nga sakop nga hadi. (2 Cron. 36:13) Pero waray tumana ni Zedekias an iya panumpa; nagrebelde hiya ha Babilonya ngan sinarig ha pwersa militar han Paraon han Ehipto (an ikaduha nga “daku nga agila”), pero napakyas ito. Ginkondenar ni Jehova an pagkadiri-maunungon ni Zedekias. (Ezek. 17:16-21) Ha urhi, gintangtang hiya ha pagkahadi ngan namatay ha prisohan ha Babilonya.​—Jer. 52:6-11.

7. Ano an aton hibabaroan ha patigo?

⁷ Ano an aton hibabaroan hini nga patigo? Siyahan, sugad nga putli nga mga magsiringba kinahanglan tumanon naton an aton ginsiring. “An iyo ‘Oo’ sadang mangahulogan hin oo, ngan an iyo ‘Diri,’ diri,” siring ni Jesus. (Mat. 5:37) Kon kinahanglan kita manumpa ha  atubangan han Dios nga magyakan han kamatuoran​—pananglitan, kon nagtitestigo ha korte—​ginsiseryoso naton ito. Ikaduha, kinahanglan mag-ikmat kita kon kan kanay kita masarig. An Biblia nagpapahamangno: “Ayaw pagsarig ha mga prinsipe ngan ha anak han tawo, nga diri makakahatag hin katalwasan.”​—Sal. 146:3.

8-10. Paonan-o iginhulagway ni Jehova an tiabot nga Mesianiko nga Magmarando, ngan paonan-o natuman an tagna? (Kitaa liwat an kahon nga “Tagna Mahitungod han Mesias​—An Daku nga Kahoy nga Sedro.”)

⁸ Pero may magmarando nga angay gud naton sarigan. Katapos ig-istorya an patigo mahitungod han saringsing nga iginbalhin, gin-gamit liwat ni Jehova ito nga patigo basi ihulagway an tiabot nga Mesianiko nga Magmarando.

⁹ An ginsisiring han tagna. (Basaha an Ezekiel 17:22-24.) Hini nga higayon, diri na dagku nga agila an magios kondi hi Jehova mismo. Magbabanggi hiya hin mahumok nga saringsing ‘tikang ha pungkay han hitaas nga kahoy nga sedro ngan itatanom ito ha hitaas nga bukid.’ Matubo ito ngan magigin “daku nga kahoy nga sedro” nga mauukyan han “tagsa nga klase han tamsi.” Katapos, an “ngatanan nga kahoy” mahibabaro nga hi Jehova mismo an nagpatubo hiton daku nga kahoy.

¹⁰ An katumanan han tagna. Ginbanggi ni Jehova, siring pa, an iya Anak nga hi Jesu-Kristo tikang ha hadianon nga tulin ni David (an “hitaas nga kahoy nga sedro”) ngan gintanom hiya ha langitnon nga Bukid Zion (“hitaas nga bukid”). (Sal. 2:6; Jer. 23:5; Pah. 14:1) Hito nga paagi, ginkuha ni Jehova an iya Anak, nga gintatagad han iya mga kaaway nga “pinakaubos han mga tawo,” ngan ginpahitaas hiya pinaagi ha paghatag ha iya han “trono ni David nga iya amay.” (Dan. 4:17; Luc. 1:32, 33) Pariho hin daku nga kahoy nga sedro, an Mesianiko nga Hadi nga hi Jesu-Kristo magmamando ha bug-os nga tuna ngan magbibendisyon ha ngatanan niya nga sakop. Ini gud an Magmarando nga angay naton sarigan. Ilarom han pagmando ni Jesus ha Ginhadian, an ngatanan nga masinugtanon nga tawo “maukoy nga may seguridad ngan diri mahahadlok ha bisan ano nga kadaot.”​—Prob. 1:33.

11. Ano nga importante nga leksyon an aton hibabaroan ha tagna mahitungod han “mahumok nga saringsing” nga nagin “daku nga kahoy nga sedro”?

¹¹ An aton hibabaroan ha tagna. An eksayting nga tagna mahitungod han “mahumok nga saringsing” nga nagin “daku nga kahoy nga sedro” nabulig ha aton nga mabaton inin importante nga pakiana: Kan kanay kita masarig? Kalurongan an pagsarig ha gobyerno han tawo ngan ha pwersa militar hito. Basi magkaada tinuod nga seguridad, maaramon an bug-os nga pagsarig ha Mesianiko nga Hadi, hi Jesu-Kristo. An langitnon nga gobyerno nga iya ginmamandoan amo la an paglaom han katawohan.​—Pah. 11:15.

12. Paonan-o ginklaro ni Jehova nga waray niya kalimti an iya kasabotan kan David?

¹² Ha pagsaysay han Dios han patigo mahitungod han duha nga agila, nasabtan ni Ezekiel nga hi Zedekias, usa nga diri matinumanon nga hadi ha tulin ni David, tatangtangon ngan dadad-on nga  bihag ha Babilonya. Bangin nahunahuna niya, ‘Ano an mahitatabo ha kasabotan han Dios kan David, nga nagsaad nga may hadi tikang ha iya tulin nga magmamando ha kadayonan?’ (2 Sam. 7:12, 16) Kon nahunahuna ito ni Ezekiel, nabaton ito waray la pag-iha. Han mga 611 B.C.E., ha ikapito ka tuig han pagkadistyero, samtang hi Zedekias nagmamando pa ha Juda, “an pulong ni Jehova inabot” kan Ezekiel. (Ezek. 20:2) Ginsugo hiya ni Jehova nga magsumat hin usa pa nga tagna mahitungod han Mesias para klaruhon nga waray kalimti han Dios an iya kasabotan kan David. Lugod, iginpakita han tagna nga an tiabot nga Mesianiko nga Magmarando magkakaada legal nga katungod ha pagmando sugad nga manurunod ni David.

13, 14. Ano an sumaryo han tagna ha Ezekiel 21:25-27, ngan paonan-o ito natuman?

¹³ An ginsisiring han tagna. (Basaha an Ezekiel 21:25-27.) Pinaagi kan Ezekiel, prangka nga ginkaistorya ni Jehova an “maraot nga lider han Israel,” nga diri na maiha sirotan. Ginsidngan ni Jehova inin maraot nga magmarando nga kukuhaon an iya “putos ha ulo” ngan “korona,” o diadema, (mga simbolo han gahum han hadi). Katapos, an mga magmarando nga “ubos” hadto pahihitas-on, ngan an mga “hitaas” hadto pauubson. An mga magmarando nga ginpahitaas padayon  nga magmamando, pero tubtob la ha pag-abot han “may legal nga katungod,” ngan ihahatag ni Jehova ha iya an Ginhadian.

¹⁴ An katumanan han tagna. Han 607 B.C.E., ginpaubos an “hitaas” nga ginhadian han Juda nga ha Jerusalem an sentro han ginbungkag han mga taga-Babilonya an Jerusalem ngan ginbihag an gintangtang nga hadi nga hi Zedekias. Tungod kay waray na tulin ni David nga naghahadi ha Jerusalem, ginpahitaas an “ubos” nga Hentil nga mga magmarando ngan ginmandoan nira ini nga tuna​—pero ha limitado la nga panahon. An mga Panahon han mga Hentil, o “itinanda nga mga panahon han mga nasud,” natapos han 1914 han iginhatag ni Jehova kan Jesu-Kristo an pagkahadi. (Luc. 21:24) Sugad nga tulin ni Hadi David, hi Jesus may-ada gud “legal nga katungod” ha Mesianiko nga Ginhadian. * (Gen. 49:10) Salit pinaagi kan Jesus, gintuman ni Jehova an iya saad nga tagan hi David hin permanente nga manurunod ha waray kataposan nga Ginhadian.​—Luc. 1:32, 33.

15. Kay ano nga makakasarig gud kita ha Hadi nga hi Jesu-Kristo?

¹⁵ An aton hibabaroan ha tagna. Makakasarig gud kita ha Hadi nga hi Jesu-Kristo. Kay ano? Kay diri pariho han mga magmarando ha  kalibotan nga iginbubutos han mga tawo o bangin nangangagaw hin awtoridad, hi Jesus ginpili ni Jehova ngan “gintagan . . . hin ginhadian” nga may-ada hiya legal nga katungod nga mandoan. (Dan. 7:13, 14) Angay gud naton sarigan an Hadi nga ginpili ni Jehova mismo!

16. Ano an inaabat ni Jehova ha iya mga karnero, ngan paonan-o an panon gintatratar han “mga paraataman han panon han Israel” ha panahon ni Ezekiel?

¹⁶ Hi Jehova, an Pinakalabaw nga Paraataman, interesado gud ha kaopayan han iya mga karnero​—an iya mga magsiringba ha tuna. (Sal. 100:3) Kon igintatapod niya hira ha kabulig nga paraataman nga mga tawo​—adton may awtoridad—​gin-oobserbaran gud niya an ira pagtratar ha iya mga karnero. Salit hunahunaa an gin-abat ni Jehova ha “mga paraataman han panon han Israel” ha panahon ni Ezekiel. Ito nga mga lider waray awod nga nagmando hin “mapintas ngan matalumpiguson.” Salit nag-antos an panon ngan damu an binaya ha putli nga pagsingba.​—Ezek. 34:1-6.

17. Paonan-o gintalwas ni Jehova an iya mga karnero?

¹⁷ Ano an bubuhaton ni Jehova? “Pababaydon ko hira ha ira ginbuhat,” an siring niya ha magpintas nga magmarando han Israel. Nagsaad gihap hiya: “Tatalwason ko an akon mga karnero.” (Ezek. 34:10) Pirme gintutuman ni Jehova an iya ginsisiring. (Jos. 21:45) Han 607 B.C.E., gintalwas niya an iya mga karnero; gin-gamit niya an nasulong nga mga taga-Babilonya basi tangtangon an pagmando hiton makikalugaringon nga mga paraataman. Paglabay hin 70 ka tuig, gintalwas ni Jehova an iya sugad-karnero nga mga magsiringba ha Babilonya ngan iginbalik hira ha ira tuna basi mapahiuli an putli nga pagsingba didto. Pero namimeligro la gihap hira, kay padayon nga mamandoan hira han mga magmarando ha kalibotan. “An itinanda nga mga panahon han mga nasud” magpapadayon hin ginatos pa ka tuig.​—Luc. 21:24.

18, 19. Ano nga tagna an iginsumat ni Ezekiel han 606 B.C.E.? (Kitaa an retrato ha tinikangan hini nga kapitulo.)

¹⁸ Han 606 B.C.E., mga usa ka tuig katapos mabungkag an Jerusalem ngan mga dekada antes an mga Israelita gintalwas ha pagkadistyero ha Babilonya, gin-giyahan ni Jehova hi Ezekiel nga magsumat hin tagna nga nagpapakita nga interesado gud an Pinakalabaw nga Paraataman ha waray kataposan nga kaopayan han iya panon. Iginhuhulagway hito kon paonan-o aatamanon han Mesianiko nga Hadi an mga karnero ni Jehova.

¹⁹ An ginsisiring han tagna. (Basaha an Ezekiel 34:22-24.) An Dios ‘maghahatag hin usa nga paraataman’ nga iya gintatawag nga “hi David nga akon surugoon.” An mga pulong nga “usa nga paraataman” ngan “surugoon” nagpapasabot nga an Magmarando diri magpapahiuli hin dinastiya han mga hadi ha tulin ni David kondi hiya an magigin permanente nga manurunod ni David. Ini nga Paraataman ngan Magmarando magpapakaon ha mga karnero han Dios ngan magigin “lider ha butnga nira.” Hi Jehova “maghihimo . . . hin kasabotan para ha kamurayawan” ha iya mga karnero. “An mga bendisyon mabunok [ha ira] pariho han mga uran,” ngan malilipay hira ha pagkaada  seguridad, kahuraan, ngan pagkamabungahon. Magkakaada pa ngani hin kamurayawan diri la butnga han mga tawo kondi butnga liwat han mga tawo ngan hayop!​—Ezek. 34:25-28.

20, 21. (a) Paonan-o natuman an tagna mahitungod kan “David nga akon surugoon”? (b) Paonan-o matutuman an gin-unabi ni Ezekiel nga “kasabotan para ha kamurayawan”?

²⁰ An katumanan han tagna. Ha pagtawag hini nga Magmarando nga “hi David nga akon surugoon,” gintutudlok han Dios hi Jesus, an tulin ni David nga may legal nga katungod ha pagmando. (Sal. 89:35, 36) Han nakanhi hi Jesus ha tuna, hiya nagin “maopay nga paraataman,” nga naghatag han iya kinabuhi “para ha mga karnero.” (Juan 10:14, 15) Pero yana langitnon na hiya nga Paraataman. (Heb. 13:20) Han 1914, ginhimo han Dios hi Jesus nga Hadi ngan gintagan han responsabilidad nga atamanon ngan pakaunon an Iya mga karnero ha tuna. Ngan han 1919, gintokahan han bag-o nga nahitrono nga Hadi “an matinumanon ngan maaramon nga uripon” nga pakaunon an “mga surugoon ha panimalay”​—an maunungon nga mga magsiringba han Dios nga may langitnon o tunan-on nga paglaom. (Mat. 24:45-47) Ha paggiya han Kristo, hura nga gintatagan han matinumanon nga uripon hin espirituwal nga pagkaon an mga karnero han Dios. Nabulig ito ha ira mapauswag pa an kamurayawan ngan seguridad ha espirituwal nga paraiso.

²¹ Ha tiarabot, paonan-o matutuman an gin-unabi ni Ezekiel nga “kasabotan para ha kamurayawan” ngan uran han mga bendisyon? Ha bag-o nga kalibotan, an putli nga mga magsiringba ni Jehova ha tuna bug-os nga magpapahimulos han mga bendisyon han “kasabotan para ha kamurayawan.” Ha paraiso nga tuna, an magtinumanon nga tawo diri na gud mamimeligro tungod ha girra, krimen, gutom, sakit, o magpintas nga hayop. (Isa. 11:6-9; 35:5, 6; 65:21-23) Eksayted ka ba nga mabuhi ha waray kataposan ha paraiso diin an mga karnero han Dios ‘maukoy nga may seguridad, ngan waray makakapahadlok ha ira’?​—Ezek. 34:28.

22. Ano an inaabat ni Jesus ha mga karnero, ngan paonan-o hiya masusubad han kabulig nga mga paraataman?

²² An aton hibabaroan ha tagna. Pariho ha iya Amay, interesado gud hi Jesus ha kaopayan han panon. Ginsisiguro hini nga Paraataman ngan Hadi nga an mga karnero han iya Amay napapakaon hin maopay ha espirituwal ngan may kamurayawan ngan seguridad ha espirituwal nga paraiso. Nakakaliaw gud nga maataman hini nga Magmarando! Kinahanglan subaron han kabulig nga mga paraataman hi Jesus. Kinahanglan atamanon han mga tigurang an panon hin “kinaburut-on” ngan “tungod han hingyap nga magserbi” ngan magin maopay nga ehemplo ha mga karnero. (1 Ped. 5:2, 3) Diri gud kakaruyagon han usa nga tigurang nga magin mapintas ha karnero ni Jehova! Hinumdumi an Iya ginsiring ha magpintas nga paraataman han Israel ha panahon ni Ezekiel: “Pababaydon ko hira ha ira ginbuhat.” (Ezek. 34:10) Gin-oobserbaran gud han Pinakalabaw nga Paraataman​—pati han iya Anak—​an paagi han pagtratar ha iya mga karnero.

23. Ano an iginsaad ni Jehova may kalabotan ha paghiusa han nasud han Israel, ngan paonan-o niya ito gintuman?

²³ Karuyag ni Jehova nga urosa nga mag-alagad an iya mga magsiringba. Ha tagna mahitungod ha pagpahiuli, nagsaad an Dios nga iya titirukon an iya katawohan​—an mga representante han duha-ka-tribo nga ginhadian han Juda ngan han napulo-ka-tribo nga ginhadian han Israel—​ngan hihimoon hira utro nga “usa la nga nasud,” sugad hin pagtampo hin duha nga “istik” basi ‘magin usa’ ha iya kamot. (Ezek. 37:15-23) Ha usa nga katumanan hito nga tagna, iginpahiuli han Dios ha Tuna nga Iginsaad an ginhiusa nga nasud han Israel han 537 B.C.E. * Pero sampol la ito han mas daku ngan nagpapadayon nga pagkaurosa nga maabot. Katapos magsaad nga pag-usahon an Israel, gintagan ni Jehova hi Ezekiel hin tagna kon paonan-o pag-uurusahon han tiarabot nga Magmarando an tinuod nga mga magsiringba ha bug-os nga tuna ha kadayonan.

24. Paonan-o iginhulagway ni Jehova an Mesianiko nga Magmarando, ngan ano an magigin kahimtang han pagmando hini nga Hadi?

²⁴ An ginsisiring han tagna. (Basaha an Ezekiel 37:24-28.) Makausa pa, gintawag ni Jehova an Mesianiko nga Magmarando nga “hi David nga akon surugoon,” “usa nga paraataman,” ngan “lider,” pero yana gintawag liwat niya nga “hadi” inin Usa nga Iginsaad. (Ezek. 37:22) Ano an magigin kahimtang han pagmando hini nga Hadi? An iya pagmando magigin permanente. An mga pulong nga “waray kataposan”  nagpapasabot nga diri matatapos an mga bendisyon han iya pagmando. * Magkakaada hin pagkaurosa ha iya pagmando. Ilarom hinin “usa la nga hadi,” susundon han maunungon nga mga sakop an pariho nga “hudisyal nga mga desisyon,” ngan urosa nga “maukoy hira ha tuna.” Ha iya pagmando, an iya mga sakop magigin mas duok kan Jehova nga Dios. Hi Jehova maghihimo ha ira hin “kasabotan para ha kamurayawan.” Hi Jehova magigin ira Dios, ngan hira magigin iya katawohan. Ngan an iya santuaryo mahimumutang “ha butnga nira ha kadayonan.”

25. Paonan-o natuman an tagna mahitungod han Mesianiko nga Hadi?

²⁵ An katumanan han tagna. Han 1919, an magtinumanon nga dinihogan gin-urosa ilarom han ira “usa nga paraataman,” an Mesianiko nga Hadi, hi Jesu-Kristo. Ha urhi, nagin kausa nira an “daku nga grupo” tikang ha “ngatanan nga nasud ngan mga tribo ngan mga katawohan ngan mga pinulongan.” (Pah. 7:9) Inin duha nga grupo nagin “usa nga panon” ilarom han “usa nga paraataman.” (Juan 10:16) Langitnon man o tunan-on an ira paglaom, hira ngatanan nasunod ha hudisyal nga mga desisyon ni Jehova. Salit tarampo nga naukoy hira ha espirituwal nga paraiso sugad nga nagkakaurosa nga magburugto ha bug-os nga kalibotan. Ginbibendisyonan hira ni Jehova hin kamurayawan, ngan aada ha butnga nira an iya santuaryo, nga nagrirepresentar han putli nga pagsingba. Hi Jehova an ira Dios, ngan  iginrarakudaku nira nga mga magsiringba hira niya​—yana ngan ha kadayonan!

26. Paonan-o ka makakabulig ha pagtipig han pagkaurosa ha espirituwal nga paraiso?

²⁶ An aton hibabaroan ha tagna. Pribilehiyo naton nga magkaurosa sugad nga magburugto ha bug-os nga kalibotan nga nagbubuhat han putli nga pagsingba kan Jehova. Pero may kaupod ito nga responsabilidad​—suportaran an pagkaurosa. Salit kita ngatanan kinahanglan bumulig basi matipigan an pagkauruyon han aton gintotoohan ngan ginbubuhat. (1 Cor. 1:10) Basi mahimo ito, nakaon kita han pariho nga espirituwal nga pagkaon, nasunod ha pariho nga Kasuratanhon nga suruklan ha panggawi, ngan nakikigbahin ha pariho nga importante nga buruhaton nga pagsangyaw han Ginhadian ngan paghimo hin disipulo. Pero gugma an tinuod nga yawi ha aton pagkaurosa. Samtang naniningkamot kita pagkultibar ngan pagpakita han damu nga bahin han gugma​—upod na an empatiya, pagpaid, ngan pagpasaylo—​nabulig kita ha pagtipig han aton pagkaurosa. “An gugma,” siring han Biblia, “hingpit nga bugkos han pagkaurosa.”​—Col. 3:12-14; 1 Cor. 13:4-7.

27. (a) Ano an imo inaabat may kalabotan ha mga tagna mahitungod han Mesias ha libro han Ezekiel? (b) Ano an aton uusisahon ha sunod nga mga kapitulo?

²⁷ Mapasalamaton gud kita ha mga tagna mahitungod han Mesias ha libro han Ezekiel! An pagbasa ngan pagpamalandong hito nagtututdo ha aton nga an aton hinigugma nga Hadi nga hi Jesu-Kristo masasarigan gud, may legal nga katungod ha pagmando, mahigugmaon nga nag-aataman ha aton, ngan magtitipig ha aton nga urosa ha kadayonan. Pribilehiyo gud naton nga magin sakop han Mesianiko nga Hadi! Hinumdoman naton nga ito nga mga tagna bahin han tema han pagpahiuli nga ginhihisgotan ha libro han Ezekiel. Hi Jesus an ginagamit ni Jehova basi tirukon an Iya katawohan ngan ipahiuli an ira putli nga pagsingba. (Ezek. 20:41) Ha sunod nga mga kapitulo, uusisahon naton iton eksayting nga tema ngan kon paonan-o ito ginhihisgotan ha libro han Ezekiel.