1. Јеһованын тәјин етдији ҝөзәтчиләрин ҝөрдүјү иши вә сонракы һадисәләри тәсвир един?

 ҜҮНӘШ јаваш-јаваш гүруб едир. Јерусәлимин гала диварында ҝөзәтчи кешик чәкир. О, әлини ҝөзүнүн үстүнә гојуб диггәтлә үфүгә бахыр. Амма бирдән илан чалмыш кими диксинир. Бабил ордусу шәһәрә доғру ирәлиләјир! Халгы хәбәрдар етмәк лазымдыр. О, әлини кәрәнаја атыр, нәфәсини ичинә чәкиб кәрәнајы уҹадан чалыр. Анҹаг бу хәбәрдарлығын һеч бир мәнасы јохдур. Шәһәрин веҹсиз сакинләри нә етсәләр бошдур. Артыг иш-ишдән кечиб. Ҝөр нечә илләрдир ки, Јеһованын тәјин етдији ҝөзәтчиләр, Онун елчиләри халгы бу ҝүнүн јетишәҹәјиндән хәбәрдар едирди. Амма, чифајда! Кимдир онлара мәһәл гојан?! Бу да нәтиҹәси. Бабил ордусу шәһәри дөрд бир тәрәфдән әһатәјә алыб. Шәһәрин агибәти аҹы олаҹаг. Мүһасирә хејли давам едәндән сонра бабиллиләр гала диварыны учураҹаг, мәбәди јерлә јексан едәҹәк. Јерусәлим сакинләриндән кимиси гәтлә јетириләҹәк, кимиси әсир апарылаҹаг.

2, 3. а) Јер үзүнүн сакинләрини тезликлә нә ҝөзләјир? б) Бу фәсилдә һансы суаллар нәзәрдән кечирилир?

² Бу ҝүн дә јер үзүнүн имансыз сакинләрини ҹәза ҝөзләјир. Јеһованын мүдһиш ҝүнү јетишәндә сәмави орду Онун һөкмү илә бу инсанлары мәһв едәҹәк. Орду артыг јүрүшә һазыр  вәзијјәтдәдир (Вәһј 17:12—14). Бу саваш бәшәр тарихиндә ҝөрүнмәмиш бөјүк мүсибәтин кулминасија нөгтәсиндә баш верәҹәк (Мәт. 24:21). Амма һәлә ҝеҹ дејил. Истәјән һәр кәс Јеһованын тәјин етдији ҝөзәтчинин хәбәрдарлығына һај вериб ҹаныны гуртара биләр.

³ Бәс ҝөзәтчи тәјин етмәјә Јеһованы нә тәшвиг етмишди? Ҝөзәтчи һансы хәбәри ҹар чәкир? Бу иши ким ҝөрүр вә бизим бу ишдә һансы пајымыз вар? Ҝәлин бу суаллары нәзәрдән кечирәк.

4. Јеһова нәјә ҝөрә ҝөзәтчиләр тәјин едирди? (Фәслин әввәлиндәки шәклә бахын.)

⁴ Һизгијал 33:7 ајәсини охујун. Ҝөзәтчиләр чох вахт гала диварында дуруб кешик чәкирдиләр, шәһәр сакинләринин тәһлүкәсизлијини горујурдулар. Бу, шәһәр һакиминин өз тәбәәләринин гејдинә галдығына сүбут иди. Ҝөзәтчинин шејпур чалмасы шәһәр сакинләрини тәлаша салса да, бу сәс онларын хејри үчүн иди. Хәбәрдарлыға һај верәнләр хилас ола биләрди. Јеһова да кешикчиләр тәјин едәндә мәгсәди исраиллиләри фәлакәт хәбәри илә горхуја салмаг дејилди, әксинә, О, халгынын гејдинә галырды, онларын хилас олмасыны истәјирди.

5, 6. Јеһованын әдаләтли олдуғуну тәсдиг едән сүбутлардан бири һансыдыр?

⁵ Һизгијалы ҝөзәтчи тәјин едәндә Јеһованын ҝөзәл кејфијјәтләри өзүнү ајдын шәкилдә бүрузә верди. Бу кејфијјәтләр бизим Јеһоваја етибарымызы мөһкәмләндирир. Ҝәлин онлардан икисинә нәзәр салаг.

⁶ Әдаләт. Јеһованын әдаләти ондан ҝөрүнүр ки, О үзҝөрәнлик етмәдән һәр биримизлә ајрыҹа бир фәрд кими давраныр. Мәсәлән, бөјүк әксәријјәт Һизгијалын сөјләдији хәбәри рәдд етсә дә, Јеһова исраиллиләрин һамысына үсјанкар күтлә кими бахмырды. Әксинә, О, ајры-ајры адамларын бу хәбәрә неҹә һај верәҹәјини ҝөрмәк истәјирди. О, дөнә-дөнә һәм пис, һәм дә салеһ адама мүраҹиәт едир. Буна ҝөрә дә һәр кәсә хәбәрә ҝөстәрдији мүнасибәт әсасында һөкм чыхарыр (Һизг. 33:8, 18—20).

7. Јеһова инсанлара нәјин әсасында һөкм чыхарыр?

⁷ Јеһованын әдаләтли олдуғу һәм дә инсанлара неҹә һөкм чыхармасындан ҝөрүнүр. Инсанлар кечмишдәки әмәлләринә ҝөрә јох, бу ҝүн хәбәрдарлыға неҹә һај вердикләринә ҝөрә Аллаһын гаршысында мәсулијјәт дашыјыр. Јеһова Һизгијала демишди: «Мән пис адама “өләҹәксән!” дејәндә о, ҝүнаһындан дөнүб, һагг вә салеһ иш тутса,.. јашајаҹаг, өлмәјәҹәк». Сонра Јеһова белә бир тәсирли сөзләр демишди: «Етдији ҝүнаһларын һеч бири јада салынмајаҹаг» (Һизг. 33:14—16). Амма салеһ инсан да дүшүнмәмәлидир ки, индијә кими ҝөстәрдији итаәткарлыг она индән белә үсјан етмәјә һагг верир. Јеһова демишди ки, әҝәр инсан «өз салеһлијинә ҝүвәниб пис иш тутса, салеһ ишләриндән һеч бири јада салынмајаҹаг, о, ҝүнаһына ҝөрә өләҹәк» (Һизг. 33:13).

8. Пејғәмбәрләрин сөјләдији хәбәрдарлыглардан Јеһованын әдаләти барәдә нә өјрәнирик?

 ⁸ Јеһованын әдаләтли олдуғуна даһа бир сүбут одур ки, О, һәрәкәтә кечмәздән әввәл хәбәрдарлыг едир. Бабил гошуну Јерусәлими дармадағын етмәздән тәхминән алты ил әввәл Јеһова Һизгијалы пејғәмбәр тәјин етмишди. Анҹаг Һизгијал исраиллиләри Аллаһа ҹаваб верәҹәкләри барәдә хәбәрдар едән биринҹи адам дејилди. Јерусәлимин дағылмасындан тәхминән бир әср әввәл Јеһова Һушә, Әшија, Микә, Одид, Әрәмја пејғәмбәри ҝөзәтчи гојмушду. Јеһова Әрәмја васитәсилә исраиллиләрә хатырлатмышды: «Ҝөзәтчиләр гојдум, ҝөзәтчиләр: “Шејпур сәсинә гулаг асын!” дедиләр» (Әрм. 6:17). Сонда бабиллиләр Јеһованын һөкмүнү иҹра едәндә чохлу инсан һәјатыны итирди, анҹаг буна ҝөрә нә Јеһова, нә дә һәмин ҝөзәтчиләр мәсулијјәт дашымырды.

9. Јеһова мәһәббәтини неҹә ҝөстәрди?

⁹ Мәһәббәт. Јеһованын мәһәббәти ондан ҝөрүнүр ки, О, ҝөзәтчиләри тәкҹә салеһ инсанлара јох, һәм дә писләрә хәбәрдарлыг етмәк үчүн ҝөндәрирди, бахмајараг ки, һәмин о пис инсанлар Онун гәлбини гырмыш, адына ләкә ҝәтирмишдиләр. Тәсәввүр едирсиниз, Јеһованын халгы кими танынан исраиллиләр дөнә-дөнә Јеһоваја арха чевирмиш вә јалан аллаһлара үз тутмушдулар. Јеһова бу хәјанәтин Она неҹә дәрин јара вурдуғуну ҝөстәрмәк үчүн халгы хәјанәткар гадына бәнзәтмишди (Һизг. 16:32). Бунунла белә, Јеһова онлардан дәрһал үз чевирмәди. Јеһова онларла барышмаг истәјирди, интигам алмаг јох. О, әлини дәрһал һөкм гылынҹынын тијәсинә узатмады, ахырынҹы мәгамда, артыг  чарә галмајанда ону гынындан чыхарды. О, Һизгијала демишди: «Мән пис адамын өлүмүндән һәзз алмырам. Истәјирәм, о, өз јолундан дөнүб јашасын» (Һизг. 33:11). Јеһова әввәлләр дә белә иди, инди дә беләдир (Мәл. 3:6).

10, 11. Јеһованын инсанларла рәфтарындан нә өјрәнирик?

¹⁰ Јеһованын исраиллиләрлә әдаләтлә вә мәһәббәтлә рәфтар етмәсиндән нә өјрәнирик? Әввәла, биз тәблиғ етдијимиз инсанлара симасыз күтлә кими јох, ајрыҹа бир фәрд кими јанашмалыјыг. Инсана әввәлки һәјат тәрзинә, миллијјәтинә, мадди вәзијјәтинә ҝөрә һөкм кәсиб хәбәри ешитмәјә лајиг олмадығыны дүшүнмәк бөјүк јанлышлыг оларды. Јеһова һәвари Бутруса буну ајдын шәкилдә баша салмышды. Бутрус демишди: «Аллаһ ајры-сечкилик етмәјән Аллаһдыр, һәр халгын ичиндә Ондан горхан вә дүзҝүн иш ҝөрән адамдан разыдыр» (Һәв. 10:34, 35). Бу сөзләр бу ҝүн дә гүввәдәдир.

¹¹ Икинҹиси, биз өзүмүзү алдатмамалыјыг. Нә вар-нә вар әввәлләр салеһ ишләр ҝөрмүшүк дејә, дүшүнмәмәлијик ки, бундан сонра ҝүнаһ етмәрик. Унутмамалыјыг ки, тәблиғ етдијимиз инсанлар кими, биз дә ҝүнаһа мејиллијик. Һәвари Булусун Коринф јығынҹағына вердији мәсләһәт бу ҝүн бизә дә аиддир: «Мөһкәм дајандығыны дүшүнән адам еһтијатлы олсун ки, јыхылмасын. Үзләшдијиниз сынагларда гејри-ади бир шеј јохдур, һамы белә сынагларла үзләшир» (1 Кор. 10:12, 13). Биз һеч вахт өз салеһлијимизә ҝүвәнмәмәлијик, дүшүнмәмәлијик ки, јахшы ишләр ҝөрүрүк дејә пис әмәл едиб ҹәзасыз гала биләрик (Һизг. 33:13). Јеһоваја хидмәт  етдијимиз илләрин сајындан асылы олмајараг, һәмишә тәвазөкар вә итаәткар галмаг ваҹибдир.

12. Әҝәр кечмишдә ҹидди ҝүнаһлара јол вермишиксә, нәји јадда сахламалыјыг?

¹² Ола биләр, биз әввәлләр ҹидди ҝүнаһлар етмишик, амма инди онун пешманчылығыны чәкирик. Һизгијалын чатдырдығы хәбәрдән өјрәндик ки, Јеһова төвбә етмәјән ҝүнаһкарлары ҹәзаландыраҹаг. Анҹаг бир шеји дә билдик ки, Јеһова мәһәббәтә ҹан атыр, интигама јох (1 Јәһ. 4:8). Әҝәр пешман олдуғумузу әмәлләримизлә ҝөстәририксә, һеч вахт дүшүнмәмәлијик ки, ҝүнаһымыз елә ағырдыр ки, Аллаһын мәрһәмәти ону бағышламаға јетмәз (Јаг. 5:14, 15). Јеһова руһани мәнада зина едән исраиллиләри бағышламаға һазыр идисә, демәли, бизи дә бағышлајаҹаг (Зәб. 86:5).

13, 14. а) Ҝөзәтчиләр һансы хәбәри чатдырмалы идиләр? б) Әшија пејғәмбәр халга һансы хәбәри ҹар чәкирди?

¹³ Һизгијал 33:2, 3 ајәләрини охујун. Бәс Јеһованын тәјин етдији ҝөзәтчиләр һансы хәбәри ҹар чәкмәли идиләр? Онларын иши халга әсас етибарилә хәбәрдарлыглар сөјләмәк иди. Амма онлар һәм дә шад хәбәр чатдырырдылар. Ҝәлин бир нечә нүмунәјә бахаг.

¹⁴ Е. ә. тәхминән 778—732-ҹи илләрдә пејғәмбәр кими хидмәт едән Әшија хәбәрдарлыг етмишди ки, бабиллиләр Јерусәлими истила едәҹәк, әһалисини әсир апараҹаг (Әшј. 39:5—7). Амма о, Аллаһын илһамы илә белә сөзләр дә јазмышды: «Бир гулаг ас! Сәнин ҝөзәтчиләрин гышгырыр. Һамысы сәс-сәсә вериб севинҹдән һарај салыр, ҝөрүрләр ки, Јеһова Сиону топлајыб ҝери гајтарыр» (Әшј. 52:8). Әшија ән севиндириҹи хәбәри ҹар чәкирди — һәгиги ибадәт дирчәләҹәк!

15. Әрәмја пејғәмбәрин чатдырдығы хәбәр нәдән ибарәт иди?

¹⁵ Әрәмја е. ә. 647-ҹи илдән 580-ҹи иләдәк пејғәмбәр кими хидмәт етмишди. Она наһагдан бәдхәбәр дамғасы вурмушдулар. Дүздүр, о, аллаһсыз исраиллиләри хәбәрдар едирди ки, Јеһова онларын башына бәла ҝәтирәҹәк *. О, бу иши чох ҝөзәл иҹра етмишди. Амма Әрәмја шад хәбәр дә чатдырырды. Дејирди ки, Аллаһын халгы вәтәнә гајыдыб пак ибадәти дирчәлдәҹәк (Әрм. 29:10—14; 33:10, 11).

16. Һизгијалын чатдырдығы хәбәр Бабилдәки әсирләрә нәдә көмәк едирди?

¹⁶ Јеһова Һизгијалы е. ә. 613-ҹү илдә ҝөзәтчи тәјин етди. О, ән азы 591-ҹи иләдәк бу вәзифәни дашыды. Бу нәшрин 5 вә 6-ҹы фәслиндә нәзәрдән кечирилдији кими, Һизгијал Исраил халгыны башларына ҝәләҹәк бәладан хәбәрдар етмишди. Бунунла да өзүнү һәмин бәла вахты һәлак олан инсанларын ганындан тәмизләмишди. О, Бабилдә әсирликдә оланлары һәм Јерусәлимдәки хәјанәткарларын ҹәзаланаҹағындан хәбәрдар едирди, һәм дә онлара руһани ҹәһәтдән ојаг галыб ҝәләҹәкдәки ишә јарарлы олмаға көмәк едирди. Јетмиш ил сүрән әсарәт битәндә Јеһова јәһудиләри Исраил торпағына гајтарыб онлары орада дирчәлдәҹәкди (Һизг. 36:7—11).  Исраилә гајыданлар, әсас етибарилә, Һизгијалын сөзләринә диггәт јетирән әсирләрин өвладлары, нәвә-нәтиҹәләри олаҹагды. Бу нәшрин 3-ҹү бөлмәсиндәки диҝәр фәсилләрдән ҝөрүндүјү кими, Һизгијал чохлу шад хәбәрләр чатдырырды, пак ибадәтин Јерусәлимдә дирчәләҹәјини дөнә-дөнә вурғулајырды.

17. Јеһова ҝөзәтчиләри нә вахт тәјин едир?

¹⁷ Бу пејғәмбәрләр е. ә. 607-ҹи илдә Јерусәлим мәһв едилән әрәфәдә халга Аллаһын адындан мүраҹиәт едирдиләр. Бәс Јеһова јалныз онлары ҝөзәтчи тәјин едиб? Әлбәттә ки, јох. Јеһова Өз нијјәтини һәјата кечирәркән һәр дәфә һәлледиҹи мәгам јетишәндә һәм писләрә хәбәрдарлыг етмәк үчүн, һәм дә халга шад хәбәр чатдырмаг үчүн ҝөзәтчиләр тәјин едир.

18. Вәфтизчи Јәһјанын ишинә нә дахил иди?

¹⁸ Ерамызын биринҹи әсриндә Вәфтизчи Јәһја ҝөзәтчи ишини иҹра едирди. О, Исраил халгыны хәбәрдар едирди ки, тезликлә Јеһова онлары рәдд едәҹәк (Мәт. 3:1, 2, 9—11). Анҹаг о, башга бир иш дә ҝөрүрдү. Иса демишди ки, Јәһја габагҹадан вәд олунмуш вә Мәсиһин јолуну һазырламыш елчидир (Мәл. 3:1; Мәт. 11:7—10). Јәһјанын ҝөрдүјү ишә һәм дә шад хәбәри, јәни Аллаһын Гузусу Исанын ҝәлдијини вә онун бүтүн бәшәријјәтин ҝүнаһыны јујаҹағыны бәјан етмәк дахил иди (Јәһ. 1:29, 30).

19, 20. Иса вә онун шаҝирдләри ҝөзәтчи кими һансы иши иҹра етмишдиләр?

¹⁹ Аллаһын тәјин етдији ҝөзәтчиләрин ән ҝөркәмлиси Иса Мәсиһ иди. Јеһова Һизгијал кими, ону да «Исраил евинә» ҝөндәрмишди (Һизг. 3:17; Мәт. 15:24). Иса Исраил халгыны хәбәрдар едирди ки, Јеһова тезликлә онлары рәдд едәҹәк вә Јерусәлим јерлә јексан олаҹаг (Мәт. 23:37, 38; 24:1, 2; Лука 21:20—24). Анҹаг онун әсас иши мүждә вермәк иди (Лука 4:17—21).

²⁰ Јер үзүндә оланда Иса шаҝирдләринә демишди: «Ојаг галын» (Мәт. 24:42). Шаҝирдләри онун әмринә табе олуб ҝөзәтчи ишини јеринә јетирирдиләр. Онлар хәбәрдарлыг едирди ки, Јеһова Исраил евини вә јердәки Јерусәлим шәһәрини рәдд едиб (Ром. 9:6—8; Гал. 4:25, 26). Шаҝирдләр өзләриндән әввәлки ҝөзәтчиләр кими һәм дә мүждә бәјан едирдиләр. Онларын бәјан етдији хәбәрә о да дахил иди ки, артыг башга халглардан олан инсанлар да Аллаһын руһла мәсһ олунмуш Исраилинин үзвү олаҹаг вә Мәсиһә јер үзүндә пак ибадәти бәрпа етмәјә көмәк едәҹәкләр (Һәв. 15:14; Гал. 6:15, 16; Вәһј 5:9, 10).

21. Һәвари Булус һансы нүмунәни гојуб?

²¹ Биринҹи әсрдәки ҝөзәтчиләрдән олан һәвари Булус чох ҝөзәл нүмунә гојуб. О, өз мәсулијјәтинә ҹидди јанашырды. О да Һизгијал кими баша дүшүрдү ки, тапшырығыны јеринә јетирмәсә, инсанларын ганына ҝөрә мәсулијјәт дашыјаҹаг (Һәв. 20:26, 27). Диҝәр ҝөзәтчиләрдән нүмунә ҝөтүрәрәк Булус инсанлара садәҹә хәбәрдарлыг етмирди, һәм дә мүждә чатдырырды (Һәв. 15:35;  Ром. 1:1—4). О, мүгәддәс руһун тәсири илә Әшијанын јаздығы бу пејғәмбәрликдән ситат ҝәтирмишди: «Дағлары ашыб ҝәлән мүждәчинин гәдәмләри нә ҝөзәлдир!» Вә бу сөзләри Падшаһлыг һагда тәблиғ едән мәсиһиләрин ҝөрдүјү ишә аид етмишди (Әшј. 52:7, 8; Ром. 10:13—15).

22. Һәвариләрин өлүмүндән сонра нә баш верди?

²² Һәвариләрин өлүмүндән сонра дөнүклүк мәсиһи јығынҹағыны ҹәнҝинә алды (Һәв. 20:29, 30; 2 Салон. 2:3—8). Узун сүрән бөјүмә мәрһәләсиндә алаг отуна бәнзәр јаланчы мәсиһиләр буғдаја бәнзәр һәгиги мәсиһиләрдән гат-гат чох олду вә Аллаһын Падшаһлығы һагда ајдын хәбәр јалан тәлимләрин ичиндә итиб батды (Мәт. 13:36—43). Анҹаг инсанларын ишинә мүдахилә етмәк вахты ҝәлиб чатанда Јеһова јенидән Өз әдаләт вә мәһәббәтини әмәлдә ҝөстәрди: инсанлара хәбәрдарлыг етмәк вә мүждәни бәјан етмәк үчүн ҝөзәтчиләр тәјин етди. Бәс бу ҝөзәтчиләр кимләр иди?

23. Рассел вә онун мәсләкдашлары һансы ролу ојнајырдылар?

²³ 1914-ҹү илә гәдәрки илләр әрзиндә Рассел вә онун мәсләкдашлары елчи гисминдә чыхыш едирдиләр. Бу елчи Аллаһын Падшаһлығы тәсис олунмаздан әввәл јол һазырламалы иди * (Мәл. 3:1). Онлар һәмчинин ҝөзәтчи ролуну ојнајырдылар. «Сион Ҝөзәтчи гүлләси вә  Мәсиһин һүзурунун ҹарчысы» журналы васитәсилә Аллаһын һөкмү барәдә хәбәрдарлыг едирдиләр. Ејни заманда Аллаһын Падшаһлығы һагда мүждәни јајырдылар.

24. а) Садиг нөкәр ҝөзәтчи ролуну неҹә иҹра едир? б) Гәдимдәки ҝөзәтчиләр һансы нүмунәни гојуб? («Ҝөзәл нүмунә гојан ҝөзәтчиләр» адлы схемә бахын.)

²⁴ Падшаһлыг тәсис едиләндән сонра Иса Мәсиһ бир груп мәсиһини садиг нөкәр тәјин етди (Мәт. 24:45—47). О вахтдан бәри, һазырда Рәһбәрлик Шурасы кими танынан садиг нөкәр ҝөзәтчи ишини иҹра едир. Садиг нөкәр һәм «интигам ҝүнү» һагда хәбәрдарлығын сәсләнмәсинә, һәм дә «Јеһованын илтифат или»нин бәјан едилмәсинә рәһбәрлик едир (Әшј. 61:2; һәмчинин 2 Коринфлиләрә 6:1, 2 ајәләринә бахын).

25, 26. а) Мәсиһин бүтүн давамчыларынын үзәринә һансы мәсулијјәт дүшүр вә онлар бу мәсулијјәти неҹә јеринә јетирир? б) Нөвбәти фәсилдә сөһбәт нәдән ҝедир?

²⁵ Ҝөзәтчилик иши садиг нөкәрин өһдәсинә дүшсә дә, Иса давамчыларынын һамысына ојаг галмағы бујурмушду (Марк 13:33—37). Биз бу әмрә табе олдуғумузу руһани ајыглығы горумагла, мүасир ҝөзәтчини сәдагәтлә дәстәкләмәклә ҝөстәририк. Руһани ҹәһәтдән ајыг олдуғумузу исә тәблиғ етмәклә сүбут едирик (2 Тим. 4:2). Бизи буна тәшвиг едән амилләрдән бири инсанларын һәјатыны хилас етмәк арзусудур (1 Тим. 4:16). Тезликлә чохлу сајда инсан ҝөзәтчинин хәбәрдарлығына мәһәл гојмадығы үчүн һәјатыны итирәҹәк (Һизг. 3:19). Лакин тәблиғ етмәкдә әсас мәгсәдимиз ән ҝөзәл хәбәри — пак ибадәтин бәрпа олдуғуну бәјан етмәкдир. Һазырда «Јеһованын илтифат или»дир вә һәр кәс үчүн гапы ачыгдыр ки, бизә гошулуб әдаләтли вә мәһәббәтли Аллаһымыз Јеһоваја ибадәт етсин. Тезликлә бу шәр дүнја мәһв олаҹаг. Сағ галан һәр кәс мәрһәмәтли падшаһ Иса Мәсиһин һакимијјәти алтында хошбәхт өмүр сүрәҹәк. Бу ҹүр мүждәни чатдырмаг ишиндә ҝөзәтчијә көмәк етмәк үчүн әлимиздән ҝәләни етмәлијик (Мәт. 24:14).

²⁶ Бу ҹүр шәр дүнјада Јеһова мөһтәшәм бир иш ҝөрүб — Өз халгыны мөҹүзәви сурәтдә бирләшдириб. Бунун неҹә баш вердијини ики чубуг һаггында пејғәмбәрликдән ҝөрмәк олар. Нөвбәти фәсил бу мөвзуја һәср олунуб.