1. Iladawan kun ano an ginigibo kan mga propeta ni Jehova na ninombrahan niyang magin bantay asin kun ano an sunod na mga nangyari.

 SARONG bantay an nakatindog sa ibabaw kan pader kan Jerusalem. Mantang nagtatanaw siya sa harayo, pigtatahuban kan kamot niya an nakakasula, o nakakasuriaw, na liwanag kan nagsusulnop na saldang. Tapos bigla na sana, itinaas niya an saiyang hamudyong, naghangos siya nin hararom, asin hinayupan niya an hamudyong para magtao nin patanid—padangadang na an hukbo nin Babilonya! Pero huri na an gabos para sa daing pakilabot na mga nakaistar sa siyudad; mayo nang panahon para humiro sinda kauyon kan pagpatanid kan bantay. Sa laog nin dakul na dekada, nagpatanid an mga ninombrahan ni Jehova na mga bantay, o propeta, na maabot an aldaw na ini; pero habong magdangog kan banwaan. Ngunyan nakapalibot na sa siyudad an hukbo nin Babilonya. Pakalihis nin dakul na bulan na pagsalikop, rinumpag kan mga suldados an pader saka linaog an siyudad, ginaba an templo, asin ginadan o binihag an daing pagtubod saka idolatrosong mga nakaistar sa Jerusalem.

2, 3. (a) Anong sitwasyon an madali nang atubangon kan mga nakaistar sa daga? (b) Anong mga hapot an pag-uulayan ta?

² Ngunyan, an langitnon na hukbo ni Jehova madali nang makigiyera sa daing pagtubod na mga nakaistar sa daga. (Kap. 17:12-14) An labanan na iyan an magigin katapusan kan pinakadakulang kasakitan sa kasaysayan nin tawo. (Mat. 24:21) Pero bako pang huri para sa  dakul na humiro kauyon kan patanid na ipinapaabot kan mga itinalaga, o ninombrahan, ni Jehova na magin bantay.

³ Ano an nagpahiro ki Jehova na magnombra nin mga bantay? Anong klaseng mensahe an ipinapahayag nin sarong bantay? Siisay an nagin mga bantay, asin paano ta masusuportaran an bantay ngunyan? Pag-ulayan ta an simbag sa mga hapot na ini.

4. Taano ta nagnombra si Jehova nin mga bantay? (Hilingon an ritrato sa kapinunan kan kapitulo.)

⁴ Basahon an Ezekiel 33:7. An literal na mga bantay sa parati nakatindog sa ibabaw kan mga pader kan siyudad tanganing siguraduhon na ligtas an mga nakaistar diyan. Pruweba iyan na nagmamakulog an tagapamahala kan siyudad sa mga sakop niya. Dawa ngani puwedeng makubhanan an mga nagtuturog na residente dahil sa tanog kan hamudyong kan bantay, an makusugon na tanog na iyan puwedeng ikaligtas kan mga mahimati diyan. Sa kaagid na paagi, nagnombra si Jehova nin mga bantay, bako dahil gusto niyang takuton an mga Israelita paagi sa mga mensahe nin kalaglagan, kundi dahil nagmamakulog siya sa saiyang banwaan asin gusto niya sindang maligtas.

5, 6. Ano an sarong paagi na risang-risa an hustisya ni Jehova?

⁵ Kan nombrahan ni Jehova si Ezekiel na magin bantay, nagpahiling Siya nin mga kuwalidad na makakapakusog sa sato. Pag-ulayan ta an duwa sa mga iyan.

⁶ Hustisya: Risang-risa an hustisya ni Jehova huling tinatrato niya an lambang saro sa sato bilang mga indibidwal, asin mayo siyang ipinapaurog. Halimbawa, maski ngani sinayumahan kan dakul an mensahe ni Ezekiel, dai ni Jehova ibinilang na rebelde an gabos na Israelita; imbes, gusto niyang mahiling kun paano mahimati an kada indibidwal. Kan kaulayon niya an banwaan, ginamit niya an pananaram na “saro na maraot” asin “saro na matanos.” Kaya, ipinapahiling kaini na naghuhusgar si Jehova basado sa kun paano naghihimati sa mensahe an kada indibidwal.—Ezek. 33:8, 18-20.

7. Ano an ginagamit ni Jehova na basehan sa paghusgar sa mga tawo?

⁷ Mahihiling ta man an hustisya ni Jehova paagi sa ginagamit niyang basehan sa paghusgar sa mga tawo. Pinapanimbag niya an mga indibidwal, bako sa ginibo ninda kaidto, kundi sa kun paano sinda naghihimati sa presenteng patanid. Sinabi ni Jehova ki Ezekiel: “Pag sinabi ko sa maraot: ‘Siguradong magagadan ka,’ tapos tinalikdan niya an saiyang kasalan asin ginibo an makatanusan saka tama, . . . siguradong padagos siyang mabubuhay.” Dangan idinagdag pa ni Jehova: “Dai siya papanimbagon sa arin man na kasalan na ginibo niya.” (Ezek. 33:14-16) Sa ibong na kampi, dai dapat asahan kan mga nagrerebelde na dahil nagin matanos sinda kaidto dai na sinda papadusahan. Sinabi ni Jehova na kun an sarong tawo ‘magtiwala sa sadiri niyang katanusan asin maggibo nin sala, mayo sa saiyang mga matanos na gibo an gigirumdumon, imbes magagadan siya dahil sa sala na ginibo niya.’—Ezek. 33:13.

8. Ano an manunudan ta manungod sa hustisya ni Jehova sa mga patanid na itinatao niya paagi sa mga propeta?

⁸ Hiling-hiling man an hustisya ni Jehova huling pag nagpapatanid siya, nagtatao siya nin igong panahon sa mga tawo bago siya humiro.  Pinunan ni Ezekiel na magpatanid mga anom na taon bago laglagon kan hukbo nin Babilonya an Jerusalem. Pero bako si Ezekiel an inot na nagpatanid sa banwaan nin Diyos na papanimbagon Niya sinda. Sa laog nin labing sarong siglo bago an paglaglag sa Jerusalem, isinugo ni Jehova an mga propetang si Oseas, Isaias, Mikas, Oded, asin Jeremias para magin mga bantay. Sinabi ni Jehova ki Jeremias na ipagirumdom sa mga Israelita: “Nagnombra ako nin mga bantay na nagsabing, ‘Magtao kamong atensiyon sa tanog kan hamudyong!’” (Jer. 6:17) Dai mababasol si Jehova o an mga bantay na idto sa mga magagadan pag isinagibo na kan mga Babilonyo an paghukom ni Jehova.

9. Paano si Jehova nagpahiling nin maimbod na pagkamuot?

⁹ Pagkamuot: Nagpahiling si Jehova nin maimbod na pagkamuot paagi sa pagsugo nin mga bantay para patanidan bako lang an mga matanos kundi pati na an mga maraot, maski ngani pigkulgan kan mga ini an saiyang buot saka rinaot an reputasyon niya. Isip-isipa na sana—an mga Israelita midbid na banwaan ni Jehova, pero pauruutro ninda siyang tinalikdan asin nagsamba sinda sa palsong mga diyos! Para ipahiling kun gurano kakulog ki Jehova an pagtraydor na ini, ikinumparar niya an nasyon sa sarong parapakisambay na agom. (Ezek. 16:32) Dawa arog kaiyan, dai sinda tulos-tulos na sinukuan ni Jehova. Hininguwa niyang makipag-ulian imbes na magbalos. Pinadusahan niya lang sinda pagkatapos niya sindang pauruutrong tawan nin pagkakataon na magbago. Taano? Sinabi niya ki Ezekiel: “Dai ako nauugma sa pagkagadan kan maraot, imbes nauugma ako pag an maraot nagbago kan saiyang dalan asin padagos na mabuhay.” (Ezek. 33:11) Arog kaiyan an namatian ni Jehova kaidto, asin iyo pa man giraray an namamatian ni Jehova ngunyan.—Mal. 3:6.

10, 11. Ano an mga manunudan niyato sa pagtratar ni Jehova sa saiyang banwaan?

 ¹⁰ Ano an manunudan niyato sa makatanusan asin mamumuton na pagtratar ni Jehova sa mga Israelita? An sarong leksiyon iyo na dapat tang mansayon an mga tawo na hinuhulitan ta bako bilang grupo, kundi bilang mga indibidwal. Sala nanggad na isipon na bakong maninigo an sarong tawo na makadangog kan satong mensahe dahil sa nagin paggawi niya kaidto o dahil sa saiyang kultura, tribo, estado sa buhay, o lengguwahe! Totoo pa man giraray sa ngunyan an itinukdo kaidto ni Jehova ki apostol Pedro: “An Diyos mayong pinapalain, kundi sa lambang nasyon, inaako niya an tawong may pagkatakot sa saiya asin naggigibo nin matanos.”—Gibo 10:34, 35.

¹¹ An saro pang leksiyon iyo na dapat tang bantayan an satong sadiri; dai ta dapat ipangatanusan na puwede kitang maggibo nin maraot ngunyan dahil naggibo man kita nin marahay na mga gibo kaidto. Dapat tang tandaan na may makasalan na mga tendensiya man kita arog kan mga tawong hinuhulitan ta. Aplikado man sa sato an sadol na itinao ni apostol Pablo sa kongregasyon nin Corinto: “An siisay man na naghuhuna na siya nakatindog mag-ingat na dai siya matumba. Ano man na sugot na minaabot sa saindo, napapaatubang man diyan an ibang mga tawo.” (1 Cor. 10:12, 13) Dai ta lamang gugustuhon na magin arog kan saro na ‘nagtitiwala sa sadiri niyang katanusan,’ na iniisip na dai kita mapapadusahan sa ginigibo tang sala dahil naggigibo man kita nin marahay. (Ezek. 33:13) Gurano man kita kahaloy nang naglilingkod ki Jehova, mahalagang marhay na magdanay kitang mapakumbaba asin masinunod.

12. Kun nakagibo kita nin magabat na mga kasalan kaidto, ano an dapat tang girumdumon?

¹² Alagad, paano kun nakagibo kita nin magabat na mga kasalan kaidto pero nakakamati pa man giraray nin grabeng pagkakonsiyensiya  sagkod ngunyan? Sa mensahe ni Ezekiel, nanudan niyato na papadusahan ni Jehova an mga nagkasalang dai nagsusulsol. Pero, nanudan ta man na si Jehova sa panginot sarong Diyos nin pagkamuot, bako nin pagbalos. (1 Juan 4:8) Kun pinapatunayan ta paagi sa satong mga gibo na nagsusulsol kita, dai ta dapat pag-isipon na nungkang papatawadon nin Diyos an mga kasalan ta. (Sant. 5:14, 15) Andam si Jehova na patawadon an bakong maimbod na mga Israelita kaidto, asin andam man siyang patawadon kita.—Sal. 86:5.

13, 14. (a) Anong klaseng mensahe an ipinapahayag kan mga bantay? (b) Anong mensahe an ipinahayag ni Isaias?

¹³ Basahon an Ezekiel 33:2, 3. Anong klaseng mensahe an ipinapahayag kan mga inasignaran ni Jehova na magin bantay? Panginot na diyan an pagpahayag nin mga patanid. Pero may dara man sindang maugmang bareta. Pag-isipan an nagkapirang halimbawa.

¹⁴ Si Isaias, na naglingkod puon mga 778 sagkod 732 B.C.E., nagpatanid na sasakupon kan mga Babilonyo an Jerusalem asin ididistiyero an mga nakaistar diyan. (Isa. 39:5-7) Pero pinasabngan man siya na isurat: “Danguga! Kinukusugan kan saimong mga bantay an boses ninda. Sarabay sindang nagkukurahaw na maugma, huling malinaw nindang mahihiling pag an Sion tinipon na giraray ni Jehova.” (Isa. 52:8) Nagpahayag si Isaias nin magayunon na bareta—ibabalik an tunay na pagsamba!

15. Anong mensahe an ipinahayag ni Jeremias?

¹⁵ Si Jeremias, na naglingkod puon 647 sagkod 580 B.C.E., parating minamansay kan dakul na “parakurahaw nin kapahamakan.” Mayong duda na talagang ginibo niya an asignasyon niya na patanidan an maraot na mga Israelita manungod sa mga kapahamakan na ipapaabot sa sainda ni Jehova. * Pero nagpahayag man siya nin maugmang bareta. Ihinula niya na mabalik an banwaan nin Diyos sa saindang daga asin na ibabalik duman an dalisay na pagsamba.—Jer. 29:10-14; 33:10, 11.

16. Paano nakinabang sa mensahe ni Ezekiel an mga bihag sa Babilonya?

¹⁶ Si Ezekiel ninombrahan bilang bantay kan 613 B.C.E., asin nagdanay siya sa saiyang asignasyon nin sagkod mga 591 B.C.E. Arog kan tinukar sa Kapitulo 5 asin 6 kan publikasyon na ini, maigot na pinatanidan ni Ezekiel an banwaan nin Israel manungod sa kalaglagan na mangyayari sa sainda, kaya mayo siya nin pagkakasala sa dugo sa siisay man na magagadan. Kasabay kaiyan, dai sana pinatanidan ni Ezekiel an mga idinistiyero na papadusahan ni Jehova an mga apostata sa Jerusalem kundi tinabangan niya man an mga bihag sa Babilonya na magdanay na buhay sa espirituwal asin magin andam sa gibuhon sa maabot. Pagkatapos kan 70 taon na pagkadistiyero, ibabalik ni Jehova sa daga nin Israel an sarong grupo nin mga natatada. (Ezek. 36:7-11) Kadaklan sa mga natatadang ini mga aki saka makuapo kan mga nagtao nin atensiyon sa mensahe ni Ezekiel. Arog kan itinatampok kan iba pang mga kapitulo sa Seksiyon 3 kan publikasyon na ini, dakul kaidtong maugmang baretang ipapahayag si Ezekiel, na nagkukumpirmar na ibabalik an dalisay na pagsamba sa Jerusalem.

17. Nuarin si Jehova nagnonombra nin mga bantay?

 ¹⁷ An mga propeta daw na ini, na nagpropesiya sa banwaan nin Diyos bago asin pagkatapos kan pagkalaglag kan Jerusalem kan 607 B.C.E., iyo sana an ginamit ni Jehova para magin mga bantay? Bako. Sa kada mahalagang pangyayari na may koneksiyon sa kautuban kan katuyuhan ni Jehova, nagnonombra siya nin mga bantay tanganing patanidan an mga maraot asin magpahayag nin maugmang bareta.

18. Anong asignasyon an ginibo ni Juan Bautista?

¹⁸ Kan inot na siglo C.E., nagserbing bantay si Juan Bautista. Pinatanidan niya an nasyon nin Israel na madali na sindang isikwal. (Mat. 3:1, 2, 9-11) Pero urog pa diyan an ginibo niya. Sinabi ni Jesus na si Juan an ihinulang “mensahero” na nag-andam kan dalan para sa Mesiyas. (Mal. 3:1; Mat. 11:7-10) Kaiba sa gibuhon na iyan iyo an pagpahayag kan maugmang bareta—nag-abot na “an Kordero nin Diyos,” si Jesus, asin hahalion niya an “kasalan kan kinaban.”—Juan 1:29, 30.

19, 20. Paano si Jesus asin an saiyang mga disipulo nagserbing mga bantay?

¹⁹ Sa gabos na bantay, si Jesus an pinakanangungurog. Arog ni Ezekiel, isinugo siya ni Jehova sa “banwaan,” o “nasyon,” nin Israel. (Ezek. 3:17; Mat. 15:24) Nagpatanid si Jesus na an nasyon nin Israel madali nang isikwal asin na an Jerusalem lalaglagon. (Mat. 23:37, 38; 24:1, 2; Luc. 21:20-24) Pero an panginot niyang gibuhon iyo an magpahayag kan maugmang bareta.—Luc. 4:17-21.

²⁰ Mantang nasa daga, espesipikong sinabi ni Jesus sa saiyang mga disipulo: “Padagos kamong magbantay.” (Mat. 24:42) Sinunod ninda an pagbuot niya asin nagserbi sindang mga bantay, na nagpapatanid na isinikwal na ni Jehova an nasyon nin Israel asin an daganon na siyudad nin Jerusalem. (Roma 9:6-8; Gal. 4:25, 26) Arog kan mga bantay na nainot sa sainda, igwa man sindang darang maugmang bareta. Kaiba diyan an pambihirang bareta na mapapabilang na an mga Hentil sa linahidan nin espiritu na Israel nin Diyos asin na may pribilehiyo sindang tumabang ki Cristo sa pagbalik kan dalisay na pagsamba sa daga.—Gibo 15:14; Gal. 6:15, 16; Kap. 5:9, 10.

21. Paano nagin marahayon na halimbawa si Pablo sa pagigin bantay?

²¹ Saro si apostol Pablo sa mga bantay kan inot na siglo na nagpahiling nin marahayon na halimbawa sa pagigin bantay. Sineryoso niya an paninimbagan niya. Arog ni Ezekiel, aram niya na magkakasala siya sa dugo kun dai niya magigibo an saiyang asignasyon. (Gibo 20:26, 27) Arog kan ibang bantay, dai sana nagpatanid si Pablo kundi nagpahayag man siya nin maugmang bareta. (Gibo 15:35; Roma 1:1-4) Sa katunayan, sa paggiya kan banal na espiritu, kinotar niya an propesiya ni Isaias: “Abaang gayon sa kabukidan kan mga bitis kan saro na nagdadara nin maugmang bareta,” asin ikinonektar niya ini sa gibuhon kan mga parasunod ni Cristo na paghuhulit manungod sa Kahadian nin Diyos.—Isa. 52:7, 8; Roma 10:13-15.

22. Ano an nangyari pagkagadan kan mga apostol?

²² Pagkagadan kan mga apostol, nangibabaw sa Kristiyanong kongregasyon an ihinulang apostasya. (Gibo 20:29, 30; 2 Tes. 2:3-8) Sa  laog nin halawig na panahon, mas duminakul an arog-duot na palsong mga Kristiyano kisa sa arog-trigo na mga parasunod ni Cristo, asin an malinaw na mensahe manungod sa Kahadian nin Diyos natahuban kan palsong mga katukduan. (Mat. 13:36-43) Alagad, kan uminabot na an panahon para mag-interbenir si Jehova, ipinahiling niya giraray an saiyang pagkamuot asin hustisya paagi sa pagnombra nin mga bantay na mapaabot nin malinaw na patanid asin mapahayag nin maugmang bareta. Siisay an mga bantay na ini?

23. Ano an nagin papel ni C. T. Russell asin kan saiyang mga kairiba?

²³ Durante kan mga taon bago 1914, si Charles Taze Russell asin an saiyang mga kairiba nagserbing “mensahero” na ‘maandam kan aagihan [o, dalan]’ bago establisaron an Mesiyanikong Kahadian. * (Mal. 3:1, nota sa ibaba) Ginibo man kan grupong iyan an trabaho nin sarong bantay, na ginagamit an magasin na Zion’s Watch Tower and Herald of Christ’s Presence para makatabang sa pagpatanid manungod sa paghukom nin Diyos asin sa pagpahayag kan maugmang bareta manungod sa Kahadian nin Diyos.

24. (a) Paano nagserbing bantay an maimbod na uripon? (b) Ano an nanudan mo sa halimbawa kan nainot na mga bantay? (Hilingon an tsart na “Nagkapirang Marahay na Halimbawa na mga Bantay.”)

²⁴ Pagkatapos na maestablisar an Kahadian, nagnombra si Jesus nin sadit na grupo nin mga lalaki na maglilingkod bilang maimbod na uripon. (Mat. 24:45-47) Puon kaidto, an maimbod na uripon, na ngunyan midbid bilang an Namamahalang Grupo, an nagseserbing bantay.  Nanginginot iyan bako lang sa pagtao nin patanid manungod sa “aldaw nin pamamalos” kundi pati man sa pagbalangibog kan “taon nin marahay na buot ni Jehova.”—Isa. 61:2; hilingon man an 2 Corinto 6:1, 2.

25, 26. (a) Ano an dapat gibuhon kan gabos na parasunod ni Cristo, asin paano ninda iyan ginigibo? (b) Ano an pag-uulayan niyato sa sunod na kapitulo?

²⁵ Mantang pinapanginutan kan maimbod na uripon an trabaho nin sarong bantay, pinagbutan ni Jesus an “gabos” niyang parasunod na ‘padagos na magbantay.’ (Mar. 13:33-37) Sinusunod ta an pagbuot na iyan paagi sa pagdadanay na mata sa espirituwal, na maimbod na sinusuportaran an presenteng panahon na bantay. Pinapatunayan ta na mata kita paagi sa pag-utob kan satong paninimbagan na maghulit. (2 Tim. 4:2) Taano ta ginigibo ta iyan? An sarong dahilan iyo na gusto tang magligtas nin buhay. (1 Tim. 4:16) Dai mahahaloy, dakulon an magagadan huling binaliwala ninda an pagpatanid kan presenteng panahon na bantay. (Ezek. 3:19) Pero an satong panginot na dahilan iyo na gustong-gusto tang sabihon sa iba an magayunon na bareta—ibinalik na an dalisay na pagsamba! Sa ngunyan, durante kan “taon nin marahay na buot ni Jehova,” bukas an pinto para sa dakul na iba pa na umiba sa sato sa pagsamba sa satong makatanusan asin mamumuton na Diyos na si Jehova. Dai mahahaloy, an gabos sa daga na makakaligtas sa katapusan kan maraot na sistemang ini makikinabang sa may pagmalasakit na pamamahala kan saiyang Aki, si Cristo Jesus. Kaya dai ta nanggad matitios na dai tumabang sa presenteng panahon na bantay sa pagpaabot kan arog kaiyan na maugmang bareta!—Mat. 24:14.

²⁶ Bago pa man matapos an maraot na sistemang ini, pinagkasararo na ni Jehova sa makangangalas na paagi an saiyang banwaan. Sa masunod na kapitulo, tutukaron an sarong propesiya may koneksiyon sa duwang pidaso nin kahoy na ginamit para iilustrar kun paano nangyari an pagkasararong iyan.