1. Kai si ilakoken nabi-nabi Jahwe si ipeseri ras penjaga-penjaga? Kai si dungna terjadi bas kota Jerusalem?

SANGA matawari nandangi terbenam, lit sekalak penjaga bas tembok Jerusalem. Iperdiatekenna kerina ku sekeliling kota e. Rempet idahna pasuken Babilon sangana reh ndeheri kota e. Mis buatna trompetna janah empetna kel ngembussa. Tapi, penduduk Jerusalem lanai sempat erkai pe. Puluhen tahun dekahna enggo suruh Jahwe nabi-nabiNa ntah pe penjaga-penjaga guna mpersingeti kalak e. Tapi la diate kalak e, la kalak e tek, janah sembahna ka berhala. Gundari kalak e enggo ikepung. Bulan tande bulanna, dungna ilubangi pasuken Babilon me tembok kota e, ihancurken kalak e rumah pertoton, bunuhina penduduk Jerusalem, janah lit ka si itabanna.

2, 3. (a) Situasi kai si nandangi iadapi kerina kalak si lit bas doni enda? Kai si arus ilakoken kalak e gundari? (b) Penungkunen kai si nandangi sibahas?

² Gundari, pasuken Jahwe si lit i surga sangana ersikap guna erperang ngelawan kalak si la erkiniteken. (Ket. 17:12-14) Perang e terjadi pagi bas pendungi kiniseran si mbelin, si lenga pernah terjadi. (Mat. 24:21) Tapi, gundari lit denga waktu guna megiken persinget arah penjaga-penjaga si ipilih Jahwe e.

 ³ Engkai maka pilih Jahwe penjaga-penjaga? Berita kai si ipeseh kalak e? Ise saja si ipilih jadi penjaga, janah kai tugasta? Mari sidarami jawapenna.

4. Engkai maka ipilih Jahwe penjaga-penjaga? (Nen gambar bas awal pasal.)

⁴ Baca Esekiel 33:7. Bas jaman si mbarenda, sekalak penjaga biasana cinder i datas tembok kota guna mastiken pendudukna la iserang musuh. Kalak e jadi bukti maka ermediate peminpin kota e man rakyatna. Amin pe sora trompet e banci erban mesui cuping kalak si megisa ras erban sengget kalak si sangana medem, tapi e banci nelamatken kalak e. Bage ka me Jahwe, ipilihNa penjaga-penjaga labo gelah mbiar kalak Israel megi berita penghakimen, tapi perban keleng ateNa umatNa janah selamat ateNa kalak e.

5, 6. Kai buktina maka Jahwe e adil?

⁵ Sanga Esekiel ipilih Jahwe jadi penjaga, situhuna cidahken Jahwe sipat-sipatNa si erban tenang ukurta. Mari sipelajari dua sipatNa e.

⁶ Keadilen: Jahwe e adil perban Ia labo erpilihen. Contohna, sanga teremen kalak Israel la nggit megiken berita si ipeseh Esekiel, labo ianggap Jahwe kerina kalak e mberontak, persingetiNa ‘kalak si jahat’ ras “kalak si benar.” Enda mbuktiken maka merhat Jahwe ngidah uga tanggapen tiap kalak. Emaka, penghukumen Jahwe sesuai ras tanggapen tiap kalak man beritaNa.​—Esek. 33:8, 18-20.

7. Sanga hakimi Jahwe manusia, uga banNa carana?

⁷ Keadilen Jahwe pe teridah sanga hakimiNa kalak. Hakimi Jahwe manusia labo menurut kesalahenna si mbarenda, tapi menurut tanggapen kalak e man persingetNa. Nina Jahwe man Esekiel, “Sanga Kukataken man kalak jahat, ‘Pasti kam mate,’ tapi kenca si e robah ia arah dosana nari janah lakokenna kai si adil ras benar, . . . pasti ia tetap nggeluh.” Kenca si e nina Jahwe ka, “Sada pe dosana e lanai iinget.” (Esek. 33:14-16) Tapi kalak si enggo ngelakoken kai si benar, la banci banna e jadi alasenna guna mberontak. Nina Jahwe adi kalak si benar ‘ngelakoken kai si salah perban akapna perbahanenna si benar sedekah enda banci nelamatken ia, labo pagi iinget sada pe perbahanenna si benar e. Pasti ia mate perban kesalahenna e.’​—Esek. 33:13.

8. Engkai maka persinget nabi-nabi mbuktiken maka Jahwe e adil?

⁸ Jahwe pe terbukti adil perban ndauh sope berekenNa hukumen, ipersingetiNa nge leben. Sope Jerusalem ikernepken, enggo persingeti Esekiel penduduk kota e kira-kira enem tahun dekahna. Tapi, labo Esekiel si pertama ipilih jadi penjaga guna mpersingeti umat Dibata. Kira-kira 200 tahun sope  Jerusalem ikernepken, enggo isuruh Jahwe me Nabi Hosea, Jesaya, Miha, Oded, ras Jeremia guna ertugas jadi penjaga. Suruh Jahwe me Jeremia mpersingeti kalak Israel, nina, “Kuban penjaga-penjaga si ngataken, ‘Perdiateken sora trompet tanduk!’” (Jer. 6:17) Emaka, sanga lit penduduk Jerusalem si mate perban iserang pasuken Babilon, Jahwe bage pe penjaga-penjaga e la banci isalahken.

9. Uga Jahwe ncidahken kekelengenNa si setia?

⁹ Kekelengen: Kekelengen Jahwe si setia jelas teridah sanga suruhNa penjaga-penjaga guna mpersingeti kalak. Labo kalak si benar saja ngenca persingetiNa tapi kalak jahat pe. Padahal enggo ceda kel ukur Jahwe ban kalak e janah enggo ka ban kalak e ceda gelarNa. Cuba bayangken, bangsa Israel itandai kalak selaku umat Jahwe, tapi mulih-ulih hianati kalak e Ia janah sembah kalak e dibata-dibata palsu. Ikataken Jahwe maka ceda kel ukurNa, bali bagi sekalak perbulangen si ndeharana erlua-lua. (Esek. 16:32) Amin pe bage, Jahwe labo mis nyerah. Labo ateNa balas dendam, tapi mulihi min ateNa umatNa nembah Ia. Sanga berekenNa penghukumen, e pilihen si terakhir labo si pertama. Engkai? Sebap ikatakenNa man Esekiel, “Labo Kuakap meriah ngidah kalak jahat mate, tapi meriah Kuakap adi kalak jahat robah arah perbahanenna janah tetap ia nggeluh.” (Esek. 33:11) Bage me perasan Jahwe seh ngasa gundari.​—Mal. 3:6.

10, 11. Kai saja si banci sipelajari arah cara Jahwe erurusen ras umatNa?

 ¹⁰ Sanga Jahwe erurusen ras kalak Israel, kai si banci sipelajari arah sipatNa si adil ras perkeleng? Pertama, sanga kita erberita la banci sianggap kerina kalak seri. Arus siinget maka tiap kalak labo seri. Ula sianggap lit kalak si la cocok ngaloken beritata perban perbahanenna si mbarenda, ntah pe perban budayana, sukuna, bahasa, ntah pe pendahinna. Si iajarken Jahwe man Rasul Petrus berlaku denga man banta gundari. Nina, “Dibata la erpilihen. Kerina kalak arah bangsa si apai pe, adi mbiar man Dibata janah ngelakoken kai si benar, pasti alokenNa.”​—Perb. 10:34, 35.

¹¹ Pelajaren si peduaken, arus kita hati-hati. Arus siinget, kita pe banci ngelakoken dosa bali bagi kalak si jumpai kita sanga erberita. Sidalanken min nasehat man runggun Korinti mbarenda, nina, “Kalak si paguh kapna pertedisna, hati-hatilah gelah ula ia ndabuh. Kerina percuban si adapi kena situhuna percuban si biasa adapi kerina kalak.” (1 Kor. 10:12, 13) Selain si e, amin pe enggo silakoken kai si benar, e la banci jadi alasenta guna ngelakoken dosa. Emaka, ula sianggap banci silakoken kai si salah perban enggo silakoken kai si benar. (Esek. 33:13) La soal asa kai dekahna kita enggo ngelayani Jahwe, arus kita tetap meteruk ukur ras patuh.

12. Adi pernah silakoken dosa si serius, kai si perlu siinget?

¹² Uga adi pernah silakoken dosa si serius, janah salah denga lalap siakap banta? Arah kai si itulis Esekiel, siteh maka  hukum Jahwe kalak si erdosa si la nggit ertobat. Tapi siteh maka Jahwe e Dibata si perkeleng labo pendendam. (1 Joh. 4:8) Adi sicidahken arah perbahanenta maka kita enggo ertobat, ula siakap dosata e mbelinsa guna iampuni. (Jak. 5:14, 15) Nggit Jahwe ngampuni kalak Israel si enggo erlua-lua secara rohani, pasti nggit ka Ia ngampuni kita.​—Ms. 86:5.

13, 14. (a) Berita si uga nge si arus ipeseh penjaga-penjaga e? (b) Berita kai si ipeseh Jesaya?

¹³ Baca Esekiel 33:2, 3. Berita si uga nge si arus ipeseh penjaga-penjaga si ipilih Jahwe? Memang salah sada tugas kalak e si penting eme mpeseh persinget, tapi peseh kalak e ka nge berita si meriah. Mari siperdiateken contohna.

¹⁴ Jesaya mulai ernubuat kira-kira tahun 778 SM seh ku tahun 732 SM. Persingetina penduduk Jerusalem maka reh pagi pasuken Babilon nyerang kalak e ras naban kalak e. (Jes. 39:5-7) Tapi tulis Jesaya ka, “Begikenlah! Penjaga-penjagandu erlebuh. Ras-ras kalak e ersurak, perban idah kalak e alu jelas maka enggo ipepulung Jahwe mulihi Sion.” (Jes. 52:8) Seh kel riahna berita si ipeseh Jesaya, eme lit pagi masana Jahwe mulihi isembah alu cara si benar!

15. Kai si ipeseh Jeremia?

¹⁵ Jeremia ernubuat mulai tahun 647 SM seh ngasa tahun 580 SM. Ikataken kalak ia “si maba berita si la mehuli.” Pasti tutus kel ate Jeremia mpersingeti kalak Israel kerna bencana si nandangi terjadi. * Tapi pesehna kang berita si meriah, eme mulih pagi umat Dibata ku kutana janah banci mulihi sembah kalak e Jahwe alu cara si benar i je.​—Jer. 29:10-14; 33:10, 11.

16. Kai gunana berita Esekiel man kalak si itaban i Babilon?

¹⁶ Esekiel ipilih jadi penjaga bas tahun 613 SM, janah idalankenna tugas e kira-kira seh tahun 591 SM. Bas Pasal 5 ras 6 buku enda, enggo sipelajari maka peseh Esekiel berita penghakimen Dibata man kalak Israel. Tutus kel atena ngelakoken tugasna e, emaka la ia rutang dareh. Situhuna berita si ipeseh Esekiel labo man kalak si murtad si lit bas Jerusalem saja, tapi sampatina ka kalak si itaban bas Babilon gelah tetap ndeher ras Dibata. Emaka kalak e enggo ipersiapken guna ngelakoken dahinna pagi. Kenca 70 tahun kalak e itaban, ibaba Jahwe pagi mulihi kalak Israel ku kutana si enggo mejile bagi si mbarenda. (Esek. 36:7-11) Teremen arah kalak Israel si mulih e eme anak-anak bage pe kempu-kempu arah kalak si megiken berita Esekiel. Bali bagi si ibahas bas pasal-pasal si deban si lit bas Bagin 3 buku enda, melala peseh Esekiel berita si meriah kerna mulihi pagi sembah kalak Jahwe alu cara si benar bas Jerusalem.

17. Katawari saja nge suruh Jahwe penjaga-penjaga ertugas?

 ¹⁷ Selain nabi-nabi si ipilih Jahwe guna mpersingeti umatNa sope Jerusalem ikernepken bas tahun 607 SM, lit ka penjaga-penjaga si deban si pilih Jahwe. Tiap lit kejadin si penting si lit hubungenna ras sura-sura Jahwe, sope e terjadi, pasti suruhNa penjaga-penjaga guna mpersingeti ras mberitaken berita si meriah.

18. Kai tugas Johanes Peridiken?

¹⁸ Bas abad pertama M, Johanes Peridiken ipilih jadi penjaga. Persingetina kalak Israel maka ntisik nari lanai anggap Dibata kalak e jadi umatNa. (Mat. 3:1, 2, 9-11) Tapi, lit ka dahinna si deban. Ikataken Jesus maka Johanes e “utusen” si nikapken dalan man Mesias. (Mal. 3:1; Mat. 11:7-10) Enda ertina ia pe mberitaken berita si meriah kerna “Anak Biri-Biri Dibata” eme Jesus si enggo reh guna “nasapken dosa doni” enda.​—Joh. 1:29, 30.

19, 20. Uga Jesus ras murid-muridna ertugas jadi penjaga?

¹⁹ Arah kerina penjaga si ipilih Jahwe, si pentingna eme Jesus. Bali bagi Esekiel, ia isuruh Jahwe ndahi “kalak Israel.” (Esek. 3:17; Mat. 15:24) Persingeti Jesus kalak Israel maka lanai pagi anggap Dibata kalak e jadi umatNa janah kota Jerusalem ihancurken pagi. (Mat. 23:37, 38; 24:1, 2; Luk. 21:20-24) Tapi dahin Jesus si pentingna eme mpeseh berita si meriah.​—Luk. 4:17-21.

²⁰ Sanga i doni, jelas kel kataken Jesus man murid-muridna nina, “Tetaplah erjaga-jaga.” (Mat. 24:42) Patuhi kalak e perentah Jesus janah lakoken kalak e dahin penjaga. Persingeti kalak e ka maka enggo itulak Jahwe kalak Israel bage pe Jerusalem si lit i doni. (Rom. 9:6-8; Gal. 4:25, 26) Bali bagi penjaga si lit sope kalak e, kalak e pe mpeseh berita si meriah. Contohna, kataken kalak e maka gundari kalak si labo Jahudi pe banci ikut jadi bagin arah Israel si jadi jang Dibata ras nampati Kristus erban kerina kalak nembah Jahwe saja.​—Perb. 15:14; Gal. 6:15, 16; Ket. 5:9, 10.

21. Engkai maka Paulus usihen si mehuli?

²¹ Bas abad pertama, Paulus eme salah sada si jadi usihen. Tutus kel atena ndalanken tugasna. Bali bagi Esekiel, tehna maka adi la dalankenna tugasna banci ia rutang dareh. (Perb. 20:26, 27) Bali bagi penjaga-penjaga si lit sope ia, labo ngenca persinget saja si ipeseh Paulus, tapi pesehna ka berita si meriah. (Perb. 15:35; Rom. 1:1-4) Isampati kesah si badia ia guna ngutip nubuat Jesaya si ngataken, “Seh kel riahna ukur ngidah kalak si mpeseh berita si meriah i gunung-gunung.” Ikataken Paulus maka nubuat e terjadi sanga pengikut Kristus  mberitaken berita kerna Kerajan Dibata.​—Jes. 52:7, 8; Rom. 10:13-15.

22. Kai si terjadi kenca mate rasul-rasul?

²² Kenca mate rasul-rasul, reh teremna kalak si murtad bas runggun Kristen bagi si enggo inubuatken. (Perb. 20:29, 30; 2 Tes. 2:3-8) Enggo ndekah kalak Kristen si palsu (sesa) teremen jumlahna asangken kalak Kristen situhu-tuhu (page). Berita kerna Kerajan Dibata pe itutupi ajaren si palsu. (Mat. 13:36-43) Tapi sanga nandangi seh waktu si itetapken Jahwe guna ertindak, kekelengenNa ras keadilenNa erban Ia mulihi milih penjaga-penjaga. Ipeseh kalak e persinget si jelas bage pe berita si meriah. Ise kin penjaga-penjaga e?

23. Kai tugas C. T. Russell ras teman-temanna?

²³ Sope tahun 1914, Charles Taze Russell ras teman-temanna ertugas jadi ‘utusen’ si ‘nikapken dalan’ sope pajek Kerajan Mesias. * (Mal. 3:1) Kalak e pe ertugas jadi penjaga. Arah majalah “Sora Ermomo Sion ras Pengumumen kerna Kerehen Kristus” (Zion’s Watch Tower and Herald of Christ’s Presence), peseh kalak e persinget kerna penghakimen Dibata, janah beritaken kalak e ka berita si meriah kerna Kerajan Dibata.

24. (a) Uga budak si setia ras pentar ertugas jadi penjaga? (b) Kai si banci pelajarindu arah penjaga-penjaga bas jaman si mbarenda? (Nen kotak “Penjaga-Penjaga si Jadi Usihen.”)

 ²⁴ Kenca pajek Kerajan Dibata, ipilih Jesus sada kelompok si kitik jadi budak si setia ras pentar. (Mat. 24:45-47) Mulai je nari, budak si setia si gundari itandai selaku Badan Pinpinen terus ertugas jadi penjaga. Kalak e jadi pinpinen sanga mpeseh persinget kerna “wari pembalasen” Dibata bage pe sanga mpeseh berita kerna “tahun kiniulin Jahwe.”​—Jes. 61:2; nen ka 2 Korinti 6:1, 2.

25, 26. (a) Tugas kai si arus ilakoken kerina pengikut Kristus? Uga cara kalak e ngelakokenca? (b) Kai kari sibahas bas pasal seterusna?

²⁵ Memang si ertanggung jawap jadi penjaga eme budak si setia ras pentar. Tapi suruh Jesus gelah “kerina” pengikutna “tetap erjaga-jaga.” (Mrk. 13:33-37) Sipatuhi perentah e adi tetap kita sadar secara rohani janah setia kita ndukung penjaga si lit bas jamanta. Sibuktiken maka tetap kita sadar secara rohani, adi sidalanken tanggung jawapta erberita. (2 Tim. 4:2) Salah sada alasenta erberita perban merhat kita kalak selamat. (1 Tim. 4:16) Siteh maka ntisik nari enterem kalak si mate perban la begikenna persinget arah penjaga si lit bas jamanta. (Esek. 3:19) Tapi alasenta si utama ngelakoken dahin enda perban merhat kita gelah teh kalak berita si meriah kerna enggo banci sisembah Dibata alu cara si benar. Gundari me masana “tahun kiniulin Jahwe,” enterem kalak lit denga kesempatenna gelah banci nembah Jahwe, Dibata si adil ras perkeleng. Ntisik nari kerina kalak si selamat arah Harmagedon banci jadi rakyat arah pemerentahen AnakNa eme Kristus Jesus si perkuah. Pasti nggit kita ndukung penjaga si lit bas jamanta alu mberitaken berita si meriah e!​—Mat. 24:14.

²⁶ Situhuna sope doni si jahat enda ikernepken pe, enggo ipersada Jahwe umatNa. Enda tuhu-tuhu sada mukjizat. Kerna persadan enda, reh jelasna kari sipelajari bas pasal seterusna si mbahas nubuat kerna dua tongkat.