1. ¿Mbaʼe avísopa omeʼẽ vaʼekue umi guárdia Jehová ombou vaʼekue, ha mbaʼépa oiko upéi?

PETEĨ guárdia oñemboʼy hína Jerusalén murálla ári. Kaʼaruetéma ha haʼe osegínte oñatende porã. Omoĩ la ipo isyváre omoʼã hag̃ua hesa kuarahýgui, ikatu hag̃uáicha ohecha mombyry. Upeichaháguinte haʼe tuicha orrespira ha ojagarra ombopu ituru ha oporoavisa: “¡Pe ehérsito babilonio og̃uahẽ mbotaite hína!”. Péro oñehendúvo pe avíso tárdema ojapo hag̃ua álgo umi oikóva pe siudápe. Heta tiémporema ningo Jehová onombra vaʼekue guárdia, térã proféta, oavisa hag̃ua chupekuéra upe día og̃uahẽtaha, péro umi hénte nopenái. Ha koʼág̃a pe ehérsito babilonio omongoráma pe siuda. Upéi, omongora rire hikuái pe siuda heta mésere, umi soldádo ohasa pe murálla ha oike pe siudápe, ohundi pe témplo, ha ojagarra térã ojuka umi oikóvape Jerusalénpe.

2, 3. a) ¿Mbaʼe situasiónpa koʼẽrõite ombohováita entéro umi oikóva ko yvy ape ári? b) ¿Mbaʼe mbaʼépa ñambohováita koʼág̃a?

² Ñane tiémpope, Jehová ehérsito yvagapegua ou hína oñorairõ hag̃ua umi ndojeroviáivandi Ñandejárare ko yvy ape ári (Apoc. 17:12-14). Upe gérra oikótava omohuʼãta pe jehasa asy guasu ivaivéva ohasátava yvyporakuéra (Mat. 24:21). Péro oĩ gueteri tiémpo umi hénte ohendu hag̃ua pe avíso omeʼẽva hína pe guárdia Jehová onombra vaʼekue.

 ³ ¿Mbaʼérepa Jehová onombra rakaʼe guárdia? ¿Mbaʼe mensáhepa omeʼẽ pe guárdia? ¿Máva mávapa oservíma rakaʼe guárdiaramo? ¿Mbaʼéichapa ñande japartisipa avei upe traváhope? Ñambohovaimi koʼág̃a koʼã porandu.

4. ¿Mbaʼérepa Jehová onombra rakaʼe umi guárdia? (Ehecha pe taʼanga oĩva iñepyrũme).

⁴ (Elee Ezequiel 33:7). Yma umi guárdia oĩmi vaʼerã pe siuda murálla ári oprotehe hag̃ua umi oikóvape upe siudápe. Haʼekuéra oĩ haguére upépe ohechauka pe governánte ojepyʼapyha ipuévlore. Ha pe turu pu omondýitaramo jepe umi hénte okévape hína, upe rruído hatãite hyapúva ikatu osalva umi iñeʼẽrendúvape upe avísope. Upéicha avei Jehová onombra umi guárdia, péro ndahaʼéi omondýi hag̃ua umi israelítape heʼívo ojekastigataha chupekuéra, síno ojepyʼapýgui ipuévlore ha oipotágui ojesalva hikuái.

5, 6. ¿Mbaʼe ehémplopa ohechauka Jehová hustísia?

⁵ Jehová oikuaauka umi kualida orekóva ha ñanekonsoláva onombrárõ guare Ezequiélpe oiko hag̃ua guárdiaramo. Jahechamína mokõi kualida.

⁶ Hustísia: Jehová ohechauka ihustísia otratávo káda uno isiervokuérandi. Por ehémplo, hetaiterei hénte nohenduséi ha orrechasáramo jepe Ezequiel mensáhe, Jehová ndotratái enterove israelítape rrevélderamo. Upéva rangue, haʼe ohechase mbaʼéichapa káda israelita orresponde pe mensáhepe. Ñandejára heta vése heʼi oñeñeʼẽ hag̃ua “peteĩ persóna iñañávape” ha ‘peteĩ ihústovape’. Upéicharõ, Jehová ohusga káda únope asegún mbaʼéichapa orresponde pe mensáhepe (Ezeq. 33:8, 18-20).

7. ¿Mbaʼépa Jehová oreko enkuénta ohusga hag̃ua la héntepe?

⁷ Jahechakuaa avei Jehová hustísia ñañatendévo mbaʼéichapa haʼe ohusga la héntepe. Káda uno orrendíta kuénta Jehovápe, ndahaʼéi umi mbaʼe ojapo vaʼekuére yma, síno orresponde lájare ohendúvo pe avíso koʼág̃a oñemeʼẽva. Jehová heʼi Ezequiélpe: “Ág̃a che haʼe vove pe iñañávape: ‘Nde katuete remanóta’, ha haʼe oheja hembiapo vaikue ha ojapo umi mbaʼe iporã ha ihústova [...] haʼe katuete osegíta oikove”. Upéi Jehová heʼive ko mbaʼe iñimportantetéva: “Ni peteĩ umi ipekadokuéra ndojepurumoʼãi ikóntrape” (Ezeq. 33:14-16). Péro ndeʼiséi avei peteĩ persóna iñeʼẽrendu vaʼekue Jehovápe ymave, ikatumaha koʼág̃a hembiapo vai. Jehová heʼi voi oiméramo peteĩ persóna “ojerovia ojapo haguére umi mbaʼe ihústova ha ojapo upe oĩ vaíva, upéicharõ avave naimanduʼamoʼãi ni peteĩ mbaʼe ihústova ojapo vaʼekuére, síno omanóta upe mbaʼe vai ojapo vaʼekuére” (Ezeq. 33:13).

8. ¿Mbaʼépa ñanemboʼe Jehová hustísiagui umi avíso omeʼẽva?

⁸ Jahechakuaa avei Jehová hustísia ko mbaʼépe: Haʼe siémpre oporoavisa ojapo mboyve álgo. Ezequiel oñepyrũ vaʼekue itraváho oiméne 6 áño pe ehérsito babilonio ohundi mboyve Jerusalén. Péro Ezequiel ndahaʼéi vaʼekue pe primero oavisáva pe puévlope orrenditaha kuénta Jehovápe. Oiméne mas de 100 áño oñehundi mboyve Jerusalén, Jehová omondo vaʼekue proféta Oseas, Isaías, Miqueas, Oded  ha Jeremíaspe. Jehová heʼi vaʼekue Jeremíaspe omomanduʼa hag̃ua umi israelítape: “Che amoĩ umi guárdia oĩva tórrepe, ha haʼekuéra heʼi: ‘¡Peñatendékena pe turu púre!’” (Jer. 6:17). Ndaikatúi vaʼekue ojekulpa Jehovápe ni umi guárdiape omano haguére umi hénte umi babilonio oúrõ guare okumpli hag̃ua Jehová huísio.

9. ¿Mbaʼéichapa Jehová ohechauka oporohayhuetereiha?

⁹ Mborayhu: Jehová ohechauka oporohayhuetereiha omondóvo umi guárdia oavisa hag̃ua, ndahaʼéi umi ihústovape añónte, síno avei umi iñañávape, umi omokorasõ rasy vaʼekuépe chupe ha omongyʼáva chugui héra. Ñapensamíntena: Umi israelítape ojekuaa vaʼekue Jehová puévloramo, péro haʼekuéra heta vése oheja chupe ha oho umi dios fálso rapykuéri. Jehovápe ningo hasyeterei kuri otraisiona haguére chupe hikuái, upévare ombojoja pe tetãme peteĩ tembireko omoakãratĩvare iménape (Ezeq. 16:32). Upéicharõ jepe, Jehová ndojedehái chuguikuéra ensegída. Haʼe oñehaʼã oiko porã jey hendivekuéra, ndahaʼéi oñevengaséva hesekuéra. Jehová siémpre omeʼẽ vaʼekue ipuévlope oportunida okambia hag̃ua. ¿Mbaʼérepa? Haʼe heʼi Ezequiélpe: “Che rekovére ahura peẽme nachembovyʼaiha omanóramo peteĩ iñañáva, upéva rangue avyʼa peteĩ iñañáva okambiáramo hape vai ha osegi oikove” (Ezeq. 33:11). Jehová ningo péicha opensa vaʼekue yma, ha koʼag̃aite peve opensa upéicha (Mal. 3:6).

10, 11. ¿Mbaʼépa ñanemboʼe Jehová otrata lájagui ipuévlope?

¹⁰ ¿Mbaʼépa ñanemboʼe Jehová otrata haguére mborayhúpe ha hustísiape umi israelítape? Peteĩ leksión hína ndovaleiha jahecha umi persóna japredikávape peteĩ grúpoicha, síno jahecha vaʼerãha chupekuéra peteĩteĩ. Tuichaite ningo jajavýta jadespresiáramo peteĩ persónape ha ñapensa nomereseiha ohendu umi notísia porã umi mbaʼe  ojapo vaʼekuére yma térã ikultúra, ipire kolór, iñidióma térã isituasión ekonómika káusare. Jehová omboʼe vaʼekue apóstol Pédrope peteĩ mbaʼe iñimportánteva koʼág̃a peve: “Ñandejára otrataha enterovépe peteĩchante, haʼe oguerohory entéro umi ojapóvape iporãva ha orrespetáva chupe ipyʼaite guive, tahaʼe haʼéva nasiónpe” (Hech. 10:34, 35).

¹¹ Ñanemboʼe avei ko mbaʼe iñimportantetéva: Jasegi vaʼerãha ñañatende mbaʼéichapa jaiko hína, ndahaʼéi ymave jajapo haguére iporãva koʼág̃a ikatútamava jajapo ivaíva. Iporã ñanemanduʼa ñandéve ñandestiraha avei umi mbaʼe vai ostiráva umi hénte japredikávape. Pe konsého apóstol Pablo omeʼẽ vaʼekue umi coríntiope ñanepytyvõ avei ñandéve: “Pe opensáva ojerovia mbareteha, toñatendéke ani hoʼa. Umi tentasión peẽ pehasáva, oñepresenta avei entéro umi ótro héntepe” (1 Cor. 10:12, 13). Ñande arakaʼeve ndajaikoséi ‘jajerovia jajapo haguére umi mbaʼe ihústova’, ha jajapo ivaíva ñapensa rupi ndajajekastigamoʼãiha pórke jajapo avei umi mbaʼe iporãva (Ezeq. 33:13). Jaservímaramo jepe heta tiémpore Jehovápe, iñimportanteterei hína jasegi ñaneumílde ha ñaneñeʼẽrendu.

12. ¿Mbaʼérepa ñanemanduʼa vaʼerã oiméramo japeka vai rakaʼe yma?

¹² ¿Ha mbaʼépa oikóta oiméramo japeka vai rakaʼe yma péro koʼág̃a peve ñañeñandu vai? Ezequiel mensáhegui ñaaprende Jehová okastigataha umi mbaʼe vai apoha noñarrepentírivape. Ñaaprende avei Jehová haʼeha Ñandejára oporohayhúva, ndahaʼéi oñevengáva (1 Juan 4:8). Ñande jahechauka vaʼerã jajapóva rupive ñañarrepentiha, ha arakaʼeve nañapensái vaʼerã Ñandejára ndaikatumoʼãiha ñaneperdona (Sant. 5:14, 15). Jehová ningo oĩ vaʼekue operdona hag̃uáicha  umi israelita oadora vaʼekuépe umi ótro dióspe, ha ñandéve avei ñaneperdonase (Sal. 86:5).

13, 14. a) ¿Mbaʼeichagua mensáhepa omeʼẽ vaʼerã umi guárdia Jehová omondo vaʼekue? b) ¿Mbaʼe mensáhepa Isaías omeʼẽ vaʼekue?

¹³ (Elee Ezequiel 33:2, 3). ¿Mbaʼeichagua mensáhepa omeʼẽ vaʼerã umi guárdia Jehová omondo vaʼekue? Haʼekuéra omeʼẽ vaʼerã avíso, péva peteĩ párte iñimportánteva ojapo vaʼerã hikuái. Péro avei omeʼẽ hikuái umi notísia iporãva. Jahechamína unos kuánto ehémplo.

¹⁴ Isaías oservi vaʼekue amo áño 778 guive 732 peve a.C., ha haʼe oavisa vaʼekue umi babilonio ojagarrataha Jerusalén ha oguerahataha umi oikóvape upépe prisionéroramo (Is. 39:5-7). Péro Ñandejára oskrivika vaʼekue avei chupe: “Ehendumi, umi guárdia oĩva pe tórre ári hatã omombeʼu la oikóva, oñondivepa peteĩ ñeʼẽme vyʼápe osapukái. Haʼekuéra ohecha porãitereíta mbaʼéichapa Jehová ombyaty jey umi hénte Siongua” (Is. 52:8). Isaías omeʼẽ vaʼekue avei pe notísia iporãvéva: ¡Ojeadora jeytaha Jehovápe haʼe oipotaháicha!

15. ¿Mbaʼe mensáhepa Jeremías omeʼẽ vaʼekue?

¹⁵ Jeremías oservi vaʼekue áño 647 guive 580 peve a.C. Heta vése umi hénte heʼi vaʼekue hese oñeʼẽha ivaívarente voi, péro Jeremías ojapo porãiterei vaʼekue itraváho oavisávo umi israelita añáme Jehová oguerutaha hiʼarikuéra heta mbaʼe vai. * Péro Jeremías omombeʼu vaʼekue avei umi notísia porã, oprofetisa Ñandejára puévlo oho jeytaha hetãme ha upépe ojeadora jeytaha Jehovápe haʼe oipotaháicha (Jer. 29:10-14; 33:10, 11).

16. ¿Mbaʼéichapa Ezequiel mensáhe oipytyvõ umi oĩvape prisionéroramo Babilóniape?

¹⁶ Ezequiélpe oñenombra vaʼekue oservi hag̃ua guárdiaramo áño 613-pe a.C., ha haʼe opyta iñasignasiónpe oiméne áño 591 peve a.C. Jahecháma haguéicha ko lívrope kapítulo 5 ha 6-pe, Ezequiel kyreʼỹme oavisa vaʼekue pe puévlo de Israélpe oñehunditaha hikuái, péicha ndojekulpamoʼãi kuri chupe omano haguére umi hénte. Haʼe oavisa vaʼekue umi ojeguerahávape prisionéroramo, Jehová okastigataha umi oñemoĩ vaʼekuépe hese Jerusalénpe. Ezequiel oipytyvõ avei umi oĩvape prisionéroramo Babilóniape osegi hag̃ua imbarete iñamista Jehovándi, ha péicha oĩ hag̃ua hikuái preparádo ojapo hag̃ua pe traváho orekótava amo gotyove. Og̃uahẽvo huʼãme umi 70 áño oĩtaha hikuái prisionéroramo, Jehová ogueraha jeýta peteĩ grúpo hembýva umi judíogui Israélpe, pe yvy oñemoporã jeýtavape (Ezeq. 36:7-11). Ko grúpope oĩta umi iñeʼẽrendu vaʼekue Ezequiélpe familiare, umi iniéto ha visnietokuéra. Jahecháma haguéicha umi kapítulo oĩvape ko lívro párte 3-pe, Ezequiel oreko vaʼekue umi notísia iporãva omombeʼu vaʼerã, ha ohechaukáva ojeadora jeytaha Jehovápe haʼe oipotaháicha Jerusalénpe.

17. ¿Mbaʼéicha javépa Jehová onombra vaʼekue umi guárdia?

¹⁷ Koʼã kuimbaʼe oservi vaʼekue profétaramo Jerusalén oñehunditaha tiémpope, áño 607-pe a.C. Péro, ¿koʼãvarentepa Jehová ojevale vaʼekue oservi hag̃ua chupe guárdiaramo? Nahániri. Oiko mboyve peteĩ mbaʼe iñimportánteva oñekumpli hag̃ua Jehová rembipota, haʼe  onombra katuete umi guárdia oavisa hag̃ua umi iñañávape ha avei omombeʼu hag̃ua umi notísia porã.

18. ¿Mbaʼe traváhopa ojapo vaʼekue Juan el Bautista?

¹⁸ Síglo primérope, Juan el Bautista oservi vaʼekue guárdiaramo. Haʼe oavisa vaʼekue Israel rogayguápe ojerrechasa potaitemaha chupekuéra (Mat. 3:1, 2, 9-11). Péro ndahaʼéi upévante la Juan ojapo vaʼekue. Jesús heʼi Juan haʼe hague pe “mensahéro” ojeprofetisa vaʼekue ha oprepara hague haperã pe Mesíaspe (Mal. 3:1; Mat. 11:7-10). Ojapo hag̃ua upe traváho, haʼe omombeʼu vaʼerã avei umi notísia porã: “Ñandejára Ovecha Raʼy”, haʼéva Jesús, oumaha ha oipeʼataha “pe pekádo ko múndogui” (Juan 1:29, 30).

19, 20. ¿Mbaʼéichapa Jesús ha idisipulokuéra oservi vaʼekue guárdiaramo?

¹⁹ Enterove umi guardiakuéra apytépe, Jesús haʼe vaʼekue pe iñimportantevéva. Ha Ezequiélpe oñemondo haguéicha, chupe avei oñemondo “Israel rogaygua” rendápe (Ezeq. 3:17; Mat. 15:24). Jesús oavisa vaʼekue ojerrechasa potaitemaha pe nasión de Israélpe ha oñehunditaha Jerusalénpe (Mat. 23:37, 38; 24:1, 2; Luc. 21:20-24). Haʼe oikuaauka vaʼekue avei umi notísia porã, upéva hína pe traváho iñimportantevéva ojapo vaʼekue (Luc. 4:17-21).

²⁰ Jesús oĩ aja ko yvy ape ári heʼi vaʼekue idisipulokuérape: “Peñatende porãke siémpre” (Mat. 24:42). Haʼekuéra ojapo upe oñemanda vaʼekue chupekuéra ha oservi guárdiaramo. Oavisa hikuái Israel rogayguápe Jehová orrechasamaha chupekuéra ha pe siuda de Jerusalénpe (Rom. 9:6-8; Gál. 4:25, 26). Umi guárdia oĩ vaʼekuéicha upe mboyve, haʼekuéra omombeʼu avei umi notísia porã. Pe mensáhe haʼekuéra omombeʼúvape oĩ ko mbaʼe ijojahaʼỹva: Umi persóna ótro tetãygua oikéta avei pe Israel Ñandejára mbaʼévape oĩháme umi unhído, ha oipytyvõta Crístope ojeadora jey hag̃ua Jehovápe haʼe oipotaháicha ko yvy ape ári (Hech. 15:14; Gál. 6:15, 16; Apoc. 5:9, 10).

21. ¿Mbaʼe ehémplopa Pablo omoĩ vaʼekue?

²¹ Umi guárdia síglo primeropegua apytépe, apóstol Pablo omoĩ vaʼekue peteĩ ehémplo ndaijojaháiva. Chupe g̃uarã tuicha rresponsavilida vaʼekue oservi guárdiaramo. Ezequiel oikuaa haguéicha, haʼe oikuaa avei ikatutaha ojekulpa chupe oĩ haguére omanóva nokumplíriramo iñasignasión (Hech. 20:26, 27). Pablo osegi vaʼekue umi ótro guárdia ehémplo, haʼe ndahaʼéi oavisánteva la héntepe, síno omombeʼu avei chupekuéra umi notísia porã (Hech. 15:35; Rom. 1:1-4). Haʼe ningo espíritu sánto rupive imanduʼa vaʼekue ko profesía Isaías oskrivi vaʼekuére: “Iporãitépa jahecha pe omombeʼúva umi notísia porã umi montáñare”. Haʼe heʼi koʼápe oñeñeʼẽha pe predikasión ojapóvare Cristo segidorkuéra oñeʼẽvo Ñandejára Rréinore (Is. 52:7, 8; Rom. 10:13-15).

22. ¿Mbaʼépa oiko vaʼekue omano rire umi apóstol?

²² Ojeprofetisáma haguéicha, omano rire umi apóstol umi opuʼãva Ñandejárare ojagarrapa pe kongregasión (Hech. 20:29, 30; 2 Tes.  2:3-8). Heta tiémpore, umi kristiáno guaʼu (oñembojojáva ñanáre) heta hetave ohóvo, ha Cristo segidorkuéra ifiélva (oñembojojáva trígore) saʼive. Péicha umi enseñánsa japu omoypytũ pe mensáhe hesakã porãva oñeʼẽva Ñandejára Rréinore (Mat. 13:36-43). Péro hiʼag̃uívo pe tiémpo Jehová ojapo hag̃ua oñekotevẽva, haʼe ohechauka jey imborayhu ha ihustísia onombrávo umi guárdia omeʼẽ hag̃ua umi avíso hesakã porãva ha omombeʼu hag̃ua umi notísia porã. ¿Mávapa rakaʼe umi guárdia?

23. ¿Mbaʼépa ojapo vaʼekue Charles Russell ha iñirũnguéra?

²³ Umi áño og̃uahẽ mboyve 1914, Charles Taze Russell ha iñirũnguéra oservi ‘pe mensahéroramo’ ha ‘oprepara pe tape’ pe Mesías oñepyrũ mboyve ogoverna * (Mal. 3:1). Upe grúpo oservi avei guárdiaramo. Upearã oipuru pe rrevísta La Torre del Vigía de Sión y Heraldo de la Presencia de Cristo (ingléspe), oavisa hag̃ua la héntepe Ñandejára oporohusgataha ha oikuaauka hag̃ua umi notísia porã oñeʼẽva Ñandejára Rréinore.

24. a) ¿Mbaʼéichapa pe esklávo de konfiánsa oservi guárdiaramo? b) ¿Mbaʼépa nde reaprende umi guárdia yma guare ehémplogui? (Ehecha pe rrekuádro “Ehémplo porã omoĩ vaʼekue umi guárdia”).

²⁴ Jesús oñepyrũ rire ogoverna, onombra peteĩ grúpo michĩvape oservi hag̃ua pe esklávo de konfiánsaramo (Mat. 24:45-47). Upe guive pe esklávo de konfiánsa, koʼág̃a ojekuaáva pe Kuérpo Governánteramo, oservi guárdiaramo. Ko esklávo omotenonde pe traváho ojejapóva ojeavisa hag̃ua Jehová “orekoha peteĩ día oñevenga hag̃ua”, ha  avei oikuaauka “haʼe orekoha peteĩ tiémpo ohechauka hag̃ua imbaʼeporãha” (Is. 61:2; ehecha avei 2 Corintios 6:1, 2).

25, 26. a) ¿Mbaʼépa ojapo vaʼerã katuete Cristo segidorkuéra, ha mbaʼéichapa jajapo upéva? b) ¿Mbaʼépa jahecháta pe kapítulo oúvape?

²⁵ Pe esklávo de konfiánsa omotenonde pe traváho ojapóva guárdiaramo. Upéicharõ jepe, Jesús heʼi ‘enterove’ isegidorkuérape ‘oñatende porã hag̃ua siémpre’ (Mar. 13:33-37). Ha ñande ñakumpli upéva ñañatende porãvo ñande jeroviáre, ha jasegívo jaapoja ñande pyʼaite guive pe guárdia oĩvape ñane tiémpope. Jahechauka avei ñañatende porãha jaikóvo ñakumpli rupi pe rresponsavilida jarekóva japredikávo (2 Tim. 4:2). ¿Mbaʼérepa jajapo upéva? Ñande ningo ñaipytyvõse ñande rapichakuérape ojesalva hag̃ua (1 Tim. 4:16). Koʼẽrõitéma ningo hetaiterei hénte omanóta nopenái rupi umi avíso omeʼẽvare pe guárdia koʼag̃agua (Ezeq. 3:19). Péro ñande ñamombeʼuseterei ñande rapichakuérape ko notísia porãite: Ojeadora jeytaha Jehovápe haʼe oipotaháicha. Upéva hína pe mbaʼe iñimportantevéva ñanemomýiva japredika hag̃ua. Koʼág̃a hína Jehová “tiémpo ohechauka hag̃ua imbaʼeporãha”, ha ojeavri hína la okẽ ikatu hag̃uáicha hetave hénte ñanemoirũ jaadora hag̃ua Ñandejára Jehová ihústo ha oporohayhuetévape. Koʼẽrõitéma enterove umi ojesalváva oñehundi vove ko múndo aña, ohupytýta umi vendisión iporãitereíva Cristo Jesús goviérno poguýpe. ¡Ajépa tuichaite priviléhio ñaipytyvõ pe guárdiape ñamombeʼúvo umi notísia porã! (Mat. 24:14).

²⁶ Jehová ningo ojapo peteĩ mbaʼe ijojahaʼỹva oñehundi mboyve jepe ko múndo aña: Haʼe ombyatýma ipuévlope oĩ hag̃ua peteĩ ñeʼẽme. Pe kapítulo oúvape jahecháta peteĩ profesía ohechaukáva mbaʼéichapa upéva oiko: Pe profesía oñeʼẽva mokõi yvyra rehe.