1. ¿Kʼusi la spasik li jkʼel-osiletik svaʼanoj Jeovae? Pe ¿kʼusi kʼot ta stojolal li Jerusalene?

 CHMAL xa batel li kʼakʼale. Ta sba smuroal li Jerusalene te oy jun jkʼel-osil ti smakoj sat ta skʼob ta skoj li kʼakʼale, yuʼun tskʼel yaʼi kʼusi chkʼot ta pasel li ta smaleb kʼakʼale. Vaʼun, ta anil noʼox tsots lik sjupan xkachu sventa tspʼijubtas li jnaklejetike. ¡Te xa nopol xtal li jbabiloniaetike! Pe mu xa kʼusi stakʼ spasik, yuʼun oy xa ta sjayibal jabil ti mu stsakik ta venta li pʼijubtasele. Li jkʼel-osiletik o j-alkʼopetik yuʼun Jeovae oy xa mas ta sien jabil ti chalik ti chtal li yajkontraike, pe muʼyuk la stsakik ta venta li jnaklejetike. Pe avie te xa sjoyobtaojik Jerusalen li yajsoltarotak Babiloniae. Kʼalal oy xa ox ta sjayibal u sjoyobtaojik jteklum li soltaroetike, la svokʼik ochel li smuroaltake, la slajesik li temploe xchiʼuk la smilik o la xchukik batel li buchʼutik muʼyuk chichʼik ta mukʼ Jeovae.

2, 3. 1) ¿Kʼusi smalaojik chkʼot ta pasel avi li krixchanoetike? 2) ¿Kʼusi ta jkʼeltik batel?

² Li soltaroetik ti tstunes Jeova sventa xchapan li jnaklejetik ta balumil ti muʼyuk xchʼunel yoʼontonike yakal xa chchapan sbaik ta sventa li paskʼope (Apok. 17:12-14). Li paskʼop taje jaʼ chakʼbe slajeb li mukʼta tsatsal vokolil ti muʼyuk bu jech kʼotem-o ta pasele (Mat. 24:21). Pe oy to kʼusi xuʼ xichʼ pasel, yuʼun ep to  buchʼutik xuʼ xchʼunik li pʼijubtasel yakal chalik li jkʼel-osiletik svaʼanoj Jeovae.

³ ¿Kʼu yuʼun svaʼanoj jkʼel-osiletik li Jeovae? ¿Kʼusi aʼyejetik chalik? ¿Buchʼutik tunemik ta jkʼel-osiletik? ¿Kʼuxi te tsakal jkʼoplaltik ek? Jkʼeltik batel.

4. ¿Kʼu yuʼun svaʼanoj jkʼel-osiletik li Jeovae? (Kʼelo li lokʼol ta slikebal kapituloe).

⁴ (Kʼelo Esekiel 33:7). Li jkʼel-osiletik ta voʼnee te chvaʼiik ti bu mas toyol ta smuroal jteklum sventa xchabiik li jnaklejetike. Kʼalal te vaʼal chilik jkʼel-osiletik li jteklume, xuʼ xakʼik venta ti oy ta yoʼonton jnaklejetik li ajvalile. Kʼalal tsjupan xkachuik ta oʼlol akʼobale, xuʼ van xiʼel to chkʼotik li jnaklejetike xchiʼuk tstotsik ta anil ta stemik. Pe xuʼ me xkolik mi la stsakik ta ventae. Li jkʼel-osiletik svaʼanoj Jeovae jaʼ jechtik tspasik ek. Kʼalal vaʼanatik yuʼun Jeovae, maʼuk sventa sibtas j-israeletik ta chopol aʼyejetik, yuʼun jaʼ sventa xakʼ ta ilel ti oy ta yoʼonton li steklumale xchiʼuk ti xuʼ sta skolelike.

5, 6. ¿Kʼusi chakʼ ta ilel ti tukʼ kʼusitik tspas li Jeovae?

⁵ Kʼalal vaʼanat yuʼun Jeova ta jkʼel-osil li Esekiele, akʼbat iluk stalelal ti xuʼ jun koʼontontik yuʼune. Jkʼeltik batel chaʼtosuk stalelal li Jeovae.

⁶ Tukʼ kʼusi tspas. Jtos ti bu chakʼ ta ilel ti tukʼ kʼusitik tspas li Jeovae jaʼ ti tskʼelutik ta jujuntale. Kalbetik jun skʼelobil, akʼo mi oy epal j-israeletik ti muʼyuk la xchʼunik li aʼyejetik laj yal Esekiele. Li Jeovae muʼyuk la snop ti jtoyba xa skotolike, yuʼun tskʼan ox tskʼel mi chchʼunik mantal ta jujuntal. Li Jeovae ep ta velta chalbe skʼoplal «li buchʼu toj chopole» xchiʼuk «li buchʼu tukʼe». Jaʼ yuʼun, sventa xchapan li krixchanoetike, tskʼel kʼu yelan chchʼunik mantal ta jujuntal (Esek. 33:8, 18-20).

7. ¿Kʼusi tstsak ta venta Jeova kʼalal chchapanvane?

⁷ Yan kʼuxi chakʼ ta ilel ti tukʼ kʼusitik tspas li Jeovae jaʼ li kʼusi tstsak ta venta kʼalal chchapan li krixchanoetike. Kʼalal oy buchʼu chchapane, maʼuk tstsak ta venta li kʼusi la spas ta voʼnee, jaʼ tstsak ta venta li kʼusi tspas mi laj xa ox yichʼ pʼijubtasele. Xi laj yalbe li Esekiele: «Mi xi laj kalbe li buchʼu toj chopole: ‹Jpʼel skʼoplal chacham›, pe mi chlik skomtsan li smule, mi chlik spas li kʼusi tukʼ xchiʼuk kʼusi leke [...], jpʼel skʼoplal chkuxi». Xi to laj yale: «Muʼyuk chichʼ tsakbel ta venta jtosuk li smul la spase» (Esek. 33:14-16). Jech xtok, li buchʼu epal jabil la spas li kʼusitik leke, pe mi la stoy sbae, muʼyuk chichʼ chʼaybel smul ta skoj ti lek toʼox kʼusitik la spase. Li Jeovae laj yal ti mi oy buchʼu «lik spat yoʼonton ta sventa ti tukʼ kʼusi tspase xchiʼuk mi lik spas li kʼusi chopole, muʼyuk chichʼ vulesel ta jolil li kʼusi tukʼ spasoje, ta xcham ta skoj li kʼusitik chopol spasoje» (Esek. 33:13).

8. ¿Kʼuxi yan chakʼ ta ilel ti tukʼ kʼusitik tspas li Jeovae?

⁸ Yan kʼuxi chakʼ ta ilel ti tukʼ kʼusitik tspas li Jeovae jaʼ ti chpʼijubtasvan kʼalal jal toʼox skʼan xkʼot ta pasel li kʼusi snopoje.  Kʼalal lik yal albil kʼopetik li Esekiele, vakib toʼox jabil skʼan slajesik Jerusalen li yajsoltarotak Babiloniae. Pe maʼuk noʼox stuk Esekiel laj yalbe jteklum ti chchapanatik yuʼun li Jeovae. Yuʼun kʼalal skʼan toʼox mas ta sien jabil xichʼ lajesel li Jerusalene, li Jeovae la stunes j-alkʼopetik sventa xkʼotik ta jkʼel-osiletik jech kʼuchaʼal Oseas, Isaias, Mikeas, Oded xchiʼuk Jeremias. Jech xtok, laj yalbe Jeremias ti xi svulesbe ta sjol li j-israeletike: «La jvaʼan jkʼel-osiletik ta toyol ti xi laj yalike: ‹¡Chikintao avaʼiik li yechʼomal kachue!›» (Jer. 6:17). Mu xuʼ xkaltik ti jaʼ ta smul Jeova mi jaʼuk li jkʼel-osiletik ti ep buchʼutik lajik ta skʼob jbabiloniaetik kʼalal chapanvan li Jeovae.

9. ¿Kʼuxi laj yakʼ ta ilel tukʼil kʼanelal li Jeovae?

⁹ Chkʼanvan. Li Jeovae laj yakʼ ta ilel tukʼil kʼanelal kʼalal la stak batel li jkʼel-osiletik sventa xbat spʼijubtasik li buchʼutik tukʼ yakʼoj sbaike, pe la spʼijubtas ek li buchʼutik chopolike ti jaʼik li buchʼutik la syayijesbeik yoʼonton Jeova xchiʼuk ti la sokesbeik skʼoplale. ¡Nopo xa noʼox avaʼi! Snaʼoj skotolik ti jaʼ steklumal Jeova li Israele. Pe ep ta velta la svalopatinik komel li Sdiosike xchiʼuk lik yichʼik ta mukʼ jecheʼ diosetik. Li Jeovae toj kʼux laj yaʼi li kʼusi la spas j-israeletike, yuʼun la skoʼoltas ta jun ajnilal ti tsloʼla smalale (Esek. 16:32). Akʼo mi jech, li Jeovae muʼyuk la snop ti muʼyuk xa kʼusi stakʼ pasele, yuʼun la skʼel kʼuxi xuʼ lek xil sbaik yan velta, maʼuk ti tspak sutele. Jaʼ to laj yakʼ lajikuk kʼalal mu xa kʼusi stakʼ pasel laj yile. ¿Kʼu yuʼun ti jech chkaltike? Xi laj yalbe stuk li Esekiele: «Muʼyuk xkuxet xa koʼonton kʼalal chcham li buchʼu toj chopole,  jaʼ xkuxet koʼonton yuʼun mi laj yikta komel li xchopol bee xchiʼuk ti xkuxie» (Esek. 33:11). Taje jech toʼox tsnop li Jeovae xchiʼuk jech-o tsnop li avie (Mal. 3:6).

10, 11. ¿Kʼusi chakʼ jchantik ti kʼu yelan laj yakʼ ta ilel tukʼilal xchiʼuk kʼanelal Jeova ta stojolal li steklumale?

¹⁰ ¿Kʼusi chakʼ jchantik ti kʼu yelan laj yakʼ ta ilel tukʼilal xchiʼuk kʼanelal Jeova ta stojolal li j-israeletike? Jtos kʼusi chakʼ jchantike jaʼ ti mu jnoptik ti koʼol skotol li krixchanoetik ta jcholbetik mantale, yuʼun jelajtik ta jujuntal. Jech xtok, mu xuʼ jnoptik ti mu sta-o jcholbetik mantal li buchʼutik oy toʼox kʼusitik chopol spasojike, ti jelel kʼu yelan xvinaj spat xokone, ti bu likem tale, mi jkʼulej o mi povre o mi jelel kʼu yelan chkʼopoj. ¡Muʼyuk me lek mi jech ta jnoptike! Jtunel-o me kuʼuntik kʼalal xi albat yuʼun Jeova li Pedroe: «Mu snaʼ xtʼujvan li Diose, yuʼun buyuk noʼox slumal lek ilbil li buchʼu chiʼta xchiʼuk ti tspas kʼusi tukʼe» (Ech. 10:34, 35).

¹¹ Yan kʼusi chakʼ jchantike jaʼ ti mu jnoptik ti xuʼ xlik jpastik kʼusitik chopol ta skoj ti la jchʼunbetik smantal Jeova ta voʼnee. Skʼan teuk ta joltik ti koʼol jpasmulilutik kʼuchaʼal li krixchanoetik ta jcholbetik mantale. Jtunel-o kuʼuntik li tojobtasel laj yalbe yajtsʼaklomtak Kristo ta Korinto li jtakbol Pabloe, xi laj yale: «Li buchʼu tsnop ti lek vaʼale akʼo me skʼel sba ti mu xyal ta lume. Muʼyuk yan akʼel ta preva chavilik, jaʼ noʼox jech chavilik jech kʼuchaʼal chil li yantike» (1 Kor. 10:12, 13). Mu jkʼantik ti jechutik kʼuchaʼal li buchʼu chlik «spat yoʼonton ta sventa ti tukʼ kʼusi tspase», ti tsnop ti muʼyuk chichʼ kastigo mi oy kʼusi chopol tspas jaʼ noʼox venta mi tspas batel li kʼusi leke (Esek. 33:13). Akʼo mi jal xa chijtunutik ta stojolal  li Jeovae tsots skʼoplal ti bikʼituk-o xkakʼ jbatik xchiʼuk ti jchʼuntik mantale.

12. ¿Kʼusi skʼan teuk ta joltik mi oy jpasoj tsots jmultik ta voʼnee?

¹² ¿Kʼusi xuʼ jpastik mi jech-o chopol chkaʼi jbatik ta skoj ti tsots jpasoj jmultik ta voʼnee? Li aʼyej laj yal Esekiele chchanubtasutik ti Jeovae chakʼbe kastigo li buchʼutik tspas smulik xchiʼuk ti muʼyuk tsutes yoʼontonike. Jech xtok, chchanubtasutik ti chkʼanvan xchiʼuk ti mu snaʼ spak sutele (1 Juan 4:8). Mi chkakʼtik ta ilel ti jsutesoj xa koʼontontik ta melele, mu jnoptik ti toj echʼ xa noʼox tsots chil jmultik Dios ti mu xa xakʼutik ta pertone (Sant. 5:14, 15). Li Jeovae ta sjunul yoʼonton laj yakʼ ta perton li j-israeletik ti valopatinvanik komele xchiʼuk jaʼ jech oy ta yoʼonton chakʼutik ta perton ek (Sal. 86:5).

13, 14. 1) ¿Kʼusi aʼyejetik chalik li jkʼel-osiletike? 2) ¿Kʼusi aʼyej laj yal li Isaiase?

¹³ (Kʼelo Esekiel 33:2, 3). ¿Kʼusi aʼyejetik chalik li jkʼel-osiletik ti svaʼanoj Jeovae? Jtos kʼusi tspasik ti tsots skʼoplale jaʼ ti chpʼijubtasvanike, pe chalik lekil aʼyejetik xtok. Jkʼelbetik junantik skʼelobil.

¹⁴ Li Isaiase tun ta j-alkʼop tetik van ta sjabilal 778 kʼalal ta 732 kʼalal muʼyuk toʼox talem Jesuse, laj yalbe jteklum ti ch-och ta skʼob Babilonia li Jerusalene xchiʼuk ti chukbil chbat li jnaklejetike (Is. 39:5-7). Xi akʼbat stsʼiba yuʼun li Dios eke: «¡Chikintao! Li jkʼel-osiletik ta toyol avuʼune tstoy yechʼomal yeik. Koʼol ta x-avanik ta muyubajel, yuʼun chil ta sat stukik ti tstsob sutel Jeova li buchʼutik likemik ta Sione» (Is. 52:8). Li Isaiase laj yal jun aʼyej ti stuk noʼox jeche, laj yal ti chchaʼta yav li melel yichʼel ta mukʼ Diose.

15. ¿Kʼusitik aʼyej laj yal li Jeremiase?

¹⁵ Li Jeremiase tun ta j-alkʼop li ta sjabilaltik 647 kʼalal ta 580 kʼalal muʼyuk toʼox talem Jesuse, li krixchanoetike laj yalik ti naka chopol li kʼusi chale. Pe toj lek li abtelal la spase, yuʼun la yalbe li jtoyba jteklum Israel ti ch-akʼbat svokolik yuʼun li Jeovae. * Jech tok, laj yal lekil aʼyejetik ti chchaʼsut ta slumalik li steklumal Diose xchiʼuk ti chchaʼta yav li melel yichʼel ta mukʼe (Jer. 29:10-14; 33:10, 11).

16. Li judaetik ti chukbil batike, ¿kʼuxi la stabeik sbalil li aʼyejetik laj yal Esekiele?

¹⁶ Li Esekiele vaʼanat ta jkʼel-osil ta sjabilal 613 xchiʼuk tsuts van yabtel ta sjabilal 591 kʼalal muʼyuk toʼox talem Jesuse. Li ta kapitulo 5 xchiʼuk 6 li ta livro liʼe, chakʼ ta ilel ti Esekiele ta sjunul yoʼonton la spʼijubtas li jteklum Israel ti chichʼ lajesel li Jerusalene. Kʼalal jech la spase, maʼuk xa kom ta sba xchʼichʼel li buchʼutik chamike. Jech xtok, maʼuk noʼox laj yalbe judaetik ti chukbil batik ta Babilonia ti ch-akʼbatik kastigo yuʼun Jeova li jvalopatinej mantaletik ta Jerusalene. Li kʼusi laj yale koltaatik sventa vikʼiluk satik ta mantal xchiʼuk ti snaʼikuk kʼusi skʼan spasike. Kʼalal mi tsʼaki 70 jabil ti chukbil batike, li Jeovae chakʼ sutuk ta Israel jtsop judaetik sventa te xnakiik (Esek. 36:7-11). Taje jaʼik li xnichʼnabtak xchiʼuk li  smamobtak judaetik ti la xchikintaik li kʼusi laj yal Esekiele. Jech kʼuchaʼal laj yal li ta yoxvokʼal ta livro liʼe, li Esekiele oy toʼox yan lekil aʼyejetik laj yal ti chal ti chchaʼta yav ta Jerusalen li melel yichʼel ta mukʼ Diose.

17. ¿Bakʼin la svaʼan jkʼel-osiletik li Jeovae?

¹⁷ Li j-alkʼopetik taje la spʼijubtasik jteklum kʼalal skʼan toʼox xchiʼuk kʼalal laj xa ox yichʼ jinesel li Jerusalen ta sjabilal 607 kʼalal muʼyuk toʼox talem Jesuse. Pe ¿mi oy to van yan buchʼutik la stunes Jeova ta jkʼel-osil? Oy. Yuʼun kʼalal skʼan toʼox xkʼot ta pasel li kʼusi snopoj tspas Jeovae, la svaʼan jkʼel-osiletik sventa spʼijubtasik li chopol krixchanoetike xchiʼuk sventa xalik batel lekil aʼyejetik.

18. ¿Kʼusi abtelal la spas li Juan J-akʼ-ichʼvoʼe?

¹⁸ Li ta baʼyel siglo kʼalal talem xa ox Jesuse, li Juan J-akʼ-ichʼvoʼe tun ta jkʼel-osil. Laj yalbe jteklum Israel ti poʼot xa xichʼik pʼajele (Mat. 3:1, 2, 9-11). Pe maʼuk noʼox taje. Li Jesuse jamal laj yal ti Juane jaʼ li j-almantal ti albil xa onoʼox skʼoplal ti chchapanbe sbe li Mesiase (Mal. 3:1; Mat. 11:7-10). Li yabtele te smakojbe skʼoplal yalel lekil aʼyejetik, yuʼun chal batel ti tal xa «li Xchʼiom Chij Dios» ti jaʼ li Jesuse xchiʼuk ti tal sventa «chchʼay mulil ta balumile» (Juan 1:29, 30).

19, 20. Li Jesus xchiʼuk yajchankʼoptake, ¿kʼuxi la spas yabtelik ta jkʼel-osiletik?

¹⁹ Ta skotol li jkʼel-osiletike, jaʼ mas tsots skʼoplal echʼ li Jesuse. Jech xtok, takat batel ta jteklum Israel jech kʼuchaʼal li Esekiele (Esek. 3:17; Mat. 15:24). Li Jesuse laj yal ti poʼot xa chichʼ pʼajel li steklumal Israele xchiʼuk ti chichʼ lajesel li Jerusalene (Mat. 23:37, 38; 24:1, 2; Luk. 21:20-24). Pe li abtel mas tsots skʼoplal tal spase jaʼ yalel li lekil aʼyejetike (Luk. 4:17-21).

²⁰ Kʼalal ay ta balumil li Jesuse, xi jamal laj yalbe li yajchankʼoptake: «Vikʼiluk-o me asatik» (Mat. 24:42). La xchʼunik li kʼusi laj yal Jesuse xchiʼuk la spas yabtelik kʼuchaʼal jkʼel-osil. Laj yalbeik jnaklejetik ti muʼyuk xa lek ch-ilatik yuʼun Jeova li jteklum Israel xchiʼuk Jerusalene (Rom. 9:6-8; Gal. 4:25, 26). Jech kʼuchaʼal li jkʼel-osiletik ta voʼnee, li yajchankʼoptak Kristoe laj yalik lekil aʼyejetik ti toj tsotsik skʼoplale, yuʼun laj yalik ti krixchanoetik ta yantik lumetike te skʼoplal li ta yajtsʼaklomtak Kristo ti tʼujbilik ta chʼul espiritu sventa xkʼotik ta Israel yuʼun Dios xchiʼuk ti tskoltaik Kristo sventa xchaʼta yav li melel yichʼel ta mukʼ Dios li ta balumile (Ech. 15:14; Gal. 6:15, 16; Apok. 5:9, 10).

21. ¿Kʼusi lek laj yakʼ ta ilel li jtakbol Pabloe?

²¹ Li jtakbol Pabloe jaʼ jun lekil jkʼel-osil echʼ li ta baʼyel sigloe, yuʼun tsots skʼoplal laj yil li yabtele. Jech kʼuchaʼal la spas li Esekiele, li Pabloe snaʼoj ti mi la spas li yabtele muʼyuk smul chkom ta sventa «li xchʼichʼel skotol krixchanoetike» (Ech. 20:26, 27). Jech kʼuchaʼal la spas li yan jkʼel-osiletike, li Pabloe maʼuk noʼox laj yal aʼyejetik sventa xpʼijubtasvan, laj yal lekil aʼyejetik xtok (Ech. 15: 35; Rom. 1:1-4). Jech xtok, beiltasat yuʼun chʼul espiritu sventa xalbe skʼoplal jun albil kʼop yuʼun Isaias ta sventa li yabtel tspasik yajtsʼaklomtak Kristo ti jaʼ li xcholel lekil aʼyejetik ta sventa li Ajvalilal yuʼun Diose, xi laj yale: «Toj kʼupil sba yakan ta ba vitsetik li buchʼu chichʼ talel lekil aʼyejetike» (Is. 52:7, 8; Rom. 10:13-15).

22. ¿Kʼusi kʼot ta pasel kʼalal cham li jtakboletike?

²² Kʼalal cham li jtakboletike, och ta stsobobbail yajtsʼaklom Kristo li jvalopatinej mantaletik ti albil xa onoʼox skʼoplale (Ech. 20:29, 30; 2 Tes. 2:3-8). Epajik tajek li jvalopatinej mantaletik ti jaʼik li chopol tsʼiʼlele, jal tajek jech kʼot ta pasel, yan li yajtsʼaklomtak Kristo ti tukʼ yakʼoj sbaik ti jaʼik li trigoe, jutukajik. Jech xtok, li jecheʼ chanubtaseletike mukul kom yuʼun li lekil aʼyejetik ta sventa li Ajvalilal yuʼun Diose (Mat. 13:36-43). Kʼalal kʼot yorail yuʼun Jeova sventa chtal skʼel li steklumale, laj yakʼ ta ilel yan velta ti kʼanvanem xchiʼuk ti tukʼ kʼusitik tspas kʼalal la svaʼan jkʼel-osiletik sventa xpʼijubtasvanik xchiʼuk xalik lekil aʼyejetike. ¿Buchʼutik li jkʼel-osiletik taje?

23. ¿Kʼusi abtelal la spasik li Charles Russell xchiʼuk li xchiʼiltake?

²³ Kʼalal skʼan toʼox li sjabilal 1914, li Charles Russell xchiʼuk li xchiʼiltake kʼotik ta j-almantal ti la sjamik be kʼalal muʼyuk toʼox vaʼanbil li Ajvalilal yuʼun Mesiase (Mal. 3:1). * Li jtsop krixchanoetik taje tunik kʼuchaʼal jkʼel-osiletik. Sventa spas li yabtelike, jaʼ la  stunesik li revista Zionʼs Watch Tower and Herald of Christʼs Presence (La Torre del Vigía de Sión xchiʼuk Heraldo de la Presencia de Cristo). Taje tun yuʼunik sventa spʼijubtasik krixchanoetik ti chtal chapanvanuk li Diose xchiʼuk sventa xalik batel lekil aʼyejetik ta sventa li Ajvalilal yuʼun Diose.

24. 1) ¿Kʼuxi spasoj yabtelik kʼuchaʼal jkʼel-osiletik li tukʼil xchiʼuk pʼijil mosoile? 2) ¿Kʼusi laj yakʼ achan li jkʼel-osiletik ti laj kalbetik skʼoplale? (Kʼelo li rekuadro «Jkʼel-osiletik ti lek la spas yabtelike»).

²⁴ Kʼalal laj xa ox yichʼ vaʼanel li Ajvalilal yuʼun Diose, li Jesuse la sbiiltas jtsop viniketik sventa xkʼotik ta tukʼil xchiʼuk pʼijil mosoil (Mat. 24:45-47). Li jtsop viniketik taje ojtikinbilik xtok kʼuchaʼal Jtsop Jbeiltasvanej xchiʼuk tunemik tal kʼuchaʼal jkʼel-osiletik. Sbainojik spʼijubtasel krixchanoetik ti chkʼot «skʼakʼalil ti tspak sutel li Jdiostike», pe maʼuk noʼox, yuʼun chalik batel xtok «li sjabilal ti chakʼ ta ilel slekil yoʼonton Jeovae» (Is. 61:2; kʼelo xtok 2 Korintios 6:1, 2).

25, 26. 1) ¿Kʼusi abtelal skʼan spasik skotol li yajtsʼaklomtak Kristoe, xchiʼuk kʼu yelan tspasik? 2) ¿Kʼusi ta jkʼeltik li ta yan kapituloe?

²⁵ Akʼo mi jaʼ vaʼanatik ta jkʼel-osil li tukʼil xchiʼuk pʼijil mosoile, li Jesuse laj yalbe skotol yajtsʼaklomtak ti skʼan vikʼiluk-o satik eke (Mar. 13:33-37). Mi vikʼil-o jsatik ta mantale, ta me jchʼuntik li kʼusi laj yal Jesuse xchiʼuk ta jkoltatik li buchʼutik vaʼanbilik ta jkʼel-osil avie. Vikʼil me jsatik mi ta jcholtik mantal ti jaʼ oy ta jbatike (2 Tim. 4:2). ¿Kʼusi tstij koʼontontik spasel taje? Jtose jaʼ ti ta jkʼantik chkol li krixchanoetike (1 Tim. 4:16). Pe jutuk xa skʼan xcham li epal krixchanoetik ti muʼyuk la xchikintaik li kʼusi laj yal li jkʼel-osil vaʼanbil avie (Esek. 3:19). Pe li kʼusi mas tstij koʼontontike, jaʼ ti ta jkʼantik ti stauk xa yorail chkaltik batel ti laj xa xchaʼta yav li melel yichʼel ta mukʼ Diose. Avi ti jaʼ to skʼakʼalil «ti chakʼ ta ilel slekil yoʼonton Jeovae» epal krixchanoetik xuʼ to jmoj chlik yichʼik ta mukʼ Jeova xchiʼuk voʼotik. Li buchʼutik kuxul chkomik kʼalal mi laj yichʼ lajesel li chopol balumile, jutuk xa skʼan sventa x-akʼbatik bendision yuʼun Jesukristo ti jaʼ li jkʼuxubinvanej Xnichʼon Jeovae. Jkoltatik li jkʼel-osil ti vaʼanbil avie xchiʼuk kaltik batel li lekil aʼyeje. ¡Taje jaʼ li kʼusi skʼan jpas jkotoltike! (Mat. 24:14).

²⁶ Yoʼ to mu xichʼ lajesel li chopol balumile, li Jeovae labal sba ti kʼu yelan stsoboj li steklumale. Li ta yan kapituloe, ta jkʼeltik jun albil kʼop ti chalbe skʼoplal taje, li albil kʼop ta sventa li chaʼtel teʼe.