1-3. (a) Boasa boi patoguhon roha ni si Hesekiel parnidaanna taringot bagas joro i? (Ida gambar di mula ni parsiajaran.) (b) Aha do na lao tabahas di pasal on?

NUNGNGA 25 taon si Hesekiel ditawan di Babel. Saonari marumur 50 taon ma ibana. Bayakkon ma songon dia pakkilalaanna. Nungnga leleng be bagas joro na di Jerusalem dipasombu hancur. Olo do ra hea si Hesekiel naeng mulak tu Jerusalem, jala lomo rohana naeng gabe malim. Alai diboto ibana do maol i saut, ai 56 taon nai bangsona i ditawan. Dang mungkin be dihilala ibana boi idaonna naposo ni Jahowa mulak tu hutana, jala boi idaonna bagas joro dipajongjong muse. (Jer. 25:11) Gabe lungun do roha ni si Hesekiel alani i?

² Alai massai burju do Jahowa. Diboto Ibana do andigan tikki na pas lao mangapuli roha ni bawa na setia on. Dilehon Ibana do parnidaan na marisi gok hatorangan lao paposson rohana. Di parnidaan i, diboan ma si Hesekiel tu hutana jala dibahen ma ibana di atas ni dolok na massai timbo. Pajuppang ma ibana dohot “sahalak bawa na marhillong songon tombaga”, suru-suruan do bawa i. Diboan ma si Hesekiel mardalani tu sakaliling ni bagas joro na mulia i. (Jaha Hesekiel 40:1-4.) Hira songon na so di bagasan parnidaan do pakkilalaan ni si Hesekiel. Dipatogu do haporseaonna  mangida parnidaan i. Mungkin adong do na mambahen ibana bingung, ai godang do na diida ibana di bagas joro i sarupa tu bagas joro na di Jerusalem. Alai godang do muse na so sarupa.

³ Parnidaan on disurat di sia bindu na parpudi sian bukku Hesekiel. Tabahas ma cara na songon dia do lao tapakke mangattusi parnidaan on. Tabahas ma muse aha do beda ni bagas joro na diida si Hesekiel tu bagas joro na dibahas si Paulus marratus taon dukkon i. Jala na parpudi, tabahas ma muse aha do lapatan ni parnidaan on tu si Hesekiel dohot tu akka halak na ditawan i.

4. Songon dia do najolo publikasitta patorakkon parnidaan taringot bagas joro, alai cara na songon dia do na porlu saonari?

⁴ Najolo, bagas joro na di parnidaan ni si Hesekiel i didok do di publikasitta sarupa tu bagas joro na dibahas Apostel Paulus di suratna tu halak Heber. * Jadi tikki i, hatorangan ni si Paulus taringot tabernakel i do na tapakke lao manottuhon aha na digombarhon akka na adong di bagas joro na diida si Hesekiel. Alai dung diriset muse lam godang, ditangiakkon, jala dirimangi, diboto ma porlu do cara na ummura lao mangattusi bagas joro na diida si Hesekiel.

5, 6. (a) Aha do na didok si Paulus taringot akka na di tabernakel, jala songon dia do ibana patuduhon na serep rohana tikki patorakkon i? (b) Songon dia do hita maniru cara ni si Paulus tikki naeng mamboto bagas joro na diida si Hesekiel i?

⁵ Dang pola porlu talului lapatan ni sude na adong di bagas joro na diida si Hesekiel i. Boasa? Taida ma sada contoh. Tikki dibahas si Paulus taringot bagas joro ni Jahowa, dipaboa ibana do inganan ni dupa na sian mas, tutup ni poti, dohot baskom na sian mas na marisi manna. Alai dipatorang ibana do lapatan ni i sude? Daong. Marhite tondi parbadia ni Debata, dang adong disuru ibana lao patorakkon i. Ai songon on do disurat si Paulus, “Dang tikkina saonari lao patorakkon i sude.” (Heb. 9:4, 5) Rade do si Paulus mangihutton panogu-noguon ni tondi parbadia, jala serep do rohana paimahon hatorangan sian Jahowa.​—Heb. 9:8.

⁶ Dos songon i ma caratta lao mangattusi bagas joro na di parnidaan ni si Hesekiel. Massai godang do hatorangan na dipaboa disi. Molo porlu taboto godang taringot i, dumenggan do tapaima andigan Jahowa patorakkon i. (Jaha Mika 7:7.) Saonari, adong do hatorangan na baru na dilehon Jahowa taringot parnidaan on? Adong.

7, 8. (a) Aha do pangattusion naung disesuaihon saonari? (b) Aha do beda ni bagas joro na diida si Hesekiel dohot bagas joro na dibahas si Paulus?

⁷ Songon na dipaboa di paragraf 4, saleleng martaon-taon publikasitta paboahon molo bagas joro na diida si Hesekiel, i ma bagas joro ni Jahowa na dibahas si Paulus di suratna tu halak Heber. Alai dung diriset lam bagas taringot i, taboto ma dang sarupa bagas joro na dua i. Boasa?

⁸ Alasan na parjolo: Bagas joro na diida si Hesekiel dang sesuai tu hatorangan ni si Paulus. Si Paulus mandok tabernakel di tikki ni si Musa i manggombarhon bagas joro na umbalga do, i ma surgo.  Sian dia taboto? Adong do “Inganan na Massai Badia” na dibahen di tabernakel, di bagas joro ni si Salomo, dohot di bagas joro ni si Serubabel. Jala sarupa do rancanganna dibahen. Alai si Paulus mandok, “Inganan na Massai Badia na dipajongjong jolma” do i, na “manggombarhon Inganan na Massai Badia na sasittongna”. Manggombarhon aha? Menurut si Paulus, manggombarhon na sian “surgo” i. (Heb. 9:3, 24) Attong surgo do na diida si Hesekiel i? Daong. Alana sian parnidaan ni si Hesekiel i dang adong bukti na patuduhon molo na diida ibana i adong di surgo.​—Bandingkon Daniel 7:9, 10, 13, 14.

9, 10. Aha do beda ni pelean na diida si Hesekiel tu pelean na di bagas joro na dibahas si Paulus?

⁹ Adong dope bukti na patuduhon dang sarupa pelean na dipelehon di parnidaan ni si Hesekiel dohot pelean na dipaboa si Paulus. Di parnidaan i, dibege si Hesekiel do adong dijalo akka malim, pamimpin, dohot rakyat tudu-tudu na takkas taringot pelean na dilehon nasida. Ikkon dilehon do pelean tu dosa ni nasida sandiri. Ikkon dilehon do muse pelean pardamean, na boi rap diallang di ruang makan na di bagas joro. (Hes. 43:18, 19; 44:11, 15, 27; 45:15-20, 22-25) Dang holan sahali dilehon nasida akka pelean i. Attong sude do pelean i adong di bagas joro na diida si Paulus?

¹⁰ Takkas do adong alusna, jala mura do i taboto. Si Paulus mandok, “Alai nungnga gabe sintua ni malim be Kristus jala nungnga tahilala be akka na denggan saonari. Tikki gabe sintua ni malim ibana, masuk do ibana tu kemah na umbalga jala na dumenggan. Dang jolma na pajongjokkon kemah i jala dang sian tano on kemah i. Masuk do ibana tu Inganan na Massai Badia i, mudarna sandiri do na dipelehon ibana, dang mudar ni hambing manang mudar ni lombu jantan na poso. Masuk do ibana tusi sahali ro di saleleng ni lelengna, jala marhite ibana, nungnga tadapot haluaon na manoktong i.” (Heb. 9:11, 12) Jadi holan sada do pelean na dilehon sahat tu saleleng ni lelengna di bagas joro ni Jahowa na mulia i, i ma tobusan na dilehon Jesus Kristus, Sintua ni Malim na massai sangap i. Alai, anggo pelean na dilehon di bagas joro ni si Hesekiel i massai godang do, jala na dilehon i ma hambing dohot lombu jantan. Takkas ma, bagas joro na diida si Hesekiel i dang bagas joro na mulia na dipatorang si Paulus.

11. Boasa dang pas di tikki ni si Hesekiel dipaboa Jahowa hasittongan taringot tu bagas jorona na mulia i?

¹¹ Alasan na paduahon: Dang dope tikkina di Debata di tikki i lao paboahon hasittongan taringot bagas joro na mulia i. Taingot ma, parnidaan ni si Hesekiel i mulana dipaboa tu halak Jahudi na ditawan di Babel. Patik ni si Musa do na dioloi nasida. Molo dung dipalua, mulak ma nasida tu Jerusalem, jala diulahon ma ibadat na sittong i sesuai tu Patik ni si Musa. Dipajongjong nasida ma muse bagas joro dohot langgatanna. Ikkon dipelehon nasida do torus pelean disi. Songon i ma torus na diulahon hira-hira 600 taon. Bayakkon  ma songon dia pengaruhna tu nasida molo nungnga dipaboa si Hesekiel hian taringot bagas joro ni Jahowa na mulia i. Molo dipaboa si Hesekiel adong sintua ni malim na mangalehon hosana lao gabe pelean di bagas joro i, jala peleanna i manesa sude pelean binatang na asing, olo do ra gabe dang olo nasida mangoloi Patik ni si Musa. Takkas ma bagas joro na diida si Hesekiel, dang sarupa tu bagas joro na mulia na dibahas si Paulus. Toktong do Jahowa paboahon hasittongan i di tikki na pas, jala di tikki rade akka naposona.

12-14. Aha do kaitan ni bagas joro na diida si Hesekiel i tu bagas joro na dibahas si Paulus? (Ida kotak “Dua Bagas Joro na Marasing-asing Artina”.)

¹² Attong, aha do hubungan ni bagas joro na di parnidaan ni si Hesekiel tu bagas joro na mulia na dibahas si Paulus? Taingot ma dang bagas joro na diida si Hesekiel i na dipakke si Paulus tikki patorakkon bagas joro ni Jahowa, alai tabernakel na di tikki ni si Musa do na dipakke ibana. Memang, piga-piga na dipaboa si Paulus i adong do di bagas joro ni si Salomo, di bagas joro ni si Serubabel, dohot di bagas joro na diida si Hesekiel. Alai asing do na dibahas si Hesekiel dohot na dibahas si Paulus. * Nang pe dang sarupa na disurat nasida, alai hatoranganna saling berhubungan do. Aha buktina?

 ¹³ Hira na songon on ma hubungan ni na disurat si Paulus dohot si Hesekiel i: Molo sian si Paulus, hita boi marsiajar pengaturan ni Jahowa taringot cara manomba Ibana. Molo sian si Hesekiel, hita marsiajar taringot standar ni Debata tu ibadat na sittong. Tikki paboahon pengaturan ni Jahowa taringot ibadat na sittong, dipatorang si Paulus do lapatan ni piga-piga na adong di bagas joro. Umpamana, songon sintua ni malim, pelean, langgatan, dohot Inganan na Massai Badia. Alai, tikki paboahon standar ni Jahowa na timbo taringot ibadat na sittong, dilehon si Hesekiel do tu hita gambaran na massai takkas taringot bagas joro. Gabe takkas ma dipikkiranta standar ni Jahowa jala tarimangi di rohatta.

¹⁴ Dung disesuaihon parbinotoanta taringot parnidaan i, adong dope guna ni parnidaan ni si Hesekiel i tu hita saonari? Adong. Asa taboto alusna, tabahas ma guna ni parnidaan i tu halak Jahudi na setia di tikki ni si Hesekiel jala dukkon di tikkina.

15. (a) Aha do sasittongna na disurirangkon di parnidaan ni si Hesekiel? (b) Aha do perbedaan ni Hesekiel bindu 8 dohot Hesekiel bindu 40 sahat tu 48?

¹⁵ Lao mangalului alusna sian Bibel, porlu do tabahen piga-piga sukkun-sukkun asa boi takkas taboto aha na dipaboa di parnidaan i.  Na parjolo, aha do surirang na dipaboa di parnidaan i? Dipaboa do disi na lao dipadenggan ibadat na sittong, jala takkas do i diboto si Hesekiel. Disurat ibana do di Hesekiel bindu 8, songon dia Jahowa patuduhon aha na diulahon halak Jahudi na murtad i di bagas joro na di Jerusalem. Alai di bindu 40 sahat tu 48, asing do na disurat. Dang taringot ibadat na sittong naung sega i be na dipaboa. Alai dipaboa ibana do nungnga sesuai be ibadat na sittong i tu Patik ni si Musa. Tottu las situtu do rohana manurat on!

16. Songon dia do parnidaan ni si Hesekiel taringot bagas joro patoguhon surirang ni si Jesaya?

¹⁶ Asa boi muse mulak ibadat na sittong songon na ditottuhon Jahowa, ikkon takkas do dipatudu naposona molo standar ni Debata dao untimbo sian agama palsu. Lobi sian 100 taon sebelum tikki ni si Hesekiel, nungnga disurat si Jesaya songon on: “Di ari parpudi, dibahen ma hot dolok inganan ni jabu ni Jahowa, jala dibahen ma i untimbo sian pussu ni akka dolok, dibahen ma i untimbo sian akka dolok-dolok. Jala tusi ma marroan akka bangso.” (Jes. 2:2) Jadi nungnga takkas diida si Jesaya, na lao dipadenggan muse ibadat na sittong tu Jahowa. Massai timbo do i dibahen, hira na dipeakkon di atas ni dolok na untimbo. Attong di parnidaan ni si Hesekiel, didia do dibahen jabu ni Jahowa? Di “dolok na massai timbo”. (Hes. 40:2) Jadi parnidaan ni si Hesekiel i ma na patoguhon surirang ni si Jesaya, na lao dipadenggan do muse ibadat na sittong i.

17. Paboa ma parnidaan na disurat di Hesekiel bindu 40 sahat tu 48.

¹⁷ Songon on ma parnidaan ni si Hesekiel di bindu 40 sahat tu 48. Diida si Hesekiel ma suru-suruan i mangukkur gerbang, tembok, alaman, dohot inganan na badia di bagas joro i. (Hes. 40-42) Dung i masa ma peristiwa na luar biasa. Marsinondang ma hasangapon ni Jahowa di bagas joro, tanda na ro Ibana tusi. Makkatai ma Jahowa, dipasingot ma naposona na mandao i, akka malim, dohot akka pamimpin. (Hes. 43:1-12; 44:10-31; 45:9-12) Diida si Hesekiel ma sada sunge mardalan mulai sian inganan na badia i sahat tu Laut Mati. Parohon hangoluan dohot pasu-pasu do sunge i tu akka halak. (Hes. 47:1-12) Diida ma luat i dibagi-bagi, jala nungnga ditottuhon ukkuranna. Dibahen ma inganan ni ibadat na sittong i di tonga-tonga ni luat i. (Hes. 45:1-8; 47:13–48:35) Aha do na lao dipaboa Jahowa sian parnidaan i? Takkas ma, naeng dipapos Jahowa do roha ni akka naposona na lao dipadenggan do ibadat na sittong, jala dibahen massai timbo. Sian bagas joro na marsinondang, dipatudu Jahowa do na lao dipasu-pasu Ibana bagas jorona i. Jala songon sunge na mardalan, godang do pasu-pasu na lao ro sian bagas joro, na boi parohon hangoluan, hadameon, jala mambahen denggan luat i.

18. Tutu do adong bagas joro songon na diida si Hesekiel i dibangun di tano on?

¹⁸ Na paduahon, tutu do adong bagas joro songon na diida si Hesekiel i dibangun di tano on? Daong. Pasti diattusi si Hesekiel dohot halak Jahudi na ditawan i do, molo bagas joro na di  parnidaan i dang bagas joro na tutu dibangun di tano on. Boasa boi tadok songon i? Taingot ma bagas joro na diida si Hesekiel i dibahen di “dolok na massai timbo”. Memang sesuai do i tu surirang ni si Jesaya, alai dang sesuai parnidaan i tu lokasi ni bagas joro na adong di tikki i. Ai di Dolok Moria na di Jerusalem do bagas joro ni si Salomo, jala disi do dipajongjong muse bagas joro i. Attong dolok na massai timbo do Dolok Moria i? Daong. Alana di sakaliling ni Dolok Moria godang dope dolok na sarupa timbona, manang untimbo sian dolok i. Hape inganan ni bagas joro na diida si Hesekiel i massai bidang do, jala dikalilingi tembok. Jadi dang siat di atas ni Dolok Moria bagas joro na diida si Hesekiel i. Bahkan di kota Jerusalem na di tikki ni si Salomo pe dang siat bagas joro i! Asing ni i, dang mungkin ro tu pikkiran ni akka halak na ditawan i, tutu adong sunge mardalan sian bagas joro sahat tu Laut Mati, jala aekna boi mambahen laut i gabe inganan ni akka binatang. Asing ni i di parnidaan ni si Hesekiel, ditarik do garis lurus lao mambagi-bagi inganan i tu ganup marga ni Israel. Hape inganan na mardolok-dolok do luat na dijanjihon i. Jadi dang mungkin boi ditarik garis lurus lao manottuhon batas ni akka inganan i. Alani i, parnidaan ni si Hesekiel dang manggombarhon bagas joro na di tano on.

19-21. Aha do tujuan ni Jahowa mangalehon parnidaan i tu naposona, jala boasa nasida boi makkilala sisongon i?

 ¹⁹ Na patoluhon, aha do tujuanna dilehon parnidaan i tu halak Jahudi di tikki ni si Hesekiel? Asa maila do bangso i mangida pangalaho ni nasida na so sesuai tu standar ni Jahowa na timbo taringot ibadat na sittong. Didok Jahowa do tu si Hesekiel, “Patorang ma taringot tu bagas joro i tu halak Israel.” Ikkon massai takkas do dipaboa si Hesekiel hatorangan ni bagas joro i, asa boi dibayakkon nasida “rancangan ni bagas joro i”. Aha tujuanna? Songon naung tabahas, dang asa dipajongjong nasida bagas joro i. Alai songon hata ni Jahowa ‘asa maila do nasida alani akka hasalaan ni nasida’.​—Jaha Hesekiel 43:10-12.

²⁰ Boasa parnidaan on boi hona tu roha ni akka halak jala mambahen nasida gabe maila? Nungnga dipaboa hian tu si Hesekiel songon on: “Ale anak ni jolma, parrohahon ma, ida ma, jala denggan ma tangihon sude na hudok tu ho. Denggan ma tangihon sude aturan dohot patik taringot tu bagas joro ni Jahowa.” (Hes. 44:5) Di parnidaan on, mulak-hulak do dibege si Hesekiel aturan dohot patik ni Debata. (Hes. 43:11, 12; 44:24; 46:14) Torus do muse dipaingot si Hesekiel taringot standar ni Jahowa, bahkan taringot standar tu ukkuran ni saasta dohot timbangan na sittong. (Hes. 40:5; 5:10-12; bandingkon Poda 16:11.) Di bahasa aslina, lobi sian 50 hali si Hesekiel mamakke hata “mangukkur” manang “ukkuran” di parnidaan on!

²¹ Boasa di parnidaan on Jahowa makkatai taringot ukkuran, timbangan, aturan, dohot patik? Marhite cara on, Jahowa naeng paingotton naposona taringot hasittongan na massai penting on: Holan Ibana do na marhak manottuhon standar tu ibadat na sittong. Jadi ikkon maila do molo adong halak na so mangihutton standarna! Songon dia do halak Jahudi marsiajar sian parnidaan on? Tabahas ma i di pasal na mangihut. Molo dung taboto, lam taattusi ma guna ni parnidaan i tu hita saonari.