1-3. a) ¿Mbaʼérepa oiméne okonsola raʼe Ezequiélpe pe visión ohecha haguépe pe témplo? (Ehecha pe taʼanga oĩva iñepyrũme). b) ¿Mbaʼépa jahecháta ko kapítulope?

EPENSAMÍNA Ezequiel orekoha 50 áño. Ojapóma 25 áñorupi oĩ hague prisionéroramo ótro tetãme. Aretereíma pe témplo de Jerusalén oñehundi hague, ha oiméramo Ezequiel oreko raʼe esperánsa oservívo de saserdóte Jerusalénpe, upéicharõ upe esperánsa oñehundi avei pe témploicha. Ofalta gueteri 56 áño opa hag̃ua pe tiémpo oĩtaha hikuái prisionéroramo, ha Ezequiel oikuaa ndoikopukumoʼãveimaha ha ijetuʼutaha chupe ohecha hag̃ua Ñandejára puévlo oho jey vove hetãme, ha koʼytevéntema ohecha hag̃ua oñemopuʼã jey vove pe témplo (Jer. 25:11). Upéva oiméne odesanima raʼe Ezequiélpe.

² ¡Ajépa imbaʼeporãite Jehová oiporavo haguére upe tiémpo ohechauka hag̃ua Ezequiélpe ko visión ipukuetéva! ¡Mbaʼeichaitépa oiméne upéva okonsola ha omeʼẽ raʼe esperánsa ko kuimbaʼe ifiélvape! Pe visión rupive Ezequiélpe ojegueraha jey hetãme ha oñemoĩ chupe peteĩ montáña ijyvatetereívape. Ko lugár ijyvatetévape, ou hendápe “peteĩ kuimbaʼe omimbíva kóvreicha”. Upe ánhel ogueraha Ezequiélpe orrekorre hag̃ua pe témplo tuichaitéva (elee Ezequiel 40:1-4). ¡Entéro koʼã mbaʼe haʼete voi la añetehápe oikóva! Upe visión oiméne  omombarete Ezequiel jerovia, ha ndahaʼéi upévante, osorprendeterei chupe ha oiméne oĩ algúna kósa nontendeporãiva. Pe témplo haʼe ohecha vaʼekue oreko heta mbaʼe haʼe oikuaámava voi, upéicharõ jepe, idiferenteterei upe témplo haʼe oikuaa vaʼekuégui Jerusalénpe.

³ Upe visión ijojahaʼỹva ojagarrapaite umi último 9 kapítulo oĩva pe lívro de Ezequiélpe. Jahecha raẽta mbaʼéichapa ñantende vaʼerã pe visión. Upéi jahecháta oimépa pe témplo tuichaitéva ohecha vaʼekue Ezequiel haʼe hína pe témplo espirituál Pablo oñeʼẽ hague heta áño upe rire. Ha ipahaitépe jahecháta mbaʼépa heʼise vaʼekue upe visión Ezequiel ha iñirũnguéra oĩvape g̃uarã prisionéroramo.

4. a) ¿Mbaʼépa heʼi vaʼekue ymave ñane puvlikasionkuéra ko visión rehe? b) ¿Mbaʼépa ojepilla ojestudia porã rire ko visión?

⁴ Ymave ñane puvlikasionkuéra heʼi pe témplo Ezequiel ohecha vaʼekue haʼeha pe témplo Pablo omyesakã vaʼekue ikárta omondo vaʼekuépe umi hebréope: Pe témplo espirituál tuichaitéva. * Upéicha rupi oñepensa vaʼekue oĩ porãha ojeʼe heta mbaʼe oĩva pe témplo Ezequiel ohecha vaʼekuépe, orrepresentaha ótra kósa. Upearã ojepuru vaʼekue umi mbaʼe Pablo omyesakã vaʼekue pe tavernákulogui. Péro ojestudia, oñeñemboʼe ha oñepensa porã rire, ojehechakuaa isensilloveha pe explikasión orekóva pe témplo Ezequiel ohecha vaʼekue visiónpe.

5, 6. a) ¿Mbaʼérepa oiméne Pablo ndeʼíri rakaʼe umi mbaʼe oĩva pe tavernákulope orrepresentaha algúna kósa? b) ¿Mbaʼéichapa Pablo ohechauka iñumildeha oñeʼẽrõ guare pe tavernákulore? c) ¿Mbaʼéichapa ikatu jaipuru Pablo heʼi vaʼekue jastudiávo pe témplo ohecha vaʼekue Ezequiel?

⁵ Amalisia ningo noĩporãi jaʼéramo entéro mbaʼe oĩva pe témplo Ezequiel ohecha vaʼekuépe heʼiseha térã orrepresentaha álgo. ¿Mbaʼérepa ndovaléi jajapo upéicha? Jahechami peteĩ ehémplo. Apóstol Pablo oñeʼẽrõ guare pe tavernákulo ha pe témplo espirituál rehe oñeʼẽ heta mbaʼe oĩvare pe tavernákulope. Por ehémplo oñeʼẽ pe mbaʼyru de óro ojehapyha insiénso rehe, pe árka tápa ha pe hárra de óro orekóvare maná. ¿Heʼi piko rakaʼe Pablo umíva orrepresentaha algúna kósa? Añetehápe pe espíritu sánto ndogiái chupe ojapo hag̃ua upéva. Upéva rangue Pablo oskrivi: “Koʼág̃a ndahaʼéi tiémpo ñañeʼẽ pukueterei hag̃ua koʼã mbaʼére” (Heb. 9:4, 5). Pablo ningo oĩ kuri dispuésto ohaʼarõvo ogia chupe pe espíritu sánto ha iñumílde rupi ohaʼarõnte Jehovápe (Heb. 9:8).

⁶ Upeichaite avei oiko pe témplo Ezequiel ohecha vaʼekuére. Upe visión avei oreko hetaiterei detálle, ha amalisia iporãve ñaneumílde ha ñahaʼarõnte Jehová tomyesakã upéva tekotevẽramo (elee Miqueas 7:7). ¿Péro ikatu piko jaʼe Jehová espíritu nomyesakãvéi hague mbaʼevete voi upe visióngui? ¡Ni mbaʼevéicharõ!

7, 8. a) ¿Mbaʼépa oñentende porãve koʼág̃a? b) ¿Mbaʼéichapa idiferénte pe témplo Ezequiel ohecha vaʼekue pe témplo Pablo oñeʼẽ vaʼekuégui?

⁷ Jahecháma haguéicha, heta áñore ñane puvlikasionkuéra heʼi pe témplo Ezequiel ohecha vaʼekue haʼeha pe témplo Pablo omyesakã vaʼekue pe kárta omondo vaʼekuépe umi hebréope: Pe témplo espirituál  tuichaitéva. Péro jastudia porã rire ko profesía ikatu jaʼe Ezequiel ndohechái hague pe témplo espirituál tuichaitéva. ¿Mbaʼérepa jaʼekuaa upéva?

⁸ Primero, pe témplo ohecha vaʼekue Ezequiel ndojoguái pe Pablo oexplika vaʼekuépe. Ñapensamína ko mbaʼére: Apóstol Pablo omyesakã porã vaʼekue pe tavernákulo Moisés tiémpope guare haʼe hague peteĩ sómbrante, ha orrepresentaha peteĩ mbaʼe tuichavéva. Pe tavernákulo ha avei Salomón ha Zorobabel témplo, orekóva haimete el mísmo modélo, oreko vaʼekue peteĩ koty hérava “Santísimo”. Apóstol Pablo ohenói vaʼekue pe kotýpe ‘peteĩ lugár sagrádo yvypóra ojapo vaʼekue’, ha heʼi upéva ‘ojoguánte hague pe lugár sagrádo teetépe’. ¿Ha mbaʼépa hína pe lugár sagrádo teete? Upéva hína pe ‘yvága voi’ (Heb. 9:3, 24). ¿Upéicharõ piko Ezequiel ohecha rakaʼe pe yvága? No. Ndaipóri mbaʼeve Ezequiel visiónpe ohechaukáva haʼe ohecha hague pe yvága, oiko haguéicha ótra visiónpe. *

9, 10. Oñeñeʼẽ jave umi sakrifísiore, ¿mbaʼe diferénsiapa oreko pe témplo Ezequiel ohecha vaʼekue ha pe témplo espirituál Pablo oexplika vaʼekue?

⁹ Ótra diferénsia tuicháva oĩva pe visión de Ezequiel ha pe Pablo oexplika vaʼekuépe haʼe hína umi sakrifísio. Ezequiélpe ojeʼe heta mbaʼe upe rire heʼi vaʼerã umi héntepe, umi kuimbaʼe oporomoakãvape, ha umi saserdótepe. Ojeʼe chupe mbaʼéichapa ojeofrese vaʼerã umi sakrifísio. Por ehémplo, haʼekuéra ojapo vaʼerã kuri umi ofrénda ipekadokuéra rehehápe. Avei ojapo vaʼerã hikuái umi ofrénda de paz, ha pe persóna ojapóva ko ofrénda ikatu vaʼekue avei hoʼu pe sakrifísio, oiméne peteĩva umi komedór oĩvape pe témplope (Ezeq. 43:18, 19; 44:11, 15, 27; 45:15-20, 22-25). ¿Ojeofresépa avei kontinuadoite koʼãichagua sakrifísio pe témplo espirituál tuichaitévape?

¹⁰ Pe rrespuésta hesakã porã ha ndahasyiete oñentende hag̃ua. Apóstol Pablo heʼi: “Cristo ou vaʼekue oservi de súmo saserdóte ha ogueru umi vendisión jarekóva koʼág̃a. Haʼe oike vaʼekue pe tavernákulo iñimportantevéva ha iporãvévape. Upéva ndahaʼéi yvypóra rembiapokue ha noĩri ko yvy ape ári. Haʼe oike pe lugár sagrádope péro ndoguerahái upépe kavara ruguy ni tóro raʼy ruguy, upéva rangue haʼe ogueraha huguy. Haʼe oike pe lugár sagrádope una ves ha opa ára g̃uarã, ha ñandesalva pára siémpre” (Heb. 9:11, 12). Upéicharõ, pe témplo espirituál tuichaitévape una vénte ojejapo pe sakrifísio ha opa ára g̃uarãma. Upéva hína pe sakrifísio ojejapo vaʼekue ñanderreskata hag̃ua, ko sakrifísio ojapo voi pe Súmo Saserdóte Tuichavéva, Jesús. Péicha hesakã porã pe témplo Ezequiel ohecha vaʼekue visiónpe, ojeofresehápe sakrifísioramo kavara ha tóro, ndahaʼeiha pe témplo espirituál tuichaitéva.

11. ¿Mbaʼérepa Ezequiel tiémpo ndahaʼéi vaʼekue pe tiémpo Ñandejára omyesakã hag̃ua umi mbaʼe oñeʼẽva pe témplo espirituál rehe?

¹¹ Upéva ñanepytyvõ koʼág̃a jahecha hag̃ua mbaʼérepa ikatu jaʼe avei Ezequiel ndohechái hague upe témplo: Upérõ ndahaʼéi kuri pe tiémpo Ñandejára omyesakã hag̃ua umi mbaʼe oñeʼẽva pe témplo  espirituál rehe. Ñanemanduʼa vaʼerã pe visión ohecha vaʼekue Ezequiel oñemeʼẽ hague umi judío oĩvape g̃uarã prisionéroramo Babilóniape. Haʼekuéra ningo oĩ vaʼekue gueteri Moisés léi poguýpe. Opa vove pe tiémpo oĩtaha prisionéroramo, haʼekuéra oho jey vaʼerã kuri Jerusalénpe ha okumpli pe léi heʼíva mbaʼéichapa oadora vaʼerã hikuái Jehovápe, ha upearã omopuʼã jey vaʼerã hikuái pe témplo ha pe altár. Upéi, amo 600 áñorupi haʼekuéra osegi vaʼekue ojapo sakrifísio upépe. Ñapensamína mbaʼépa oiko vaʼerãmoʼã Ezequiel visión ohechaukárire chupekuéra pe témplo espirituál: ¡Peteĩ témplo pe súmo saserdóte omeʼẽhápe hekove sakrifísioramo, ha péicha natekotevẽmoʼãvéima ojeofrese arakaʼeve umi ótro sakrifísio! ¿Mbaʼéichapa ontende vaʼerãmoʼã hikuái upéva? ¿Nomokangymoʼãi piko upéva chupekuéra osegi hag̃ua ojapo pe léi mosáika heʼíva? Péro jepiveguáicha, Jehová omyesakã heta mbaʼe itiempoitépe ha ipuévlo oĩ jave preparádo ontende hag̃uáicha.

12-14. ¿Mbaʼépepa ojojogua pe témplo Ezequiel ohecha vaʼekue ha pe explikasión Pablo omeʼẽva pe témplo espirituál rehe? (Ehecha pe rrekuádro “Diferénte témplo, diferénte mbaʼe ñanemboʼéva”).

¹² ¿Mbaʼépepa ojojogua upéicharõ pe témplo Ezequiel ohecha vaʼekue ha pe témplo espirituál Pablo oexplika vaʼekue? Ñanemanduʼa vaʼerã Pablo noñeʼẽi hague pe témplo ohecha vaʼekuére Ezequiel omopyenda hag̃ua ijexplikasión, upéva rangue haʼe oipuru pe tavernákulo Moisés tiémpope guare. Añetehápe ningo Pablo omombeʼu heta  detálle orekóva avei Salomón ha Zorobabel témplo, ha avei pe témplo Ezequiel ohecha vaʼekue. Upéicharõ jepe, Pablo ha Ezequiel oñeʼẽ vaʼekue diferénte kósare. * Umi mbaʼe oskrivíva hikuái ningo ndojojoguái, péro mokõivéva oñopytyvõ omyesakã hag̃ua peteĩ mbaʼe. ¿Mbaʼépa hína upéva?

¹³ Ikatu jaʼe koʼã mokõi párte oĩva la Bíbliape ohoha ojuehe ko mbaʼépe: Pablo ñanemboʼe umi mbaʼe Jehová ojapo vaʼekue ojeadora hag̃ua chupe, péro Ezequiel ñanemboʼe mbaʼéichapa Jehová oipota ojeadora chupe. Ñanemboʼe hag̃ua umi mbaʼe Jehová ojapo vaʼekue ojeadora hag̃ua chupe, Pablo omyesakã umi mbaʼe orekóva pe témplo espirituál, por ehémplo oñeʼẽ pe súmo saserdótere, umi sakrifísio, pe altár ha pe Santísimo rehe. Péro pe témplo Ezequiel ohecha vaʼekue visiónpe orresalta mbaʼéichapa Jehová oipota ojeadora chupe, ha upearã omyesakã porã heta detálle opytaitéva ñane akãme ha ñane korasõme.

¹⁴ Ñantende porã rire upéva koʼág̃a, ¿heʼise piko upéicharõ pe visión Ezequiel ohecha vaʼekue naiñimportanteguasuiha ñandéve g̃uarã? ¡Ni mbaʼevéicharõ! Jaikuaa hag̃ua mbaʼéichapa pe visión ñanepytyvõ, jahecháta mbaʼéichapa upéva oipytyvõ vaʼekue umi judío yma guare ifiélvape.

15. a) ¿Mbaʼe mensáhepa oreko pe visión Ezequiel ohecha haguépe pe témplo? b) ¿Mbaʼe diferénsiapa jatopa oĩha éntre Ezequiel kapítulo 8, ha kapítulo 40 guive 48 peve?

¹⁵ Jaikuaa hag̃ua mbaʼéichapa la Biblia ombohovái ko pregúnta, jahecháta mbohapy mbaʼe ñanepytyvõtava ñantende porã hag̃ua upéva. Primero ¿mbaʼe mensáhe iñimportántevapa oreko pe visión Ezequiel ohecha haguépe pe témplo? Jaʼe porãsérõ g̃uarã omombeʼu ojeadora jeytaha Jehovápe añoiténte. Upéva oiméne hesakã porãiterei Ezequiélpe g̃uarã. Haʼe ningo oskrivíma kuri upéva rehe ilívrope kapítulo 8-pe, upérõ Jehová ohechauka vaʼekue Ezequiélpe umi mbaʼe oporombojeguarúva ojejapóva Jerusalén témplope. Péro oiméne haʼe ovyʼaiterei raʼe oskrivívo en detálle peteĩ mbaʼe idiferentetereíva, ha jatopáva koʼág̃a ilívrope kapítulo 40 guive 48 peve. Umi kapítulope jahecha pe adorasión oñemeʼẽva Jehovápe ndaikyʼaveimaha, upéva rangue oĩma upe okorrespondeháicha: Ipotĩmbaitéma, ha upéva peteĩ ehémplo ohechauka porãitereíva mbaʼéichapa ojeadora vaʼerã Jehovápe, Moisés léi heʼiháicha.

16. ¿Mbaʼéichapa pe témplo Ezequiel ohecha vaʼekue visiónpe okonfirma pe Isaías oprofetisa vaʼekue mas de 100 áño upe mboyve?

¹⁶ Ikatu hag̃uáicha pe adorasión oñemeʼẽva Jehovápe oreko jey pe lugár okorrespondéva chupe, upéva oñemoĩ vaʼerã peteĩ lugár ijyvatévape. Mas de 100 áño upe mboyve, proféta Isaías oskrivi vaʼekue espíritu sánto rupive: “Umi ára pahápe, pe montáña oĩháme Jehová róga oñemohenda ha isegúro porãta umi montáña ruʼã ári ha ijyvatevéta umi sérrogui” (Is. 2:2). Isaías ningo oprofetisa vaʼekue pe adorasión oñemeʼẽva Jehovápe ipotĩ jeytaha ha oñemoĩtaha peteĩ lugár ijyvatévape, oñemoĩramoguáicha umi montáña ruʼã ári. ¿Mbaʼéichapa okonfirma upéva pe visión Ezequiel ohecha vaʼekue? ¿Moõpa oĩ raʼe Jehová róga Ezequiel visiónpe? Oĩ “peteĩ montáña ijyvatetereíva ári” (Ezeq. 40:2). Péicha Ezequiel visión ohechauka oñemeʼẽ jeytaha Jehovápe pe adorasión haʼe omereséva.

17. ¿Mbaʼe rehepa oñeʼẽ Ezequiel kapítulo 40 guive 48 peve?

¹⁷ Jahechamína mbykymi umi mbaʼe Ezequiel ohecha ha ohendu vaʼekue, jatopáva kapítulo 40 guive 48 peve. Haʼe ohecha peteĩ ánhel omediha umi okẽ, pe murálla, umi korapy ha pe témplo (Ezeq. 40-42). Upéi oiko peteĩ mbaʼe ndaijojaháiva: ¡Jehová podér omimbipáva og̃uahẽ pe témplope! Jehová oñemoñeʼẽ ha heʼi mbaʼépa ojapo vaʼerã ipuévlo naiñeʼẽrendúiva, umi saserdóte ha umi kuimbaʼe oporomoakãva (Ezeq. 43:1-12; 44:10-31; 45:9-12). Ezequiel ohecha peteĩ rrío osyrýva pe témplo guive, oporomoingovéva ha ogueraháva vendisión umi lugár ohasahárupi og̃uahẽ meve pe Mar Muértope (Ezeq. 47:1-12). Upéi ohecha pe yvy ojedividiha diferénte pártepe, ha pe lugár ojeadorahápe Jehovápe oĩ mbytetépe (Ezeq. 45:1-8; 47:13–48:35). ¿Mbaʼépa heʼise entéro koʼã mbaʼe? Umíva ohechauka porã Jehová oaseguraiteha ipuévlope ojeadora jeytaha chupe añoiténte ha oñembotuicha jeytaha pe adorasión. Ipresénsia rupive haʼe  ovendesíta pe óga ojeadorahápe chupe, ha umi vendisión ýicha osyrýta pe témplogui, oporomongueráta, omeʼẽta vída ha pyʼaguapy pe yvy oñembopyahu jeýtavape.

18. ¿Oñentende vaʼerãpa literálmente voi pe visión? Emyesakã.

¹⁸ Segundo, ¿oñentende vaʼerãpa literálmente voi pe visión? Nahániri. Ezequiel ha umi oĩva prisionéro, haʼe omombeʼu hague pe visión, oiméne ohechakuaa raʼe upe visión noñentendéi vaʼerãha pe oĩhaichaite voi. ¿Mbaʼérepa? Ñanemanduʼa vaʼerã Ezequiel ohecha hague pe témplo oĩha peteĩ “montáña ijyvatetereíva ári”. Añetehápe ningo upéva oho porãiterei Isaías profesíare, péro pe témplo noĩri vaʼekue peichagua lugárpe. Pe témplo de Salomón oñemopuʼã vaʼekue pe Sérro Móriape, oĩva Jerusalénpe, ha upépe oñemopuʼã jeýta kuri pe témplo. ¿Péro añetehápe piko ijyvateterei vaʼekue pe Sérro Moria? Nahániri. Ijerére oĩ vaʼekue heta sérro orekóva la mísma altúra, ha oĩ voi umi ijyvatevéva chugui. Avei pe témplo ohecháva Ezequiel tuichaiterei vaʼekue. Pe témplo, pe korapy ha pe murálla oĩva ijerére kompletoite tuichaiterei vaʼekue ha ndaijamoʼãi pe Sérro Moria ári. ¡Upe témplo ndaijamoʼãi kuri ni pe siuda de Jerusalén oĩ vaʼekuépe Salomón tiémpope! Avei umi oĩva prisionéroramo nopensaichéne rakaʼe osyrytaha pe témplogui peteĩ rrío, upéi ohóva opa pe Mar Muértope ha omonguera pe y. Ipahápe, pe Tiérra Prometída oreko vaʼekue heta montáña, upévare umi trívu ndaikatumoʼãi kuri odividi ijyvyrã en línea rrékta, ojehecha  haguéicha Ezequiel visiónpe. * Upéicharõ, pe visión noñentendéi vaʼerã pe oĩhaichaite.

19-21. a) ¿Mbaʼéichapa Jehová oipota vaʼekue oñeñandu pe puévlo ontendévo pe visión? b) ¿Mbaʼérepa pe visión og̃uahẽ umi hénte ipyʼaporãva korasõme?

¹⁹ Tercero, ¿mbaʼéichapa Jehová oipota vaʼekue oñeñandu pe puévlo ontendévo pe visión? Ojepyʼamongeta vove mbaʼéichapa Jehová oipota ojeadora chupe, umi hénte opyta vaʼerã otĩ umi hembiapo vaikuére. Jehová heʼi Ezequiélpe: “Ere Israel rogayguápe mbaʼéichapa pe témplo”. Ezequiel odeskrivi vaʼerã pe témplo en detálle, péicha umi israelita ikatúta ‘ostudia pe pláno’. ¿Mbaʼérepa pe puévlo ojepyʼamongeta vaʼerã pe témplore? Jahechaháicha ndahaʼéi kuri omopuʼã hag̃ua hikuái pe témplo. Upéva rangue, Jehová heʼi haguéicha, “ikatu hag̃uáicha otĩ hikuái hembiapo vaikuére” (elee Ezequiel 43:10-12).

²⁰ ¿Mbaʼérepa upe visión og̃uahẽ umi hénte ipyʼaporãva korasõme ha omomýi chupekuéra otĩ hag̃ua hembiapo vai haguére? Jahechami mbaʼépa ojeʼe Ezequiélpe: “Yvypóra raʼy, eñatende porã, emaña ha ehendu porãke entéro mbaʼe haʼéva ndéve umi léi ha mandamiéntore oñeʼẽva hína Jehová témplore” (Ezeq. 44:5). Ezequiel heta vése ohendu oñeñeʼẽrõ umi léi ha mandamiéntore (Ezeq. 43:11, 12; 44:24; 46:14). Avei Ezequiélpe pyʼỹinte oñemomanduʼa jepi Jehová mandamientokuérare, por ehémplo oĩ voi mandamiénto oñeʼẽva umi medída fíha ojepuru vaʼerãre oñemedi ha ojepesa hag̃ua hendaitépe (Ezeq. 40:5; 45:10-12; ekompara Proverbios 16:11 rehe). ¡Ndareíri Ezequiel oipuru pe idióma orihinálpe mas de 50 vése umi palávra “medída” ha “oñemedi”!

²¹ ¿Mbaʼépa heʼise raʼe Jehová ipuévlope oñeʼẽvo umi medídare, péso, léi ha mandamiéntore? Haʼete ku omomanduʼáva chupekuéra peteĩ mensáhe ipoderósova rupive ko mbaʼe iñimportantetévare: Jehová añoite ikatuha heʼi mbaʼéichapa ojeadora vaʼerã chupe. ¡Umi nokumplíriva koʼã mbaʼe haʼe ojeruréva, otĩ vaʼerã! ¿Mbaʼéichapa pe visión omboʼe raʼe koʼã mbaʼe umi judíope? Pe kapítulo oúvape jahecháta algúno ehémplo, umíva ñanepytyvõta ñantende porãve hag̃ua mbaʼépa heʼise ñandéve g̃uarã ko tiémpope ko visión ijojahaʼỹva.