1-3. (a) Naegbọn numimọ tẹmpli daho gigonọ lọ tọn na ko miọnhomẹna Ezekiẹli? (Pọ́n yẹdide he tin to bẹjẹeji hosọ ehe tọn.) (b) Etẹwẹ mí na gbadopọnna to weta ehe mẹ?

YÍ NUKUN homẹ tọn do pọ́n Ezekiẹli he ko tindo owhe 50 todin. E sọgan flin nudi owhe 25 he e ko yizan wayi to kanlinmọgbenu lẹ hlan godo. Tẹmpli he to Jelusalẹm lọ ko jẹvọ́ sọn whenẹnu gbọ́n. Eyin Ezekiẹli ko nọ lẹn dai dọ emi na wá sẹ̀n taidi yẹwhenọ to finẹ wẹ, be todido enẹ lọsu ko lẹzun odlọ todin. Nudi owhe 56 dona gbẹ́ juwayi whẹpo kanlinmọgbenu-ninọ lọ nado wá vivọnu, enẹwutu Ezekiẹli yọnẹn dọ vlavo emi ma na nọgbẹ̀ dẹn sọmọ nado mọ whenue omẹ Jehovah tọn lẹ na lẹkọyi otò yetọn mẹ, kavi tlẹ mọ whenue tẹmpli lọ na yin vivọgbá. (Jel. 25:11) Be nulinlẹnpọn do onú mọnkọtọn lẹ ji na ko hẹn ẹn blawu jẹ obá de mẹ wẹ ya?

² Homẹdagbe nankọ die Jehovah dohia to whenue e de ojlẹ tangan enẹ pẹẹ nado do numimọ he gbloada de hia Ezekiẹli, yèdọ numimọ de he na ko miọnhomẹna dawe nugbonọ enẹ bo vọ́ todido na ẹn taun! Gbọn numimọ enẹ gblamẹ, yẹwhegán lọ yin hinhẹn lẹkọyi otò etọn mẹ, yèdọ yì osó he yiaga taun de ji. To lẹdo jiawu enẹ mẹ, e dukosọ hẹ “dawe de he awusọhia etọn taidi gànvẹẹ tọn.” Angẹli alihiamẹtọ enẹ plan ẹn dánpe gbọn tẹmpli daho  gigonọ de mẹ. (Hia Ezekiẹli 40:1-4.) Nuhe mọ e te lẹpo wẹ taidi onú jọnun to nukun etọn mẹ! Numimọ enẹ na ko hẹn yise Ezekiẹli tọn lodo bo hẹn awuji i bo tlẹ gán ko fọ́n kanbiọ susu dote to ayiha etọn mẹ. Dile etlẹ yindọ tẹmpli he e mọ lọ bẹ nuhe e ko jẹakọ hẹ susu hẹn, e gbọnvo taun na dehe e ko nọ mọ dai to Jelusalẹm.

³ Numimọ ojlofọndotenamẹ tọn ehe ji wẹ weta ṣinẹnẹ he gbọngodo to owe Ezekiẹli tọn mẹ lẹ dọhodo. Mì gbọ mí ni pọ́n pọndohlan he mí dona tindo, dile mí to dogbapọnna numimọ ehe bo to vivẹnudo nado mọnukunnujẹemẹ. Enẹgodo, mí na dindona eyin tẹmpli daho gbigbọmẹ tọn he apọsteli Paulu dọhodeji to gigọ́ mẹ to owhe kanweko susu godo lọ wẹ Ezekiẹli lọsu mọ to numimọ mẹ. To enẹ lẹpo godo, mí na gbadopọnna nuhe numimọ lọ na ko zẹẹmẹdo na Ezekiẹli po kanlinmọ hatọ etọn lẹ po to whenẹnu.

4. Pọndohlan tẹwẹ mí tindo dai gando numimọ tẹmpli lọ tọn go, ṣigba diọdo tẹwẹ yin dandan todin?

⁴ To ojlẹ de mẹ wayi, owe mítọn lẹ nọ dọ dọ tẹmpli daho gbigbọmẹ tọn Jehovah tọn wẹ Ezekiẹli mọ, yèdọ dehe apọsteli Paulu yin gbigbọdo nado kanwe gandego to wekanhlanmẹ etọn hlan Heblu lẹ mẹ. * To dodonu enẹ ji, e nọ taidi nuhe sọgbe hẹ lẹnpọn dagbe to ojlẹ enẹ mẹ dọ mí gán yí zẹẹmẹ he Paulu basi gando gòhọtúntún lọ go lẹ zan nado wá tadona kọ̀n dọ adà voovo tẹmpli he Ezekiẹli mọ lọ tọn lẹ nọtena onú vonọtaun delẹ to yẹhiadonu-liho. Ṣigba, to dodinnanu po ayihamẹlinlẹnpọn yinukọn dogọ to odẹ̀ mẹ po godo, e wá họnwun dọ mí dona diọ pọndohlan mítọn bo hẹn zẹẹmẹ tẹmpli he Ezekiẹli mọ lọ tọn lẹ bọawu.

5, 6. (a) Nawẹ apọsteli Paulu do whiwhẹ hia to nuhe e dọ gando gòhọtúntún lọ go lẹ mẹ gbọn? (b) Etẹwẹ Paulu dọ gando adà flinflin gòhọtúntún lọ tọn delẹ go, podọ nawẹ mí sọgan yí nuhe e dọ lẹ zan nado mọnukunnujẹ zẹẹmẹ tẹmpli he Ezekiẹli mọ lọ tọn mẹ gbọn?

⁵ E taidi dọ nuyọnẹnnu wẹ e na yin ma nado dín zẹẹmẹ dọdai kavi yẹhiadonu tọn de gando adà tẹmpli he Ezekiẹli mọ to numimọ mẹ lọ tọn lẹpo go. Etẹwutu? Pọ́n nuyijlẹdonugo dagbe ehe. Whenue Paulu to hodọdo gòhọtúntún po tẹmpli gbigbọmẹ tọn lọ po ji, e donù adà flinflin gòhọtúntún lọ tọn delẹ go taidi nuwhẹ́nwan-gbán sika tọn, nùsu apotin alẹnu tọn lọ tọn po ozẹ́n sika tọn he mẹ manna te lọ po. Be e dọ dọ adà flinflin ehe lẹpo wẹ tindo zẹẹmẹ yẹhiadonu tọn de ya? E họnwun dọ gbigbọ wiwe ma whàn ẹn nado dọ mọ. Kakatimọ, Paulu wlan dọmọ: “E ma yin ojlẹ lọ die nado dọho gando onú ehelẹ go to gigọ́ mẹ gba.” (Heb. 9:4, 5) Paulu wleawufo nado joawuna anademẹ gbigbọ wiwe tọn bo gbọn whiwhẹ dali nọtepọn Jehovah.—Heb. 9:8.

⁶ Mí sọgan hodo nunọwhinnusẹ́n dopolọ gando tẹmpli he Ezekiẹli mọ to numimọ mẹ lọ go. Numimọ enẹ lọsu donù adà flinflin susu go. Podọ e na pọnte hugan nado nọte jẹ whenue Jehovah na hẹn nukunnumọjẹnumẹ lẹ họnwun yinukọn dogọ eyin e biọ domọ. (Hia Mika 7:7.) Amọ́, be enẹ dohia dọ gbigbọ Jehovah tọn ma ko hẹn hinhọ́n depope họnwun dogọ gando numimọ ehe go wẹ ya? Paali!

7, 8. (a) Vọjlado tẹwẹ yin bibasi gando nukunnumọjẹnumẹ mítọn go todin? (b) Nawẹ tẹmpli he yin mimọ to numimọ mẹ lọ gbọnvona tẹmpli gbigbọmẹ tọn he Paulu basi zẹẹmẹ etọn gbọn?

⁷ Dile mí ko dọ do wayi, owe mítọn lẹ ko basi zẹẹmẹ na owhe susu dọ tẹmpli daho gbigbọmẹ tọn Jehovah tọn wẹ Ezekiẹli mọ, yèdọ dehe apọsteli Paulu yin gbigbọdo nado kanwe gandego to wekanhlanmẹ etọn hlan Heblu lẹ mẹ. Ṣigba, dodinnanu yinukọn dogọ hẹn mí wá tadona kọ̀n dọ Ezekiẹli ma sọgan ko mọ tẹmpli daho gbigbọmẹ tọn lọ. Etẹwutu?

⁸ Jẹnukọn whẹ́, tẹmpli he Ezekiẹli mọ lọ ma sọgbe hẹ zẹẹmẹ he Paulu basi to gbọdo glọ. Lẹnnupọndo ehe ji: Apọsteli Paulu hẹn ẹn họnwun dọ gòhọtúntún he yin yiyizan to azán Mose tọn gbè lọ yin oyẹ̀ podọ ohia nuhe yiaga hugan de tọn. Gòhọtúntún lọ, kẹdẹdi tẹmpli Sọlomọni po Zelubabẹli po tọn he yè hodo apajlẹ dopolọ do gbá bẹ “Fiwiwe Gbaugbau” de hẹn. Paulu ylọ abò enẹ dọ “ofi wiwe he yin bibasi po alọ po” bo basi zẹẹmẹ dọ “ohia onú jọnun lẹ tọn” wẹ e yin, e ma yin onú jọnun lọ lẹ lọsu. Etẹwẹ yin onú jọnun lọ lẹ? Paulu dọ dọ: “Olọn lẹ lọsu . . . wẹ.” (Heb. 9:3, 24) Be olọn lẹ wẹ Ezekiẹli mọ ya? Lala. Numimọ Ezekiẹli tọn ma bẹ nudepope hẹn he dohia dọ nuhe to olọn mẹ lẹ mọ wẹ e te.—Yijlẹdo Daniẹli 7:9, 10, 13, 14 go.

9, 10. Na nuhe dù avọ́sinsan lẹ, nawẹ tẹmpli he Ezekiẹli mọ lọ gbọnvona tẹmpli daho gbigbọmẹ tọn he Paulu basi zẹẹmẹ etọn gbọn?

⁹ Vogbingbọn he tlẹ sọ jẹna ayidego hugan to numimọ Ezekiẹli tọn po zẹẹmẹ Paulu tọn lẹ po ṣẹnṣẹn wẹ tito avọ́sinsan lẹ tọn. Ezekiẹli sè bọ anademẹ gigọ́ lẹ yin nina gbẹtọ lẹ, ahọvi lẹ po yẹwhenọ lẹ po gando avọ́sinsan lẹ bibasi go. Yé dona nọ basi avọ́sinsan lẹ do ylando yetọn titi lẹ tamẹ. Yé sọ dona nọ basi avọ́sinsan jijọho tọn lẹ, ehe mẹ yé sọgan dù sọn to abò núdùdù tọn tẹmpli lọ tọn lẹ mẹ. (Ezek. 43:18, 19; 44:11, 15, 27; 45:15-20, 22-25) Be avọ́sinsan whẹwhẹ mọnkọ lẹ nọ yin bibasi to tẹmpli daho gbigbọmẹ tọn lọ mẹ wẹ ya?

¹⁰ Gblọndo lọ bọawu bosọ họnwun. Paulu dọmọ: “To whenue Klisti wá taidi yẹwhenọ daho nudagbe he ko wá aimẹ lẹ tọn, e jugbọn gòhọ he klohugan bo yin pipé hugan he ma yin bibasi po alọ po lọ mẹ, enẹ wẹ, dehe ma yin nudida ehe tọn. Ewọ ma biọ ofi wiwe lọ mẹ po ohùn gbọgbọẹ lẹ tọn po podọ po oyìnsú winyanwinyan lẹ tọn po gba, lala, ṣigba ewọ biọ e mẹ whladopo podọ kakadoi po ohùn edetiti tọn po bo mọ whlẹngán madopodo yí na mí.” (Heb. 9:11, 12) E dohia dọ avọ́sinsan dopo gee wẹ yin bibasi to tẹmpli daho gbigbọmẹ tọn lọ mẹ—yèdọ whladopo podọ kakadoi. Enẹ wẹ avọ́sinsan ofligọ tọn lọ, podọ e yin bibasi gbọn Yẹwhenọ Daho Hugan lọ lọsu titi, yèdọ Jesu Klisti dali. E họnwun dọ po avọ́sinsan gbọgbọẹvu gọna oyìnsú tọn wunmẹwunmẹ he tẹmpli he Ezekiẹli mọ to numimọ mẹ lọ bẹhẹn lẹ po, tẹmpli enẹ ma yin tẹmpli daho gbigbọmẹ tọn lọ.

11. To azán Ezekiẹli tọn gbè, naegbọn ojlẹ ma ko sọ̀ na Jiwheyẹwhe nado de nugbo lẹ hia gando tẹmpli daho gbigbọmẹ tọn lọ go?

¹¹ Ehe hẹn mí wá whẹwhinwhẹ́n awetọ ji he wutu Ezekiẹli ma gán ko mọ tẹmpli daho gbigbọmẹ tọn lọ: Ojlẹ ma ko sọ̀ na Jiwheyẹwhe  to whenẹnu nado de nugbo enẹlẹ hia. Flindọ, Juvi kanlinmọ he to Babilọni lẹ wẹ numimọ Ezekiẹli tọn tin na jẹnukọn. Yé gbẹ́ pò to Osẹ́n Mose tọn glọ. To vivọnu kanlinmọgbenu-ninọ lọ tọn, yé dona lẹkọyi Jelusalẹm bo yìn adà Osẹ́n enẹ tọn he gando sinsẹ̀n-bibasi wiwe-ṣeke go gbọn tẹmpli lọ po agbà etọn po vivọgbá dali. Enẹgodo, yé na zindonukọn nado to avọ́sinsan lẹ basi to finẹ, yèdọ na nudi owhe kanweko ṣidopo dile nulẹ wá yì do. Yí nukun homẹ tọn do pọ́n numọtolanmẹ he Ju lẹ na ko tindo eyin tẹmpli gbigbọmẹ tọn lọ wẹ numimọ Ezekiẹli tọn ko dohia yé—yèdọ tẹmpli he mẹ yẹwhenọ daho yí ogbẹ̀ etọn titi do sanvọ́ te bọ avọ́sinsan lẹpo yin hùzẹdeji to enẹgodo! Nawẹ yé sọgan mọnukunnujẹ numimọ mọnkọ mẹ gbọn? Be e ma na ko dekanpona gbemima yetọn nado yìn Osẹ́n Mose tọn ya? Na nugbo tọn, aliho nuyiwa tọn Jehovah tọn to whepoponu wẹ nado nọ de nugbo lẹ hia to ojlẹ sisọ mẹ podọ to whenue omẹ etọn lẹ ko wleawufo nado mọnukunnujẹemẹ.

12-14. Kanṣiṣa tẹwẹ tin to tẹmpli he Ezekiẹli mọ lọ po zẹẹmẹ he Paulu basi gando tẹmpli daho gbigbọmẹ tọn lọ go lẹ po ṣẹnṣẹn? (Pọ́n apotin lọ “Tẹmpli Voovo, Nuplọnmẹ Voovo.”)

¹² Eyin mọ wẹ, kanṣiṣa tẹwẹ tin to tẹmpli he Ezekiẹli mọ lọ po zẹẹmẹ he Paulu basi gando tẹmpli gbigbọmẹ tọn lọ go po ṣẹnṣẹn? Hẹn do ayiha mẹ dọ Paulu ma ze hodidọ etọn sinai do tẹmpli he Ezekiẹli mọ lọ ji; kakatimọ, gòhọtúntún azán Mose tọn gbè tọn ji wẹ e ze e sinai do. Nugbo wẹ dọ Paulu donù adà delẹ go  he sọ tin to tẹmpli Sọlomọni tọn po Zelubabẹli po tọn mẹ, podọ etlẹ yin to tẹmpli he Ezekiẹli mọ lọ mẹ. Ṣigba to paa mẹ, Ezekiẹli po Paulu po ma na ayidonugo nudopolọ lẹ to kandai yetọn lẹ mẹ. * Kakati kandai yetọn lẹ nido sọgbe hẹ yedelẹ pẹpẹ, yé yidogọna ode awetọ wẹ. Gbọnna?

¹³ Mí sọgan basi zẹẹmẹ kanṣiṣa he tin to adà Owe-wiwe tọn awe lọ lẹ ṣẹnṣẹn tọn dole: Sọn Paulu dè, mí plọnnu gando awuwledainanu Jehovah tọn lẹ na sinsẹ̀n-bibasi go, amọ́ sọn Ezekiẹli dè, mí plọnnu gando nujinọtedo Jehovah tọn lẹ na sinsẹ̀n-bibasi go. Nado plọnnu mí gando awuwledainanu Jehovah tọn lẹ na sinsẹ̀n-bibasi wiwe-ṣeke go, Paulu de zẹẹmẹ adà tẹmpli gbigbọmẹ tọn lọ tọn delẹ hia taidi dehe gando yẹwhenọ daho, avọ́sinsan lẹ, agbà lọ po Fiwiwe Gbaugbau po go. Ṣigba nado zinnudo nujinọtedo yiaga Jehovah tọn lẹ na sinsẹ̀n-bibasi wiwe-ṣeke ji, numimọ tẹmpli tọn he Ezekiẹli mọ lọ bẹ nudọnamẹ gigọ́ delẹ hẹn, ehe zọ́n bọ nuplọnmẹ susu na gbọṣi ayiha po ahun mítọn po mẹ gando nujinọtedo Jehovah tọn lẹ go.

¹⁴ Po enẹ po, tadona tẹ kọ̀n wẹ nukunnumọjẹnumẹ yọyọ mítọn plan mí jẹ? E họnwun dọ, e ma to didohia dọ numimọ Ezekiẹli tọn ma tindo zẹẹmẹ na mí sọmọ to egbehe. Nado mọ lehe mí gán mọaleyi sọn numimọ lọ mẹ do, mì gbọ mí ni yiagbọji bo  lẹnnupọndo lehe e na ko hẹn ale wá na Ju nugbonọ lẹ do to azán Ezekiẹli tọn gbè podọ to enẹgodo.

15. (a) Etẹwẹ yin wẹndomẹ dọdai tọn he numimọ Ezekiẹli tọn bẹhẹn to blebu mẹ? (b) Vogbingbọn tẹwẹ tin to Ezekiẹli weta 8 po Ezekiẹli weta 40 jẹ 48 po ṣẹnṣẹn?

¹⁵ Nado mọ gblọndo Biblu tọn na kanbiọ enẹ, mì gbọ mí ni gbadopọnna kanbiọ debọdo-dego delẹ he na gọalọna mí nado lẹnnupọndo whẹho lọ ji to gigọ́ mẹ. Tintan whẹ́, etẹwẹ yin wẹndomẹ dọdai tọn he numimọ lọ bẹhẹn to blebu mẹ? Do glido, wẹndomẹ tangan lọ wẹ yindọ sinsẹ̀n-bibasi wiwe-ṣeke na yin hinhẹngọwa! Ehe họnwun hezeheze na Ezekiẹli. E ko kàn nuhe mí yọnẹn to egbehe taidi weta 8tọ owe Ezekiẹli tọn to whenẹnu, ehe mẹ Jehovah yí numimọ de zan te nado do ninọmẹ gblezọn he mẹ tẹmpli Jelusalẹm tọn te hia. Din, homẹ Ezekiẹli tọn na ko hùn nado kanwe gando ninọmẹ he gbọnvo pete de go, dile e sọawuhia do todin to weta 40 jẹ 48 mẹ. To weta ehelẹ mẹ, e ma yin sinsẹ̀n-bibasi wiwe-ṣeke he ko yin hinhẹnflu wẹ sọ yin nùdego ba, ṣigba sinsẹ̀n-bibasi wiwe-ṣeke dile e dona ko te do—yèdọ apajlẹ pipé sinsẹ̀n-bibasi hlan Jehovah tọn dile e te do to Osẹ́n Mose tọn mẹ.

16. Nawẹ tẹmpli he Ezekiẹli mọ lọ do nugbo-yinyin nuhe Isaia ko dọdai etọn owhe kanweko jẹnukọn tọn hia gbọn?

¹⁶ Na sinsẹ̀n-bibasi Jehovah tọn nido yin hinhẹngọwa otẹn he jẹna ẹn mẹ, e dona yin zizedaga. To nudi owhe kanweko linlán jẹnukọn, yẹwhegán Isaia yin gbigbọdo nado wlan dọmọ: “To azán godo tọn lẹ mẹ, osó ohọ̀ Jehovah tọn na yin hinhẹn lodo gligli to aga pete osó lẹ tọn, e nasọ yin zizedaga hú okọ́ta lẹ.” (Isa. 2:2) Isaia mọ hlan nukọn hezeheze dọ sinsẹ̀n-bibasi wiwe-ṣeke Jehovah tọn na yin hinhẹngọwa bo na yin zizedaga taidi dọ osó he yiaga hugan osó lẹpo ji wẹ e te nkọ. Podọ todin, fitẹ wẹ Ezekiẹli mọ ede te to numimọ he wá sọn olọn mẹ ehe mẹ? E mọ ede “to osó he yiaga taun de ji,” fihe e mọ ohọ̀ Jehovah tọn te! (Ezek. 40:2) Gbọnmọ dali, numimọ Ezekiẹli tọn hẹnmẹ deji dọ sinsẹ̀n-bibasi wiwe-ṣeke na yin hinhẹngọwa nugbo.

17. Basi bladopọ Ezekiẹli weta 40 jẹ 48 tọn to kleun mẹ.

¹⁷ Mì gbọ mí ni basi bladopọ kleun nuhe Ezekiẹli mọ bosọ sè lẹ tọn, dile e yin kinkandai do to Ezekiẹli weta 40 jẹ 48 mẹ. E mọ bọ angẹli de to họngbo tẹmpli lọ tọn lẹ jlẹ, gọna adó etọn, awánu etọn lẹ po fiwiwe etọn po. (Ezek. 40-42) Enẹgodo, ojlofọndotenamẹnu de jọ: Jehovah wá tẹmpli etọn mẹ po gigo daho po! Jehovah na ayinamẹ omẹ etọn tasinyẹntọ lẹ gọna yẹwhenọ lẹ po ahọvi lẹ po. (Ezek. 43:1-12; 44:10-31; 45:9-12) Ezekiẹli mọ otọ̀ de he to sisà sọn fiwiwe lọ mẹ bo to nulẹ hẹngọwa ogbẹ̀ bosọ to dona lẹ hẹnwa dile e to sisà biọ Ohù kúkú mẹ. (Ezek. 47:1-12) E sọ mọ bọ aigba lọ lọsu yin mimá do adà voovo he sọzẹn lẹ ji bọ sinsẹ̀n-bibasi wiwe-ṣeke nọ wá aimẹ to fihe sẹpọ ṣẹnṣẹn aigba lọ tọn. (Ezek. 45:1-8; 47:13–48:35) Etẹwẹ ehe lẹpo dohia to blebu mẹ? E họnwun dọ jidide wẹ Jehovah to nina omẹ etọn lẹ dọ  sinsẹ̀n-bibasi wiwe-ṣeke na yin hinhẹngọwa bo na yin zizedaga. E na dona ohọ̀ sinsẹ̀n-bibasi tọn etọn gbọn tintin to finẹ etọn titi dali, podọ e na hẹn dona lẹ sà jẹgbonu sọn tẹmpli enẹ mẹ nado hẹn azọ̀nhẹngbọ, ogbẹ̀ po jijọho po wá aigba he yin hinhẹngọwa lọ ji.

18. Be onú jọnun de wẹ numimọ tẹmpli lọ tọn to alọdlẹndo ya? Basi zẹẹmẹ.

¹⁸ Awetọ, be onú jọnun de wẹ numimọ ehe to alọdlẹndo ya? Lala. Ezekiẹli po kanlinmọ hatọ etọn he e basi zẹẹmẹ numimọ etọn tọn na lẹ po na ko doayi e go to afọdopolọji dọ e ma yin onú jọnun wẹ numimọ lọ to alọdlẹndo. Naegbọn mí do dọ mọ? Flindọ Ezekiẹli mọ tẹmpli ehe to “osó he yiaga taun de ji.” Dile etlẹ yindọ ehe sọgbe pẹpẹ hẹ dọdai Isaia tọn, e ma yọnbasi dọ tẹmpli ehe ni nọ lẹdo he yin alọdlẹndo lọ mẹ. Osó Molia ji wẹ tẹmpli Sọlomọni tọn yin gbigbá do to Jelusalẹm, podọ finẹ wẹ e na wá yin vivọgbá do to gbèdopo. Ṣigba, be “osó he yiaga taun de” wẹ osó ehe yin ya? Lala. Nado dọ hójọhó, Osó Molia tin to osó daho devo he sọzẹn hẹ ẹ kavi he tlẹ yiaga hú i lẹ ṣẹnṣẹn. Humọ, tẹmpli he Ezekiẹli mọ lọ klo taun. Po gbigblo etọn he adó yin dido lẹdo po, e ko klo gbau nado nọ aga Osó Molia tọn. E ma tlẹ sọgan ko mọtẹn to tòdaho Jelusalẹm tọn mẹ to azán Sọlomọni tọn gbè! Gbọnvona enẹ, e họnwun dọ kanlinmọ lọ lẹ ma donukun dọ tọ̀sisa paa de na sà sọn fiwiwe tẹmpli lọ tọn mẹ yì biọ Ohù Kúkú mẹ, nado hẹn osin kúkú he to finẹ lẹ gọwá ogbẹ̀. Nado dotana, Aigba Pagbe tọn lọ yin lẹdo osó tọn de, enẹwutu dogbó he jlọ lẹ ma sọgan ko yin dido to aliho tlọlọ tọn mẹ to  hẹnnu lẹ ṣẹnṣẹn dile numimọ lọ dohia do. Po enẹ po, e họnwun dọ numimọ lọ ma to alọdlẹndo onú jọnun de.

19-21. Nuyiwadomẹji tẹwẹ Jehovah jlo dọ numimọ Ezekiẹli tọn ni tindo do gbẹtọ lọ lẹ ji, podọ naegbọn e sọgan yinuwado yé ji to aliho enẹ mẹ?

¹⁹ Atọ̀ntọ, nuyiwadomẹji tẹwẹ numimọ lọ dona tindo do omẹ Ezekiẹli tọn lẹ ji? Dile yé to nulẹnpọn do nujinọtedo yiaga Jehovah tọn lẹ na sinsẹ̀n-bibasi wiwe-ṣeke ji, winyan dona ko hù yé taun. Jehovah dọna Ezekiẹli dọ ni “basi zẹẹmẹ tẹmpli lọ tọn na owhé Islaeli tọn.” Zẹẹmẹ he Ezekiẹli na basi gando tẹmpli lọ go dona bẹ nudọnamẹ gigọ́ hẹn sọmọ bọ Islaelivi lẹ na penugo nado “doayi yẹdide etọn go” to aliho de mẹ. Naegbọn gbẹtọ lọ lẹ dona lẹnayihamẹpọn do tẹmpli lọ ji? Dile mí ko mọ do, e ma yin nado gbá ẹ wutu. Kakatimọ, dile Jehovah dọ do, “na winyan nido hù yé na nuṣiwa yetọn lẹ wutu” wẹ.—Hia Ezekiẹli 43:10-12.

²⁰ Naegbọn numimọ ehe dona yinuwado ayihadawhẹnamẹnu mẹhe yin ahunjijlọnọ lẹ tọn ji bọ winyan nado hù yé? Doayi nuhe yin didọna Ezekiẹli go dọmọ: “Visunnu gbẹtọ tọn, na ayidonugo, pọ́n, bo dotoai po sọwhiwhe po na nuhe yẹn to didọna we lẹpo gando osẹ́ndoai lẹ po osẹ́n tẹmpli Jehovah tọn tọn lẹ po go.” (Ezek. 44:5) Whlasusu wẹ Ezekiẹli sèhó gando osẹ́ndoai po osẹ́n lẹ po go. (Ezek. 43:11, 12; 44:24; 46:14) Ezekiẹli sọ mọ nuflinmẹ yí whẹwhẹ gando nujinọtedo Jehovah tọn lẹ go—etlẹ yin nujinọtedo he nọ do tedidi awagbà dopo tọn po ojlẹnu zínpinpẹn tọn he sọgbe lẹ po hia. (Ezek. 40:5; 45:10-12; yijlẹdo Howhinwhẹn lẹ 16:11 go.) Etẹ nkọ, to numimọ ehe kẹdẹ mẹ, Ezekiẹli yí hogbe dowhenu tọn he nọ yin lilẹdo “jlẹ” kavi “ojlẹnu” zan hugan whla 50!

²¹ Etẹ na dọ wẹ Jehovah te na omẹ etọn lẹ taun bo do to hodọ gbọzangbọzan gando ojlẹnu, zínpinpẹn, osẹ́n po osẹ́ndoai lẹ po go? E taidi dọ nuflin yé wẹ e te po hogbe sinsinyẹn lẹ po gando nugbo titengbe ehe go: Jehovah kẹdẹ wẹ nọ ze nujinọtedo sinsẹ̀n-bibasi wiwe-ṣeke tọn lẹ dai. Winyan dona hù mẹdepope he ko jẹla na nujinọtedo enẹlẹ! Amọ́, aliho tẹlẹ mẹ wẹ numimọ lọ plọnnu titengbe ehelẹ Ju lẹ te? To weta he bọdego mẹ, mí na dọhodo apajlẹ tangan delẹ ji. Enẹ na gọalọna mí nado mọ nuhe numimọ ayidego tọn ehe zẹẹmẹdo na mí to egbehe yinukọn dogọ.