1-3. (a) Ndi ngani Hesekiele a tshi nga vha o khuthadzwa nga bono ḽa thembele khulwane? (Sedzani tshifanyiso tsha u thoma.) (b) Ri ḓo guda mini kha ino ndima?

HUMBULANI nga ha Hesekiele e na miṅwaha ya 50. O no fhedza miṅwaha ya 25 o thubiwa. Ho no fhela miṅwaha minzhi thembele i re Yerusalema i si tsha shuma. Arali Hesekiele o vha a tshi humbula uri a nga shuma sa tshifhe Yerusalema, muḽoro wawe wo fela mbevha. Hu tshee ho sala miṅwaha i ṱoḓaho u vha 56 uri vha vhofhololwe vhuthubwani. Hesekiele u a zwi ḓivha uri zwi nga kha ḓi sa konadzea uri a tshile, a vhone vhathu vha Yehova vha tshi vhuyedzedzwa shangoni ḽa havho na u vhona thembele i tshi fhaṱululwa. (Yer. 25:11) Naa zwi a mu ṱungufhadza u humbula nga ha zwenezwo?

² Yehova o sumbedza Hesekiele vhuthu nga u shumisa tshenetshi tshifhinga u itela u mu sumbedza bono ḽi re na zwidodombedzwa zwinzhi. Ḽeneḽo bono ḽo vha ḽi tshi ḓo khuthadza onoyo munna a fhulufhedzeaho na u ita uri a vhe na fhulufhelo! Kha ḽeneḽo bono, Hesekiele o iswa shangoni ḽa hawe a dzudzwa kha thavha ndapfu-ndapfu. O ṱanganedzwa nga “munna we a vha a tshi penya sa koporo.” Onoyu muruṅwa a mu sumbedza tshifhaṱo tshoṱhe tsha thembele i mangadzaho. (Vhalani Hesekiele 40:1-4.) Zwoṱhe zwo vha zwi tshi tou u nga ndi zwa vhukuma! Zwe Hesekiele a zwi vhona zwi fanela u vha zwo mu khwaṱhisa lutendo, zwo mu akhamadza  na u mu ḓaḓisa. Naho a tshi khou vhona thembele i re na zwithu zwe a zwi ḓowela, yo vha yo fhambanesa na thembele ya Yerusalema ye a vha a tshi i ḓivha.

³ Ndima dzoṱhe dza 9 dza u fhedza dza bugu ya Hesekiele, dzi amba nga ha ḽeneḽi bono ḽi mangadzaho. Kha ri ambe nga ha nḓila ine ra tea u dzhia ngayo ḽeneḽi bono, musi ri tshi khou guda nga haḽo na u ṱoḓa u ḽi pfesesa. Nga murahu, ri ḓo guda uri, naa thembele ye ya vhoniwa nga Hesekiele ndi thembele khulwane ya pfanyisedzo ye muapostola Paulo a amba nga hayo nga murahu ha maḓana manzhi a miṅwaha? Tsha u fhedza, ri ḓo haseledza uri ḽeneḽo bono ḽo vha ḽi tshi kwama hani Hesekiele na vhe a vha o thubiwa navho.

4. Ro vha ri tshi pfesesa hani bono ḽa Hesekiele, fhedzi zwino ḽi tea u ṱalutshedzwa hani?

⁴ Tshifhingani tsho fhiraho, khandiso dzashu dzo vha dzi tshi amba uri Hesekiele o vhona thembele ya Yehova khulwane ya pfanyisedzo, ye muapostola Paulo a amba nga hayo kha vhurifhi he a vhu ṅwalela Vhahevheru. * U ya nga nḓila ye ra vha ri tshi pfesesa ngayo, zwo vha zwi tshi vhonala zwi tshi pfala uri ri shumise mafanyisi, musi ri tshi amba nga ha tshiṅwe na tshiṅwe tshi re thembeleni ya bono ḽa Hesekiele. Fhedzi musi ri tshi ita ṱhoḓisiso, u rabela na u elekanya, ro ṱhogomela uri bono ḽa Hesekiele ḽa thembele ḽi fanela u ṱalutshedzwa nga nḓila ine zwa ḓo lelutshela vhathu u pfesesa.

5, 6. (a) Muapostola Paulo o sumbedza hani u ḓiṱukufhadza musi a tshi amba nga ha dennde ḽikhethwa? (b) Paulo o ri mini nga ha zwiṅwe zwidodombedzwa zwa dennde ḽikhethwa, nahone ri nga shumisa hani zwe a zwi amba u itela u pfesesa bono ḽa Hesekiele ḽa thembele?

⁵ Zwi vhonala hu vhuṱali u sa ṱalutshedza kana u fanyisa tshidodombedzwa tshiṅwe na tshiṅwe tshi re kha bono ḽa Hesekiele ḽa thembele. Ndi ngani? Ṱhogomelani tsumbo i tevhelaho. Musi Paulo a tshi amba nga ha dennde ḽikhethwa na thembele ya pfanyisedzo, o amba na zwidodombedzwa zwa dennde ḽikhethwa, zwi ngaho mudzio wa musuku, mutibo wa mbulungelo na mvuvhelo ya musuku ye ya vha i na mana. Naa o ṱalutshedza uri zwenezwo zwithu zwi amba mini u ya nga vhuporofita? Zwi tou vha khagala uri muya mukhethwa a wo ngo mu livhisa uri a ite nga u ralo. Fhedzi Paulo o ṅwala a ri: “Zwino a si tshifhinga tsha u amba nga vhuḓalo nga ha zwenezwi zwithu.” (Vhahev. 9:4, 5) Paulo o vha o ḓiimisela u tendela muya mukhethwa u tshi mu livhisa na u lindela Yehova nga u ḓiṱukufhadza.—Vhahev. 9:8.

⁶ Ri nga dzhia bono ḽa Hesekiele ḽa thembele nga nḓila i fanaho. Na bono ḽa Hesekiele ḽi na zwidodombedzwa zwinzhi. Ndi zwavhuḓi u lindela Yehova uri a bvisele mafhungo khagala musi zwi tshi ṱoḓea. (Vhalani Mika 7:7.) Fhedzi naa ri nga amba uri muya wa Yehova a u athu u ri dzumbululela mafhungo o engedzeaho nga ha ḽeneḽi bono? Hai!

7, 8. (a) Ho khwiniswa mini kha nḓila ye ra vha ri tshi pfesesa ngayo? (b) Thembele i re kha bono yo fhambana hani na thembele ya pfanyisedzo ye Paulo a amba nga hayo?

⁷ Samusi zwo ambiwa mathomoni, lwa miṅwaha minzhi, khandiso dzo ṱalutshedza uri Hesekiele o vhona thembele khulwane ya Yehova ya pfanyisedzo ye Paulo a amba nga hayo kha vhurifhi he a  vhu ṅwalela Vhahevheru. Fhedzi musi ri tshi ita ṱhoḓisiso yo engedzeaho, ri nga amba uri Hesekiele ho ngo vhona thembele khulwane ya pfanyisedzo. Ndi ngani?

⁸ Tsha u thoma, thembele ye Hesekiele a i vhona a i tshimbidzani na zwe Paulo a zwi ṱalutshedza. Ṱhogomelani hezwi: Muapostola Paulo o zwi bvisela khagala uri dennde ḽikhethwa ḽa misini ya Mushe, ḽo vha ḽi murunzi wa zwi ḓaho nahone ḽi tshi fanyisela zwiṅwe zwithu zwihulwane. Thembele ya Salomo na ya Serubabele dzo vha dzo fhaṱwa nga nḓila i fanaho, dzi na fhethu hune ha vhidzwa uri ndi “Hukhethwa-khethwa.” Na dennde ḽikhethwa ḽo vha ḽo itwa nga nḓila i fanaho. Paulo o vhidza henefho fhethu uri ndi “fhethu hukhethwa ho itwaho nga zwanḓa.” O ṱalutshedza uri hu “fanyisela fhethu hukhethwa ha vhukuma.” Ndi ngafhi henefho fhethu ha vhukuma? Paulo o ṱalutshedza a ri: “Ṱaḓulu.” (Vhahev. 9:3, 24) Naa Hesekiele o vhona ṱaḓulu? Hai. Bono ḽa Hesekiele a ḽi ambi uri o vhona zwithu zwa ṱaḓulu.—Vhambedzani na Daniele 7:9, 10, 13, 14.

9, 10. Musi zwi tshi ḓa kha zwiṱhavhelo, thembele i re kha bono ḽa Hesekiele yo fhambana hani na thembele khulwane ya pfanyisedzo ye Paulo a amba nga hayo?

⁹ Bono ḽa Hesekiele ḽo fhambana na zwe Paulo a zwi amba musi zwi tshi ḓa kha zwiṱhavhelo. Hesekiele o pfa vhathu, vharangaphanḓa na vhotshifhe vha tshi vhudzwa nḓila ine vha tea u ṋekedza ngayo zwiṱhavhelo. Vho vha vha tshi tea u ṋekedza zwiṱhavhelo uri vha hangwelwe zwivhi. Vho vha vha tshi tea u dovha vha ṋekedza zwiṱhavhelo zwa u pfumedzana, zwe khamusi vha zwi ḽa vhe fhethu ha u ḽela henefho thembeleni. (Hesek. 43:18, 19; 44:11, 15, 27; 45:15-20, 22-25) Naa thembeleni khulwane ya pfanyisedzo na hone hu dzula hu tshi ṋekedzwa zwiṱhavhelo nga nḓila i fanaho?

¹⁰ Phindulo i khagala. Paulo o ṱalutshedza a ri: “Musi Kristo a tshi ḓa sa tshifhe muhulu wa zwivhuya zwo no vhaho hone, o dzhena denndeni ḽa ndeme vhukuma na ḽa khwine, ḽi songo itwaho nga zwanḓa nahone a si ḽa fhano kha ḽifhasi. Ho ngo dzhena fhethu hukhethwa nga malofha a mbudzi na a mbohwana, fhedzi o dzhena nga malofha awe luthihi nahone lwa tshoṱhe, a ri tshidza nga hu sa fheli.” (Vhahev. 9:11, 12) Nga zwenezwo, thembeleni khulwane ya pfanyisedzo hu ṋekedzwa tshiṱhavhelo tshithihi nahone lwa tshoṱhe. Tshenetsho ndi tshiṱhavhelo tshi rengululaho, tshi ṋekedzwaho nga Yesu Kristo ane a vha Tshifhe Muhulu. Zwi khagala uri thembele ye Hesekiele a i vhona kha bono i re na zwiṱhavhelo zwinzhi zwa dzimbudzi na zwa dzimboho, a si thembele khulwane ya pfanyisedzo.

11. Misini ya Hesekiele, ndi ngani tsho vha tshi si tshifhinga tsha uri Mudzimu a dzumbulule ngoho nga ha thembele khulwane ya pfanyisedzo?

¹¹ Zwenezwo zwi ri swikisa kha tshiitisi tsha vhuvhili tsha uri ndi ngani Hesekiele a songo vhona thembele khulwane ya pfanyisedzo: Tshifhinga tsha uri Mudzimu a dzumbulule yeneyo ngoho, tsho vha tshi sa athu u swika. Ri songo hangwa uri mathomoni, bono ḽa Hesekiele ḽo vha ḽo livhiswa kha Vhayuda vho thubiwaho Babele. Vho vha vha tshi livhiswa nga Mulayo wa Mushe. Musi vha tshi vhofhololwa vhuthubwani, vho vha vha tshi tea u vhuyelela Yerusalema,  vha livhiswa nga wonoyo Mulayo u ambaho nga ha vhurabeli ho kunaho. Vho vha vha tshi ḓo ita zwenezwo nga u fhaṱulula thembele na aḽeṱare yayo. Vho vha vha tshi ḓo bvela phanḓa vha tshi ṋekedza zwiṱhavhelo henefho lwa miṅwaha i ṱoḓaho u vha maḓana a rathi. Humbulani uri zwo vha zwi tshi ḓo kwama hani Vhayuda arali bono ḽa Hesekiele ḽo sumbedza thembele ya pfanyisedzo, ye khayo tshifhe muhulu a ṋekedza vhutshilo hawe sa tshiṱhavhelo, tshe tsha ita uri zwiṱhavhelo zwoṱhe zwi si tsha shuma! Vho vha vha tshi ḓo pfesesa hani ḽeneḽo bono? Naa zwo vha zwi sa ḓo ita uri vha si tsha ḓiimisela u tevhedza Mulayo wa Mushe? Yehova u dzula a tshi dzumbulula ngoho nga tshifhinga tsho teaho na musi vhathu vhawe vho lugela u pfa yeneyo ngoho.

12-14. Zwe Paulo a zwi ṱalutshedza nga ha thembele ya pfanyisedzo zwi tshimbidzana hani na thembele ye Hesekiele a i vhona? (Sedzani bogisi “Thembele Dzi Sa Fani, Ngudo Dzi Sa Fani.”)

¹² Zwino bono ḽa Hesekiele ḽa thembele ḽi tshimbidzana hani na zwe Paulo a zwi ṱalutshedza nga ha thembele ya pfanyisedzo? Ri songo hangwa uri zwe Paulo a zwi amba zwo vha zwi songo thewa kha bono ḽa Hesekiele ḽa thembele; fhedzi zwo vha zwo thewa kha dennde ḽikhethwa ḽa misini ya Mushe. Ndi ngoho uri Paulo o amba nga ha zwithu zwo vhalaho zwe zwa vha zwi hone thembeleni ya Salomo na ya Serubabele, zwe zwa vha zwi hone na kha bono ḽa Hesekiele ḽa thembele. Fhedzi musi Hesekiele na Paulo vha tshi ṅwala, vho livhisa ṱhogomelo kha zwithu zwi sa fani. * Naho zwe vha zwi ṅwala zwi sa fani, fhedzi zwi a tshimbidzana. Nga nḓila-ḓe?

 ¹³ Zwe Paulo na Hesekiele vha zwi ṅwala zwi tshimbidzana nga heyi nḓila: Kha Paulo, ri guda zwe Yehova a zwi dzudzanya nga ha vhurabeli, fhedzi kha Hesekiele ri guda nḓila ine Yehova a ṱoḓa ri tshi mu gwadamela ngayo. U itela u ri gudisa nga zwe Yehova a zwi dzudzanya kha vhurabeli ho kunaho, Paulo u amba nga ha zwithu zwi re kha thembele ya pfanyisedzo. O amba nga ha tshifhe muhulu, zwiṱhavhelo, aḽeṱare na fhethu Hukhethwa-khethwa. Fhedzi bono ḽa Hesekiele ḽa thembele, ḽi ombedzela nḓila ine Yehova a ṱoḓa ri tshi mu gwadamela ngayo. Ḽi sumbedza zwidodombedzwa zwine khazwo ra guda zwithu zwinzhi nga ha nḓila ine Yehova a ṱoḓa ri tshi mu gwadamela ngayo.

¹⁴ Nḓila ine ra pfesesa ngayo enea mafhungo zwino i ri kwama hani? A zwi ambi uri zwi re kha bono ḽa Hesekiele a si zwa ndeme kha riṋe ṋamusi. U itela u vhona nḓila ine ḽeneḽi bono ḽa ri vhuyedza ngayo, kha ri thome nga u vhona uri ḽo vhuyedza hani Vhayuda vha fhulufhedzeaho vha misini ya Hesekiele na nga murahu.

15. (a) Bono ḽa Hesekiele ḽo vha ḽi na mulaedza ufhio wa ndeme? (b) Hu na phambano ifhio kha Hesekiele ndima 8 na ndima 40 u swika kha ndima 48?

¹⁵ U itela u vhona uri Bivhili i fhindula hani yeneyo mbudziso, kha ri haseledze nga ha mbudziso dzo vhalaho dzine dza tshimbidzana, dzine dza ḓo ri thusa u pfesesa enea mafhungo nga vhuḓalo.  Mbudziso ya u thoma ndi ya uri, ḽeneḽo bono ḽo vha ḽi tshi khou amba nga ha mini? Mulaedza wa ndeme wo vha u wa uri vhurabeli ho kunaho vhu ḓo vusuluswa! Zwi tou vha khagala uri Hesekiele o vha a tshi zwi pfesesa. O vha o no ṅwala zwi re kha Hesekiele ndima 8. Kha yeneyo ndima, Yehova o mu sumbedza vhuimo vhu nengisaho he thembele ya vha i khaho. Hesekiele u fanela u vha o takala vhukuma musi a tshi ṅwala zwidodombedzwa zwi takadzaho zwi re kha ndima 40 u swika kha ndima 48. Kha dzenedzi ndima, ri vhona vhurabeli ho kunaho vhu songo tsha tshikafhala, fhedzi vhu nga nḓila ine ha tea u vha ngayo, hu tshi gwadamelwa Yehova nga nḓila yo teaho u tendelana na Mulayo wa Mushe.

16. Bono ḽa Hesekiele ḽa thembele ḽo khwaṱhisedza hani zwe Yesaya a zwi amba miṅwahani ya ḓana hu tshee nga phanḓa?

¹⁶ U itela uri vhurabeli ha Yehova vhu dovhe vhu vhe nga nḓila ye ha vha vhu ngayo, ho vha vhu tshi tea u dzhiiwa vhu ha ndeme u fhira zwithu zwoṱhe. Miṅwaha i fhiraho ḓana zwenezwo zwi sa athu u itea, muporofita Yesaya o hevhedzwa uri a ṅwale zwi tevhelaho: “Maḓuvhani a vhufhelo, thavha ine nnḓu ya Yehova ya vha khayo i ḓo vhewa hune ya fhira dziṅwe thavha, ya lapfa u fhira zwikwara zwoṱhe.” (Yes. 2:2) Yesaya o zwi vhona zwi sa athu u itea uri vhurabeli ha Yehova ho kunaho ho vha vhu tshi ḓo vusuluswa ha dzhielwa nṱha u fhira zwithu zwoṱhe, zwa tou nga vhu nṱha ha thavha ndapfu-ndapfu. Zwino Hesekiele o vha e ngafhi musi Mudzimu a tshi mu sumbedza ḽeneḽi bono? O vha e “kha thavha ndapfu,” o sedza nnḓu ya Yehova! (Hesek. 40:2) Nga zwenezwo, zwe Hesekiele a zwi vhona kha bono zwo khwaṱhisedza uri vhurabeli ho kunaho vhu ḓo vusuluswa.

17. Ambani nga u tou pfufhifhadza zwi re kha Hesekiele ndima 40 u swika kha ndima 48.

¹⁷ Kha ri haseledze nga u tou pfufhifhadza zwe Hesekiele a zwi vhona na zwe a zwi pfa, samusi zwo ṅwalwa kha Hesekiele ndima 40 u swika kha ndima 48. O vha o sedza musi muruṅwa a tshi khou kala khoro, luvhondo, miṱa na nnḓu khethwa i re thembeleni. (Hesek. 40–42) Ho mbo ḓi itea zwithu zwi takadzaho: Vhugala ha Yehova ha dzhena thembeleni! Yehova o mbo ḓi kaidza vhathu vhawe vha sa thetshelesi, vhotshifhe na vharangaphanḓa. (Hesek. 43:1-12; 44:10-31; 45:9-12) Hesekiele o vhona mulambo u tshi elela u tshi bva nḓuni khethwa, u tshi khou ḓisa vhutshilo na phaṱhutshedzo musi u tshi elela u tshi dzhena Lwanzheni lwo Faho. (Hesek. 47:1-12) A vhona na shango ḽi tshi khethekanywa ḽa vha zwipiḓa zwo linganaho, vhathu vhe vhukati ha shango vha tshi khou gwadamela Mudzimu kha vhurabeli ho kunaho. (Hesek. 45:1-8; 47:13–48:35) Mbuno khulwane yo vha i ifhio? Zwi tou vha khagala uri Yehova o vha a tshi khou khwaṱhisedza vhathu vhawe uri vhurabeli ho kunaho vhu ḓo vusuluswa ha dzhielwa nṱha u fhira zwithu zwoṱhe. O vha a tshi ḓo fhaṱutshedza vhathu vhawe, a vha fhodza, a vha ṋea vhutshilo na u ita uri vha dzudzanyee shangoni ḽo vusuluswaho.

18. Naa zwi re kha bono zwo vha zwi tshi tea u dzhiiwa zwi zwa vhukuma? Ṱalutshedzani.

¹⁸ Mbudziso ya vhuvhili, naa zwi re kha bono zwo vha zwi tshi tea u dzhiiwa zwi zwa vhukuma? Hai. Hesekiele na vhe a vha o  thubiwa navho, vha nga vha vho ṱavhanya u zwi pfesesa uri a vho ngo fanela u dzhia zwi re kha ḽeneḽo bono zwi zwa vhukuma. Ndi ngani? Ri songo hangwa uri Hesekiele o vha e kha “thavha ndapfu” musi a tshi vhona yeneyi thembele. Naho zwenezwi zwo vha zwi tshi tshimbidzana zwavhuḓi na zwe Yesaya a zwi porofita, zwo vha zwi sa tshimbidzani na he thembele ya vhukuma ya vha i hone. Thembele ya Salomo yo vha i Yerusalema Thavhani ya Moriya nahone yo vha i tshi ḓo dovha ya fhaṱiwa henefho. Fhedzi naa yeneyo thavha yo vha i “thavha ndapfu”? Hai. Thavha ya Moriya yo tangwa nga dziṅwe thavha dzo lapfaho u lingana nayo kana u i fhira. Zwiṅwe hafhu, thembele ye Hesekiele a i vhona yo vha i khulwane. Yeneyo thembele na mbondo dzayo, zwo vha zwo hula lwe zwa vha zwi nga si fhelele kha Thavha ya Moriya. Yo vha i sa ḓo fhelela na kha muḓi wa Yerusalema wa misini ya Salomo! Zwiṅwe hafhu, zwi tou vha khagala uri vhathu vho thubiwaho vho vha vha songo lavhelela uri mulambo wa vhukuma u ḓo elela u tshi bva thembeleni ya nnḓu khethwa, wa dzhena Lwanzheni lwo Faho, wa ita uri eneo maḓi a kune. Tsha u fhedza, samusi Shangoni ḽo Fhulufhedziswaho ho vha hu na thavha nnzhi, zwo vha zwi sa konadzei uri hu vhewe mikano vhukati ha dzitshaka samusi zwo ṱalutshedzwa kha bono. Nga zwenezwo, zwithu zwi re kha ḽeneḽo bono ndi zwa pfanyisedzo.

19-21. Yehova o vha a tshi ṱoḓa uri vhathu vha ḓipfe hani nga bono ḽa Hesekiele, nahone ndi ngani ḽo vha ḽi tshi nga ita uri vha ḓipfe nga u ralo?

¹⁹ Mbudziso ya vhuraru ndi ya uri, ḽeneḽo bono ḽo vha ḽi tshi tea u kwama hani Vhayuda vhe Hesekiele a vha o thubiwa navho?  Vhenevho vhathu vho vha vha tshi fanela u farwa nga ṱhoni musi vha tshi elekanya nga nḓila ya vhuimo ha nṱha ye Yehova a vha a tshi tea u gwadamelwa ngayo kha vhurabeli ho kunaho. Yehova o vhudza Hesekiele uri a “ṱalutshedz[e] vha nnḓu ya Isiraele nga ha thembele.” Musi Hesekiele a tshi ṱalutshedza nga ha yeneyo thembele, o vha a songo fanela u siedza tshithu u itela uri Vhaisiraele vha kone u “sedz[a] pulane yayo.” Ndi ngani vhathu vho vha vho tea u sedzulusa yeneyo thembele? Samusi ro zwi vhona, vho vha vha sa khou itela uri vha i fhaṱe. Fhedzi ho vha hu itela “uri vha dzhenwe nga ṱhoni nga nṱhani ha vhukhakhi havho,” samusi Yehova o amba.—Vhalani Hesekiele 43:10-12.

²⁰ Ndi ngani ḽeneḽi bono ḽi tshi nga vha ḽo kwama vhathu vha mbilu dzavhuḓi na u ita uri vha farwe nga ṱhoni? Ṱhogomelani zwe Hesekiele a vhudzwa: “Murwa muthu, ṱhogomela, u lavhelese, u thetshelese nga vhuronwane zwoṱhe zwine nda u vhudza nga ha maitele na milayo ya thembele ya Yehova.” (Hesek. 44:5) Hesekiele o pfa nga ha maitele na milayo lunzhi-lunzhi. (Hesek. 43:11, 12; 44:24; 46:14) Kanzhi Hesekiele o vha a tshi humbudzwa nga ha milayo ya Yehova na nḓila ye ha vha hu tshi tea u kalwa ngayo vhulapfu ha khubithi na mielo yo teaho. (Hesek. 40:5; 45:10-12; vhambedzani na Mirero 16:11.) Kha ḽeneḽi bono ḽithihi, Hesekiele o shumisa lu fhiraho 50 maipfi a luambo lwa u thoma o ṱalutshedzelwaho nga uri “kala,” “tshikalo” na maṅwe maipfi a tshimbidzanaho na eneo!

²¹ Yehova o vha a tshi khou vhudza vhathu vhawe mini musi a tshi amba nga ha tshikalo, tshileme, milayo na maitele? Zwi vhonala u nga Yehova o shumisa maipfi a re na maanḓa u itela u vha humbudza heyi mbuno ya ndeme: Ndi Yehova fhedzi ane a tea u vhea milayo ya nḓila ine ra tea u mu gwadamela ngayo kha vhurabeli ho kunaho. Vho litshaho u tevhela yeneyo milayo vho vha vha tshi fanela u shona. Ḽeneḽo bono ḽo gudisa hani Vhayuda zwenezwo zwithu? Ri ḓo haseledza dziṅwe tsumbo kha ndima i tevhelaho. Zwi ḓo ri thusa uri ri vhone zwavhuḓi uri ḽeneḽi bono ḽo khetheaho ḽi amba mini kha riṋe ṋamusi.