1-3. (a) Kay ano nga bangin nakaliaw kan Ezekiel an bisyon mahitungod han daku gud nga templo? (Kitaa an retrato hini nga pahina.) (b) Ano an aton hihisgotan hini nga kapitulo?

 IMADYINA hi Ezekiel nga 50 anyos na. Bainte-singko ka tuig na hiya nga distyero. Maiha na nga ruba an templo ha Jerusalem. Kon naghandom hiya nga magin saserdote didto, maaram hiya nga diri na ito mahitatabo. Mga 56 ka tuig pa an malabay antes matapos an pagkadistyero, salit maaram hiya nga imposible na niya makita an pagbalik han katawohan ni Jehova ha ira tuna, labi na an pagtukod utro han templo. (Jer. 25:11) Nasubo ba hiya tungod hito?

² Buotan gud hi Jehova kay ginpili niya ini nga panahon basi tagan hi Ezekiel hin detalyado hinduro nga bisyon, nga sigurado nga magliliaw gud ngan maghahatag hin paglaom hinin matinumanon nga propeta! Hito nga bisyon, iginbalik hiya ha iya tuna ngan iginbutang hiya ha hitaas gud nga bukid. Didto gintapo hiya hin “lalaki nga sugad hin tumbaga pagkit-on.” Iginlibot hiya hito nga anghel ha usa nga daku hinduro nga templo. (Basaha an Ezekiel 40:1-4.) Baga hin tinuod gud ito! Para kan Ezekiel, ito nga eksperyensya sigurado nga makaparig-on han pagtoo, urusahon gud, ngan  bangin medyo nakakawurok. Bisan kon damu an pamilyar nga detalye hito nga templo, iba gud ito ha iya nakita ha Jerusalem.

³ Inin makapainteres nga bisyon mababasa ha ultimo nga siyam nga kapitulo han libro han Ezekiel. Hisgotan naton an angay naton magin disposisyon samtang gin-uusisa naton ngan ginsasabot ini nga bisyon. Sunod, hihisgotan naton kon an nakita ba ni Ezekiel amo an daku nga espirituwal nga templo nga ginhisgotan ni apostol Pablo paglabay han mga siglo. Katapos, uusisahon naton kon ano an kahulogan hini kan Ezekiel ngan ha iya mga igkasi-distyero.

4. Ano an aton pagsaysay hadto han bisyon mahitungod han templo, pero ano an ginkikinahanglan yana?

⁴ Hadto, an aton mga publikasyon nasiring nga an nakita ni Ezekiel amo an daku nga espirituwal nga templo ni Jehova, an ginhisgotan ni Pablo ha iya giniyahan nga surat ha mga Hebreo. * Basado hito nga pagsabot, baga hin lohikal nga tagan hin simboliko, o antitipiko, nga mga kahulogan an damu nga detalye han templo ha bisyon ni Ezekiel, gamit an pagsaysay ni Pablo han tabernakulo. Pero ha dugang nga pag-aram, pag-ampo, ngan pagpamalandong, nagin klaro nga kinahanglan an mas simple nga pagsaysay han bisyon ni Ezekiel mahitungod han templo.

5, 6. (a) Paonan-o iginpakita ni apostol Pablo an iya pagkamapainubsanon ha iya paghisgot han tabernakulo? (b) Ano an ginsiring ni Pablo mahitungod han pipira nga detalye han tabernakulo, ngan paonan-o naton masusubad an iya panhunahuna ha aton pagsabot ha bisyon ni Ezekiel mahitungod han templo?

⁵ Baga hin maaramon nga diri kita mamiling hin simboliko nga kahulogan ha tagsa nga detalye han templo ha bisyon ni Ezekiel. Kay ano? Tagda inin makapainteres nga ehemplo. Han ginhisgotan ni Pablo an tabernakulo ngan an espirituwal nga templo, nag-unabi hiya hin mga detalye han tabernakulo, sugad han bulawan nga insensaryo, taklob han arka, ngan bulawan nga tibod nga may sulod nga manna. Gintagan ba niya ito hin simboliko nga kahulogan? Klaro nga an baraan nga espiritu waray mag-aghat ha iya nga buhaton ito. Lugod, nagsurat hiya: “Diri yana an panahon nga ig-istorya hin detalyado ini nga mga butang.” (Heb. 9:4, 5) Andam hiya nga magpagiya ha baraan nga espiritu ngan mapainubsanon nga maghulat kan Jehova.​—Heb. 9:8.

⁶ Ito nga prinsipyo mahimo liwat iaplikar ha bisyon ni Ezekiel mahitungod han templo. Damu gihap an detalye hito. Ngan mas maopay nga maghulat kan Jehova nga klaruhon ito kon kinahanglan pa. (Basaha an Micas 7:7.) Kondi angay ba naton hunahunaon nga an espiritu ni Jehova waray maghatag hin dugang nga pagpatin-aw hini nga bisyon? Diri!

7, 8. (a) Ano nga pagsabot an ginbag-o na yana? (b) Ano an kaibahan han templo ha bisyon ngan han espirituwal nga templo nga iginhulagway ni Pablo?

⁷ Sugad han gin-unabi na, damu ka tuig nga an aton mga publikasyon nasiring nga an nakita ni Ezekiel amo an daku nga espirituwal nga templo ni Jehova, an ginhisgotan ni Pablo ha iya surat  ha mga Hebreo. Pero an dugang nga pag-aram nabulig ha aton nga masantop nga diri ito an nakita ni Ezekiel. Kay ano?

⁸ Siyahan, an templo nga nakita ni Ezekiel diri haom ha giniyahan nga pagsaysay ni Pablo. Tagda ini: Ginklaro ni apostol Pablo nga an tabernakulo ha panahon ni Moises lambong ngan surubdan han usa nga butang nga mas labaw pa. May-ada ito “Pinakabaraan” nga kwarto, pariho han mga templo ni Solomon ngan ni Zerubabel, nga gindisenyo tikang ha amo gihap nga surubdan. Ito nga kwarto gintawag ni Pablo nga “baraan nga lugar nga hinimo han mga kamot,” ngan iginsaysay niya nga “ginsubad [ito] ha reyalidad,” diri an reyalidad mismo. Ano an reyalidad? Hiya nagsiring: An “langit mismo.” (Heb. 9:3, 24) An langit ba an nakita ni Ezekiel? Diri. Waray gin-uunabi ha iya bisyon nga nagpapasabot nga langitnon nga mga butang an iya nakita.​—Ikompara an Daniel 7:9, 10, 13, 14.

9, 10. May kalabotan ha mga halad, ano an kaibahan han templo ha bisyon ni Ezekiel ngan han espirituwal nga templo nga iginhulagway ni Pablo?

⁹ An mas makakombinse pa nga kaibahan han bisyon ni Ezekiel ngan han paghulagway ni Pablo amo an parte ha mga halad. Nakabati hi Ezekiel hin detalyado nga mga instruksyon ha katawohan, mga lider, ngan mga saserdote mahitungod han paghalad. Maghahalad hira para ha ira kalugaringon nga mga sala. Maghahatag liwat hira hin mga halad nga ginsasarosaroan, nga puydi nira kaunon ha mga kwarto nga pangaonan han templo. (Ezek. 43:18, 19; 44:11, 15, 27; 45:15-20, 22-25) Ito ba nga pauroutro nga paghalad ginhihimo ha daku nga espirituwal nga templo?

¹⁰ Klaro ngan simple an baton. Hi Pablo nagsaysay: “Pag-abot han Kristo sugad nga hitaas nga saserdote han mag-opay nga mga butang nga natuman na, sinulod hiya ha mas importante ngan mas perpekto nga tolda nga diri hinimo han mga kamot, karuyag sidngon, diri bahin hini nga linarang. Sinulod hiya ha baraan nga lugar, nga an iya dara diri an dugo han mga kanding ngan han turilyo nga mga baka kondi an iya kalugaringon nga dugo, hin makausa gud la, ngan nakakuha hin waray kataposan nga katalwasan para ha aton.” (Heb. 9:11, 12) Salit ha daku nga espirituwal nga templo, usa gud la an iginhalad. Ito an halad-lukat nga iginhalad han Mas Harangdon nga Hitaas nga Saserdote mismo, hi Jesu-Kristo. Klaro nga an templo ha bisyon ni Ezekiel nga may damu nga halad nga kanding ngan baka diri amo an daku nga espirituwal nga templo.

11. Ha panahon ni Ezekiel, kay ano nga diri pa panahon nga isumat han Dios an mga kamatuoran mahitungod han daku nga espirituwal nga templo?

¹¹ Nagtutugway ini ha ikaduha nga rason kon kay ano nga diri an daku nga espirituwal nga templo an nakita ni Ezekiel: Diri pa adto panahon han Dios nga isumat an sugad nga mga kamatuoran. Hinumdumi nga an bisyon ni Ezekiel iginsurat siyahan para ha mga  Judio nga distyero ha Babilonya. Sakop hira han Mosaiko nga Balaud. Katapos han pagkadistyero, mabalik hira ha Jerusalem ngan susundon ito nga Balaud may kalabotan ha putli nga pagsingba pinaagi ha pagtukod utro han templo ngan han halaran hito. Ngan magpapadayon hira paghalad didto, nga inabot hin haros unom ka siglo. Hunahunaa an epekto ha mga Judio kon an nakita ha bisyon ni Ezekiel amo an espirituwal nga templo, diin iginhalad han hitaas nga saserdote an iya mismo kinabuhi ngan katapos, gin-undang an ngatanan nga iba pa nga halad! Masasabtan ba nira an sugad nga bisyon? Diri ba manluluya an ira determinasyon nga sundon an Mosaiko nga Balaud? Sugad han pirme ginbubuhat ni Jehova, iginsusumat la niya an mga kamatuoran ha husto nga panahon ngan kon andam na an iya katawohan.

12-14. Ano an koneksyon han templo nga nakita ni Ezekiel ngan han pagsaysay ni Pablo han espirituwal nga templo? (Kitaa an kahon nga “Magkaiba nga Templo, Magkaiba nga Leksyon.”)

¹² Kon sugad, ano an koneksyon han bisyon ni Ezekiel mahitungod han templo ngan han pagsaysay ni Pablo han espirituwal nga templo? Tigamni nga iginbasar ni Pablo an iya paghisgot, diri ha bisyon ni Ezekiel, kondi ha tabernakulo ha panahon ni Moises. Oo, nag-unabi hi Pablo hin mga detalye nga nakadto ha mga templo ni Solomon ngan ni Zerubabel ngan nakita liwat ha bisyon ni  Ezekiel. Pero ha kabug-osan, magkaiba an pokus han iginsurat ni Ezekiel ngan ni Pablo. * Diri ito magkapariho, kondi nasuporta ha usa kag usa. Ha ano nga paagi?

¹³ Ini an mahuhunahuna naton nga koneksyon hiton duha nga asoy: Kan Pablo, hibabaroan naton an kahikayan ni Jehova ha pagsingba, ngan kan Ezekiel, hibabaroan naton an mga suruklan ni Jehova ha pagsingba. Basi itutdo an kahikayan ni Jehova ha putli nga pagsingba, iginsumat ni Pablo an kahulogan han mga detalye han espirituwal nga templo sugad han hitaas nga saserdote, han mga halad, han halaran, ngan han Pinakabaraan. Kondi basi pabug-atan an higtaas nga suruklan ni Jehova ha putli nga pagsingba, an bisyon ni Ezekiel naghahatag hin detalyado nga hulagway nga nagpapasilsil ha aton hunahuna ngan kasingkasing han damu nga leksyon mahitungod han mga suruklan ni Jehova.

¹⁴ Ano an epekto ha aton hini nga bag-o nga pagsabot? Diri karuyag sidngon nga gutiay na la an kahulogan ha aton yana han bisyon ni Ezekiel. Basi masabtan an kapulsanan ha aton han bisyon, usisahon naton hin mas maopay an kapulsanan hini ha magtinumanon nga Judio ha panahon ni Ezekiel ngan katapos hito.

15. (a) Ano an kabug-osan nga mensahe han bisyon ni Ezekiel? (b) Ano an kaibahan nga mababasa ha Ezekiel kapitulo 8 ngan ha Ezekiel kapitulo 40 tubtob 48?

¹⁵ Basi hibaroan an baton han Biblia hini nga pakiana, tagdon naton an konektado nga mga pakiana nga mabulig ha aton nga magkaada bug-os nga pagsabot. Siyahan, ano an kabug-osan nga mensahe han bisyon? Ini: Ipapahiuli an putli nga pagsingba! Sigurado nga klaro ini kan Ezekiel. Naisurat na niya an mababasa yana ha kapitulo 8 han Ezekiel, diin klaro nga iginpakita ni Jehova an maraot gud nga kahimtang han templo ha Jerusalem. Ngan sigurado nga nalipay hiya nga detalyado nga isurat an daku nga kaibahan, nga mababasa yana ha kapitulo 40 tubtob 48. Didto mababasa naton, diri an nadaot nga putli nga pagsingba, kondi kon ano gud unta ito​—perpekto nga ehemplo han pagsingba kan Jehova uyon ha Mosaiko nga Balaud.

16. Paonan-o ginpamatud-an han bisyon ni Ezekiel mahitungod han templo an igintagna ni Isaias usa ka siglo antes pa?

¹⁶ Basi mapahiuli ha husto nga kahimtang an pagsingba kan Jehova, kinahanglan ito pahitas-on. Sobra usa ka siglo antes pa, hi propeta Isaias gin-giyahan nga magsurat: “Ha ultimo nga bahin han mga adlaw, an bukid han balay ni Jehova maiestablisar hin marig-on ha bawbaw han pungkay han kabukiran, ngan pahihitas-on ito ha bawbaw han mga bungtod.” (Isa. 2:2) Klaro nga igintagna ni Isaias nga an putli nga pagsingba kan Jehova ipapahiuli ngan pahihitas-on, nga sugad hin iginbutang ha pinakahitaas nga bukid. Ngan yana, nakain hi Ezekiel ha iya bisyon? Nakadto hiya “ha hitaas gud nga bukid” ngan nagkikita ha balay ni Jehova! (Ezek. 40:2) Salit an iya bisyon nagpapamatuod nga ipapahiuli an putli nga pagsingba.

17. Isumaryo an Ezekiel 40 tubtob 48.

¹⁷ Tagda an sumaryo han nakita ngan nabatian ni Ezekiel, nga aada ha Ezekiel 40 tubtob 48. Nagkita hiya samtang ginsusukol han anghel an mga ganghaan, pader, mga bungsaran, ngan santuaryo han templo. (Ezek. 40-42) Katapos, may eksayting nga nahitabo: An mahimayaon nga pag-abot ni Jehova ha templo! Iya ginsagdonan an iya sarawayon nga katawohan, an mga saserdote, ngan an mga lider. (Ezek. 43:1-12; 44:10-31; 45:9-12) Nakakita hi Ezekiel hin salog nga naagos tikang ha santuaryo, nga naghahatag hin kinabuhi ngan bendisyon samtang naawas ito ha Dagat nga Patay. (Ezek. 47:1-12) Ngan nakita niya nga an tuna mismo ginbahin-bahin ha eksakto nga sukol, ngan an putli nga pagsingba hirani ha sentro hito. (Ezek. 45:1-8; 47:13–48:35) Ano an kabug-osan nga mensahe hini? Klaro nga ginpapasarig ni Jehova an iya katawohan nga an putli nga pagsingba ipapahiuli ngan pahihitas-on. Bibendisyonan niya han iya presensya an iya balay para ha pagsingba ngan paaaguson tikang hito nga templo an mga bendisyon nga maghahatag hin pagtambal, kinabuhi, ngan kahapsay ha iginpahiuli nga tuna.

18. Angay ba sabton hin literal an bisyon? Isaysay.

 ¹⁸ Ikaduha, angay ba sabton hin literal an bisyon? Diri. Posible nga nasabtan dayon ni Ezekiel ngan han mga igkasi-distyero nga iya ginsumatan han bisyon nga diri ito literal. Kay ano? Hinumdumi nga nakita niya ini nga templo ha “hitaas gud nga bukid.” Haom ito ha tagna ni Isaias, pero diri ito haom ha aktuwal nga lokasyon han templo. An templo ni Solomon gintukod ha Bukid Moria ha Jerusalem, ngan didto liwat ito tutukuron utro. Kondi ito ba “hitaas gud nga bukid”? Diri. Ngani, an Bukid Moria napapalibotan han iba pa nga bukid nga pariho hito kahitaas o mas hitaas pa. Dugang pa, an templo nga nakita ni Ezekiel daku gud. Ngan haluag an ginpader nga mga tubtoban hito, salit diri ito maigo ha bawbaw han Bukid Moria. Diri ngani ito maigo ha tubtoban han syudad han Jerusalem ha panahon ni Solomon! Labot pa, sigurado nga an mga distyero waray maghunahuna nga may literal nga salog nga maagos tikang ha santuaryo han templo ngadto ha Dagat nga Patay ngan magtatambal hiton waray kinabuhi nga katubigan. Dugang pa, bukiron an Tuna nga Iginsaad salit imposible magkaada tadong nga mga giutan butnga han mga tribo, sugad han iginhulagway ha bisyon. Salit an bisyon diri angay sabton hin literal.

19-21. Ano an katuyoan ni Jehova nga magin epekto ha katawohan han bisyon ni Ezekiel, ngan kay ano nga bangin ito an ira abaton?

¹⁹ Ikatulo, ano an angay magin epekto han bisyon ha katawohan ni Ezekiel? Angay unta hira maawod kon ginpapamalandong  nira an higtaas nga suruklan ni Jehova ha putli nga pagsingba. Ginsugo ni Jehova hi Ezekiel nga “ihulagway an templo ha panimalay ni Israel.” Kinahanglan detalyado gud an paghulagway ni Ezekiel hini nga templo salit sugad hin ‘maaadman [nira] an plano hini.’ Kay ano nga angay nira pamalandungon ini nga templo? Sugad han aton hinbaroan, diri basi tukuron ini. Lugod, sugad han siring ni Jehova, “basi maawod hira han ira mga sayop.”​—Basaha an Ezekiel 43:10-12.

²⁰ Kay ano nga bangin makonsensya ngan maawod an sinsero nga mga tawo tungod hini nga bisyon? Tigamni nga ginsugo hi Ezekiel: “Anak han tawo, paghatag hin atensyon, pagkita, ngan pamati hin maopay ha ngatanan nga isusumat ko ha imo mahitungod han mga surundon ngan han mga balaud mahitungod han templo ni Jehova.” (Ezek. 44:5) Pauroutro hiya nga nakabati mahitungod han mga surundon ngan balaud. (Ezek. 43:11, 12; 44:24; 46:14) Agsob liwat ipahinumdom ha iya an mga suruklan ni Jehova​—bisan an suruklan para ha kahilaba han usa ka siko ngan ha eksakto nga timbang. (Ezek. 40:5; 45:10-12; ikompara an Proberbios 16:11.) Ngani, hini la nga bisyon, sobra 50 ka beses nga iginrekord ni Ezekiel an orihinal nga mga pulong para ha “pagsukol” ngan “sukol”!

²¹ Mga sukol, timbang, balaud, surundon​—ano an mensahe ni Jehova ha iya katawohan? Baga hin iginpapahinumdom niya ha mapwersa nga mga pulong inin importante nga kamatuoran: Hi Jehova gud la an naghihimo han mga suruklan ha putli nga pagsingba. Kinahanglan maawod adton binulag hito nga mga suruklan! Kondi paonan-o igintutdo han bisyon ini nga mga leksyon ha mga Judio? Ha sunod nga kapitulo, hihisgotan naton an pipira nga espisipiko nga ehemplo. Mabulig ito ha aton nga mas masabtan kon ano an kahulogan para ha aton hinin makatirigamnan nga bisyon.