1, 2. (a) Aha do naung taparsiajari sian parnidaan ni si Hesekiel taringot bagas joro i? (b) Aha do dua sukkun-sukkun na lao tabahas di pasal on?

NUNGNGA taparsiajari, molo bagas joro na diida si Hesekiel i dang bagas joro na mulia na dibahas si Paulus marratus taon dukkon i. Nungnga taparsiajari muse, molo parnidaan on dibahen lao mangajari naposo ni Debata. Sian i boi ma diboto nasida na massai penting mangihutton standar ni Jahowa taringot ibadat na sittong. Ai molo dung diihutton nasida do i baru boi nasida marale-ale dohot Debata. Alani i ma didok Jahowa, “On ma patik taringot tu bagas joro i.” Jala diulangi Ibana do muse hatana i, didok do, “I do patik taringot tu bagas joro i.”​—Jaha Hesekiel 43:12.

² Tabahas ma dua sukkun-sukkun on. Na parjolo: Sian parnidaan taringot bagas joro i, aha do parsiajaran na boi dapot ni akka halak na ditawan di tikki ni si Hesekiel taringot standar ni Jahowa tu ibadat na sittong? Alus ni sukkun-sukkun on mangurupi hita mamboto alus ni sukkun-sukkun na paduahon, i ma: Aha do parsiajaran na boi tadapot sian parnidaan i, na boi mangurupi hita mangolu di ari parpudi na susa on?

3. Songon dia do bagas joro na dibahen di dolok na timbo i mambahen maila akka halak?

³ Lao mamboto alus ni sukkun-sukkun na parjolo, taida ma piga-piga hatorangan sian bagas joro na diida si Hesekiel. Didok do disi dolok na timbo. Mungkin gabe diingot halak Israel do surirang ni si Jesaya taringot padenggatton saluhutna. (Jes. 2:2) Aha do parsiajaran na boi dapot ni nasida sian bagas joro ni Jahowa na dibahen di dolok na timbo i? Nasida marsiajar, ibadat na sittong i untimbo do sian sude, jala ikkon uppetting do i dibahen di ngolu ni nasida. Sasittongna, untimbo do ibadat na sittong i sian sude. Ai na mambahen pengaturan tu ibadat i Jahowa do, Debata na “untimbo sian sude debata na so sittong”. (Ps. 97:9) Alai ulaon ni halak Israel dang sesuai tu pengaturan ni Jahowa. Saleleng marratus taon leas do roha ni nasida tu pengaturan i. Ditinggalhon jala dibahen nasida do ibadat i gabe dang badia. Jadi tikki diida akka halak dibahen bagas joro i di dolok na timbo jala dipasangap dos songon naung ditottuhon hian, pasti gabe maila do akka halak na tulus rohana mangingot hasalaan ni nasida.

4, 5. Sian akka gerbang na timbo na di bagas joro i, aha do parsiajaran na boi dapot ni halak na manangihon si Hesekiel?

⁴ Akka gerbang na timbo. Di parnidaan i, diida si Hesekiel ma diukkur suru-suruan i gerbang ni bagas joro. Timbona hira-hira 30 meter! (Hes. 40:14) Adong do di dalan masuk tu bagas joro i akka ruangan ni panjaga. Aha do parsiajaran na boi dapot ni naposo ni Debata tikki dibayakkon rancangan ni bagas joro i? Didok Jahowa do tu si Hesekiel, “Manat ma parrohahon dalan lao masuk na tu bagas joro i.” Boasa? Ai diboan naposo ni Debata do halak “na so marsunat jala na jahat rohana” tu bagas joro na badia i. Alani i ma didok Jahowa songon on, “Dibahen nasida ma ramun bagas jorokki.”​—Hes. 44:5, 7.

⁵ Dang olo halak “na so marsunat” i mangoloi paretta ni Debata. Hape takkas do isi ni paretta i jala nungnga dilehon i mulai sian tikki ni si Abraham. (1 Mus. 17:9, 10; 3 Mus. 12:1-3) Uppara dope na diulahon akka halak “na jahat rohana” na masuk tu bagas joro i. Jogal do roha ni nasida, dialo do paretta dohot tudu-tudu ni Jahowa. Dang pantas nasida masuk tu bagas joro na badia i. Massai sogo do roha ni Jahowa mangida halak na munafik. Alai dipasombu naposona do masuk halak sisongon i tu bagas joro. Jadi gerbang dohot akka ruangan ni panjaga i patuduhon, dang pasombuon ni Jahowa be masuk halak sisongon i tu bagas jorona. Manang ise na naeng masuk tu jabu ni Debata, ikkon diihutton do standar ni Jahowa na timbo. Ikkon jolo diulahon do i baru pe dipasu-pasu Debata ibadat ni nasida.

6, 7. (a) Songon dia do Jahowa mamakke tembok dohot inganan na bidang di bagas joro i mangajari naposona? (b) Aha do na dibahen naposo ni Debata tu bagas joro najolo? (Ida surat na di toru.)

⁶ Tembok na di sakaliling ni bagas joro. Luar biasa do tembok on. Sian na diida si Hesekiel, ganjang ni setiap sisi ni tembok, i ma 500 tukkot manang 1.555 meter, hampir 1,6 kilometer! (Hes. 42: 15-20) Alai bangunan ni bagas joro i dohot alamanna, bentukna persegi do jala ganjang ni setiap sisi, holan 500 asta manang 259 meter! Jadi adong do sada inganan na bidang di sakaliling ni bagas joro i jala sude inganan i dikalilingi tembok. * Aha do tujuanna?

⁷ Jahowa mandok, “Saonari ikkon dipadao nasida do akka patung na disomba nasida songon raja i. Jala ikkon dipaso nasida do akka ulaon na patuduhon nasida dang setia tu Au. Dung i maringanan ma Au di tonga-tonga ni nasida saleleng ni lelengna.” (Hes. 43:9) Jadi dibahen Jahowa do inganan na bidang di sakaliling ni bagas joro i lao paingotton naposona. Hira songon on ma didok Ibana, “Padao hamu ma sude na mambahen bagas jorokkon dang badia. Unang bahen i jonok tuson.” Molo toktong dibahen naposona i badia ibadat ni nasida, maringanan ma Jahowa di tonga-tonga ni nasida lao mangalehon pasu-pasu.

8, 9. Aha do na boi diparsiajari naposo ni Jahowa sian sipasingot na dilehon Ibana tu akka bawa na martanggung jawab i?

⁸ Sipasingot na tegas tu bawa na martanggung jawab di tonga-tonga ni naposo ni Debata. Alani holong ni Jahowa do umbahen na dipasingot nasida. Dipasingot do halak Lepi ala dohot nasida mandao sian Debata tikki disomba akka naposona patung. Alai dipuji Debata do pinoppar ni si Sadok, na toktong ‘martanggung jawab di ingananna na badia i’. Adil jala asi do roha ni Jahowa tu halak Lepi. Diuhumi do nasida sesuai tu pangalahona. (Hes. 44:10, 12-16) Asing ni halak Lepi, akka pamimpin ni Israel pe tegas do dipasingot.​—Hes. 45:9.

⁹ Jahowa patuduhon ikkon martanggung jawab do akka bawa na mamimpin jala na mangawasi i tu cara ni nasida mangulahon tugasna. Toktong do nasida porlu dipasingot, dikoreksi, jala didisiplin. Ikkon gabe sitiruon do nasida tikki mangihutton standar ni Jahowa na sittong!

10, 11. Aha do patuduhon na godang sian halak Jahudi naung mulak i mangulahon parsiajaran na sian parnidaan ni si Hesekiel i?

¹⁰ Diulahon akka halak na mulak sian tawanan i do parsiajaran na dapot ni nasida sian parnidaan i? Dang takkas memang taboto songon dia reaksi ni halak na setia tu parnidaan i. Alai dipaboa do di Bibel aha na diulahon nasida jala songon dia pandangan ni nasida taringot ibadat na sittong. Diihutton nasida do prinsip na di parnidaan ni si Hesekiel i? Molo dibandingkon tu pangalaho ni ompu ni nasida, nungnga diulahon be prinsip i. Ai akka ompu ni nasida torus do mangalo sebelum diboan tu Babel.

¹¹ Dung mulak sian Babel, marsitutu do akka bawa na setia songon Panurirang Haggai dohot Sakaria, Malim Esra panalin i, dohot Gubernur Nehemia mangajarhon prinsip na di parnidaan ni si Hesekiel i. (Esra 5:1, 2) Diajarhon nasida do tu naposo ni Debata molo ibadat na sittong ikkon dibahen untimbo sian sude.  Dang boi leas roha ni nasida tu ibadat i holan ala naeng mangalului hamoraon manang lomo ni roha ni nasida sandiri. (Hag. 1:3, 4) Takkas do muse diajarhon, na ikkon diihutton bangso i standar ni Debata. Umpamana, tegas do si Esra dohot si Nehemia paingotton nasida asa diusir akka istri ni nasida na sian bangso na asing, na mambahen nasida mandao sian Debata. (Jaha Esra 10:10, 11; Neh. 13:23-27, 30) Asing ni i dung dipalua sian Babel, dang manomba debata na so sittong be halak Israel, nang pe najolo mulak-hulak nasida tarjorat lao mangulahon dosa i. Aha do na masa tu akka malim dohot tu akka pamimpin i? Songon na dipaboa di parnidaan ni si Hesekiel, mandapot sipasingot do nasida sian Jahowa. (Neh. 13:22, 28) Godang do sian nasida na marserep ni roha jala mangoloi sipasingot i.​—Esra 10:7-9, 12-14; Neh. 9:1-3, 38.

12. Aha do pasu-pasu na dilehon Jahowa tu halak Jahudi naung mulak i?

¹² Ujungna dipasu-pasu Jahowa ma naposona. Boi ma nasida muse marale-ale dohot Jahowa, sehat jala makkilala hadameon naung leleng mago sian nasida. (Esra 6:19-22; Neh. 8:9-12; 12:27-30, 43) Boasa boi songon i? Alana, nungnga diihutton nasida be standar ni Jahowa taringot ibadat na sittong. Jala parsiajaran sian parnidaan ni si Hesekiel taringot bagas joro, hona do tu roha ni halak na tulus rohana. On ma dua parsiajaran na dapot ni nasida  sian parnidaan i: (1) Nasida marsiajar taringot standar ni Jahowa tu ibadat na sittong jala carana mangihutton i. (2) Parnidaan i paposson roha ni nasida na lao dipadenggan do ibadat na sittong, jala molo torus diulahon ibadat na sittong, dipasu-pasu Jahowa ma nasida. Alai aha do parsiajaranna tu tikkinta saonari?

13, 14. (a) Sian dia do boi taboto na adong hubungan ni parnidaan ni si Hesekiel taringot bagas joro i tu tikkinta saonari? (b) Aha do dua parsiajaran na boi tadapot sian parnidaan i? (Ida kotak 13A, “Dua Bagas Joro na Marasing-asing Artina”.)

¹³ Porsea do hamu adong kaitan ni parnidaan ni si Hesekiel i tu hita saonari? Porsea. Taingot ma, bagas joro na diida si Hesekiel dibahen di “dolok na massai timbo”. Di surirang ni si Jesaya didok, “Dibahen ma hot dolok inganan ni jabu ni Jahowa. Jala dibahen ma i untimbo sian pussu ni akka dolok.” Dipaboa si Jesaya do muse andigan saut surirang on, i ma “di ari parpudi”. (Hes. 40:2; Jes. 2:2-4; ida muse Mika 4:1-4.) Memang tutu do saut akka surirang i di ari parpudi. Saut ma i mulai taon 1919 tikki dibahen Debata ibadat na sittong i untimbo sian sude jala dipadenggan, hira na dibahen ma i di atas ni dolok na massai timbo. *

¹⁴ Sian i boi ma takkas taida, parnidaan ni si Hesekiel i adong do hubunganna tu ibadat na sittong di tikkinta saonari. Dos songon halak Jahudi na ditawan najolo, adong dua parsiajaran na boi tadapot sian parnidaan on: (1) Hita boi marsiajar carana mangihutton standar ni Jahowa taringot ibadat na sittong. (2) Parnidaan on paposson rohatta na lao dipadenggan do ibadat na sittong jala na lao dipasu-pasu Jahowa do hita.

15. Aha do na porlu taingot tikki taparsiajari bagas joro na diida si Hesekiel i?

¹⁵ Saonari tabahas ma piga-piga na di parnidaan i. Bayakkon ma hita mangihutton si Hesekiel mardalani di bagas joro na massai uli i. Taingot ma, bagas joro na diida i dang bagas joro na mulia na manggombarhon pengaturan taringot ibadat na sittong. Tujuanta mardalani, i ma mangalului akka parsiajaran na boi taihutton tikki manomba Debata. Aha ma parsiajaran na boi taida?

16. Aha do parsiajaran na boi tadapot sian ukkuran ni bagas joro na di parnidaan ni si Hesekiel? (Ida gambar di mula ni parsiajaran.)

¹⁶ Boasa diukkur sude? Diida si Hesekiel do diukkur suru-suruan na marhillong songon tombaga i sude na adong di bagas joro, termasuk ma tembok, akka gerbang, ruangan ni panjaga, alaman, dohot langgatan. Olo do ra bingung hita mamikkiri akka ukkuran i. (Hes. 40:1–​42:20; 43:13, 14) Alai tapikkiri ma parsiajaranna. Marhite akka ukkuran i, Jahowa patuduhon massai penting do taihutton standarna. Ibana do na manottuhon standar i, dang jolma. Alani i, dang tutu hata ni halak na mandok dang diparsoalhon Jahowa cara ni jolma manomba Ibana. Jala bagas joro na diukkur di parnidaan i paposson roha, molo Jahowa pasti padenggatton ibadat na sittong. Dos songon akka ukkuran naung ditottuhon i, nungnga ditottuhon Debata lao pasautonna janjina.  Jadi parnidaan ni si Hesekiel ma na paposson rohatta molo ibadat na sittong pasti dipadenggan di ari parpudi on!

17. Aha do sipasingot na boi tadapot sian tembok na di sakaliling ni bagas joro i?

¹⁷ Tembok na di sakaliling ni bagas joro. Songon naung tabahas, tembok di sakaliling ni bagas joro i gabe sipasingot tu naposona na so boi nasida mambahen ramun jabu ni Debata. Ikkon dibahen nasida do dao sude ulaon na ramun sian ibadat na sittong. (Jaha Hesekiel 43:7-9.) Dung ditawan Babel na Balga naposo ni Debata saleleng marratus taon, malua ma nasida. Dung i taon 1919, dilantik Kristus ma naposo haposan. Mulai sian i, marsitutu do naposo ni Debata mamastihon asa unang adong ajaran na diihutton nasida sian agama palsu, dohot ma i kebiasaan na adong hubunganna tu ulaon manomba debata na so sittong manang akka dewa. Hita pe porlu do tapastihon na dao tabahen akka ulaon na ramun sian ibadat na sittong. Dang boi hita marbisnis di Bale Harajaon. Ai ikkon torus do dao tabahen ulaon ni portibi on sian ibadat na sittong.​—Mrk. 11:15, 16.

18, 19. (a) Aha do parsiajaran na boi tadapot sian akka gerbang na timbo na di bagas joro i? (b) Songon dia do tabahen molo adong halak na mandok dang cocok be standar ni Jahowa? Paboa ma sada contoh.

¹⁸ Akka gerbang na timbo. Sian akka gerbang na timbo na di parnidaan i, halak Jahudi na ditawan i dipasingot na massai timbo do standar moral na ditottuhon Jahowa tu naposona. Alai aha do parsiajaranna tu tikkinta on? Saonari, hita dang porlu be tu bagas joro lao manomba Jahowa. Alai ikkon taihutton do aturan naung dibahen di ibadat na sittong. Alani i, massai penting do saonari ikkon badia pangalahotta jala dang munafik. (Rom 12:9; 1 Ptr. 1:14, 15) Saleleng ari parpudi, martahap do Jahowa mangurupi naposona asa boi mangihutton standar moral na ditottuhon i. * Umpamana, dipakaluar do sian huria akka halak na mangulahon dosa dohot na so olo muba. (1 Kor. 5:11-13) Asing ni i, adong do sipasingot na tadapot sian ruangan ni panjaga na adong di gerbang ni bagas joro i. On paingotton hita, dang boi sasahalak ro manomba Ibana molo dang lomo roha ni Debata mangida pangalahona. Umpamana adong ma halak na munafik ro tu Bale Harajaon manomba Debata. Nang pe ro ibana manomba Debata, alai molo dang diulahon ibana pangidoan ni Jahowa, dang lomo roha ni Debata mangida ibana. (Jak. 4:8) Jadi torus do dijaga Jahowa ibadat na sittong i asa toktong badia nang pe pangalaho ni jolma saonari on lam jahat!

¹⁹ Nungnga dipaboa di Bibel, andorang so hancur portibi on, lam tu jahatna ma akka jolma. Didok do, “Lam tu jahatna ma akka parjahat dohot panipu, mangaliluhon do nasida jala laos dililuhon.” (2 Tim. 3:13) Lam godang do halak saonari on na dililuhon. Didok roha ni nasida, standar ni Jahowa i kaku, ketinggalan jaman, manang dang sittong be. Boi do hamu dohot dililuhon? Umpamana, molo adong sasahalak na paposson rohamuna lao  mandok standar ni Debata taringot homoseks i dang sittong, setuju do hamu? Manang setuju do hamu tu pandangan ni Debata na mandok ulaon i “ulaon na ramun”? Dipaingot Debata do hita asa unang taulahon seks na so patut jala dang setuju tu ulaon i. (Rom 1:24-27, 32) Tikki masa tantangan sisongon i, tabayakkon ma bagas joro na di parnidaan ni si Hesekiel dohot akka gerbangna na massai timbo. Taingot ma, dang na lao hea dipaturun Jahowa standarna, dang soal songon dia pandangan ni portibi na jahat on. Setuju do hita tu standar na dibahen Bapakta na di surgo i jala olo do hita mambela na sittong?

20. Aha do parsiajaran na boi patoguhon roha ni “punguan bolon” sian alaman na adong di bagas joro i?

²⁰ Alaman na di bagas joro. Tikki diida si Hesekiel na massai bidang alaman luar ni bagas joro i, pasti las do rohana. Alana dibayakkon ibana ma godang halak marpungu disi manomba Jahowa. Saonari, dao do umbalga inganan ni halak Kristen lao manomba Debata. Songon “punguan bolon” do godang ni na manomba Jahowa di alaman luar ni inganan na badia i. Pasti dipatogu do roha ni nasida alani parnidaan ni si Hesekiel. (Pgk. 7:9, 10, 14, 15) Diida si Hesekiel do akka ruang makan di alaman luar i. Boi do diallang akka halak disi pelean pardamean na diboan nasida. (Hes. 40:17) Seolah-olah nasida boi rap mangan dohot Jahowa. On patuduhon, nungnga mardame jala marale-ale muse nasida dohot Debata. Saonari dang talehon be pelean, songon halak Jahudi na  mangihutton Patik ni si Musa. Alai talehon do ‘pujian tu Debata songon pelean’ tu Ibana. Tapatudu do i sian komentar di parpunguan, manang tikki marbarita. Godang do muse sipanganon na diparade Jahowa na mambahen togu parale-aleotta tu Ibana. Sarupa ma pakkilalaanta tu pinoppar ni si Kora na marende tu Jahowa. Didok nasida do, “Dumenggan do sadari di alaman ni jabum sian apala saribu ari di inganan na asing!”​—Ps. 84:10.

21. Aha do na boi diparsiajari akka na dimiahi sian akka malim na di parnidaan i?

²¹ Akka malim. Di parnidaan i, tikki masuk akka malim dohot halak Lepi tu alaman na di bagasan, ikkon dilewati nasida do gerbang na sarupa tu gerbang di alaman luar na dilewati akka halak sian marga na asing. Gabe sipasingot ma on tu akka malim, ikkon dohot do nasida mangihutton standar ni Jahowa taringot ibadat na sittong. Aha ma parsiajaranna tu hita? Saonari on, dang adong be pengaturan na ikkon sian pinoppar ni si Lepi gabe malim di tonga-tonga naposo ni Debata. Alai didok do tu akka halak na dimiahi, “Hamu do ‘bangso na tarpillit, akka malim na laos gabe raja’.” (1 Ptr. 2:9) Di tikki ni halak Israel, dang sarupa alaman na dipakke akka malim lao marhobas dohot alaman na dipakke halak na asing. Alai anggo halak na dimiahi, sarupa do inganan ni nasida marhobas rap dohot halak na asing na manomba Jahowa. Alai, istimewa do hubungan ni akka halak na dimiahi on dohot Jahowa. Ai nungnga diangkat nasida gabe akka anak ni Debata. (Gal. 4:4-6) Nang pe songon i, adong do sipasingot dapot ni nasida sian parnidaan i. Umpamana, dos songon akka malim najolo, porlu do nasida mandapot sipasingot dohot disiplin. Dang soal ise pe hita, porlu do taingot, sude halak Kristen i “sada punguan” do jala “sada parmahan”.​—Jaha Johannes 10:16.

22, 23. (a) Aha do parsiajaran na boi dapot ni akka sintua sian pamimpin na di parnidaan i? (b) Aha do mungkin na saut di ari na naeng ro?

²² Pamimpin ni naposo ni Debata. Halak na sangap do pamimpin na di parnidaan ni si Hesekiel i. Ala dang pinoppar ni malim ibana, ikkon diihutton do tudu-tudu sian akka malim di bagas joro. Alai, ibana do na gabe pengawas di tonga-tonga ni naposo ni Debata jala ibana do na mangurupi nasida lao paradehon pelean. (Hes. 44:2, 3; 45:16, 17; 46:2) Gabe sitiruon ma ibana tu akka bawa na dilehon tanggung jawab di huria saonari on. Ikkon tunduk do sude sintua, termasuk ma i pengawas wilayah tu naposo haposan. (Heb. 13:17) Marsitutu do akka sintua mangurupi akka dongan asa denggan mangalehon pujian tu Debata di parpunguan dohot di ulaon marbarita. (Eps. 4:11, 12) Najolo, dipasingot Jahowa do pamimpin ni halak Israel ala dang denggan mangulahon tugasna. (Hes. 45:9) Sian i, diboto akka sintua do na porlu nasida dipasingot jala dikoreksi. Las do roha ni nasida manjalo i jala dibahen do i gabe kesempatan ni Jahowa mangurupi nasida. Ai marhite i do nasida boi gabe parmahan jala pengawas na dumenggan.​—Jaha 1 Petrus 5:1-3.

 ²³ Di Paradeiso, torus do paradeon ni Jahowa pengawas na malo jala na olo patuduhon holong mangurus naposona. Sasittongna, godang do sian nasida saonari on dilatik asa boi gabe parmahan na denggan di Paradeiso. (Ps. 45:16) Nasida ma sada sian pasu-pasu na lao tajalo di tano na imbaru. Pasti dipatogu do rohatta mamboto i. Dos songon surirang taringot ulaon padenggatton saluhutna, lam takkas ma taattusi parnidaan ni si Hesekiel on di tikki naung ditottuhon Jahowa. Mungkin adong dope bagian na asing na boi taparsiajari sian parnidaan on manang bagian na lao saut di ari na naeng ro. Alai dang boi dope tabayakkon i saonari. Tapaima ma tikkina.

24, 25. Songon dia do parnidaan ni si Hesekiel i paboahon na lao dipasu-pasu akka naposo ni Debata na mangulahon ibadat na sittong?

²⁴ Kesimpulanna, taingot ma peristiwa na luar biasa di parnidaan ni si Hesekiel i. Marsinondang do hamuliaon ni Jahowa di bagas joro, tanda na ro Ibana tusi. Marjanji do Debata na lao toktong Ibana di bagas jorona i molo torus setia naposona mangihutton standar naung ditottuhon. (Hes. 43:4-9) Aha do pengaruh ni haroro ni Jahowa i tu halak Jahudi dohot tu luat ni nasida?

²⁵ Di parnidaan i, adong do dua gambaran na paboahon lao dipasu-pasu Debata akka naposona. (1) Adong do sunge na mardalan sian bagas joro i. Aekna parohon hangoluan jala mambahen subur tano na di luat i. (2) Dibagi do luat i gabe piga-piga bagian, ukkuranna nungnga ditottuhon, jala di tonga-tonga adong bagas joro. Aha do lapatanna tu hita? Takkas do taboto, nungnga dipabadia Jahowa bagas jorona na mulia i, i ma pengaturan taringot ibadat na sittong. Dibahen Ibana do i umbadia sian ibadat ni halak Israel najolo, jala las do rohana tu pengaturan i. (Mal. 3:1-4) Tabahas ma gambaran na dua on di Pasal 19 sahat tu 21 di bukku on.