1, 2. (a) Ano an nanudan ta sa bisyon ni Ezekiel manungod sa templo sa sinundan na kapitulo? (b) Anong duwang hapot an pag-uulayan ta sa kapitulong ini?

 NANUDAN ta sa nainot na kapitulo na an nahiling ni Ezekiel sa bisyon bako an dakulang espirituwal na templo na tinukar ni Pablo pakalihis nin pirang siglo. Naaraman ta man na itinao an bisyon para itukdo sa banwaan nin Diyos an kahalagahan kan mga pamantayan nin Diyos para sa dalisay na pagsamba. Uuyunan sana giraray sinda ni Jehova kun susunudon ninda an mga pamantayan na iyan. Posibleng iyan an rason kun taano ta duwang beses na inutro ni Jehova an mahalagang mga tataramon na ini sa saro sanang bersikulo: “Ini an katugunan kan templo.”—Basahon an Ezekiel 43:12.

² Pag-ulayan ta ngunyan an duwa pang hapot. Inot: Anong espesipikong mga leksiyon manungod sa mga pamantayan ni Jehova para sa dalisay na pagsamba an posibleng nanudan kan mga Judio kan panahon ni Ezekiel sa bisyon na ini manungod sa templo? An simbag sa hapot na iyan matabang sa sato na masimbag an ikaduwang hapot: Ano an kahulugan kan bisyon para sa sato sa huring mga aldaw na ini?

3. Taano ta posibleng nasupog an banwaan kan mahiling nindang nasa halangkaw na bukid an templo sa bisyon?

³ Tanganing masimbag an inot na hapot, magpokus kita sa pirang pambihirang mga detalye kan bisyon na ini manungod sa templo. An  halangkaw na bukid. Posibleng marhay na ikinonektar kan banwaan an detalyeng ini kan bisyon ni Ezekiel sa nakakaugmang propesiya ni Isaias manungod sa pagbabalik. (Isa. 2:2) Pero ano an nanudan ninda manungod sa harong ni Jehova na nasa ibabaw kan halangkawon na bukid? Nanudan ninda na an dalisay na pagsamba dapat na ilangkaw asin iitaas nin mas halangkaw pa kisa sa gabos na iba pang bagay. Siyempre, talagang halangkawon an dalisay na pagsamba, huling an areglong ini gikan sa Saro na ‘mas urog na nakakalabaw kisa sa gabos na iba pang diyos.’ (Sal. 97:9) Pero dai iyan sinuportaran kan banwaan. Sa laog nin dakul na siglo, pauruutro nindang tinugutan na mawaran nin halaga, mapabayaan, asin maramugan an dalisay na pagsamba. Siguradong nakamati nin supog an mga tawong tama an kamugtakan nin puso kan mahiling ninda an sagradong harong nin Diyos na ilinangkaw asin iinitaas sa maninigo nanggad na kamugtakan kaini—sarong mamuraway asin prominenteng posisyon.

4, 5. Anong leksiyon an posibleng nanudan kan banwaan manungod sa halangkawon na mga trangkahan kan templo?

⁴ An halangkawon na mga trangkahan. Sa kapinunan kan bisyon, nahiling ni Ezekiel na sinusukol kan anghel an mga trangkahan. Mga 30 metros an langkaw kan mga iyan! (Ezek. 40:14) Igwa nin mga kurukuwarto kan guwardiya sa laog kan mga laugan na iyan. Ano an posibleng ipinaparisa kan gabos na ini sa siisay man na nag-adal kan plano? Sinabi ni Jehova ki Ezekiel: “Mangnuhon mong marhay an laugan kan templo.” Taano? Huling nagdadara an banwaan nin mga tawong “bakong turi an puso saka laman” sa mismong sagradong harong nin Diyos para sa pagsamba. An resulta? “Linalapastangan ninda an templo ko,” an sabi ni Jehova.—Ezek. 44:5, 7.

⁵ An mga “bakong turi an . . . laman” dai nagsunod sa malinaw na pagbuot kan Diyos na nagpuon pa kan panahon ni Abraham. (Gen. 17:9, 10; Lev. 12:1-3) Pero mas grabe an mga “bakong turi an puso.” Mga sutil sinda saka rebelyoso; habo nindang magsunod sa instruksiyon asin paggiya ni Jehova. Dai dapat tinugutan na makalaog an mga tawong ini sa sagradong harong ni Jehova para sa pagsamba! Anggot si Jehova sa pagsagin-sagin, pero tinugutan kan saiyang banwaan na maglakop iyan sa saiyang harong. Malinaw an leksiyon na itinutukdo kan mga trangkahan saka mga kurukuwarto kan guwardiya: Dai na puwedeng magpadagos an arog kaining karatan! Dapat na sunudon an halangkaw na mga pamantayan ni Jehova para makalaog sa saiyang harong. Saka sana bebendisyunan ni Jehova an pagsamba kan banwaan.

6, 7. (a) Anong mensahe an gustong ipaabot ni Jehova sa saiyang banwaan paagi sa pader na nakapalibot sa bilog na templo? (b) Paano trinato kaidto kan banwaan ni Jehova an saiyang harong? (Hilingon an nota sa ibaba.)

⁶ An nakapalibot na pader. An saro pang pambihirang detalye kan bisyon na ini iyo an pader na nakapalibot sa bilog na templo. Sinabi ni Ezekiel na an pader sa kada gilid igwa nin laba na 500 na tambo, o 1,555 metros, na haros 1.6 kilometros! (Ezek. 42:15-20) Pero an mga edipisyo kan templo saka an mga patyo, na an porma kuwadrado, 500 na maniko sana, o 259 metros, an kada gilid. Kaya igwa nin mahiwas na espasyo sa palibot kan bilog na templo, asin an mahiwas na espasyong iyan napapalibutan nin pader. * Para sain iyan?

 ⁷ Sinabi ni Jehova: “Irayo ninda ngunyan sa sako an mga bagay na ginigibo ninda na dahilan kan pagigin bakong maimbod ninda, asin irayo man ninda sa sako an mga bangkay kan saindang mga hadi, asin mairok ako sa kaibanan ninda sagkod lamang.” (Ezek. 43:9) “An mga bangkay kan saindang mga hadi” posibleng marhay na nanunungod sa idolatriya. Kaya kan iladawan ni Jehova an templo na igwa nin mahiwas na espasyo sa palibot, garo man sana sinasabi niya: “Irayo nindo sako an gabos na kaatian na iyan. Dai lamang nindo iyan irani sako.” Kun papagdanayon ninda na dalisay an saindang pagsamba, bebendisyunan sinda ni Jehova paagi kan saiyang presensiya.

8, 9. Ano an posibleng nanudan kan banwaan sa magabat na sadol ni Jehova sa mga lalaking may paninimbagan?

⁸ Magabat na sadol sa mga lalaking may paninimbagan. Nagtao man si Jehova nin magabat alagad mamumuton na sadol sa mga lalaking igwa nin dakulang paninimbagan sa saiyang banwaan. Itinanos niya an mga Levita na suminuway sa saiya kan magsagibo nin idolatriya an banwaan, pero kinomendaran niya an mga aki ni Zadok “na nag-asikaso kan mga gibuhon sa santuwaryo [niya] kan bayaan [siya] kan mga Israelita.” Trinato niya nin makatanusan asin may pagkahirak an lambang grupo, uyon sa saindang ginibo. (Ezek. 44:10, 12-16) Nag-ako man nin mapuwersang pagtatanos an mga pamayo kan Israel.—Ezek. 45:9.

⁹ Kaya malinaw na ipinahiling ni Jehova na an mga lalaking nanginginot saka may awtoridad maninimbag sa saindang paagi nin pag-asikaso kan mga paninimbagan ninda. Kaipuhan pa man giraray ninda an sadol, pagtatanos, asin disiplina. Sa katunayan, dapat sindang manginot sa pagsunod sa mga pamantayan ni Jehova!

10, 11. Ano an nagpapatunay na isinabuhay kan nagkapira sa mga nagbaralik hali sa pagkadistiyero an mga nanudan ninda sa bisyon ni Ezekiel?

¹⁰ Isinabuhay daw kan mga nagbaralik hali sa pagkadistiyero an mga nanudan ninda sa bisyon ni Ezekiel? Dai ta aram kun ano talaga an iniisip kan maimbod na mga lalaki asin babayi kan panahon na idto manungod sa pambihirang bisyon na ini. Pero dakul an sinasabi sato kan Tataramon nin Diyos manungod sa mga ginibo kan mga nagbaralik hali sa pagkadistiyero asin kun ano an nagin pagmansay ninda sa dalisay na pagsamba ki Jehova. Isinabuhay daw ninda an mga nanudan ninda sa bisyon ni Ezekiel? Masasabi tang iyo—lalo na kun ikukumparar sa ginibo kan rebelyoso nindang mga apuon bago an pagkadistiyero sa Babilonya.

¹¹ An maimbod na mga lalaki na arog ni propeta Hageo asin Zacarias, ni Esdras na saserdote asin parakopya, saka ni Nehemias na gobernador gabos naghinguwang marhay na tukduan an banwaan kan mga leksiyon na manunudan sa bisyon ni Ezekiel manungod sa templo. (Esd. 5:1, 2) Tinukduan ninda an banwaan na dapat ilangkaw an dalisay na pagsamba, asin dapat na iyan an magin priyoridad imbes na an materyal na mga bagay saka pansadiring mga kamawutan. (Hag. 1:3, 4) Idinuon ninda na dapat sunudon an mga pamantayan para sa pakikikabtang sa dalisay na pagsamba. Halimbawa, sinabihan ni Esdras saka Nehemias an banwaan na pahalion an saindang dayuhan na mga agom, na nagpapaluya kan saindang espirituwalidad. (Basahon  an Esdras 10:10, 11; Neh. 13:23-27, 30) Kumusta man pag-abot sa idolatriya? Minalataw na pagkatapos na makatalingkas an nasyon, nanudan na ninda na ikaungis an kasalan na iyan na parating nakakasiod sa sainda. Kumusta man kun manungod sa mga saserdote saka mga pamayo, o prinsipe? Arog kan ipinaparisa sa bisyon ni Ezekiel, kaiba sinda sa mga nag-ako nin sadol asin pagtatanos hali ki Jehova. (Neh. 13:22, 28) Dakul an mapakumbabang nagdangog sa sadol.—Esd. 10:7-9, 12-14; Neh. 9:1-3, 38.

12. Sa anong mga paagi binendisyunan ni Jehova an mga distiyero pagkatapos nindang makabalik?

¹² Bilang resulta, binendisyunan ni Jehova an saiyang banwaan. Nagkaigwa sinda nin haraning relasyon ki Jehova asin an saindang daga nagin mas marahay saka matiwasay—mga bagay na haloy na nindang dai naeeksperyensiyahan. (Esd. 6:19-22; Neh. 8:9-12; 12:27-30, 43) Taano ta binendisyunan sinda? Huling sinunod na ninda an matanos na mga pamantayan ni Jehova para sa dalisay na pagsamba. Dakul an napahiro kan mga leksiyon na manunudan sa templo sa bisyon. Bilang sumaryo, masasabi tang nakinabang an banwaan sa bisyon ni Ezekiel manungod sa templo sa duwang mahalagang paagi. (1) Natukduan sinda kaiyan nin praktikal na mga leksiyon manungod sa mga pamantayan para sa dalisay na pagsamba asin sa kun paano ninda dapat sunudon an mga pamantayan na iyan. (2) Nagtao iyan sa sainda nin kasiguruhan na ibabalik an dalisay na pagsamba, asin ihinula man kaiyan na bebendisyunan ni Jehova an banwaan niya sagkod na nagsasagibo sinda nin dalisay na pagsamba. Pero gusto niyato na maaraman: May kautuban daw sa ngunyan an bisyon na iyan?

13, 14. (a) Paano ta naaraman na may kautuban sa panahon ta ngunyan an bisyon ni Ezekiel manungod sa templo? (b) Sa anong duwang paagi kita nakikinabang ngunyan sa bisyon? (Hilingon man an kahon 13A, “Magkalain na Templo, Magkalain na Leksiyon.”)

¹³ Makakasigurado daw talaga kita na aplikado man sa panahon ta ngunyan an bisyon ni Ezekiel manungod sa templo? Iyo! Girumdumon an pagkakaagid kan bisyon ni Ezekiel manungod sa sagradong harong nin Diyos na nasa “sarong halangkawon na bukid” asin kan propesiya ni Isaias na “an bukid kan harong ni Jehova marigon na maeestablisar na halangkaw pa sa alituktok kan mga bukid.” Espesipikong sinabi ni Isaias na mauutob an saiyang propesiya durante kan “huring kabtang kan mga aldaw,” o “sa huring mga aldaw.” (Ezek. 40:2; Isa. 2:2-4; nota sa ibaba; hilingon man an Mikas 4:1-4.) An mga propesiyang ini nagpuon na mautob puon 1919 kan ilinangkaw asin ibinalik an dalisay na pagsamba, na garo baga ibinugtak sa sarong halangkawon na bukid. *

¹⁴ Siyerto nanggad na an bisyon ni Ezekiel aplikado man sa dalisay na pagsamba ngunyan. Arog kan mga Judiong idinistiyero kaidto, nakikinabang man kita diyan ngunyan sa duwang paagi. (1) Nagtatao iyan nin praktikal na mga leksiyon kun paano niyato masusunod an mga pamantayan ni Jehova para sa dalisay na pagsamba. (2) Sinisiyerto kaiyan sa sato na ibabalik an dalisay na pagsamba asin na bebendisyunan kita ni Jehova.

15. Ano an dapat tang tandaan mantang inaaram ta an mga leksiyon na manunudan ta sa templo sa bisyon ni Ezekiel?

¹⁵ Pag-ulayan ta ngunyan an nagkapirang espesipikong detalye kan bisyon ni Ezekiel. Imahinara na maiba kita sa paglibot ni Ezekiel sa kahanga-hangang templo sa bisyon. Tandaan na bako su dakulang espirituwal na templo an mahihiling ta; imbes, gusto ta lang makanuod nin mga leksiyon may koneksiyon sa satong pagsamba ngunyan. Ano an nagkapira sa mga puwede tang manudan?

16. Ano an manunudan ta sa gabos na pagsukol sa bisyon ni Ezekiel? (Hilingon an ritrato sa kapinunan kan kapitulo.)

¹⁶ Taano ta kadakul nin mga sukol? Mantang nakahiling si Ezekiel, an anghel na an itsura arog sa tanso detalyadong pigsukol an templo; sinukol kaini an mga pader, an mga lanob, an mga trangkahan, an mga kurukuwarto kan guwardiya, an mga patyo, asin an altar. Tibaad malula an saro pag nabasa niya an dakulon na detalye manungod diyan. (Ezek. 40:1–42:20; 43:13, 14) Pero isipa an mahalagang mga leksiyon na manunudan ta sa mga detalyeng iyan. Paagi kaiyan, mapuwersang idinuduon ni Jehova an kahalagahan kan saiyang mga pamantayan. Siya an nagbubugtak kaiyan, bakong mga tawo. Salang marhay an mga nagsasabi na bakong mahalaga kun paano niyato sinasamba an Diyos. Apuwera diyan, paagi sa detalyadong pagsukol kan templo, sinisiyerto ni Jehova na talagang ibabalik an dalisay na pagsamba. Eksaktong mauutob an panuga nin Diyos kun paanong eksakto an mga sukol na idto. Kaya kinukumpirmar ni Ezekiel na talagang ibabalik an dalisay na pagsamba durante kan huring mga aldaw!

17. Ano an posibleng ipinapagirumdom sa sato ngunyan kan nakapalibot na pader sa bilog na templo?

¹⁷ An nakapalibot na pader. Arog kan napag-ulayan ta na, sa templo sa bisyon, nahiling ni Ezekiel an sarong pader na nakapalibot sa bilog na templo. An detalyeng iyan sarong mapuwersang pagirumdom  sa banwaan nin Diyos kaidto na dapat nindang halion an gabos na espirituwal na kaatian—harayo sa dalisay na pagsamba—para dai maramugan an harong nin Diyos. (Basahon an Ezekiel 43:7-9.) Kaipuhan ta man ngunyan an sadol na iyan! Pagkatapos na makatalingkas an banwaan nin Diyos sa dakul na siglong espirituwal na pagkabihag sa Dakulang Babilonya, ninombrahan ni Cristo an maimbod asin mapagmansay na uripon kan 1919. Puon kaidto, nagmaigot na marhay an banwaan nin Diyos na halion an palsong mga doktrina asin mga gibo-gibo na sinalakan nin idolatriya saka paganismo. Sinisigurado ta na dai lamang masalakan nin espirituwal na kaatian an dalisay na pagsamba. Dugang pa, dai man kita nagnenegosyo sa satong mga Kingdom Hall, na pinapagdanay an siring na ordinaryong mga bagay na suway sa satong pagsamba.—Mar. 11:15, 16.

18, 19. (a) Ano an manunudan ta sa halangkaw na mga trangkahan sa templo sa bisyon? (b) Ano an gigibuhon ta kun may mga naghihinguwang ibaba an halangkaw na mga pamantayan ni Jehova? Magtao nin halimbawa.

¹⁸ An halangkawon na mga trangkahan. Anong mga leksiyon an manunudan ta pag iniisip-isip ta an halangkawon na mga trangkahan na nahiling ni Ezekiel sa bisyon? Siyertong naitukdo kaini sa mga Judiong idinistiyero na halangkaw na marhay an moral na mga pamantayan ni Jehova. Kun totoo iyan kan suanoy na mga panahon, kumusta man sa ngunyan? Nagsasamba kita sa dakulang espirituwal na templo ni Jehova. Bako daw na mas lalo nang mahalaga ngunyan na magdanay kitang matanos asin daing pagsagin-sagin? (Roma 12:9; 1 Ped. 1:14, 15) Durante kan huring mga aldaw, progresibong giniyahan ni Jehova an saiyang banwaan para masunod nindang marhay an saiyang mga pamantayan sa moral na paggawi. * Halimbawa, hinahali sa kongregasyon an mga nagkasalang dai nagsusulsol. (1 Cor. 5:11-13) Asin an mga kurukuwarto kan guwardiya na nasa mga laugan kan mga trangkahan na idto posibleng nagpapagirumdom sa sato na, pag-abot sa pagsamba ki Jehova, dai aakuon ngunyan an siisay man na mayo kan pag-uyon nin Diyos. Halimbawa, puwedeng maglaog sa Kingdom Hall an sarong tawong igwa nin dobleng pamumuhay, pero dai niya makukua an pag-uyon ni Jehova sagkod na dai niya ginigibo kun ano an tama sa paghiling nin Diyos. (Sant. 4:8) Iyo, pinoprotektaran ni Jehova an dalisay na pagsamba para magdanay iyan na malinig sa panahon na ini na hababaon nang marhay an mga pamantayan sa moral!

¹⁹ Ihinula kan Bibliya na magigin mas maraot pa an kinaban na ini bago an katapusan. Sinasabi kaiyan: “An mga maraot na tawo asin impostor lalo pang magigin maraot, na nanglalagalag asin nailalagalag.” (2 Tim. 3:13) Padakul nin padakul na mga tawo ngunyan an nadadaya saka napapatubod na an halangkaw na mga pamantayan ni Jehova sobra kaistrikto, bako nang praktikal, o sala pa ngani. Mapadaya ka daw? Halimbawa, kun may magkumbinsir sa saimo na sala an pamantayan nin Diyos may koneksiyon sa homoseksuwal na mga gibo, mauyon ka daw sa saiya? O mauyon ka daw sa Diyos na Jehova, na malinaw na nagsasabi sa saiyang Tataramon na idtong mga nagsasagibo nin mga arog kaiyan “naggigibo nin kalaswaan”? Pinapatanidan  kita kan Diyos na dai pag-uyunan an imoral na mga paggawi. (Roma 1:24-27, 32) Pag napaatubang sa arog kaiyan na mga isyu, isipon an halangkawon na mga trangkahan sa templo sa bisyon ni Ezekiel asin tandaan: Dai ibinababa ni Jehova an saiyang matanos na mga pamantayan, ano man an gibuhon kan maraot na kinaban na ini. Uyon daw kita sa satong Ama sa langit asin naninindugan sa kun ano an tama?

20. Sa bisyon ni Ezekiel, anong nakakapakusog na pagirumdom an inako kan mga kabilang sa “dakulang kadaklan”?

²⁰ An mga patyo. Kan mahiling ni Ezekiel an mahiwas na patyong nasa luwas, siguradong naugma siya mantang iniisip-isip kun gurano kadakul na parasamba ni Jehova an maugmang makakapagtiripon duman. Sa ngunyan, nagsasamba an mga Kristiyano sa mas sagrado nanggad na lugar. Idtong mga kabilang sa “dakulang kadaklan” kan mga parasamba na yaon sa patyong nasa luwas kan espirituwal na templo ni Jehova nag-aako nin nakakapakusog na mga pagirumdom hali sa bisyon ni Ezekiel. (Kap. 7:9, 10, 14, 15) Nahiling ni Ezekiel na an mga patyo igwa nin mga kuwartong kakanan na diyan puwedeng kakanon kan mga parasamba an dara nindang mga atang sa pakikikabtang. (Ezek. 40:17) Garo man sana puwede nindang makaibanan sa pagkakan an Diyos na Jehova—sarong tanda nin matuninong na relasyon bilang mag-amigo! Sa ngunyan, dai kita nagdudulot nin mga atang arog kan ginigibo kaidto kan mga Judio bilang pagsunod sa Katugunan ni Moises. Imbes, nagdudulot kita nin mga “atang nin pag-umaw” pag nakikikabtang kita sa dalisay na pagsamba, arog kan pagkomento saka iba pang paagi nin pagpahayag nin pagtubod pag nasa mga pagtiripon kita o pag nagmiministeryo sa langtad. (Heb. 13:15) Napapakusog man kita paagi sa espirituwal na kakanon na itinatao ni  Jehova. Siguradong namamatian ta man an namatian kan mga aki ni Kora kan mag-awit sinda ki Jehova: “An sarong aldaw sa saimong mga patyo mas marahay pa kisa sangribong aldaw sa ibang lugar!”—Sal. 84:10.

21. Sa bisyon ni Ezekiel, ano an puwedeng manudan kan linahidan na mga Kristiyano manungod sa pagkasaserdote?

²¹ An pagkasaserdote. Nahiling ni Ezekiel na an mga trangkahan na ginagamit kan mga saserdote asin mga Levita para makalaog sa patyong nasa laog kapareho kan mga trangkahan na ginagamit kan ibang mga Israelita para makalaog sa patyong nasa luwas. Malinaw na ipinagirumdom kaini sa mga saserdote na kaipuhan man nindang sunudon an mga pamantayan ni Jehova para sa dalisay na pagsamba. Kumusta man sa panahon ta ngunyan? Dai nagmamana nin pagkasaserdote an mga lingkod nin Diyos ngunyan, pero sinabi sa linahidan na mga Kristiyano: “Kamo ‘sarong lahing pinili, sarong katiripunan nin mga saserdoteng hadi.’” (1 Ped. 2:9) Sa suanoy na Israel, igwa nin nakasuway na patyo para sa mga saserdote. Sa ngunyan, dai man literal na nakasuway an linahidan na mga Kristiyano sa saindang mga kapwa parasamba, pero inampon sinda ni Jehova bilang mga aki kaya igwa sinda nin espesyal na relasyon sa Saiya. (Gal. 4:4-6) May manunudan man na kapaki-pakinabang na pagirumdom an mga linahidan sa bisyon ni Ezekiel. Halimbawa, ipinahiling sa bisyon na kaipuhan man nin sadol saka disiplina kan mga saserdote. Dapat na tandaan kan gabos na Kristiyano na kabtang kita nin “sarong aripumpon” na naglilingkod sa pangangataman nin “sarong pastor.”—Basahon an Juan 10:16.

22, 23. (a) Anong leksiyon an puwedeng manudan kan Kristiyanong mga elder ngunyan sa pamayo sa bisyon ni Ezekiel? (b) Ano an posibleng mangyari sa maabot na panahon?

²² An pamayo. Sa bisyon ni Ezekiel, igwa nin mahalagang papel an sarong pamayo. Dai siya naggikan sa tribo nin mga saserdote, asin sa laog kan templo, kaipuhan niyang magpasakop sa mga saserdote. Pero pinapanginutan niya an banwaan asin tinatabangan sinda sa pagtao nin mga atang. (Ezek. 44:2, 3; 45:16, 17; 46:2) Kaya saro siyang halimbawa sa Kristiyanong mga lalaki sa ngunyan na may paninimbagan sa kongregasyon. Gabos na elder, pati na an mga nagbibiyaheng paraataman, kaipuhan na magpasakop sa linahidan na maimbod na uripon. (Heb. 13:17) Naghihinguwang marhay an mga elder na tabangan an banwaan nin Diyos na makapagdulot nin mga atang nin pag-umaw sa Kristiyanong mga pagtiripon saka sa ministeryo. (Efe. 4:11, 12) Asin puwede man girumdumon kan mga elder kun paano sinaway ni Jehova an mga pamayo sa Israel huli sa pag-abuso ninda sa saindang kapangyarihan. (Ezek. 45:9) Kaya dai pig-iisip kan mga elder na dai na ninda kaipuhan nin sadol asin pagtatanos. An totoo, pinapahalagahan ninda an lambang oportunidad na dalisayon sinda ni Jehova tanganing magin sindang mas epektibong mga pastor asin paraataman.—Basahon an 1 Pedro 5:1-3.

²³ Padagos na magtatagama si Jehova nin kuwalipikado asin mamumuton na mga paraataman sa maabot na Paraisong daga. Masasabing sinasanay na ngunyan an dakul na elder para magin epektibo sindang mga pastor sa Paraiso. (Sal. 45:16) Bako daw na nakakaugmang  isip-isipon kun paano magigin bendisyon an siring na mga lalaki sa bagong kinaban? An bisyon ni Ezekiel, saka an iba pang mga propesiya manungod sa pagbabalik, posibleng magin mas malinaw sa sato sa itinalaan na panahon ni Jehova. Tibaad an pira sa mga detalye kaiyan igwa nin nakakapukaw sa buot na mga leksiyon na manunudan niyato sa maabot na panahon, o tibaad magkakaigwa an mga iyan nin kautuban na imposible pang maaraman sa ngunyan. Panahon sana an makakapagsabi.

24, 25. Paano ilinadawan sa bisyon ni Ezekiel an mga bendisyon na itatao ni Jehova sa saiyang banwaan sagkod na nagsasagibo sinda nin dalisay na pagsamba?

²⁴ Bilang kongklusyon, girumdumon ta an sarong nakakaugmang pangyayari sa bisyon ni Ezekiel. Nag-abot si Jehova sa templo, asin nanuga siya na magdadanay siya diyan sagkod na maimbod na sinusunod kan banwaan an mga pamantayan niya sa dalisay na pagsamba. (Ezek. 43:4-9) Ano an magigin epekto kan presensiya ni Jehova sa saiyang banwaan saka sa saindang daga?

²⁵ Ipinahiling kan bisyon an maabot na mga bendisyon nin Diyos paagi sa duwang nakakapakusog sa buot na propetikong paglaladawan: (1) Hali sa santuwaryo kan templo, igwa nin salog na nagbubulos na nagtatao nin buhay sa daga asin ginigibo iyan na mabunga; saka (2) an daga binanga-banga nin areglado saka sa eksaktong paagi, asin nasa tahaw kaini an templo. Paano ta sasabuton iyan sa panahon niyato ngunyan? Importante sa sato an simbag huling nabubuhay na kita sa panahon na diyan dinalisay asin inuyunan ni Jehova an sarong mas sagradong areglo nin pagsamba, an dakulang espirituwal na templo. (Mal. 3:1-4) Pag-uulayan ta an duwang propetikong paglaladawan na iyan sa Kapitulo 19 sagkod 21 kan publikasyon na ini.