1, 2. (a) Bas pasal sebelumna, kai pelajaren si banci sidat arah pengenehenen Esekiel kerna rumah pertoton? (b) Dua penungkunen kai si nandangi sibahas bas pasal enda?

ENGGO sipelajari maka rumah pertoton si idah Esekiel labo rumah pertoton rohani si bahas Rasul Paulus ratusen tahun kenca si e. Enggo ka sipelajari maka tujun pengenehenen enda gelah iteh umat Dibata uga pentingna patoken Jahwe i bas nembah Ia. Banci kalak e mulihi jadi teman Jahwe adi ikutkenna patoken e. Emaka nina Jahwe, “Enda ndai me undang-undang kerna rumah pertoton.” Janah ban penting kapNa, katakenNa ka sekali nari, “Enda kap undang-undang kerna rumah pertoton.”​—Baca Esekiel 43:12.

² Gundari, lit dua penungkunen si perlu sibahas. Pertama: Arah pengenehenen e, kai si banci saja ipelajari kalak si itaban bas jaman Esekiel kerna patoken Jahwe i bas nembah Ia? Jawapenna nampati kita njawap penungkunen si peduaken enda: Kai pelajarenna banta bas wari-wari pendungi si jahat enda?

3. Engkai maka rumah pertoton si lit bas gunung si meganjang e erban mela kalak si bujur ukurna?

³ Guna njawapsa, perdiateken ciri-ciri bas rumah pertoton si idah Esekiel. Pertama, gunung si meganjang. Banci saja enda erban kalak Israel nginget nubuat Jesaya si erban meriah ukur, eme lit pagi masana mulihi sembah kalak Jahwe. (Jes. 2:2) Kai si ipelajari kalak e sanga tehna rumah pertoton lit bas gunung si meganjang? Erlajar kalak e maka cara nembah Jahwe arus ipeganjang ntah pe arus e si pentingna asangken kerinana. Situhuna, pengaturen i bas nembah Jahwe enggo meganjang perban Ia si erbanca. Ia Dibata si ‘ndauh mulian asangken kerina dibata si deban.’ (Ms. 97:9) Tapi la lakoken kalak Israel baginna. Ratusen tahun dekahna lanai sembah kalak e Jahwe alu cara si benar, la ergaina patoken Jahwe, janah sembahna ka berhala-berhala. Sanga rumah pertoton Dibata si badia ipeganjang ras imuliaken, kalak si bujur ukurna pasti mela kapna ngidahsa.

4, 5. Arah gerbang si meganjang e, kai pelajarenna man umat Dibata bas jaman Esekiel?

⁴ Gerbang-gerbang si meganjang. Bas pengenehenen e, tangtangna idah Esekiel lit sada malekat si ngukur gerbang-gerbang rumah pertoton. Ganjangna kira-kira 30 meter! (Esek. 40:14) Bas dalan masuk ku rumah pertoton e, lit ruang-ruang penjaga. Sanga pelajari umat Dibata rancangen rumah pertoton e, pelajaren kai si banci dat kalak e? Nina Jahwe man Esekiel, “Tuhu-tuhulah perdiateken dalan masuk ku rumah pertoton e.” Engkai? Perban baba umat Dibata kalak “si pusuh ras dagingna la isunat” masuk ku rumah pertoton Dibata si badia e. Nina Jahwe ka, “Najis ban kalak e rumah pertotonKu.”​—Esek. 44:5, 7.

⁵ Kalak si “dagingna la isunat” la ikutkenna perentah Dibata. Situhuna perentah e jelas kel janah enggo ndekah ibereken mulai kin jaman Abraham. (Kej. 17:9, 10; Im. 12:1-3) Tapi keleken ka kalak ‘si pusuhna la isunat,’ keras kepala kalak e janah mberontak man perentah Jahwe bage pe man petunjukNa. Kalak e la cocok masuk ku rumah pertotonNa si badia. Segat ate Jahwe ngidah kalak si munapik. Tapi umatNa la bage, pediatna kalak si munapik bebas masuk ku rumah Dibata. Emaka, gerbang rumah pertoton ras ruang-ruang penjaga e alu jelas mbuktiken maka kalak si munapik lanai banci masuk ku bas. Adi masuk ate umat Dibata ku rumah pertotonNa, arus ikutken kalak e patoken si meganjang e. Bage maka nggit Jahwe masu-masu kalak si nembah Ia i je.

6, 7. (a) Kai si ipelajari umat Jahwe arah tembok ras daerah si mbelang si lit i sekeliling rumah pertoton? (b) Uga mbarenda perbahanen umat Jahwe man rumah pertoton? (Nen cataten i teruh.)

⁶ Tembok i sekeliling rumah pertoton. Salah sada si menarik arah rumah pertoton e eme tembokna. Nina Esekiel gedang  tiap sisi tembok e lit 500 tongkat ntah 1.555 meter, hampir 1,6 kilometer! (Esek. 42:15-20) Tapi bangunen rumah pertoton e ras halamenna si bentukna segi empat, tiap sisina gedangna 500 hasta ngenca ntah pe 259 meter. (Esek. 45:2) Emaka, lit daerah si mbelang i sekeliling bangunen rumah pertoton e janah daerah e ilindungi tembok. * Engkai maka bage?

⁷ Nina Jahwe, “Gundari arus pengadi kalak e perbahanenna si la setia janah arus ambekkenna berhalana si sembahna bagi raja. Alu bage, tading pagi Aku i tengah-tengah kalak e seh rasa lalap.” (Esek. 43:9) Situhuna, daerah si mbelang si lit i sekeliling rumah pertoton e ipake Jahwe guna ngataken man umatNa, “Kerina si najis e la banci ndeher ku rumah pertotonKu.” Adi Jahwe saja ngenca si isembah umatNa janah la persadana ras berhala, pasti pasu-pasu Jahwe kalak e alu kerehenNa.

8, 9. Kai si ipelajari umat Jahwe arah persinget si tegas si bereken Jahwe man dilaki-dilaki si lit tanggung jawapna?

⁸ Ibereken persinget si tegas man dilaki-dilaki si lit tanggung jawapna. Bereken Jahwe persinget si tegas tapi perkeleng. Tegas kel persingeti Jahwe kalak Lewi, perban sanga umat Dibata nembah berhala, kalak Lewi pe enggo ndauh nilah arah Jahwe. Tapi puji Jahwe ‘keturunen Sadok si tetap ertugas bas inganNa si badia.’ PerbahanenNa man duana kelompok e adil janah perkuah sesuai ras perbahanen kalak e. (Esek. 44:10, 12-16) Selain kalak Lewi, peminpin Israel pe ipersingeti alu tegas.​—Esek. 45:9.

⁹ Jelas teridah maka ate Jahwe dilaki-dilaki si minpin ertanggung jawap man baNa kerna uga cara kalak e ndalanken tugasna. Kalak e pe tetap merluken nasehat, persinget, ras disiplin. Kalak e pe arus jadi usihen i bas ngikutken patoken Jahwe!

10, 11. Enterem kalak si itaban si mulih e ngikutken patoken si lit bas pengenehenen Esekiel, kai saja buktina?

¹⁰ La lit iceritaken Pustaka uga tanggapen kalak si itaban si enggo mulih e nandangi pengenehenen e. Tapi kataken Pustaka man banta kerna kai saja si lakoken kalak e, janah uga tanggapen kalak e nandangi cara si benar i bas nembah Jahwe. Ikutken kalak e nge patoken si lit bas pengenehenen Esekiel e? Ue, banci sikataken bage. Khususna adi sibandingken ras nini bulang kalak e si lalap mberontak sope itaban ku Babilon.

¹¹ Lit dilaki si erkiniteken bagi Nabi Hagai, Nabi Sakaria, Imam Esra si sekalak penulis, ras Gubernur Nehemia. Tutus kel ate kalak e ngajarken patoken Dibata si mirip ras patoken si lit bas pengenehenen Esekiel. (Esa. 5:1, 2) Ajarken kalak e man umat Dibata maka cara si benar bas nembah Jahwe  arus ipeganjang. Arus pentingen akap umat Jahwe nembah Jahwe asangken kebayaken ntah pe kepentingenna. (Hag. 1:3, 4) Jelasken kalak e ka maka penting kel ngikutken patoken i bas nembah Dibata. Contohna, terus terang kataken Esra ras Nehemia maka arus ipelawes umat Dibata ndehara-ndeharana arah bangsa asing nari, perban e erban kalak e ndauh arah Dibata. (Baca Esra 10:10, 11; Neh. 13:23-27, 30) Uga kerna nembah berhala? Dungna, lanai nggit umat Dibata nembah berhala perban enggo segat ate kalak e, sebap enggo mulih-ulih kalak e ipengaruhina. Uga kerna imam-imam ras peminpin-peminpin? Bagi si icidahken bas pengenehenen Esekiel, kalak e pe ipersingeti ras inasehati Jahwe. (Neh. 13:22, 28) Enterem kalak si meteruk ukur ngikutken nasehat e.​—Esa. 10:7-9, 12-14; Neh. 9:1-3, 38.

12. Uga Jahwe masu-masu kalak si itaban si enggo mulih e?

¹² Hasilna, pasu-pasu Jahwe umatNa. Banci kalak e rembak ras Jahwe, sehat kalak e, janah dame akap kalak e. Enda enggo ndekah lanai gejapken kalak e. (Esa. 6:19-22; Neh. 8:9-12; 12:27-30, 43) Si e banci terjadi perban mulai ikutken kalak e patoken si benar i bas nembah Jahwe. Enterem kalak si meteruk ukur ngelakoken kai si pelajarina arah pengenehenen Esekiel e. Kesimpulenna, lit dua gunana si datken kalak si  itaban e arah pengenehenen enda. (1) Erlajar kalak e uga carana ngikutken patoken i bas nembah Jahwe. (2) Dat kalak e jaminen maka mulihi pagi Jahwe isembah alu cara si benar. Janah adi tetap sembah kalak e Jahwe alu cara si benar, pasti pasu-pasu Jahwe kalak e. Tapi merhat kita metehsa, lit nge hubungenna nubuat e ras jamanta?

13, 14. (a) Ja nari banci siteh maka pengenehenen Esekiel kerna rumah pertoton lit hubungenna ras jamanta? (b) Lit dua gunana pengenehenen e man banta, kai saja e? (Nen ka kotak 13A, “Dua Rumah Pertoton si La Seri Ertina.”)

¹³ Banci kita tek maka pengenehenen Esekiel kerna rumah pertoton lit hubungenna ras jamanta gundari. Kai buktina? Bagi si enggo sipelajari, rumah pertoton si idah Esekiel e, lit bas “sada gunung si seh kel ganjangna,” janah inubuatken Jesaya ka maka ‘gunung ingan rumah Jahwe, pajek pagi alu paguh ganjangen asangken gunung-gunung.’ Jelas kel ikataken Jesaya ndigan nubuatna e terjadi, eme “bas wari-wari pendungi” ntah pe “bas pendungi jaman.” (Esek. 40:2; Jes. 2:2-4; ctt.; nen ka Miha 4:1-4.) Nubuat-nubuat e tuhu-tuhu terjadi bas wari-wari pendungi mulai tahun 1919, sanga cara si benar i bas nembah Jahwe mulihi ipeganjang ntah pe idalanken, tempa-tempa itama i datas gunung si meganjang. *

¹⁴ Jelas me, pengenehenen Esekiel lit hubungenna ras jamanta gundari. Bagi kalak Jahudi si itaban mbarenda, kita pe sidat dua gunana arah pengenehenen e. (1) Erlajar kita uga carana ngikutken patoken Jahwe si benar i bas nembah Ia. (2) Sidat jaminen maka mulihi pagi Jahwe isembah alu cara si benar janah pasu-pasuNa me kita.

15. Kai si perlu siinget sanga sipelajari kerna rumah pertoton si idah Esekiel?

¹⁵ Mari sibahas kai saja si lit bas pengenehenen e. Cuba bayangken kita erdalan-dalan ras Esekiel engkelilingi rumah pertoton si luar biasa e. Perlu siinget maka rumah pertoton e labo rumah pertoton rohani. Tujunta eme ndarami pelajaren si banci sidalanken i bas nembah Jahwe gundari. Kai saja e?

16. Kai saja si banci sipelajari arah ukuren-ukuren si lit bas pengenehenen Esekiel? (Nen gambar bas awal pasal.)

¹⁶ Engkai maka kerinana iukur? Perdiateken Esekiel maka malekat si ersinar bagi tembaga e ngukur tembok, gerbang, ruang-ruang penjaga, halamen, ras ingan nutung persembahen si lit bas rumah pertoton e. Kerina ukuren si ikatakenna alu jelas e banci saja erban kita bingung. (Esek. 40:1–42:20; 43:13, 14) Tapi, ukurilah kai pelajaren si penting si banci sidat. Bereken Jahwe keterangen si jelas guna mbuktiken maka penting kel patokenNa e. Ia kap si nentukenca, labo manusia. Enterem si ngataken maka ugapa pe carata nembah Dibata pasti alokenNa, tapi situhuna labo bage. Sanga iukur malekat  rumah pertoton e, pastiken Jahwe maka cara si benar i bas nembah Ia pasti mulihi ilakoken. Bagi ukuren-ukuren si lit bas rumah pertoton e enggo itetapken, janji Dibata pe enggo itetapken gelah terjadi janah la banci berubah. Jadi, pengenehenen Esekiel e erban kita tek maka cara si benar i bas nembah Jahwe mulihi ilakoken bas wari-wari pendungi enda.

17. Tembok si lit i sekeliling rumah pertoton e mpersingeti kita kerna kai bas jamanta?

¹⁷ Tembok i sekeliling rumah pertoton. Bagi si enggo sibahas, tembok si lit i sekeliling rumah pertoton e jadi persinget si jelas man umat Dibata maka rumah pertoton arus tetap badia. La banci persada kalak e kai pe si najis sanga nembah Jahwe. (Baca Esekiel 43:7-9.) Persinget e cocok kel bas jamanta gundari! Lit ratusen tahun dekahna umat Dibata itaban Babilon si Mbelin, dung e ibebasken kalak e. Kenca si e, ilantik Kristus budak si setia ras pentar bas tahun 1919. Mulai paksa si e, usahaken umat Dibata kel nadingken ajaren agama palsu bage pe perbahanen si lit hubungenna ras nembah berhala ntah pe dewa-dewi. Sipastiken ateta gelah sanga sisembah Jahwe, la sipersada e ras kai pe si najis. Bage ka pe sanga kita bas Bale Kerajan, la silakoken i je urusen bisnista ntah pe pendahinta, perban urusen doni enda la banci ipersada ras nembah Jahwe.​—Mrk. 11:15, 16.

18, 19. (a) Kai si banci sipelajari arah gerbang-gerbang si meganjang si lit bas rumah pertoton e? (b) Kai si arus silakoken adi lit kalak si mpengaruhi kita gelah la ngikutken patoken Jahwe? Ban contohna.

¹⁸ Gerbang-gerbang si meganjang. Pelajaren kai si banci sidat sanga sibayangken gerbang si meganjang si idah Esekiel? Mbarenda, kalak Jahudi si itaban erlajar maka meganjang kel patoken Jahwe kerna lagu langkah. Uga kita gundari? Gundari, sisembah Jahwe bas rumah pertoton rohaniNa. Emaka reh pentingna ka gundari njaga lagu langkahta tetap badia janah la munapik. (Rom. 12:9; 1 Pet. 1:14, 15) Bas wari-wari pendungi, alu manjar-anjar sampati Jahwe umatNa ngikutken patoken si ibanNa kerna lagu langkah. * Contohna, adi kalak si erdosa la ertobat, ipedarat ia arah runggun. (1 Kor. 5:11-13) Selain si e, lit persinget si banci sidat arah pengenehenen kerna ruang-ruang penjaga si lit bas gerbang rumah pertoton. Persinget e eme: Ise pe la banci masuk ku rumah pertoton rohani guna nembah Jahwe adi la senang Jahwe ngidah ia. Contohna, kalak si munapik banci saja reh ku Bale Kerajan, tapi la senang Jahwe ngidah ia adi la lakokenna kai si pindo Jahwe. (Jak. 4:8) Pastiken Jahwe gelah cara nembah Ia tetap benar amin pe doni enda reh jahatna!

¹⁹ Bas wari-wari pendungi, enggo ikataken Pustaka maka “kalak jahat ras penipu reh dekahna reh jahatna, tipuna kalak janah ia pe kena tipu.” (2 Tim. 3:13) Reh teremna kalak tertipu, emaka menurut kalak e patoken Jahwe si meganjang e lebihsa,  ketadingen jaman, ntah pe la terteki. Adi kam uga? Banci nge kam tertipu? Contohna, adi lit kalak si usahakenna kel erban kam tek maka lebihsa patoken Dibata kerna perbahanen homo e, setuju nge kam? Ntah setuju nge kam ras Dibata Jahwe si ngataken maka e “perbahanen si erban ciga ate”? Enggo persingeti Dibata kita gelah ula ngelakoken perbahanen seks si salah. (Rom. 1:24-27, 32) Sanga siadapi tentangen si bage, sibayangkenlah rumah pertoton si idah Esekiel ras gerbang-gerbangna si seh kel ganjangna. Siinget maka la pernah ubah Jahwe patokenNa si benar, la soal uga pendapat doni si jahat enda. Setuju nge kita nandangi patoken Bapakta si i surga, janah nggit nge kita mbela kai si benar?

20. Arah halamen rumah pertoton si lit bas pengenehenen Esekiel, pelajaren kai si banci mpegegehi “kelompok jelma si enterem”?

²⁰ Halamen rumah pertoton. Sanga idah Esekiel mbelang kel halamen rumah pertoton si arah darat, meriah ukurna perban bayangkenna banci enterem kel umat Jahwe pulung i je. Gundari, kalak Kristen nembah Jahwe bas rumah pertoton si ndauh badian asangken si idah Esekiel e. Lit “kelompok jelma si enterem” si nembah Jahwe bas halamen si arah darat rumah pertoton rohaniNa, janah dat kalak e pelajaren si mpegegehi arah pengenehenen Esekiel e. (Ket. 7:9, 10, 14, 15) Kai pelajarenna? Idah Esekiel lit ruangen-ruangen ingan man bas halamen si arah darat. I je, kalak si maba korban persadan, banci  panna baginna. (Esek. 40:17) Tempa-tempa, man kalak e ras Dibata Jahwe, e buktina kalak e erteman ras Ia. Gundari, lanai sipersembahken korban bagi kalak Jahudi si ndalanken Undang-Undang Musa. Tapi sibereken “korban pujin” sanga sisembah Jahwe. Contohna, sibereken komentar janah sibuktiken kinitekenta sanga kita bas perpulungen ntah pe sanga kita erberita. (Heb. 13:15) Puas ka kita man pangan rohani si isikapken Jahwe. Emaka, perasanta seri ras keturunen Korah si rende man Jahwe, nina, “Padin kuakap sada wari i halamen rumahNdu asangken seribu wari bas ingan si deban!”​—Ms. 84:10.

21. Kai si ipelajari kalak si ipilih ku surga arah imam-imam bas pengenehenen Esekiel?

²¹ Imam-imam. Idah Esekiel maka gelah banci masuk ku halamen si arah bas, imam-imam ras kalak Lewi arus ngelewati gerbang si seri ras gerbang si lit bas halamen si arah darat. Gerbang si arah darat e suku si deban si ngelewatisa. Enda jadi persinget si mehuli man imam-imam maka kalak e pe arus ngikutken patoken Jahwe i bas nembah Ia. Gundari uga? Memang lanai lit pengaturen maka kalak Lewi jadi imam i tengah-tengah umat Dibata. Tapi ikataken man kalak si ipilih ku surga, “Kena kap ‘bangsa pilihen, imam-imam si jadi raja.’” (1 Pet. 2:9) Imam-imam bas Israel jaman si mbarenda, nembah Jahwe bas halamen si terpisah. Gundari, kalak Kristen si ipilih ku surga nembah Jahwe bas ingan si seri ras turang senina si deban. Tapi kalak si ipilih ku surga, istimewa hubungenna ras Jahwe, perban kalak e enggo ipilih jadi anak-anakNa. (Gal. 4:4-6) Amin pe bage, banci dat kalak e persinget si erguna arah pengenehenen Esekiel. Contohna, bagi imam-imam si mbarenda, teh kalak e maka kalak e pe perlu persinget ras disiplin. La soal ise pe kita, arus siinget maka selaku kalak Kristen kita “sada rarasen” janah ‘sada permakanta.’​—Baca Johanes 10:16.

22, 23. (a) Arah pengenehenen Esekiel kerna peminpin, kai si banci saja ipelajari pertua Kristen? (b) Kai si banci saja terjadi bas masa depan?

²² Peminpin umat Dibata. Peminpin si idah Esekiel e kalak si terpandang. Tugasna ngawasi umat Dibata ras nampati kalak e nikapken korban persembahen. Tapi perban peminpin e labo keturunen imam, arus ia patuh man petunjuk imam bas rumah pertoton. (Esek. 44:2, 3; 45:16, 17; 46:2) Peminpin e pe jadi usihen man dilaki si ibereken tanggung jawap bas runggun Kristen gundari. Kerina pertua, termasuk pertua keliling arus patuh man budak si setia. (Heb. 13:17) Pertua-pertua kerja keras nampati umat Dibata mpersembahken korban pujin bas perpulungen bage pe sanga erberita. (Ep. 4:11, 12) Peminpin bas jaman Israel mbarenda ipersingeti Jahwe perban isalahgunaken kalak e kuasana. (Esek. 45:9) Arah je nari, pertua banci erlajar maka kalak e pe perlu denga nasehat ras persinget.  Meriah ukur kalak e dat kesempaten iajari Jahwe, perban e banci erban kalak e jadi permakan ras pengawas si mehuli.​—Baca 1 Petrus 5:1-3.

²³ Tetap pagi bereken Jahwe pengawas si pentar ras perkeleng bas Pardis. Situhuna, gundari kalak e sangana iajari gelah banci jadi permakan si mehuli bas Pardis. (Ms. 45:16) Cuba sibayangken pasu-pasu si banci sigejapken pagi sanga kalak e jadi pengawasta bas Pardis, pasti kita terpegegehi! Erti pengenehenen Esekiel banci saja reh jelasna pagi bas waktu si enggo itetapken Jahwe, bagi nubuat si debanna. Banci saja lit denga pelajaren si deban arah nubuat e ntah lit denga si terjadi bas masa depan, tapi gundari lenga banci sibayangken.

24, 25. Bas pengenehenen Esekiel, gambaren kai saja si njelasken pasu-pasu Jahwe man umatNa pagi?

²⁴ Kesimpulenna, cuba siinget mulihi peristiwa si luar biasa si lit bas pengenehenen Esekiel: Masuk Jahwe ku rumah pertoton e janah erjanji Ia maka tetap Ia lit i je adi setia umatNa ngikutken patoken i bas nembah Ia. (Esek. 43:4-9) Kai kin pengaruhna kerehen Jahwe man umatNa ras negri kalak e?

²⁵ Bas pengenehenen Esekiel e, lit dua gambaren si njelasken pasu-pasu Dibata si terjadi pagi: (1) Lit lau si maler arah ingan si badia janah ku ja pe lau e maler lit banna i je kegeluhen janah subur banna taneh bas negri e. (2) Negri e ibagi-bagi si tiap baginna ukurenna enggo itentuken, janah i tengah-tengah negri e lit bangunen rumah pertoton. Memang, enggo imurniken Jahwe rumah pertoton rohani. Gundari, enggo ndauh badian pengaturen guna nembah Jahwe asangken si lit mbarenda, janah cocok akap Jahwe kerna pengaturen e. Adi bage, lit denga nge pelajaren si banci sidat arah dua gambaren ndai? (Mal. 3:1-4) Sibahas pagi kerna dua gambaren e bas Pasal 19 ngasa Pasal 21 buku enda.