1, 2. a) ¿Mbaʼépa ñaaprende pe visión ohecha vaʼekuégui Ezequiel pe kapítulo ohasa vaʼekuépe? b) ¿Mbaʼe mbaʼépa ñambohováita ko kapítulope?

PE TÉMPLO Ezequiel ohecha vaʼekue visiónpe ndahaʼéi pe témplo espirituál tuichaitéva apóstol Pablo omyesakã vaʼekue heta áño upe rire. Upéva jahecha kuri pe kapítulo ohasa vaʼekuépe. Ñaaprende kuri upe visión omboʼe hague Ñandejára puévlope iñimportanteha okumpli hikuái umi mandamiénto ojeadora hag̃ua chupe haʼe oipotaháicha. Ñandejára puévlo ikatu jeýta oiko Jehová amígoramo okumplíramo añoite umi mandamiénto. Upévare Jehová ohechauka iñimportanteha umíva heʼívo 2 vése voi peteĩ versíkulope: “Kóva hína pe léi oñeʼẽva pe témplore” (elee Ezequiel 43:12).

² Péro koʼág̃a tekotevẽ ñakontesta mokõi pregúnta. Primero: ¿Mbaʼéichapa pe visión oñeʼẽva pe témplore oipytyvõ vaʼekue umi judío Ezequiel tiémpope guarépe ohechakuaa hag̃ua mbaʼéichapa Jehová oipota ojeadora chupe? Ñambohováivo ko pregúnta ñanepytyvõta ñambohovái hag̃ua pe segunda pregúnta: ¿Mbaʼépa heʼise ñandéve g̃uarã upe visión koʼã ára paha ijetuʼuetévape?

3. ¿Mbaʼépa omboʼe umi héntepe ohecha haguére Jehová róga peteĩ montáña ijyvatetereívape?

³ Ñambohovái hag̃ua pe primera pregúnta, jahechami algúno detálle ijojahaʼỹva orekóva pe témplo oĩva pe visiónpe. Pe montáña ijyvatetéva.  Umi hénte opensávo pe témplo Ezequiel visionpeguáre, oiméne imanduʼa raʼe Isaías profesía oporomokyreʼỹetévare, ha heʼíva ojeadora jeytaha Jehovápe añoiténte (Is. 2:2). ¿Péro mbaʼépa omboʼe chupekuéra ohechávo Jehová róga peteĩ montáña ijyvatetereívape? Omboʼe chupekuéra pe adorasión oñemeʼẽva Jehovápe oñemoĩ vaʼerãha peteĩ lugár ijyvatévape, oñembotuicha ha oñemombaʼeve vaʼerãha opa mbaʼégui. Añetehápe, pe adorasión oñemeʼẽva Jehovápe oĩ voínte peteĩ lugár iñimportantetereívape pórke ou hína Ñandejáragui, “pe iñimportantevéva entéro umi ótro dios apytépe” (Sal. 97:9). Péro pe puévlo ndojapói kuri upe oñehaʼarõva chuguikuéra. Hetaiterei áñore, haʼekuéra heta vése oheja oñemongyʼa, ojedespresia ha ojeguereko ku mbaʼeveʼỹrõguáicha pe adorasión oñemeʼẽva Jehovápe. Ohechávo Ñandejára róga oĩha peteĩ lugár yvatépe, oñembotuicha ha oñemombaʼeha omereseháicha, katuete oiméne omomýi raʼe umi ipyʼaporãvape otĩ hag̃ua hembiapo vaikuére.

4, 5. ¿Mbaʼépa oiméne oaprende rakaʼe umi ohendúva Ezequiélpe umi entráda ijyvatetereívagui?

⁴ Pe entráda ijyvatetereíva. Oñepyrũvo pe visión, Ezequiel ohecha peteĩ ánhel omediha hína pe entráda. Upéva ijyvate vaʼekue amo 30 métrorupi (Ezeq. 40:14). Pe entrádape oĩ vaʼekue umi guárdia koty. ¿Mbaʼépa oiméne ontendekase raʼe upéva umi ostudia vaʼekuépe upe pláno? Jehová heʼi Ezequiélpe: “Eñatende porãkena pe témplo entrádare”. ¿Mbaʼérepa? Pórke umi hénte ogueru oikóvo Ñandejára rogaitépe voi, pe ojeadorahápe chupe, “umi extranhéro nosirkunsidái vaʼekue ikorasõ ni hete”. ¿Ha mbaʼépa oiko upévare? Jehová heʼi: “Haʼekuéra omongyʼa hína che témplo” (Ezeq. 44:5, 7).

⁵ Umi “nosirkunsidái vaʼekue [...] hete” nokumplíri hína kuri peteĩ mandamiénto Ñandejára heʼi porã vaʼekue oñekumpli vaʼerãha, ha upe mandamiénto oĩma vaʼekue yma Abrahán tiémpo guive (Gén. 17:9, 10; Lev. 12:1-3). Péro umi “nosirkunsidái vaʼekue ikorasõ” katu oĩ vaivéntema. Haʼekuéra irrevélde, ikaprichóso ha ndojaposéi vaʼekue Jehová heʼíva. ¡Umichagua héntepe núnka ndojehejái vaʼerã kuri oike Jehová róga ojeadorahápe chupe! Jehová ndaijaʼeiete umi hovamokõivare, ha ipuévlo oheja vaʼekue umi hovamokõiva ojagarrapa Jehová róga. Umi entráda ha umi guárdia koty ojehecháva pe visiónpe, ohechauka porãiterei ko mbaʼe: ¡Upéva ningo arakaʼeve ndoikói vaʼerã kuri! Ñandejára rógape ndaikatúi vaʼekue oike oimeraẽvante, Jehová mandamientokuéra ojerrespeta vaʼerã. Upéicharõ añoite Jehová ovendesíta pe adorasión omeʼẽva chupe ipuévlo.

6, 7. a) ¿Mbaʼéichapa Jehová omeʼẽ peteĩ mensáhe ipuévlope oñeʼẽvo pe murálla oĩvare pe témplo jerére? b) ¿Mbaʼéichapa Jehová puévlo otrata vaʼekue ymave itémplo? (Ehecha nóta).

⁶ Murálla oĩva pe témplo jerére. Péva haʼe vaʼekue ótro detálle ijojahaʼỹva orekóva pe témplo oĩva pe visiónpe. Ezequiel heʼi vaʼekue káda ládo pe murálla omediha 500 takuára, térã ¡1 kilómetro 555 métro! (Ezeq. 42:15-20). Péro pe témplo ha umi korapy kuadrádova omedínte vaʼekue 500 kódo, térã 259 métro káda ládo. Péicha oĩ vaʼekue peteĩ lugár tuicháva éntre pe témplo ha pe murálla okapegua. * ¿Maʼerãpa upéva?

 ⁷ Jehová heʼi: “Anivémakena chetraisiona hikuái, tomomombyry upéva chehegui, ha tomomombyry avei irreikuéra reʼongue, ha péicha aikóta ijapytepekuéra pára siémpre” (Ezeq. 43:9). Umi “irreikuéra reʼongue” oiméne heʼise vaʼekue umi dios fálso oreko vaʼekue hikuái. Upéicharõ Jehová oñeʼẽvo pe lugár tuicháva oĩvare pe témplo jerére, haʼete ku heʼíva hína chupekuéra: “¡Animoʼãkena ni pemoag̃ui cherehe umi mbaʼe kyʼa!”. Haʼekuéra oñehaʼãramo siémpre ipotĩ hag̃ua pe adorasión omeʼẽva, Jehová ovendesíta kuri chupekuéra siémpre oĩvo hendivekuéra.

8, 9. ¿Mbaʼépa oiméne oaprende raʼe pe puévlo Jehová omeʼẽ haguére konsého imbaretéva umi kuimbaʼe orekóvape rresponsavilida?

⁸ Konsého imbaretéva umi kuimbaʼe orekóvape g̃uarã rresponsavilida. Jehová omeʼẽ avei umi konsého imbaretéva umi kuimbaʼe orekóvape tuicha rresponsavilida ipuévlope, péro ojapo upéva mborayhúpe. Por ehémplo, pe puévlo oñepyrũrõ guare oadora umi dios fálsope, haʼe okorrehi mbarete umi levita oñemomombyry vaʼekuépe chugui. Péro oguerohory Sadoc raʼykuérape, umi ‘oñenkarga vaʼekuépe umi tembiapo itemplopeguáre umi israelita oñemomombyrýrõ guare chugui’. Jehová ningo ihústo ha oiporiahuvereko káda grúpope asegún umi mbaʼe ojapo vaʼekue (Ezeq. 44:10, 12-16). Péicha avei oñemoñeʼẽ mbarete porã umi kuimbaʼe omoakãvape Israel (Ezeq. 45:9).

⁹ Jehová ohechauka porã vaʼekue umi kuimbaʼe orekóva autorida ha oporomoakãva, orrenditaha kuénta chupe asegún mbaʼéichapa okumpli irresponsavilida. Haʼekuéra oikotevẽ vaʼekue avei oñeakonseha ha ojekorrehi chupekuéra. Avei haʼekuéra púntape okumpli vaʼerã kuri Jehová mandamientokuéra.

10, 11. ¿Mbaʼérepa ikatu jaʼe umi oĩ vaʼekue prisionéroramo ojapo hague umi mbaʼe oaprendéva Ezequiel visióngui?

¹⁰ ¿Ojapópa rakaʼe umi mbaʼe oaprendéva Ezequiel visióngui umi oĩ vaʼekue prisionéro ha oho jeýva Israélpe? Añetehápe ndajaikuaái mbaʼépa opensa vaʼekue ko visiónre umi kuña ha kuimbaʼe ojeroviáva Ñandejárare. Upéicharõ jepe, la Biblia omombeʼu ñandéve heta mbaʼe ojapo vaʼekue umi prisionéro oho jey vaʼekue hetãme, ha mbaʼéichapa ohecha vaʼekue pe adorasión oñemeʼẽva Jehovápe. ¿Okumplípa raʼe hikuái umi mbaʼe oaprendéva Ezequiel visióngui? Ikatu jaʼe en párte okumpli hague ñambojojátaramo umi ituakuéra ypykue rrevéldevare, umíva hína umi oiko vaʼekue ojegueraha mboyve chupekuéra prisionéroramo Babilóniape.

¹¹ Ñandejára siervokuéra ifiélva apytépe oĩ vaʼekue proféta Ageo, Zacarías, Esdras pe saserdóte ha okopiáva Ñandejára Ñeʼẽ, ha pe governadór Nehemías. Haʼekuéra ombaʼapo jejopy vaʼekue omboʼe hag̃ua umi héntepe Ñandejára mandamientokuéra, por ehémplo umi oñemombeʼúva Ezequiel visiónpe (Esd. 5:1, 2). Haʼekuéra omboʼe vaʼekue pe puévlope pe adorasión oñemeʼẽva Jehovápe oĩ vaʼerãha peteĩ lugár ijyvatévape ha oñemotenonde vaʼerãha opa mbaʼe ári, por ehémplo umi mbaʼe ñandegustávagui ha umi mbaʼerepýgui (Ageo 1:3, 4). Haʼekuéra oñehaʼãmbaite oipytyvõ umi héntepe orrespeta hag̃ua umi mandamiénto heʼíva mbaʼéichapa ojeadora vaʼerã Jehovápe.  Por ehémplo, Esdras ha Nehemías heʼi porã vaʼekue pe puévlope omosẽ vaʼerãha hembirekokuéra extranhérape, umíva ningo mbeguekatúpe omomombyry chupekuéra Ñandejáragui (elee Esdras 10:10, 11; Neh. 13:23-27, 30). ¿Ha mbaʼépa ikatu jaʼe umi dios fálso oadora vaʼekuégui hikuái? Ymave ningo pe puévlo heta vése hoʼa vaʼekue upe pekádope. Péro amalisia osẽ rire hikuái oĩhágui prisionéroramo, hasypeve ombojeguaru chupekuéra umi dios fálso ñemombaʼeguasu. ¿Ha mbaʼépa ikatu jaʼe umi saserdóte, umi kuimbaʼe oporomoakãva térã umi prínsipe rehe? Ohechaukaháicha Ezequiel visión, haʼekuéra oĩ hína umi hénte Jehová oakonseha ha okorrehi vaʼekue apytépe (Neh. 13:22, 28). Ijapytepekuéra oĩ vaʼekue heta iñumíldeva ha oaseptáva pe konsého oñemeʼẽva chupekuéra (Esd. 10:7-9, 12-14; Neh. 9:1-3, 38).

12. ¿Mbaʼéichapa Jehová ovendesi ipuévlope oho jey rire hetãme?

¹² Ojapo haguére hikuái upéicha, Jehová ovendesi ipuévlope. Haʼekuéra ningo oreko kuri peteĩ amista iporãitereíva Jehová ndive, hesãi ha oiko hikuái pyʼaguapýpe hetaiterei tiémpo rire (Esd. 6:19-22; Neh. 8:9-12; 12:27-30, 43). ¿Ha mbaʼérepa? Pórke hasypeve haʼekuéra oñepyrũ okumpli umi mandamiénto ihústova Jehová omeʼẽva ojeadora hag̃ua chupe haʼe oipotaháicha. Pe visión oñeʼẽva pe témplore omboʼéva ningo og̃uahẽ vaʼekue heta ipyʼaporãva korasõme. Upéicharõ, ikatu jaʼe Ezequiel visión oipytyvõ hague umi oĩ vaʼekuépe prisionéro mokõi mbaʼe iñimportantetereívape: 1) Omboʼe chupekuéra mbaʼéichapa okumpli vaʼerã umi mandamiénto heʼíva mbaʼéichapa  ojeadora vaʼerã Jehovápe. 2) Oasegura chupekuéra ojeadora jeytaha Ñandejárape haʼe oipotaháicha, ha okumplíma guive hikuái umi mandamiénto, Jehová ovendesitaha chupekuéra. Péro, ¿oñekumplípa hína ko visión ñane tiémpope?

13, 14. a) ¿Mbaʼérepa ikatu jaʼe Ezequiel visión oñekumpliha avei ñane tiémpope? b) ¿Mbaʼéichapa pe visión ñanepytyvõ koʼág̃arupi mokõi hendáicha? (Ehecha avei pe rrekuádro 13A, “Diferénte témplo, diferénte mbaʼe ñanemboʼéva”).

¹³ ¿Ikatu piko ñaime segúro Ezequiel visión, oñeʼẽva pe témplore, ideprovechoha avei ñandéve koʼág̃arupi? Si. Ñanemanduʼa vaʼerã pe témplo Ezequiel ohecha vaʼekue visiónpe oĩ hague “peteĩ montáña ijyvatetereíva ári”, ha Isaías oprofetisa hague “pe montáña oĩháme Jehová róga”, ‘oñemohenda ha isegúro porãtaha umi montáña ruʼã ári’. Isaías heʼi porã vaʼekue iprofesiakuéra oñekumplitaha “umi ára pahápe” (Ezeq. 40:2; Is. 2:2-4; ehecha avei Miqueas 4:1-4). Koʼã profesía oñeʼẽ hína umi ára paháre, espesífikamente áño 1919 guive, pórke upérõ oñepyrũ jey vaʼekue ojeadora Jehovápe haʼe oipotaháicha ha pe adorasión oñemoĩ peteĩ lugár ijyvatévape, ku oñemoĩramoguáicha peteĩ montáña ijyvatéva ári. *

¹⁴ Upéicharõ, ikatu ñaime segúro pe visión ohecha vaʼekue Ezequiel ideprovechoha avei ñandéve koʼág̃arupi. Ko visión oipytyvõ haguéicha yma umi judíope, ñandéve avei ñanepytyvõ koʼág̃arupi mokõi mbaʼépe: 1) Ohechauka ñandéve mbaʼéichapa ñadefende vaʼerã umi mandamiénto Jehová omeʼẽva ojeadora hag̃ua chupe haʼe oipotaháicha. 2) Haʼe peteĩ garantía ohechaukáva pe adorasión oñemeʼẽva Jehovápe oñemoĩ jeytaha hendaitépe ha haʼe ovendesitaha ipuévlope.

15. ¿Mbaʼe rehepa ñanemanduʼa vaʼerã jahechávo umi detálle orekóva pe visión Ezequiel ohecha vaʼekue?

¹⁵ Jahechamína koʼág̃a unos kuánto detálle orekóva pe visión ohecha vaʼekue Ezequiel. Ñapensamína ñaimeha Ezequiel ndive ha jakorreha hína pe témplo ijojahaʼỹvare haʼe ohecha vaʼekue. Ñanemanduʼa vaʼerã péva ndahaʼeiha hína pe témplo espirituál tuichaitéva, upéva rangue jahechátante mbaʼépa ikatu ñaaprende ha mbaʼéicha ikatu jaipuru umíva ñane adorasiónpe koʼág̃arupi. ¿Mbaʼépa hína umi mbaʼe ikatúva ñaaprende?

16. ¿Mbaʼépa ikatu ñaaprende oñemedi haguére entéro mbaʼe Ezequiel visiónpe? (Ehecha pe taʼanga oĩva iñepyrũme).

¹⁶ ¿Mbaʼérepa hetaite mbaʼe oñemedi? Ezequiel ohecha haguéicha, pe ánhel omimbíva kóvreicha omedi pe témplo, umi murálla, umi entráda, umi guárdia koty, umi korapy ha pe altár. Hetaiterei rupi umi detálle ningo ikatu ñandedesespera jalee jave (Ezeq. 40:1–42:20; 43:13, 14). Upéicharõ jepe, ñapensamíntena umi mbaʼe ikatúvare ñaaprende umi detállegui. Umíva rupive, Jehová ohechauka iñimportanteha imandamientokuéra. Haʼe hína upe omeʼẽva umi mandamiénto, ndahaʼéi hína yvypóra reínte. Umi heʼíva chupekuéra ogustaháichante ikatuha oadora Ñandejárape, tuichaiterei ojavy hína. Avei oñemedi porãvo pe témplo, Jehová oasegura hína katuete ojeadora jeytaha  chupe haʼe oipotaháicha. Oñemedívo entéro mbaʼe hesakuaitépe, ojehechauka hína Ñandejára promésa oñekumplitaha oĩhaichaite. ¡Péicha Ezequiel okonfirma umi ára pahápe katuete ojeadora jeytaha Ñandejárape haʼe oipotaháicha!

17. ¿Mbaʼépa ñanemboʼe koʼág̃arupi pe murálla oĩva pe témplo korapy jerére?

¹⁷ Pe murálla oĩva pe témplo korapy jerére. Jahecháma haguéicha, Ezequiel ohecha kuri visiónpe pe murálla oĩva pe témplo jerére. Upéva ningo omomanduʼa vaʼekue pe puévlope nomongyʼái vaʼerãha Ñandejára róga. Umi mbaʼe kyʼa oúva umi rrelihión fálsagui ni noñemoag̃uíri vaʼerã pe adorasión verdadérare (elee Ezequiel 43:7-9). ¡Ajépa ñande avei ñaikotevẽ upe konsého koʼág̃arupi! Ñandejára puévlo oĩ vaʼekue prisionéro hetaiterei áñore Babilonia Guasu poguýpe, ha osẽ rire upégui, áño 1919-pe Cristo onombra ijesklávo de konfiánsa ha iñarandúvape. Koʼýte upe áño guive, Ñandejára puévlo ombaʼapo jejopy ojei hag̃ua umi enseñánsa ha kostúmbre ivaívagui, umi oúva rrelihión fálsagui ha taʼanga ñemombaʼeguasúgui. Ñande ningo ñañatende porã ani hag̃ua umi mbaʼe kyʼa oñemoag̃ui pe adorasión verdadérare. Avei ñande ndajajapói negósio Salón del Réinope, ha péicha nañambojeheʼái ñane adorasión rehe umi mbaʼe ko mundopegua (Mar. 11:15, 16).

18, 19. a) ¿Mbaʼépa ikatu ñaaprende umi entráda ijyvatetéva Ezequiel ohecha vaʼekuégui? b) ¿Mbaʼépa rejapóta oĩramo nekonvenseséva Jehová mandamientokuéra ipohyietereimaha? Emoĩ peteĩ ehémplo.

¹⁸ Umi entráda ijyvatetereíva. Jahecha jave umi entráda ijyvatetéva Ezequiel ohecha vaʼekue, ¿mbaʼépa ikatu ñaaprende? Upéva oiméne omomanduʼa rakaʼe umi judío oĩvape prisionéroramo ijyvatetereiha Jehová mandamientokuéra oñeʼẽva tekoporã rehe. Ha oiméramo upéicha rakaʼe yma, ¿mbaʼépa ikatu jaʼe ñane tiémpore? Ñande jaadora hína Jehovápe itémplo espirituál tuichaitévape. ¿Ajépa koʼág̃arupi iñimportantetereivéntema ñanderekoporã ha nañanderovamokõi? (Rom. 12:9; 1 Ped. 1:14, 15). Koʼã ára pahápe Jehová ogia ohóvo ipuévlope okumpli hag̃ua hekoitépe imandamientokuéra heʼíva isiervokuéra hekopotĩ vaʼerãha. * Por ehémplo, umi pekadór noñarrepentíriva oñemosẽ kongregasióngui (1 Cor. 5:11-13). Avei umi guárdia koty oĩva umi entrádape, ñanemomanduʼa koʼág̃arupi avave ndaikatuiha oadora Jehovápe, haʼe voi ndoaseptáiramo chupe itémplo espirituálpe. Por ehémplo, peteĩ persóna heʼíva oserviha Ñandejárape ha hembiapo vai oikóvo, ikatu oike peteĩ Salón del Réinope, péro Jehová ndoguerohorymoʼãi chupe ndojapói aja entéro hekópe porã umi mbaʼe haʼe ojeruréva (Sant. 4:8). ¡Ajépa jaguerohoryete mbaʼeichaitépa ojeprotehe pe adorasión oñemeʼẽva Jehovápe ko tiémpo oĩháme hetaiterei hekovaíva!

¹⁹ La Biblia oprofetisa ko múndo ivaivetaha ohóvo hiʼag̃uívo pe fin. Heʼi voi: “Umi hénte aña ha oporombotavýva oho vai vaive vaʼerã, haʼekuéra ningo ombotavýta ótrope ha chupekuéra avei oñembotavýta” (2 Tim. 3:13). Heta hetave persónape oñembotavy opensa hag̃ua Jehová mandamientokuéra ipohyietereimaha, yma guaremaha térã oĩ vaiha. ¿Ha ndévepa nembotavýta avei hikuái? Por ehémplo,  oĩramo nekonvenseséva noĩporãiha Ñandejára heʼíva umi omosexuál rehe, ¿regueroviátapa chupekuéra? ¿Térãpa regueroviáta Jehovápe, heʼíva Iñeʼẽme koʼã hénte ojapoha “umi mbaʼe ñanembojeguarúva”? Ñandejára ningo ñandeavisa naiporãieteha jaasepta pe tekovai (Rom. 1:24-27, 32). Ñambohovái jave umichagua situasión, iporãta ñanemanduʼa pe visión Ezequiel ohecha vaʼekuére ha umi entráda ijyvatetereívare: Tahaʼe haʼéva pe ojapóva Satanás múndo, Jehová nokambiái umi imandamientokuéra oñeʼẽva tekoporã rehe. ¿Ñandépa ñaime de akuérdo ñande Ru yvagapeguándi ha ñadefende pe oĩ porãva?

20. ¿Mbaʼéichapa Ezequiel visión omokyreʼỹ umi oĩvape pe ‘aty guasúpe’?

²⁰ Umi korapy. Ezequiel ohechárõ guare pe témplo orekoha peteĩ korapy guasu, oiméne ikyreʼỹeterei rakaʼe opensávo oñembyatytaha upépe hetaiterei oadoráva Jehovápe. Koʼág̃arupi, ñande kristianokuéra jaadora Ñandejárape peteĩ témplo isagradovévape. Umi oĩva pe ‘aty guasúpe’, oservíva hína Jehová témplo espirituál korapy okapeguápe, ikyreʼỹeterei ojepyʼamongetávo Ezequiel visión rehe (Apoc. 7:9, 10, 14, 15). Ezequiel ohecha vaʼekue umi korapýpe oĩha umi komedór, upépe umi oadoráva Ñandejárape ikatu vaʼekue oho hoʼu umi ofrénda de paz oguerúva (Ezeq. 40:17). Péicha haʼekuéra haʼete vaʼekue okarúva Jehovándi, ha ohechauka oĩha pyʼaguapýpe Ñandejárandi ha orekoha chupe iñamígoramo. Koʼág̃arupi ñande ndajajapovéima sakrifísio ojapo haguéicha umi judío oĩ vaʼekue Moisés léi poguýpe. Upéva rangue, ñande ñameʼẽ sakrifísio ‘ombotuicháva Ñandejárape’ ñakomenta jave rreunionhápe térã japredika  jave (Heb. 13:15). Jehová omeʼẽ avei ñandéve entéro mbaʼe ñaikotevẽva ñamombarete hag̃ua ñande jerovia. Ikatu voi jaʼe ñañeñanduha Coré raʼykuéra oñeñandu haguéicha opurahéirõ guare Jehovápe: “Che avyʼave un diami jepe aiméramo nde róga korapýpe, aiko rangue 1.000 día ótro lugárpe” (Sal. 84:10).

21. ¿Mbaʼépa umi unhído ikatu oaprende umi saserdóte Ezequiel ohecha vaʼekuégui visiónpe?

²¹ Umi saserdóte. Ezequiel ohecha vaʼekue umi saserdóte ha levita oikeha pe entráda ijyvatetévarupi ohasa hag̃ua pe korapy hyepypeguápe, ojapoháicha avei umi trívu ndahaʼéiva saserdóte oike hag̃ua pe korapy okapeguápe. Upéicha oñemomanduʼa umi saserdótepe haʼekuéra okumpli vaʼerãha avei Jehová mandamientokuéra heʼíva mbaʼéichapa ojeadora vaʼerã chupe. ¿Ha mbaʼépa ikatu jaʼe ñane tiémpore? Koʼág̃arupi ndaiporivéima Ñandejára siérvo orresivíva pe saserdósio erénsiaramo oservi hag̃ua avei saserdóteramo, péro oĩ umi kristiáno unhído, haʼekuéra hína “peteĩ trívu ojeporavo pyre, peteĩ grúpo de rréi haʼéva saserdóte” (1 Ped. 2:9). Yma umi saserdóte oĩva Israélpe oadora vaʼekue Ñandejárape peteĩ korapy apartetépe. Koʼág̃arupi, umi unhído ndoadorái Ñandejárape apárte umi ótro kristiánogui, péro haʼekuéra oreko peteĩ amista ijojahaʼỹva Jehovándi, pórke haʼe oadoptáma chupekuéra itaʼýraramo (Gál. 4:4-6). Umi unhídope ideprovécho avei umi mbaʼe omboʼéva pe visión ohecha vaʼekue Ezequiel. Por ehémplo, umi unhído ohechakuaa oikotevẽha oñeakonseha ha ojekorrehi chupekuéra, oiko haguéicha umi saserdóte yma guarére. Iporãta ningo enterove kristiáno ñanemanduʼáramo ñaimeha ‘peteĩ ovecha atýpente’, ha oñangarekoha ñanderehe “peteĩ pastór” añónte (elee Juan 10:16).

22, 23. a) ¿Mbaʼépa ikatu oaprende umi ansianokuéra koʼag̃agua umi kuimbaʼe oporomoakãvagui Ezequiel ohecha vaʼekue visiónpe? b) ¿Mbaʼépa ikatu oiko amo gotyove?

²² Umi kuimbaʼe oporomoakãva. Ezequiel visiónpe pe kuimbaʼe oporomoakãva haʼe vaʼekue peteĩ persóna iñimportánteva. Haʼe noĩri vaʼekue umi saserdóte trívupe, péro pe témplope haʼe okumpli vaʼerã umi saserdóte heʼíva. Upéicharõ jepe, haʼe omoakã vaʼekue umi héntepe ha oipytyvõ chupekuéra omeʼẽ hag̃ua umi sakrifísio (Ezeq. 44:2, 3; 45:16, 17; 46:2). Upéicha rupi, pe kuimbaʼe oporomoakãva haʼe peteĩ ehémplo umi kristiáno orekóvape g̃uarã rresponsavilida kongregasiónpe ko tiémpope. Jaikuaa ningo umi ansiáno ha avei umi superintendénte de sirkuíto oñemoĩ vaʼerãha pe esklávo de konfiánsa poguýpe (Heb. 13:17). Umi ansianokuéra ningo ombaʼapo jejopy oipytyvõ hag̃ua Ñandejára puévlope, omeʼẽ hag̃ua sakrifísio omombaʼeguasúva Ñandejárape umi rreunionhápe ha predikasiónpe (Efes. 4:11, 12). Umi ansiáno ohechakuaa vaʼerã avei mbaʼéichapa Jehová okorrehi vaʼekue umi kuimbaʼe oporomoakãvape oipuru vai haguére ipodér (Ezeq. 45:9). Upéicha avei, umi ansiáno nopensái vaʼerã haʼekuéra noikotevẽiha ojekorrehi ha oñemeʼẽ chupekuéra konsého. Upéva rangue, haʼekuéra ovyʼaiterei Jehová omboʼe jave chupekuéra ikatu hag̃uáicha oservi porãve pastór ha superintendénteramo (elee 1 Pedro 5:1-3).

 ²³ Jehová ningo osegíta omeʼẽ ñandéve umi superintendénte ikatupyrýva ha oporohayhúva pe Paraíso jarekótavape ko yvy ápe ári. Koʼág̃arupi oñembokatupyry hína umi ansiánope oiko hag̃ua chuguikuéra pastór ikatupyrýva ha imbaʼeporãva. Ha hetápe umíva apytégui ikatu hína avei ojepuru pe Paraísope (Sal. 45:16). ¡Ajépa javyʼaite ñapensávo koʼã ermáno haʼetaha peteĩ vendisión pe múndo pyahúpe! Umi mbaʼe ñantendéva Ezequiel visióngui hesakãvéta ohóvo ñandéve Jehová ohecha vove og̃uahẽmaha itiémpo, oikoháicha umi ótro profesía oñeʼẽvare mbaʼéichapa ojeadora jeýta Jehovápe haʼe oipotaháicha. Ikatu hína heta mbaʼe oĩva Ezequiel visiónpe oñekumpli amo gotyove, ha koʼág̃a ni nañaimoʼãi ikatuha oiko upéicha. Jahecháta mbaʼépa oiko ág̃a amo gotyove.

24, 25. ¿Mbaʼéichapa Ezequiel visión ohechauka umi vendisión ohupytýtava Jehová puévlo okumpli aja umi mandamiénto heʼíva mbaʼéichapa ojeadora vaʼerã chupe?

²⁴ Ñamohuʼã hag̃ua, jahechami jey peteĩ mbaʼe guasu oiko vaʼekue Ezequiel visiónpe. Upépe ojehecha Jehová voi ou hague pe témplope ha opromete ipuévlope haʼe opytataha hendivekuéra, okumpli aja entéro hikuái umi mandamiénto heʼíva mbaʼéichapa ojeadora vaʼerã chupe (Ezeq. 43:4-9). ¿Mbaʼéichapa Jehová presénsia ovenefisiáta ipuévlope ha ijyvykuérape?

²⁵ Pe visiónpe oĩ mokõi mbaʼe ohechaukáva umi vendisión ojehupytýtava: 1) Peteĩ rrío osyrýva pe témplogui, oporomoingove ha omboprodusi porãva pe yvy, ha 2) pe yvy ojedividíva hendaitépe ha medidaitére, ha pe témplo ha pe lugár nandi oĩva ijerére katu oĩ pe Tiérra Prometída mbytetépe. ¿Mbaʼéichapa ñantende vaʼerã koʼã mbaʼe ñane tiémpope? Ñande ningo jaiko hína pe tiémpo Jehová oumahápe omopotĩ ha oasepta peteĩ adorasión isagradovéva: Pe témplo espirituál tuichaitéva (Mal. 3:1-4). Jahecháta umi mokõi mbaʼe ko lívrope, kapítulo 19 guive 21 peve.