1, 2. (a) Vyuma muka twalinangulanga kuchakumwenesa chatembele vamwenesele Ezekele mukapetulu nafumuho? (b) Vihula muka vivali natushimutwilaho mukapetulu uno?

MUKAPETULU nafumuho twalinangulanga ngwetu Ezekele kavamumwenesele tembele yayinene yakushipilitu yize ahanjikile kaposetolo Pauluko. Twalinangulanga nawa nge chize chakumwenesa kana chakafwile vatu jaKalunga vatachikize jindongi jajilemu vatela kukavangiza mukulemesa chamuchano. Kukavangiza jindongi kana chavakafwile vapwenga cheka nausoko wamwaza naYehova. Echi chikiko chalingishile Yehova ahanjike mazu wowamwe mapapa kavali muvesi yoyimwe ngwenyi: “Elu lukiko lushimbi lwatembele.”—Tangenu Ezekele 43:12.

² Tushimutwilenu havihula vino vivali. Chatete: Vyuma muka valinangwile vaYuleya kuchakumwenesa chatembele vamwenesele Ezekele kutalisa kujindongi ahakako Yehova mukulemesa chamuchano? Kukumbulula chihula kana nachitukafwa twijive mwakukumbulwila chihula chamuchivali chakwamba ngwavo: Vyuma muka natulinangula kuchakumwenesa kana mumakumbi ano akukuminyina?

3. Uno chakumwenesa chize chasolwele pili yayisuku chikuma chalingishile ngachilihi vatu vevwenga sonyi?

³ Tukekesenu havyuma vimwe vyapwile muchakumwenesa chatembele mangana chitukafwe kukumbulula chihula chatete. Pili yayisuku chikuma. Pamo vatu vafwanyishile chakumwenesa chaEzekele kuupolofweto waIsaya uze wahanjika vyakukindulwisa kulemesa chamuchano. (Isa. 2:2) Chuma muka valinangwile hakumona zuvo yaYehova yili hapili yayisuku chikuma? Valinangwile nge kulemesa chamuchano vatelelele kuchimona kupwa chachilemu chikuma mukuyoya chavo kuhambakana vyuma vyeka vyosena. Twatachikiza ngwetu kulemesa chamuchano vachizezula helu, mwomwo vachiwahisa kuli uze “azezuka chikuma helu kuhambakana tulunga veka vosena.” (Samu 97:9) Oloze vatu kavapwile nakumona kulemesa chamuchano kupwa chachilemuko. Hamyaka yayivulu, vatu kavakundwijilenga kulemesa chamuchanoko, oloze vachipihishilenga. Jino hakumona zuvo yajila yaKalunga vanayizezula helu, chalingishile vatu vamichima yamwaza vevwanga sonyi.

4, 5. Chuma muka valinangwile vatu kuchakumwenesa chatembele yize yapwile navikolo vyavisuku chikuma?

⁴ Vikolo vyavisuku chikuma. Muchakumwenesa kana, Ezekele apwile nakutala omu kangelo apwile nakupima vikolo. Vize vikolo apwile nakupima vyapwile jimita 30 muusuku. (Ezeke. 40:14) Kuvikolo vyakwingilila kwapwile tuzuvo twavaka-kulama. Uno vyuma kanevi vyanangwile vyuma muka vatu vaze valinagwile jila yakutungilamo eyi tembele? Yehova alwezele Ezekele ngwenyi: “Nyingilila kuwingililo watembele.” Mwomwo ika? Mwomwo vatu vapwile nakwingisa vatu “vakuzeneka kujihana kumichima nakumijimba” muzuvo yajila yakulemesela Kalunga. Vyuma muka vyasolokele? Yehova ambile ngwenyi: “Vali nakujilulula tembele yami.”—Ezeke. 44:5, 7.

⁵ Vatu vaze vapwile “vakuzeneka kujihana . . . kumijimba” kavakavangijile lushimbi avahanyine Kalunga luze lwaputukile mumakumbi aApalahamako. (Kupu. 17:9, 10; Levi 12:1-3) Oloze vatu vaze vapwile “vakuzeneka kujihana kumichima” vakiko vapwile naukalu waunene chikuma. Vakakamishile michima yavo, nakukana kukavangiza jindongi avahanyine Yehova. Vatu kana kavatelelele kuvetavisa kwingila muzuvo yajila yakulemesela Yehovako. Yehova ahunga vaka-kulyonga, oloze vatu jenyi vetavishile vaka-kulyonga vatwaleho lika kwizanga muzuvo yenyi. Vikolo natuzuvo twavaka-kulama vize vyapwile muchakumwenesa vyavanangwile nge kavatelelele kwitavisa vatu kanako. Jindongi jize vahakileko hakwingila muzuvo yaKalunga vatelelele kujikavangiza. Yehova akiswilenga vatu vaze vakavangijile jindongi kana hakumulemesa.

6, 7. (a) Uno Yehova apwile nakunangula vatu jenyi chuma muka omu alwezele Ezekele avalwekese chipato chize chajingilikile tembele? (b) Vatu jaYehova valaminenga ngachilihi tembele hakavanga? (Talenu kwinyikila chamwishi.)

⁶ Chipato chachinene. Chuma chikwavo chachilemu chapwile muze muchakumwenesa shina chipato chize chajingilikile chihela chosena. Ezekele ahanjikile ngwenyi uze kangelo apimine mahongo 500, chipwe ngwetu jimita 1, 555, kafwe jikilomita 1.6  kufuma hambango yimwe nakuheta hambango yikwavo. (Ezeke. 42:15-20) Oloze chihela vatungililileho jizuvo jatembele navipango chesekele hamwe mujimbango josena jiwana, chapwile najikuvite 500 chipwe ngwetu jimita 259 kusali nasali. Shikaho kufuma kuchipango chamukachi muze mwapwile tembele nakuheta kuchipango chakuweluka mwapwile chihela chachinene. * Uno chihela kana chapwile chaka?

⁷ Yehova ambile ngwenyi: “Valitwamine jino ujila wavo wakushipilitu nakwecha kulemesa tuponya vaze vanamononga kupwa vamyangana javo. Nge navalinga ngocho, kaha nangutwama muli vakiko haya myaka yosena.” (Ezeke. 43:9) Shikaho Yehova amwenesele Ezekele chize chihela chachinene muchakumwenesa kwijiva nge apwile nakulweza vatu jenyi ngwenyi: “Mbilenu vyuma vyosena evi vyaunyengwe kwakusuku.” Ngocho Yehova akiswilenga kaha vatu jenyi vaze valaminenga kulemesa chamuchano kupwa chitoma.

8, 9. Vyuma muka vatu vatelelele kulinangula kuli Yehova hakuhuhumuna malunga vaze vatwaminyinyinenga vatu jenyi?

⁸ Kuhuhumuna malunga vaze vapwile nakutwaminyina. Yehova ahuhumwine nawa malunga vaze vapwile nakuzata mulimo waulemu wakutwaminyina vatu jenyi. Ahuhumwine vaLevi vaze vechelelele vatu vaputuke kulemesa tuponya, oloze asangejekele vana vamalunga vaZatoke “vaze vazachilenga milimo hachihela [chenyi] chajila omu vaIsalele vahandukile kuli [ikiye].” Shikaho, vatu jenyi avahuhumwine mwachiyulo nakutetela kweseka navilinga vyavo. (Ezeke. 44:10, 12-16) Oloze vamyata javaIsalele vakiko ahuhumwine chikuma.—Ezeke. 45:9.

⁹ Echi chasolola hatoma nge, Yehova ahulishilenga vakulwane vaze vapwilenga nakutwaminyina vatu jenyi mangana vamulweze omwo vazachilenga milimo avahanyinenga. Navakiko vatelelele kuvahanjikila, nakuvahuhumuna nakuvolola. Kaha nawa vatelelele kuhana chakutalilaho chamwaza hakukavangiza jindongi jaYehova.

10, 11. Unjiho muka wasolola nge vatu vamwe vaze vafumine muufunge vakavangijile vyuma valinangwile kuchakumwenesa chaEzekele?

¹⁰ Uno vatu vaze vafumine muufunge vakavangijile vyuma valinangwile kuchakumwenesa chaEzekele tahi? Katwatachikiza kanawa vyuma vapwile nakushinganyeka malunga namapwevo vakushishika hachakumwenesa kanako. Chipwe ngocho, Mazu aKalunga atulweza vyuma valingile vatu vaze vafumine muufunge nomu vakundwijile kulemesa chamuchano. Kutala vakavangijile jindongi japwile muchakumwenesa vamwenesele Ezekele tahi? Eyo, vajikavangijile kuhambakana muze valingile vakakuluka javo shimbu kanda vavatwale muufunge muMbavilone.

¹¹ Malunga vakushishika vakufwana nge kapolofweto Hangai, naZekaliya, nakapilishitu Ezela uze nawa apwile muka-kusoneka, nanguvulu Nehemiya vazachile nangolo hakunangula vatu jindongi, ngana jize japwile muchakumwenesa chatembele vamwenesele Ezekele. (Ezela 5:1, 2) Vanangwilenga vatu vamone kulemesa chamuchano kupwa chachilemu chikuma kuhambakana  luheto navyuma vyeka vyamukuyoya vafwililile. (Hangai 1:3, 4) Vanangwilenga nawa vatu vavumbikenga jindongi jamukulemesa chamuchano. Chakutalilaho, Ezela naNehemiya valwezele vaYuleya vahange mapwevo vakumafuchi eka vaze vambachile vaze vazeyeselenga vatu vavavulu kushipilitu. (Tangenu Ezela 10:10, 11; Nehe. 13:23-27, 30) Nyi ngachilihi tuponya? Chasoloka nge omu vatu jaKalunga vafumine muufunge, vahungile kulemesa tuponya mwomwo chikiko chavahungumwishilenga chikuma kufuma vene kunyima. Vyuma muka vyasolokele kuvapilishitu, navamyata chipwe ngwetu vilolo? Navakiko vavahuhumwine kuli Yehova ngana muze chakumwenesa chaEzekele chasolwele. (Nehe. 13:22, 28) Kaha vavavulu vakavangijile mazu vavahuhumwine.—Ezela 10:7-9, 12-14; Nehe. 9:1-3, 38.

12. Yehova akiswile ngachili vatu jenyi vaze vafumine muufunge?

¹² Yehova akiswile vatu jenyi hakukavangiza jindongi avahanyine. Vatu jino vapwile nausoko wakukola naYehova, nakupwa vakulikangula nakulinunga. (Ezela 6:19-22; Nehe. 8:9-12; 12:27-30, 43) Mwomwo ika? Mwomwo vatu vapwile jino nakukavangiza jindongi jaYehova jakwoloka jize jasakiwa mukulemesa chamuchano. Chize chakumwenesa chatembele chakafwile vatu vamichima yamwaza vavavulu. Tunahase kukukulula ngwetu, chakumwenesa kana chakafwile vafunge mujijila jivali jajilemu. (1) Chavakafwile vatachikize jindongi jasakiwa mukulemesa chamuchano, nomu vatelelele kujikavangijilamo. (2) Chavakafwile vatachikize nawa ngwavo chapwile chaupolofweto. Chakumwenesa kana chahanjikile vyakukindulwisa kulemesa chamuchano,  nomu Yehova mwakakisula vatu jenyi kachi nge navakakundwizanga kulemesa chamuchano. Oloze nayetu tuli nakufwila kutachikiza numba nge chakumwenesa kana chili nakutesamo namakumbi ano.

13, 14. (a) Twatachikiza ngachilihi ngwetu chakumwenesa chatembele vamwenesele Ezekele chili nakutesamo nama kumbi ano? (b) Mujijila muka jivali tweji kunganyalilangamo kuchakumwenesa kana? (Talenu nawa lipwata 13A, lyakwamba ngwavo “JiTembele Jakulihandununa naVishina Natulinangulako.”)

¹³ Kutala tunahase kwitavila ngwetu chakumwenesa chatembele vamwenesele Ezekele chikwechi ulumbunwiso nakuli yetu makumbi ano tahi? Eyo. Chakumwenesa chaEzekele chasolwele nge zuvo yajila yaKalunga yapwile ‘hapili yayisuku chikuma.’ Mazu kana alifwana nawaze apolofwetele Isaya ngwenyi, “pili yazuvo yaYehova nayikazama mbe helu lyajipili jikwavo.” Isaya ahanjikile ngwenyi upolofweto wenyi naukatesamo “hamakumbi akukuminyina.” (Ezeke. 40:2; Isa. 2:2-4; talenu nawa Mika 4:1-4.) Ou upolofweto wosena uvali unakutesamo mumakumbi ano akukuminyina. Kuputuka mu 1919, kulemesa chamuchano vachizezwile helu, nakuchikindulwisa kwijiva nge vanachihake hapili yayisuku chikuma. *

¹⁴ Echi chasolola hatoma nge chakumwenesa vamwenesele Ezekele chikwechi ulumbunwiso kutalisa kukulemesa chamuchano makumbi ano. Shikaho ngana muze vafunge vavaYuleya kushikulu vanganyalile kuchakumwenesa kana, nayetu makumbi ano tweji kunganyalanga kuchakumwenesa kana mujijila jivali. (1) Chatunangula omu tunahase kukavangiza jindongi jaYehova mukulemesa chamuchano. (2) Chatunangula upolofweto uze wahanjika vyakukindulwisa kulemesa chamuchano navyuma vyamwaza mwakatulingila Yehova.

15. Chuma muka twatela kwanuka omu natulinangula vishina vimwe kuchakumwenesa chatembele vamwenesele Ezekele?

¹⁵ Tushimutwilenu jino havyuma vimwe amwene Ezekele muchakumwenesa. Achishinganyekenu tuli hamwe naEzekele omu vali nakumumwenesa chakumwenesa chakukomwesa chatembele. Anukenu ngwenu muchakumwenesa kana katweshi nakushimutwila hatembele yayinene yakushipilituko, oloze tuli nakusaka kuwana vishina vize twatela kuzachisa mukulemesa chamuchano makumbi ano. Vishina vimwe muka tunahase kulinangulako?

16. Vyuma muka natulinangula hakumona omu tembele vayipimine munona munona? (Talenu muvwimbimbi wakulivanga.)

¹⁶ Mwomwo ika yize tembele vayipiminyinyine? Ezekele amwene kangelo uze apwile nakusoloka nge unengu mwapima tembele, najimbango, navikolo, natuzuvo twavaka-kulama, navipango nalijiko lyakulumbila. Mujila vapiminyinyinemo vyuma kana yinahase kukomwesa mutu uze mwatanga mujimbu kana. (Ezeke. 40:1–42:20; 43:13, 14) Shinganyekenu vishina vyavilemu natulinangula kumujimbu kana. Ou mujimbu wasolola omu Yehova amona kulema chajishimbi jenyi jize ahakako. Ikiye ahakako jishimbi keshi vatuko. Vatu vamwe veji kushinganyekanga mwakuhenga hakwamba ngwavo vanahase kulemesa Kalunga mukala  jila. Kaha nawa hakupima tembele kana munona munona, chasolwele nge Yehova afwelelesele vatu jenyi ngwenyi mwakakindulwisa kulemesa chamuchano. Ngana muze yize tembele vayipimine munona munona, mukiko jeji kutesangamo najishiko jaKalunga josena. Shikaho Ezekele afwelelele chikupu ngwenyi kulemesa chamuchano navakachikindulwisa mumakumbi akukuminyina.

17. Uno chize chihela chatembele chosena vajingilikile muchipato chatwanukisa yika makumbi ano?

¹⁷ Chipato chachinene. Ngana muze tunashimutwila, Ezekele amwene chihela chatembele chosena vanachijingilika muchipato. Chuma kana chanukishile vatu jaKalunga nge vatelelele kulihenda kuvyuma vyavipi vyosena, mangana vahone kupihisa zuvo yaKalunga. (Tangenu Ezekele 43:7-9.) Nayetu makumbi ano twatela kukavangiza mazu kana awa akuhuhumuna. Vatu jaKalunga vavasokwele muufunge wakushipilitu muMbavilone Yayinene muze vatwamine myaka yayivulu. Kufumaho Kulishitu atongwele ndungo wakushishika wakuzangama mu 1919. Kufuma vene haze vatu jaKalunga vanazatenga nangolo hakulihenda kukunangula chamakuli navilinga vyakundwiza kulemesa tuponya. Shikaho katweshi kufutula vyuma vyaunyengwe hamwe nakulemesa chamuchanoko. Kaha nawa katweshi kusekasanyina haZuvo yaWanganako.—Mako 11:15, 16.

18, 19. (a) Vyuma muka natulinangula kuvikolo vyavisuku vize vyapwile kutembele vamwenesele Ezekele? (b) Twatela kulinga ngachilihi nge vatu navalelesa jishimbi jaYehova jakwoloka? Hanenu chakutalilaho.

¹⁸ Vikolo vyavisuku. Vyuma muka natulinangula hakushinganyeka havikolo vyavisuku vize amwene Ezekele? Chize chakumwenesa chatembele chanangwile vafunge vavaYuleya vatachikize ngwavo jindongi jaYehova japwa jakwoloka. Hakuwana nge halwola kana jishimbi jaYehova vajimwene kupwa jajilemu, shikaho namakumbi ano twatela kujimona kupwa jajilemu. Tweji kulemesanga Yehova mutembele yenyi yayinene yakushipilitu. Shikaho twatela kupwa natwamiso yamwaza kuhambakana namuze chapwile kuli vaYuleya kunyima. (Loma 12:9; Petu. 1, 1:14, 15) Mumakumbi ano akukuminyina, Yehova chatwalaho lika kuhana vangamba jenyi jindongi jakuvakafwa vapwenga navilinga vyamwaza. * Chakutalilaho, vatu vaze kaveshi kupihilila nakwalumukako, vatela kuvafumisa muchikungulwilo. (Koli. 1, 5:11-13) Kaha nawa tuze tujizuvo twavaka-kulama tuze twapwililile kuvikolo, tweji kutwanukisanga nge, makumbi ano vatu vosena vaze Kalunga keshi kwivwila uselewako kaveshi kuvetavisa kwingila mutembele yenyi yakushipilituko. Chakutalilaho, mutu uze anakulemesa Kalunga oku anakulinga vyuma vyavipi nahase kuya kuZuvo yaWangana, oloze Yehova keshi kumwivwila kuwahako kuvanga kaha nge mwapihilila nakwalumuka. (Yako. 4:8) Chikupu vene jindongi kana jinakulingisa kwitava chamuchano vahone kuchipihisa mukaye kano kakuhuka.

¹⁹ Mbimbiliya yahanjikile chimweza ngwayo kano kaye nakakapihya chikuma shimbu kanda kukuma chizenga. Yamba ngwayo: “Vatu vakuhuka navaka-kuhungumwisa vakwavo navayanga nakupihilako lika, navahungumwisanga vakwavo, kaha navakiko  nawa navavahungumwisa.” (Chimo. 2, 3:13) Vatu vavavulu makumbi ano, vali nakuvahungumwisa vashinganyeke ngwavo jishimbi jaYehova japwa jajikalu chikuma, kaha nawa jaseka lyehi chipwe ngwavo japwa jakuhenga. Uno nayenu navamihungumwisa tahi? Chakutalilaho, kachi nge mutu umwe mwamilweza ngwenyi jishimbi jaKalunga jahanjika mwakuhenga hakwamba ngwajo vatu vausonyi woumwe kavatela kulisavalako, kutala namumwitavila tahi? Kutala namwitavila Mazu aKalunga aze ahanjika ngwawo vatu vaze veji kulinganga vyuma kana veji kulinganga “vyuma vyaunyengwe” tahi? Kalunga atuhuhumuna tulihende kuvilinga vyavipi. (Loma 1:24-27, 32) Kachi nge tunalitalasana naukalu kanou, kaha nachipwa chamwaza kushinganyeka hachakumwenesa chatembele vamwenesele Ezekele. Chakumwenesa kana chasolwele vikolo vyavisuku vize vyatwanukisa nge, Yehova keshi kulelesa jishimbi jenyi jakwolokako numba tuhu vakwetu navatushinjila tuhokole jishimbi jenyi mukaye kano kakuhuka. Kutala tweji kwitavilanga mazu aSetu wamwilu nakukavangiza jishimbi jenyi jakwoloka tahi?

20. Uno vatu vaze vatwama mulizavu ‘lyaliyongomena lyalinene’ veji kunganyalanga ngachilihi hakushinganyeka hachakumwenesa vamwenesele Ezekele?

²⁰ Vipango. Omu Ezekele amwene kutohwa chachipango chahaweluka watembele, atela alikomokelele nakushinganyeka ngwenyi vatu vavavulu navakeza nakulemeselangamo Yehova nakuwahilila. Makumbi ano, vaka-Kulishitu veji kulemeselanga Kalunga muchihela chajila chikuma. Vaze vatwama mulizavu ‘lyaliyongomena lyalinene,’ veji kulemeselanga muchipango chatembele yaYehova yakushipilitu. Veji kunganyalanga hakushinganyeka chakumwenesa chatembele vamwenesele Ezekele. (Kuso.  7:9, 10, 14, 15) Ezekele amwene vipango muli tupete twakulila vyakulya, muze vaka-kulemesa Kalunga vahanyinenga mawana akusolola kuunda. (Ezeke. 40:17) Echi chapwile nakulumbununa nge vapwile nakulila hamwe vyakulya naYehova Kalunga, chinjikizo chakusolola usepa wamwaza vapwile nawo naKalunga. Makumbi ano, katwahana vimuna vakuvatula ngana muze valingilenga vaYuleya kweseka naJishimbi jaMoseko. Oloze tweji ‘kuhananga Kalunga chimuna wakuvatula wakumwalisa’ omu tweji kukumbululanga hakukunguluka, nakwazana mumulimo wakwambulula. (Hepe. 13:15) Kaha nawa tweji kunganyalanga kukulya chakushipilitu chize eji kutuhanga Yehova. Shikaho, tweji kwivwanga ngana muze vevwile vana vaKola vaze vembile nakwalisa Yehova ngwavo: “Kutwama muvipango vyove likumbi limwe chinawahe kuhambakana kutwama makumbi 1,000 kweka.”—Samu 84:10.

21. Chishina muka vanahase kulinangula vaka-Kulishitu vawavisa kuli vapilishitu vavuluka muchakumwenesa vamwenesele Ezekele?

²¹ Vapilishitu. Ezekele amwene vikolo vize vazachishilenga vapilishitu navaLevi hakwingila mukachi kachipango. Vikolo kana vyalifwana navize vazachishilenga vaze kavapwile vakutanga yavapilishituko. Echi chanukishile malunga vaze vazachilenga mulimo waupilishitu nge navakiko vatelelele kukavangiza jindongi jaYehova jize jasakiwa mukulemesa chamuchano. Makumbi ano kakwatwama vangamba jaKalunga vaze veji kuzatanga mulimo waupilishituko, oloze vaka-Kulishitu vawavisa vavalweza ngwavo: “Enu munapu ‘muvatu vasakula, muvapilishitu vawangana.’” (Petu. 1, 2:9) Vapilishitu vamuIsalele yakushikulu valemeselelenga Yehova muchipango chauka wavo. Oloze makumbi ano, vaka-Kulishitu vawavisa kavalihandununa navakwavo vaka-Kulishituko, oloze vatwama nausoko wakulipwila naYehova hakupwa vana venyi asakula. (Ngale. 4:4-6) Vaka-Kulishitu vawavisa navakiko vanahase kulinangulako vyuma vimwe kuchakumwenesa chaEzekele. Vatachikiza ngwavo vapilishitu navakiko vavahuhumwinenga nakuvazangamisa. Shikaho vaka-Kulishitu vosena vatela kutachikiza ngwavo, twapwa “utanga umwe” uze weji kuzachilanga “kafunga umwe.”—Tangenu Yowano 10:16.

22, 23. (a) Chishina muka navalinangula vakulwane muvikungulwilo kuli mwata wavaIsalele uze vavuluka muchakumwenesa chaEzekele? (b) Vyuma muka navikasoloka kulutwe?

²² Mwata wavaIsalele. Muchakumwenesa vamwenesele Ezekele, mwata ikiye azachilenga mulimo waulemu. Ou mwata kapwile wamutanga yavapilishituko, kaha nawa evwilililenga kujindongi vavahanyinenga kuli vapilishitu mutembele. Chipwe ngocho, azachilenga mulimo waunene wakutwaminyina vatu jaKalunga nakuwahisa wana uze vahanyinenga. (Ezeke. 44:2, 3; 45:16, 17; 46:2) Ou mwata ahana chakutalilaho chamwaza kuli malunga vaka-Kulishitu vaze vali nakutwaminyina chikungulwilo. Vakulwane muvikungulwilo, natulama vakutambwojoka vatela kuliluulanga kuli ndungo wakushishika. (Hepe. 13:17) Vakulwane veji kuzatanga nangolo hakukafwa vatu jaKalunga mangana vahanenga wana wakuvatula wakwalisa hakukunguluka chavaka-Kulishitu namumulimo wakwambulula. (Efwe. 4:11, 12) Vakulwane nawa vatela kwanuka mazu aze Yehova ahuhumwine vamyata  javaIsalele omu vazachishilenga ngolo javo mujila yakuhenga. (Ezeke. 45:9) Vatela kutachikiza ngwavo navakiko vanahase kuvahuhumuna nakuvolola nge vanalimbenje. Muchishishisa chakuhomba, veji kwitavilanga Yehova avatomese mangana vazate kanawa mulimo wavo waufunga.—Tangenu WaPetulu 1, 5:1-3.

²³ Yehova mwatwalaho lika kuhananga vatu jenyi tulama vamwenemwene namuPalachise yahamavu yili nakwiza. Vakulwane vavavulu vali nakuvanangula mangana vakapwe tufunga vamwenemwene muPalachise. (Samu 45:16) Shikaho nachipwa chamwaza kushinganyeka omu malunga kana navakatukafwa mukaye kakahya. Natukevwishisa kanawa mwalumbunukila chakumwenesa vamwenesele Ezekele, naupolofweto weka wahanjika vyakukindulwisa kulemesa chamuchano halwola atongola Yehova. Pamo upolofweto umwe katweshi kuwivwishisa oholyapwako, oloze natukawivwishisa omu naukatesamo kulutwe.

24, 25. Chakumwenesa vamwenesele Ezekele chasolwele ngachilihi omu Yehova mwakakisula vatu jenyi omu navakakavangiza jindongi jasakiwa mukulemesa chamuchano?

²⁴ Tukukululenu jino hakushimutwila hachuma chachilemu chize chasolokele muchakumwenesa chaEzekele. Yehova engilile muli yize tembele vasolwele muchakumwenesa, kaha ashikile vatu jenyi ngwenyi mwapwanga lika muze mutembele kachi nge navakavangizanga jindongi jenyi jize jasakiwa mukulemesa chamuchano. (Ezeke. 43:4-9) Uno vyuma muka navisoloka omu Yehova mwapwa hamwe navatu jenyi hali chize chihela?

²⁵ Chize chakumwenesa chavulukile upolofweto uvali uze wasolwele omu Yehova avakiswile: (1) Kwapwile kalwiji uze afuminyinyine muchihela chajila, uze anehele kuyoya nakunganyalisa vyuma vyakuyoya vyosena; (2) lifuchi valipulile muvihanda mujila yakulonga, kaha tembele nachihela chayo vyapwile hakachi kalifuchi. Uno twatachikiza omu walumbunukila upolofweto kana makumbi ano tahi? Makumbi ano, twatachikiza ngwetu tuli nakuyoyela mulwola luze Yehova engila lyehi mutembele yenyi yayinene yakushipilitu, nakuyitomesa, nakwitavila jila vali nakumulemeselamo vatu jenyi. (Mala. 3:1-4) Shikaho muKapetulu 19 nakuheta muKapetulu 21, natukashimutwila haupolofweto kanou uvali.