1, 2. (a) Sifundeni ngombono kaHezekheli wethempeli esahlukweni esidlulileyo? (b) Yiphi imibuzo emibili esizayiphendula esahlukweni lesi?

 ESAHLUKWENI esidlulileyo sifunde ukuthi uHezekheli kazange abone ithempeli likaJehova elikhulu elacaciswa ngumphostoli uPhawuli ebhalela amaKhristu. Sifunde lokuthi uJehova watshengisa uHezekheli umbono lo ngoba wayefuna ukufundisa abantu bakhe ukuthi kuqakathekile ukuthi bamkhonze belandela izimiso zakhe. Abantu babezakuba lobudlelwano obuhle loJehova nxa babengalandela izimiso zakhe. UJehova wagcizelela ukuthi izimiso zakhe ziqakathekile ngokukhuluma kabili evesini eyodwa esithi: “Nanku umthetho wethempeli.”—Bala uHezekheli 43:12.

² Esahlukweni lesi sizaphendula imibuzo emibili. Owokuqala uthi: Yiziphi izifundo ezimayelana lezimiso zikaJehova amaJuda angesikhathi sikaHezekheli ayengazifunda embonweni lo? Impendulo yombuzo lo izasinceda senelise ukuthola impendulo yombuzo wethu wesibili othi: Umbono lo usifundisani thina esiphila ezinsukwini zokucina ezinzima?

3. Kungani umbono kaHezekheli wawungenza amaJuda ayangeke?

³ Ukuze siphendule umbuzo wethu wokuqala, asixoxeni ngezinto ezingajayelekanga uHezekheli azibona embonweni wakhe. Intaba ende. Kumele ukuthi amaJuda athi esizwa ngentaba ende uHezekheli ayibona embonweni acabanga ngesiphrofetho sika-Isaya sokuvuselelwa kokukhonza kweqiniso. (Isaya. 2:2) Kodwa ukuthi indlu kaJehova yayiphezu kwentaba ende kwakuwafundisani? Kwakuwafundisa ukuthi ukukhonza kweqiniso kumele kuphakanyiswe loba kuqakathekiswe ukwedlula loba yini. Ukukhonza kweqiniso vele kuphakeme ngoba kwasungulwa nguNkulunkulu ‘ophakeme kakhulu ukwedlula bonke onkulunkulu.’ (Hubo. 97:9) Kodwa abantu bako-Israyeli bona babengasakuqakathekisi. Basebeleminyaka eminengi kakhulu bengelandaba lokukhonza kweqiniso, bekungcolisa futhi besenza izinto ezimbi. Kufanele ukuthi amaJuda ayelenhliziyo eziqotho ayangeka ngesikhathi ebona indlu kaNkulunkulu engcwele isendaweni ephakemeyo futhi ilenkazimulo eyifaneleyo.

4, 5. Yisiphi isifundo amaJuda angesikhathi sikaHezekheli ayengasifunda emagedini amade ethempeli?

⁴ Amagedi amade. Umbono wathi usanda kuqalisa, uHezekheli wabona ingilosi eyayimtshengisa okwakusethempelini ilinganisa amagedi. Amagedi la ayengaba ngamamitha angu-30 ukuya phezulu. (Hez. 40:14) Emagedini lawo kwakulezindlu zabalindi. Konke lokhu kwakuzabafundisani labo ababezahlola umdwebo wethempeli? UJehova watshela uHezekheli wathi: “Ukhangelisise amagedi ethempeli.” Kungani watsho njalo? AmaJuda ayeseletha abantu “abangasokanga enhliziyweni lasenyameni,” abangenise endlini kaNkulunkulu engcwele. UJehova wathi abantu labo bafika ‘bangcolise ithempeli lakhe.’—Hez. 44:5, 7.

⁵ Labo ‘ababengasokanga enyameni’ babesephula umthetho kaNkulunkulu ayewunike u-Abrahama kudala khonale. (Gen. 17:9, 10; Lev. 12:1-3) Kodwa labo ‘ababengasokanga enhliziyweni’ babelohlupho olukhulu kakhulu. Babeyiziqholo bengafuni ngitsho ukulalela okwakutshiwo nguJehova. Ngakho kwakungamelanga bavunyelwe ukungena endlini kaJehova engcwele. UJehova uyabazonda abantu abangabazenzisi. Kodwa isimanga yikuthi abantu bakhe basebeyekela abantu abanjalo bengena endlini yakhe. Amagedi lezindlu zabalindi ezazisembonweni wethempeli kwenza kwacaca ukuthi ukuzenzisa okunjalo kwasekumele kuphele. Abantu abangena endlini kaNkulunkulu kwakumele kube ngabantu abalandela izimiso zakhe eziphakemeyo. Lokho yikho okwakuzakwenza uJehova amukele indlela abamkhonza ngayo.

6, 7. (a) Yisiphi isifundo uJehova ayefuna abantu bakhe basifunde emdulini owawugombolozele indawo yonke yethempeli? (b) Abantu bakaJehova babeyiphatha njani indlu yakhe? (Khangela amabala angaphansi.)

⁶ Umduli owawugombolozele indawo yonke yethempeli. Eyinye into eyayimangalisa ngethempeli elalisembonweni ngumduli owawugombolozele indawo yonke yethempeli. UHezekheli wathi icele  ngalinye lomduli laliyimihlanga engu-500 ubude loba amamitha angu-1 555, okutsho ukuthi icele ngalinye lalisedlula ikhilomitha elilodwa lengxenye. (Hez. 42:15-20) Kodwa icele ngalinye lendawo eyayilezakhiwo zethempeli lamaguma alo lalingamamitha angu-259 ubude kuphela. Ngakho kwakulendawo enkulu emaceleni ethempeli futhi indawo le yayigonjolozelwe ngumduli. a Kungani kwakunjalo?

⁷ UJehova wathi: “Khathesi kabayekele ukukhonza abanye onkulunkulu futhi kabalahlele izidumbu zamakhosi abo khatshana lami. Lapho-ke ngizahlala phakathi kwabo kuze kube nini lanini.” (Hez. 43:9) Kungenzakala ukuthi “izidumbu zamakhosi” ayekhuluma ngazo kwakuyizithombe. Ngakho-ke indawo enkulu eyayisemaceleni wonke ethempeli yayitshengisa ukuthi uJehova wayengafuni lutho olungcolileyo kumbe olwenyanyekayo duzane lethempeli lakhe. UJehova wayezababusisa abe phakathi kwabo nxa babezamkhonza ngendlela ehlanzekileyo.

8, 9. Kuyini uJehova akwenza kwacaca ngesikhathi elaya amadoda akhokhelayo?

⁸ UJehova ulaya amadoda akhokhelayo. UJehova wawalaya ngamazwi aqatha amadoda ayelomsebenzi wokukhokhela abantu bakhe. Wawasola kakhulu amaLevi amhlamukelayo ngesikhathi abantu sebekhonza izithombe. Kodwa wawancoma amadodana kaZadokhi ‘aqhubeka esenza imisebenzi endaweni yakhe engcwele ngesikhathi ama-Israyeli emhlamukela.’ Iqembu ngalinye walahlulela ngendlela efaneleyo kusiya ngokuthi lalisenzani. (Hez. 44:10, 12-16) Abakhokheli bako-Israyeli labo wabakhuza engabakhekhelezi.—Hez. 45:9.

⁹ UJehova wakwenza kwacaca ukuthi amadoda ayewaphathise umsebenzi wokukhokhela abantu bakhe kwakumele alandise kuye ngendlela ayesenza ngayo imisebenzi yawo. Lawo kwakumele alaywe futhi akhuzwe njengabo bonke abanye abantu. UJehova wayekhangelele ukuthi amadoda akhokhelayo kube yiwo ahamba phambili ekulandeleni izimiso zakhe eziphakemeyo.

10, 11. Kuyini okutshengisa ukuthi amanye amaJuda abuyela elizweni lawo akwenza lokho akufunda embonweni kaHezekheli?

¹⁰ Ngesikhathi amaJuda esebuyele elizweni lawo akwenza yini lokho uHezekheli akubona embonweni wakhe? Ngeke sibekwazi sibisibili ukuthi abantu laba babecabangani ngombono kaHezekheli. Kodwa iLizwi likaNkulunkulu liyasitshela okunengi abakwenzayo sebebuyele elizweni labo lokuthi basebekubona njani ukukhonza kweqiniso. Bakwenza yini lokho ababekufunde embonweni kaHezekheli? Okunengi kwakhona bakwenza. Kukhanya bona babengcono kulabokhokho babo abathunjwa bahanjiswa eBhabhiloni.

¹¹ Kwakulamadoda athembekileyo ayesebenza nzima efundisa abantu ukuthi balandele izimiso zikaJehova ezinjengalezo ezitholakala embonweni kaHezekheli wethempeli. Abanye babo kwakungabaphrofethi uHagayi loZakhariya, lombusi uNehemiya kanye lo-Ezra owayengumphristi aphinde abe ngumbhali. (Ezra. 5:1, 2)  Bafundisa abantu ukuthi kwakumele baqakathekise ukukhonza kweqiniso ukudlula inotho lokwenza izinto ezithokozisa bona. (Hag. 1:3, 4) Baqonqosela abantu ukuthi kwakumele balandele izimiso zikaJehova zokukhonza kweqiniso. Ngokwesibonelo u-Ezra loNehemiya bakhuza abantu, babatshela ukuthi kwakumele bahlukane labafazi babo ababebathethe kwezinye izizwe ngoba babebaphambanisa ekukhonzeni kweqiniso. (Bala u-Ezra 10:10, 11; Neh. 13:23-27, 30) AmaJuda aqhubeka ekhonza izithombe yini? Kukhanya angathi amaJuda athi esebuyele elizweni lawo ayesekuzonda kakhulu ukukhonza izithombe lanxa lokho kwakuyisilingo esikhulu kakhulu kubokhokho babo. Abaphristi labakhokheli labo babekhuziwe futhi baqondiswa nguJehova embonweni kaHezekheli. Manje bakwenza yini lokho ababekufundile? (Neh. 13:22, 28) Abanengi babo bazehlisa benza lokho uJehova ayefuna bakwenze.—Ezra. 10:7-9, 12-14; Neh. 9:1-3, 38.

12. UJehova wawabusisa njani amaJuda esebuyele elizweni lawo?

¹² UJehova wathi ebona okwakusenziwa ngabantu bakhe wababusisa. Elizweni kwasekulokuthula futhi abantu basebelobungane obuqinileyo loJehova, sebeyikholisa impilo. (Ezra. 6:19-22; Neh. 8:9-12; 12:27-30, 43) Lokhu kwabangelwa yikuthi basebekhonza uJehova belandela izimiso zakhe eziphakemeyo. Abanengi balalela bakwenza lokho ababekufunde embonweni kaHezekheli wethempeli. Ngakho singathi umbono kaHezekheli wethempeli wanceda  amaJuda ayethunjiwe ngezindlela ezimbili. Okokuqala, wawafundisa ukuthi uJehova kumele akhonzwe njani lokuthi ayengazilandela njani izimiso zakhe eziphakemeyo. Okwesibili, waqinisa ithemba lawo, wawatshengisa ukuthi ukukhonza kweqiniso kwakuzavuselelwa lokuthi uJehova wayezawabusisa nxa angamkhonza ngendlela ehlanzekileyo. Lathi siyafuna ukwazi ukuthi umbono lo usinceda njani lamuhla.

13, 14. (a) Sikwazi njani ukuthi umbono kaHezekheli wethempeli uyagcwaliseka ngesikhathi sethu? (b) Umbono lo usinceda ngaziphi indlela ezimbili? (Khangela lebhokisi 13A elithi “Amathempeli Atshiyeneyo Asinika Izifundo Ezitshiyeneyo.”)

¹³ Sikwazi njani ukuthi umbono kaHezekheli wethempeli uyasinceda lathi lamuhla? Khumbula ukuthi umbono kaHezekheli wendlu kaNkulunkulu engcwele ‘esentabeni ende kakhulu’ uyahambelana lesiphrofetho sika-Isaya esithi “intaba yendlu kaJehova izamiswa iqine phezu kweziqongo zezintaba.” U-Isaya wakwenza kwacaca ukuthi isiphrofetho sakhe sasizagcwaliseka “ngezinsuku zokucina.” (Hez. 40:2; Isaya. 2:2-4; khangela loMikha 4:1-4.) Iziphrofetho lezi zaqalisa ukugcwaliseka ensukwini zokucina kusukela ngo-1919, lapho ukukhonza kweqiniso okwavuselelwa khona kwaphakanyiswa angathi kubekwe phezu kwentaba ende. b

¹⁴ Kuyacaca-ke ukuthi umbono kaHezekheli uyasinceda lamuhla ukuthi sikhonze uJehova ngendlela ayifunayo. Lathi usinceda ngendlela ezimbili njengamaJuda ayethunjiwe. Okokuqala, uyasifundisa ukuthi singazilandela njani izimiso zikaJehova eziphakemeyo zokukhonza kweqiniso. Okwesibili, uyasiqinisekisa ukuthi ukukhonza kweqiniso kuzavuselelwa ngokupheleleyo lokuthi uJehova uzasibusisa.

15. Kuyini okumele sikukhumbule nxa sihlola ithempeli elabonwa nguHezekheli embonweni?

¹⁵ Ake sixoxe ngezinye izinto ezabonwa nguHezekheli embonweni wethempeli. Akuzicabange ubhoda loHezekheli ubuka ithempeli lelo elakhiwe ngendlela emangalisayo. Khumbula ukuthi lelo kayisilo ithempeli likaJehova elikhulu elachasiswa ngumphostoli uPhawuli. Lanxa kunjalo ithempeli lelo olibonayo lingakunceda uthole izifundo ongazisebenzisa ekukhonzeni kweqiniso lamuhla. Khathesi asixoxeni ngezinye izifundo esizitholayo embonweni kaHezekheli wethempeli.

16. Izilinganiso ezisembonweni wethempeli zisifundisani? (Khangela umfanekiso osekuqaliseni.)

¹⁶ Kungani kulezilinganiso ezinengi kangaka? UHezekheli wabona indoda eyayikhazimula angathi yikhopha ilinganisa ithempeli. Yalinganisa imiduli, lamagedi, lezindlu zabalindi, lamaguma kanye le-alithare. Izilinganiso lezo zinengi okokuthi kungaba nzima emuntwini obalayo ukuzilandelela zonke. (Hez. 40:1–42:20; 43:13, 14) Lanxa kunjalo kulezifundo ezinengi esingazithola kuzo. UJehova ufuna sinanzelele ukuthi kuqakathekile ukuthi silandele izimiso zakhe lokuthi nguye okumele asitshele ukuthi simkhonze njani.  Ngakho labo abazitshela ukuthi uNkulunkulu kalandaba lokuthi bamkhonza njani bayalahleka. Okunye uJehova ayefuna sikufunde ngezilinganiso zonke lezi yikuthi ukukhonza kweqiniso kwakuzavuselelwa loba sekutheni. Njengoba zonke izilinganiso lezo zaziqondile, kutsho ukuthi zonke izithembiso zikaJehova zizagcwaliseka. Umbono kaHezekheli wenza singathandabuzi ukuthi ukukhonza kweqiniso kuyavuselelwa ngensuku zokucina.

17. Umduli owawugombolozele indawo yonke yethempeli usifundisani?

¹⁷ Umduli ogombolozele indawo yonke yethempeli. Embonweni wakhe uHezekheli wabona umduli owawugombolozele lonke ithempeli. Umduli lo wawukhumbuza abantu bakaNkulunkulu ukuthi kwakungamelanga bahlanganise ukukhonza kweqiniso lokukhonza kwamanga. Kwakumele babe leqiniso lokuthi izinto ezingcolileyo kazisondeli eduze kwendlu kaNkulunkulu. (Bala uHezekheli 43:7-9.) Lathi kufanele sihlale sikukhumbula lokho. Abantu bakaNkulunkulu bathi sebekhululiwe eBhabhiloni Enkulu uKhristu wabeka inceku ethembekileyo lehlakaniphileyo ngo-1919. Kusukela lapho abantu bakaNkulunkulu basebenze nzima ukuze balahle izimfundiso zamanga lemikhuba yamahedeni kanye lokukhonza izithombe. Kumele sizimisele ukukhonza uJehova ngendlela ehlanzekileyo. Kanti njalo kasenzi lutho oluphathelane lamabhizimusi nxa siseWolu yoMbuso ngoba asifuni kuhlanganisa izinto ezinjalo lokukhonza kweqiniso.—Mak. 11:15, 16.

18, 19. (a) Amagedi amade abonwa nguHezekheli embonweni asifundisani? (b) Uzakwenzani nxa abanye besola imithetho kaJehova?

¹⁸ Amagedi amade. Yiziphi izifundo esizitholayo emagedini amade abonwa nguHezekheli? Kumele ukuthi amaJuda ayethunjiwe athi esizwa ngamagedi la ayemade abona ukuthi izimiso zikaJehova zokuziphatha ziphakeme kakhulu. Khathesi uJehova ukhangeleleni kithi? Njengoba sikhonza uJehova sisethempelini lakhe kumele sibe leqiniso lokuthi asiphili impilo embaxambili kodwa siziphatha kuhle. (Rom. 12:9; 1 Phet. 1:14, 15) Ensukwini lezi zokucina uJehova uncedise abantu bakhe ukuthi baziphathe ngendlela ayifunayo. c Ngokwesibonelo nxa umuntu angenza isono esikhulu kodwa angaphenduki, uyasuswa ebandleni. (1 Khor. 5:11-13) Izindlu zabalindi uHezekheli azibona zisemagedini ethempeli zisikhumbuza ukuthi uJehova kabamukeli abantu abathi bayamkhonza kodwa besenza okubi. Ngokwesibonelo, umuntu ophila impilo embaxambili angangena sibili eWolu yoMbuso kodwa uJehova ngeke amamukele nxa engatshintshanga indlela aphila ngayo. (Jak. 4:8) Lokhu kwenza ukuthi ukukhonza kweqiniso kungangcoliswa lanxa siphila emhlabeni ogcwele abantu abangaziphathanga.

¹⁹ IBhayibhili lavele latsho ukuthi ukuphela kungakafiki abantu bazabe sebeziphatha ngendlela embi kakhulu. Lathi: “Abantu abenza okubi labangamaqili bazaqhubeka besiba babi kakhulu, bedukisa futhi bedukiswa.” (2 Thim. 3:13) Khathesi sokulabantu abanengi  abacabanga ukuthi imithetho kaNkulunkulu ngeyakudala kakhulu, kayiqondanga futhi ibancitsha inkululeko. Wena uyibona njani imithetho kaNkulunkulu? Nxa omunye umuntu angathi umthetho kaJehova othi abantu akumelanga babe yizitabane kawuqondanga, uzavumelana laye yini? Uzavumelana loJehova uNkulunkulu wethu yini othi abantu abayizitabane ‘benza izinto ezilihlazo’? UJehova uthi uzabajezisa abantu abavumelana labantu abenza izinto ezinjalo. (Rom. 1:24-27, 32) Ezindabeni ezinjalo kumele sikhumbule amagedi amade abonwa nguHezekheli embonweni. UJehova kasoze atshintshe imithetho yakhe kungelani lokuthi abantu bomhlaba lo bathini. Uzavumelana loBaba wethu osezulwini yini ulilwele iqiniso?

20. ‘Abexuku elikhulu’ bafundani embonweni kaHezekheli?

²⁰ Amaguma ethempeli. Kufanele ukuthi uHezekheli wathokoza ebona ukuthi iguma elingaphandle lalilikhulu kakhulu. Mhlawumbe wacabanga ukuthi banengi abantu bakaJehova ababengabuthana lapho bamkhonze. Lamuhla amaKhristu akhonza uJehova esendaweni engcwele ukwedlula iguma elabonwa nguHezekheli. ‘Abexuku elikhulu’ bakhonza uJehova besegumeni elingaphandle lethempeli likaJehova elikhulu. Ngakho zinengi izifundo abangazithola embonweni kaHezekheli wethempeli. (Isam. 7:9, 10, 14, 15) UHezekheli wabona ukuthi emagumeni ethempeli kwakulezindlu zokudlela, lapho abantu ababengadlela khona eyinye inyama yemihlatshelo  yobudlelwano ababeyinikela. (Hez. 40:17) Kwakungathi badla loJehova okwakutshengisa ukuthi balobudlelwano obuhle laye. Khathesi asisanikeli imihlatshelo eyayinikelwa ngamaJuda ngaphansi koMthetho kaMosi. Kodwa ‘sinikela imihlatshelo yokudumisa’ nxa siphendula emihlanganweni yebandla loba sifundisa abantu ekutshumayeleni. (Heb. 13:15) Kanti njalo uJehova usinika ukudla okusiqinisa ukholo okusinceda sihlale singabangane bakhe. Lathi siyakuqakathekisa ukukhonza kweqiniso njengamadodana kaKhora ahlabela athi: “Ilanga elilodwa emagumeni akho lingcono kulayinkulungwane kwenye indawo.”—Hubo. 84:10.

21. AmaKhristu agcotshiweyo angafundani embonweni kaHezekheli wethempeli?

²¹ Abaphristi. UHezekheli wabona ukuthi abaphristi lamaLevi babengena egumeni elingaphakathi ngamagedi ayefanana lalawo abantu ababengena ngawo egumeni elingaphandle. Lokhu kwakukhumbuza abaphristi lamaLevi ukuthi labo kumele balandele izimiso zikaJehova ukuze bangangcolisi ukukhonza kweqiniso. Lanxa lamuhla singelabo abaphristi abangabosendo lwamaLevi, iBhayibhili lithi amaKhristu agcotshiweyo ‘ayisizwe esikhethiweyo, iqembu labaphristi abangamakhosi.’ (1 Phet. 2:9) Abaphristi bako-Israyeli babengakhonzeli endaweni yinye labanye abantu. Kodwa lamuhla amaKhristu agcotshiweyo akhonza ndawonye labexuku elikhulu. Lanxa kunjalo, wona alobudlelwano obuqakatheke kakhulu loJehova, angamadodana akhe. (Gal. 4:4-6) Ngakho lawo kukhona angakufunda embonweni kaHezekheli. Embonweni kaHezekheli wethempeli uJehova wabalaya abaphristi futhi wabasola ngendlela ababesenza ngayo. Lokhu kutshengisa ukuthi uJehova uyawalaya lawo amaKhristu agcotshiweyo. Kuqakathekile ukuthi wonke amaKhristu, kugoqela lagcotshiweyo, akhumbule ukuthi ‘singumhlambi owodwa’ ngaphansi ‘komelusi oyedwa.’—Bala uJohane 10:16.

22, 23. (a) Yisiphi isifundo abadala abangamaKhristu abasithola kumkhokheli osembonweni kaHezekheli? (b) Kuyini okungenzakala ngesikhathi esizayo?

²² Umkhokheli. Embonweni kaHezekheli umkhokheli wayelemisebenzi eqakathekileyo. Yena wayengayisuye mphristi yikho nxa wayezokhonza ethempelini kwakumele azehlise kubaphristi. Umsebenzi wakhe wawungowokukhokhela abantu futhi nguye owayesamukela imihlatshelo abeseyihambisa kubaphristi. (Hez. 44:2, 3; 45:16, 17; 46:2) Amadoda angamaKhristu aphathiswe imisebenzi ebandleni angafunda okunengi kuye. Abadala bebandla kanye lababonisi beziqinti kumele bahlale bezithoba encekwini ethembekileyo. (Heb. 13:17) Abadala basebenza nzima bencedisa abantu bakaNkulunkulu ukuthi benze imihlatshelo yokudumisa ebandleni lasekutshumayeleni. (Efe. 4:11, 12) Kodwa kumele bakhumbule ukuthi uJehova wabasola abakhokheli bako-Israyeli ababephatha kubi abantu bakhe. (Hez. 45:9) Lokhu kufundisa abadala ukuthi labo kumele balalele nxa bekhuzwa. Phezu kwalokho kumele bamvumele uJehova ukuthi ababumbe njalo abafundise ukuze bawenze kuhle umsebenzi wabo wokukhokhela lowokwelusa.—Bala u-1 Phetro 5:1-3.

 ²³ LasePharadayisi uJehova uzaqhubeka enika abantu bakhe abakhokheli abazabaphatha kuhle. Khathesi abadala baphiwa imfundo ezabanceda ukuthi babe ngabelusi abalothando emhlabeni omutsha. (Hubo. 45:16) Kuyasithokozisa ukuthi lasePharadayisi sizakweluswa ngamadoda afundiswe nguJehova. Kungenzakala ukuthi ngokuhamba kwesikhathi uJehova asincedise sizwisise okunengi ngombono kaHezekheli langezinye iziphrofetho zokuvuselelwa kokukhonza kweqiniso. Mhlawumbe okunye kwakhona kuzagcwaliseka esikhathini esizayo ngendlela ebesingeke siyicabange khathesi. Sizabona ngakho sekusenzakala.

24, 25. Yiziphi izinto ezimbili uHezekheli azibonayo embonweni ezazitshengisa ukuthi uJehova wayezabusisa abantu bakhe nxa bangamkhonza ngendlela ayamukelayo?

²⁴ Asiphetheni ngokuxoxa ngokunye okuqakathekileyo okwabonwa nguHezekheli embonweni. UHezekheli wabona uJehova efika ethempelini, wasethembisa abantu bakhe ukuthi uzaqhubeka elabo nxa bangaqhubeka bethembekile kuye futhi bemkhonza ngendlela ayamukelayo. (Hez. 43:4-9) Ukuba khona kukaJehova kwakuzabanceda njani abantu bakhe kanye lelizwe labo?

²⁵ Embonweni lo kulezinto ezimbili ezitshengisa ukuthi abantu bakaNkulunkulu babezazithola njani izibusiso. Okokuqala ngumfula owawugeleza usuka endaweni engcwele yethempeli. Amanzi awo ayevuselela zonke izinto eziphilayo esenza lokuthi ilizwe livunde. Okwesibili yikwehlukaniswa kwelizwe ngendlela ehlelekileyo. Ithempeli lamaguma alo kwakuphakathi laphakathi kwelizwe. Ukuhlola ukuthi izinto lezi zisifundisani kungasinceda ngoba khathesi sikhonza sisethempelini lakhe elikhulu. UJehova sewangena ethempelini lakhe elikhulu walihlola futhi wamukela indlela abantu bakhe abamkhonza ngayo. (Mal. 3:1-4) KuSahluko 19 kusiya ku-21 sizaxoxa ngomfula owabonwa nguHezekheli ugeleza usuka ethempelini langendlela ilizwe elehlukaniswa ngayo.