1, 2. 1) Li ta kapitulo 13, ¿kʼusi la jchantik ta sventa li templo laj yil Esekiele? 2) ¿Kʼusi chaʼtos ta jkʼelbetik skʼoplal li ta kapitulo liʼe?

 LI TA kapitulo 13, la jchantik ti mu koʼoluk skʼoplal li templo laj yil Esekiel xchiʼuk li mukʼta templo ta mantal laj yalbe skʼoplal li jtakbol Pablo kʼalal echʼem xa ox jayibuk sigloe. Jech xtok, li Jeovae jaʼ jech laj yakʼbe xchan steklumal ti kʼu yelan skʼan x-ichʼat ta mukʼe. Jaʼ yuʼun, mi tskʼan lek chil sbaik yan velta xchiʼuk li Jeovae, skʼan xchʼunik li mantaletik taje. Jech oxal, chib to velta xi laj yale: «Liʼe jaʼ li mantal ta sventa temploe» (kʼelo Esekiel 43:12).

² Avie, ta jkʼeltik kʼusi chakʼ jchantik li templo laj yil Esekiele. Baʼyel jkʼeltik kʼusi la xchanik jechuk li judaetik kʼalaluk albatik yuʼun Jeova ti kʼu yelan skʼan xichʼik ta mukʼe. Mi laj xa ox jchantik taje, ta jkʼeltik kʼuxi te tsakal jkʼoplaltik avi ti ta slajebal xa kʼakʼal kuxulutike.

3. ¿Kʼu van yuʼun kʼexav jteklum kʼalal laj yaʼiik li kʼusi akʼbat yil Esekiele?

³ Jkʼeltik kʼusitik labalik sba laj yil Esekiel kʼalal akʼbat iluk li temploe, taje jaʼ sventa xkiltik kʼusi la xchanik li judaetik ti chukbil toʼox batike. Li vits ti toyol tajeke. Kʼalal laj yaʼi jteklum li kʼusi  akʼbat yil Esekiele, xuʼ van tal ta sjolik li albil kʼop yaloj xa onoʼox Isaias ta sventa ti chchaʼta yav li melel yichʼel ta mukʼ Diose (Is. 2:2). ¿Kʼusi akʼbat xchanik ti ta toyol tajek oy li sna Jeovae? Jaʼ ti chichʼ toybel skʼoplale, ti stuk noʼox toyol chkʼote. Melel onoʼox ti toyol xa onoʼox skʼoplale, yuʼun jaʼ yakʼoj li Dios ti ‹toj toyol skʼoplale, ti jaʼ mu sta li yan diosetike› (Sal. 97:9). Pe epal siglo mu jechuk la spasik li steklumal Diose, yuʼun ep ta velta la sokesik li yichʼel ta mukʼ Diose xchiʼuk la sten ta yoʼontonik. Li judaetik ti tskʼan chtunik ta stojolal Diose lik kʼexavikuk ta skoj stalelalik kʼalal laj yilik ti ta toyol oy li sna Diose, jaʼ xkaltik, ti toybil xa skʼoplal xchiʼuk ti ichʼbil ta mukʼe.

4, 5. ¿Kʼusi van akʼbat xchanik judaetik kʼalal laj yilik li mukʼta ochebaletik ta temploe?

⁴ Li mukʼta ochebaletike. Li kʼusi baʼyel akʼbat yil Esekiele jaʼ jun anjel ti yakal tspʼis li yochebaltak templo ti te van 30 metro stayleje (Esek. 40:14). Ta jujujot xokon li ta mukʼta ochebaletike te oy li skuarto jchabivanejetike. ¿Kʼusi ch-akʼbat xchanik li buchʼutik tskʼelik kʼu yelan meltsanbil li temploe? Xi albat yuʼun Jeova li Esekiele: «Kʼelo lek li yochebal temploe». ¿Kʼu yuʼun ti jech albate? Yuʼun li jteklume la stikʼik ochel ta sna Jeova li buchʼutik «muʼyuk yichʼojik sirkunsision ta yoʼontonik xchiʼuk ta sbekʼtalike». Jaʼ yuʼun, xi jamal laj yal li Jeovae: «Ta xikʼubtasik [li jtemploe]» (Esek. 44:5, 7).

⁵ Li buchʼutik «muʼyuk yichʼojik sirkunsision [...] ta sbekʼtalike» muʼyuk yakal chchʼunik li mantal laj yal Dios ta skʼakʼalil Abraane (Jen. 17:9, 10; Lev. 12:1-3). Pe mas to toj tsots smulik li buchʼutik ‹muʼyuk yichʼojik sirkunsision ta yoʼontonike›, yuʼun yolbaj mu xchʼunik li mantaletik xchiʼuk li beiltaseletik yakʼoj Jeovae. Li jtoybaetik taje muʼyuk akʼat ochikuk jechuk li ta sna Jeovae. Yuʼun spʼajoj li buchʼu chloʼlavane, pe li jteklume laj yakʼik ti jechuk xichʼ pasel li ta snae. Li yochebaltak xchiʼuk li skuarto jchabivanejetik ti te oy ta temploe jamal kʼusi chakʼ ta chanel, ti mu xa stakʼ spasik li kʼusitik nopemik xaʼiike. Sventa x-ochik ta sna li Diose xchiʼuk ti xchʼam li ichʼel ta mukʼ chakʼbeike, skʼan xchʼunbeik li smantaltake.

6, 7. 1) Kʼalal laj yakʼ ta ilel Jeova li muro sjoyoj li yosilal temploe, ¿kʼusi laj yakʼbe xchan li steklumale? 2) ¿Kʼusi la spasik ta sna Jeova li j-israeletike? (Kʼelo li tsʼib ta yok vune).

⁶ Smuroal ta sjoylejal. Yan ti kʼusi labal sba laj yil Esekiele jaʼ li muro ti oy ta sjoylej li yosilal temploe. Li muro laj yil Esekiele koʼol sjamlej ta xchanjotal, yuʼun voʼob sien aj ta jujujot o 1.555 metro. Nopo noʼox avaʼi, taje mas ta jun kilometro xchiʼuk oʼlol (Esek. 42:15-20). Jech xtok, sjunul li templo xchiʼuk li yamakʼiltake koʼol sjamlej ta xchanjotal, yuʼun voʼob sien xukʼubil sjamlej ta jujujot o 259 metro (Esek. 45:2). Taje chakʼ ta ilel ti ep to jamal yosilal li temploe xchiʼuk ti joybil ta muroe. * ¿Kʼu yuʼun ti jech meltsanbile?

 ⁷ Xi laj yal li Jeovae: «Akʼo yiktaik ti chchon sbaike xchiʼuk akʼo snamajesik ta jtojolal li sbekʼtal ajvaliletik yuʼunike, vaʼun te ta jchiʼinik ta naklej ta sbatel osil» (Esek. 43:9). Kʼalal chal «li sbekʼtal ajvaliletik yuʼunike», xuʼ van jaʼ skʼoplal li yichʼel ta mukʼ santoetik tspasik toʼoxe. Jech oxal, ti lek jamal li yosilal ta spat xokon li temploe jaʼ sventa xi chalbe yaʼeluk Jeova li judaetike: «Lokʼesik batel skotol li kʼusitik ibalik sbae, nom xavichʼik batel, ¡mu jkʼan jkʼel!». Mi chichʼik ta mukʼ Jeova jech kʼuchaʼal tskʼane, te chchiʼinatik-o.

8, 9. Kʼalal la stukʼibtas Jeova li viniketik ti tsots yabtel yichʼojike, ¿kʼusi van akʼbat xchan li jteklume?

⁸ Tukʼibtasatik li buchʼutik la sbeiltasik jteklume. Li Jeovae tukʼ laj yakʼbe mantal li buchʼutik tsots yabtel yichʼojik ta jteklume, pe ta slekil yoʼonton la spas. Tsots la stukʼibtas li jlevietik ti namajik ta stojolal Dios kʼalal lik yichʼik ta mukʼ santoetik li jteklume. Yan li xnichʼnabtak Sadoke laj yichʼik kʼupil kʼoptael akʼo mi laj yiktaik Jeova li j-israeletike, li stukike jech-o la spasik li kʼusitik skʼan pasel ti bu chʼul yuʼun Jeovae. Tukʼ la xchapanan xchiʼuk ta slekil yoʼonton la spas jech kʼuchaʼal sta-o chile (Esek. 44:10, 12-16). Tsots laj yichʼik tukʼibtasel ek li bankilaletik ta Israele (Esek. 45:9).

⁹ Jaʼ jech jamal laj yakʼ ta ilel Jeova ti chchapan li buchʼutik tsots yabtel yichʼojik ta skoj ti kʼu yelan la spas li yabtelike. Li tojobtasel, tukʼibtasel xchiʼuk pʼijubtasel laj yakʼ Jeovae jaʼ sventaik ek. Yuʼun jaʼ baʼyel skʼan xakʼik ta ilel ti chchʼunbeik li smantaltak Jeovae.

10, 11. ¿Kʼuxi chvinaj ti oy junantik judaetik la stabeik sbalil li kʼusi laj yil Esekiele?

¹⁰ Li judaetik ti sut ta slumalike, ¿mi laj van spasik li kʼusi akʼbat xchanik li kʼusi laj yil Esekiele? Mu onoʼox jnaʼtik kʼusi la snopik li viniketik xchiʼuk antsetik ti tukʼ laj yakʼ sbaik ta stojolal Jeova ta sventa li kʼusi labal sba laj yil Esekiele. Pe li Vivliae chalbutik kʼusi la spasik kʼalal sut ta slumalike xchiʼuk ti kʼu yelan laj yilik li melel yichʼel ta mukʼ Jeovae. ¿Mi laj van xkuxlebinik li kʼusi akʼbat xchanik li kʼusi laj yil Esekiele? Laj, pe mu skotoluk, yuʼun mas to chopol echʼik li smoltotakik ti kuxiik kʼalal skʼan toʼox xichʼik chukel batel ta Babiloniae.

¹¹ Junantik yajtuneltak Dios ti tukʼ laj yakʼ sbaik jech kʼuchaʼal li j-alkʼop Ajeo, Sakarias, li ajvalil Neemiase xchiʼuk Esdras ti jaʼ pale xchiʼuk ti jtsʼibajome laj yakʼik persa sventa xakʼbeik beiltaseletik li jteklume. Li beiltaseletik taje xkoʼolaj xchiʼuk li kʼusi akʼbat yil Esekiele (Esd. 5:1, 2). Akʼbat xchanik ti mas tsots skʼoplal li yichʼel ta mukʼ Diose, ti jaʼ muʼyuk tsots skʼoplal li saʼel kʼulejal xchiʼuk li kʼusi tskʼan yoʼonton stukike (Ajeo 1:3, 4). Jech xtok, laj yalik ti skʼan xchʼunik li mantaletik ti chal kʼu yelan skʼan xichʼik ta mukʼ li Diose. Li Esdras xchiʼuk Neemiase jamal laj yalbe judaetik ti akʼo xikta li yajnilik ti jaʼik jyanlumetik ta skoj ti yakal  chkʼunibik-o ta mantale (kʼelo Esdras 10:10, 11; Neem. 13:23-27, 30). ¿Mi jech-o van laj yichʼik ta mukʼ li santoetike? Yaʼeluke jaʼo te laj yiktaik xchiʼuk la spʼajik yichʼel ta mukʼ santoetik kʼalal kolik lokʼel ta skʼob li Babiloniae. ¿Mi laj van yichʼik tukʼibtasel li paleetik xchiʼuk bankilaletike? Jech kʼuchaʼal akʼbat yil Esekiele, li Jeovae la stukʼibtasan xchiʼuk tsots laj yakʼanbe mantal (Neem. 13:22, 28). Ep buchʼutik ta sjunul yoʼonton la xchʼunik li tukʼibtasele (Esd. 10:7-9, 12-14; Neem. 9:1-3, 38).

12. Li judaetik ti sut ta slumalike, ¿kʼuxi akʼbatik bendision yuʼun Jeova?

¹² Ta skoj ti la xchʼunik li tukʼibtasele, oy kʼusitik lik skʼupinik yan velta, akʼbatik bendision li jteklume, lek laj yil sbaik xchiʼuk Jeova, muʼyuk x-ipajik xchiʼuk jun noʼox yoʼontonik (Esd. 6:19-22; Neem. 8:9-12; 12:27-30, 43). ¿Kʼu yuʼun? Yuʼun li jteklume lik xchʼun li mantaletik ta sventa ti kʼu yelan skʼan xichʼik ta mukʼ li Diose. Epal krixchanoetik ti oy ta yoʼontonik mantale kʼot ta yoʼontonik li kʼusi laj yil Esekiele, yuʼun oy kʼusi akʼbat xchanik. Ta jaypʼel noʼoxe, li judaetike oy chaʼtos kʼu yelan koltaatik li kʼusi laj yil Esekiele: 1) akʼbatik ta ilel ti kʼu yelan skʼan ichʼel ta mukʼ li Diose xchiʼuk ti kʼuxi ta chʼunel li smantaltake, 2) akʼbat snaʼik kʼusi chkʼot ta pasel ta tsʼakal, yuʼun laj yakʼ ta naʼel ti chchaʼta yav li melel yichʼel ta mukʼ Diose xchiʼuk ti tstaik bendision yuʼun Jeova mi chichʼik ta mukʼ jech kʼuchaʼal tskʼane. Pe xuʼ van xi ta jakʼbe jbatike: «Li kʼusi akʼbat yil Esekiele, ¿mi chkʼot ta pasel li avi eke?».

13, 14. 1) ¿Kʼuxi jnaʼojtik ti chkʼot ta pasel avi li templo akʼbat yil Esekiele? 2) ¿Kʼuxi ta jtabetik sbalil li kʼusi akʼbat yil Esekiele? (Kʼelo li rekuadro 13A «Chib templo, chib smelolal»).

¹³ Li kʼusi laj yil Esekiele, ¿mi ta melel te tsakal jkʼoplaltik? Te, vuleso ta ajol kʼuxi xkoʼolaj li kʼusi laj yil Esekiel xchiʼuk li albil kʼop laj yal Isaiase. Li Esekiele akʼbat yil ti oy ‹ta jpʼej vits ti toyol tajek› li sna Diose, yan li Isaiase xi laj yale: «Li vits ti bu oy sna Jeovae [...] jaʼ mas toyol chkʼot kʼuchaʼal li yan vitsetike xchiʼuk lek nakal chkom». Li Isaiase laj yal ti jaʼ to chkʼot ta pasel ‹ta slajebaltik kʼakʼal› li kʼusi laj yale (Esek. 40:2; Is. 2:2-4; xuʼ xakʼel xtok Mikeas 4:1-4). Jaʼ yuʼun, li albil kʼopetik taje jaʼ mas to te lik kʼotuk ta pasel ta sjabilal 1919 ti jaʼ xa ox li slajebal kʼakʼale, yuʼun li vaʼ jabile laj yichʼ toybel skʼoplal li yichʼel ta mukʼ Diose xchiʼuk la xchaʼta yav, xkoʼolaj ti laj yichʼ akʼel ta sba jun tayal vitse. *

¹⁴ Jaʼ yuʼun, li kʼusi laj yil Esekiele te tsakal skʼoplal ti kʼu yelan chichʼ ichʼel ta mukʼ Dios li avie. Jech kʼuchaʼal la stabeik sbalil li judaetik ta voʼnee, oy chaʼtos kʼuxi ta jtabetik sbalil ek li kʼusi laj yal Esekiele: 1) chakʼ kiltik kʼu yelan skʼan ichʼel ta mukʼ li Diose xchiʼuk 2) chakʼ jnaʼtik ti chchaʼta yav li melel yichʼel ta mukʼ Diose xchiʼuk li bendisionetik chakʼ Jeovae.

15. ¿Kʼusi skʼan teuk ta joltik kʼalal ta jkʼeltik li kʼusi chakʼ jchantik li templo akʼbat yil Esekiele?

¹⁵ Avie jkʼeltik li kʼusi mas tsots skʼoplal chakʼ jchantik li kʼusi laj yil Esekiele. Nopo noʼox ti te achiʼuk batel Esekiel kʼalal ch-akʼbat yojtikin li labal sba temploe. Vuleso ta ajol ti maʼuk li mukʼta templo ta mantal li kʼusi yakal chavile, yuʼun jaʼ noʼox chakʼ ta chanel ta sventa li yichʼel ta mukʼ Diose. ¿Kʼusitik ti chakʼ ta chanele?

16. ¿Kʼusi chakʼ jchantik skotol li kʼusi laj yichʼ pʼisel laj yil Esekiele? (Kʼelo li lokʼol ta slikebal kapituloe).

¹⁶ ¿Kʼu yuʼun ti tspʼis skotole? Li Esekiele laj yil ti yakal tspʼis sjunul templo li anjel ti xojobinaj kʼuchaʼal kovree, la spʼis li smuroaltake, li yochebaltake, li skuarto jchabivanejetike, li yamakʼiltake xchiʼuk li skajleb matanale. Ti xlikuk xchanbe skʼoplal skotol li jun krixchanoe, xuʼ chlik-o xkʼuxul sjol (Esek. 40:1-42:20; 43:13, 14). Pe nopo noʼox avaʼi skotol li kʼusi chakʼ jchantik li kʼusi laj yichʼ pʼisele. Ti laj yichʼ tsʼibael skotol taje, jaʼ svinajeb ti oy tajek ta yoʼonton Jeova ti tsotsuk skʼoplal xkiltik li smantaltake, yuʼun jaʼ chakʼ stuk li mantaletike, maʼuk li krixchanoetike. Jaʼ yuʼun, muʼyuk srasonik li buchʼutik chalik ti mu ventauk kʼu yelan chkichʼtik ta mukʼ li Diose. Ti lek tajek laj yichʼ pʼisel li temploe, chakʼ ta ilel Jeova ti persa chchaʼta yav li melel yichʼel ta mukʼe. Jech xtok, ti yakʼojbe lek spʼisol li jujutos kʼusitike chakʼ ta ilel ti yakʼojbe lek yorail sventa xkʼot ta pasel li kʼusi tskʼane. Jaʼ yuʼun, li Esekiele chakʼ ta aʼiel ti persa chchaʼta yav li melel yichʼel ta mukʼ Dios li ta slajebal kʼakʼale.

17. ¿Kʼusi tsvules ta joltik li muro ti oy ta sjoylej yosilal temploe?

¹⁷ Li smuroal ta sjoylejal temploe. Jech kʼuchaʼal laj xa jchantike li Esekiele laj yil jun muro ti oy ta sjoylej li yosilal temploe. Taje  tsvules ta joltik ti yajtunelutik Diose skʼan jkʼel jbatik sventa mu xkikʼubtastik li melel yichʼel ta mukʼ Diose xchiʼuk ti nom jiptik batel li kʼusi xuʼ xikʼubtasbe sna Jeovae (kʼelo Esekiel 43:7-9). Li tojobtasel taje, ¡jtunel kuʼuntik li avie! Li ta sjabilal 1919, li steklumal Dios ti chukbilik toʼox ta mantal yuʼun li Babiloniae, laj yichʼik pojel lokʼel, vaʼun jaʼo la svaʼan li tukʼil xchiʼuk pʼijil mosoil li Kristoe. Li vaʼ orae, li yajtuneltak Diose laj yakʼik tal persa sventa xiktaik li jecheʼ chanubtaseletike, li kʼusitik te kapal skʼoplal li yichʼel ta mukʼ santoetike xchiʼuk li kʼusitik tspasik li buchʼutik muʼyuk chichʼik ta mukʼ Diose. Jaʼ yuʼun, ta jkʼel jbatik sventa nomuk oy li kʼusitik xuʼ xikʼubtas li melel yichʼel ta mukʼ Diose. Jech xtok, muʼyuk chkalbetik skʼoplal manolajel xchiʼuk chonolajel li ta Salon sventa Tsobobbaile, yuʼun mu jkʼan jkapbetik skʼoplal li melel yichʼel ta mukʼ Diose (Mar. 11:15, 16).

18, 19. 1) ¿Kʼusi chakʼ jchantik li mukʼta yochebaltak templo akʼbat yil Esekiele? 2) ¿Kʼusi van ta jpastik mi oy buchʼu chalbutik ti muʼyuk lek li smantaltak Jeovae? Albo junuk skʼelobil.

¹⁸ Li mukʼta ochebaletike. ¿Kʼusi chakʼ jchantik li mukʼta ochebaletik ta templo laj yil Esekiele? Li yochebaltak templo ti mukʼtik tajeke jaʼ laj yakʼbe xchan judaetik ti toj tsotsik skʼoplal li smantaltak Jeovae. ¿Kʼusi chakʼ jchantik li avi kʼakʼal eke? Ta skoj ti chkichʼtik ta mukʼ Jeova li ta mukʼta templo ta mantale, ¿mi mu masuk tsots skʼoplal ti lekuk jtalelaltik xchiʼuk ti mu jecheʼuk xijloʼlavane? (Rom. 12:9; 1 Ped. 1:14, 15). Ti kʼuxi lik talel li slajebal kʼakʼale, li Jeovae jech-o sbeiltasoj steklumal sventa xchʼunik li smantaltak sventa talelalile. * Jun skʼelobile jaʼ ti chichʼ lokʼesel ta tsobobbail li buchʼutik tsots tspas smulik ti mu sutes yoʼontonike (1 Kor. 5:11-13). Jech xtok, li skuarto jchabivanejetik ti oy ta jujujot xokon li ta mukʼta ochebaletike, tsvules ta joltik ti buchʼutik muʼyuk lek ch-ilatik yuʼun Diose, mu xuʼ x-ochik li ta templo ta mantal sventa xichʼik ta mukʼ Jeovae. Xuʼ van chkʼot ta Salon sventa Tsobobbail li buchʼu muʼyuk yakal xkuxlebin li smantaltak Jeovae, pe jaʼ to lek ch-ilat yuʼun Jeova mi la xchʼunbe smantaltake (Sant. 4:8). Ti jech chichʼ pasele jaʼ sventa mu sok skʼoplal li melel yichʼel ta mukʼ Dios avi ti pukem tajek skʼoplal li mulivajele.

¹⁹ Li Vivliae yaloj xa onoʼox ti mas to tsok batel li balumil kʼalal skʼan to xlaj li kʼusitik oy ta balumile. Xi chale: «Yantik sok batel li viniketik ti toj chopolike xchiʼuk li jloʼlavanej viniketike, yakal chloʼlavanik xchiʼuk yakal chichʼik loʼlael ek» (2 Tim. 3:13). Epal krixchanoetik avie chalik ti toj vokol ta chʼunel li smantaltak Jeovae, ti voʼneik xa o ti muʼyuk xa sbalile. ¿Mi jaʼ van jech chlik anop ek? Kalbetik junuk skʼelobil, li Vivliae jamal chal ti ‹toj chopol› mi chchiʼin sbaik ta vayel li buchʼutik xchiʼil noʼox sbaik ta vinikal o ta antsile. Li Jeovae tspʼijubtasutik ti toj xibal sba mi lek xa chkiltik li mulivajele (Rom. 1:24-27, 32). Mi oy buchʼu tskʼan chakʼ achʼun  ti muʼyuk lek li smantaltak Jeova ta sventa li mulivajele, ¿mi jaʼ van jech chlik anop ek o jaʼ chachʼun li kʼusi chal Jeovae? Mi jech la jnuptantik junuk veltae, xuʼ me skoltautik mi ta jnopbetik skʼoplal li templo ti mukʼtik tajek yochebal laj yil Esekiele. ¿Kʼusi tsvules ta joltik taje? Jaʼ ti jech-o tsots skʼoplal li smantaltak Jeovae, mu ventauk kʼusi chal o tspas li chopol balumile. ¿Mi jech ta jnoptik kʼuchaʼal li Jtotik ta vinajele xchiʼuk mi ta jpakbetik skʼoplal li kʼusi leke?

20. Li buchʼutik te skʼoplal li ta epal krixchanoetike, ¿kʼuxi chpatbat yoʼontonik li kʼusitik laj yil Esekiele?

²⁰ Li amakʼetike. Muyubaj van tajek Esekiel kʼalal laj yil li mukʼta amakʼe. Ep yajtuneltak Jeova xuʼ van te jmoj xichʼik ta mukʼ. Li avie, mas to chʼul ti bu chichʼik ta mukʼ Jeova li yajtsʼaklomtak Kristoe. Li templo laj yil Esekiele tspatbe yoʼonton li buchʼutik te skʼoplal li ta «epal krixchanoetik» ti jaʼik li yajtuneltak Dios ti te oyik ta mukʼta amakʼ li ta templo ta mantal yuʼun Jeovae (Apok. 7:9, 10, 14, 15). Li Esekiele laj yil jun amakʼ ti te oy ta spat li mukʼta amakʼe, vaʼun te laj yil veʼebaletik, teye xuʼ jmoj slajes judaetik jlomuk li matanal sventa jun oʼontonal ti chichʼ akʼbel Jeovae (Esek. 40:17). Xkoʼolaj ti jaʼ chchiʼinik ta veʼel li Jeovae, jaʼ senyail ti jun yoʼontonik xchiʼuk ti lek xil sbaik xchiʼuke. Avie, muʼyuk xa chkakʼtik milbil matanaletik jech kʼuchaʼal chal li Smantal Moisese, ti jech tspasik toʼox li judaetike. Pe ta to xkakʼtik «milbil matanaletik» kʼalal chkichʼtik ta mukʼ Jeovae, jaʼo kʼalal chkakʼ jloʼiltik xchiʼuk kʼalal chkakʼtik ta ilel xchʼunel koʼontontik ta tsobajeletik  xchiʼuk ta cholmantale (Ebr. 13:15). Ta jmakʼlin jbatik li ta veʼlil ta mantal chakʼbutik Jeovae. Jaʼ yuʼun, jaʼ jech chkaʼi jbatik kʼuchaʼal li xnichʼnabtak Kore ti xi la skʼejintabeik li Jeovae: «Akʼo mi jun noʼox kʼakʼal te oyun li ta avamakʼe, jaʼ toj lek, jaʼ mu sta li jmil kʼakʼal te oyun ta yan partee» (Sal. 84:10).

21. Li buchʼutik tʼujbil chbatik ta vinajele, ¿kʼusi xuʼ xchanik ta stojolal li paleetik akʼbat yil Esekiele?

²¹ Li paleetike. Li Esekiele laj yil ti xkoʼolaj tajek li yochebaltak li bikʼit amakʼ xchiʼuk li mukʼta amakʼe, pe jaʼ noʼox xuʼ x-ochik ta bikʼit amakʼ li paleetik xchiʼuk jlevietike, yan li ta mukʼta amakʼe xuʼ te xjelavik li buchʼutik maʼuk snitilulal paleetike. Taje jaʼ chvulesbat ta sjol paleetik ti skʼan xchʼunik ek li mantaletik yakʼoj Jeova sventa xichʼ ichʼel ta mukʼe. ¿Kʼusi chakʼ jchantik ek? Akʼo mi muʼyuk xa ch-ochik ta pale li yajtsʼaklomtak Kristo avie, pe xi ch-albatik li buchʼutik tʼujbil chbatik ta vinajele: «Li voʼoxuke jaʼoxuk ‹jun tʼujbil nitilulal, paleoxuk ti chatunik kʼuchaʼal ajvaliletike, jaʼoxuk jun chʼul lum›» (1 Ped. 2:9). Ta skʼakʼalil voʼneal Israele ta yan amakʼ chichʼik ta mukʼ Jeova li paleetike. Li avie, li buchʼutik tʼujbil chbatik ta vinajele muʼyuk bu xchʼakoj sbaik ta melel xchiʼuk li yan yajtsʼaklomtak Kristoe, pe jelel kʼu yelan xil sbaik xchiʼuk li Jeovae, yuʼun chʼambilik kʼuchaʼal xnichʼnabtak Dios (Gal. 4:4-6). Pe oy kʼusi ch-akʼbat xchanik ek ta sventa li kʼusi akʼbat yil Esekiele. Li stukike snaʼojik ti xuʼ chichʼik tojobtasel xchiʼuk tukʼibtasel li paleetike. Skotol li yajtsʼaklomtak Kristoe skʼan teuk ta sjolik ti jaʼik «jtsop noʼox» chij xchiʼuk ti jun jchabichij yuʼunike (kʼelo Juan 10:16).

22, 23. 1) Li moletike, ¿kʼusi xuʼ xchanik mi la snopbeik skʼoplal li bankilaletik akʼbat yil Esekiele? 2) ¿Kʼusi van xuʼ xkʼot ta pasel ta mas jelavel?

²² Li bankilale. Li ta templo akʼbat yil Esekiele, li bankilale jaʼ jun krixchano ti tsots yabtele, yuʼun chchabi xchiʼuk tskolta jteklum sventa xakʼik li matanaletike. Pe ta skoj ti maʼuk te likem ta snitilulal paleetike, skʼan xchʼunbe smantal li paleetik kʼalal te oy ta temploe (Esek. 44:2, 3; 45:16, 17; 46:2). Jaʼ jun slekil kʼelobil yuʼunik li buchʼutik oy kʼusi sbainojik li ta tsobobbaile. Skotol li moletik ta tsobobbail xchiʼuk li jkʼelvanejetik ta sirkuitoe skʼan xchʼunbeik smantal xchiʼuk xakʼ sbaik ta ventainel yuʼun li tukʼil xchiʼuk pʼijil mosoile (Ebr. 13:17). Li moletike chakʼik persa skoltael li yajtuneltak Jeova sventa xichʼik ta mukʼ ta tsobobbail xchiʼuk ta cholmantal ti xkoʼolaj kʼuchaʼal chakʼik milbil matanale (Efes. 4:11, 12). Jech xtok, tstsakik ta venta kʼu yelan laj yichʼik tukʼibtasel li bankilaletik ta Israel ta skoj ti muʼyuk lek la spas yabtelike (Esek. 45:9). Li moletike snaʼojik ti xuʼ xichʼik tojobtasel ek xchiʼuk tukʼibtasele. Maʼuk noʼox, yuʼun tstojik ta vokol xchiʼuk snaʼojik ti jaʼ jech chkoltaatik yuʼun Jeova sventa xlekub yabtelik, ti chkʼotik ta lekil jchabichij xchiʼuk ta jkʼelvanejetike (kʼelo 1 Pedro 5:1-3).

²³ Li Jeovae jech-o tsvaʼan jkʼelvanejetik ta Paraiso ti chkʼanvanik  xchiʼuk ti lek xtojobik ta spasel li yabtelike. Ti melel xkaltike, yakal xa chichʼik chanubtasel epal moletik ta tsobobbail sventa lek spas yabtelik li ta Paraisoe (Sal. 45:16). ¿Mi mu kʼupiluk sba ta aʼiel ti jaʼ chbeiltasvanik ta Paraiso li viniketik taje? Mi jech oy ta yoʼonton Jeovae, xuʼ mas to xkaʼibetik smelolal ta tsʼakal li kʼusi akʼbat yil Esekiele xchiʼuk li yan albil kʼopetik ti chal ti chchaʼta yav li melel yichʼel ta mukʼ Diose. Jech xtok, oy kʼusitik ti jaʼ to chkʼot ta pasel ta tsʼakal ti muʼyuk bu jech jnopojtike, yuʼun jaʼ to te chkiltik ta jelavel.

24, 25. Kʼalal akʼbat yil templo li Esekiele, ¿kʼusi chaʼtos laj yil ti jaʼ svinajeb li bendisionetik chakʼbe steklumal Jeovae?

²⁴ Yan kʼusi skʼan teuk ta joltike jaʼ li kʼusi mas labal sba laj yil Esekiele, yuʼun laj yil ti kʼot stuk Jeova li ta temploe xchiʼuk ti laj yalbe ta jamal steklumal ti muʼyuk chikta mi jech-o chichʼik ta mukʼ jech kʼuchaʼal chal smantaltake (Esek. 43:4-9). ¿Kʼusi bendision tstaik li krixchanoetik xchiʼuk li jteklum ti te chchiʼinatik yuʼun Jeovae?

²⁵ Kʼalal akʼbat yil templo li Esekiele, oy chaʼtos kʼusi laj yil ti jaʼ svinajeb li bendisionetik chakʼe: 1) laj yil ti lokʼ talel voʼ ta yolon yochebal templo xchiʼuk ti chyaxub yuʼun li balumil ti bu chbein batele xchiʼuk 2) laj yil ti koʼol smukʼul laj yichʼ chʼakel li lume xchiʼuk ti ta oʼlol kom li yosilal temploe. ¿Kʼu yuʼun ti te tsakal jkʼoplaltike? Yuʼun li avie xkoʼolaj ti ochem ta mukʼta templo ta mantal li Jeovae, jaʼ xkaltik, ti mas xa chʼul kʼu yelan chichʼ ichʼel ta mukʼe, yuʼun lek chil xchiʼuk jaʼ slekubtasoj stuk (Mal. 3:1-4). Li ta kapitulo 19 kʼalal ta 21 li ta livro liʼe, jaʼ ta jkʼelbetik skʼoplal li chaʼtos kʼusitik laj yile.