1, 2. (a) Kha ndima yo fhiraho, ro guda mini kha bono ḽa Hesekiele ḽa thembele? (b) Ri ḓo fhindula mbudziso dzifhio mbili kha ino ndima?

HESEKIELE ho ngo vhona thembele khulwane ya pfanyisedzo ye muapostola Paulo a amba nga hayo nga murahu ha maḓana manzhi a miṅwaha. Ro guda zwenezwi kha ndima yo fhiraho. Ro dovha ra guda uri ḽeneḽo bono ḽo vha ḽo itelwa u funza vhathu vha Mudzimu uri vha dzhiele nṱha nḓila ine a ṱoḓa vha tshi mu gwadamela ngayo kha vhurabeli ho kunaho. Vhathu vho vha vha tshi nga dovha vha ḓiphiṋa nga u vha na vhushaka havhuḓi na Yehova arali fhedzi vha mu gwadamela nga nḓila ine a i ṱoḓa. Ri a kona u zwi pfesesa uri ndi ngani kha ndimana nthihi, Yehova o ombedzela luvhili mbuno ine ya ri: “Hoyu ndi mulayo wa thembele.”—Vhalani Hesekiele 43:12.

² Zwino kha ri fhindule dziṅwe mbudziso mbili. Ya u thoma: Vhayuda vha misini ya Hesekiele vha nga vha vho guda mini kha ḽeneḽi bono nga ha nḓila ine Yehova a ṱoḓa u gwadamelwa ngayo? Phindulo ya yeneyo mbudziso i ḓo ri thusa u fhindula mbudziso ya vhuvhili ine ya ri: Ḽeneḽi bono ḽi ri kwama hani kha ano maḓuvha mavhi a vhufhelo?

3. U vhona havho nnḓu ya Yehova i kha thavha ndapfu zwi nga vha zwo ita hani uri vhathu vha farwe nga ṱhoni?

³ U itela u fhindula mbudziso ya u thoma, kha ri haseledze zwithu zwo khetheaho zwi re kha ḽeneḽi bono ḽa thembele. Thavha ndapfu. Vhathu vha nga vha vho vhambedza zwi re kha bono ḽa Hesekiele na zwithu zwi takadzaho zwe Yesaya a zwi porofita nga ha u vusuluswa. (Yes. 2:2) Fhedzi u vhona havho nnḓu ya Yehova i kha thavha ndapfu, zwo vha funza mini? Zwo vha funza uri vha fanela u dzhiela nṱha vhurabeli ho kunaho na u vhu dzhia vhu ha ndeme u fhira zwithu zwoṱhe. Zwi tou vha khagala uri vhurabeli ho kunaho ndi ha ndeme nahone vhu tea u dzhielwa nṱha ngauri ndi ndugiselelo i bvaho kha Ane a “huliswa u fhira miṅwe midzimu yoṱhe.” (Ps. 97:9) Fhedzi vhathu vho vha vha sa khou zwi ita. Lwa miṅwaha minzhi, vho litshelela vhurabeli ho kunaho vhu tshi tshinyadzwa, ha si tsha ṱhogomelwa nahone ha tshikafhala. A zwi timatimisi uri vhathu vha mbilu dzavhuḓi vho farwa nga ṱhoni musi vha tshi vhona nnḓu khethwa ya Mudzimu i tshi huliswa, i na vhugala ho i teaho nahone i tshi dzhielwa nṱha.

4, 5. Vhathu vhe vha vha vho thetshelesa Hesekiele vha nga vha vho guda mini kha khoro ndapfu dza thembele?

⁴ Khoro ndapfu. Mathomoni a ḽeneḽi bono, Hesekiele o vha o lavhelesa musi muruṅwa a tshi khou kala khoro. Dzo vha dzo lapfa mithara dzi ṱoḓaho u vha 30! (Hesek. 40:14) Nga ngomu ha dzenedzo khoro, ho vha hu na kamara dza vhalindi. Zwenezwi zwoṱhe zwi nga vha zwo amba mini kha vhe vha sedzulusa yeneyo pulane? Yehova o amba na Hesekiele a ri: “Lavhelesa nga vhuronwane muṋango wa u dzhena thembeleni.” Ndi ngani? Ndi ngauri vhathu vho vha vha tshi khou ḓisa vhathu “vha re na mbilu dzi si dzavhuḓi vha songo fumbaho” nḓuni khethwa ya Mudzimu ya vhurabeli. Ho vha na mvelelo dzifhio? Yehova o ri: “Vho tshikafhadza thembele yanga.”—Hesek. 44:5, 7.

⁵ “Vha songo fumbaho” a vho ngo kona u tevhela mulayo u pfalaho we wa thoma misini ya Abrahamu. (Gen. 17:9, 10; Lev. 12:1-3) Fhedzi “vha re na mbilu dzi si dzavhuḓi” vho vha vhe na thaidzo khulwane. Vho omisa ṱhoho, vha hana u livhiswa nga Yehova. Vhathu vho raloho vho vha vha songo fanela u tendelwa u dzhena nḓuni khethwa ya Yehova ya vhurabeli! Yehova u vhenga muhoyo nahone vhathu vhawe vho tendela vhathu vha re na muhoyo vha tshi ḓala nḓuni yawe. Khoro na kamara dza vhalindi dzi re thembeleni i re kha bono, zwo funza vhathu ngudo i pfalaho ya uri: U tshikafhadza thembele nga yeneyi nḓila zwi fanela u fhela! Milayo ya u dzhena nḓuni ya Mudzimu i tea u dzhielwa nṱha. Ndi hone Yehova a tshi ḓo fhaṱutshedza vhathu musi vha tshi mu gwadamela u tendelana na milayo yawe.

6, 7. (a) Yehova u shumisa hani luvhondo lwo tangaho thembele uri vhathu vhawe vha pfesese zwine a khou amba? (b) Vhathu vha Yehova vho vha vho fara hani nnḓu yawe tshifhingani tsho fhiraho? (Sedzani ṱhaluso i re magumoni a siaṱari.)

⁶ Luvhondo lwo tangaho thembele. Tshiṅwe tshithu tsho khetheaho nga thembele i re kha bono, ndi luvhondo lwo tangaho thembele. Hesekiele o amba uri matungo oṱhe a luvhondo ho vha hu mithara dza 1 555, zwine zwa vha khiḽomithara dzi ṱoḓaho u vha 1,6. (Hesek. 42:15-20) Fhedzi zwifhaṱo zwa thembele na miṱa ya  hone, zwo vha zwi khubithi dza 500 kana mithara dza 259 dzi linganaho thungo dzoṱhe. Ho vha hu na fhethu huhulwane u mona na thembele, ho tangiwaho nga luvhondo lwa nga nnḓa. * Lwonolwo luvhondo lwo vha lwo itelwa mini?

⁷ Yehova o ri: “Zwino vha vhudze vha litshe u sa fhulufhedzea havho, vha bvisele zwitumbu zwa mahosi avho kule na nṋe, ndi hone ndi tshi ḓo dzula vhukati havho lwa tshoṱhe.” (Hesek. 43:9) Khamusi “zwitumbu zwa mahosi avho” zwo vha zwi tshi ambela kha midzimu ya zwifanyiso. Yehova o shumisa henefho fhethu huhulwane u mona na thembele hu re kha bono ḽa Hesekiele, zwa tou nga u khou ri: “Bviselani kule zwenezwi zwithu zwi ṋengisaho. Ni songo vhuya na zwi ḓisa hafha.” Arali vho ita uri vhurabeli havho vhu dzule ho kuna, Yehova o vha a tshi ḓo vha fhaṱutshedza, a dzula vhukati havho.

8, 9. Vhathu vha nga vha vho guda mini kha nḓila ye Yehova a kaidza ngayo vhanna vha re na vhuḓifhinduleli?

⁸ Hu kaidzwa vhanna vha re na vhuḓifhinduleli. Yehova o kaidza vhanna vha re na vhuḓifhinduleli vhuhulwane na u vha eletshedza. O zwi ita nga lufuno. O kaidzesa Vhalevi vhe vha mu ṱutshela musi vhathu vha tshi thoma u gwadamela midzimu ya zwifanyiso. Fhedzi o khoḓa vharwa vha Tsadoko “vhe vha ṱhogomela nnḓu [yawe] khethwa musi Vhaisiraele vha tshi [mu] ṱutshela.” O haṱula tshigwada tshiṅwe na tshiṅwe nga nḓila yo teaho na u vha khathutshela zwi tshi ya nga zwe vha ita. (Hesek. 44:10, 12-16) Na vharangaphanḓa vha Isiraele vho kaidzeswa.—Hesek. 45:9.

⁹ Yehova o zwi sumbedza zwavhuḓi uri vhanna vha re na vhuḓifhinduleli ha u ranga phanḓa, vha fanela u ḓifhindulela khae nga ha nḓila ye vha ita ngayo mishumo yavho. Na vhone vho vha vha tshi tea u kaidzwa, u khakhululwa na u laiwa. Zwo fhambanaho na zwenezwo, vho vha vho fanela u ranga phanḓa kha u tevhedza milayo ya Yehova!

10, 11. Ndi mini zwi sumbedzaho uri vhaṅwe vho vhuyaho vhuthubwani vho guda kha bono ḽa Hesekiele?

¹⁰ Naa vho vhuyaho vhuthubwani vho shumisa zwe vha zwi guda kha bono ḽa Hesekiele? A ri koni u ḓivha uri vhenevho vhanna na vhafumakadzi vha fhulufhedzeaho vha tshenetsho tshifhinga vho humbula mini nga ha ḽeneḽi bono ḽo khetheaho. Fhedzi Ipfi ḽa Mudzimu ḽi ri vhudza zwinzhi nga ha zwe vhathu vho vhuyaho vhuthubwani vha zwi ita na nḓila ye vha dzhia ngayo vhurabeli ha Yehova ho kunaho. Naa vho shumisa zwe vha zwi guda kha bono ḽa Hesekiele? Ri nga amba uri vho lingedza, zwihuluhulu musi ri tshi vha vhambedza na vho makhulukuku wavho vhe vha shandukela Mudzimu vha sa athu u iswa vhuthubwani Babele.

¹¹ Vhanna vha fhulufhedzeaho vha ngaho muporofita Hagai, Sakaria, Esera we a vha e tshifhe na mukopololi na Nehemia we a vha e muvhusi, vhoṱhe vho shuma vhukuma u itela u funza vhathu zwi re kha bono ḽa Hesekiele ḽa thembele. (Esera 5:1, 2) Vho funza vhathu uri vhurabeli ho kunaho vhu fanela u huliswa na uri vhu fanela u vha ha ndeme u fhira zwithu zwoṱhe. (Hag. 1:3, 4) Vho ita vhungoho ha uri hu ṱhonifhiwe milayo ya Yehova ya vhurabeli ho  kunaho. Sa tsumbo, Esera na Nehemia vho kaidza vhathu uri vha pandele vhafumakadzi vhavho vha dziṅwe tshaka ngauri vho vha vha tshi khou thithisa vhushaka havho na Mudzimu. (Vhalani Esera 10:10, 11; Neh. 13:23-27, 30) Hu pfi mini nga u gwadamela midzimu ya zwifanyiso? Zwi vhonala u nga musi lushaka lu tshi vhuya vhuthubwani, lwo vha lu tshi vho vhenga u gwadamela midzimu ya zwifanyiso, samusi zwo vha zwi tshi dzulela u vha fasha. Hu pfi mini nga vhotshifhe, vharangaphanḓa na vhakololo? Samusi zwo sumbedzwa kha bono ḽa Hesekiele, na vhone vho kaidzwa na u khakhululwa nga Yehova. (Neh. 13:22, 28) Vhanzhi vho ḓiṱukufhadza, vha thetshelesa musi vha tshi laiwa.—Esera 10:7-9, 12-14; Neh. 9:1-3, 38.

12. Yehova o fhaṱutshedza hani vho vhuyaho vhuthubwani?

¹² Zwenezwo zwo ita uri Yehova a fhaṱutshedze vhathu vhawe. Vhathu vho vha na vhushaka ha tsini na Yehova, vha takala, vha vha vhathu vho dzudzanyeaho u fhira naho hu lini. (Esera 6:19-22; Neh. 8:9-12; 12:27-30, 43) Ndi ngani? Ndi ngauri vhathu vho thoma u tshila u tendelana na milayo ya Yehova ya vhurabeli ho kunaho. Vhathu vhanzhi vha re na mbilu dzavhuḓi vho kwamea nga zwe vha zwi guda kha bono ḽa thembele. Nga u tou pfufhifhadza, ri nga ri vhathu vho thubiwaho vho vhuyelwa nga bono ḽa Hesekiele ḽa thembele nga nḓila mbili dza ndeme. (1) Ḽo vha gudisa nga ha milayo ya vhurabeli ho kunaho na nḓila ye vha vha vha tshi fanela u i tevhedza ngayo. (2) Ḽo vha khwaṱhisedza uri zwe ha porofitiwa nga hazwo zwi ḓo itea. Ḽo dzula ḽo amba uri vhurabeli ho kunaho  vhu ḓo vusuluswa na nḓila ine Yehova a ḓo fhaṱutshedza ngayo vhathu vhawe, arali vha dzula vhe kha vhurabeli ho kunaho. Fhedzi ṋamusi ri ṱoḓa u ḓivha uri: Naa zwi re kha ḽeneḽi bono zwi khou itea zwino?

13, 14. (a) Ri zwi ḓivha hani uri zwi re kha bono ḽa Hesekiele ḽa thembele zwi khou itea tshifhingani tshashu? (b) Ḽeneḽi bono ḽi ri vhuyedza nga nḓila dzifhio mbili ṋamusi? (Sedzani na bogisi 13A, “Thembele Dzi Sa Fani, Ngudo Dzi Sa Fani.”)

¹³ Naa zwa vhukuma bono ḽa Hesekiele ḽa thembele ḽi a shuma kha riṋe ṋamusi? Ee! Ri songo hangwa uri hu na zwithu zwine zwa fana zwi re kha bono ḽa Hesekiele ḽa nnḓu khethwa ya Mudzimu i re kha “thavha ndapfu” na zwi re kha vhuporofita ha Yesaya ha uri “thavha ine nnḓu ya Yehova ya vha khayo,” yo vha i tshi ḓo “vhewa hune ya fhira dziṅwe thavha.” Yesaya o ri vhudza nga ho livhaho uri zwe a zwi porofita zwo vha zwi tshi ḓo itea “maḓuvhani a vhufhelo.” (Hesek. 40:2; Yes. 2:2-4; sedzani na Mika 4:1-4.) Honovhu vhuporofita ho thoma u shuma maḓuvhani a vhufhelo u bva nga 1919 musi vhurabeli ho kunaho vhu tshi vusuluswa na u dzhielwa nṱha, zwa tou nga ho vhewa nṱha ha thavha ndapfu. *

¹⁴ A zwi timatimisi uri bono ḽa Hesekiele ḽi a shuma kha vhurabeli ho kunaho ṋamusi. Samusi ḽeneḽi bono ḽo vhuyedza Vhayuda vho thubiwaho vha zwifhingani zwa kale, na riṋe ḽi a ri vhuyedza nga nḓila mbili. (1) Ḽi ri gudisa nḓila ya u bvela phanḓa ri tshi tshila u tendelana na milayo ya Yehova ya vhurabeli ho kunaho. (2) Ḽi ri khwaṱhisedza uri vhurabeli ho kunaho vhu ḓo vusuluswa u ya nga zwe zwa porofitiwa na uri Yehova u ḓo fhaṱutshedza vhathu vhawe.

15. Ri fanela u humbula mini musi ri tshi guda nga ha thembele i re kha bono ḽa Hesekiele?

¹⁵ Zwino kha ri sedze zwiṅwe zwithu zwo khetheaho zwi re kha bono ḽa Hesekiele. Kha ri zwi dzhie ri tshi khou tshimbila na Hesekiele musi a tshi khou tandula thembele i mangadzaho i re kha bono. Ri songo hangwa uri heyi a si yone thembele khulwane ya pfanyisedzo; fhedzi ri khou ṱoḓa u guda khayo zwine ra nga zwi shumisa kha vhurabeli hashu ṋamusi. Ri nga guda mini?

16. Ri nga guda mini kha u kaliwa ha zwithu zwoṱhe zwi re kha bono ḽa Hesekiele? (Sedzani tshifanyiso tsha u thoma.)

¹⁶ Ndi ngani zwithu zwi tshi khou kaliwa? Zwenezwi zwidodombedzwa zwinzhi-zwinzhi, zwi nga konḓela muvhali uri a zwi pfesese musi a tshi humbula nga ha Hesekiele o sedza muruṅwa a penyaho sa koporo a tshi khou kala thembele nga vhuronwane, u katela na mbondo, dzikhoro, kamara dza vhalindi, miṱa na aḽeṱare. (Hesek. 40:1–42:20; 43:13, 14) Fhedzi kha ri humbule nga ha mbuno dza ndeme dzine ra nga dzi wana nga u ḓivha mielo ya zwenezwi zwithu zwoṱhe. Yehova u khou ombedzela nḓila ine milayo yawe ya vha ya ndeme ngayo. Ndi ene ane a tea u ri vhudza uri ri tshile hani, hu si vhathu. Vhathu vhane vha amba uri a zwi na ndavha uri Mudzimu u gwadamelwa hani vha vha vha tshi khou khakha. Zwiṅwe hafhu, musi hu tshi kaliwa thembele nga vhuḓalo, Yehova o vha a tshi khou khwaṱhisedza uri vhurabeli ho kunaho vhu ḓo  vusuluswa zwa vhukuma. U tou fana na yeneyo mielo, zwe Mudzimu a zwi fhulufhedzisa zwi ḓo itea zwa vhukuma. Nga zwenezwo, Hesekiele u khwaṱhisedza uri vhurabeli ho kunaho vhu ḓo vusuluswa zwa vhukuma maḓuvhani a vhufhelo!

17. Luvhondo lwo tangaho muṱa wa thembele lu ri humbudza mini ṋamusi?

¹⁷ Luvhondo lwo tangaho thembele. Samusi ro zwi haseledza, Hesekiele o vhona luvhondo lwo tangaho thembele yoṱhe i re kha bono. Lwonolwo luvhondo lwo vha lu tshi humbudza vhathu vha Mudzimu uri vha iledze tshiṅwe na tshiṅwe tshine tsha nga tshikafhadza vhurabeli ho kunaho na nnḓu ya Mudzimu. (Vhalani Hesekiele 43:7-9.) Na riṋe ri ṱoḓa nyeletshedzo i fanaho ṋamusi! Kristo o vhea mulanda wawe a fhulufhedzeaho na wa vhuṱali nga 1919, musi vhathu vha Mudzimu vho no vhofhololwa vhuthubwani Babele Ḽihulu. Vho vha vho fhedza miṅwaha minzhi vho thubiwa. U bva nga tshenetsho tshifhinga, vhathu vha Mudzimu vho ḓidina nga maanḓa u itela u fhelisa pfunzo dza mazwifhi na mikhuvha i tshimbidzanaho na u gwadamela midzimu ya zwifanyiso na vhuhedeni. Ri ita zwoṱhe zwine ra nga kona u itela u iledza tshiṅwe na tshiṅwe tshine tsha nga tshikafhadza vhurabeli ho kunaho. Zwiṅwe hafhu, a ri iti zwa mabindu Holoni dzashu dza Ṱhanzi dza Yehova, a ri ṱanganyisi zwenezwi zwithu zwi si zwa ndeme na vhurabeli hashu.—Marko 11:15, 16.

18, 19. (a) Ri nga guda mini kha khoro ndapfu dza thembele i re kha bono? (b) Ri fanela u ita mini musi vhaṅwe vha tshi ṱoḓa u ita uri milayo ya Yehova i vhonale i si ya ndeme? Ṋeani tsumbo.

¹⁸ Khoro ndapfu. Ri nga guda mini musi ri tshi elekanya nga ha khoro ndapfu dze Hesekiele a dzi vhona? Dzenedzo khoro dza thembele i re kha bono, dzo funza Vhayuda vho thubiwaho uri milayo ya Yehova ya vhuḓifari ndi ya vhuimo ha nṱha. Arali zwo vha zwo tou ralo zwifhingani zwa kale, hu pfi mini nga ṋamusi? Ri khou gwadamela Yehova ri thembeleni khulwane ya pfanyisedzo. Naa vhuḓifari havhuḓi vhu si ha muhoyo a si ha ndeme nga maanḓa ṋamusi? (Vharoma 12:9; 1 Pet. 1:14, 15) Kha enea maḓuvha a vhufhelo, Yehova u bvela phanḓa a tshi livhisa vhathu vhawe uri vha tevhedze milayo yawe ya vhuḓifari. * Sa tsumbo, vhane vha ita tshivhi vha sa rembuluwi vha a bviswa tshivhidzoni. (1 Vhakor. 5:11-13) Zwiṅwe hafhu, kamara dza vhalindi dzi re khoroni dzi nga ri humbudza uri musi zwi tshi ḓa kha u gwadamela Yehova, a hu na ane a dzhena arali a sa takalelwi nga Mudzimu. Sa tsumbo, muthu ane a ḓiita Mukriste musi e vhukati ha vhaṅwe Vhakriste, a nga ḓi ya Holoni ya Ṱhanzi dza Yehova, fhedzi Yehova a nga si mu takalele arali a sa lugisa mafhungo awe. (Yak. 4:8) Zwenezwi zwi tsireledza vhurabeli ho kunaho kha ḽino shango ḽo ḓalaho u ḓifara luvhi.

¹⁹ Bivhili yo amba uri ḽino shango ḽi ḓo tshinyala ḽi sa athu u fheliswa. Ri vhala uri “vhavhi na vhane vha fhura vha ḓo ṋaṋa u ita vhuvhi, vha tshi fhura vhaṅwe na vhone vha tshi fhurwa.” (2 Tim. 3:13) Vhathu vhanzhi ṋamusi vha khou fhurwa uri vha humbule uri milayo ya Yehova ya vhuḓifari i a konḓa, yo fhelelwa nga tshifhinga kana yo khakhea. Naa na inwi ni ḓo tenda u fhurwa? Sa tsumbo, naa ni nga tendelana na muthu ane a lingedza u ni fhura uri  ni humbule uri mulayo wa Mudzimu u ambaho nga ha vhanna kana vhafumakadzi vhane vha ita zwa vhudzekani nga tshavho wo khakhea? Kana ni ḓo tendelana na Yehova Mudzimu ane Ipfi ḽawe ḽa amba uri vhane vha ita zwenezwo zwithu, “vha ita zwi nengisaho”? Mudzimu u ri sevha uri ri songo tenda u ḓifara luvhi. (Vharoma 1:24-27, 32) Arali ra ḓiwana ri kha honoho vhuimo, ndi zwa ndeme u humbula nga ha bono ḽa Hesekiele ḽa thembele i re na khoro ndapfu. Ri songo hangwa uri Yehova ha tsitseli fhasi milayo yawe hu sa londwi mitsiko ya ḽino shango ḽivhi. Naa ri a tendelana na Khotsi ashu wa ṱaḓulu ra ima na zwo lugaho?

20. Vha “gogo ḽihulu” vha ṱuṱuwedzea hani musi vha tshi humbula nga ha bono ḽa Hesekiele?

²⁰ Miṱa ya thembele. Hesekiele a nga vha o takala vhukuma musi a tshi vhona nḓila ye muṱa wa nga nnḓa wa thembele wa vha wo hula ngayo. A nga vha o humbula uri vhashumeli vhanzhi vha Yehova vha ḓo mu gwadamela henefho vho takala. Ṋamusi, Vhakriste vha gwadamela Mudzimu fhethu hukhethwa hu fhiraho ha misini ya Hesekiele. “Gogo ḽihulu” ḽa vhane vha gwadamela Yehova muṱani wa nga nnḓa wa thembele yawe ya pfanyisedzo, vha a ṱuṱuwedzea musi vha tshi humbula nga ha bono ḽa Hesekiele. (Nzumb. 7:9, 10, 14, 15) Hesekiele o vhona miṱa ye ya vha i na kamara dza u ḽela, he vhagwadameli vha Mudzimu vha vha vha tshi nga ḽa hone vhoṱhe zwiṱhavhelo zwa u pfumedzana zwe vha ḓa nazwo. (Hesek. 40:17) Nga yeneyo nḓila, zwo vha zwi tshi tou nga vha khou ḓiphiṋa nga u ḽa na Yehova Mudzimu, zwine zwa sumbedza uri vha na vhushaka havhuḓi nae! Ṋamusi, a ri ṋekedzi zwiṱhavhelo u fana na Vhayuda vhe vha vha vhe nga fhasi ha Mulayo wa Mushe. Musi ri  tshi shela mulenzhe kha vhurabeli ho kunaho nga u fhindula na u amba nga ha zwine ra zwi tenda musi ri miṱanganoni kana tsimuni, ri vha ri tshi khou ṋekedza “tshiṱhavhelo” tsha u “renda Mudzimu.” (Vhahev. 13:15) Ri dovha ra kanzwiwa nga zwine Yehova a ri gudisa zwone. Ndi ngazwo ri tshi ḓipfa u fana na vharwa vha Kora vhe vha imbela Yehova vha ri: “Ḓuvha ḽithihi ndi miṱani yau zwi khwine u fhira maḓuvha a tshigidi ndi huṅwe fhethu!”—Ps. 84:10.

21. Vhakriste vho ḓodzwaho vha nga guda mini kha vhotshifhe vha re kha bono ḽa Hesekiele?

²¹ Vhotshifhe. Hesekiele o vhona uri khoro dze vhotshifhe na Vhalevi vha vha vha tshi dzhena ngadzo muṱani wa nga ngomu, dzo vha dzi tshi fana na khoro dze dza vha dzi tshi shumiswa nga tshaka dza vhathu vhane vha si vhe vhotshifhe. Yeneyi yo vha i nḓila yavhuḓi ya u humbudza vhotshifhe uri na vhone vha tea u tshila u tendelana na milayo ya Mudzimu ya vhurabeli ho kunaho. Ri nga ri mini ṋamusi? Kha vhashumeli vha Mudzimu ṋamusi, a hu na vhane vha bebwa vhe kha mutevhe wa vhotshifhe, fhedzi Vhakriste vho ḓodzwaho vha vhudzwa uri: “Ni ‘lushaka lwo nangwaho, vhotshifhe vhane vha shuma sa mahosi.’” (1 Pet. 2:9) Vhotshifhe vha Isiraele vho vha vha tshi gwadamela Mudzimu vhe kha muṅwe muṱa wa thembele. Ṋamusi, Vhakriste vho ḓodzwaho a vho ngo fhandekana na vhaṅwe vhashumeli vha Yehova, fhedzi vha ḓiphiṋa nga vhushaka ho khetheaho na Yehova sa vhana vhawe. (Vhagal. 4:4-6) Fhedzi vhenevho vhaḓodzwa vha nga guda zwithu zwa ndeme kha bono ḽa Hesekiele. Sa tsumbo, vha a zwi ḓivha uri vhotshifhe vho vha vha tshi eletshedzwa na u kaidzwa. Ndi zwavhuḓi uri Vhakriste vhoṱhe vha humbule uri ri “sambi ḽithihi” ḽi shumaho fhasi ha “mulisa muthihi.”—Vhalani Yohane 10:16.

22, 23. (a) Vhahulwane vha tshivhidzo vha nga guda mini kha murangaphanḓa we ha ambiwa nga hae kha bono ḽa Hesekiele? (b) Hu nga kha ḓi itea mini tshifhingani tshi ḓaho?

²² Murangaphanḓa. Kha bono ḽa Hesekiele, murangaphanḓa ndi muthu wa ndeme. Murangaphanḓa o vha e si wa lushaka lwa vho tshifhe nahone o vha a tshi tea u ḓiṱukufhadza kha vhotshifhe musi e thembeleni. Fhedzi o vha a tshi shuma sa mulavhelesi na u thusa vhathu musi vha tshi ṋekedza zwiṱhavhelo. (Hesek. 44:2, 3; 45:16, 17; 46:2) Ndi tsumbo kha vhanna vha Vhakriste ṋamusi vha re na vhuḓifhinduleli tshivhidzoni. Ngauralo, vhahulwane vha tshivhidzo, u katela na vhalavhelesi vha dalelaho zwivhidzo, vha fanela u dzula vha tshi ḓiṱukufhadza kha mulanda a fhulufhedzeaho. (Vhahev. 13:17) Vhahulwane vha tshivhidzo vha a shuma vhukuma u itela u thusa vhathu vha Mudzimu u ṋekedza zwiṱhavhelo zwavho zwa u renda Mudzimu musi vhe miṱanganoni ya Vhukriste na tsimuni. (Vhaef. 4:11, 12) Vhahulwane vha tshivhidzo vha tea u ṱhogomela nḓila ye Yehova a kaidza ngayo vharangaphanḓa vha Isiraele nge vha shumisa maanḓa avho luvhi. (Hesek. 45:9) Na vhahulwane vha tshivhidzo a vho ngo fanela u humbula uri a zwi ṱoḓei uri vha ṋewe nyeletshedzo na u khakhululwa. Zwo fhambanaho na zwenezwo, vha a zwi dzhiela nṱha musi Yehova a tshi vha thusa u khwinisa uri vha kone u vha vhalisa na vhalavhelesi vha khwine.—Vhalani 1 Petro 5:1-3.

 ²³ Yehova u ḓo bvela phanḓa a tshi ri ṋea vhalavhelesi vha re na vhukoni na lufuno Pharadisoni tshifhingani tshi ḓaho. Ri nga amba uri vhahulwane vha tshivhidzo vhanzhi ṋamusi vha khou gudiswa uri vha nga vha hani vhalisa vha re na vhukoni vhane vha ḓo thusa Pharadisoni. (Ps. 45:16) Naa a zwi ri takadzi musi ri tshi humbula uri vhenevho vhanna vha ḓo vha phaṱhutshedzo nngafhani shangoni ḽiswa? U fana na nḓila ye ra pfesesa ngayo vhuporofita ha u vusuluswa, na bono ḽa Hesekiele ri ḓo ḽi pfesesa khwine nga tshifhinga tsha Yehova tsho teaho. Khamusi zwiṅwe zwa zwithu zwi re kha ḽeneḽo bono zwi ḓo itea nga nḓila khulwane tshifhingani tshi ḓaho, ine ri nga si kone u i pfesesa nga vhuḓalo zwino. Ri ḓo zwi vhona tshifhinga tshi tshi swika.

24, 25. Bono ḽa Hesekiele ḽo fanyisa hani nḓila ine Yehova a ḓo fhaṱutshedza ngayo vhathu vhawe arali vha farelela kha vhurabeli ho kunaho?

²⁴ Musi ri tshi phetha, kha ri humbule zwithu zwihulwane zwe zwa itea kha bono ḽa Hesekiele. Yehova o mbo ḓi dzhena kha yeneyo thembele i re kha bono, a fhulufhedzisa vhathu vhawe uri u ḓo dzula e henefho arali fhedzi vha dzula vha tshi tevhedza nga u fhulufhedzea milayo yawe ya vhurabeli ho kunaho. (Hesek. 43:4-9) U vha hone ha Yehova zwi ḓo kwama hani vhathu vhawe na shango ḽavho?

²⁵ Kha ḽeneḽo bono, hu sumbedzwa zwithu zwivhili zwine zwa khwaṱhisedza nḓila ine Yehova a ḓo fhaṱutshedza ngayo vhathu vhawe: (1) Mulambo u elela u tshi bva nḓuni khethwa ya thembele, wa ita uri zwithu zwi re shangoni zwi tshile na u ita uri shango ḽi none; na (2) shango ḽa khethekanywa zwavhuḓi na nga mielo yo teaho, thembele ya dzudzwa vhukati. Ri nga pfesesa hani eneo mafhungo ṋamusi? Zwino ri khou tshila tshifhingani tshine Yehova o no dzhena, a kunakisa na u ṱanganedza vhurabeli ho khetheaho u fhira hoṱhe vhune ha vha thembele khulwane ya pfanyisedzo. (Maḽ. 3:1-4) Kha Ndima 19 u swika kha Ndima 21 ya yeneyi bugu, ri ḓo haseledza nga ha zwenezwo zwithu zwivhili zwe ha porofitiwa nga hazwo.