1-3. (a) Aha do na mambahen si Hesekiel tarsonggot jala aha do na diboto ibana lao masa tikki dihancurhon Jerusalem? (b) Aha do sukkun-sukkun na lao tabahas?

TARSONGGOT do si Hesekiel mangida pangalaho ni halak Jahudi na murtad i. Ai marhite parnidaan, dipatudu Debata do tu ibana akka ulaon na dihagigihon na diulahon nasida di bagas joro di Jerusalem. * Nungnga mangalo nasida jala dibahen dang badia pusat ibadat na sittong na di Israel. Alai dang holan bagas joro i na dibahen ramun. Sude do halak na di Juda mangulahon na jahat, jala songon na so boi be dipadenggan luat i. Massai haccit do roha ni Jahowa mangida bangso na pinillitna i. Ibana mandok tu si Hesekiel, “Muruk situtu ma Au tu nasida.”​—Hes. 8:17, 18.

² Pasti marsak do si Hesekiel tikki dibege naung muruk Jahowa, jala na lao dihancurhon Jerusalem dohot bagas joro i. Olo do ra sukkun-sukkun rohana, ‘Boha ma akka halak na setia na di kota i? Diselamatton do nasida? Molo diselamatton, songon dia ma carana?’ Alai dang pola leleng sukkun-sukkun rohana. Dung dibege hukuman na lao dibahen tu Jerusalem, dibege ibana do muse di parnidaan i adong soara na gogo manjou akka halak na mangulahon panguhuman sian Debata. (Hes. 9:1) Pasti las do roha ni  si Hesekiel dung diida na masa di parnidaan i. Sian i diboto ma, dang sude halak dipamate. Tetap do selamat anggo halak na setia!

³ Ala naeng marujung nama portibi na jahat on, pasti sukkun-sukkun do rohatta, ‘Ise do na lao selamat tikki dihancurhon portibi on?’ Lao mamboto alusna, tabahas ma tolu sukkun-sukkun on: (1) Aha do na diida si Hesekiel? (2) Songon dia do parnidaan i saut di tikki ni si Hesekiel? (3) Aha do lapatanna tu hita?

4. Aha do na diida jala na dibege si Hesekiel?

⁴ Aha do muse na diida si Hesekiel jala na dibege ibana di parnidaan i? (Jaha Hesekiel 9:1-11.) Diida ma di bagas joro i adong pitu bawa “na ro sian gerbang parginjang na menghadap tu utara”. Mungkin jonok do on tu patung na mambahen Debata muruk, manang tu inganan ni akka borua na mangandungi Dewa Tamus. (Hes. 8:3, 14) Bawa na pitu i masuk tu alaman na di bagasan jala jongjong di labbung ni langgatan na sian tombaga. Dang na lao mangalehon pelean nasida, ai di tikki i dang olo be Debata manjalo akka pelean na di bagas joro i. Onom sian bawa i “mamboan attuk-attuk”. Alai asing do anggo bawa na papituhon i. Mamakke baju linen do ibana, jala dang diboan sinjata. Alai diboan ibana do “inganan ni alat tulis ni sekretaris”, manang menurut surat na di toru diboan do “inganan ni tinta ni sekretaris”.

5, 6. Aha do na boi tasimpulhon sian akka halak na dilehon tanda i? (Ida gambar di mula ni parsiajaran.)

⁵ Aha do na diulahon bawa na mamboan inganan ni alat tulis i? Adong do tugas na massai penting dijalo ibana sian Jahowa. Didok Jahowa do tu ibana, “Dalani ma sude kota Jerusalem, jala lehon ma tanda tu dahi ni akka halak na sai holsoan. Ai marsak situtu do nasida alani ulaon na huhagigihon na diulahon di kota i.” Tikki dibege si Hesekiel i, mungkin diingot ibana ma na masa najolo. Diingot ma aha na diulahon akka natua-tua ni halak Israel na setia. Dibahen nasida do tanda di kusen ni pintu. Dipispisson do mudar tusi lao gabe tanda asa unang dohot anak siakkanganna dipamate. (Hes. 12:7, 22, 23) Saonari, sarupa do tujuan ni tanda di dahi na dibahen bawa na di parnidaan i? Na lao selamat do halak na dilehon tanda i tikki dihancurhon Jerusalem?

⁶ Boi ma taboto alus ni sukkun-sukkun on molo dung taida akka halak na songon dia do na dilehon tanda. Tanda i dibahen tu dahi ni akka halak na “holsoan” jala na ‘marsak situtu alani ulaon na dihagigihon na diulahon di kota i’. Aha ma na boi tasimpulhon taringot akka halak na ditandai i? Nasida marsak dang holan ala dang badia be bagas joro i dibahen akka halak na manomba patung. Alai ala nungnga gok di kota i halak na mangulahon na jahat, dohot na mangulahon seks na so patut. (Hes. 22:9-12) Asing ni i, sian hata dohot pambahenan ni nasida, dipatuduhon do na  marsak situtu nasida. Magigi do nasida tu akka halak na di sakalilingna, jala marsitutu do nasida asa boi setia mangulahon ibadat na sittong. Alani i ma dipatuduhon Jahowa asi ni rohana, jala dang na lao dipamate nasida.

7, 8. Aha do tugas ni onom bawa na mamboan attuk-attuk i, jala songon dia do ujung ni na masa i?

⁷ Aha do tugas ni onom bawa na mamboan attuk-attuk i? Dibege si Hesekiel do disuru Jahowa nasida mangihutton bawa na mamboan inganan ni alat tulis i. Nasida ma na disuru pamatehon sude halak. Alai anggo halak na mandapot tanda di dahi, dang dipamate. Jahowa mandok, “Ulahon ma i mulai sian inganakku na badia i.” (Hes. 9:6) Mulai ma nasida mangulahon tugasna i sian pusat ni kota Jerusalem, i ma bagas joro na so badia i. Parjolo do dipamate “akka bawa na matua na adong di jolo ni bagas joro”, i ma 70 halak pamimpin ni Israel na mangalehon dupa tu akka dewa.​—Hes. 8:11, 12; 9:6.

 ⁸ Songon dia do ujung ni na masa i? Diida jala dibege si Hesekiel do ro bawa i paboahon tu Jahowa, didok do, “Nungnga huulahon be sude dos songon na diparettahon Ho tu au.” (Hes. 9:11) Jadi aha do na masa tu penduduk ni Jerusalem? Tutu do selamat halak na setia tikki dihancurhon Jerusalem?

9, 10. Akka ise do halak na setia na selamat sian Jerusalem na dihancurhon i, jala aha do na boi taparsiajari sian nasida?

⁹ Jaha 2 Kronika 36:17-20. Saut ma surirang ni si Hesekiel i taon 607 SM, tikki ro tentara ni Babel manghancurhon Jerusalem dohot bagas joro. Dos songon ‘makkuk na sian mas di tangan ni Jahowa’, songon i ma Jahowa mamakke Babel lao mangusehon rimasna tu Jerusalem na so setia i. (Jer. 51:7) Sude halak do dipamate? Daong. Dipaboa do di parnidaan i, na lao adong do halak selamat sian tentara ni Babel.​—1 Mus. 18:22-33; 2 Ptr. 2:9.

¹⁰ Adong do halak na setia na selamat, termasuk ma i halak na sian pinoppar ni si Rekab, si Ebedmelek halak Etiopia, Panurirang Jeremia, dohot si Baruk sekretarisna. (Jer. 35:1-19; 39:15-18; 45:1-5) Sian parnidaan ni si Hesekiel, boi ma taboto nasida ma halak na “sai holsoan”, jala na “marsak situtu” alani sude ulaon na dihagigihon na diulahon di Jerusalem. (Hes. 9:4) Sebelum dihancurhon Jerusalem, pasti dipatudu do na magigi nasida mangida hajahaton na disi. Jala pasti marsitutu do nasida asa boi torus mangulahon ibadat na sittong. Alani i ma nasida boi diselamatton.

11. Ise do na digombarhon onom bawa na mamboan attuk-attuk i dohot bawa na mamboan inganan ni alat tulis sekretaris i?

¹¹ Memang tutu do adong tanda dibahen di dahi ni halak na setia i? Dang dipaboa di Bibel na markaliling si Hesekiel manang panurirang na asing di Jerusalem lao mangalehon tanda tu dahi ni akka halak. Jadi parnidaan ni si Hesekiel i paboahon aha na masa di surgo do, na so boi diida jolma. Bawa na mamboan inganan ni alat tulis ni sekretaris dohot onom bawa na mamboan attuk-attuk i, manggombarhon akka suru-suruan na setia jala na toktong rade mangulahon lomo ni roha ni Jahowa. (Ps. 103:20, 21) Jadi suru-suruanna do dipakke Jahowa lao manghukum Jerusalem na so setia i. Marhite mangalehon tanda tu dahi ni akka halak na lao diselamatton, dipastihon akka suru-suruan do asa holan halak na so setia na dipamate, dang dohot halak na setia i.

12, 13. (a) Boasa diusehon Jahowa murukna tu Jerusalem, jala boasa pos rohatta na lao diulahon Ibana muse songon i di tikkinta on? (b) Na manggombarhon Gareja do Jerusalem na so setia i? (Ida kotak “Tutu do Jerusalem na Murtad I Manggombarhon Gareja?”)

¹² Na lao taida ma di tikkinta on, paroon ni Debata hukuman na so hea dope masa. Didok do di Bibel, “Ai masa ma di tikki i hasusaan bolon na so hea dope masa sian mulai adong portibi on sahat tu saonari. Jala dang na lao masa be i muse.” (Mat. 24:21) Alai sukkun-sukkun do ra rohatta: Naung ditottuhon do halak na songon dia na ikkon dipamate? Adong do tanda dilehon tu halak  na mangulahon ibadat na sittong asa diselamatton nasida? Na lao saut do muse di tikkinta on surirang taringot bawa na mamboan alat tulis ni sekretaris i? Alusna, ido. Sian dia taboto? Taida ma muse parnidaan ni si Hesekiel i.

¹³ Diingot hamu dope boasa diusehon Jahowa rimasna tu Jerusalem? Parrohahon ma muse Hesekiel 9:8, 9. (Jaha.) Dirippu si Hesekiel do na lao mate ‘sude halak na mangolu’ di kota i tikki dihancurhon Jerusalem. Tikki marsak ibana mamikkiri i, dipaboa Jahowa ma opat alasan boasa ikkon dihukum kota i. Na parjolo, Jahowa mandok, “nungnga tung massai balga situtu hasalaan” ni bangso i. * Na paduahon, “nungnga tung gok mudar ni halak na use” di luat ni Juda. Na patoluhon, “gok hajahaton” do Jerusalem ibu kota ni harajaon Juda. Na paopatton, licik do roha ni akka halak na disi. Didok nasida do “dang diida Jahowa” pangalaho ni nasida na jahat i. Songon i do tong na masa di portibi on kan? Gok do halak saonari mangulahon na jahat jala dang porsea tu Debata. Alai dang hea muba-uba Jahowa. Pasti muruk do Ibana tu portibi on dos songon di tikki ni si Hesekiel. (Jak. 1:17; Mal. 3:6) Pos do rohatta, sarupa do tugas ni bawa na mamboan alat tulis ni sekretaris i dohot onom bawa na mamboan attuk-attuk i di tikkinta saonari on.

14, 15. Aha do bukti na patuduhon dilehon Jahowa do sipasingot andorang so dibahen Ibana panguhumanna?

¹⁴ Songon dia do parnidaan i saut di tikkinta on? Ikkon jolo taparsiajari do songon dia parnidaan i saut najolo asa boi taattusi aha naung masa saonari on, jala aha na lao masa di ari na naeng ro. Taparrohahon ma piga-piga naung saut dohot na lao saut dope di ari na naeng ro sian parnidaan ni si Hesekiel i.

¹⁵ Dilehon Jahowa do sipasingot andorang so diulahon Ibana panguhumanna. Songon naung tabahas di Pasal 11, dipillit Jahowa do si Hesekiel “gabe panjaga ni halak Israel”. (Hes. 3:17-19) Mulai taon 613 SM, dipaboa si Hesekiel do tu halak Israel na lao dihancurhon Jerusalem. Akka panurirang na asing pe, termasuk ma i si Jesaya dohot si Jeremia, dipaboa nasida do sipasingot na sarupa. (Jes. 39:6, 7; Jer. 25:8, 9, 11) Di tikkinta on, dipillit Jahowa do Jesus lao mangalantik punguan na metmet sian akka halak na dimiahi. Nasida disuru dang holan lao mangalehon mangan akka naposona na asing, manang halak na mangulahon ibadat na sittong, alai disuru do nasida paingotton akka halak na lao masa hasusaan bolon satokkin nai.​—Mat. 24:45.

16. Dohot do akka naposo ni Debata mangalehon tanda tu akka halak na lao diselamatton?

¹⁶ Dang dohot naposo ni Jahowa mangalehon tanda tu akka halak na setia na lao diselamatton. Taingot ma, dang adong disuru si Hesekiel markaliling di Jerusalem lao mambahen tanda tu dahi ni jolma. Dos songon i ma saonari, dang disuru hita mambahen tanda  tu akka halak. Alai disuru do hita marbarita na uli. Tapatudu ma na massai penting di hita tugas on, semangat ma hita paboahon barita na uli taringot Harajaon ni Debata, jala tapaingot ma akka halak naung jonok ujung ni portibi na jahat on. (Mat. 24:14; 28:18-20) Molo taulahon i, boi ma taurupi halak na tulus rohana mangulahon ibadat na sittong.​—1 Tim. 4:16.

17. Aha do na ikkon diulahon setiap halak asa dilehon tu ibana tanda i?

¹⁷ Asa boi selamat sian panguhuman na lao ro i, ikkon dipatudu setiap halak do haporseaonna. Songon naung tabahas, adong do halak na selamat tikki dihancurhon Jerusalem taon 607 SM. Alai dang otomatis nasida boi selamat. Andorang so dihancurhon Jerusalem, dipatudu do na magigi nasida tu hajahaton na adong disi, jala marsitutu mangulahon ibadat na sittong. Jadi andorang so dihancurhon akka na di portibi on, setiap halak ikkon patuduhon na “holsoan” jala na “marsak situtu” rohana mangida na masa saonari. Ikkon tarida do sian hata dohot pangalaho, na marsitutu nasida naeng mangulahon ibadat na sittong. Songon dia do carana mangulahon i? Ikkon las do roha ni nasida manjalo barita na uli. Ikkon marsitutu do maniru parange ni Kristus. Dilehon nasida ma dirina tu Jahowa jala tardidi. Ikkon setia do nasida torus mangurupi ulaon ni akka anggi ni Kristus. (Hes. 9:4; Mat. 25:34-40; Eps. 4:22-24; 1 Ptr. 3:21) Ikkon diulahon nasida do sudena i, jala ikkon  torus do diulahon ibadat na sittong sahat tu na ro hasusaan bolon. Ai holan halak sisongon i do na dilehon tanda lao diselamatton.

18. (a) Andigan jala songon dia do Jesus mangalehon tanda tu akka halak? (b) Porlu do dibahen tanda tu akka halak na dimiahi na setia?

¹⁸ Jesus do na lao mambahen tanda tu akka halak na setia na lao diselamatton i. Di tikki ni si Hesekiel, dohot do akka suru-suruan mambahen tanda tu dahi ni halak na setia. Di tikkinta on, bawa na mamboan alat tulis ni sekretaris i manggombarhon tugas ni Jesus di ari na naeng ro. Di tikki ro ibana “di bagasan hasangaponna”, martugas do ibana gabe Hakim tu sude bangso. (Mat. 25:31-33) Na lao ro nama ibana di hasusaan bolon, na masa dukkon dihancurhon agama palsu. * Di tikki masa hasusaan bolon, dang leleng sebelum dimulai Armagedon, na lao diuhumi Jesus ma akka halak manang dibahen ibana tanda, ise do halak na gabe biru-biru manang hambing. Diuhumi ma “punguan bolon” jala ditandai gabe biru-biru asa dapotna “hangoluan na saleleng ni lelengna”. (Pgk. 7:9-14; Mat. 25:34-40, 46) Songon dia do halak na dimiahi na setia? Dang pola porlu dilehon tu nasida tanda asa boi selamat lewat sian Armagedon. Ai andorang so mate manang andorang so dimulai hasusaan bolon, jaloon ni nasida do meterai na parpudi sian Debata. Di tikki naung ditottuhon sebelum Armagedon, nungnga diangkat nasida sude tu surgo.​—Pgk. 7:1-3.

19. Ise do dongan ni Jesus manguhum portibi on? (Ida kotak “Marsak Situtu, Mangalehon Tanda, Manghancurhon​—Andigan jala Songon dia?”)

 ¹⁹ Na lao ro ma Jesus Kristus, Raja na di surgo rap dohot tentarana manghukum portibi on. Di parnidaan ni si Hesekiel, onom bawa na mamboan attuk-attuk i mulai manghancurhon Jerusalem, dukkon sae bawa na marbaju linen mambahen tanda tu akka halak. (Hes. 9:4-7) Dos songon i ma nang saonari, na lao dihancurhon Jesus ma akka na di portibi on dukkon sae ibana manguhumi sude halak jala mangalehon tanda tu akka biru-biru na lao diselamatton i. Di Armagedon, dipimpin Jesus ma pasukan tentarana na di surgo, i ma na 144.000 donganna raja i dohot akka suru-suruan na badia lao marporang mangalo portibi na jahat on. Dihancurhon ma akka na di portibi on, jala diboan ma akka halak na mangulahon ibadat na sittong tu tano na imbaru, na bebas sian hajahaton.​—Pgk. 16:14-16; 19:11-21.

20. Aha do parsiajaran na boi tadapot sian parnidaan ni si Hesekiel taringot bawa na mamboan alat tulis ni sekretaris i?

²⁰ Mandok mauliate do hita ala godang do parsiajaran na tadapot jala na patoguhon roha sian parnidaan i. Pos situtu do rohatta na so rap dipamate Jahowa halak na sittong dohot halak na jahat. (Ps. 97:10) Nungnga taboto be aha na lao taulahon saonari asa dilehon tu hita tanda na lao diselamatton. Marsitutu ma hita paboahon barita na uli tu halak na holsoan jala na marsak alani hajahaton ni portibi ni Sibolis. Tapasingot ma nasida naung jonok ujung ni portibi on. Molo taulahon i, parsidohot ma hita mangulahon tugas na massai penting lao mangurupi halak na marpangalaho na denggan jala na tama lao mangolu salelengna. (Ul. 13:48) Molo taurupi nasida, gabe dohot ma nasida mangulahon ibadat na sittong, dilehon ma tanda asa boi selamat, jala boi ma nasida masuk tu tano na imbaru na bebas sian na jahat.