1-3. (a) Unsay nakita ni Ezequiel nga dili siya makatuo, ug unsay iyang nahibaloan bahin sa kalaglagan sa Jerusalem? (b) Unsang mga pangutana ang atong hisgotan?

 SI Ezequiel di gyod makatuo! Nakakita siyag panan-awon bahin sa dulumtanang mga butang nga ginahimo sa apostatang mga Hudiyo diha sa templo sa Jerusalem. * Gihugawan sa maong mga rebelde ang mismong dapit nga maoy sentro sa putling pagsimba sa Israel. Pero dili lang ang templo ang ilang gihugawan. Ang yuta sa Juda napunog kapintasan ug wala nay purohan nga mabag-o. Kay nasuko pag-ayo si Jehova sa gihimo sa iyang piniling katawhan, iyang giingnan si Ezequiel: “Ipakita nako ang akong grabeng kasuko.”​—Ezeq. 8:17, 18.

² Nasakitan gyod si Ezequiel sa pagkahibalo nga si Jehova nasuko sa Jerusalem ug sa kanhing sagradong templo niini ug nga kini laglagon! Seguradong naghunahuna si Ezequiel: ‘Unsay mahitabo sa mga matinumanon nga anaa sa siyudad? Maluwas ba sila? Kon mao, sa unsang paagi?’ Dili na kinahanglang maghulat pag dugay si Ezequiel sa tubag. Pagkadungog niya bahin sa grabeng paghukom batok sa Jerusalem, nakadungog pod dayon siyag kusog nga tingog nga nagpatawag sa mga tigpahamtang sa paghukom sa Diyos. (Ezeq.  9:1) Sa nagpadayon ang panan-awon, nahibaloan sa propeta​—ug nahupay siya pag-ayo​—nga dili tanan ang laglagon. Oo, dunay maluwas!

³ Samtang nagkaduol ta sa kataposan niining daotang sistema sa mga butang, lagmit maghunahuna pod ta kon kinsay maluwas sa umaabot nga dakong kalaglagan. Busa hisgotan nato kini: (1) Unsay sunod nga nakita ni Ezequiel diha sa panan-awon? (2) Sa unsang paagi natuman ang panan-awon sa iyang panahon? (3) Unsay kahulogan niini nga panan-awon sa atong panahon?

4. Unsay sunod nga nakita ug nadungog ni Ezequiel sa panan-awon?

⁴ Unsay sunod nga nakita ug nadungog ni Ezequiel sa panan-awon? (Basaha ang Ezequiel 9:1-11.) Dihay pito ka lalaki nga “naggikan sa ibabaw nga ganghaan nga nag-atubang sa amihanan,” lagmit duol sa nahimutangan sa simbolo sa pagselos o sa dapit diin ang mga babaye nanghilak tungod sa diyos nga si Tamuz. (Ezeq. 8:3, 14) Ang pito ka lalaki nangadto sa sulod nga hawanan sa templo ug mibarog duol sa halaran nga tumbaga. Pero ang maong mga lalaki wala moadto aron magdalag halad. Ang mga halad nga itanyag sa maong templo dili na dawaton ni Jehova. Ang unom sa maong mga lalaki nagbarog, nga “ang matag usa nagbitbit sa iyang hinagiban nga pangdugmok.” Pero lahi kaayo ang ikapitong lalaki. Siya nagbestig lino, ug dili hinagiban ang iyang dala, kondili “tintiro sa sekretaryo” o, sumala sa footnote, “sudlanan sa tinta sa usa ka eskriba.”

5, 6. Unsay atong ikahinapos bahin niadtong gimarkahan? (Tan-awa ang hulagway sa sinugdan sa kapitulo.)

⁵ Unsay himoon sa lalaki nga dunay tintiro? Nakadawat siyag asaynment gikan kang Jehova mismo: “Libota ang tibuok siyudad sa Jerusalem, ug markahi ang agtang sa mga tawo nga nanghupaw ug nag-agulo tungod sa tanang dulumtanang butang nga ginahimo diha sa siyudad.” Lagmit nianang tungora, nahinumdoman ni Ezequiel ang matinumanon nga Israelinhong mga ginikanan nga nagwisik ug dugo sa ibabaw sa ilang pultahan ug sa haligi sa ilang pultahan ingong timaan nga ang ilang panganayng anak luwason sa kalaglagan. (Ex. 12:7, 22, 23) Sa panan-awon ni Ezequiel, ang marka ba sa agtang nga ibutang sa lalaki nga dunay tintiro samag katuyoan​—ingong timaan nga ang dunay marka angayng luwason sa kalaglagan sa Jerusalem?

⁶ Ang tubag maklaro dihang atong hisgotan ang basehanan sa marka. Ibutang kini sa agtang niadtong “nanghupaw ug nag-agulo” tungod sa dulumtanang mga butang nga “ginahimo diha sa siyudad.” Busa unsay atong ikahinapos bahin niadtong gimarkahan? Usa niana mao nga sila naguol pag-ayo dili lang tungod sa idolatriya nga gihimo diha sa templo kondili sa tanan sab nga kapintasan, imoralidad, ug kahugawan sa tibuok Jerusalem. (Ezeq. 22: 9-12) Dugang pa, lagmit wala nila itago ang ilang gibati. Seguradong makita sa mga pulong ug binuhatan sa maong mga tawong matarong ug kasingkasing nga sila nagdumot gayod sa nagakahitabo sa yuta ug nga sila debotado sa putling pagsimba. Tungod sa iyang kaluoy, luwason ni Jehova kining mga tawong matarong ug kasingkasing.

7, 8. Unsaon pagtuman sa mga lalaki nga nagbitbit ug mga hinagiban nga pangdugmok ang ilang asaynment, ug unsay nahitabo?

⁷ Unsaon pagtuman sa unom ka lalaki nga nagbitbit ug mga hinagiban nga pangdugmok ang ilang asaynment? Nadunggan ni Ezequiel ang instruksiyon ni Jehova kanila: Sundi ang lalaki nga may tintiro ug patya ang tanan gawas niadtong minarkahan sa ilang agtang. “Pagsugod mo sa akong sangtuwaryo,” si Jehova nagsugo. (Ezeq. 9:6) Ang mga tiglaglag magsugod sa ilang buluhaton sa sentro sa Jerusalem, ang templo, nga dili na sagrado para kang Jehova. Ang unang patyon mao ang “tigulang nga mga lalaki nga diha  sa atubangan sa balay”​—ang 70 ka ansiyano sa Israel nga atua sa templo ug naghalad ug insenso sa bakak nga mga diyos.​—Ezeq. 8:11, 12; 9:6.

⁸ Unya unsay nahitabo? Samtang si Ezequiel nagpadayon sa pagtan-aw ug pagpaminaw, ang lalaki nga may tintiro mireport kang Jehova: “Nabuhat na nako ang sumala gayod sa imong gisugo kanako.” (Ezeq. 9:11) Seguradong makahunahuna ta: ‘Unsa kahay nahitabo sa mga molupyo sa Jerusalem? Naa kahay matinumanon nga naluwas sa kalaglagan?’

9, 10. Kinsa ang pipila sa mga matinumanon nga naluwas sa kalaglagan sa Jerusalem, ug unsay atong ikahinapos bahin kanila?

⁹ Basaha ang 2 Cronicas 36:17-20. Ang tagna ni Ezequiel natuman niadtong 607 B.C.E. dihang gilaglag sa kasundalohan sa Babilonya ang Jerusalem ug ang templo niini. Samag ‘kopa diha sa kamot ni Jehova,’ ang mga Babilonyanhon mao ang nahimong instrumento ni Jehova sa pagbubo ug silot batok sa dili matinumanong Jerusalem. (Jer. 51:7) Ang tanan ba gilaglag? Wala. Gitagna sa panan-awon ni Ezequiel nga naay mga tawo nga dili laglagon sa mga Babilonyanhon.​—Gen. 18:22-33; 2 Ped. 2:9.

¹⁰ Ubay-ubay ang mga matinumanon nga naluwas, apil ang mga Rekabita, si Ebed-melek nga Etiopianhon, si propetang Jeremias, ug si Baruk nga iyang sekretaryo. (Jer. 35:1-19; 39:15-18; 45:1-5) Base sa panan-awon ni Ezequiel, tingali makahinapos ta nga ang maong mga tawo “nanghupaw ug nag-agulo tungod sa tanang dulumtanang butang” nga ginahimo sa Jerusalem. (Ezeq. 9:4) Sa wala pa ang kalaglagan, seguradong gipakita nila ang ilang bug-os nga pagsalikway sa pagkadaotan ug ang ilang debosyon sa putling pagsimba, ug tungod niana duna silay kahigayonan nga maluwas.

11. Kinsay girepresentahan sa unom ka lalaki nga nagbitbit ug mga hinagiban nga pangdugmok ug sa lalaki nga dunay tintiro sa sekretaryo?

¹¹ Ang maong mga matinumanon literal bang gimarkahan para sa kaluwasan? Wala tay mabasa nga dunay tawo​—si Ezequiel man o ubang propeta—​nga milibot sa Jerusalem ug literal nga nangmarka sa agtang sa mga matinumanon. Busa dayag nga ang panan-awon ni Ezequiel nagpakita kon unsay nagakahitabo sa langit nga dili makita sa literal nga mga mata. Ang lalaki nga dunay tintiro sa sekretaryo ug ang unom ka lalaki nga dunay mga hinagiban nga pangdugmok nagrepresentar sa matinumanong espiritung mga linalang ni Jehova nga kanunayng andam sa pagtuman sa iyang kabubut-on. (Sal. 103:20, 21) Walay duhaduha nga gigamit ni Jehova ang iyang mga anghel aron giyahan ang pagpahamtang ug paghukom sa dili matinumanong Jerusalem. Samag nangmarka sa agtang niadtong mga luwason, giseguro sa mga anghel nga dili tanan ang malaglag; dunay maluwas.

12, 13. (a) Nganong gibubo ni Jehova ang iyang kasuko sa Jerusalem, ug nganong makadahom ta nga ingon ana sab ang himoon ni Jehova sa atong panahon? (b) Ang dili matinumanong Jerusalem ba nagsimbolo sa Kakristiyanohan? Ipatin-aw. (Tan-awa ang kahong “Ang Jerusalem ba Nagsimbolo sa Kakristiyanohan?”)

¹² Karon hapit na tang makakitag paghukom sa Diyos nga wala pa gyod mahitabo sukad​—ang “dakong kasakitan nga wala pa mahitabo sukad sa sinugdan sa kalibotan hangtod karon, ug dili na mahitabo pag-usab.” (Mat. 24:21) Samtang gihulat nato kanang importante kaayong hitabo, makapangutana ta: Pilion ba ang patyon sa umaabot nga kalaglagan ug dili kay bisan kinsa na lang? Markahan ba ang putling mga magsisimba ni Jehova para sa kaluwasan? Sa laing pagkasulti, ang panan-awon ba ni Ezequiel bahin sa lalaki nga may tintiro dunay katumanan sa atong panahon? Ang tubag sa maong tulo ka pangutana maoy oo. Nganong makahinapos kita niana? Aron atong mahibaloan, balikan nato ang panan-awon ni Ezequiel.

¹³ Imo bang mahinumdoman kon nganong gibubo ni Jehova ang iyang kasuko sa karaang Jerusalem? Tan-awag balik ang Ezequiel 9:8, 9. (Basaha.) Dihang nahadlok si Ezequiel nga basig mangamatay ang “tanang nahibilin sa Israel” sa umaabot nga kalaglagan, si Jehova mihatag ug upat ka rason alang sa paghukom. Una, “ang kasaypanan” sa nasod “dako gayod kaayo.” * Ikaduha, ang yuta sa Juda “napuno sa pag-ula ug dugo.” Ikatulo, ang Jerusalem, nga kaulohan sa gingharian sa Juda, “napuno sa pagkadaotan.” Ikaupat, gipakamatarong sa katawhan ang ilang daotang binuhatan pinaagi sa pagkombinsir sa ilang kaugalingon nga si Jehova “wala makakita” niana. Dili ba mao sab ni ang ginahimo niining kalibotan nga ubos kaayog moral, bayolente, daotan, ug walay pagtuo? Kay si Jehova “dili mausab,” seguradong ang mga buhat nga nakaaghat sa iyang matarong nga kasuko sa panahon ni Ezequiel makapasuko gihapon niya karon. (Sant. 1:17; Mal. 3:6) Busa makadahom ta nga ang unom ka lalaki nga nagbitbit ug mga hinagiban nga pangdugmok ug ang lalaki nga may tintiro dunay buluhaton sa atong panahon!

14, 15. Unsang mga pananglitan ang nagpakita nga si Jehova magpasidaan sa katawhan sa dili pa ang kalaglagan?

¹⁴ Pero sa unsang paagi natuman ang panan-awon ni Ezequiel sa atong panahon? Kon balikan nato kon sa unsang paagi ang panan-awon natuman kaniadto, mahibaloan nato kon unsay atong madahom karon ug sa umaabot. Matikdi ang pipila ka kaugmaran nga atong nakita o makita ingong katumanan sa tagna ni Ezequiel.

¹⁵ Si Jehova magpasidaan sa katawhan sa dili pa ang kalaglagan. Sumala sa atong nakita sa Kapitulo 11 niini nga publikasyon, gitudlo ni Jehova si Ezequiel “ingong tigbantay sa panimalay ni Israel.” (Ezeq. 3:17-19) Sugod sa 613 B.C.E., klarong gipasidan-an ni Ezequiel ang Israel sa umaabot nga kalaglagan. Ang ubang propeta, apil si Isaias ug Jeremias, nagpasidaan sab bahin sa katalagman nga modangat sa Jerusalem. (Isa. 39:6, 7; Jer. 25:8, 9, 11) Sa atong panahon, si Jehova, pinaagi sa Kristo, migamit ug gamayng grupo sa dinihogang mga alagad dili lang sa pagpakaon sa putling mga  magsisimba, ang mga sulugoon sa panimalay, kondili sa pagpasidaan sab nila bahin sa dakong kasakitan nga hapit na gyong mahitabo.​—Mat. 24:45.

16. Kita ba ingong katawhan ni Jehova ang momarka niadtong luwason? Ipatin-aw.

¹⁶ Ang katawhan ni Jehova dili maoy momarka niadtong luwason. Hinumdomi nga si Ezequiel wala ingni sa paglibot sa Jerusalem aron markahan ang uban para sa kaluwasan. Sa susama, ang katawhan ni Jehova karon wala sugoa sa pagmarka niadtong luwason. Hinunoa, ingong mga sulugoon sa espirituwal nga panimalay sa Kristo, kita gisugo sa pagsangyaw. Atong gipakita nga giseryoso nato kini nga sugo pinaagi sa madasigong pagsangyaw sa maayong balita sa Gingharian sa Diyos ug sa pagpaningkamot sa pagpasidaan nga kining daotang kalibotan hapit na gyong matapos. (Mat. 24:14; 28:18-20) Busa naa tay mahimo sa pagtabang sa mga tawong matarong ug kasingkasing nga dawaton ang putling pagsimba.​—1 Tim. 4:16.

17. Unsay angayng himoon sa mga indibiduwal karon aron mamarkahan sila sa umaabot?

¹⁷ Aron maluwas sa umaabot nga kalaglagan, kinahanglang pamatud-an karon sa mga indibiduwal ang ilang pagtuo. Sumala sa ato nang nakat-onan, kadtong naluwas sa pagkalaglag sa Jerusalem niadtong 607 B.C.E. nagpakita na sa ilang bug-os nga pagsalikway sa pagkadaotan ug sa ilang debosyon sa putling pagsimba sa wala pa ang kalaglagan. Ingon sab niana karon. Sa dili pa mahitabo ang kalaglagan, ang mga tawo kinahanglang ‘manghupaw ug mag-agulo’​—nga maguol pag-ayo—​sa pagkadaotan niining kalibotana. Ug imbes itago ang  ilang pagbati, angay nilang ipakita sa pulong ug buhat nga sila debotado sa putling pagsimba. Unsaon nila kana paghimo? Kinahanglan nilang dawaton ang mensahe nga gisangyaw karon, mosugod pagsul-ob sa samag Kristo nga personalidad, magpabawtismo ingong simbolo sa ilang dedikasyon kang Jehova, ug maunongong mosuportar sa mga igsoon sa Kristo. (Ezeq. 9:4; Mat. 25:34-40; Efe. 4:22-24; 1 Ped. 3:21) Kadto lang naningkamot sa paghimo niana karon​—ug makasulod sa dakong kasakitan ingong putling mga magsisimba—​ang mamarkahan para sa kaluwasan.

18. (a) Sa unsang paagi ug kanus-a markahan ni Jesu-Kristo kadtong luwason? (b) Kinahanglan bang markahan ang matinumanong mga dinihogan? Ipatin-aw.

¹⁸ Si Jesus ang magmarka niadtong luwason. Sa panahon ni Ezequiel, ang mga anghel dunay papel sa pagmarka sa mga matinumanon para sa kaluwasan. Sa modernong katumanan, ang lalaki nga dunay tintiro sa sekretaryo nagrepresentar kang Jesu-Kristo dihang siya ‘moabot diha sa iyang himaya’ ingong Maghuhukom sa tanang kanasoran. (Mat. 25:31-33) Ang pag-abot ni Jesus mahitabo sa dakong kasakitan, human sa kalaglagan sa bakak nga relihiyon. * Nianang importanteng panahon, una magsugod ang Armagedon, hukman ni Jesus ang katawhan ingong karnero o kanding. Kadtong sakop sa “dakong panon” hukman, o markahan, ingong karnero, nga nagpakitang sila “makadawat ug kinabuhing walay kataposan.” (Pin. 7:9-14; Mat. 25:34-40, 46) Komosta man ang matinumanong mga dinihogan? Dili sila kinahanglang markahan aron maluwas sa Armagedon. Madawat  nila ang ilang kataposang selyo una sila mamatay o una magsugod ang dakong kasakitan. Dayon sa panahon una magsugod ang Armagedon, kadtong naa pa sa yuta dad-on sa langit.​—Pin. 7:1-3.

19. Kinsay makauban ni Jesus sa pagpahamtang sa paghukom niining sistemaha sa mga butang? (Tan-awa ang kahong “Pagpanghupaw ug Pag-agulo, Pagmarka, Pagdugmok​—Kanus-a ug Sa Unsang Paagi?”)

¹⁹ Ang langitnong Hari, si Jesu-Kristo, ug ang iyang langitnong kasundalohan magpahamtang ug paghukom niini nga sistema sa mga butang. Sa panan-awon ni Ezequiel, ang unom ka lalaki nga nagbitbit ug mga hinagiban nga pangdugmok nagsugod pagpanglaglag dihang nahuman sa lalaki nga nagbestig lino ang pagmarka. (Ezeq. 9:4-7) Sa susama, ang umaabot nga kalaglagan magsugod dihang mahukman na ni Jesus ang mga tawo sa tanang kanasoran ug mamarkahan na niya ang mga karnero para sa kaluwasan. Unya sa gubat sa Armagedon, si Jesus manguna sa langitnong kasundalohan, nga maglakip sa balaang mga anghel ug sa tanang 144,000 ka kauban niyang magmamando, sa pagpahamtang ug paghukom niining daotang kalibotan, nga bug-os maglaglag niini ug magluwas sa putling mga magsisimba ngadto sa matarong nga bag-ong kalibotan.​—Pin. 16:14-16; 19:11-21.

20. Unsang makapalig-ong mga leksiyon ang atong nakat-onan sa panan-awon ni Ezequiel bahin sa lalaki nga dunay tintiro sa sekretaryo?

²⁰ Mapasalamaton gyod ta sa makapalig-ong mga leksiyon nga atong nakat-onan sa panan-awon ni Ezequiel bahin sa lalaki nga dunay tintiro sa sekretaryo! Kita makasalig gayod nga dili iapil ni Jehova ang mga matarong dihang iyang laglagon ang mga daotan. (Sal. 97:10) Nahibalo ta kon unsay angay natong buhaton karon aron mamarkahan sa umaabot para sa kaluwasan. Ingong mga magsisimba ni Jehova, determinado tang himoon ang tanan natong maarangan sa pagsangyaw sa maayong balita ug sa pagpasidaan niadtong nanghupaw ug nag-agulo tungod sa pagkadaotan sa kalibotan ni Satanas. Busa duna tay pribilehiyo nga motabang niadtong “nakiling sa pagdawat sa kamatuoran nga motultol sa kinabuhing walay kataposan” sa pagduyog nato sa putling pagsimba, ug tungod niana duna silay kahigayonan nga mamarkahan para sa kaluwasan ug mabuhi sa matarong nga bag-ong kalibotan sa Diyos.​—Buh. 13:48.