1-3. a) ¿Mbaʼérepa Ezequiel tuichaiterei oñemondýi, péro mbaʼépa otrankilisa chupe? b) ¿Mbaʼe pregúntapa ñambohováita?

¡EZEQUIEL tuichaiterei oñemondýi ha ndoikuaái mbaʼépa heʼíta! Koʼangeténte haʼe ohecha kuri peteĩ visiónpe umi judío apóstata ojapoha umi mbaʼe oporombojeguarúva Jerusalén témplope. * Umi rrevélde ningo omongyʼa pe lugár iñimportantevéva oĩva Israélpe ojeadora vaʼerãhápe Jehovápe añoiténte. Péro ndahaʼéi pe témplonte la omongyʼáva hikuái, síno Judá território kompletoite henyhẽ violénsiagui ha naipohãvéima hikuái. Jehovápe omorrenegaiterei ipuévlo ojapóva, upévare heʼi Ezequiélpe: “Rreniégo reheve ajapóta la ajapo vaʼerã” (Ezeq. 8:17, 18).

² Ezequiel ningo ombyasyeterei oikuaávo Jehová orrenegaiterei ha ohunditaha Jerusalén ha itémplo, hiʼarive upe lugár ymave sagrádo vaʼekue. Oiméne Ezequiel oñeporandu: “¿Mbaʼépa oikóta umi ifiélvagui oĩva pe siudápe? ¿Ojesalvátapa hikuái? Ha oiméramo upéicha, ¿mbaʼéichapa oikóta upéva?”. Ezequiel natekotevẽi kuri areterei ohaʼarõ oñembohovái hag̃ua chupe koʼã pregúnta. Ohendu rire mbaʼéichapa oñekondena Jerusalénpe, haʼe ohendu peteĩ oñeʼẽ hatãva ha ohenóiva umi okumplítavape Jehová huísio  (Ezeq. 9:1). Okontinuávo pe visión, Ezequiel tuichaiterei oñetrankilisa oikuaávo noñehundimoʼãiha oimeraẽvapente, síno ojeporavotaha umi omeresévape ojesalva.

³ Ñande jaikuaa ko múndo aña oñehundi potaitemaha, ha ikatu ñañeporandu hína mávapa ojesalváne oiko vove pe ñehundi guasu. Jahechamína upéicharõ koʼã mbaʼe: 1) ¿Mbaʼépa Ezequiel ohecha upe rire pe visiónpe? 2) ¿Mbaʼéichapa upe visión oñekumpli vaʼekue Ezequiel tiémpope? 3) ¿Mbaʼépa heʼise upe visión ko tiémpope?

4. ¿Mbaʼépa Ezequiel ohecha ha ohendu upe rire pe visiónpe?

⁴ ¿Mbaʼépa Ezequiel ohecha ha ohendu upe rire pe visiónpe? (Elee Ezequiel 9:1-11). Ezequiel ohecha 7 kuimbaʼe “ouha hína pe okẽ ijyvatevévaguio ládo, pe omañáva nórte gotyo”, oiméne ag̃uieténte upe oĩhágui pe taʼanga ombopochýva Ñandejárape, térã umi kuña hasẽháme pe dios Tamuz rehe (Ezeq. 8:3, 14). Umi 7 kuimbaʼe oike pe témplo korapy hyepypeguápe ha opyta pe altár de kóvre ojejapoha sakrifísio ypýpe. Péro haʼekuéra ndoofresemoʼãi kuri sakrifísio, pórke Jehová ndoaseptamoʼãvéima umi sakrifísio ojeofreséva pe témplope. Umi kuimbaʼe apytégui, 6 “ogueru ipópe hiʼárma oporohundi hag̃ua”. Pe sieteha katu idiferénte umi ótrogui, haʼe ijao de líno, péro ndorekói ni peteĩ árma, síno “peteĩ tínta ryru oipurúva umi sekretário”.

5, 6. ¿Mbaʼépa ñaaprende umi oñemarka vaʼekuégui? (Ehecha pe taʼanga oĩva iñepyrũme).

⁵ ¿Mbaʼépa ojapóta kuri pe kuimbaʼe orekóva pe tínta ryru? Jehová voi omeʼẽ chupe peteĩ traváho iñimportánteva: “Tereho Jerusalén siuda tuichakuére, ha emoĩ peteĩ márka umi hénte syváre, umi osuspira ha ipyahẽva ojejapo haguére pe siudápe umi mbaʼe vaiete ha oporombojeguarúva”. Oiméne upe jave Ezequiel imanduʼa rakaʼe umi israelita ifiélva ojapo vaʼekuére. Haʼekuéra ningo omoĩ vaʼekue tuguy hóga rokẽ márkore, ha upéva oservi kuri de señál ani hag̃ua ojejuka umi itaʼyrakuéra ypykuépe (Éx. 12:7, 22, 23). Ezequiel visiónpe pe kuimbaʼe orekóva pe tínta ryru omoĩ peteĩ márka umi hénte syváre, ¿heʼisépa upéva pe persóna ikatutaha ojesalva oñehundi vove Jerusalén?

⁶ Pe rrespuésta hesakã porã ñapensáramo mávapepa oñemarka vaʼerã isyvápe: “Umi osuspira ha ipyahẽva” hína “ojejapo haguére pe siudápe” umi mbaʼe vaiete ha oporombojeguarúva. ¿Mbaʼépa ñaaprende umi oñemarka vaʼekuégui? Haʼekuéra ningo oñeñandu vaieterei ojeadora haguére umi taʼanga pe témplope, péro ndahaʼéi upévante, síno oĩ haguére avei hetaiterei ivioléntova, hekovaíva ha ojapóva mbaʼe vai Jerusalénpe (Ezeq. 22:9-12). Avei oiméne haʼekuéra noñomíri umi mbaʼe oñandúva entéro mbaʼe vai ojejapóvare. Umi mbaʼe heʼi ha ojapóvare ohechauka ojapoha Jehová oipotáva,  ha ombojeguaruha chupekuéra entéro mbaʼe oikóva upe paíspe. Jehová oiporiahuverekóta kuri koʼã hénte ipyʼaporãvape ha osalváta chupekuéra.

7, 8. a) ¿Mbaʼéichapa okumpli vaʼerã hembiapo umi 6 kuimbaʼe orekóva ipópe hiʼárma oporohundi hag̃ua? b) ¿Mbaʼépa oiko raʼe opávo pe visión?

⁷ ¿Mbaʼéichapa okumpli vaʼerã hembiapo umi 6 kuimbaʼe orekóva ipópe hiʼárma oporohundi hag̃ua? Ezequiel ohendu Jehová heʼiha chupekuéra: Pesegi pe kuimbaʼe orekóvape pe tínta ryru, ha pejuka enterovépe, péro ndapejukái vaʼerã ni peteĩ orekóvape pe márka isyváre. Jehová heʼi avei: “Peñepyrũ vaʼerã pe che lugár sagrádogui” (Ezeq. 9:6). Koʼã kuimbaʼe oñepyrũ vaʼerã itraváho pe lugár iñimportantevévagui oĩva Jerusalénpe, térã pe témplogui, koʼág̃a ndahaʼevéimava sagrádo Jehovápe g̃uarã. Umi primeroite ojejukátava haʼe hína “umi kuimbaʼe ijedáva oĩva pe témplo renondépe”. Umíva hína umi 70 kuimbaʼe omoakãva Israel rogayguápe oĩva pe témplope, ha ohapýva insiénso umi dios fálsope (Ezeq. 8:11, 12; 9:6).

 ⁸ ¿Mbaʼépa oiko raʼe opávo pe visión? Ezequiel osegi omaña ha ohendu pe kuimbaʼe orekóva pe tínta ryru heʼi hague Jehovápe: “Ajapóma upe remanda hagueichaite chéve” (Ezeq. 9:11). ¿Mbaʼépa oiko raʼe umi hénte oikóvagui Jerusalénpe? ¿Ojesalvápa raʼe umi ifiélva Jehovápe? Jahechami.

9, 10. ¿Máva mávapa umi ifiélva ojesalva vaʼekue oñehundírõ guare Jerusalén, ha mbaʼépa ikatu ñaaprende chuguikuéra?

⁹ (Elee 2 Crónicas 36:17-20). Ezequiel profesía oñekumpli vaʼekue áño 607-pe a.C., Babilonia ehérsito ohundírõ guare Jerusalén ha itémplo. “Babilonia haʼe kuri peteĩ kópa de óro Jehová pópe”, ha haʼe ojevale hesekuéra oñohẽ hag̃ua ipochykue Jerusalén ári ha péicha okastiga ipuévlo naiñeʼẽrenduiete vaʼekuépe (Jer. 51:7). ¿Ojejuka piko raʼe enterove persónape? Nahániri. Ezequiel visión oprofetisa vaʼekue oĩtaha unos kuánto ojesalváva umi babilóniogui (Gén. 18:22-33; 2 Ped. 2:9).

¹⁰ Umi ifiélva ojesalva vaʼekue apytépe oĩ vaʼekue umi recabita, pe etíope Ébed-Mélec, proféta Jeremías ha isekretário Baruc (Jer. 35:1-19; 39:15-18; 45:1-5). Jajepyʼamongetáramo Ezequiel visión rehe, jahechakuaa umi ojesalva vaʼekue haʼeha “umi osuspira ha ipyahẽva” umi mbaʼe vaiete ha oporombojeguarúva ojejapo vaʼekuére Jerusalénpe (Ezeq. 9:4). Katuete oiméne oiko mboyve pe ñehundi, haʼekuéra ohechauka raʼe oserviha Jehovápe añoiténte, ha ombojeguaruha chupekuéra entéro umi mbaʼe vai ojejapóva, upéicha rupi ikatu vaʼekue ojesalva.

11. ¿Mávapepa orrepresenta pe kuimbaʼe orekóva pe tínta ryru, ha umi 6 kuimbaʼe orekóva ipópe hiʼárma oporohundi hag̃ua?

¹¹ ¿Oñemarka piko rakaʼe literálmente koʼã ifiélvape isyvápe? La Biblia ndeʼíri Ezequiel térã ótro proféta ohasa hague Jerusalénrupi ha omarka isyvápe umi hénte ifiélvape. Ikatu jaʼe upéicharõ Ezequiel visión ohechauka hague upe ojapóva umi anhelkuéra, upéicha rupi ni peteĩ yvypóra ndaikatúi vaʼekue ohecha. Pe kuimbaʼe orekóva pe tínta ryru ha umi 6 kuimbaʼe orekóva hiʼárma oporohundi hag̃ua orrepresenta Jehová anhelkuéra ifiélvape, siémpre oĩva preparádo ojapo hag̃ua Ñandejára volunta (Sal. 103:20, 21). Katuete Jehová oipurúne raʼe umi ánhelpe odirihi hag̃ua pe kastígo oúva Jerusalénpe naiñeʼẽrendúi haguére. Umi ánhel ojasegura ani hag̃ua oñehundi umi ihústovape umi iñañávandi, omoĩramoguáicha peteĩ márka umi ojesalvátava syváre.

12, 13. a) ¿Mbaʼérepa Jehová ohykuavo vaʼekue ipochykue Jerusalén ári? b) ¿Mbaʼérepa ikatu ñahaʼarõ ko tiémpope ojapotaha avei upéicha? c) ¿Ikatúpa jaʼe Jerusalén naiñeʼẽrenduietéva orrepresentaha umi rrelihión heʼívape ijehe kristianoha? Emyesakã. (Ehecha pe rrekuádro “¿Orrepresentápa Jerusalén umi rrelihión heʼívape ijehe kristianoha?”).

¹² Koʼẽrõite ñambohováita Jehová huísio arakaʼeve ndojehecháiva gueteri: “Peteĩ jehasa asy guasu. Ko múndo oñepyrũ guive koʼág̃a peve núnka ndoikóiva péicha, ha núnka ndoikomoʼãvéima upe rire” (Mat. 24:21). Ñahaʼarõ aja oiko ko mbaʼe, ikatu ñañeporandu: ¿Oñehundíta piko oimeraẽvapente, térãpa ojeporavóta umi omeresévape ojesalva? ¿Oñemarkáta piko umi oadorávape Jehovápe  ojesalva hag̃ua? ¿Ikatu piko jaʼe oñekumpliha avei ñane tiémpope pe visión ojekuaahápe pe kuimbaʼe orekóva tínta ryru ha oporomarkáva hína? Pe rrespuésta umi mbohapy pregúntape g̃uarã haʼe si. ¿Mbaʼérepa jaʼekuaa upéva? Jaikuaa hag̃ua jahechami jey Ezequiel visión.

¹³ ¿Ñanemanduʼápa Jehová ohykuavo hague ipochykue Jerusalén ári? Jahechami jey Ezequiel 9:8, 9 (elee). Ezequiel okyhyje vaʼekue ojejukapárõ g̃uarã “umi Israelgua hembýva”. Péro Jehová heʼi mbaʼérepa oguerúta pe ñehundi. Primero, “umi mbaʼe vai ojapóva” pe nasión “ivaieterei rasapáma”. * Segundo, Judápe “hetaiterei oĩ ojejukáva”. Tercero, Jerusalén, haʼéva Judá kapitál, “henyhẽte umi ikorrúptovagui”. Cuarto, umi hénte ojapo heta mbaʼe vai ha omoĩ exkúsa heʼívo: “Jehová nañanderechái”. ¿Ajépa umi mbaʼe oiko vaʼekue upe tiémpope jahecha avei koʼág̃arupi ko múndope? Umi hénte ningo hekovaieterei, iviolénto, ikorrúpto ha ndojeroviái Ñandejárare. Jehová “nokambiái hína”, upévare umi mbaʼe ombopochy vaʼekue chupe yma Ezequiel tiémpope, katuete ombopochy avei chupe koʼã tiémpope (Sant. 1:17; Mal. 3:6). Upéicharõ, ikatu jaʼe umi 6 kuimbaʼe orekóva hiʼárma oporohundi hag̃ua ha pe kuimbaʼe orekóva tínta ryru ojehecháva pe visiónpe, orekoha avei peteĩ kumplimiénto ñane tiémpope.

14, 15. ¿Mbaʼe ehémplopa ohechauka Jehová oporoavisaha ogueru mboyve ñehundi?

¹⁴ ¿Mbaʼéichapa oñekumpli koʼág̃arupi Ezequiel visión? Jahecháramo mbaʼéichapa pe visión oñekumpli vaʼekue yma, jaikuaáta mbaʼéichapa oñekumpli hína koʼág̃a ha avei mbaʼépa oikóta amo gotyove. Jahechami mbaʼéichapa oñekumplíma hína koʼág̃arupi algúna kósa oĩva Ezequiel profesíape, ha mbaʼéichapa oñekumplivéta amo gotyove.

¹⁵ Jehová oavisa raẽ ogueru mboyve ñehundi. Jahecha haguéicha ko lívrope kapítulo 11-pe, Jehová omoĩ Ezequiélpe “Israel rogaygua guardiarã” (Ezeq. 3:17-19). Áño 613 guive a.C., Ezequiel oavisa Israélpe hiʼag̃uimaha pe ñehundi. Umi ótro proféta, umíva apytépe Isaías ha Jeremías, oavisa vaʼekue avei Jerusalén oñehunditaha (Is. 39:6, 7; Jer. 25:8, 9, 11). Koʼág̃arupi Jehová ojevale Cristo rupive peteĩ grúpo michĩvare oĩháme umi kristiáno unhído. Haʼekuéra omeʼẽ umi ‘ótro siérvope’, umi oadoráva Jehovápe haʼe oipotaháicha, entéro mbaʼe oikotevẽva omombarete hag̃ua ijerovia, péro ndahaʼéi upévante, síno oavisa avei umi héntepe og̃uahẽ mbotaitemaha pe jehasa asy guasu (Mat. 24:45).

16. ¿Jehová puévlo piko omarkáta hína umi ojesalvátavape? Emyesakã.

¹⁶ Jehová puévlo nomarkái umi ojesalvátape. Ñanemanduʼa vaʼerã Jehová ndeʼíri hague Ezequiélpe ohasa hag̃ua Jerusalénrupi omarka hag̃ua umi hénte ojesalvátavape. Upéicha avei koʼág̃arupi Jehová nonkargái ipuévlope omarka hag̃ua umi ojesalvátavape. Upéva rangue, ñande ñaimévape umi ‘ótro siérvo’ apytépe, oñemanda  ñandéve japredika hag̃ua. Ñande jahechauka ñamombaʼeha ko traváho ñañehaʼãmbaitévo japredika umi notísia porã oñeʼẽva Ñandejára Rréinore, ha kyreʼỹme jaavisa umi héntepe ko múndo aña koʼẽrõitéma oñehunditaha (Mat. 24:14; 28:18-20). Péicha ñande ñaipytyvõ umi ipyʼaporãvape oadora hag̃ua Jehovápe haʼe oipotaháicha (1 Tim. 4:16).

17. ¿Mbaʼépa ojapo vaʼerã koʼág̃a umi hénte ikatu hag̃uáicha oñemarka ha ojesalva ou vove pe ñehundi?

¹⁷ Ikatu hag̃uáicha ojesalva ou vove pe ñehundi, umi hénte ohechauka vaʼerã koʼág̃a ojeroviaha. Jahecháma haguéicha, umi ojesalva vaʼekue oñehundírõ guare Jerusalén áño 607-pe a.C. ohechaukáma vaʼekue oadoraha Jehovápe haʼe oipotaháicha ha orrechasaha umi mbaʼe vai ou mboyve pe ñehundi. Ñane tiémpope upéva nokambiái. Ou mboyve pe ñehundi, umi hénte ohechauka vaʼerã oñembyasyetereiha, ‘osuspira ha ipyahẽha’ umi mbaʼe vai ojejapóvare ko múndope. Ha oñomi rangue umi mbaʼe oñandúva, ohechauka vaʼerã heʼi ha ojapóvare oadoraha Ñandejárape haʼe oipotaháicha. ¿Mbaʼéichapa ikatu ojapo hikuái upéva? Haʼekuéra oasepta vaʼerã umi notísia porã ojepredikáva, oñepyrũ oiko kristiánoicha, oñemeʼẽ Jehovápe ha ojevautisa, ha siémpre oapoja vaʼerã Cristo ermanokuérape (Ezeq. 9:4; Mat. 25:34-40; Efes. 4:22-24; 1 Ped. 3:21). Sólamente umi ojapóva koʼã mbaʼe, ha oadorámava Jehovápe haʼe oipotaháicha oñepyrũ vove pe jehasa asy guasu, oñemarkáta ojesalva hag̃ua.

18. a) ¿Arakaʼe ha mbaʼéichapa Jesús omarkáta umi omeresévape ojesalva? b) ¿Mbaʼérepa natekotevẽmoʼãi oñemarka umi unhídope ojesalva hag̃ua Armagedónpe? Emyesakã.

 ¹⁸ Jesús omarkáta umi omeresévape ojesalva. Ezequiel tiémpope umi ánhel ombaʼapo vaʼekue omarka hag̃ua umi ifiélvape ojesalva hag̃ua. Ñane tiémpope Jesucristo orrepresenta hína pe kuimbaʼe orekóvape pe tínta ryru, ág̃a ou vove “tuicha autorida reheve” ohusga hag̃ua entéro nasiónpe (Mat. 25:31-33). Jesús oúta pe jehasa asy guasu aja, oñehundi rire pe rrelihión fálsape. * Upe tiémpo iñimportantetévape, oñepyrũ mboyvemi Armagedón, Jesús ohusgáta umi héntepe, tahaʼe ovecha térã kavaráramo. Umi oĩva pe ‘aty guasúpe’ ojehusgáta térã oñemarkáta ovecháramo, ha upéva ohechaukáta ‘oikovetaha pára siémpre’ (Apoc. 7:9-14; Mat. 25:34-40, 46). Umi unhído katu natekotevẽmoʼãi oñemarka ojesalva hag̃ua Armagedónpe. Chupekuéra oñemeʼẽta pe séllo finál, tahaʼe omano mboyve hikuái térã oñepyrũ mboyve pe jehasa asy guasu. Upéi, oñepyrũ mboyve Armagedón, umi unhído oikovéva gueteri ko yvy ape ári ojegueraháta yvágape orresivi hag̃ua iprémio (Apoc. 7:1-3).

19. ¿Mávapa ohundíta ko múndo aña? (Ehecha pe rrekuádro “Osuspira ha ipyahẽ, oñemarka, oñehundi. ¿Arakaʼe ha mbaʼéichapa?”).

¹⁹ Pe Rréi Jesucristo ha ijehérsito yvagapegua ohundíta ko múndo aña. Ezequiel visiónpe, umi 6 kuimbaʼe orekóva hiʼárma oporohundi hag̃ua, oñepyrũ ohundi umi iñañávape otermina rire itraváho pe kuimbaʼe orekóva pe tínta ryru (Ezeq. 9:4-7). Péicha avei pe ñehundi oikótava koʼẽrõite, oñepyrũta Jesús ohusga rire entéro nasiónpe ha omarka ovecháramo umi hénte ojesalvátavape. Upéi,  oiko aja pe gérra de Armagedón, Jesús odirihíta ijehérsito yvagapegua, oĩháme umi ánhel ha umi 144.000 ogovernátava hendive, ohundipaite hag̃ua ko múndo aña. Avei ogiáta umi oadorávape Jehovápe añoiténte oike hag̃ua peteĩ múndo pyahu ihústovape (Apoc. 16:14-16; 19:11-21).

20. ¿Mbaʼépa ñaaprende Ezequiel visióngui ojekuaahápe pe kuimbaʼe orekóva pe tínta ryru?

²⁰ ¡Ajépa omombarete ñande jerovia ha jaagradese Jehovápe ñanemboʼe haguére Ezequiel visión, ojekuaahápe pe kuimbaʼe orekóva pe tínta ryru! Ikatu jajerovia ñande pyʼaite guive Jehová nohundimoʼãiha umi ihústova umi iñañávandi (Sal. 97:10). Ñande jaikuaáma mbaʼépa jajapo vaʼerã ikatu hag̃uáicha jarresivi pe márka jajesalva hag̃ua. Ñande jaadoráva Jehovápe jajedesidíma jajapotaha ikatúva entéro ñamombeʼu hag̃ua umi notísia porã ‘umi osuspira ha ipyahẽvape’ Satanás múndo aña káusare, ha jaavisa og̃uahẽ mbotaitemaha pe fin. Péicha avei ñande jarekóta pe oportunida ijojahaʼỹva ñaipytyvõ hag̃ua ‘umi ipyʼaporãvape’ oadora hag̃ua avei ñanendive Jehovápe haʼe oipotaháicha. Upéicha ikatúta oñemarka chupekuéra ojesalva hag̃ua ha oike Ñandejára múndo pyahu ihústovape (Hech. 13:48).