1-3. (a) Nĩ kĩĩ kĩagegirie Ezekieli, na nĩ ũndũ ũrĩkũ aamenyire wĩgiĩ mwanangĩko ũrĩa ũngĩakorire Jerusalemu? (b) Nĩ ciũria irĩkũ tũgũthuthuria?

 EZEKIELI nĩ aagegire mũno! Aakoretwo ona kĩoneki kĩa maũndũ marĩ magigi marĩa Ayahudi arĩa maaregenyũkĩte meekaga thĩinĩ wa hekarũ Jerusalemu. a Aremi acio nĩ maathahĩtie handũ harĩa ũthathaiya mũtheru wekagĩrũo thĩinĩ wa Isiraeli. No to hekarũ iki maathahĩtie. Bũrũri wa Juda waiyũrĩte maũndũ ma ũhinya na nĩ wakĩrĩtie njano maũndũ-inĩ macio. Jehova eerire Ezekieli ũũ nĩ ũndũ wa kũrakario mũno nĩ maũndũ marĩa andũ acio aathuurĩte meekaga: “Nĩ ngoya ikinya ndĩ na mathũgũta.”—Ezek. 8:17, 18.

² No mũhaka akorũo Ezekieli nĩ aaiguire ũũru mũno nĩ kũmenya atĩ Jerusalemu na hekarũ ĩrĩa yarĩ kuo ĩrĩa hĩndĩ ĩmwe yarĩ theru nĩ ciatũmĩte Jehova arakare na atĩ nĩ ingĩanangirũo! No nginya akorũo Ezekieli nĩ eeyũragia ũũ: ‘Hihi gũgũthiĩ atĩa harĩ andũ arĩa ehokeku thĩinĩ wa itũũra rĩu? Hihi nĩ mekũhonokio? Angĩkorũo nĩguo-rĩ, mekũhonokio atĩa?’ Ezekieli ndaaikarire mũno atonete macokio. Kahinda kanini thutha wa kũigua ituĩro rĩu rĩatuĩrĩirũo Jerusalemu, nĩ aaiguire mũgambo mũnene ũgĩta andũ arĩa mangĩahingirie ituĩro rĩu rĩa Ngai. (Ezek. 9:1) Kĩoneki kĩu gĩgĩthiĩ  na mbere, mũnabii ũcio nĩ aamenyire atĩ mwanangĩko ũcio ndũngĩaniinanĩirie andũ ega na oru, na ũndũ ũcio ũgĩtũma acokwo nĩ thayũ. Andũ arĩa maagĩrĩire nĩ mangĩahonokirio!

³ O ũrĩa tũrakuhĩrĩria mũthia wa mũtabarĩre ũyũ mũũru wa maũndũ, o na ithuĩ no twĩyũrie nĩa makaahonoka mwanangĩko mũnene ũrĩa ũkuhĩrĩirie. Gũkĩrĩ ũguo-rĩ, reke tũthuthurie ciũria ici: (1) Nĩ ũndũ ũrĩkũ Ezekieli aacokire akĩona thĩinĩ wa kĩoneki kĩu? (2) Kĩoneki kĩu kĩahingirio atĩa matukũ-inĩ make? (3) Kĩoneki kĩu kĩa ũrathi kĩratũhutia atĩa matukũ-inĩ maya maitũ?

4. Taarĩria ũndũ ũrĩa Ezekieli aacokire akĩona na akĩigua thĩinĩ wa kĩoneki.

⁴ Nĩ ũndũ ũrĩkũ Ezekieli aacokire akĩona na akĩigua thĩinĩ wa kĩoneki kĩu? (Thoma Ezekieli 9:1-11.) Oonire andũ mũgwanja “moimĩte na kũrĩa kĩhingo kĩa rũgongo kĩarĩ, kĩrĩa kĩarorete mwena wa rũgongo,” hihi hakuhĩ na harĩa mũhianano wa ũiru warĩ kana harĩa atumia maarĩragĩra ngai ya Tamuzu. (Ezek. 8:3, 14) Andũ acio mũgwanja magĩtonya thĩinĩ wa nja ĩrĩa nini ya hekarũ na makĩrũgama hakuhĩ na kĩgongona kĩrĩa gĩa gĩcango. No matiokĩte hau kũruta igongona. Ihinda-inĩ rĩu Jehova ndangĩetĩkĩrire magongona marĩa mangĩarutĩirũo hekarũ-inĩ ĩyo. Andũ atandatũ harĩ acio maarũgamire “o ũmwe wao anyitĩte itharaita rĩake rĩa kwananga.” Wa mũgwanja oonekaga arĩ ngũrani. Eehumbĩte nguo ya gatani, na ndaarĩ na itharaita no aarĩ na “rũhĩa rwa mwandĩki rwa gwĩkĩra rangi.”

5, 6. Tũngiuga atĩa ũhoro-inĩ wĩgiĩ andũ acio meekĩrirũo rũũri? (Rora mbica kĩambĩrĩria-inĩ gĩa gĩcunjĩ gĩkĩ.)

⁵ Mũndũ ũcio warĩ na rũhĩa rwa gwĩkĩra rangi aagĩrĩirũo gwĩka atĩa? Aaheirũo wĩra mũritũ nĩ Jehova we mwene akĩrũo ũũ: “Tuĩkanĩria itũũra-inĩ, ũtuĩkanĩrie Jerusalemu, na wĩkĩre rũũri mathiithi-inĩ ma andũ arĩa maracaya na magacakaya nĩ ũndũ wa maũndũ mothe marĩ magigi marĩa marekwo itũũra-inĩ rĩu.” No kũhoteke hĩndĩ ĩyo Ezekieli nĩ aaririkanire ũhoro wa aciari ehokeku a Isiraeli arĩa meerĩtwo mahake thakame igũrũ rĩa mĩrango ya nyũmba ciao na itugĩ-inĩ cia mĩrango ĩrĩ rũũri nĩguo marigithathi mao mahonokio kuumana na mwanangĩko. (Tham. 12:7, 22, 23) Thĩinĩ wa kĩoneki kĩa Ezekieli-rĩ, hihi rũũri rũrĩa rwekĩrirũo thiithi-inĩ nĩ mũndũ ũcio warĩ na rũhĩa rwa gwĩkĩra rangi rũngĩahingirie muoroto o ta ũcio—rũtuĩke kĩmenyithia atĩ mũndũ ũrĩa ũngĩakorirũo naruo agĩrĩirũo kũhonokio kuumana na mwanangĩko wa Jerusalemu?

⁶ No tũmenye macokio ma kĩũria kĩu tũngĩĩciria kĩrĩa gĩatũmaga mũndũ ekĩrũo rũũri rũu. Rwaagĩrĩirũo gwĩkĩrũo mathiithi-inĩ ma andũ arĩa ‘maacayaga na magacakaya’ nĩ ũndũ wa maũndũ marĩ magigi ‘marĩa meekagwo itũũra-inĩ rĩu.’ Kwoguo-rĩ, tũngiuga atĩa ũhoro-inĩ wĩgiĩ andũ acio meekĩrirũo rũũri rũu? Ũndũ ũmwe nĩ atĩ, nĩ maaiguaga ũũru mũno ngoro nĩ ũndũ wa ũhoi mĩhianano ũrĩa wekĩkaga hekarũ-inĩ na ningĩ nĩ ũndũ wa maũndũ  mothe ma ũhinya, ngomanio itagĩrĩire, na ungumania ũrĩa waiyũrĩte Jerusalemu. (Ezek. 22:9-12) Makĩria ma ũguo, no kũhoteke atĩ matiahithaga ũrĩa maaiguaga. Hatarĩ nganja ciugo na ciĩko cia andũ ta acio maarĩ na ngoro njega nĩ cioonanagia atĩ nĩ maathũũrĩte maũndũ macio meekĩkaga thĩinĩ wa bũrũri ũcio na ikonania wĩrutĩri wao harĩ ũthathaiya mũtheru. Nĩ ũndũ wa tha ciake, Jehova nĩ angĩahonokirie andũ ta acio tondũ nĩ maagĩrĩire.

7, 8. Andũ arĩa maarĩ na matharaita ma kwananga maagĩrĩirũo kũruta wĩra wao atĩa, na thutha-inĩ gwathiire atĩa?

⁷ Nĩ ũndũ ũcio-rĩ, andũ acio atandatũ maarĩ na matharaita ma kwananga maagĩrĩirũo kũruta wĩra wao atĩa? Ezekieli nĩ aaiguire ũrĩa Jehova eerire andũ acio: Rũmĩrĩrai mũndũ ũcio ũrĩ na rũhĩa rwa gwĩkĩra rangi na mũũrage andũ othe tiga o arĩa mekĩrĩtwo rũũri mathiithi-inĩ mao. Jehova aameerire ũũ: “Mwagĩrĩirũo kwambĩrĩria na handũ hakwa harĩa hatheru.” (Ezek. 9:6) Andũ acio maagĩrĩirũo kwambĩrĩria wĩra wao gatagatĩ ka Jerusalemu, thĩinĩ wa hekarũ, ĩrĩa  ihinda-inĩ rĩu ĩtaarĩ handũ hatheru maitho-inĩ ma Jehova. Arĩa maarĩ a mbere kũũragwo maarĩ ‘athuri arĩa maarũgamĩte mbere ya nyũmba ĩyo’—athuri 70 a nyũmba ya Isiraeli arĩa maarĩ hekarũ-inĩ magĩcinĩra ngai cia maheeni ũbumba.—Ezek. 8:11, 12; 9:6.

⁸ Hihi thutha-inĩ gwathiire atĩa? Hĩndĩ ĩyo Ezekieli eeroragĩra na agathikĩrĩria, mũndũ ũcio warĩ na rũhĩa rwa gwĩkĩra rangi agĩcokeria Jehova ũhoro akĩmwĩra atĩrĩ: “Nĩ ndeka o ta ũrĩa ũkũnjathĩte.” (Ezek. 9:11) No twĩyũrie ũũ: ‘Gwathiire atĩa harĩ aikari a Jerusalemu? Hihi nĩ kwarĩ na andũ ehokeku maahonokire mwanangĩko ũcio?’

9, 10. Andũ amwe ehokeku arĩa maahonokire mwanangĩko wa Jerusalemu nĩa, na tũngiuga atĩa igũrũ rĩao?

⁹ Thoma 2 Maũndũ ma Matukũ ma Tene 36:17-20. Ũrathi wa Ezekieli wahingire mwaka wa 607 M.M.M. rĩrĩa mbũtũ ya Ababuloni yaanangire Jerusalemu na hekarũ ĩrĩa yarĩ kuo. O ta ‘gĩkombe guoko-inĩ kwa Jehova,’ Ababuloni nĩo Jehova aahũthĩrire kũherithia andũ a Jerusalemu arĩa mataarĩ ehokeku. (Jer. 51:7) Hihi mwanangĩko ũcio waniinire andũ othe? Aca. Kĩoneki kĩa Ezekieli nĩ kĩarathĩte atĩ andũ amwe matingĩaniinirũo nĩ Ababuloni.—Kĩam. 18:22-33; 2 Pet. 2:9.

¹⁰ Andũ amwe arĩa maarĩ ehokeku nĩ maahonokire, ta Arekabu, Ebedi-meleku ũrĩa warĩ Mũethiopia, mũnabii Jeremia, na Baruku ũrĩa warĩ mwandĩki wake. (Jer. 35:1-19; 39:15-18; 45:1-5) Kuumana na kĩoneki kĩa Ezekieli no tuuge atĩ andũ ta acio nĩ ‘maacayaga na magacakaya nĩ ũndũ wa maũndũ mothe marĩ magigi’ marĩa meekagwo Jerusalemu. (Ezek. 9:4) Mbere ya mwanangĩko ũcio, no kũhoteke atĩ andũ acio nĩ moonanĩtie biũ atĩ nĩ maathũũrĩte maũndũ macio ma waganu na makonania wĩrutĩri wao harĩ ũthathaiya mũtheru, na kwoguo makĩagĩrĩra kũhonokio.

11. Nĩa maarũgamĩrĩirũo nĩ andũ acio atandatũ maarĩ na matharaita ma kwananga na mũndũ ũcio warĩ na rũhĩa rwa mwandĩki rwa gwĩkĩra rangi?

¹¹ Hihi andũ acio ehokeku meekĩrirũo rũũri rũroneka nĩguo mahonokio? Gũtirĩ handũ honanĩtie atĩ nĩ kũrĩ mũndũ—hihi Ezekieli kana mũnabii ũngĩ o wothe—watuĩkanĩirie Jerusalemu agĩkĩraga rũũri rũroneka mathiithi-inĩ ma andũ arĩa maarĩ ehokeku. Nĩ ũndũ ũcio, kĩoneki kĩa Ezekieli kĩguũragia ũndũ ũrĩa wekĩkaga igũrũ na kwoguo ndũngĩonekire na maitho ma andũ. Mũndũ ũcio warĩ na rũhĩa rwa mwandĩki rwa gwĩkĩra rangi na andũ acio angĩ atandatũ maarĩ na matharaita ma kwananga maarũgamagĩrĩra ciũmbe njĩhokeku cia Jehova cia roho iria ikoragwo ciĩhaarĩirie hingo ciothe kũhingia wendi wake. (Thab. 103:20, 21) Hatarĩ nganja Jehova nĩ aahũthĩrire araika ake gũtongoria wĩra-inĩ wa kũhingia ituĩro harĩ andũ a Jerusalemu arĩa mataarĩ ehokeku. O ta arĩ gwĩkĩra rũũri mathiithi-inĩ ma andũ arĩa mangĩahonokirio, araika acio nĩ maatigĩrĩire atĩ ituĩro rĩu rĩtingĩaniinire andũ ega hamwe na andũ oru.

12, 13. (a) Nĩ kĩĩ gĩatũmire Jehova aitũrũrĩre Jerusalemu marakara make, na nĩkĩ no twĩrĩgĩrĩre eke ũguo mahinda maya maitũ? (b) Hihi ndini iria ciĩĩtaga cia Gĩkristiano nĩcio irũgamĩrĩirũo nĩ Jerusalemu hĩndĩ ĩrĩa yaagire wĩhokeku? Taarĩria. (Rora gathandũkũ, “Hihi Ndini Iria Ciĩĩtaga cia Gĩkristiano Nĩcio Irũgamĩrĩirũo nĩ Jerusalemu?”)

¹² Ũmũthĩ nĩ twĩrĩgĩrĩire kuona ituĩro rĩa Ngai rĩkĩhinga na njĩra ĩtarĩ yoneka rĩngĩ, hĩndĩ ya “thĩna mũnene ũtarĩ woneka kuuma kĩambĩrĩria gĩa thĩ nginyagia rĩu, na ndũkoneka rĩngĩ.” (Mat. 24:21) O twetereire ũndũ ũcio wa bata, nĩ harĩ ciũria ciĩyumĩragia: Hihi nĩ kũrĩ andũ makaahonoka mwanangĩko ũcio ũroka? Hihi athathaiya a ma a Jehova nĩ mageekĩrũo rũũri nĩguo mahonokio? Na njĩra ĩngĩ-rĩ, hihi kĩoneki kĩu kĩa ũrathi wa Ezekieli kĩgiĩ mũndũ ũcio warĩ na rũhĩa rwa gwĩkĩra rangi nĩ gĩkaahinga matukũ-inĩ maya maitũ? Macokio ma ciũria icio ciothe ithatũ nĩ ĩĩ. Nĩ kĩĩ kĩngĩtũma tuuge ũguo? Nĩgetha tuone ũndũ ũcio, reke tũcoke harĩ kĩoneki kĩa Ezekieli.

¹³ Hihi nĩ ũraririkana kĩrĩa gĩatũmire Jehova aitũrũrĩre Jerusalemu ya tene mathũgũta make? Ta rora rĩngĩ thĩinĩ wa Ezekieli 9:8, 9. (Thoma.) Hĩndĩ ĩrĩa Ezekieli eeciragia atĩ mwanangĩko ũcio ũngĩaniinire ‘arĩa othe maatigarĩte thĩinĩ wa Isiraeli,’ Jehova aagwetire itũmi inya cia kũrehe ituĩro rĩu. Kĩa mbere, “mehia” ma rũrĩrĩ rũu maarĩ “maingĩ mũno.” b Gĩa kerĩ, bũrũri wa Juda waiyũrĩte “ũiti wa thakame.” Gĩa gatatũ, Jerusalemu, itũũra rĩrĩa inene rĩa ũthamaki wa Juda, rĩaiyũrĩte “ungumania.” Gĩa kana, andũ acio matiatindanagĩra na mĩthiĩre yao mĩũru tondũ meeĩraga atĩ Jehova “ndarona” ciĩko ciao njũru. Githĩ ciugo icio itironania ũrĩa thĩ ĩno ĩthũkĩte kĩĩmĩtugo, ĩgakorũo na ũhinya, ungumania, na andũ matarĩ na wĩtĩkio? Hatarĩ nganja, tondũ Jehova nĩ Ngai “ũtagarũrũkaga kana agacenjia,” maũndũ marĩa maatũmire arakare matukũ-inĩ ma Ezekieli no matũme arakare nginya matukũ-inĩ maya maitũ. (Jak. 1:17; Mal. 3:6) Kwoguo no twĩrĩgĩrĩre atĩ andũ acio atandatũ maarĩ na matharaita ma kwananga na mũndũ ũcio ũmwe warĩ na rũhĩa rwa gwĩkĩra rangi nĩ marĩkorũo na wĩra wa kũruta mahinda-inĩ maya maitũ!

14, 15. Nĩ ngerekano irĩkũ ironania atĩ Jehova nĩ aheaga andũ mũkaana atanarehe mwanangĩko?

¹⁴ No rĩrĩ, kĩoneki kĩa Ezekieli kĩhingaga atĩa matukũ-inĩ maya maitũ? Tũngĩrora ũrĩa kĩoneki kĩu kĩahingire mahinda mahĩtũku, no tuone maũndũ marĩa tũngĩĩrĩgĩrĩra ihinda rĩrĩ na rĩrĩa rĩũkĩte. Reke tũthuthurie maũndũ mamwe marĩa tuonete kana marĩa tũkoona makĩhingia ũrathi wa Ezekieli.

¹⁵ Jehova nĩ aheaga andũ mũkaana atanarehe mwanangĩko. O ta ũrĩa Gĩcunjĩ gĩa 11 kĩa ibuku rĩrĩ kĩonanĩtie, Jehova aamũrire Ezekieli atuĩke “mũrangĩri wa nyũmba ya Isiraeli.” (Ezek. 3:17-19) Kwambĩrĩria mwaka wa 613 M.M.M., Ezekieli nĩ aaheire andũ a Isiraeli mũkaana wĩgiĩ mwanangĩko ũrĩa wakuhagĩrĩria. Anabii angĩ ta Isaia na Jeremia nĩ maaheanire mũkaana wĩgiĩ thĩna ũrĩa ũngĩgaakora Jerusalemu. (Isa. 39:6, 7; Jer. 25:8, 9, 11) Matukũ-inĩ maya maitũ, Jehova kũgerera Kristo nĩ akoretwo akĩhũthĩra gakundi kanini ka  Akristiano aitĩrĩrie maguta kũheana irio cia kĩĩroho kũrĩ athathaiya a ma, nĩo andũ a nyũmba yake, o hamwe na kũhe andũ arĩa angĩ mũkaana wĩgiĩ thĩna mũnene ũrĩa ũkuhĩrĩirie mũno.—Mat. 24:45.

16. Hihi tũrĩ andũ a Jehova nĩ twĩkĩraga andũ arĩa makaahonoka rũũri? Taarĩria.

¹⁶ Andũ a Jehova matiĩkĩraga andũ arĩa makaahonoka rũũri. Ririkana atĩ Ezekieli ndeerirũo atuĩkanĩrie Jerusalemu we mwene na ekĩre arĩa angĩ rũũri nĩguo makaahonoka. O nao andũ a Jehova ũmũthĩ matiĩrĩtwo mekĩre andũ arĩa magĩrĩire gũkaahonoka rũũri. Ithenya rĩa ũguo, wĩra ũrĩa tũheetwo tũrĩ andũ a nyũmba ya Kristo ya kĩĩroho nĩ kũhunjia. Tuonanagia atĩ nĩ tuoyaga wĩra ũcio na ũritũ na njĩra ya kũhunjia ũhoro ũrĩa mwega wa Ũthamaki wa Ngai tũrĩ na kĩyo na kũheana mũkaana atĩ mũthia wa thĩ ĩno njũru nĩ ũkuhĩrĩirie mũno. (Mat. 24:14; 28:18-20) Kwoguo nĩ tũkoragwo na itemi harĩ gũteithia andũ arĩa marĩ na ngoro njega gwĩtĩkĩra ũthathaiya mũtheru.—1 Tim. 4:16.

17. Andũ mabatiĩ gwĩka atĩa ihinda-inĩ rĩrĩ nĩguo mageekĩrũo rũũri ihinda rĩũkĩte?

¹⁷ Nĩguo andũ makaahonoka mwanangĩko ũrĩa ũroka, magĩrĩirũo kuonania wĩtĩkio wao ihinda-inĩ rĩrĩ. O ta ũrĩa tũkuonete, arĩa maahonokire Jerusalemu ĩkĩanangwo mwaka wa 607 M.M.M. moonanirie biũ atĩ nĩ maathũũrĩte maũndũ ma waganu na makĩonania wĩrutĩri wao harĩ ũthathaiya mũtheru mbere ya mwanangĩko. Ũguo noguo gũtariĩ ũmũthĩ. Mbere ya mwanangĩko ũũkĩte, andũ magĩrĩirũo gũkorũo ‘magĩcaya na magacakaya’—magakorũo na kĩeha kĩnene ngoro-inĩ—nĩ ũndũ wa waganu ũrĩa ũrĩ thĩinĩ wa thĩ ĩno. Na  handũ ha kũhitha ũrĩa maraigua, magĩrĩirũo kuonania na ciugo na ciĩko wĩrutĩri wao harĩ ũthathaiya mũtheru. Hihi mangĩka ũguo atĩa? Mabatiĩ kwamũkĩra wega ndũmĩrĩri ĩrĩa ĩrahunjio ũmũthĩ, mathiĩ na mbere kwĩhumba ũmũndũ ta wa Kristo, mabatithio nĩguo monanie wĩyamũrĩri wao harĩ Jehova, na manyite mbaru ariũ a Ithe na Kristo marĩ ehokeku. (Ezek. 9:4; Mat. 25:34-40; Ef. 4:22-24; 1 Pet. 3:21) Andũ arĩa mekaga ũguo ihinda-inĩ rĩrĩ—arĩa magaakorũo marĩ athathaiya a ma thĩna ũrĩa mũnene ũkĩambĩrĩria—no o mageekĩrũo rũũri nĩguo makaahonoka.

18. (a) Jesu Kristo ageekĩra andũ arĩa magĩrĩire rũũri atĩa, na ageeka ũguo rĩ? (b) Hihi aitĩrĩrie maguta arĩa ehokeku nĩ marabatara gwĩkĩrũo rũũri? Taarĩria.

¹⁸ Wĩra wa gwĩkĩra andũ arĩa magĩrĩire rũũri ũkaarutĩrũo igũrũ. Matukũ-inĩ ma Ezekieli, araika maarĩ na itemi harĩ gwĩkĩra andũ arĩa ehokeku rũũri nĩguo makaahonoka. Mahinda-inĩ maya, mũndũ ũcio warĩ na rũhĩa rwa mwandĩki rwa gwĩkĩra rangi arũgamĩrĩire Jesu Kristo rĩrĩa “agooka arĩ na riri wake” arĩ Mũtuanĩri Ciira wa ndũrĩrĩ ciothe. (Mat. 25:31-33) Gũka kũu kwa Jesu gũgaakorũo hĩndĩ ya thĩna ũrĩa mũnene, thutha wa ndini cia maheeni kwanangwo. c Ihinda-inĩ rĩu rĩa bata, kahinda kanini mbere ya Hari–Magedoni kwambĩrĩria, Jesu nĩ agaatua ciira kana mũndũ nĩ ngʼondu kana nĩ mbũri. Andũ a “kĩrĩndĩ kĩnene” nĩ magaatuĩrũo, kana mekĩrũo rũũri, atĩ o nĩ ngʼondu, ũndũ ũrĩa ũkoonania atĩ nĩ magĩrĩire ‘kũheo muoyo wa tene na tene.’ (Kũg. 7:9-14; Mat. 25:34-40, 46) Ĩ nao aitĩrĩrie maguta arĩa ehokeku? Matirabatara gwĩkĩrũo  rũũri nĩguo makaahonoka Hari–Magedoni. Handũ ha ũguo, mageekĩrũo mũhũũri wao wa mũthia matanakua kana mbere ya thĩna ũrĩa mũnene kwambĩrĩria. Thutha ũcio, ihinda-inĩ rĩna mbere ya Hari–Magedoni kwambĩrĩria, nĩ magaatwarũo igũrũ.—Kũg. 7:1-3.

19. Nĩa magaakorũo hamwe na Jesu rĩrĩa agooka kũhingia ituĩro harĩ mũtabarĩre ũyũ wa maũndũ? (Rora gathandũkũ, “Gũcaya na Gũcakaya, Gwĩkĩra Rũũri, Kwananga—Nĩ rĩ na nĩ na Njĩra Ĩrĩkũ?”)

¹⁹ Mũthamaki ũrĩa ũrĩ igũrũ, Jesu Kristo, na mbũtũ ciake cia igũrũ nĩo makaahingia ituĩro harĩ mũtabarĩre ũyũ wa maũndũ. Thĩinĩ wa kĩoneki kĩa Ezekieli, andũ atandatũ arĩa maarĩ na matharaita ma kwananga maambĩrĩirie wĩra wao thutha wa mũndũ ũrĩa wehumbĩte nguo ya gatani kũrĩkia wĩra wake wa gwĩkĩra rũũri. (Ezek. 9:4-7) O naguo mwanangĩko ũrĩa ũroka ũkaambĩrĩria thutha wa Jesu gũtuĩra andũ a ndũrĩrĩ ciothe na gwĩkĩra ngʼondu rũũri nĩguo ikaahonoka. Thutha ũcio, hĩndĩ ya mbaara ya Hari–Magedoni, Jesu nĩ agaatongoria mbũtũ cia igũrũ iria ikaahingia ituĩro, na arĩa magaakorũo mbũtũ-inĩ icio nĩ araika arĩa atheru na arĩa 144,000 magaathana hamwe nake marĩ othe, nĩguo mokĩrĩre thĩ ĩno njũru, mamĩanange biũ na mahonokie athathaiya a ma maingĩre thĩinĩ wa thĩ njerũ ĩrĩ na ũthingu.—Kũg. 16:14-16; 19:11-21.

20. Nĩ maũndũ marĩkũ ma gwĩkĩra ngoro twĩrutĩte kuumana na kĩoneki kĩa Ezekieli kĩgiĩ mũndũ ũrĩa warĩ na rũhĩa rwa mwandĩki rwa gwĩkĩra rangi?

²⁰ Nĩ tũkenaga mũno nĩ ũndũ wa maũndũ ma gwĩkĩra ngoro marĩa twĩrutaga kuumana na kĩoneki kĩa Ezekieli kĩgiĩ mũndũ ũrĩa warĩ na rũhĩa rwa mwandĩki rwa gwĩkĩra rangi! No tũkorũo na ma biũ atĩ Jehova ndakaaniina andũ arĩa athingu hamwe na arĩa aganu. (Thab. 97:10) Nĩ tũĩ ũrĩa tũbatiĩ gwĩka ihinda rĩrĩ nĩguo tũgeekĩrũo rũũri rwa gũkaahonoka ihinda rĩũkĩte. Tũrĩ athathaiya a Jehova, nĩ tũtuĩte itua rĩa gwĩka ũrĩa wothe tũngĩhota kũhunjia ũhoro ũrĩa mwega na kũheana mũkaana kũrĩ arĩa maracaya na magacakaya nĩ ũndũ wa waganu ũrĩa ũrĩ thĩinĩ wa thĩ ya Shaitani. Kwoguo no tũkorũo na mweke wa gũteithia arĩa marĩ na “mwerekera ũrĩa wagĩrĩire wa kũheo muoyo wa tene na tene” nĩguo manyitanĩre na ithuĩ ũthathaiya-inĩ mũtheru na njĩra ĩyo magĩrĩre gũgeekĩrũo rũũri nĩguo makaahonoka maingĩre thĩinĩ wa thĩ njerũ ya Ngai ĩrĩ na ũthingu.—Atũm. 13:48.