16-تاراۋ
«ماڭدايلارىنا تاڭبا قويىپ شىق»
ويباعدار: ەزەكيەلدىڭ كەزىندەگى ادال جانداردىڭ ماڭدايىنا قۇتقارىلۋ تاڭباسىنىڭ قويىلۋى جانە ونىڭ بۇگىنگى ماعىناسى
1—3. ا) ەزەكيەل نەگە ەسەڭگىرەپ قالدى جانە يەرۋساليمنىڭ جويىلۋىنا قاتىستى ول نەنى ٴتۇسىندى؟ ٵ) ٴبىز قانداي سۇراقتارعا توقتالامىز؟
ەزەكيەل ەسىن جيا الماي ەسەڭگىرەپ قالدى! ول جاڭا عانا ايان الىپ، جولدان تايعان ياھۋديلەردىڭ يەرۋساليمدەگى عيباداتحانادا جاساپ جاتقان جەركەنىشتى ىستەرىن كوردى *. ولار ەش شىمىرىكپەستەن يسرايلدەگى تازا عيباداتتىڭ ورداسىن لاستاپ جاتتى. ولار تەك عيباداتحانانى عانا لاستاپ قويماي، بۇكىل ياھۋدا جەرىن زورلىق-زومبىلىققا تولتىرىپ، ەلدى وڭالماستاي كۇيگە ۇشىراتتى. تاڭداپ العان حالقىنىڭ مۇنداي ىستەرىنە قاتتى كۇيىنگەن ەحوبا ەزەكيەلگە: «مەن قاھارلانا ارەكەت ەتەمىن»،— دەدى (ەزەك. 8:17، 18).
2 يەرۋساليم مەن قاسيەتتى سانالعان عيباداتحانا ەحوبانىڭ قاھارىن تۋعىزاتىن جەرگە اينالىپ، ەندى جويىلىپ كەتەتىنى ەزەكيەلدىڭ جانىنا زىلدەي باتسا كەرەك. «قالاداعى ادال ادامدارمەن نە بولماق؟ ولار امان قالا ما؟ امان قالسا، قالاي امان قالادى؟» دەگەن سۇراقتار ونى مازالاعانى ٴسوزسىز. بۇل سۇراقتاردىڭ جاۋابى كوپ كۇتتىرمەدى. ەزەكيەل اياندا يەرۋساليمگە شىعارىلعان اۋىر ۇكىمدى ەستىگەنى سول-اق ەكەن، ۇكىمدى جۇزەگە اسىرۋشىلاردى جينالۋعا شاقىرعان قاتتى داۋىس شىقتى (ەزەك. 9:1). پايعامبار اياننىڭ بارىسىندا حالىقتىڭ تۇگەل ەمەس، ىرىكتەلىپ جويىلاتىنىن ٴتۇسىندى. ٴيا، قۇتقارىلۋعا لايىق جاندار امان قالماق ەدى!
3 وسى زۇلىم زاماننىڭ سوڭى جاقىنداعان سايىن ٴبىز دە الداعى ۇلى اپاتتان كىم امان قالادى دەپ ۋايىمدايتىن شىعارمىز. سوندىقتان مىنا سۇراقتارعا توقتالعانىمىز ورىندى: 1) ەزەكيەل ٵرى قاراي اياندا نە كوردى؟ 2) بۇل ايان ونىڭ كەزىندە قالاي ورىندالدى؟ 3) ال بۇگىندە بۇل اياننىڭ قانداي ٴمانى بار؟
«قالانى جازالايتىندار... بەرى كەلسىن!»
4. ەزەكيەل ٵرى قاراي اياندا نە كورگەنىن ايتىپ بەرىڭىز.
4 ەزەكيەل ٵرى قاراي اياندا نە كوردى؟ (ەزەكيەل 9:1—11 وقىڭىز). ول «سولتۇستىككە قارايتىن جوعارعى قاقپا جاقتان» جەتى كىسىنىڭ كەلە جاتقانىن كوردى. بۇل جەر قۇدايدىڭ قاھارىن تۋعىزعان ٴمۇسىن تۇرعان جەر، يا بولماسا ايەلدەر تاممۋز ٴتاڭىرىن جوقتاپ جىلاپ جاتقان جەر بولسا كەرەك (ەزەك. 8:3، 14). بۇل جەتى كىسى عيباداتحانانىڭ ىشكى اۋلاسىنا كىرىپ، مىس قۇرباندىق وشاعىنىڭ قاسىنا كەلىپ تۇردى. ٴبىراق ولار قۇرباندىق شالۋ ٷشىن كەلگەن جوق. ويتكەنى ەحوبا بۇل جەردە ۇسىنىلعان قۇرباندىقتاردى بۇدان بىلاي قابىلدامايتىن. الگى كىسىلەردىڭ التاۋى «قولدارىنا ٴبىر-ٴبىر شوقپاردان ۇستاعان». ال جەتىنشىسى وزگەلەرىنەن ەرەكشە كوزگە ٴتۇسىپ تۇردى. ۇستىنە زىعىر كيىم كيگەن بۇل كىسىنىڭ قولىندا شوقپار ەمەس، «حاتشىنىڭ سياساۋىتى» بولدى.
5، 6. ماڭدايلارىنا تاڭبا قويىلعان ادامدار جونىندە قانداي تۇجىرىم جاساۋعا بولادى؟ (تاراۋدىڭ باسىنداعى سۋرەتتى قاراڭىز.)
5 سياساۋىتى بار كىسى نە ىستەۋگە كەلدى؟ ەحوبا وعان: «يەرۋساليمدى باستان-اياق ارالاپ ٶت. قالادا جاسالىپ جاتقان جەركەنىشتى ىستەردى كورىپ، اھ ۇرىپ كۇرسىنىپ جۇرگەندەردىڭ ماڭدايلارىنا تاڭبا قويىپ شىق»،— دەپ جاۋاپتى ٸس تاپسىردى. وسى مەزەتتە ەزەكيەل ەجەلدەگى يسرايلدىك اتا-انالاردى ەسكە العان شىعار. ولار تۇڭعىش بالالارىن اپاتتان امان ساقتاپ قالۋ ٷشىن، ەسىكتەرىنىڭ ماڭدايشالارى مەن جاقتاۋلارىنا قان جاققان ەدى (مۇس. 2-ج. 12:7، 22، 23). ەزەكيەلدىڭ ايانىنداعى سياساۋىتى بار كىسى ادامداردىڭ ماڭدايىنا تۋرا وسىنداي ماقساتپەن تاڭبا قويعان با؟ باسقاشا ايتقاندا، بۇل يەرۋساليم جويىلعان كەزدە تاڭبا قويىلعاندار امان قالاتىنىن بىلدىرگەن بە؟
6 بۇل سۇراقتىڭ جاۋابىن ٴبىلۋ ٷشىن، تاڭبانىڭ نە ٷشىن قويىلاتىنىن قاراستىرايىق. تاڭبا «قالادا جاسالىپ جاتقان جەركەنىشتى ىستەردى كورىپ، اھ ۇرىپ كۇرسىنىپ جۇرگەندەردىڭ» ماڭدايىنا قويىلۋ كەرەك-ٴتىن. ەندەشە، تاڭبا قويىلعان ادامدار جونىندە قانداي تۇجىرىم جاساۋعا بولادى؟ ولار عيباداتحاناداعى پۇتقا تابىنۋشىلىق ٷشىن عانا ەمەس، بۇكىل يەرۋساليمدى جايلاعان زورلىق-زومبىلىق، ازعىندىق پەن ادىلەتسىزدىك ٷشىن دە قاتتى قايعىردى (ەزەك. 22:9—12). ٴبىراق ولار مۇنى تەك سەزىنىپ قانا قويعان جوق. ولاردىڭ ەلدە بولىپ جاتقان جاعدايعا جەركەنىشپەن قارايتىندارى ٵرى تازا عيباداتقا شىن بەرىلگەندەرى سوزدەرى مەن ىستەرىنەن دە كورىنىپ تۇرعان. ەحوبا مۇنداي اقجۇرەك جاندارعا مەيىرىمىن ٴتۇسىرىپ، ولاردى قۇتقارىپ قالماق ەدى.
7، 8. شوقپارى بار التى كىسى نە ىستەۋ كەرەك ەدى، ٵرى اياننىڭ سوڭىندا نە بولدى؟
7 ال شوقپارى بار التى كىسى نە ىستەۋ كەرەك ەدى؟ ەزەكيەل اياندا ەحوبانىڭ ولارعا نۇسقاۋ بەرىپ، سياساۋىتى بار كىسىنىڭ ارتىنان ٴجۇرىپ، ماڭدايلارىنا تاڭبا قويىلعانداردان باسقاسىنىڭ ٴبارىن ٶلتىرۋدى بۇيىرىپ جاتقانىن ەستىدى. ەحوبا ولارعا: «مەنىڭ كيەلى ۇيىمنەن باستاپ سولاي ىستەڭدەر»،— دەدى (ەزەك. 9:6). ۇكىمدى جۇزەگە اسىرۋشىلار جازالاۋدى يەرۋساليم قالاسىنىڭ جۇرەگىنەن — ەحوبا ٷشىن قاسيەتتىلىگىن جوعالتقان عيباداتحانادان — باستاۋ كەرەك ەدى. ٴبىرىنشى كەزەكتە «كيەلى ٷيدىڭ الدىندا تۇرعان اقساقالدار»، ياعني عيباداتحانانىڭ ىشىندە جالعان تاڭىرلەرگە حوش ٴيىستى زات تۇتەتىپ جاتقان يسرايلدىڭ 70 اقساقالى ولتىرىلمەك ەدى (ەزەك. 8:11، 12؛ 9:6).
8 اياننىڭ سوڭىندا نە بولدى؟ ەزەكيەل ٵرى قاراي اياندا سياساۋىتى بار ادامنىڭ: «ايتقانىڭنىڭ ٴبارىن ورىندادىم»،— دەپ ەحوباعا ەسەپ بەرگەنىن كوردى (ەزەك. 9:11). سونىمەن، يەرۋساليم جويىلعاندا ونىڭ تۇرعىندارىمەن نە بولدى؟ ارالارىندا امان قالعان ادال ادامدار بولدى ما؟
اياننىڭ ەزەكيەلدىڭ كەزىندە ورىندالۋى
9، 10. يەرۋساليم جويىلعاندا امان قالعان ادال ادامداردىڭ اراسىندا كىمدەر بولدى جانە ولار جايىندا قانداي تۇجىرىم جاسايمىز؟
9 شەجىرەلەر 2-جازبا 36:17—20 وقىڭىز. ب.ز.ب. 607-جىلى بابىل اسكەرى يەرۋساليم مەن ونداعى عيباداتحانانى جويعاندا، ەزەكيەلدىڭ ايتقان پايعامبارلىعى ورىندالدى. ەحوبا «قولىندا توستاعان» سياقتى بولعان بابىلدىقتاردى قولدانىپ، وپاسىز يەرۋساليمگە قاھارىن توكتى (ەرم. 51:7). سول كەزدە قالا تۇرعىندارىنىڭ ٴبارى بىردەي جويىلىپ كەتتى مە؟ جوق. ەزەكيەلدىڭ ايانىنان كورۋگە بولاتىنداي، بابىلدىقتاردىڭ شاپقىنشىلىعىنان كەيبىرەۋلەر امان قالماق ەدى (مۇس. 1-ج. 18:22—33؛ پەت. 2-ح. 2:9).
10 جويىلۋ كەزىندە ٴبىراز ادال ادام، سونىڭ ىشىندە رەحاب اۋلەتى، ەفيوپيالىق ابدىمالىك، ەرەميا پايعامبار مەن ونىڭ حاتشىسى بارۋح تا قۇتقارىلدى (ەرم. 35:1—19؛ 39:15—18؛ 45:1—5). ەزەكيەلدىڭ ايانىنا قاراپ، مۇنداي ادامدار يەرۋساليمدە «جاسالىپ جاتقان جەركەنىشتى ىستەردى كورىپ، اھ ۇرىپ كۇرسىنىپ ٴجۇردى» دەپ تۇجىرىم جاساي الامىز (ەزەك. 9:4). بۇل ادامدار زۇلىمدىقتان بارىنشا اۋلاق ەكەندەرىن جانە تازا عيباداتقا شىن بەرىلگەندەرىن قالا جويىلماس بۇرىن كورسەتكەن. وسىلاي ولار قۇتقارىلۋعا جەتەلەيتىن جولمەن جۇرگەن.
11. شوقپار ۇستاعان التى كىسى مەن حاتشىنىڭ سياساۋىتى بار كىسى كىمدەردى بەينەلەيدى؟
11 بۇل ادال ادامداردىڭ ماڭدايىنا تاڭبا تۋرا ماعىنادا قويىلدى ما؟ ەزەكيەلدىڭ بولسىن، نە باسقا پايعامباردىڭ بولسىن، يەرۋساليمدى ارالاپ، ادال ادامداردىڭ ماڭدايىنا تاڭبا قويىپ شىققانى جايلى كيەلى كىتاپتىڭ ەش جەرىندە جازىلماعان. ەزەكيەلدىڭ پايعامبارلىق ٴمانى بار بۇل ايانى كوزگە كورىنبەيتىن كوكتەگى الەمدە بولىپ جاتقان جايتتى ايقىن ەتسە كەرەك. سياساۋىتى بار كىسى مەن قولدارىندا شوقپارى بار التى كىسى ەحوبانىڭ ەركىن جۇزەگە اسىرۋعا قاشاندا دايىن تۇراتىن ادال رۋحاني جاراتىلىستاردى بەينەلەگەن (ٴزاب. 103:20، 21). ەحوبا وپاسىز يەرۋساليمگە شىعارىلعان ۇكىمىن جۇزەگە اسىرۋ ٷشىن پەرىشتەلەردى قولدانعانى ٴسوزسىز. قۇتقارىلاتىن ادامداردىڭ ماڭدايىنا تاڭبا قويىلعانى پەرىشتەلەر ادامداردىڭ ٴبارىن بىردەي جويماي، ىرىكتەپ جوياتىنىن بىلدىرگەن.
ەزەكيەل كورگەن اياننىڭ بۇگىندەگى ٴمانى
12، 13. ا) ەحوبا يەرۋساليمگە قاھارىن نە ٷشىن توككەن ەدى جانە ٴبىزدىڭ كەزىمىزدە دە سولاي بولادى دەپ كۇتۋ نەگە ورىندى؟ ٵ) ماسىحشىلەر الەمى وپاسىز يەرۋساليمنىڭ بەينەسى مە؟ ٴتۇسىندىرىڭىز. («ماسىحشىلەر الەمى يەرۋساليمنىڭ بەينەسى مە؟» دەگەن قورشاۋدى قاراڭىز.)
12 ٴبىز جۋىردا قۇدايدىڭ ۇلى ۇكىمىنىڭ جۇزەگە اساتىنىنا كۋا بولامىز. بۇل «دۇنيە جاراتىلعاننان بەرى وسى ۋاقىتقا دەيىن بولماعان جانە قايتىپ قايتالانبايتىن زور الاپات بولادى» (مات. 24:21). وسى شەشۋشى كەزەڭدى كۇتە ٴجۇرىپ، بىزدە مىناداي سۇراقتار تۋىندار: الداعى ۇلى اپات كەزىندە ٴبارى تەگىس جويىلىپ كەتپەي، ىرىكتەلىپ جويىلا ما؟ ەحوباعا تازا عيبادات ەتەتىندەر امان قالۋ ٷشىن ولارعا تاڭبا قويىلا ما؟ باسقاشا ايتقاندا، ەزەكيەلدىڭ ايانىنداعى سياساۋىتى بار كىسى جايلى پايعامبارلىق ٴبىزدىڭ كەزىمىزدە ورىندالا ما؟ بۇل سۇراقتاردىڭ ٴبارىنىڭ جاۋابى — «ٴيا». نەگە بۇلاي دەي الامىز؟ بۇنى ٴبىلۋ ٷشىن ەزەكيەلدىڭ ايانىنا قايتا ورالايىق.
13 ەجەلدە ەحوبانىڭ يەرۋساليمگە قاھارىن نە ٷشىن توككەنى ەسىڭىزدە مە؟ ەزەكيەل 9:8، 9 عا (وقىڭىز) تاعى ٴبىر نازار اۋدارايىقشى. ەزەكيەل ٴتونىپ تۇرعان اپاتتان «يسرايلدىڭ تامتىعى تۇگەل قۇرىپ» كەتەتىن بولدى دەپ ۋايىمداعان كەزدە، ەحوبا وعان حالقىن نە ٷشىن ۇكىمگە كەسكەنىنىڭ ٴتورت سەبەبىن كەلتىردى. بىرىنشىدەن، حالىقتىڭ «كۇناسى وتە، وتە اۋىر» ەدى *. ەكىنشىدەن، ياھۋدا جەرى «قانتوگىسكە تولى» بولدى. ۇشىنشىدەن، ياھۋدا پاتشالىعىنىڭ استاناسى يەرۋساليمدى «ادىلەتسىزدىك جايلاعان» ەدى. تورتىنشىدەن، حالىق «ەحوبا ٴبىزدى كورمەيدى» دەپ ٶز-ٶزىن الداپ، جاساعان زۇلىمدىعى ٷشىن ٶزىن ايىپتى سەزىنبەدى. ەحوبانىڭ ايتقان سوزدەرى مورالدىق جاعىنان بۇزىلعان، قاتىگەز، ادىلەتسىز، سەنىمنەن جۇرداي وسى دۇنيەنى ٴدال سيپاتتايدى، سولاي ەمەس پە؟! ەحوبا قۇبىلمالى ەمەس، ول «ەش وزگەرمەيدى»، سوندىقتان ەزەكيەلدىڭ كەزىندە نە نارسە ونىڭ ٵدىل اشۋىن تۋعىزعان بولسا، بۇگىندە دە تۋرا سول نارسە اشۋىن تۋعىزادى (جاق. 1:17؛ مالح. 3:6). ٴبىزدىڭ كۇنىمىزدە دە شوقپار ۇستاعان التى كىسى مەن حاتشىنىڭ سياساۋىتى بار كىسى ارەكەت ەتەدى دەپ كۇتكەنىمىز ابدەن ورىندى!
شوقپار ۇستاعان التى كىسى جاقىندا ارەكەت ەتەدى (12، 13-ابزاستى قاراڭىز)
14، 15. ەحوبا ادامداردى اپات كەلمەي تۇرىپ ەسكەرتەتىنى قاي مىسالداردان كورىنەدى؟
14 سونىمەن، پايعامبارلىق ٴمانى بار ەزەكيەلدىڭ ايانى بۇگىندە قالاي ورىندالۋدا؟ بۇل اياننىڭ ەجەلدە قالاي ورىندالعانىن ەستە ۇستاساق، ونىڭ قازىر جانە بولاشاقتا قالاي ورىندالاتىنىن تۇسىنە الامىز. ولاي بولسا، ەزەكيەلدىڭ پايعامبارلىعىنداعى قازىر ورىندالىپ جاتقان ٵرى الداعى ۋاقىتتا ورىندالاتىن كەيبىر جايتتارعا نازار اۋدارايىق.
15 ەحوبا ادامداردى اپات كەلمەي تۇرىپ ەسكەرتەدى. وسى باسىلىمنىڭ 11-تاراۋىنان كورگەنىمىزدەي، ەحوبا ەزەكيەلدى «يسرايل ۇيىنە كۇزەتشى ەتىپ تاعايىنداعان» ەدى (ەزەك. 3:17—19). ەزەكيەل ب.ز.ب. 613-جىلدان باستاپ يسرايلدىكتەردى ٴتونىپ كەلە جاتقان اپات جايلى ەسكەرتۋمەن بولدى. ودان بولەك يشايا، ەرەميا سياقتى پايعامبارلار دا يەرۋساليمنىڭ جويىلاتىنىن ايتىپ دابىل قاققان (يشايا 39:6، 7؛ ەرم. 25:8، 9، 11). ال بۇگىندە ەحوبا مايلانعان قىزمەتشىلەرىنەن تۇراتىن شاعىن توپتى ٴماسىح ارقىلى قولدانادى. بۇل توپ تازا عيبادات ەتەتىندەرگە، ياعني ۇيدەگى باسقا قۇلدارعا اس-سۋ بەرىپ قانا قويماي، ادامداردى قارقىنمەن ٴتونىپ كەلە جاتقان زور الاپات جايلى ەسكەرتەدى (مات. 24:45).
16. بۇگىندە ەحوبانىڭ حالقى قۇتقارىلاتىن ادامدارعا تاڭبا قويا ما؟ ٴتۇسىندىرىڭىز.
16 ەحوبانىڭ حالقى قۇتقارىلاتىندارعا تاڭبا قويمايدى. ەسىمىزدە بولسا، ەحوبا ەزەكيەلگە يەرۋساليمدى ارالاپ، امان قالاتىندارعا تاڭبا قويىپ شىعۋدى تاپسىرماعان. تۋرا سول سياقتى، ەحوبانىڭ حالقى بۇگىندە قۇتقارىلۋعا لايىق ادامدارعا تاڭبا قويمايدى. ٴبىراق ٴماسىحتىڭ ۇيىندەگى باسقا قۇلدار رەتىندە بىزگە ۋاعىزداۋ ٸسى تاپسىرىلعان. ەگەر قۇداي پاتشالىعى جايلى ىزگى حاباردى قۇلشىنا جاريالاساق جانە وسى زۇلىم زاماننىڭ اقىرى تەز تاياپ كەلە جاتقانىن بار ىنتامەن ەسكەرتەتىن بولساق، وسى تاپسىرماعا جاۋاپكەرشىلىكپەن قارايتىنىمىزدى كورسەتەمىز (مات. 24:14؛ 28:18—20). وسىلايشا اقجۇرەك ادامدارعا تازا عيباداتتى تابۋعا كومەكتەسەمىز (ٴتىم. 1-ح. 4:16).
17. تاڭبا قويىلاتىنداردىڭ قاتارىندا بولۋ ٷشىن، ادامدار قازىردەن باستاپ نە ىستەۋ كەرەك؟
17 الداعى اپاتتان امان ٶتۋ ٷشىن، ادام سەنىمى بار ەكەنىن قازىردەن دالەلدەۋ كەرەك. جوعارىدا قاراستىرعانىمىزداي، ب.ز.ب. 607-جىلى يەرۋساليمنىڭ جويىلۋى كەزىندە امان قالعاندار زۇلىمدىقتان بارىنشا اۋلاق ەكەندەرىن جانە تازا عيباداتقا شىن بەرىلگەندەرىن قالا جويىلماي تۇرىپ كورسەتكەن بولاتىن. بۇگىندە دە تۋرا سولاي. ادامدار الداعى اپات كەلمەي تۇرىپ «اھ ۇرىپ كۇرسىنۋلەرى» كەرەك، ياعني وسى دۇنيەنىڭ زۇلىمدىعىن كورىپ، قاتتى قايعىرۋلارى قاجەت. سونداي-اق ولار مۇنى ىشتەي سەزىنىپ قانا قويماي، سوزدەرىمەن دە، ىستەرىمەن دە تازا عيباداتقا شىن بەرىلگەندەرىن كورسەتۋلەرى كەرەك. ولار مۇنى جاريالانىپ جاتقان ىزگى حاباردى قابىلداۋ ارقىلى، ماسىحكە ٴتان جاڭا بولمىسقا يە بولۋ ارقىلى، ەحوباعا باعىشتالىپ، شومىلدىرۋ راسىمىنەن ٶتۋ ارقىلى جانە ٴماسىحتىڭ باۋىرلارىن ادالدىقپەن قولداۋ ارقىلى كورسەتە الادى (ەزەك. 9:4؛ مات. 25:34—40؛ ەفەس. 4:22—24؛ پەت. 1-ح. 3:21). قۇتقارىلۋ تاڭباسى قازىردەن باستاپ وسىنداي ٶمىر جولىن ۇستاناتىندارعا عانا جانە زور الاپاتتى تازا عيبادات ەتۋشىلەر رەتىندە وتكەرەتىندەرگە عانا قويىلاتىن بولادى.
18. ا) يسا ٴماسىح قۇتقارىلاتىن ادامدارعا قاشان جانە قالاي تاڭبا قويادى؟ ٵ) ادال مايلانعان ماسىحشىلەرگە تاڭبا قويۋدىڭ قاجەتى بار ما؟ ٴتۇسىندىرىڭىز.
18 قۇتقارىلۋعا لايىق جاندارعا تاڭبانى يسا ٴماسىح قويادى. ەزەكيەلدىڭ كەزىندە ادال ادامدارعا تاڭبا قويۋعا پەرىشتەلەر قاتىسقان ەدى. ال بۇل پايعامبارلىقتىڭ بۇگىنگى ورىندالۋىنا ساي، حاتشىنىڭ سياساۋىتى بار كىسى «ۇلىلىققا بولەنىپ كەلىپ»، بارلىق حالىقتاردى سوتتايتىن يسا ٴماسىحتى بەينەلەيدى (مات. 25:31—33). ول زور الاپاتتىڭ كەزىندە، جالعان دىندەر جويىلعاننان كەيىن كەلەدى *. سول ٴبىر شەشۋشى كەزەڭدە، ارماگەددوننىڭ ٴدال الدىندا، يسا ادامداردى سوتتاپ، ولاردى قوي مەن سەركەگە بولەدى. «ۇلى جاماعاتقا» جاتاتىندار قوي رەتىندە تانىلادى، باسقاشا ايتقاندا، ولارعا تاڭبا قويىلادى. بۇل ولاردىڭ «ماڭگىلىك ٶمىردى يەمدەنەتىنىن» بىلدىرەدى (ايان 7:9—14؛ مات. 25:34—40، 46). ال ادال مايلانعان ماسىحشىلەر جايلى نە دەۋگە بولادى؟ ارماگەددوننان امان ٶتۋ ٷشىن ولارعا تاڭبا قويىلمايدى. ويتكەنى ولار شەشۋشى بەلگىلەرىن ولگەنگە دەيىن نەمەسە زور الاپات باستالماس بۇرىن الىپ قويادى. ولار ارماگەددون باستالار الدىندا كوككە اكەتىلەدى (ايان 7:1—3).
19. وسى دۇنيەگە شىعارىلعان ۇكىمدى يسامەن بىرگە كىمدەر جۇزەگە اسىرادى؟ («اھ ۇرىپ كۇرسىنۋ، تاڭبا قويۋ، شوقپارمەن قىرۋ. قاشان جانە قالاي ورىندالدى؟» دەگەن قورشاۋدى قاراڭىز.)
19 پاتشا يسا ٴماسىح پەن ونىڭ كوكتەگى اسكەرى وسى دۇنيەگە شىعارىلعان ۇكىمدى جۇزەگە اسىرادى. ەزەكيەلدىڭ ايانىندا زىعىر كيىمدەگى كىسى قۇتقارىلاتىنداردىڭ بارىنە تاڭبا قويىپ شىقپايىنشا، شوقپار ۇستاعان التى كىسى جويۋدى باستاماعان ەدى (ەزەك. 9:4—7). الداعى بولاتىن اپات تا يسا ٴماسىح حالىقتاردىڭ ٴبارىن سوتتاپ، قۇتقارىلاتىن قويلارعا تاڭبا قويىپ بىتپەيىنشە، باستالمايدى. ال ارماگەددون سوعىسىندا يسا كوكتەگى اسكەرىمەن، ياعني كيەلى پەرىشتەلەرمەن جانە وزىمەن بىرگە بيلىك ەتەتىن 144 000 مايلانعانمەن بىرگە وسى زۇلىم دۇنيەگە قارسى اتتانىپ، ونى تۇپتامىرىمەن جويادى. ال تازا عيبادات ەتەتىندەردى قۇتقارىپ، ادىلدىك ورناعان جاڭا دۇنيەگە باستاپ اپارادى (ايان 16:14—16؛ 19:11—21).
20. سياساۋىتى بار كىسى تۋرالى اياننان كوڭىلىمىزدى ورنىقتىراتىن قانداي ٴتالىم الامىز؟
20 سياساۋىتى بار كىسى تۋرالى اياننان كوڭىلىمىزدى ورنىقتىراتىن كوپ ٴتالىم الدىق. ٴبىز ەحوبا ادىلدەردى زۇلىمدارمەن بىرگە جويىپ جىبەرمەيتىنىنە كامىل سەنۋگە بولاتىنىن بىلدىك (ٴزاب. 97:10). بولاشاقتا بىزگە قۇتقارىلۋ تاڭباسى قويىلۋ ٷشىن، قازىردەن باستاپ نە ىستەۋ كەرەكتىگىن دە بىلدىك. ٴبىز ەحوباعا عيبادات ەتۋشىلەر رەتىندە مىناعان نىق بەكىندىك: ٴبىز شايتاننىڭ دۇنيەسىندەگى زۇلىمدىقتى كورىپ، اھ ۇرىپ كۇرسىنىپ جۇرگەندەرگە ىزگى حاباردى جاريالاۋعا جانە ٴتونىپ كەلە جاتقان اپات جايىندا ەسكەرتۋگە بارىنشا اتسالىسامىز. وسىلاي «ماڭگى ومىرگە ىڭعاي تانىتقاندارعا» تازا عيبادات ەتۋشىلەردىڭ قاتارىنا قوسىلۋعا كومەكتەسەمىز. سوندا ولاردىڭ دا قۇتقارىلۋ تاڭباسىن الۋعا ٵرى ادىلدىك ورناعان قۇدايدىڭ جاڭا دۇنيەسىنە جەتەلەيتىن جولمەن جۇرۋگە مۇمكىندىكتەرى بولادى (ەل. ٸس. 13:48).
^ 1-ابزاس ەزەكيەلدىڭ عيباداتحاناداعى جەركەنىشتى ىستەردى كورگەن ايانى وسى باسىلىمنىڭ 5-تاراۋىندا قاراستىرىلعان.
^ 13-ابزاس ٴبىر ەڭبەككە ساي، وسى تارماقتاعى «كۇنا» دەپ اۋدارىلعان ٴسوز، كوپ جاعدايدا، قۇدايدىڭ الدىندا جاسالاتىن مورالدىق قىلمىس نە سوراقى ارەكەتكە نۇسقايدى.
^ 18-ابزاس ۇلى بابىلدىڭ جويىلۋى جالعان دىندەردىڭ بارلىق مۇشەلەرى ولەدى دەگەندى بىلدىرمەسە كەرەك. سول ۋاقىتتا ٴتىپتى كەيبىر ٴدىني قىزمەتكەرلەردىڭ ٶزى جالعان دىننەن باس تارتىپ، ونىمەن بايلانىستا بولعاندارىن مويىنداماۋى مۇمكىن (زاك. 13:3—6).
