1-3. (a) Ang’o momiyo Ezekiel obwok ahinya, to ang’o ma ofwenyo e wi kethruok mar Jerusalem? (b) Wabiro nono penjo mage?

 EZEKIEL obwok ahinya! Oneno e fweny gik modwanyore ma Jo-Yahudi mong’anyo timo e hekalu man Jerusalem. a Joma ong’anyogo osedwanyo kama owal ne lamo madier e Israel. Kata kamano, ok hekalu kende e ma gisedwanyo. Piny Juda opong’ gi mahundu ma koro ok nyal kony. Nikech i Jehova nowang’ ahinya gi gik ma joge moyier ne timo, nonyiso Ezekiel niya: “Abiro olonegi mirimba.”​—Eze. 8:17, 18.

² Mano kaka Ezekiel winjo malit ahinya nikech i Jehova owang’ gi Jerusalem kaachiel gi hekalu ma yande ne ler kendo koro odwa kethogi! Onge kiawa ni Ezekiel penjore niya: ‘To nade joma oluoro Nyasaye manie dalano? Be idhi resgi? To ka en kamano, ere kaka idhi resgi?’ Mapiyo nono, Ezekiel yudo dwoko mag penjogo. Bang’ winjo kum mager ma idhi kumgo Jerusalem, owinjo kendo dwol maduong’ ma luongo joma omi tich mar chopo kumno. (Eze. 9:1) Kaka fwenyno medo dhi nyime, janabino chunye duogo nikech ofwenyo ni  ok dhi keth ji duto e rumbi. Joma oluoro Nyasaye ne idhi resi!

³ Nikech wadak e kinde mag giko mar pinyni, wan be wanyalo penjore ka be nitie joma biro tony e masira maduong’ mokayo machiegnini. We wanonuru penjo ma luwogi: (1) Ang’o kendo ma Ezekiel noneno e fwenyno? (2) Ere kaka fwenyno nochopo e kinde Ezekiel? (3) Fwenyno mulowa nade e kindewagi?

4. Ler ane gima Ezekiel neno kendo winjo e fweny.

⁴ Ang’o kendo ma Ezekiel noneno kendo winjo e fwenyno? (Som Ezekiel 9:1-11.) Chwo abiriyo “biro koa e dho rangach ma malo mochomo yo nyandwat.” Nyalo bedo ni rangano ne ni machiegni gi kama nochungie sanamu ma kelo nyiego kata kama mon ma ne ywago nyasaye miluongo ni Tamuz ne nitie. (Eze. 8:3, 14) Chwo abiriyogo nodonjo e laru ma iye mar hekalu ma gichung’ machiegni gi kendo mar misango molos gi mula. Kata kamano, chwo abiriyogo ne ok obiro chiwo misango. Kinde ma Jehova ne yie gi misango ma ne ichiwo e hekalu nosekalo. Chwo auchiel kuomgi nochung’ kanyo ka ‘ng’ato ka ng’ato kuomgi oting’o gir lweny e lwete.’ Dichwo mar abiriyo to nopogore. Norwako law kitani kendo ne ok oting’o gir lweny, kar mano, ne oting’o “gir ting’o wino mar jagoro.”

5, 6. Ang’o ma wanyalo wacho e wi joma oketnegi alama? (Ne picha manie chak sulani.)

⁵ Dichwo ma ne nigi gir ting’o wino mar jagoro nonego otim ang’o? Jehova nomiye migawo mapek. Nonyise niya: “Dhiyo iwuoth e i dala mar Jerusalem duto, kendo iket alama e lela wang’ ng’ato ka ng’ato ma ywagore kendo ma chur nikech gik moko duto modwanyore ma ji timo e dalano.” Nyalo bedo ni gie sechego Ezekiel noparo kaka jonyuol ma Jo-Israel noketo alama mar remo e wi frem mar dhoot kod bathe koni gi koni mondo obed kaka ranyisi ni nyithindgi makayo ok onego onegi. (Wuok 12:7, 22, 23) Dibed ni e fweny mar Ezekiel, alama ma ng’at ma oting’o gir wino ne keto e lela wang’ ng’ato ne dhi miyo kik neg ng’atno sama ne iketho Jerusalem?

⁶ Dwoko mar penjono nenore maler ka wang’eyo gimomiyo iketo ne ng’ato alama. Alamano ne iketo e lela wang’ joma ne “ywagore kendo ma chur” nikech gik modwanyore “ma ji timo e dalano.” Ang’o ma wanyalo wacho e wi joma ne iketonegi alamano? Wanyalo bedo gadier ni ne giwinjo malit ahinya e chunygi ok mana nikech lamo sanamu ma ne itimo  e hekalu kende, to bende nikech mahundu, terruok, kod timbe mibadhi ma ne opong’o Jerusalem. (Eze. 22:9-12) E wi mano, nenore ni ne giwachoga ayanga ni timbego ne richonegi. Onge kiawa ni weche kod timbe jogo ne nyiso maler ni ne gisin gi gik ma ne timore e pinyno kendo ne gimakore chuth gi lamo madier. Nikech Jehova ng’won, ne odhi reso joma chunygi ni karego.

7, 8. Ere kaka chwo auchiel ma ne oting’o gige lweny ne dhi timo migapgi, to weche norumo nade?

⁷ Kata kamano, ere kaka chwo auchiel ma ne oting’o gige lweny ne dhi timo migapgi? Ezekiel nowinjo ka Jehova chikogi niya: Luwuru ng’at moting’o gir ting’o wino mar jagoro kendo uneguru ji duto mak mana joma nigi alama e lela wang’gi. Jehova nochikogi niya: ‘Chakuru nego ji e oda maler’. (Eze. 9:6) Chwogo nonego ochak tijgi e hekalu man Jerusalem  ma koro Jehova ne ok kwan kaka kama ler. Joma ne idhi kwong negi ne gin “jodongo ma ne nie nyim odcha,” ma ne gin jodongo 70 mag Israel ma ne nie hekalu kendo ma ne wang’o ubani ne nyiseche manono.​—Eze. 8:11, 12; 9:6.

⁸ Weche norumo nade? Sama Ezekiel ne dhi nyime ng’iyo kendo winjo gik ma timore, ng’at moting’o gir ting’o wino mar jagoro ne miyo Jehova ripot niya: “Asetimo mana kaka ne ichika.” (Eze. 9:11) Wanyalo penjore niya: ‘Ang’o ma ne otimore ne joma ne odak Jerusalem? Be nitie joma ne oluoro Nyasaye ma ne otony?’

9, 10. Gin jomage ma ne otony ka ne iketho Jerusalem, to wanyalo wacho ang’o kuomgi?

⁹ Som 2 Weche mag Ndalo 36:17-20. Weche ma ne Ezekiel okoro notimore e higa mar 607 K.K.P. ka ne jolweny mag Jo-Babulon oketho Jerusalem kod hekalu mare. Jo-Babulon ne chalo mana kaka “okombe e lwet Jehova.” Jehova notiyo kodgi e olo mirimbe ka okumo Jo-Jerusalem ma ne ok omakore kode. (Jer. 51:7) Be ne idhi neg ji duto? Ooyo. E fweny ma ne Ezekiel oneno, ne okor ni nitie joma ne ok dhi neg gi Jo-Babulon.​—Cha. 18:22-33; 2 Pet. 2:9.

¹⁰ Nitie joma ng’eny ma ne oluoro Nyasaye ma ne otony. Ne giriwo Jo-Rekab, Ebed-melek Ja-Ethiopia, janabi Jeremia, kod jandikone miluongo ni Baruk. (Jer. 35:1-19; 39:15-18; 45:1-5) Kaluwore gi fweny mar Ezekiel wanyalo bedo gadier ni jogo ne ‘ywagore kendo chur nikech gik moko duto modwanyore ma ji ne timo’ Jerusalem. (Eze. 9:4) Onge kiawa ni ka pok kinde ma ikethoe Jerusalem nochopo, ne ginyiso maler ni gikwedo chuth timbe maricho ma ne dhi nyime kendo ne giriwo lwedo lamo madier. Timo kamano nomiyo ginyiso ayanga ni owinjore oresgi.

11. Chwo auchiel ma ne oting’o gige lweny kod dichwo ma ne nigi gir ting’o wino mar jagoro ochung’ ne ng’a gini?

¹¹ Be en adier ni noket ne jogo alama masie? Onge gima nyiso ni nitie ng’ato ang’ata bed ni Ezekiel kata janabi moro amora, ma nowuotho Jerusalem ka keto alama ne joma oluoro Nyasaye. Nikech mano, nenore ni fweny ma ne Ezekiel oneno ne nyiso gik ma timore e polo kama wang’ dhano ok nyal neno. Dichwo ma ne nigi gir ting’o wino mar jagoro kod chwo auchiel ma ne oting’o gige lweny e fwenyno ne ochung’ ne chuech mag roho mag Jehova moikore timo dwache. (Zab. 103:20, 21) Nenore maler ni Jehova notiyo gi malaikene mondo gichik kaka ne ikumo joma ok oluoro Nyasaye ma nodak Jerusalem. Keto alama ne joma ne dhi tony nyiso ni malaikego ne ok dhi nego ji duto to nitie joma ne dhi tony.

12, 13. (a) Ang’o momiyo Jehova ne oolo mirimbe kuom Jerusalem, to ang’o momiyo wanyalo bedo gadier ni obiro olo mirimbe kendo e kindewagi? (b) Be en adier ni dinde ma luongore ni Jokristo ochung’ ne Jo-Jerusalem ma ne ok omakore gi Nyasaye? Ler ane. (Ne sanduk ma wiye wacho ni “Be Dinde ma Luongore ni Jokristo Ochung’ ne Jerusalem?”)

¹² E kindewagi, kethruok maduong’ ma pok obedoe ochomowa. “Masira maduong’ nobedie ma pok ne otimore a chakruok piny nyaka sani, bende ok nochak otimre kendo.” (Mat. 24:21) Sama warito kinde makendeno, nitie penjo moko ma wanyalo penjore: Be ibiro keth ji duto e masirano koso nitie joma biro tony? Be ibiro ket alama e yo moro ne joma lamo Jehova gadier? Tiende ni, be nitie kaka fweny ma ne Ezekiel oneno mar ng’at moting’o gir wino chopo e okang’ moro e kindewagi? Dwoko mar penjo adekgo duto en ee. Ang’o momiyo wanyalo wacho kamano? Mondo wayud dwoko, we wadog ane e fweny mar Ezekiel.

¹³ Be iparo gimomiyo Jehova noolo mirimbe ne Jerusalem? Ng’i ane kendo Ezekiel 9:8, 9. (Som.) Ka ne Ezekiel oluor ni ne idhi keth “Jo-Israel duto modong’,” Jehova nonyise weche ang’wen ma nyiso gimomiyo nodhi chiwo kum. Mokwongo, “richo mar” ogandano ne “duong’ ahinya.” b Mar ariyo, piny Juda ne “opong’ gi remo.” Mar adek, Jerusalem, ma ne en dala maduong’ mar piny Juda, ne “opong’ gi mibadhi.” Mar ang’wen, jogo ne timo timbe maricho ka giparo ni Jehova ok nyal neno timbegi marichogo. Donge wechego nyiso ni pinywa ma sani mopong’ gi timbe mag terruok, mahundu, mibadhi mitimo gi joma ok oluoro Nyasaye bende ibiro kethi? Kuom adier, nikech Jehova en “jal ma ok lokre” donge timbe maricho ma nomiyo iye owang’ e kinde Ezekiel bende miyo iye wang’ e kindewagi? (Jak. 1:17; Mal. 3:6) Donge mano nyiso ni chwo auchiel ma ne oting’o gige lweny kod ng’at ma ne oting’o gir ting’o wino mar jagoro bende nigi tich e kindewagi!

14, 15. Gin ranyisi mage ma nyiso ni Jehova chiwoga siem ka pok oketho ji?

¹⁴ Kata kamano, ere kaka fweny mar Ezekiel chopo e kindewagi? Ka wanono kaka fwenyno nochopo e kinde machon wanyalo fwenyo kaka ochopo e kindewagi kod kaka obiro chopo e kinde ma biro. We wane ane moko kuom gik ma osetimore kod ma biro timore ma chopo weche ma ne Ezekiel okoro.

¹⁵ Jehova chiwo siem ka pok okelo kethruok. Mana kaka ne wanono e Sula mar 11 mar bugni, Jehova noketo Ezekiel mondo obed kaka “jarit mar od Israel.” (Eze. 3:17-19) Chakre higa mar 613 K.K.P., Ezekiel nonyiso Jo-Israel achiel kachiel ni ne idhi kethgi. Jonabi mamoko kaka Isaya kod Jeremia bende nosiemo Jo-Israel ka ginyisogi masira ma ne dhi yudo Jerusalem. (Isa. 39:6, 7; Jer. 25:8, 9, 11) E kindewagi, kokalo  kuom Kristo, Jehova osetiyo gi grup matin mar Jokristo mowal mondo gipidh Jokristo madier ma gin joode gi chiemb chuny. E wi mano, otiyo kodgi mondo gisiem ji e wi masira maduong’ ma okayo machiengni.​—Mat. 24:45.

16. Be en adier ni wan kaka jotich Jehova waketoga alama kuom joma biro tony? Ler ane.

¹⁶ Jotich Jehova ok ket alama ne joma biro tony. Par ni ne ok onyis Ezekiel mondo owuoth owuon e dala mar Jerusalem koketo alama kuom joma ne dhi tony. E yo ma kamano bende, ok omi jotich Jehova migawo mar keto alama kuom joma dhi tony. Kar mano, kaka jood Kristo, omiwa migawo mar lendo. Wanyiso ni wakawo migawoni mapek kuom lando wach maber mar Pinyruoth kendo chiwo siem ni piny marachni chiegni rumo. (Mat. 24:14; 28:18-20) Kuom timo kamano, wabiro konyo joma chunygi ni kare mondo girwak lamo madier.​—1 Tim. 4:16.

17. Ang’o ma ng’ato onego otim sani mondo obi oketne alama mar tony e kinde ma biro?

¹⁷ Mondo ng’ato otony e masira ma biro, nyaka onyis sani ni en gi yie. Mana kaka ne waseneno motelo, joma ne otony e masira ka ne iketho Jerusalem e higa mar 607 K.K.P. nonyiso ka pok masirano ochopo ni ne gikwedo timbe maricho ma ne timore kendo ne gimakore chuth gi lamo madier. Mano bende e gima joma biro tony onego otim e kindewagi. Ka pok  masira ochopo, ji onego “oywagre kendo chur” tiende ni, giwinj malit ahinya e chunygi nikech gik maricho ma timore e piny. E wi mano, kar pando kaka giwinjo e chunygi, wechegi kod timbegi onego onyis ayanga ni gimakore gi lamo madier. Ginyalo timo kamano nade? Nyaka girwak wach maber milando e kindewagi, gidhi nyime nyago kido mag Kristo, obatisgi kaka ranyisi ma nyiso ni gichiwore ne Jehova kendo giriw lwedo owete Kristo gi chunygi duto. (Eze. 9:4; Mat. 25:34-40; Efe. 4:22-24; 1 Pet. 3:21) Mana jogo ma timo kamano sani kendo ma masira maduong’ biro yudo ka gimakore gi lamo madier e ma ibiro ketnegi alama mar tony.

18. (a) Yesu biro keto alama mar tony ne joma chunygi nikare e yo mane kendo e kinde mage? (b) Be onego oket alama ne Jokristo mowal? Ler ane.

¹⁸ Tij keto alama ne joma chunygi ni kare biro timore e polo. E kinde Ezekiel, malaike ne nigi migawo mar keto alama ne joma ne dhi tony. E kindewagi, ng’at ma nigi gir ting’o wino mar jagoro ochung’ ne Yesu ka “obiro e duong’ne” kaka Jang’ad Bura ne ogendni manie piny. (Mat. 25:31-33) Yesu biro duogo e kinde masira maduong’ bang’ ka oseketh dinde mag miriambo. c E kinde matekno ka pok Har–Magedon ochakore, Yesu biro ng’ado bura kopogo joma gin rombe kod diek. Joma nie ‘oganda mang’ongo’ ibiro ketnegi alama ma nyiso  ni gin rombe ma tiende ni ‘gibiro donjo e ngima ma nyaka chieng’.’ (Fwe. 7:9-14; Mat. 25:34-40, 46) To nade Jokristo mowal? Ok bi dwarore ni oketnegi alama mondo gitony e lweny mar Har–Magedon. Kar mano, gibiro yudo alama mogik ka pok githo kata ka pok masira maduong’ ochakore. Kae to kinde matin ka Har–Magedon ochakore, gibiro dhi e polo.​—Fwe. 7:1-3.

19. Gin jomage ma biro konyo e chiwo kum ne piny marachni? (Som sanduk ma wiye wacho ni “Ywagruok, Chur, Keto Alama, kod Ketho Joma Onge Alama​—Kinde ma Gibiro Timoree kod Kaka Gibiro Timore)

¹⁹ Ruoth Yesu kaachiel gi jolweny mage manie polo biro ng’ado bura ne piny marachni. E fweny mar Ezekiel, chwo auchiel moting’o gige lweny ne dhi chako tijgi bang’ ka ng’at ma nigi law kitani osetieko tije mar keto ne ji alama. (Eze. 9:4-7) E yo ma kamano bende, kethruok biro chakore bang’ ka Yesu oseng’ado bura ne ogendni ma oketo alama ne joma gin kaka rombe ma ibiro resi. Kae to e kinde lweny mar Har–Magedon, Yesu biro tayo jolweny manie polo moriwo malaike kaachiel gi joloch wetene 144,000 mondo giketh piny marachni, kendo gires joma lamo Nyasaye gadier ka girwakogi e piny manyien.​—Fwe 16:14-16; 19:11-21.

20. Gin puonj mage ma iyudo e fweny ma ne Ezekiel oneno e wi ng’at ma nigi gir ting’o wino mar jagoro?

²⁰ Mano kaka wamor gi puonj ma wayudo e fweny ma ne Ezekiel oneno e wi ng’at ma nigi gir ting’o wino mar jagoro! Wan gadier chuth ni Jehova ok bi ketho joma beyo kaachiel gi joma richo. (Zab. 97:10) Wang’eyo gima onego watim mondo obi oketnwa alama ma iketo ne joma ibiro resi. Kaka jotich Jehova, wang’ado ni wabiro timo duto ma wanyalo e lando wach maber kendo chiwo siem ne jogo ma ywagore kendo chur nikech gik maricho mitimo e piny Satanni. Wan gi thuolo makende mar konyo ‘ji duto ma chunygi ni kare ne ngima mochwere’ mondo giriwre kodwa e lamo madier kendo gibed e kind jogo ma ibiro ketnegi alama mar tony miketo ne jogo ma ibiro resi mondo odonj e piny manyien mar Nyasaye.​—Tich 13:48.