1-3. (a) Fu san ede Esekièl e skreki èn san a e leri fu a pori di Yerusalem ben o kisi? (b) Sortu aksi wi o luku?

 ESEKIÈL skreki fu den sani di a si. Na ini wan fisyun a si sortu ogri sani den Dyu ben du na ini a tempel na Yerusalem. a Den Dyu dati doti a presi pe sma ben go anbegi a tru Gado na ini Israel. Ma a no a tempel wawan den doti. Na ini a heri kondre Yuda sma ben e du ogri èn Yehovah no ben o gi den pardon moro. Yehovah ben taigi Esekièl: „Fu di mi ati e bron srefisrefi, meki mi o strafu den.”​—Esek. 8:17, 18.

² Esekièl e sari taki Yehovah o pori Yerusalem nanga a tempel di ben de wan santa presi. Kande a e aksi ensrefi: ’San o pasa nanga den sma di e gi yesi na Yehovah? Yehovah o kibri den? Fa a o du dati?’ Esekièl no abi fu wakti langa fu kisi piki tapu den aksi disi. Syatu baka di a yere taki Yehovah o strafu Yerusalem, a yere wan tranga sten e kari den man di ben o strafu a foto (Esek. 9:1). Na ini  a fisyun a profeiti e si taki a no ala sma o dede, ma den wan di e gi yesi na Gado o tan na libi.

³ A kaba fu na ogri grontapu disi de krosibei èn kande wi e aksi wisrefi tu suma o tan na libi. Meki wi go luku den aksi disi: (1) Sortu tra sani Esekièl si na ini a fisyun? (2) Fa a fisyun kon tru na ini a ten fu en? (3) San wi e leri fu a fisyun na ini a ten disi?

4. Fruteri sortu tra sani Esekièl e si èn e yere na ini a fisyun.

⁴ Sortu tra sani Esekièl e si èn e yere na ini a fisyun? (Leisi Esekièl 9:1-11.) Seibi man e waka kon „fu a tapusei-portu di de na noordsei”. Kande a portu disi ben de krosibei fu a popki di e meki Gado dyarusu noso kande a ben de pe den uma ben e krei gi a gado Tamus (Esek. 8:3, 14). Den seibi man e go na ini a pikin tempel-dyari èn den e tanapu na sei a kopro altari pe sma ben tyari ofrandi. Ma den man no ben de drape fu tyari ofrandi. Yehovah no ben o teki nowan ofrandi di sma ben o tyari na a tempel. Siksi fu den man „ben abi wan fetisani na ini den anu fu naki sma kiri”. A di fu seibi man ben difrenti fu den. A ben weri linnen krosi èn a no ben abi wan fetisani na ini en anu, ma „wan enkikokro fu wan sekretarsi”.

5, 6. San wi e leri fu den sma di kisi wan marki? (Luku a prenki na a bigin fu a kapitel.)

⁵ San a man di ben abi na enkikokro ben musu du? Yehovah gi en wan prenspari wroko fu du. A taigi en: „Pasa na ini a heri foto Yerusalem èn poti wan marki na a fesi-ede fu ala den sma di e soktu èn e geme fu ala den tegu sani di sma e du na ini a foto.” Kande a sani disi ben meki Esekièl prakseri den Israelsma di ben teki brudu fu marki a doropostu nanga tapusei fu den doro, so taki den fosi pikin fu den no ben dede (Eks. 12:7, 22, 23). A de so taki a man nanga na enkikokro ben poti wan marki na a fesi-ede fu den sma fu sori taki den ben o tan na libi te Yerusalem ben o kisi pori?

⁶ Wi e kisi piki tapu na aksi disi te wi e luku fu san ede den sma e kisi wan marki. Den sma di ’e soktu èn e geme fu ala den tegu sani di sma ben e du na ini a foto’ e kisi wan marki. San disi e leri wi fu den sma disi? A e leri wi taki den no ben sari nomo taki sma ben dini falsi gado na ini a tempel, ma den ben sari tu taki sma ben e du ogri, taki den ben du hurudu èn taki den ben du kruka sani na  ini heri Yerusalem (Esek. 22:9-12). Boiti dati, den ben taki èn den ben du sani fu sori taki den ben tegu gi den sani di ben pasa na ini a kondre. Den ben sori tu taki den ben horibaka gi a tru anbegi. Dati meki Yehovah ben o sori sari-ati gi den èn a ben o meki den tan na libi.

7, 8. Fa den man di ben abi fetisani na ini den anu ben musu du a wroko di den kisi, èn san e pasa na a kaba fu a fisyun?

⁷ Fa den siksi man di ben abi fetisani na ini den anu ben musu du a wroko di den kisi? Esekièl yere san Yehovah taigi den man disi: Baka te a man nanga na enkikokro marki den sma, dan unu musu kiri ala sma di no abi wan marki na den fesi-ede. Yehovah e taigi den tu: „Un musu bigin na mi santa presi” (Esek. 9:6). Den man ben musu bigin na a tempel na ini Yerusalem di no ben santa moro  gi Yehovah. Den fosi sma di den ben musu kiri na „den owru man di ben de na fesi a santa presi”. Seibitenti fu den owru man fu Israel ben de na ini a tempel e bron switismeri gi falsi gado.​—Esek. 8:11, 12; 9:6.

⁸ San e pasa na a kaba fu a fisyun? Esekièl e tan luku èn a e yere san a man nanga na enkikokro e taigi Yehovah: „Mi du ala san yu taigi mi fu du” (Esek. 9:11). Kande wi e aksi wisrefi: ’San pasa nanga den sma fu Yerusalem? Sma ben de di gi yesi na Yehovah èn di tan na libi?’

9, 10. Suma tan na libi di Yerusalem kisi pori èn fu san ede den kisi kibri?

⁹ Leisi 2 Kroniki 36:17-20. A profeititori fu Esekièl kon tru na ini 607 Fosi Krestes di a legre fu Babilon pori Yerusalem nanga a tempel. Den Babilonsma ben de leki wan „kan na ini na anu fu Yehovah”. A gebroiki den Babilonsma fu strafu den sma fu Yerusalem (Yer. 51:7). A de so taki den kiri ala sma na ini Yerusalem? Nôno. Esekièl ben taki na ini a fisyun taki den Babilonsma no ben o kiri ala sma.​—Gen. 18:22-33; 2 Petr. 2:9.

¹⁰ Wan tu sma di ben gi yesi na Yehovah ben tan na libi soleki den Rekabsma, na Etiopiaman Ebed-Meilek, a profeiti Yeremia nanga Baruk a sekretarsi fu en (Yer. 35:1-19; 39:15-18; 45:1-5). A fisyun fu Esekièl e sori wi taki den sma disi ben musu fu ’soktu èn geme fu ala den tegu sani di sma ben e du’ na ini Yerusalem (Esek. 9:4). A no de fu taki dati fosi Yerusalem kisi pori den sma disi ben tegu gi na ogri di ben e pasa èn den ben horibaka gi a tru anbegi. Dati meki den ben tan na libi.

11. Suma a man nanga na enkikokro èn den siksi man nanga den fetisani na ini den anu e prenki?

¹¹ Den sma di ben tan na libi ben kisi wan trutru marki na den fesi-ede? Nowan presi na ini Bijbel wi e leisi taki Esekièl noso wan tra profeiti waka pasa na ini Yerusalem fu poti wan marki na a fesi-ede fu den sma di gi yesi na Yehovah. Sobun, a profeititori fu Esekièl e sori san den engel ben e du èn libisma no ben man si disi. A man nanga na enkikokro nanga den siksi man di ben abi den fetisani na ini den anu e prenki den engel fu Yehovah di de klariklari fu du a wani fu en (Ps. 103:20, 21). A no de fu taki dati Yehovah meki den engel fu en seti sani na so wan fasi taki den ogrisma na ini Yerusalem kisi strafu. Na wan agersifasi den engel e poti wan marki na a fesi-ede  fu den sma di musu tan na libi. Na so den sorgu taki soso den ogrisma dede.

12, 13. (a) Fu san ede Yehovah strafu Yerusalem, èn fu san ede wi kan fruwakti taki a o strafu sma na ini a ten disi tu? (b) A de so taki Yerusalem e prenki den falsi Kresten kerki? Fruklari dati. (Luku a faki „Yerusalem e prenki den falsi Kresten kerki?”)

¹² Heri esi a dei o doro pe Gado o strafu sma na heri grontapu. Bijbel e taki: „Wan bigi banawtu o de. Noiti ete so wan ten ben de sensi a bigin fu grontapu teleki now èn noiti moro so wan ten o kon baka” (Mat. 24:21). Ma kande wi e aksi wisrefi: ’Sma o tan na libi? Den anbegiman fu Yehovah o kisi wan marki di o meki taki den tan na libi? A fisyun fu a man nanga na enkikokro o kon tru na ini a ten disi tu?’ A piki tapu den dri aksi disi na „iya”. Fa wi du sabi dati? A fisyun fu Esekièl o gi wi a piki.

¹³ Yu sabi ete fu san ede Yehovah strafu Yerusalem? Meki wi luku baka san Esekièl 9:8, 9 e taki. (Leisi en.) Esekièl ben frede taki „ala den Israelsma di tan abra” ben o dede te Yerusalem ben o kisi pori. Ma Yehovah taigi en fu san ede a ben o strafu den sma. A fosi reide na taki a pipel ben „du kefalek bigi ogri”. b A di fu tu reide na taki ’sma ben e kiri trawan na ini a heri kondre’ Yuda. A di fu dri reide na taki sma ’ben e du wan lo kruktudu na ini’ Yerusalem, a mamafoto fu Yuda. A di fu fo reide na taki sma ben e du ogri fu di den ben bribi taki Yehovah ’no ben si’ den. Na fu den srefi sani disi Yehovah ati e bron nanga a grontapu disi. Yehovah „no e kenki” (Yak. 1:17; Mal. 3:6). Sobun, den sani di ben meki Yehovah atibron na ini a ten fu Esekièl o meki en atibron tu na ini a ten disi. Dati meki wi kan fruwakti taki den siksi man nanga den fetisani na ini den anu èn a man nanga na enkikokro o abi wan wroko fu du na ini a ten disi.

14, 15. Sortu eksempre e sori taki Yehovah e warskow sma fosi a strafu den?

¹⁴ Ma fa a fisyun fu Esekièl e kon tru na ini a ten disi? Te wi e luku fa a fisyun kon tru na ini a ten di pasa, dan wi kan sabi san wi kan fruwakti now èn na ini a ten di e kon. Luku wan tu sani di kon tru kaba èn di musu kon tru ete.

¹⁵ Yehovah e warskow sma fosi a strafu den. Soleki fa wi luku na ini kapitel 11, Yehovah meki Esekièl „tron wan waktiman gi den Israelsma” (Esek. 3:17-19). Na ini a yari 613 Fosi Krestes, Esekièl bigin warskow den Israelsma taki a foto ben o kisi pori. Tra profeiti soleki Yesaya nanga  Yeremia, ben warskow a pipel tu taki Yerusalem ben o kisi pori (Yes. 39:6, 7; Yer. 25:8, 9, 11). Na ini a ten disi Yehovah e gebroiki wan pikin grupu salfuwan fu gi den anbegiman fu en leri. Ma den e warskow sma tu gi a bigi banawtu di o kon heri esi.​—Mat. 24:45.

16. A de so taki a pipel fu Yehovah e poti wan marki gi den sma di o tan na libi? Fruklari disi.

¹⁶ A pipel fu Yehovah no e poti wan marki gi den sma di o tan na libi. Memre taki Gado no seni Esekièl fu go marki den sma na ini Yerusalem di ben o tan na libi. Na so a de tu taki a pipel fu Yehovah no kisi a wroko fu poti wan marki gi den sma di o tan na libi. Ma leki futuboi fu Gado wi kisi a wroko fu preiki. Wi e sori taki wi e si a wroko disi leki wan prenspari wroko te wi e preiki a bun nyunsu fu Gado Kownukondre fayafaya èn te wi e warskow sma taki heri esi na ogri grontapu disi o kisi pori (Mat. 24:14; 28:18-20). Na so wi e yepi sma fu kon dini a tru Gado.​—1 Tim. 4:16.

17. San wan sma musu du nownow kaba fu kisi wan marki fu tan na libi?

¹⁷ Efu sma wani tan na libi den musu sori nownow taki den abi bribi. Den sma di ben tan na libi di Yerusalem kisi pori na ini 607 Fosi Krestes, ben sori kaba taki den  ben tegu gi den ogri di ben e pasa èn den ben horibaka gi a tru anbegi. Na so a de na ini a ten disi. Fosi a kaba kon, den sma di wani tan na libi musu ’soktu èn geme’ fu den ogri di e pasa. Den sani di den e taki èn e du musu sori taki den e horibaka gi a tru anbegi. Fa den kan du disi? Den musu arki a boskopu di wi e preiki, den musu meki muiti fu kon abi den fasi fu Krestes, den musu gi densrefi abra na Yehovah, den musu dopu èn den musu horibaka gi den brada fu Krestes (Esek. 9:4; Mat. 25:34-40; Ef. 4:22-24; 1 Petr. 3:21). Soso den sma di e du den sani disi èn di de anbegiman fu Yehovah kaba te a bigi banawtu bigin, o kisi wan marki fu tan na libi.

18. (a) Fa Yesus Krestes o marki den sma di tan gi yesi na Gado èn o ten a o du dati? (b) Den salfuwan musu kisi wan marki tu? Fruklari dati.

¹⁸ Yesus o marki den sma di e gi yesi na Yehovah. Na ini a ten fu Esekièl, engel ben yepi fu marki sma fu tan na libi. Na ini a ten disi a man nanga na enkikokro e prenki Yesus Krestes te a o „kon nanga en glori” fu krutu ala pipel (Mat. 25:31-33). Yesus o kon na a ten fu a bigi banawtu, baka te falsi bribi kisi pori. c Na a ten dati, syatu fosi Armagedon bigin, Yesus o bosroiti suma na den skapu  èn suma na den bokoboko. Den sma fu a „bigi ipi” o de den skapu di o „kisi têgo libi” (Openb. 7:9-14; Mat. 25:34-40, 46). San o pasa nanga den salfuwan di tan gi yesi na Gado? Den o kisi a lasti marki fosi den dede noso fosi a bigi banawtu bigin. Wan pisi ten fosi Armagedon bigin, den salfuwan di de na grontapu ete o go na hemel.​—Openb. 7:1-3.

19. Suma o de nanga Yesus te a o pori na ogri grontapu disi? (Luku a faki „Soktu èn geme, Marki, Kiri sma​—O ten èn fa den sani disi o pasa?”)

¹⁹ Yesus Krestes, wi kownu na hemel, o kon nanga en hemel legre fu pori a grontapu disi. Na ini a fisyun fu Esekièl den siksi man nanga den fetisani na ini den anu bigin kiri sma, baka di a man nanga a linnen krosi kaba marki sma (Esek. 9:4-7). Na so a de tu taki a grontapu disi o kisi pori, baka te Yesus krutu den pipel èn te a marki den sma di o tan na libi. Na a feti fu Armagedon, Yesus o kon nanga den santa engel èn nanga den 144.000 salfuwan fu pori na ogri grontapu disi. A o frulusu den anbegiman fu Yehovah èn den o libi na ini a nyun grontapu.​—Openb. 16:14-16; 19:11-21.

20. San wi leri fu a fisyun fu a man nanga na enkikokro fu wan sekretarsi?

²⁰ Wi de nanga tangi gi den sani di wi leri fu a fisyun fu a man nanga na enkikokro! Wi de seiker taki Yehovah no o kiri den reti-ati sma makandra nanga den ogrisma (Ps. 97:10). Wi sabi san wi musu du fu kisi a marki fu tan na libi na ini a ten di e kon. Leki anbegiman fu Yehovah wi e du ala san wi man fu preiki a bun nyunsu gi den sma di e soktu èn e geme fu den ogri di e pasa. Ma wi e warskow den tu taki a grontapu o kisi pori. Wi abi a grani fu yepi den sma di „abi a yoisti denki fu man kisi têgo libi” fu kon na ini a tru anbegi. Na so den o kisi a marki fu tan na libi èn den o libi fu têgo na ini a nyun grontapu.​—Tori 13:48.