1-3. (a) Ano an nakita ni Ezekiel nga diri katoohan, ngan ano an iya hinbaroan mahitungod han kabungkagan han Jerusalem? (b) Ano nga mga pakiana an aton hihisgotan?

 DIRI makatoo hi Ezekiel! Nakakita pa la hiya hin bisyon han mangil-ad nga mga ginbubuhat han apostata nga mga Judio ha templo ha Jerusalem. * Ginhugawan nira an sentro han putli nga pagsingba ha Israel. Pero diri la an templo an nahugawan. An tuna han Juda napuno hin kamadarahog ngan imposible na mabag-o an kahimtang. Nasakitan gud hi Jehova ha ginbubuhat han iya pinili nga katawohan salit nagsiring hiya kan Ezekiel: “Magios ako tungod han duro nga kasina.”​—Ezek. 8:17, 18.

² Nasubo gud hi Ezekiel nga an Jerusalem ngan an templo hito nga sagrado hadto nasisinahan na gud ni Jehova ngan mabubungkag! Sigurado nga nahunahuna niya: ‘Kumusta man an magtinumanon nga aada ha syudad? Titipigan ba hira nga buhi? Kon oo, paonan-o?’ Waray pag-iha, nabaton an iya mga pakiana. Pakabati gud niya han mapintas nga paghukom para ha Jerusalem, nakabati hiya hin daku nga tingog nga nagpapatawag hadton magpapadapat han paghukom han Dios. (Ezek. 9:1) Ha pagpadayon han bisyon, nalipay gud an propeta nga hibaroan nga pinili la an  bubungkagon, diri an ngatanan. Oo, an magtinumanon matatalwas!

³ Samtang nagtitikahirani an kataposan hinin maraot nga sistema, bangin maghunahuna liwat kita kon hin-o an matatalwas. Salit hisgotan naton ini nga mga pakiana: (1) Ano an sunod nga nakita ni Ezekiel ha bisyon? (2) Paonan-o natuman ito nga bisyon ha iya panahon? (3) Ano an kahulogan hito ha aton panahon?

4. Ano an sunod nga nakita ngan nabatian ni Ezekiel ha bisyon?

⁴ Ano an sunod nga nakita ngan nabatian ni Ezekiel? (Basaha an Ezekiel 9:1-11.) Pito nga lalaki an nagkaabot “tikang ha dapit han igbaw nga ganghaan nga naatubang ha norte,” bangin hirani ha hinmumutangan han simbolo han pangabugho o ha lugar diin an kababayin-an nananangis tungod ha dios nga hi Tamuz. (Ezek. 8:3, 14) An pito nga lalaki kinadto ha sulod nga bungsaran han templo ngan tinindog ha sapit han halaran nga tumbaga. Pero diri paghalad an ira tuyo. Diri na ginkakarawat ni Jehova an mga halad dida hito nga templo. Unom ha ira an may ‘dara nga armas para ha pagdugmok.’ An ikapito nga lalaki naiiba gud. Lino an iya bado, ngan diri armas an iya dara kondi “surudlan hin tinta han sekretaryo,” o sumala ha footnote, “burutangan hin tinta han eskriba.”

5, 6. Ano an aton masisiring mahitungod hadton ginmarkahan? (Kitaa an retrato ha tinikangan hini nga kapitulo.)

⁵ Ano an bubuhaton han lalaki nga may surudlan hin tinta? May importante nga toka ha iya hi Jehova: “Libota an syudad, an bug-os nga Jerusalem, ngan markahi an mga agtang han mga tawo nga nanhahayhay ngan nangangaraba tungod han ngatanan nga mangil-ad nga butang nga ginbubuhat ha syudad.” Bangin hito nga takna, nahinumdoman ni Ezekiel an magtinumanon nga Israelita nga nagmarka hin dugo ha igbaw nga bahin han hamba han ira purtahan ngan ha duha nga ligid hito sugad nga tigaman nga diri papatayon an ira suhag nga mga anak. (Ex. 12:7, 22, 23) Ha bisyon ni Ezekiel, an marka ba nga ibubutang han lalaki may puropariho nga katuyoan​—usa nga tigaman nga an may-ada hito ha agtang matatalwas ha kabungkagan han Jerusalem?

⁶ Magigin klaro an baton kon uusisahon naton an basihan ha pagmarka. Mamarkahan an mga “nanhahayhay ngan nangangaraba” tungod han mangil-ad nga mga butang nga “ginbubuhat ha syudad.” Salit ano an aton masisiring mahitungod hadton ginmarkahan? Nasusubo gud hira diri la tungod han idolatriya nga ginbubuhat ha templo kondi tungod liwat han kamadarahog, imoralidad, ngan karaotan nga kalyap ha Jerusalem. (Ezek. 22:9-12) Dugang pa, posible nga waray nira itago an ira inaabat. Sigurado nga an mga pulong ngan buhat hinin magtadong nga tawo nagpakita han ira kangalas ha nahitatabo ha Juda ngan han ira debosyon  ha putli nga pagsingba. Tungod han kalooy ni Jehova, tatalwason niya hira.

7, 8. Paonan-o tutumanon han mga lalaki nga may dara nga armas para ha pagdugmok an ira misyon, ngan ano an nahitabo ha kataposan han bisyon?

⁷ Kon sugad, paonan-o tutumanon han unom nga lalaki nga may dara nga armas para ha pagdugmok an ira misyon? Nabatian ni Ezekiel an instruksyon ni Jehova ha ira: Sundan an lalaki nga may surudlan hin tinta ngan pamatayon an ngatanan labot la hadton may marka ha agtang. “Sadang kamo magtikang ha akon santuaryo,” siring ni Jehova. (Ezek. 9:6) Magtitikang hira ha sentro han Jerusalem, an templo, nga diri na sagrado kan Jehova. An siyahan nga pamamatayon amo an “mga tigurang nga nakadto ha atubangan han balay”​—an 70 nga tigurang han Israel nga nakadto ha templo ngan naghahalad hin insenso ha buwa nga mga dios.​—Ezek. 8:11, 12; 9:6.

 ⁸ Ano an nahitabo ha kataposan han bisyon? Samtang hi Ezekiel padayon nga nagkikita ngan namamati, an lalaki nga may surudlan hin tinta nagsumat kan Jehova: “Ginbuhat ko kon ano an imo iginsugo ha akon.” (Ezek. 9:11) Sigurado nga mahuhunahuna naton: ‘Ano an nahitabo ha mga umurukoy han Jerusalem? May mga matinumanon ba nga nakatalwas ha kabungkagan?’

9, 10. Hin-o an pipira nga matinumanon nga nakatalwas han nabungkag an Jerusalem, ngan ano an aton masisiring mahitungod ha ira?

⁹ Basaha an 2 Cronicas 36:17-20. An tagna ni Ezekiel natuman han 607 B.C.E. han ginbungkag han kasundalohan han Babilonya an Jerusalem ngan an templo hito. Pariho hin “kopa ha kamot ni Jehova,” hira an instrumento ni Jehova ha paghuwad han iya kapungot ha diri matinumanon nga Jerusalem ngan pagsirot hito. (Jer. 51:7) Ginpamatay ba an ngatanan? Waray. Iginpakita ha bisyon ni Ezekiel nga an iba diri papatayon han mga taga-Babilonya.​—Gen. 18:22-33; 2 Ped. 2:9.

¹⁰ May mga matinumanon nga nakatalwas, upod na an mga Recabita, hi Ebed-melec nga taga-Etiopia, hi Jeremias nga propeta, ngan hi Baruc nga iya sekretaryo. (Jer. 35:1-19; 39:15-18; 45:1-5) Basado ha bisyon ni Ezekiel, masisiring naton nga hira “nanhahayhay ngan nangangaraba tungod han ngatanan nga mangil-ad nga butang” nga ginbubuhat ha Jerusalem. (Ezek. 9:4) Antes han kabungkagan, sigurado nga iginpakita nira an ira kangalas ha karaotan ngan an ira debosyon ha putli nga pagsingba, salit mahimo hira talwason.

11. Hin-o an ginrirepresentaran han unom nga lalaki nga may armas para ha pagdugmok ngan han lalaki nga may surudlan hin tinta han sekretaryo?

¹¹ Literal ba nga ginmarkahan ito nga magtinumanon? Waray rekord nga may bisan hin-o​—hi Ezekiel man o an iba nga propeta—​nga naglibot ha Jerusalem ngan aktuwal nga nagmarka ha agtang han magtinumanon. Salit klaro nga an bisyon ni Ezekiel nagpapakita han nahitatabo ha langit ngan diri nakikita han mga tawo. An lalaki nga may surudlan hin tinta han sekretaryo ngan an unom nga lalaki nga may armas para ha pagdugmok nagrirepresentar ha matinumanon nga espiritu nga mga linarang ni Jehova, nga pirme andam ha pagtuman han iya kaburut-on. (Sal. 103:20, 21) Sigurado nga gin-gamit ni Jehova an iya mga anghel basi maggiya ha pagpadapat han paghukom ha diri matinumanon nga Jerusalem. Sugad hin ginmamarkahan an agtang hadton tatalwason, ginsiguro han mga anghel nga pinili la an mabubungkag, diri an ngatanan.

12, 13. (a) Kay ano nga iginhuwad ni Jehova an iya kapungot ha Jerusalem, ngan kay ano nga sigurado nga ito liwat an iya bubuhaton ha aton panahon? (b) An Kakristianohan ba an ginsisimbolohan han diri matinumanon nga Jerusalem? Isaysay. (Kitaa an kahon nga “An Kakristianohan ba an Ginsisimbolohan han Jerusalem?”)

¹² Hirani na naton makita an waray kapariho nga pagpadapat han paghukom han Dios​—an “daku nga kasakitan nga waray pa  mahitabo tikang ha tinikangan han kalibotan tubtob yana, ngan diri na mahitatabo utro.” (Mat. 24:21) Samtang aton ginpapamulat iton eksayting nga panhitabo, may nabangon nga mga pakiana: Pinili la ba an bubungkagon, diri an ngatanan? Mamarkahan ba gihap para ha katalwasan an putli nga mga magsiringba ni Jehova? Karuyag sidngon, may katumanan ba ha aton panahon an bisyon ni Ezekiel mahitungod han lalaki nga may surudlan hin tinta? Oo an baton hiton tulo nga pakiana. Kay ano nga makakasiring kita hito? Basi hibaroan, balikon naton an bisyon ni Ezekiel.

¹³ Nahinunumdoman mo ba kon kay ano nga iginhuwad ni Jehova an iya kapungot ha kadaan nga Jerusalem? Kitaa utro an Ezekiel 9:8, 9. (Basaha.) Han nabaraka hi Ezekiel nga bangin magkamatay “an ngatanan nga nahisalin han Israel” ha tiarabot nga kabungkagan, nag-unabi hi Jehova hin upat nga rason hito nga paghukom. Siyahan, “an sayop” han nasud “daku gud hinduro.” * Ikaduha, an tuna han Juda “napuno hin pamatay.” Ikatulo, an Jerusalem nga kapital han Juda “puno hin karaotan.” Ikaupat, ginbalewaray han katawohan an ira magraot nga binuhatan pinaagi ha pagkombinse ha ira kalugaringon nga ‘diri [ito] nakikita’ ni Jehova. Diri ba ito liwat an masisiring ha imoral, bayolente, maraot, ngan waray pagtoo nga kalibotan yana? Hi Jehova “diri nag-iiba o nagbabag-o,” salit an nakaaghat han iya matadong nga kasina ha panahon ni Ezekiel makakapasina liwat ha iya yana. (San. 1:17; Mal. 3:6) Kon sugad, sigurado nga an unom nga lalaki nga may armas para ha pagdugmok ngan an lalaki nga may surudlan hin tinta magkakaada buruhaton ha moderno nga panahon!

14, 15. Ano nga mga ehemplo an nagpapakita nga nagpapahamangno hi Jehova antes han kabungkagan?

¹⁴ Kondi paonan-o natutuman ha aton panahon an bisyon ni Ezekiel? Kon balikon naton kon paonan-o ito natuman hadto, hibabaroan naton kon ano an aton malalaoman yana ngan ha tiarabot. Tagda an pipira nga panhitabo nga aton na nakita o makikita pa la sugad nga katumanan han tagna ni Ezekiel.

¹⁵ Hi Jehova nagpapahamangno ha mga tawo antes han kabungkagan. Ha Kapitulo 11, aton hinbaroan nga igintoka ni Jehova hi Ezekiel “sugad nga bantay ha panimalay ni Israel.” (Ezek. 3:17-19) Tikang han 613 B.C.E., klaro nga ginpahamangnoan ni Ezekiel an Israel han tiarabot nga kabungkagan. An iba nga propeta, upod na hira Isaias ngan Jeremias, nagpahamangno liwat mahitungod han kabungkagan han Jerusalem. (Isa. 39:6, 7; Jer. 25:8, 9, 11) Yana, pinaagi han Kristo, ginagamit ni Jehova an gutiay nga grupo han dinihogan nga mga surugoon diri la basi pakaunon an putli nga mga magsiringba, an mga surugoon ha panimalay, kondi basi pahamangnoan liwat an iba mahitungod han daku nga kasakitan nga tiabot na gud.​—Mat. 24:45.

16. Kita ba nga katawohan ni Jehova an magmamarka hadton matatalwas? Isaysay.

 ¹⁶ Diri an katawohan ni Jehova an magmamarka hadton matatalwas. Hinumdumi nga waray sugoa hi Ezekiel nga libuton an Jerusalem ngan markahan an iba para ha katalwasan. An katawohan ni Jehova yana waray liwat sugoa nga markahan an mga angay talwason. Lugod, sugad nga mga surugoon ha espirituwal nga panimalay han Kristo, ginsugo kita nga magsangyaw. Iginpapakita naton nga ginsiseryoso naton ito pinaagi han madasigon nga pagsangyaw han maopay nga sumat han Ginhadian han Dios ngan pagpahamangno nga hirani na gud tapuson inin maraot nga kalibotan. (Mat. 24:14; 28:18-20) Hini nga paagi, may bahin kita ha pagbulig ha sinsero nga mga tawo nga karawaton an putli nga pagsingba.​—1 Tim. 4:16.

17. Ano an kinahanglan buhaton yana han mga indibiduwal basi mamarkahan ha tiarabot nga panahon?

¹⁷ Basi matalwas ha tiarabot nga kabungkagan, kinahanglan pamatud-an yana han mga tawo an ira pagtoo. Hinbaroan naton nga adton natalwas ha kabungkag han Jerusalem han 607 B.C.E. nagpakita han ira kangalas ha karaotan ngan han ira debosyon ha putli nga pagsingba antes pa hito. Sugad liwat hito yana. Antes umabot an kabungkagan, an mga indibiduwal kinahanglan “nanhahayhay ngan nangangaraba”​—nasusubo gud—​tungod han karaotan hini nga kalibotan. Ngan imbes nga itago an ira inaabat, kinahanglan ipakita nira ha pulong ngan buhat an ira debosyon ha putli nga pagsingba.  Paonan-o? Kinahanglan karawaton nira an iginsasangyaw yana, padayon nga isul-ot an sugad-Kristo nga personalidad, magpabawtismo sugad nga simbolo han ira dedikasyon kan Jehova, ngan maunungon nga suportaran an kabugtoan han Kristo. (Ezek. 9:4; Mat. 25:34-40; Efe. 4:22-24; 1 Ped. 3:21) Adton nagbubuhat la hito yana​—ngan nagpapabilin nga putli nga mga magsiringba pag-abot han daku nga kasakitan—​an mamarkahan para ha katalwasan.

18. (a) Paonan-o ngan san-o mamarkahan ni Jesu-Kristo an magtinumanon? (b) Kinahanglan ba markahan an matinumanon nga mga dinihogan? Isaysay.

¹⁸ Ha langit bubuhaton an pagmarka ha magtinumanon. Ha panahon ni Ezekiel, an mga anghel may papel ha pagmarka para ha katalwasan. Ha moderno nga panahon, an lalaki nga may surudlan hin tinta nagrirepresentar kan Jesu-Kristo ‘pag-abot niya ha iya himaya’ sugad nga Hukom han ngatanan nga nasud. (Mat. 25:31-33) Mahitatabo ito ha daku nga kasakitan, katapos bungkagon an buwa nga relihiyon. * Hiton kritikal nga panahon, antes gud han Armagedon, huhukman ni Jesus an katawohan kon hira ba karnero o kanding. An kaapi ha “daku nga grupo” huhukman, o mamarkahan, sugad nga karnero, nga nagpapakita nga hira “makakakarawat hin kinabuhi nga waray kataposan.” (Pah. 7:9-14; Mat. 25:34-40, 46) Kumusta man an matinumanon nga mga dinihogan? Diri na hira kinahanglan markahan para ha katalwasan ha Armagedon. Lugod, makakarawat nira an ira ultimo nga pagselyo antes  hira mamatay o antes magtikang an daku nga kasakitan. Katapos, antes magtikang an Armagedon, babanhawon hira ngadto ha langit.​—Pah. 7:1-3.

19. Hin-o an makakaupod ni Jesus ha pagpadapat hin paghukom hini nga sistema? (Kitaa an kahon nga “Panhayhay Ngan Pangaraba, Pagmarka, Pagdugmok​—San-o Ngan Paonan-o?”)

¹⁹ An langitnon nga Hadi, hi Jesu-Kristo, ngan an iya mga hugpo ha langit magpapadapat hin paghukom hini nga sistema. Ha bisyon ni Ezekiel, an unom nga lalaki nga may dara nga armas para ha pagdugmok nagtikang la pagbungkag han tapos na an pagmarka nga buruhaton han lalaki nga lino an bado. (Ezek. 9:4-7) Ha pariho nga paagi, an tiarabot nga kabungkagan magtitikang la katapos ni Jesus hukman an katawohan ha ngatanan nga nasud ngan markahan an mga karnero para ha katalwasan. Kahuman, ha girra han Armagedon, pangungunahan ni Jesus an mga hugpo ha langit​—an baraan nga mga anghel ngan an 144,000 nga iya igkasi-magmarando—​kontra hinin maraot nga kalibotan. Bubungkagon nira ini ngan tatalwason an putli nga mga magsiringba ngadto ha matadong nga bag-o nga kalibotan.​—Pah. 16:14-16; 19:11-21.

20. Ano nga nakakaliaw nga mga leksyon an aton hinbaroan ha bisyon ni Ezekiel mahitungod han lalaki nga may surudlan hin tinta han sekretaryo?

²⁰ Mapasalamaton gud kita ha nakakaliaw nga mga leksyon ha bisyon ni Ezekiel mahitungod han lalaki nga may surudlan hin tinta han sekretaryo! Makakasarig gud kita nga diri bubungkagon ni Jehova an magtadong upod han magraot. (Sal. 97:10) Maaram kita han kinahanglan naton buhaton yana basi ha tiarabot markahan kita para ha katalwasan. Sugad nga mga magsiringba ni Jehova, determinado kita nga makigbahin hin bug-os ha pagpasamwak han maopay nga sumat ngan ha pagpahamangno ha mga nanhahayhay ngan nangangaraba tungod han karaotan ha kalibotan ni Satanas. Hini nga paagi, may pribilehiyo kita nga mabuligan adton “may husto nga disposisyon basi magkaada kinabuhi nga waray kataposan” nga umupod ha aton ha putli nga pagsingba ngan mamarkahan para ha katalwasan ngadto ha matadong nga bag-o nga kalibotan han Dios.​—Buh. 13:48.