Sumaryo sang Bag-o nga mga Paathag
Sa sulod sang mga tinuig, ginapaathag sang Lalantawan ang bag-o nga paghangop sa pila ka bahin sang tagna ni Ezequiel. Kag ini nga publikasyon nga Putli nga Pagsimba kay Jehova—Napasag-uli Na! may pila man ka bag-o nga paathag. Tilawi kon masabat mo ang masunod nga mga pamangkot.
Ano ang ginarepresentar sang apat ka nawong sang buhi nga tinuga?
Paghangop sadto: Ang kada isa sa apat ka nawong sang buhi nga tinuga, ukon mga kerubin, nagarepresentar sa isa sa apat ka panguna nga kinaiya ni Jehova.
Bag-o nga paathag: Bisan pa ang kada isa sang apat ka nawong sang buhi nga tinuga nagarepresentar sa isa sa apat ka panguna nga kinaiya ni Jehova, kon tan-awon sa kabilugan ang apat ka nawong nagasakop sa tanan nga kinaiya ni Jehova. Ang apat ka nawong nagapadaku man sang indi matupungan nga gahom kag himaya ni Jehova.
Rason sa pagbag-o: Sa Pulong sang Dios, ang numero nga apat masami nga nagakahulugan nga sakop ang tanan ukon kompleto. Gani, ang apat ka nawong kon tan-awon sa kabilugan, indi lang apat ka matahom nga kinaiya, kundi amo ini ang pundasyon sang dalayawon nga personalidad ni Jehova. Isa pa, ang kada nawong iya sang tinuga nga nagarepresentar sang pagkahalangdon, kusog, kag gahom. Bisan pa sini, ang apat ka gamhanan nga tiglawas sang mga tinuga, nga ginarepresentar sang apat ka nawong sang kada kerubin, ara sa idalom sang trono ni Jehova. Ginapadaku sini nga si Jehova amo ang Supremo nga Manuggahom sa tanan.
Sin-o ang ginasimbulo sang lalaki nga may suludlan sang tinta nga ginagamit sang sekretaryo?
Paghangop sadto: Ang lalaki nga may suludlan sang tinta nga sungay nagarepresentar sa hinaplas nga nagkalabilin. Paagi sa pagbantala kag paghimo sing disipulo nga hilikuton, ginabutangan subong sang mga hinaplas sing simbuliko nga marka ang agtang sang mangin bahin sang “daku nga kadam-an.”—Bug. 7:9
Bag-o nga paathag: Ang lalaki nga may suludlan sang tinta nga sungay nga ginagamit sang sekretaryo nagarepresentar kay Jesucristo. Markahan niya ang daku nga kadam-an kon hukman sila bilang mga karnero sa tion sang “dakung kapipit-an.”—Mat. 24:21.
Rason sa pagbag-o: Gintugyan ni Jehova sa iya Anak ang paghukom. (Juan 5:22, 23) Suno sa Mateo 25:31-33, si Jesus ang magahimo sang katapusan nga paghukom kon sin-o ang “mga karnero” kag sin-o ang “mga kanding.”
Ginalarawan bala sang mag-utod nga makihilawason nga sanday Ohola kag Oholiba ang Cristiandad nga natunga sa Katoliko kag Protestante?
Paghangop sadto: Ang magulang nga si Ohola (ang Samaria, nga kapital sang Israel), nagalarawan sa Katolisismo; ang manghod nga si Oholiba (ang Jerusalem, nga kapital sang Juda), nagalarawan sa Protestantismo.
Bag-o nga paathag: Ining mag-utod nga makihilawason wala nagalarawan sa bisan ano nga bahin sang Cristiandad. Kundi, ang impormasyon parte sa ila nagatudlo sa aton kon ano ang ginabatyag ni Jehova sa iya matutom anay nga katawhan nga naghimo sing espirituwal nga pagpakighilawas. Amo man sini ang iya ginabatyag sa tanan nga butig nga relihion.
Rason sa pagbag-o: Wala sing basihan sa Kasulatan nga sanday Ohola kag Oholiba nagalarawan sa Cristiandad. Ang Israel kag Juda ginkabig anay ni Jehova nga iya matutom nga mga asawa, pero ang Cristiandad wala gid sing bisan ano nga relasyon kay Jehova. Isa pa, ang pagpaanggid sa indi matutom nga katawhan sang Dios sa mga makihilawason sa kapitulo 16 kag 23 sang Ezequiel naghatag sing paglaum nga magabag-o sila kag mapasag-uli. Pero wala gid sing paglaum ang Cristiandad, bilang bahin sang Babilonia nga Daku.
Ang Cristiandad bala ang ginalarawan sang dumaan nga apostata nga Jerusalem?
Paghangop sadto: Ang Cristiandad amo ang ginalarawan sang indi matutom nga Jerusalem. Gani ang kalaglagan sang Jerusalem nagalandong sa kalaglagan sang Cristiandad.
Bag-o nga paathag: Ang sitwasyon sa indi matutom nga Jerusalem—pareho sang pagsimba sa diosdios kag lapnag nga kahigkuan—nagapahanumdom sa aton sang Cristiandad, pero wala na naton ginapatuhuyan ang Cristiandad nga ginalarawan sang Jerusalem.
Rason sa pagbag-o: Wala sing maathag nga basihan sa Kasulatan para hatagan sing larawan ukon ginalarawan ini nga topiko. Indi pareho sa dumaan nga Jerusalem, ang Cristiandad wala gid nakahimo sing putli nga pagsimba. Isa pa, ang Jerusalem ginpatawad ni Jehova sadto, pero ang Cristiandad wala na gid sing kapatawaran.
Paano natuman ang palanan-awon parte sa nalupyakan sang mamala nga mga tul-an?
Paghangop sadto: Sang 1918, ang ginhingabot nga mga hinaplas ginbihag sang Babilonia nga Daku, kag daw patay ang ila kahimtangan. Inang malip-ot nga pagkabihag natapos sang 1919 sang ginbuhi sila ni Jehova bilang mga manugbantala sang Ginharian.
Bag-o nga paathag: Malawig nga tion ang daw patay nga kahimtangan sa espirituwal nga pagkabihag kag nagsugod ini antes pa sang 1918. Nag-umpisa ini sang ikaduha nga siglo C.E. kag natapos sang 1919 C.E. kag nagasibu ini sa malawig nga tion sa pagtubo sang trigo kag hilamon sa parabola ni Jesus.
Rason sa pagbag-o: Malawig nga tion ang pagkabihag sang dumaan nga Israel, nga nagsugod sang 740 B.C.E. kag natapos sang 537 B.C.E. Ginlaragway sa tagna ni Ezequiel ang mga tul-an nga “mamala” ukon “mamala gid,” nga nagapakita nga ang ginarepresentar sini nga mga tul-an madugay na nga napatay. Kag ginalaragway sa sini nga tagna nga ang pagbuhi sa mga tul-an amat-amat kag kinahanglan sing tion.
Ano ang kahulugan sang pagtingob sang duha ka lipak?
Paghangop sadto: Sa tapos sang malip-ot nga panahon nga nadula ang paghiusa sa tion sang Bug-os Kalibutan nga Inaway I, nahiusa liwat ang matutom nga mga miembro sang hinaplas nga nagkalabilin sang 1919.
Bag-o nga paathag: Ginapadaku sang tagna nga himuon ni Jehova nga mangin isa ang iya mga sumilimba. Samtang nagaligad ang tion sa tapos sang 1919, nagadamo pa gid ang mga tawo nga may paglaum diri sa duta nga nagabuylog sa mga miembro sang hinaplas nga nagkalabilin. Ining duha ka grupo nagasimba sing nahiusa bilang katawhan ni Jehova.
Rason sa pagbag-o: Wala ginasiling sa tagna nga may isa lang ka lipak nga gin-utod kag sang ulihi gintingob. Gani, wala ginasiling sa tagna nga may isa ka grupo nga natunga kag sang ulihi nahiusa liwat. Kundi, nagasugid ini kon paano ang duha ka grupo himuon nga isa.
Sin-o ang Gog sang Magog?
Paghangop sadto: Ang Gog sang Magog nagapatuhoy kay Satanas sa tapos sia gintagbong halin sa langit.
Bag-o nga paathag: Ang Gog sang Magog nagapatuhoy sa paghimbon sang mga pungsod sa duta nga magasalakay sa putli nga mga sumilimba sa tion sang dakung kapipit-an.
Rason sa pagbag-o: Ang paglaragway sa Gog—nga ipakaon sia sa tanan nga sahi sang pispis nga nagapangdagit kag hatagan sing lulubngan sa duta—nagapakita nga ang Gog indi isa ka espiritu nga tinuga. Isa pa, ang pagsalakay sang Gog pareho man sa ginasiling sa libro sang Daniel kag Bugna parte sa mga pungsod sa duta nga magasalakay sa katawhan sang Dios.—Dan. 11:40, 44, 45; Bug. 17:14; 19:19.
Nakita bala kag nalibot ni Ezequiel ang dakung espirituwal nga templo nga ginpaathag sang ulihi ni apostol Pablo?
Paghangop sadto: Ang templo nga nakita ni Ezequiel sa palanan-awon amo man ang espirituwal nga templo nga ginpaathag ni apostol Pablo.
Bag-o nga paathag: Nakita ni Ezequiel indi ang espirituwal nga templo nga nagsugod sang 29 C.E., kundi nakita niya ang isa ka palanan-awon kon paano ang putli nga pagsimba base sa Mosaikong Kasuguan ipasag-uli sa tapos makabalik ang mga tinapok. Ang paathag ni Pablo sa espirituwal nga templo nagasentro sa hilikuton ni Jesus bilang Daku Pa nga Mataas nga Saserdote sugod sang 29 asta 33 C.E. Ang palanan-awon naman ni Ezequiel parte sa templo, nga wala nagsambit sang mataas nga saserdote, nagasentro sa espirituwal nga pagpasag-uli nga nagsugod sang 1919 C.E. Gani wala naton ginapangita kon ano ang ginalarawan sang tanan nga bahin kag mga takus sang templo nga nakita ni Ezequiel sa palanan-awon. Kundi, nagapokus kita sa mga leksion sa palanan-awon ni Ezequiel nga nagatudlo sa aton parte sa mga talaksan ni Jehova para sa putli nga pagsimba.
Rason sa pagbag-o: Ang templo nga nakita ni Ezequiel sa palanan-awon may daku nga kinalain sa espirituwal nga templo. Halimbawa, sa templo nga nakita ni Ezequiel madamo sing ginahalad nga sapat; sa espirituwal nga templo, isa lang ka halad ang ginhimo kag “makaisa gid lang.” (Heb. 9:11, 12) Sa sulod sang ginatos ka tuig antes nag-abot ang Cristo, wala sing ginpahayag si Jehova nga madalom nga kamatuoran parte sa espirituwal nga templo kay indi pa ini ang iya ginpat-od nga tion.
