Elembetshielo w’eyoyo lo tshena pe
L’edja k’ɛnɔnyi, Tshoto y’Etangelo yakatshikitanya eokelo kaso k’awui efula wa lo prɔfɛsiya ka Ɛzɛkiyɛlɛ. Ndo dibuku nɛ, Ɔtɛmwɛlɔ wa pudipudi wa Jehowa—wambokaloyama!, diekɔ la elembetshielo ekina efula w’eyoyo. Enda kana wɛ koka nkadimola lo ambola wayela anɛ:
Dungi dia ditongami diasɛna nɛi diekɔ didjidji dia na?
Eokelo k’edjedja: Elungi tshɛ ka dungi nɛi dia ditongami diasɛna kana akɛruba kekɔ didjidji dia dionga dimɔtshi dia lo waonga wa weke anɛi wa Jehowa.
Elembetshielo w’eyoyo: Kaanga mbele elungi tshɛ ka lo dungi nɛi dia lo ditongami diasɛna mɛnyaka dionga dimɔtshi dia lo waonga anɛi wa weke wa Jehowa, etena kɔsamadiɔ lo tshɛ, dungi nɛi sɔ mendanaka la waonga tshɛ wele la Jehowa. Ndo nto, dungi nɛi sɔ tɛnyaka woke woke wa wolo woleki wa Jehowa ndo lotombo lande.
Ɔkɔkɔ wokonyisha dia nembetshiya ngasɔ: L’Ɔtɛkɛta wa Nzambi, lofulo anɛi kambemaka mbala efula dia nembetshiya kɛnɛ kɔsami tshɛ. Ɔnkɔnɛ, etena kɛnama dungi nɛi kaamɛ, diɔ hadiɛnama tsho oko dionga la dionga lo waonga anɛi, koko diɔ diekɔ ehikamelo ka lonto la diambo la Jehowa. Ndo nto, elungi tshɛ kekɔ didjidji di’etongami kɛnya lɔnɛnɛ, wolo ndo nkudu. Kaanga mbediɔ ngasɔ, ditongami nɛi diele la wolo sɔ tshɛ oko wɛnyamidiɔ lo dungi nɛi diele l’ɔkɛruba tshɛ, diekɔ l’ɛse ka kiti ka lowandji ka Jehowa. Kɛsɔ mbidjaka dikako vɔlɛ ɔnɛ Jehowa mbele Omboledi Waheme Tshɛ.
Pami kele l’ɔlɔndɔ w’ashi wa mukanda wa sekeletɛlɛ ekɔ didjidji dia na?
Eokelo k’edjedja: Pami kele l’ɔlɔndɔ w’ashi wa mukanda ekɔ didjidji di’atshikadi w’akitami. Lo tshimbo y’olimu w’esambishelo ndo wa mbetɛ anto ambeki, akitami wekɔ lo mbidja kakianɛ djembetelo ya didjidji l’ekoko wa wanɛ wɔtɔ lo “olui a woke w’anto.”—Ɛny. 7:9.
Elembetshielo w’eyoyo: Pami kele l’ɔlɔndɔ w’ashi wa mukanda wa sekeletɛlɛ ekɔ didjidji dia Yeso Kristo. Nde ayodja anto wa l’olui a woke djembetelo etena kayowolomboshama oko ɛkɔkɔ lo “mfɔnu ka woke.”—Mat. 24:21.
Ɔkɔkɔ wokonyisha dia nembetshiya ngasɔ: Jehowa akasha Ɔnande lotshungɔ la nombosha. (Jni. 5:22, 23) Lo ndjela Mateo 25:31-33, Yeso ayolombosha anto l’ekomelo oko “ɛkɔkɔ” kana “mbudi.”
Onde wamato ahende wa numba w’otema ɔtɔi, Ohola la Oholiba wekɔ didjidji dia Lokristokristo kaamɛ la woho wakakakitɔna aseka Mupɛ l’ase Asɔnyi lo dietawɔ?
Eokelo k’edjedja: Ohola (Samariya, kapitalɛ ka Isariyɛlɛ), enondo ekɔ didjidji di’aseka Mupɛ; Oholiba (Jɛrusalɛma, kapitalɛ ka Juda), kose ekɔ didjidji di’ase Asɔnyi.
Elembetshielo w’eyoyo: Wamato wa numba asɔ w’otema ɔtɔi bu didjidji dia prɔfɛsiya di’etenyi kɛmɔtshi ka Lokristokristo. Koko, woongelo awɔ tɛnyaka woho wayaoka Jehowa etena kasala wanɛ waki ekambi ande wa kɔlamelo kinumba ka lo nyuma. Nde ndjaokaka woho akɔ waamɛ lo kɛnɛ kendana l’ɛtɛmwɛlɔ wa kashi tshɛ.
Ɔkɔkɔ wokonyisha dia nembetshiya ngasɔ: Ndooko dihole diɛnya Afundelo dia Ohola la Oholiba wekɔ didjidji dia Lokristokristo. Isariyɛlɛ ndo Juda waki etena kɛmɔtshi oko wadi wa kɔlamelo le Jehowa, koko ndooko lushi lakonge Lokristokristo la diɔtɔnganelo dia ngasɔ la Jehowa. Ndo nto, wɛdikelo w’ekambi wa Nzambi wele bu la kɔlamelo la wamato wa numba watanema lo tshapita 16 ndo 23 mbishaka elongamelo k’ɔlɔngɔswɛlɔ ndo k’okaloyelo. Lokristokristo oko welɔ etenyi kɛmɔtshi ka Babilɔna ka Woke bu l’elongamelo ka ngasɔ.
Onde Lokristokristo lekɔ didjidji dia Jɛrusalɛma y’apɔsta?
Eokelo k’edjedja: Jɛrusalɛma yaki komonga la kɔlamelo ekɔ didjidji dia Lokristokristo. Laasɔ, elanyelo ka Jɛrusalɛma aki didjidji dia prɔfɛsiya di’elanyelo ka Lokristokristo.
Elembetshielo w’eyoyo: Awui waketaka la Jɛrusalɛma yaki komonga la kɔlamelo wele oko ɔtɛmwɛlɔ wa dikishi ndo woho wakakokanɛ awui wa kɔta mishiko toholaka Lokristokristo, koko hatoyolembetshiya dia Jɛrusalɛma yaki didjidji dia Lokristokristo.
Ɔkɔkɔ wokonyisha dia nembetshiya ngasɔ: Ndooko ɔkɔkɔ wa l’Afundelo shikaa wa nembetshiya akambo lo yoho shɔ. Otshikitanyi la Jɛrusalɛma y’edjedja, ndooko lushi lakatɛmɔla Lokristokristo l’ɔtɛmwɛlɔ wa pudipudi. Ndo kaanga mbele Jehowa akadimanyiya Jɛrusalɛma l’etena kɛmɔtshi, Lokristokristo bu l’elongamelo ka dimanyiyama.
Ngande wakakotshama ɛnɛlɔ k’okidi wele la weka wamboma?
Eokelo k’edjedja: Lo 1918 akitami wakahɛnyahɛnyama wakatɔlama lo lɔhɔmbɔ lo Babilɔna ka Woke, oko anto wambovɔ. Etena ka mondo ka lɔhɔmbɔ kɛsɔ kakakomɛ lo 1919 etena kakawaolola Jehowa oko esambisha wa Diolelo.
Elembetshielo w’eyoyo: Eongelo kele oko anto wambovɔ ka lɔhɔmbɔ la lo nyuma kakaviya etena k’otale ndo kakatatɛ edja la ntondo ka 1918. Tɔ kakatatɛ lo ntambe ka hende T.D. ndo kakakomɛ lo 1919 T.D. ndo lo mɛtɛ, tɔ mbɔtɔnɛka l’etena k’otale kakole eponga la kangaka lo wɛɛla wa Yeso w’eponga la kangaka.
Ɔkɔkɔ wokonyisha dia nembetshiya ngasɔ: Lɔhɔmbɔ lakatshu Isariyɛlɛ w’edjedja lakaviya edja efula ntatɛ lo 740 N.T.D. ndo lakakomɛ lo 537 N.T.D. Prɔfɛsiya k’Ɛzɛkiyɛlɛ ka weka “wamboma” kana “wamboma to” mɛnyaka dia wanɛ wele weka waki didjidji diawɔ waki lo nyɔi edja efula. Ndo okaloyelo wa weka lo lɔsɛnɔ tɛkɛtamaka oko dui diakahombe ndjasalemaka yema yema ndo diakahombe mbiviya.
Kakɔna kalembetshiya omamatanyelo wa totenyi t’esongo tohende?
Eokelo k’edjedja: L’ɔkɔngɔ wa tshanda mɔtshi yakiwɔ komonga kaamɛ lo nshi ya Ta dia ntondo dia l’andja w’otondo, atshikadi w’akitami wa kɔlamelo wakayonga nto kaamɛ lo 1919.
Elembetshielo w’eyoyo: Prɔfɛsiya kɛsɔ mbidjaka dikako vɔlɛ dia Jehowa ayosala di’atɛmɔdi ande monga nto kaamɛ. L’ɔkɔngɔ wa 1919, lam’akatetaka nshi, wanɛ wele l’elongamelo ka nsɛna la nkɛtɛ wele lofulo lawɔ lakatalekaka mpama wakayonga kaamɛ l’atshikadi w’akitami. Elui akɔ ehende wekɔ lo ntɛmɔla Jehowa kaamɛ oko wodja ɔtɔi.
Ɔkɔkɔ wokonyisha dia nembetshiya ngasɔ: Prɔfɛsiya hatɛkɛta dia tshenyi ya shongo tshɔi yakatema lo bɛtshi dihende ko ndjokakatanyema l’ɔkɔngɔ ko aya tshenyi tshɔi. Laasɔ, prɔfɛsiya hatɛkɛta dia olui ɔtɔi wakahombe mbatɔna ko l’ɔkɔngɔ diko ndjonga kaamɛ. Koko, tɔ mɛnyaka woho wakahombe elui ehende ndjonga kaamɛ.
Ele Ngɔngɔ ka la Mangɔngɔ?
Eokelo k’edjedja: Ngɔngɔ ka la Mangɔngɔ ekɔ lokombo la prɔfɛsiya la Satana l’ɔkɔngɔ wa nde mbikashema oma l’olongo.
Elembetshielo w’eyoyo: Ngɔngɔ ka la Mangɔngɔ ekɔ wedja wa la nkɛtɛ wayosangana dia ndɔsha wanɛ wele l’ɔtɛmwɛlɔ wa pudipudi lo mfɔnu ka woke.
Ɔkɔkɔ wokonyisha dia nembetshiya ngasɔ: Kɛnɛ katɛkɛta prɔfɛsiya lo dikambo dia Ngɔngɔ, ɛnyɛlɔ oko ɔnɛ wayokimɔ emunyi atɔ le tofudu talɛ emunyi ndo ɔnɛ wayowosha diombo la nkɛtɛ mɛnyaka dia Ngɔngɔ bu etongami ka lo nyuma. Ndo nto, ta diayɔlɔsha Ngɔngɔ mbɔtɔnɛka la ta diayɔlɔsha wedja wa la nkɛtɛ ekambi wa Nzambi diatɛkɛtama lo dibuku dia Danyɛlɛ ndo di’Ɛnyɛlɔ.—Dan. 11:40, 44, 45; Ɛny. 17:14; 19:19.
Onde Ɛzɛkiyɛlɛ akɛnyi ndo aketeta lo tɛmpɛlɔ ka woke ka lo nyuma kakayɔtɛkɛtaka Pɔɔlɔ l’ɔkɔngɔ?
Eokelo k’edjedja: Tɛmpɛlɔ kakɛnyi Ɛzɛkiyɛlɛ l’ɛnɛlɔ ekɔ tɛmpɛlɔ kakɔ kaamɛ ka lo nyuma kakatɛkɛta ɔpɔstɔlɔ Pɔɔlɔ.
Elembetshielo w’eyoyo: Ɛzɛkiyɛlɛ akɛnyi aha tɛmpɛlɔ ka lo nyuma kakatatɛ lo 29 T.D., koko nde akɛnyi ɛnɛlɔ ka dimɛna ka woho wakahombe kaloyama ɔtɛmwɛlɔ wa pudipudi oko wɔtɛkɛtamadiɔ l’Ɛlɛmbɛ wa Mɔsɛ l’ɔkɔngɔ wa lɔhɔmbɔ. Elembetshielo wakasha Pɔɔlɔ lakasambiyama la nyuma wendana la tɛmpɛlɔ ka lo nyuma mbidjaka dikako vɔlɛ l’olimu wa Yeso oko wende Ɔlɔmbɛdi a Laadiko Woleki Woke wakandakambe oma lo 29 polo 33 T.D. Tɛmpɛlɔ kakɛnyi Ɛzɛkiyɛlɛ l’ɛnɛlɔ lɛnɛ ahandatɛkɛta dikambo dia ɔlɔmbɛdi a laadiko mbidjaka dikako vɔlɛ l’okaloyelo wa lo nyuma wakatatɛ lo 1919 T.D. Ɔnkɔnɛ hatoyange elembetshielo wa didjidji w’awui tshɛ ndo wa wɛdikelo tshɛ wa tɛmpɛlɔ kakɛnyi Ɛzɛkiyɛlɛ lo ɛnɛlɔ. Koko, sho nyangaka dia ndjasha ntondontondo lo wetshelo wakondjaso oma l’ɛnɛlɔ ka Ɛzɛkiyɛlɛ lo kɛnɛ kendana l’atɔndɔ wa Jehowa lo dikambo di’ɔtɛmwɛlɔ wa pudipudi.
Ɔkɔkɔ wokonyisha dia nembetshiya ngasɔ: Tɛmpɛlɔ kakɛnyi Ɛzɛkiyɛlɛ l’ɛnɛlɔ tshikitana lo toho efula la tɛmpɛlɔ ka lo nyuma. Ɛnyɛlɔ, lo tɛmpɛlɔ kakɛnyi Ɛzɛkiyɛlɛ wakalambolaka nyama efula; koko lo tɛmpɛlɔ ka lo nyuma olambo ɔtɔi wakakimɔma “mbala ɔtɔi lo pondjo.” (Hɛb. 9:11, 12) Ɛnɔnyi nkama la ntondo ka Kristo ndja komonga etena ka Jehowa mbishola akambo wa mɛtɛ wa lotshimola wendana la tɛmpɛlɔ ka lo nyuma.
