Nkatsakanyo Wa Tidyondzo Leti Antswisiweke
Emalembeni lama hundzeke, Xihondzo xo Rindza xi antswise ndlela leyi a hi swi twisisa ha yona swilo swin’wana leswi ku vulavuriwaka ha swona eka vuprofeta bya Ezekiyele. Kutani buku leyi, leyi nge Eku Heteleleni Yehovha U Pfuxete Vugandzeri Lebyi Tengeke! yi ni tidyondzo to tala leti antswisiweke. Vona loko u ta swi kota ku hlamula swivutiso leswi landzelaka.
Xana swikandza swa mune swa swivumbiwa leswi hanyaka swi yimela yini?
Matwisiselo ya khale: Xikandza xin’wana ni xin’wana xa swivumbiwa swa mune leswi hanyaka kumbe makerubu xi yimela timfanelo ta mune ta vumunhu bya Yehovha.
Matwisiselo lamantshwa: Hambileswi xikandza xin’wana ni xin’wana xa swivumbiwa swa mune leswi hanyaka xi yimelaka mfanelo yin’we eka timfanelo ta mune ta vumunhu bya Yehovha, loko swi vonaka swin’we hi mune ka swona, swi yimela timfanelo hinkwato ta vumunhu bya yena. Nakambe swikandza swa mune swi kandziyisa leswaku matimba ni ku vangama ka Yehovha a swi nge ringanisiwi na nchumu hi vukulu.
Leswi endlaka hi cinca: ERitweni ra Xikwembu, hakanyingi nhlayo ya mune yi tirhisiwa ku vula nchumu lowu heleleke. Kutani loko swikandza leswa mune swi vonaka swi ri swin’we, a swi yimeli timfanelo ta mune ntsena ta vumunhu bya Yehovha, kambe swi yimela vumunhu byakwe hinkwabyo lebyi hlamarisaka lebyi n’wi endlaka a rhandzeka. Nakambe xikandza xin’wana ni xin’wana xa xivumbiwa xi kombisa vukulukumba, matimba ni ntamu. Nilokoswiritano, swivumbiwa swa mune leswi nga ni matimba leswi yimelaka swivumbiwa leswi Yehovha a swi tumbuluxeke, hilaha swi kombisiweke hakona hi swikandza swa mune swa kerubu ha rin’we, swi le hansi ka xiluvelo xa Yehovha. Sweswo swi kombisa leswaku Yehovha i Hosi leyi Tlakukeke ya vuako hinkwabyo.
Xana wanuna loyi a nga ni rimhondzo ro chela inki ra matsalana u fanekisela yini?
Matwisiselo ya khale: Wanuna loyi a khomeke rimhondzo ro chela inki u fanekisela masalela ya vatotiwa. Vatotiwa hi ku tirhisa ntirho wo chumayela ni wo endla vadyondzisiwa, va le ku fungheni ka mimombo ya lava vaka eka “ntshungu lowukulu,” hi ndlela yo fanekisela.—Nhlav. 7:9.
Matwisiselo lamantshwa: Wanuna loyi a khomeke rimhondzo ro chela inki ra matsalana u fanekisela Yesu Kreste. U ta fungha lava ntshungu lowukulu loko va avanyisiwa tanihi tinyimpfu hi nkarhi wa “nhlomulo lowukulu.”—Mat. 24:21.
Leswi endlaka hi cinca: Yehovha u nyike N’wana wakwe ntirho wo avanyisa. (Yoh. 5:22, 23) Hi ku ya hi Matewu 25:31-33, Yesu u ta va avanyisa ro hetelela lava nga “tinyimpfu” ni lava nga “timbuti.”
Xana vamakwavo lava nga tinghwavava Ohola na Oholiba, va fanekisela ku avana ka Vujagana byi va kereke ya Khatoliki ni ya Protestente?
Matwisiselo ya khale: Ohola (Samariya, ntsindza wa Israyele), makwavo lonkulu, u fanekisela Khatoliki; Oholiba (Yerusalema, ntsindza wa Yuda), makwavo lontsongo, u fanekisela Protestente.
Matwisiselo lamantshwa: Eka vuprofeta, vamakwavo lava, lava nga tinghwavava a va fanekiseli swiyenge swo karhi swa Vujagana. Ematshan’weni ya sweswo, tinghwavava leti ti hi dyondzisa ndlela leyi Yehovha a titwaka ha yona loko vanhu lava nga tshama va tshembeka eka yena va gandzela swikwembu swa hava. U venga vukhongeri hinkwabyo bya mavunwa.
Leswi endlaka hi cinca: EMatsalweni a ku na vuprofeta lebyi kombisaka leswaku Ohola na Oholiba va fanekisela Vujagana. Israyele na Yuda va tshame va fana ni vasati vo tshembeka eka Yehovha, kambe Vujagana a byi si tshama byi va ni vuxaka byo tano na Yehovha. Ku engetela kwalaho, leswi eka Ezekiyele ndzima 16 na 23, vanhu va Xikwembu lava nga tshembekiki va fanisiwaka ni tinghwavava, swi vula leswaku a va ri ni ntshembo wo cinca va vuyela evugandzerini lebyi tengeke. Kambe leswi Vujagana byi nga xiphemu xa Babilona Lonkulu, a byi na wona ntshembo wo tano.
Xana Yerusalema Wa Khale La Gwineheke A A Fanekisela Vujagana?
Matwisiselo ya khale: Yerusalema loyi a nga tshembekangiki u fanekisela Vujagana. Kutani hi ku ya hi vuprofeta ku lovisiwa ka Yerusalema, ku fanekisela ku lovisiwa ka Vujagana.
Matwisiselo lamantshwa: Swilo leswi a swi endliwa loko Yerusalema a nga ha tshembekanga, swo tanihi vugandzeri bya swikwembu swa hava ni vukanganyisi, swi hi tsundzuxa Vujagana kambe sweswi a ha ha vuli leswaku Yerusalema a a fanekisela Vujagana.
Leswi endlaka hi cinca: EMatsalweni a ku kona laha Yerusalema a fanekiselaka Vujagana. Yerusalema u tshame a gandzela hi ndlela leyi tengeke, kasi Vujagana a byi si tshama byi gandzela hi ndlela leyi tengeke. Yerusalema u tshame a rivaleriwa, kambe Vujagana a byi nge pfuki byi rivaleriwile.
Xana xi hetiseke njhani xivono xa ndhawu leyi nga ni marhambu lama omeke?
Matwisiselo ya khale: Hi 1918 vatotiwa lava xanisiweke va ve evuhlongeni bya Babilona Lonkulu, va va onge hiloko va file va nga ha swi koti ku endla ntirho wa Xikwembu. Nkarhi wolowo wo koma wa vuhlonga wu hele hi 1919 loko Yehovha a tlhela a va nyika matimba yo chumayela hi Mfumo.
Matwisiselo lamantshwa: Vuhlonga bya vukhongeri bya mavunwa lebyi fanisiwaka ni rifu byi teke nkarhi wo leha naswona byi sungule khale ku nga si fika lembe ra 1918. Byi sungule emalembeni ya va-100 C.E. byi hela hi lembe ra 1919 naswona byi fambisana ni nguva ya ku kula leyi tekeke nkarhi wo leha ya le xifanisweni xa Yesu xa koroni ni mfava.
Leswi endlaka hi cinca: Vuhlonga bya Israyele wa khale byi teke nkarhi wo leha, ku sukela hi 740 B.C.E. byi ya hela hi 537 B.C.E. Vuprofeta bya Ezekiyele byi vula leswaku marhambu a ma ‘omile’ kumbe a ma “ome ngopfu,” leswi vulaka leswaku lava yimeriwaka hi marhambu wolawo a va ri ni nkarhi wo leha va file. Nakambe ku pfuxetiwa ka marhambu ku hlamuseriwa tanihi loku a ku ta endleka hakatsongotsongo.
Swi vula yini ku hlanganisiwa ka tinhonga timbirhi?
Matwisiselo ya khale: Endzhaku ka nkarhi wo koma laha a va nga ri na vun’we hi nkarhi wa Nyimpi yo Sungula ya Misava, masalela ya vatotiwa vo tshembeka va tlhele va va ni vun’we hi 1919.
Matwisiselo lamantshwa: Vuprofeta byi kombisa leswaku Yehovha u ta endla leswaku vagandzeri vakwe va va nchumu wun’we. Endzhaku ka 1919, loko nkarhi wu ri karhi wu famba masalela ya vatotiwa ma joyiniwe hi nhlayo leyi kulaka ya vanhu lava nga ni ntshembo wo hanya laha misaveni. Mintlawa ha yimbirhi yi gandzela Yehovha swin’we tanihi ntlawa wun’we wa vanhu.
Leswi endlaka hi cinca: Vuprofeta a byi vulavuli hi nhonga leyi nga rhanga yi tshoviwa yi va tinhonga timbirhi kutani endzhaku ti hlanganisiwa ti va nhonga yin’we. Hikwalaho vuprofeta a byi vulavuli hi ntlawa wun’we lowu a wu ta avana ivi endzhaku wu tlhela wu hlanganisiwa. Ematshan’weni ya sweswo byi vulavula hi mitlawa yimbirhi yo hambana leyi a yi ta hlangana yi va ni vun’we..
I mani Gogo wa Magogo?
Matwisiselo ya khale: Gogo wa Magogo i vito rin’wana ra Sathana hi ku ya hi vuprofeta endzhaku ka loko a hlongoriwile etilweni.
Matwisiselo lamantshwa: Vito Gogo wa Magogo ri vula matiko ya misava lama nga ta va nyandza yin’we ma hlasela vagandzeri lava tengeke hi nkarhi wa nhlomulo lowukulu.
Leswi endlaka hi cinca: Leswi vuprofeta byi hlamuselaka leswaku Gogo, u ta nyiketiwa eka swinyenyana leswi dyaka nyama naswona u ta lahliwa laha misaveni, leswi swi kombisa leswaku Gogo a hi xivumbiwa xa moya. Ku engetela kwalaho, ku hlasela ka Gogo ku fambisana ni leswi buku ya Daniyele ni ya Nhlavutelo ti swi vulaka hi ku hlaseriwa ka vanhu va Xikwembu hi matiko ya laha misaveni.—Dan. 11:40, 44, 45; Nhlav. 17:14; 19:19.
Xana Ezekiyele u vone a tlhela a valangisiwa tempele leyikulu yo fanekisela leyi endzhaku ka nkarhi muapostola Pawulo a yi hlamuseleke?
Matwisiselo ya khale: Tempele leyi Ezekiyele a yi voneke exivonweni ya fana ni tempele yo fanekisela leyi muapostola Pawulo a yi hlamuseleke.
Matwisiselo lamantshwa: Ezekiyele a nga vonanga yona tempele yo fanekisela leyi veke kona ku sukela hi 29 C.E., kambe u vone xivono lexi hi pfunaka ku twisisa ndlela leyi vugandzeri lebyi tengeke lebyi hlamuseriweke eNawini wa Muxe a byi ta pfuxetiwa ha yona endzhaku ka vuhlonga. Nhlamuselo ya Pawulo leyi huhuteriweke ya tempele yo fanekisela yi dzika ngopfu eka ntirho lowu Yesu a wu endleke tanihi Muprista Lonkulu Swinene, ku sukela hi lembe ra 29 ku ya eka lembe ra 33 C.E. Exivonweni xa Ezekiyele xa tempele, lexi nga vulavuliki nchumu hi muprista lonkulu, xi dzika ngopfu eka ku pfuxetiwa ka vugandzeri lebyi tengeke loku sunguleke hi 1919. Hikwalaho a hi lavi nhlamuselo ya vuprofeta eka xiyenge xin’wana ni xin’wana ni mimpimo yin’wana ni yin’wana leyi kumekaka exivonweni xa Ezekiyele xa tempele. Ematshan’weni ya sweswo, exivonweni xa Ezekiyele hi fanele hi tikarhatela ku dyondza swo karhi hi milawu ya Yehovha ya vugandzeri lebyi tengeke.
Leswi endlaka hi cinca: Ku ni swilo swa nkoka leswi xivono xa Ezekiyele xa tempele xi hambanaka ha swona ni tempele yo fanekisela leyi muapostola Pawulo a yi hlamuseleke. Hi xikombiso, eka tempele ya le xivonweni xa Ezekiyele a ku nyikeriwa magandzelo yo tala ya swifuwo kasi eka tempele yo fanekisela ku nyikeriwe gandzelo rin’we ntsena, “kan’we swi helela kwalaho.” (Hev. 9:11, 12) Loko Ezekiyele a vona xivono xakwe eka madzana ya malembe Yesu a nga si ta laha misaveni, a wu nga si fika nkarhi wa leswaku Yehovha a paluxa swilo leswi enteke mayelana ni tempele yo fanekisela.
