1, 2. (a) Ano nga pinasahi nga bahin sang duta ang ihatag? (Tan-awa ang piktyur sa kober.) (b) Ano nga pasalig ang ginahatag sini nga palanan-awon para sa mga tinapok?

SA IYA katapusan nga palanan-awon, natun-an ni Ezequiel ang parte sa bahin sang duta nga ihatag para sa pinasahi nga katuyuan. Ini nga bahin ihatag indi bilang palanublion sang isa ka tribo sang mga Israelinhon, kundi bilang duta nga ihatag kay Jehova. Natun-an man ni Ezequiel ang dalayawon nga siudad nga may talalupangdon nga ngalan. Ini nga bahin sang palanan-awon nagahatag sa mga tinapok sing pinakaimportante nga pasalig: Si Jehova mangin kaupod nila kon makabalik na sila sa ila pinalangga nga duta.

² Detalyado nga ginlaragway sa aton ni Ezequiel ang duta nga ihatag sa Dios. Usisaon naton ina, kay may kahulugan ina para sa aton bilang matuod nga mga sumilimba ni Jehova.

3. Ano ang lima ka bahin sang duta nga ihatag kay Jehova, kag ano ang katuyuan sini nga mga bahin? (Tan-awa ang kahon nga “Magkuha Kamo sing Duta . . . kag Ihatag Ninyo Ini sa Dios.”)

³ Ang pinasahi nga bahin sang duta may kasangkaron nga 25,000 ka maniko (13 kilometros) halin sa amihan asta sa bagatnan kag 25,000 ka maniko halin sa sidlangan asta sa katundan. Ining kuadrado nga duta ginatawag nga kabilugan nga “balaan nga duta.” Ginpartida ini sa tatlo. Ang naibabaw nga parte para sa mga  Levinhon, kag ang sa tunga para sa templo kag sa mga saserdote. Ining duha ka parte amo “ang balaan nga duta.” Ang naidalom kag pinakagamay nga parte, ukon “ang nabilin nga kasangkaron,” “para sa kinaandan nga paggamit.” Para ini sa siudad.—Ezeq. 48:15, 20.

4. Ano nga leksion ang matun-an naton sa sini nga palanan-awon parte sa duta nga ihatag kay Jehova?

⁴ Ano nga leksion ang matun-an naton sa sini nga palanan-awon parte sa duta nga ihatag kay Jehova? Paagi sa paghatag anay sing duta para sa sining pinasahi nga katuyuan kag dayon sing duta para sa mga tribo, ginpakita ni Jehova nga dapat hatagan sing importansia ang sentro sang pagsimba sa sining duta. (Ezeq. 45:1) Sigurado madamo sing natun-an ang mga tinapok sa sining pasunod nga pagpanagtag sing duta. Dapat nila unahon sa ila kabuhi ang pagsimba kay Jehova. Subong, ginatamod man naton nga importante gid sa aton kabuhi ang espirituwal nga mga hilikuton pareho sang pagtuon sa Pulong sang Dios, pagtambong sa Cristianong mga miting, kag pagbantala. Kon sundon naton si Jehova sa pagpahamtang sing husto nga mga prioridad, masentro naton ang aton kabuhi sa pagsimba sa iya.

5, 6. (a) Sin-o ang nagapanag-iya sang siudad? (b) Ano ang wala ginapatuhuyan sang siudad, kag ngaa?

⁵ Basaha ang Ezequiel 48:15. Ano ang “siudad” kag ang duta sa palibot sini? (Ezeq. 48:16-18) Sa palanan-awon, ginsilingan ni Jehova si Ezequiel nga ‘ang siudad mangin iya sang bug-os nga panimalay sang Israel.’ (Ezeq. 45:6, 7) Gani, ang siudad kag ang duta sa palibot sini wala nalakip sa “balaan nga duta” nga ‘ihatag kay Jehova.’ (Ezeq. 48:9) Samtang ginapamensar naton ina, usisaon naton kon ano ang mahimo matun-an naton sa kahimusan sina nga siudad.

⁶ Para mabal-an naton ang mga leksion nga matun-an naton sa siudad, hibaluon anay naton kon ano ang wala ginapatuhuyan sini nga siudad. Wala ini nagapatuhoy sa nakay-o nga siudad sang Jerusalem kag sa templo sini. Ngaa? Kay ang nakita ni Ezequiel nga siudad sa palanan-awon wala sing templo. Wala man ini nagapatuhoy sa bisan ano nga siudad sa napasag-uli nga duta sang Israel. Ngaa? Kay sang nagbalik ang mga tinapok ukon ang ila mga kaliwat, wala sila sing ginpatindog nga siudad nga may mga bahin nga pareho sa nakita sa sini nga palanan-awon. Ang siudad wala man nagapatuhoy sa langitnon nga siudad. Ngaa? Kay ginpatindog ini sa duta nga “indi balaan” kag lain ini sa mga tinukod nga ginpatindog sa duta nga ginseparar para sa sagrado nga pagsimba.—Ezeq. 42:20.

7. Ano nga siudad ang nakita ni Ezequiel, kag ano ang mahimo nga ginarepresentar sini? (Tan-awa ang piktyur sa umpisa sini nga kapitulo.)

⁷ Kon amo, ano ang siudad nga nakita ni Ezequiel? Dumduma nga nakita niya ang siudad sa pareho nga palanan-awon diin nakita niya ang duta. (Ezeq. 40:2; 45:1, 6) Ginapakita sang Pulong sang Dios nga ang duta nagapatuhoy sa espirituwal nga duta, gani ang  siudad nagapatuhoy man sa espirituwal nga siudad. Sa kabilugan, ano ang buot silingon sang tinaga nga “siudad”? Nagakahulugan ini sang grupo sang mga tawo nga nagaistar sa isa ka lugar kag nagakabuhi sing organisado. Gani, ang organisado nga siudad nga nakita ni Ezequiel—nga kuadrado ang korte—mahimo nga nagarepresentar sa organisado gid nga administrasyon.

8. Ano ang sakop, ukon teritoryo, sini nga administrasyon, kag ngaa?

⁸ Ano ang sakop, ukon teritoryo, sini nga administrasyon? Ginpakita sa palanan-awon ni Ezequiel nga ini nga siudad nagapanghikot sa espirituwal nga duta. Gani, ini nga administrasyon nagapanghikot ukon nagadumala sa mga hilikuton sang katawhan sang Dios. Kag ano ang buot silingon nga ang siudad ara sa indi balaan nga duta? Nagapahanumdom ini sa aton nga ang siudad nagapatuhoy indi sa administrasyon sa langit, kundi sa administrasyon sa duta, nga madugay na nga nagapanghikot para sa kaayuhan sang tanan nga nagaistar sa espirituwal nga paraiso.

9. (a) Sin-o ang mga miembro sining administrasyon sa duta? (b) Ano ang himuon ni Jesus sa tion sang Isa ka Libo ka Tuig?

⁹ Sin-o ang mga miembro sining administrasyon sa duta? Sa palanan-awon ni Ezequiel, ang nagapanguna sa gobierno sang siudad ginatawag nga “pangulo.” (Ezeq. 45:7) Sia ang manugtatap sang katawhan, pero indi sia saserdote ukon Levinhon. Ini nga pangulo nagapahanumdom sa aton sang mga manugtatap sang kongregasyon nga indi mga hinaplas sang espiritu. Ining mapinalanggaon nga espirituwal nga mga manugbantay nga katapo sang “iban nga mga karnero” mapainubuson nga mga alagad sang Cristo diri sa duta nga sakop sang iya paggahom sa langit. (Juan 10:16) Sa tion sang Isa ka Libo ka Tuig, magapili si Jesus kag magatangdo “sa bug-os nga duta” sing kalipikado nga mga gulang, ukon “mga prinsipe.” (Sal. 45:16) Sa idalom sang panuytoy sang Ginharian sa langit, tatapon nila ang katawhan sang Dios sa tion sang Isa ka Libo ka Tuig.

10. Ano ang ngalan sang siudad, kag ano ang ginahatag sini nga pasalig?

¹⁰ Basaha ang Ezequiel 48:35. Ang ngalan sang siudad, “Si Jehova Yara Didto.” Ginapasalig sini nga ngalan nga ara sa sini nga siudad ang presensia ni Jehova. Paagi sa pagpakita kay Ezequiel sining siudad nga ara sa sentro, daw ginasilingan ni Jehova ang mga tinapok: ‘Mangin kaupod ninyo ako liwat!’ Makapaumpaw gid ini nga pasalig!

11. Ano nga mga leksion ang matun-an naton sa palanan-awon ni Ezequiel parte sa siudad kag sa dalayawon nga ngalan sini?

¹¹ Ano nga mga leksion ang matun-an naton sa sini nga bahin sang tagna ni Ezequiel? Ang ngalan sining daw siudad nga administrasyon nagapasalig sa aton bilang mga alagad sang Dios subong, nga si Jehova padayon nga magapuyo upod sa iya matutom nga mga alagad sa duta. Ining dalayawon nga ngalan nagapadaku man sang importante nga kamatuoran: Nagaluntad ang siudad indi para hatagan sing gahom ang bisan sin-o nga tawo, kundi para ipatuman ang mahigugmaon kag makatarunganon nga mga dalanon  ni Jehova. Halimbawa, wala ginhatagan ni Jehova sing awtoridad ang mga administrador nga magpartida sing duta suno sa gusto nila. Kundi, ginapaabot ni Jehova nga respetuhon nila ang mga bahin, ukon pribilehiyo, nga ginhatag niya sa iya mga alagad, lakip sa mga “kubos.”—Hulu. 19:17; Ezeq. 46:18; 48:29.

12. (a) Ano ang talalupangdon sa sini nga siudad, kag ano ang ginapakita sini? (b) Ano ang ginapahanumdom sini nga bahin sang palanan-awon sa Cristianong mga manugtatap?

¹² Ano pa gid ang talalupangdon nga bahin sang siudad nga “Si Jehova Yara Didto”? Para maproteksionan ang dumaan nga mga siudad nagahimo sila sing pader nga may pila lang ka gawang, pero ini nga siudad may 12 ka gawang! (Ezeq. 48:30-34) Ining madamo nga gawang (tatlo sa kada kilid sang kuadrado nga siudad) nagapakita nga ang mga administrador sini nga siudad mahapos palapitan kag handa pirme sa pagbulig sa tanan nga alagad sang Dios. Isa pa, ginapadaku sang 12 ka gawang sang siudad nga bukas ini sa tanan, sa “bug-os nga panimalay sang Israel.” (Ezeq. 45:6) Ang madamo nga gawang sang siudad nagahatag man sing importante nga pahanumdom sa Cristianong mga manugtatap. Gusto ni Jehova nga mahapos sila palapitan kag handa pirme sa pagbulig sa tanan nga nagaistar sa espirituwal nga paraiso.

13. Ano nga sarisari nga porma sang pag-alagad ang ginsambit ni Jehova nga himuon sang mga tawo?

¹³ Balikan naton ang panahon ni Ezequiel kag hibaluon naton ang dugang pa nga detalye nga iya ginrekord sa sining palanan-awon parte sa pagpanagtag sing duta. May ginsambit si Jehova nga mga tawo nga magapakigbahin sa sarisari nga porma sang pag-alagad. Ang mga saserdote—“mga alagad sa santuaryo”—amo ang magahalad kag magapalapit kay Jehova sa pag-alagad sa iya. Kag ang mga Levinhon—“mga alagad sang templo”—amo ang ‘magadumala sa templo kag sa tanan nga pag-alagad kag hilikuton didto.’ (Ezeq. 44:14-16; 45:4, 5) Isa pa, may mga trabahador nga magaobra malapit sa siudad. Sin-o ini sila?

14. Ano ang ginapahanumdom sa aton sang mga trabahador malapit sa siudad?

¹⁴ Ang mga trabahador malapit sa siudad halin sa “tanan nga tribo sang Israel.” Sila ang magapanguma para may patubas nga “mangin pagkaon sang mga nagaalagad sa siudad.” (Ezeq. 48:18, 19) Ano nga kahigayunan subong ang ginapahanumdom sa aton sini nga kahimusan? Subong, ang tanan nga pumuluyo sang espirituwal nga paraiso may kahigayunan nga magsuporta sa pag-alagad sang hinaplas nga mga utod sang Cristo kag sa pag-alagad sang mga miembro sang “daku nga kadam-an” nga gintangdo ni Jehova sa pagpanguna. (Bug. 7:9, 10) Ang panguna nga paagi nga makasuporta kita amo ang kinabubut-on nga pagkooperar sa panuytoy sang matutom nga ulipon.

15, 16. (a) Ano pa nga detalye ang matun-an naton sa palanan-awon ni Ezequiel? (b) May kahigayunan kita sa pagpakigbahin sa ano nga mga hilikuton?

¹⁵ Ang palanan-awon ni Ezequiel may dugang pa nga detalye nga makahatag sing leksion parte sa aton ministeryo. Ano ini? Nagsiling  si Jehova nga ang mga miembro sang 12 ka indi Levinhon nga tribo may himuon sa duha ka lokasyon: sa luwang sang templo kag sa halalban sang siudad. Ano ang ila ginahimo sa kada lokasyon? Sa luwang sang templo, ang tanan nga tribo “nagasulod agod magsimba” paagi sa paghalad kay Jehova. (Ezeq. 46:9, 24) Sa duta sang siudad, ang mga miembro sang tanan nga tribo nagasulod para suportahan ang siudad paagi sa pagkultibar sang duta. Ano ang matun-an naton sa halimbawa sini nga mga trabahador?

¹⁶ Subong, ang mga miembro sang daku nga kadam-an may kahigayunan sa paghimo sang mga hilikuton pareho sa nakita ni Ezequiel sa palanan-awon. Ginasimba nila si Jehova “sa iya templo” paagi sa mga halad sang pagdayaw. (Bug. 7:9-15) Ginahimo nila ini paagi sa pagpakigbahin sa pagbantala kag pagpabutyag sang ila pagtuo sa Cristianong mga miting. Para sa ila, ang pagsimba kay Jehova amo ang ila panguna nga responsibilidad. (1 Cron. 16:29) Isa pa, madamo sa katawhan sang Dios ang makasuporta sa organisasyon sang Dios sa sarisari nga paagi. Halimbawa, nagabulig sila sa pagtukod kag pagmentinar sang mga Kingdom Hall kag mga pasilidad sang sanga, kag nagabulig man sila sa iban pa nga proyekto sang organisasyon ni Jehova. Ang iban nagasuporta sa sini nga mga proyekto paagi sa ila pinansial nga amot. Masiling nga daw  ginakultibar nila ang duta, “para sa himaya sang Dios.” (1 Cor. 10:31) Makugi kag malipayon nila nga ginahimo ang ila hilikuton kay kabalo sila nga si Jehova ‘nahamuot gid sa sini nga mga halad.’ (Heb. 13:16) Ginapanginpuslan mo bala ini nga mga kahigayunan?

17. (a) Ano pa nga daku nga katumanan sang palanan-awon ni Ezequiel ang matabo sa palaabuton? (b) Sa tion sang Isa ka Libo ka Tuig, sin-o ang makabenepisyo sa daw siudad nga administrasyon?

¹⁷ Sa palaabuton, may daku pa bala nga katumanan ang palanan-awon ni Ezequiel parte sa duta nga ihatag sa Dios? Huo! Binagbinaga ini: Nakita ni Ezequiel nga ang bahin sang duta nga ginatawag “balaan nga duta” amo ang sentro sang duta. (Ezeq. 48:10) Pareho man sini, sa tapos sang Armageddon, bisan diin man kita nagaistar sa duta, si Jehova magapuyo upod sa aton. (Bug. 21:3) Sa tion sang Isa ka Libo ka Tuig, ang daw siudad nga administrasyon—buot silingon ang mga tawo diri sa duta nga gintangduan sa pagtatap sa kaayuhan sang katawhan sang Dios—magapasangkad sang sakop sini sa bilog nga kalibutan kay hatagan sini sing mahigugmaon nga giya kag panuytoy ang tanan nga mangin bahin sang “bag-o nga duta,” nga amo ang bag-o nga katilingban sang mga tawo.—2 Ped. 3:13.

18. (a) Ngaa makasiguro kita nga ang daw siudad nga administrasyon padayon nga magasunod sa paggahom sang Dios? (b) Ano ang ginapasalig sa aton sang ngalan sang siudad?

¹⁸ Ngaa makasiguro kita nga ang daw siudad nga administrasyon padayon nga magasunod sa paggahom sang Dios? Kay gin-athag sang Pulong sang Dios nga ang siudad sa duta nga may 12 ka gawang daw pareho man sa siudad sa langit nga may 12 ka gawang, ang Bag-o nga Jerusalem, nga amo ang 144,000 ka kaupod nga manuggahom sang Cristo. (Bug. 21:2, 12, 21-27) Ginapakita sini nga ang administrasyon sa duta magasunod sa tanan nga desisyon sang Ginharian sang Dios sa langit. Ang ngalan sang siudad nga “Si Jehova Yara Didto” nagapasalig gid sa kada isa sa aton nga ang putli nga pagsimba magapabilin kag magauswag sing dayon sa Paraiso. Matahom gid nga palaabuton ang nagahulat sa aton!