1, 2. (a) Ania nga espesial a paset ti daga ti masapul a mailasin? (Kitaen ti ladawan iti akkub.) (b) Ania ti ipatalged dayta a sirmata para kadagiti naipanaw?

ITI maudi a sirmatana, naammuan ni Ezekiel ti maipapan iti daga a mailasin para iti espesial a panggep. Ti nailasin a daga ket maited kas kontribusion para ken Jehova, saan a kas tawid ti maysa a tribu dagiti Israelita. Naammuan met ni Ezekiel ti naisangsangayan a siudad nga adda makapainteres a naganna. Nangted dayta a paset ti sirmata iti kapatgan a pammatalged: Adda kadakuada ni Jehova inton agsublida iti ipatpategda a daga.

² Detalyado ti panangilawlawag kadatayo ni Ezekiel iti dayta a kontribusion. Usigentayo daytoy a salaysay a napnuan kaipapanan kadatayo kas pudno nga agdaydayaw ken Jehova.

3. Ania a lima a paset ti mangbukel iti daga nga inlasin ni Jehova, ket ania ti pakausaran dagita a paset? (Kitaen ti kahon a “Ti Kontribusion nga Ilasinyo.”)

³ Ti rukod ti espesial a paset ti daga ket 25,000 a kasiko (13 a kilometro) manipud amianan agingga iti abagatan ken 25,000 a kasiko manipud daya agingga iti laud. Daytoy a kuadrado a lote ket naawagan iti “intero a kontribusion.” Nabingay dayta iti tallo a paset. Para kadagiti Levita ti makinngato, ken nailasin para iti  templo ken kadagiti papadi ti makintengnga. Dagita a paset ti mangbukel iti “nasantuan a kontribusion.” Ti basbassit a makimbaba a paset, wenno “ti nabatbati a disso,” ket “usarento” ti siudad.​—Ezek. 48:15, 20.

4. Ania ti masursurotayo iti daytoy a salaysay maipapan iti kontribusion ken Jehova?

⁴ Ania ti masursurotayo iti daytoy a salaysay maipapan iti kontribusion ken Jehova? Babaen ti panangilasin nga umuna iti daga para iti daytoy nga espesial a kontribusion ken kalpasanna ti daga para kadagiti tribu, impakita ni Jehova a ti masapul a maipangpangruna ket daytoy a naespirituan a sentro ti daga. (Ezek. 45:1) Iti dayta nga urnos ti pannakabingaybingay ti daga, sigurado nga adu ti naammuan dagiti naipanaw. Masapul nga ipangpangrunada iti biagda ti panagdaydayawda ken Jehova. Ita, ipangpangrunatayo met dagiti naespirituan nga aktibidad, kas iti panagadal iti Sao ti Dios, pannakigimong, ken panangasaba. No tuladentayo ti ulidan ni Jehova iti panangaramid kadagiti rumbeng nga ipangpangruna, ipakpakitatayo a ti panagdaydayawtayo kenkuana ti kapatgan iti biagtayo.

5, 6. (a) Makinkukua iti siudad? (b) Ania ti saan a tukoyen ti siudad, ken apay?

⁵ Basaen ti Ezekiel 48:15. Ania ti kaipapanan “ti siudad” ken ti daga iti aglawlawna? (Ezek. 48:16-18) Iti sirmata, imbaga ni Jehova ken Ezekiel: Ti ‘kukua ti siudad kukuanto ti intero a sangakabbalayan ti Israel.’ (Ezek. 45:6, 7) No kasta, ti siudad ken ti daga iti aglawlawna ket saan a karaman iti “nasantuan a kontribusion” a ‘mailasin para ken Jehova.’ (Ezek. 48:9) Bayat a pampanunotentayo dayta a nagdumaan, usigentayo no ania ti mabalin nga isuro kadatayo ita dayta nga urnos iti siudad.

⁶ Tapno maammuantayo dagiti masursurotayo iti dayta a siudad, masapul nga ammuentayo no ania ti saan a kaipapanan dayta a siudad. Saan a tumukoy dayta iti naibangon manen a siudad ti Jerusalem ken ti templona. Apay? Ngamin, awan templo iti siudad a nakita ni Ezekiel iti sirmata. Ti siudad ket saan met a tumukoy iti sabali pay a siudad iti naisubli a daga ti Israel. Apay? Gapu ta awan siudad nga addaan kadagiti paset a nailadawan iti daytoy a sirmata ti imbangon dagiti naipanaw a nagsubli wenno dagiti annakda. Dayta a siudad ket saan met a tumukoy iti nailangitan a siudad. Apay? Agsipud ta naibangon dayta iti daga a nairanta a “di nasantuan a disso” a naiduma kadagiti pasdek a naibangon iti daga a para laeng iti sagrado a panagdaydayaw.​—Ezek. 42:20.

7. Ania a siudad ti nakita ni Ezekiel, ken ania ti agparang nga irepresentarna? (Kitaen ti ladawan iti rugi ti kapitulo.)

⁷ Ania ngarud ti siudad a nakita ni Ezekiel? Laglagipenyo a nakitana ti siudad iti isu met la a sirmata a nakakitaanna iti daga. (Ezek. 40:2; 45:1, 6) Ipakita ti Sao ti Dios a ti daga ket tumukoy iti naespirituan a daga, isu a ti siudad ket tumukoy la ketdi iti  naespirituan a siudad. Ania ngarud ti kaipapanan ti sao a “siudad”? Kaipapanan dayta dagiti tattao a nagtitipon kas grupo ken mangbukel iti banag a naurnos ken organisado. No kasta, ti nakaur-urnos a siudad a nakita ni Ezekiel​—a perpekto a kuadrado—​agparang nga irepresentarna ti nakaor-organisado nga administrasion.

8. Ania ti masakupan, wenno iwanwanwan, daytoy nga administrasion, ken apay a kasta?

⁸ Ania ti masakupan, wenno iwanwanwan, daytoy nga administrasion? Ipakita ti sirmata ni Ezekiel a daytoy a siudad ket agserserbi iti uneg ti naespirituan a daga. No kasta, daytoy nga administrasion ti mangiwanwanwan ita kadagiti maar-aramid nga aktibidad ti ili ti Dios. Ket ania ti ipakita ti kaadda ti siudad iti di nasantuan a disso? Ipalagipna kadatayo a ti siudad ket tumukoy saan nga iti nailangitan, no di ket iti naindagaan nga administrasion, nga agserserbi para iti pagimbagan ti amin nga agnanaed iti naespirituan a paraiso.

9. (a) Siasino dagiti mangbukel ita iti daytoy naindagaan nga administrasion? (b) Ania ti aramidento ni Jesus bayat ti Sangaribu a Tawen?

⁹ Siasino dagiti mangbukel iti daytoy naindagaan nga administrasion? Iti sirmata ni Ezekiel, daydiay mangidadaulo iti gobierno ti siudad ket natukoy kas ti “panguluen.” (Ezek. 45:7) Nupay saan a padi wenno Levita, isu ti manangaywan kadagiti tattao. Daytoy a panguluen ipalagipna kadatayo dagiti manangaywan kadagiti kongregasion ita a saan a dinutokan ti espiritu wenno napulotan. Dagitoy a nadungngo a naespirituan a papastor ditoy daga a kameng ti ‘sabsabali a karnero’ ket napakumbaba nga adipen ti nailangitan a gobierno ni Kristo. (Juan 10:16) Bayat ti umas-asidegen a Sangaribu a Tawen, mangpili ken mangapointar ni Jesus manipud “iti intero a daga” kadagiti kualipikado a panglakayen wenno “piprinsipe.” (Sal. 45:16) Babaen ti panangiturong ti nailangitan a Pagarian, asikasuendanto dagiti pagimbagan ti ili ti Dios bayat ti Sangaribu a Tawen.

10. Ania ti nagan ti siudad, ket ania ti ipasigurado dayta a nagan?

¹⁰ Basaen ti Ezekiel 48:35. Ti nagan ti siudad ket “Adda Dita ni Jehova.” Ipasigurado daytoy a nagan a marikna iti daytoy a siudad ti kaadda ni Jehova. Idi impakita ni Jehova ken Ezekiel a daytoy a siudad ket adda iti tengnga, arigna ibagbagana kadagiti naipanaw: ‘Addaakto manen kadakayo!’ Anian a makaparegta a pammatalged!

11. Ania dagiti masursurotayo iti daytoy a sirmata ni Ezekiel maipapan iti siudad ken iti naisangsangayan a naganna?

¹¹ Ania dagiti masursurotayo iti daytoy a paset ti padto ni Ezekiel? Ti nagan daytoy kasla siudad nga administrasion ipasiguradona kadatayo, kas agserserbi iti Dios, a talaga a makipagnanaed ita ni Jehova kadagiti matalek nga adipenna ditoy daga ken kanayon a kasta. Ipaganetget met daytoy naisangsangayan a nagan ti napateg a kinapudno: Adda ti siudad tapno mangipatungpal kadagiti naayat ken nainkalintegan a pamay-an ni Jehova, saan a tapno mangted iti pannakabalin iti asinoman a tao. Kas pagarigan, saan  nga inikkan ni Jehova ti administrasion iti autoridad a mangbingay iti daga, a kas iti ibilang dagiti tattao a maiparbeng koma. Imbes ketdi, namnamaen ni Jehova a dagiti administrador raemenda dagiti bingay, wenno pribilehio nga intedna kadagiti adipenna, agraman kadagiti “nanumo.”​—Prov. 19:17; Ezek. 46:18; 48:29.

12. (a) Ania ti naisangsangayan a paset daytoy a siudad, ken ania ti iyilustrar dayta? (b) Ania ti napateg nga ipalagip dayta a paset ti sirmata kadagiti Kristiano a manangaywan?

¹² Ania pay ti sabali a naisangsangayan a paset ti siudad nga “Adda Dita ni Jehova”? Nupay dagiti nagkauna a siudad ket addaan kadagiti mangsalaknib a pader ken sumagmamano la a ruangan, 12 ti ruangan daytoy a siudad! (Ezek. 48:30-34) Daytoy a kinaadu ti ruangan (saggatlo iti tunggal sikigan ti kuadrado a siudad) iyilustrarna a dagiti administrador dayta a siudad ket nalaka a maasitgan ti amin nga agserserbi iti Dios ken kanayon nga addada para kadakuada. Ipaganetget pay ti kaadda ti 12 a ruangan ti siudad a nakalukat dayta iti amin, iti “intero a sangakabbalayan ti Israel.” (Ezek. 45:6) Ti kaadda ti nagadu a ruangan ti siudad ket napateg a palagip kadagiti Kristiano a manangaywan. Kayat ni Jehova a nalaka ida a maasitgan ti amin nga agnanaed iti naespirituan a paraiso ken kanayon nga addada para kadakuada.

13. Ania dagiti dinakamat ni Jehova maipapan iti nadumaduma a serbisio nga aramiden dagiti tattao?

¹³ Subliantayo ti tiempo ni Ezekiel ken ammuentayo ti ad-adu pay a detalye nga insuratna maipapan iti daytoy nalawa ti saklawenna a sirmata ti pannakabingay ti daga. Dinakamat ni Jehova dagiti tattao a makiramraman iti nadumaduma a serbisio. Dagiti papadi​—“dagiti agserserbi iti santuario”—​ti mangidaton ken umasideg ken Jehova tapno agserbida Kenkuana. Ken dagiti Levita​—“dagiti agserserbi iti templo”—​ti ‘mangasikaso iti panagserbi ken amin a banag a rumbeng a maaramid sadiay.’ (Ezek. 44:14-16; 45:4, 5) Adda met dagiti trabahador nga aktibo iti trabahoda iti asideg ti siudad. Siasino dagitoy a trabahador?

14. Ania ti ipalagip kadatayo ti kaadda dagiti trabahador iti asideg ti siudad?

¹⁴ Dagiti trabahador iti asideg ti siudad ket naggapu iti “amin a tribu ti Israel.” Adda pasetda a tumulong. Ti trabahoda ket agmula iti “pagtaraonto dagidiay agserserbi iti siudad.” (Ezek. 48:18, 19) Ipalagip kadi kadatayo daytoy nga urnos ti gundawaytayo ita a tumulong? Wen. Adda gundaway ita ti amin nga agnanaed iti naespirituan a paraiso a tumulong iti panagserbi kadagiti dinutokan ti espiritu a kakabsat ni Kristo ken kadagiti kameng ti “dakkel a bunggoy” nga inapointaran ni Jehova a mangidaulo. (Apoc. 7:9, 10) Ti kangrunaan a pamay-an a maipaaytayo dayta ket ti situtulok a pannakitunos iti panangiwanwan ti matalek nga adipen.

15, 16. (a) Ania a sabali pay a detalye ti maammuantayo iti sirmata ni Ezekiel? (b) Ania dagiti umasping a trabaho a gundawaytayo a pakipasetan?

¹⁵ Iti sabali pay a detalye iti sirmata ni Ezekiel, adda masursurotayo maipapan iti ministeriotayo. Ania a detalye? Dinakamat ni  Jehova a dagiti kameng ti 12 a tribu a saan a Levita ket aktibo iti dua a lugar: iti paraangan ti templo ken iti pagpastoran ti siudad. Ania ti ar-aramidenda iti tunggal lugar? Iti paraangan ti templo, amin a tribu ket ‘sumrek tapno agdayaw’ babaen ti panagdatonda ken Jehova. (Ezek. 46:9, 24) Iti daga ti siudad, dagiti kameng ti amin a tribu ket umay tumulong iti siudad babaen ti panagtalon. Ania ti masursurotayo iti ulidan dagita a trabahador?

¹⁶ Ita, adda gundaway dagiti kameng ti dakkel a bunggoy a makipaset kadagiti aktibidad a kas iti inaramid dagidiay adda iti sirmata ni Ezekiel. Agdaydayawda ken Jehova “idiay templona” babaen ti panagdatonda iti panangidaydayaw. (Apoc. 7:9-15) Ar-aramidenda dayta babaen ti pannakipasetda iti trabaho a panangasaba ken napigsa a panangyebkasda iti pammatida kadagiti Nakristianuan a gimong. Ibilangda ti direkta a panagdaydayaw ken Jehova kas ti kangrunaan a responsabilidadda. (1 Cron. 16:29) Adu met a kameng ti ili ti Dios ti makabael a tumulong iti organisasion ti Dios iti adu a praktikal a pamay-an. Kas pagarigan, tumultulongda a mangibangon ken mangmantener kadagiti Kingdom Hall ken pasilidad ti sangay, ken tumultulongda iti adu a dadduma pay a proyekto ti organisasion ni Jehova. Dadduma ti tumultulong kadagita a  proyekto babaen ti panagdonarda iti kuarta. Ar-aramidenda amin dagita, nga arig panagtalon, a “pakaidayawan ti Dios.” (1 Cor. 10:31) Sireregta ken siraragsak nga ar-aramidenda ti trabahoda ta ammoda a ‘maragsakan unay ni Jehova kadagita a daton.’ (Heb. 13:16) Naan-anay kadi nga ap-aprobetsarem dagita a gundaway?

17. (a) Ania a dakdakkel a kaitungpalan ti sirmata ni Ezekiel ti makitatayto iti masanguanan? (b) Bayat ti Sangaribu a Tawen, siasino dagiti mabenepisiaran iti kasla siudad nga administrasion?

¹⁷ Iti masanguanan, makitatayto kadi ti dakdakkel a kaitungpalan ti sirmata ni Ezekiel maipapan iti kontribusion? Wen! Usigenyo daytoy: Nakita ni Ezekiel a ti paset ti daga a napanaganan iti “nasantuan a kontribusion” ket adda iti tengnga ti daga. (Ezek. 48:10) Umasping iti dayta, kalpasan ti Armagedon, sadinoman ti mabalin a pagnaedantayo ditoy daga, makipagnaedto ni Jehova kadatayo. (Apoc. 21:3) Bayat ti Sangaribu a Tawen, ti kasla siudad nga administrasion​—kayatna a sawen, dagidiay adda ditoy daga a madutokan a mangasikaso iti pagimbagan ti ili ti Dios—​isaknapnanto ti impluensiana iti intero a daga babaen ti naayat a panangiturong ken panangiwanwanna iti amin a mangbukel iti “baro a daga,” ti baro a kagimongan dagiti tattao.​—2 Ped. 3:13.

18. (a) Apay a makasigurotayo a ti kasla siudad nga administrasion ket maitunos iti turay ti Dios? (b) Ania ti talaga nga ipasigurado kadatayo ti nagan ti siudad?

¹⁸ Apay a makasigurotayo a ti kasla siudad nga administrasion ket agtalinaed a naan-anay a maitunos iti turay ti Dios? Gapu ta ilawlawag ti Sao ti Dios a ti naindagaan a siudad nga addaan iti 12 a ruangan iyanninawna ti nailangitan a siudad nga addaan iti 12 a ruangan, ti Baro a Jerusalem, a buklen ti 144,000 a kakadua ni Kristo nga agturay. (Apoc. 21:2, 12, 21-27) Ipakita dayta a ti naindagaan nga administrasion ket maitunos iti amin a pangngeddeng ti Pagarian ti Dios idiay langit ken siaannad nga ipatungpalda dagita. Wen, ti nagan ti siudad nga “Adda Dita ni Jehova” ipasiguradona iti tunggal maysa kadatayo nga iti Paraiso, agtalinaed ken agnanayon a rumang-ay ti nadalus a panagdaydayaw. Anian a nagpintas ti masakbayantayo!