1, 2. (a) Nĩ gĩcigo kĩrĩkũ kĩa mwanya kĩaagĩrĩire kwamũrũo? (Rora mbica ĩrĩa ĩrĩ ngothi-inĩ.) (b) Kĩoneki kĩu gĩatũmire andũ arĩa maarĩ ithamĩrio makorũo na ũũma ũrĩkũ?

 KĨONEKI-INĨ gĩake kĩa mũico, Ezekieli nĩ aamenyire ũhoro wĩgiĩ gĩcigo kĩa bũrũri kĩrĩa kĩaamũrirũo nĩ ũndũ wa gĩtũmi kĩa mwanya. Gĩcigo kĩu kĩamũre gĩtiaheanirũo kĩrĩ igai rĩa mũhĩrĩga wa Aisiraeli, no kĩarĩ mũhothi wa kũrutĩrũo Jehova. Ningĩ Ezekieli nĩ aamenyire ũhoro wa itũũra rĩa magegania rĩrĩa rĩarĩ na rĩĩtwa rĩa mwanya. Gĩcunjĩ kĩu gĩa kĩoneki nĩ gĩatũmire andũ arĩa maarĩ ithamĩrio makorũo na ũũma wa ũndũ ũyũ wa bata: Jehova nĩ angĩakorirũo hamwe nao macoka bũrũri-inĩ wao ũrĩa meendete.

² Ezekieli nĩ atũtaarĩirie wega ũhoro wĩgiĩ gĩcigo kĩu kĩarĩ mũhothi. Reke tũthuthurie ũhoro ũcio, tondũ nĩ wa bata mũno harĩ ithuĩ tũrĩ athathaiya a ma a Jehova.

3. Nĩ icunjĩ irĩkũ ithano ciarĩ thĩinĩ wa gĩcigo kĩrĩa Jehova aamũrire, na icunjĩ icio ciarĩ cia wĩra ũrĩkũ? (Rora gathandũkũ, “Gĩcigo Kĩrĩa Mũkaamũra Kĩrĩ Mũhothi.”)

³ Gĩcigo kĩu kĩa mwanya kĩarĩ kĩa mĩkono 25,000 (kilomita 13) kuuma mwena wa rũgongo nginya wa mũhuro na mĩkono 25,000 kuuma mwena wa irathĩro nginya wa ithũĩro. Gĩcigo kĩu kĩaiganaine mĩena yothe ĩna gĩetirũo ‘gĩcigo gĩothe kĩa mũhothi.’ Kĩagayanĩtio  icunjĩ ithatũ. Gĩcunjĩ kĩa igũrũ kĩarĩ kĩa Alawii, na gĩcunjĩ gĩa gatagatĩ kĩaamũrĩtwo nĩ ũndũ wa hekarũ na athĩnjĩri-Ngai. Icunjĩ icio igĩrĩ nĩcio ciarĩ “mũhothi mwamũre.” Gĩcunjĩ kĩa mũhuro kĩrĩa kĩarĩ kĩnini, na gĩetirũo “gĩcigo kĩrĩa gĩgaatigara,” kĩarĩ gĩa ‘kũhũthĩrũo na maũndũ ma itũũra.’—Ezek. 48:15, 20.

4. Nĩ ũndũ ũrĩkũ tũngĩĩruta kuumana na ũhoro wĩgiĩ mũhothi wa Jehova?

⁴ Nĩ ũndũ ũrĩkũ tũngĩĩruta kuumana na ũhoro ũcio wĩgiĩ mũhothi ũrĩa warutĩirũo Jehova? Na njĩra ya kwamũra gĩcigo kĩa mũhothi ũcio wa mwanya mbere na thutha ũcio gĩcigo kĩa mĩhĩrĩga, Jehova nĩ oonanirie atĩ gĩcigo kĩrĩa kĩa bata makĩria kĩagĩrĩirũo gũkorũo kĩrĩ gĩcigo kĩu kĩa maũndũ ma kĩĩroho. (Ezek. 45:1) Hatarĩ nganja, andũ arĩa maarĩ ithamĩrio nĩ meerutire maũndũ maingĩ kuumana na mũtaratara ũrĩa wahũthĩrirũo kũgayania bũrũri ũcio. Maagĩrĩirũo kũiga ũthathaiya wa Jehova mbere ũtũũro-inĩ wao. Ũmũthĩ, o na ithuĩ tuonaga maũndũ ma kĩĩroho, ta kwĩruta Kiugo kĩa Ngai, gũthiĩ mĩcemanio ya Gĩkristiano, na kũnyitanĩra wĩra-inĩ wa kũhunjia, marĩ maũndũ marĩa ma bata makĩria. Rĩrĩa twarũmĩrĩra kĩonereria kĩa Jehova gĩa kũiga maũndũ marĩa magĩrĩire mbere, tuonanagia atĩ ũthathaiya wake nĩguo wa bata ũtũũro-inĩ witũ.

5, 6. (a) Itũũra rĩu rĩarĩ rĩa ũ? (b) Nĩ maũndũ marĩkũ matangĩkorũo makĩrũgamĩrĩrũo nĩ itũũra rĩu, na nĩkĩ?

⁵ Thoma Ezekieli 48:15. “Itũũra” rĩu hamwe na gĩcigo kĩrĩa kĩarĩthiũrũrũkĩirie ciarĩ cia wĩra ũrĩkũ? (Ezek. 48:16-18) Jehova eerĩte Ezekieli ũũ kĩoneki-inĩ: ‘Gĩcigo gĩa itũũra gĩgaakorũo kĩrĩ kĩa nyũmba yothe ya Isiraeli.’ (Ezek. 45:6, 7) Kwoguo itũũra rĩu hamwe na gĩcigo kĩrĩa kĩarĩthiũrũrũkĩirie itiarĩ cia “mũhothi mwamũre” ũrĩa waagĩrĩirũo ‘kwamũrĩrũo Jehova.’ (Ezek. 48:9) Tũrĩ na ũndũ ũcio meciria-inĩ, reke rĩu tũthuthurie ũrĩa mũbango ũcio wa itũũra rĩu ũngĩtũruta ũmũthĩ.

⁶ Nĩguo tũmenye maũndũ marĩa tũngĩĩruta kuumana na itũũra rĩu, tũrabatara kwamba kuona maũndũ marĩa matangĩkorũo makĩrũgamĩrĩrũo nĩ itũũra rĩu. Rĩtingĩkorũo rĩarũgamĩrĩire itũũra rĩa Jerusalemu rĩrĩa rĩaakĩtwo rĩngĩ hamwe na hekarũ ĩrĩa yarĩ kuo. Nĩkĩ? Tondũ itũũra rĩrĩa Ezekieli oonire kĩoneki-inĩ rĩtiarĩ na hekarũ thĩinĩ warĩo. Ningĩ, itũũra rĩu rĩtiarũgamĩrĩire itũũra o rĩothe thĩinĩ wa bũrũri wa Isiraeli ũrĩa wacoketio. Nĩkĩ? Tondũ gũtirĩ itũũra rĩatariĩ ta rĩrĩa rĩataarĩirio kĩoneki-inĩ kĩu rĩakirũo nĩ andũ arĩa maacokire kuuma ithamĩrio kana njiarũa ciao. Makĩria ma ũguo, itũũra rĩu rĩtingĩkorũo rĩarũgamĩrĩire itũũra rĩa kũrĩa igũrũ. Nĩkĩ? Tondũ rĩaakĩtwo gĩcigo-inĩ kĩa handũ “harĩa hatarĩ hatheru [kana, ha maũndũ matarĩ mamũre]” ngũrani na mĩako ĩrĩa yaakĩtwo gĩcigo-inĩ kĩrĩa kĩaamũrĩtwo nĩ ũndũ wa ũthathaiya mũtheru.—Ezek. 42:20.

7. Itũũra rĩrĩa Ezekieli oonire nĩ kĩĩ, na kũroneka atĩ rĩrũgamĩrĩire kĩĩ? (Rora mbica kĩambĩrĩria-inĩ gĩa gĩcunjĩ gĩkĩ.)

⁷ Gũkĩrĩ ũguo-rĩ, itũũra rĩrĩa Ezekieli oonire rĩrũgamĩrĩire kĩĩ? Ririkana atĩ oonire itũũra rĩu kĩoneki-inĩ o kĩrĩa oonire bũrũri.  (Ezek. 40:2; 45:1, 6) Kiugo kĩa Ngai kĩonanagia atĩ bũrũri ũcio nĩ bũrũri wa kĩĩroho, kwoguo no mũhaka akorũo itũũra rĩu nĩ itũũra rĩa kĩĩroho. Kaingĩ-rĩ, kiugo “itũũra” kĩendaga kuuga atĩa? Kiugo kĩu kĩrehaga rĩciria rĩa andũ maraikarania hamwe marĩ gĩkundi na mebangĩte na mũtaratara mũna. Kwoguo kũroneka atĩ itũũra rĩu Ezekieli oonire rĩbangĩtwo wega, rĩrĩa rĩaiganaine mĩena yothe ĩna, rĩrũgamĩrĩire mũbango mwega wa ũrũgamĩrĩri.

8. Ũrũgamĩrĩri ũcio ũrutaga wĩra kũ, na tũngiuga ũguo nĩkĩ?

⁸ Ũrũgamĩrĩri ũcio ũrutaga wĩra kũ? Kĩoneki kĩa Ezekieli kĩguũragia atĩ itũũra rĩu rĩrutaga wĩra thĩinĩ wa bũrũri ũcio wa kĩĩroho. Kwoguo, ũmũthĩ ũrũgamĩrĩri ũcio ũrutaga wĩra thĩinĩ wa paradiso ya kĩĩroho, ũgatongoria wĩra wa andũ a Ngai. Na hihi itũũra rĩu gũkorũo rĩrĩ gĩcigo-inĩ kĩa maũndũ matarĩ mamũre kũronania ũndũ ũrĩkũ? Gũtũririkanagia atĩ itũũra rĩu ti ũrũgamĩrĩri wa igũrũ, no nĩ ũrũgamĩrĩri wa gũkũ thĩ, ũrĩa ũkoretwo ũkĩruta wĩra nĩ ũndũ wa kũguna aikari othe a paradiso ya kĩĩroho.

9. (a) Nĩa makoragwo thĩinĩ wa mũbango ũcio wa ũrũgamĩrĩri gũkũ thĩ ũmũthĩ? (b) Nĩ ũndũ ũrĩkũ Jesu ageka hĩndĩ ya wathani wa Mĩaka Ngiri?

⁹ Nĩa makoragwo thĩinĩ wa mũbango ũcio wa ũrũgamĩrĩri gũkũ thĩ? Thĩinĩ wa kĩoneki kĩa Ezekieli, mũndũ ũrĩa warĩ mũnene thirikari-inĩ ya itũũra rĩu eetagwo “mũtongoria.” (Ezek. 45:7) Aarĩ mũrori gatagatĩ-inĩ ka andũ, no ndaarĩ mũthĩnjĩri-Ngai kana Mũlawii. Ũmũthĩ mũtongoria ũcio aratũririkania mũno ũhoro wa arori thĩinĩ wa kĩũngano arĩa matakoragwo maitĩrĩirio maguta kũgerera roho mũtheru. Arĩithi acio a kĩĩroho marĩ wendo na wĩnyihia arĩa makoragwo marĩ a “ngʼondu ingĩ,” nĩ ndungata cia gũkũ thĩ cia thirikari ya igũrũ ya Kristo. (Joh. 10:16) Hĩndĩ ya wathani wa Mĩaka Ngiri ũrĩa ũroka, “thĩinĩ wa thĩ yothe,” Jesu nĩ agaathuura na aamũre athuri arĩa magĩrĩire kana “anene.” (Thab. 45:16) Marĩ rungu rwa ũtongoria wa Ũthamaki wa igũrũ, nĩ makaarũmbũiya mabataro ma andũ a Ngai hĩndĩ ya wathani ũcio wa Mĩaka Ngiri.

10. Itũũra rĩu rĩtagwo atĩa, na rĩĩtwa rĩu rĩonanagia ũũma wa ũndũ ũrĩkũ?

¹⁰ Thoma Ezekieli 48:35. Itũũra rĩu rĩtagwo “Jehova Arĩ Kuo.” Rĩĩtwa rĩu rĩonanagia ũũma wa atĩ thĩinĩ wa itũũra rĩu nĩ kuonekaga atĩ Jehova arĩ kuo. Na njĩra ya kuonia Ezekieli itũũra rĩu rĩarĩ gatagatĩ, nĩ ta Jehova eeraga andũ arĩa maarĩ ithamĩrio ũũ: ‘Nĩ ngaakorũo hamwe na inyuĩ rĩngĩ!’ Ũcio warĩ ũndũ wa gwĩkĩra ngoro mũno!

11. Nĩ maũndũ marĩkũ tũngĩĩruta kuumana na kĩoneki kĩa Ezekieli kĩgiĩ itũũra o hamwe na rĩĩtwa rĩarĩo?

¹¹ Nĩ maũndũ marĩkũ tũngĩĩruta kuumana na gĩcunjĩ kĩu kĩa ũrathi wa Ezekieli? Rĩĩtwa rĩa mũbango ũcio wa ũrũgamĩrĩri ũringithanĩtio na itũũra rĩtũheaga ũũma tũrĩ ndungata cia Ngai ũmũthĩ atĩ Jehova nĩ akoragwo hamwe na ndungata ciake njĩhokeku gũkũ thĩ ihinda-inĩ rĩrĩ na nĩ arĩkoragwo hamwe nacio hingo ciothe. Rĩĩtwa rĩu ningĩ nĩ rĩtĩtĩrithagia ma ĩno ya bata: Itũũra rĩu rĩtikoragwo ho nĩguo rĩhe andũ wathani, no rĩkoragwo ho nĩguo rĩtigĩrĩre atĩ njĩra cia Jehova cia wendo na cia kĩhooto nĩ  ciarũmĩrĩrũo. Kwa ngerekano, Jehova ndaheete andũ arĩa marĩ mũbango-inĩ wa ũrũgamĩrĩri wathani wa kũgayania bũrũri ũcio wa kĩĩroho kũringana na ũrĩa andũ mangĩona kwagĩrĩire. Ithenya rĩa ũguo, Jehova erĩgagĩrĩra matĩe harĩa we mwene agaĩire ndungata ciake, kana mĩeke ĩrĩa aciheete, nginya ‘arĩa matarĩ hinya.’—Thim. 19:17; Ezek. 46:18; 48:29.

12. (a) Nĩ ũndũ ũrĩkũ wa mwanya wĩgiĩ itũũra rĩu, na ũndũ ũcio ũronania atĩa? (b) Gĩcunjĩ kĩu gĩa kĩoneki kĩheaga Akristiano arĩa matungataga marĩ arori kĩririkania kĩrĩkũ kĩa bata?

¹² Hihi nĩ ũndũ ũrĩkũ ũngĩ wa mwanya wĩgiĩ itũũra rĩu rĩtagwo “Jehova Arĩ Kuo”? Matũũra ma tene maakoragwo na thingo cia kũmagitĩra na ihingo nini o ũrĩa kũngĩahotekire, no itũũra rĩu rĩarĩ na ihingo 12! (Ezek. 48:30-34) Ihingo icio nyingĩ (ithatũ harĩ o mwena wa itũũra rĩu rĩarĩ na mĩena ĩna ĩiganaine) ironania atĩ arũgamĩrĩri a itũũra rĩu nĩ makinyĩrĩkaga nĩ ndungata ciothe cia Ngai. Makĩria ma ũguo, itũũra rĩu gũkorũo na ihingo 12 kũratĩtĩrithia atĩ no rĩtonywo nĩ mũndũ o wothe, “nyũmba yothe ya Isiraeli.” (Ezek. 45:6) Gũkorũo atĩ nĩ ũndũ mũhũthũ gũtonya thĩinĩ wa itũũra rĩu nĩ kĩririkania kĩa bata harĩ Akristiano arĩa matungataga marĩ arori. Jehova endaga makorũo magĩkinyĩrĩka nĩ arĩa othe makoragwo thĩinĩ wa paradiso ya kĩĩroho.

13. Nĩ maũndũ marĩkũ Jehova aagwetire megiĩ motungata matiganĩte marĩa andũ mangĩarutire?

¹³ Reke tũcoke na thutha mahinda-inĩ ma Ezekieli na tuone nĩ maũndũ marĩkũ mangĩ andĩkĩte megiĩ kĩoneki kĩu kĩgiĩ kũgaywo kwa bũrũri. Jehova agwetete andũ makĩnyitanĩra ũtungata-inĩ wa mĩthemba ĩtiganĩte. Athĩnjĩri-Ngai—arĩa maatungataga “thĩinĩ wa handũ harĩa hatheru”—maagĩrĩirũo kũruta magongona na gũkuhĩrĩria Jehova nĩguo mamũtungatĩre. Nao Alawii—arĩa maatungataga “thĩinĩ wa hekarũ”—maarĩ “marorage ũtungata wayo na maũndũ mothe marĩa magĩrĩire gwĩkwo thĩinĩ wayo.” (Ezek. 44:14-16; 45:4, 5) Makĩria ma ũguo, nĩ kũngĩakorirũo na andũ mararuta wĩra hakuhĩ na itũũra rĩu. Aruti wĩra acio nĩa?

14. Andũ arĩa maarutaga wĩra hakuhĩ na itũũra matũririkanagia ũndũ ũrĩkũ?

¹⁴ Andũ acio maarutaga wĩra hakuhĩ na itũũra mooimĩte “mĩhĩrĩga-inĩ yothe ya Isiraeli.” Maarĩ a gũteithĩrĩria. Wĩra wao warĩ gũkũria ‘irio cia arĩa maarutaga wĩra thĩinĩ wa itũũra.’ (Ezek. 48:18, 19) Hihi mũbango ũcio nĩ ũtũririkanagia ũhoro wa mweke tũkoragwo naguo ũmũthĩ? Ĩĩ. Ũmũthĩ, aikari othe a paradiso ya kĩĩroho nĩ makoragwo na mweke wa gũteithĩrĩria ũtungata wa ariũ a Ithe na Kristo arĩa aitĩrĩrie maguta na ũtungata wa arĩa a “kĩrĩndĩ kĩnene” arĩa Jehova amũrĩte matongoragie. (Kũg. 7:9, 10) Njĩra ĩmwe nene tũteithagĩrĩria nayo nĩ kũrũmĩrĩra twĩyendeire ũtongoria kuuma kũrĩ ngombo ĩrĩa njĩhokeku.

15, 16. (a) Nĩ ũndũ ũrĩkũ ũngĩ tũngĩĩruta kuumana na kĩoneki kĩa Ezekieli? (b) Tũkoragwo na mweke wa kũruta mawĩra marĩkũ ta macio?

¹⁵ Kĩoneki kĩa Ezekieli nĩ gĩkoragwo na ũndũ ũngĩ tũngĩĩruta naguo ũhoro-inĩ wĩgiĩ ũtungata witũ. Nĩ ũndũ ũrĩkũ ũcio? Jehova  ooigire atĩ andũ a mĩhĩrĩga 12 ĩrĩa ĩtaarĩ ya Alawii nĩ mangĩakorirũo makĩruta wĩra kũndũ kwĩrĩ: thĩinĩ wa nja ya hekarũ na kũndũ gwa kũrĩithio gwa itũũra. Nĩ wĩra ũrĩkũ mangĩarutire o kũndũ? Thĩinĩ wa nja ya hekarũ, andũ a mĩhĩrĩga yothe ‘maatonyaga kuo nĩguo mathathaiye’ na njĩra ya kũrutĩra Jehova magongona. (Ezek. 46:9, 24) Thĩinĩ wa mũgũnda wa itũũra, andũ a mĩhĩrĩga yothe maathiaga gũteithĩrĩria itũũra rĩu na njĩra ya kũrĩma mũgũnda warĩo. Tũngĩĩruta atĩa kuumana na kĩonereria kĩa aruti wĩra acio?

¹⁶ Ũmũthĩ, andũ a kĩrĩndĩ kĩrĩa kĩnene nĩ makoragwo na mweke wa kũruta mawĩra ta marĩa maarutagwo thĩinĩ wa kĩoneki kĩa Ezekieli. Mathathayagia Jehova “thĩinĩ wa hekarũ yake” na njĩra ya kũruta magongona ma kũgooca. (Kũg. 7:9-15) Mekaga ũguo rĩrĩa manyitanĩra wĩra-inĩ wa kũhunjia na rĩrĩa moimbũra wĩtĩkio wao mĩcemanio-inĩ ya Gĩkristiano. Monaga atĩ gũthathaiya Jehova na njĩra ta ĩyo nĩguo ũndũ ũrĩa wa bata makĩria magĩrĩirũo gwĩka. (1 Maũ. 16:29) Makĩria ma ũguo, andũ aingĩ gatagatĩ-inĩ ka andũ a Ngai nĩ mahotaga gũteithĩrĩria ithondeka rĩa Ngai na njĩra nyingĩ itiganĩte. Kwa ngerekano, nĩ mateithagĩrĩria gwaka na kũmenyerera Nyũmba cia Ũthamaki na mĩako ya wabici cia honge, na nĩ mateithagĩrĩria mawĩra-inĩ mangĩ maingĩ mambĩrĩirio nĩ ithondeka rĩa Jehova. Angĩ  mateithagĩrĩria mawĩra macio na njĩra ya kũruta mbeca irĩ mĩhothi. Rĩrĩa mararuta mawĩra macio mothe, nĩ ta makoragwo makĩrĩma mũgũnda ũcio wa mũhaano ‘nĩguo magoocithie Ngai.’ (1 Kor. 10:31) Marutaga wĩra wao marĩ na kĩyo na makenete tondũ nĩ moĩ atĩ Jehova “nĩ akenagio mũno nĩ magongona ta macio.” (Ahib. 13:16) Hihi wee nĩ ũhũthagĩra mĩeke ĩyo na njĩra njega biũ?

17. (a) Tũkoona kĩoneki kĩa Ezekieli gĩkĩhinga na njĩra nene makĩria atĩa ihinda rĩũkĩte? (b) Nĩa makaagunĩka kuumana na ũrũgamĩrĩri ũrĩa ũringithanĩtio na itũũra hĩndĩ ya wathani wa Mĩaka Ngiri?

¹⁷ Hihi nĩ tũkoona kĩoneki kĩa Ezekieli kĩgiĩ gĩcigo kĩrĩa kĩarĩ mũhothi gĩkĩhinga na njĩra nene makĩria ihinda rĩũkĩte? Ĩĩ nĩ tũkoona! Ririkana ũndũ ũyũ: Ezekieli oonire atĩ gĩcigo kĩrĩa gĩetirũo “mũhothi mwamũre” kĩarĩ gatagatĩ ka bũrũri. (Ezek. 48:10) Na njĩra o ta ĩyo, thutha wa Hari–Magedoni, gũtekũmakania kũrĩa tũgaakorũo thĩinĩ wa thĩ, Jehova agaakoragwo hamwe na ithuĩ. (Kũg. 21:3) Hĩndĩ ya wathani wa Mĩaka Ngiri, mũbango ũcio wa ũrũgamĩrĩri ũringithanĩtio na itũũra—ũguo nĩ kuuga andũ arĩa makaamũrũo gũkũ thĩ nĩguo marũmbũiye mabataro ma andũ a Ngai—nĩ ũgaakinyia wathani waguo kũndũ guothe thĩinĩ wa thĩ na njĩra ya kũheana ũtongoria wa wendo kũrĩ arĩa othe magaakorũo marĩ “thĩ njerũ,” kana andũ arĩa Ngai agaakorũo etĩkĩrĩte thĩinĩ wa thĩ.—2 Pet. 3:13.

18. (a) Nĩ kĩĩ kĩngĩtũma tũkorũo na ma atĩ ũrũgamĩrĩri ũcio ũringithanĩtio na itũũra nĩ ũgaatwaranaga biũ na wathani wa Ngai? (b) Rĩĩtwa rĩa itũũra rĩu rĩtũheaga ũũma wa ũndũ ũrĩkũ?

¹⁸ Nĩ kĩĩ kĩngĩtũma tũkorũo na ma atĩ mũbango ũcio wa ũrũgamĩrĩri ũringithanĩtio na itũũra nĩ ũgaatwaranaga biũ na wathani wa Ngai? Tondũ Kiugo kĩa Ngai gĩtaaragĩria wega atĩ itũũra rĩu rĩa gũkũ thĩ rĩrĩ na ihingo 12 rĩhaana ta itũũra rĩa igũrũ rĩrĩ na ihingo 12, na nĩrĩo Jerusalemu Njerũ, ĩrĩa ĩkoragwo na arĩa 144,000 magaathana hamwe na Kristo. (Kũg. 21:2, 12, 21-27) Ũndũ ũcio wonanagia atĩ ũrũgamĩrĩri ũcio wa gũkũ thĩ nĩ ũgaatwarana na matua mothe marĩa magaatuo nĩ Ũthamaki wa Ngai kũrĩa igũrũ na nĩ ũgaatigĩrĩra atĩ nĩ wamahingia. Hatarĩ nganja, rĩĩtwa rĩa itũũra rĩu “Jehova Arĩ Kuo” rĩheaga o ũmwe witũ ũũma wa atĩ ũthathaiya mũtheru nĩ ũgũtũũra na nĩ ũkaagaacĩra tene na tene thĩinĩ wa Paradiso. Tũrĩ na ihinda rĩega mũno mbere itũ!