1, 2. (a) Musuka muka wakulipwila uze vapulile? (Talenu muvwimbimbi wakulivanga.) (b) Chakumwenesa kana chakafwile vafunge vafwelele chuma muka?

MUCHAKUMWENESA chamakumishilo, Ezekele amwene musuka wamavu uze vapulile mangana vauzachise kumulimo wakulipwila. Uze musuka wamavu kavauhanyine kupwa uswana kumuyachi wavaIsaleleko oloze vauhanyine kupwa wana kuli Yehova. Amwene nawa nganda yize yapwile nalijina lyakukomwesa. Echi chakumwenesa chakafwile vafunge vafwelele ngwavo Yehova mwakapwa navakiko omu navakakinduluka kulifuchi lyavo.

² Ezekele atulumbunwina kanawa vyamusuka kanou wawana wajila. Tushimutwilenu jino hamujimbu kanou ukwechi vishina vize natulinangulako nayetu vaka-kulemesa Kalunga vamuchano.

3. Misuka muka yitanu yize vapulile hamusuka wamavu uze vahanyine Yehova kupwa wana, kaha yapwile yaka? (Talenu lipwata lyakwamba ngwavo “Musuka waMavu Uze Namukahana Kalunga Kupwa Wana.”)

³ Musuka wamavu wakulipwila wapwile najikuvite 25,000 (jikilomita 13) kufuma kunote nakuya kusulo, kaha wapwile najikuvite 25,000 kufuma kumututuko nakuya kumulauko. Ou musuka vauvulukile ngwavo, “musuka wosena  wawana wajila.” Musuka kana vaupulile muvihanda vitatu. Chihanda chakulivanga chapwile chavaLevi, kaha chihanda chahakachi chapwile chatembele navapilishitu. Evi vihanda vivali vikiko vavulukile ngwavo “wana wajila.” Kaha chihanda chachindende chipwe ngwetu ‘musuka wasalileho’ wapwile “wakuzachisa kumilimo yeka.” Hakiko hapwile nganda.—Ezeke. 48:15, 20.

4. Chuma muka natulinangula kumujimbu kanou wamusuka wawana wajila vahanyine Yehova?

⁴ Chuma muka natulinangula kumujimbu kanou wamusuka wawana wajila vahanyine Yehova? Yehova alwezele vatu jenyi vapule chatete musuka wamavu nakuuhana kupwa wana wajila, kufumaho vapule yikwavo nakuyihana kumiyachi yavaIsalele yosena. (Ezeke. 45:1) Echi chasolwele nge Yehova asakile vatu jenyi vazakame chatete chihela chakuzachilaho milimo yakushipilitu. Chikupu vene vafunge valinangwile chishina chachilemu hakumona Yehova mwavalweza vapule chatete musuka wakuzachilaho milimo yajila. Ngocho vatachikijile ngwavo vatelelele kuhaka chatete milimo yakushipilitu kulutwe mukuyoya chavo. Nayetu makumbi ano, twamona milimo yakushipilitu yakufwana nge kulinangula Mazu aKalunga, kukungulukanga nakwazananga mumulimo wakwambulula kupwa vyavilemu chikuma mukuyoya chetu. Nge natulondezeza Yehova hakuhaka vyuma vyavilemu kulutwe kaha natusolola ngwetu twamona kulemesa Yehova kupwa chuma chachilemu chikuma mukuyoya chetu.

5, 6. (a) Uno nganda kana yapwile yeya? (b) Eyi nganda kayemanyinyineko vyuma muka, kaha mwomwo ika?

⁵ Tangenu Ezekele 48:15. Uno yize “nganda” yemanyinyineko ika? Kaha chize chipapa chapwile chaka? (Ezeke. 48:16-18) Yehova alwezele Ezekele muchakumwenesa ngwenyi: “Musuka . . . wanganda . . . naukapwa wavaze vakuzuvo yaIsalele vosena.” (Ezeke. 45:6, 7) Shikaho nganda nachipapa chayo kavyapwile musuka wawana wajila uze ‘vahanyine Yehovako.’ (Ezeke. 48:9) Tuwanenu jino vyuma natulinangula hakukekesa milimo vazachilenga munganda kana.

⁶ Hakusaka tuwane vyuma vize natulinangula kunganda kana, chatete twatela kutachikiza ngwetu eyi nganda kayemanyinyineko nganda yaYelusalema natembele yayo yize vatungulwileko. Mwomwo ika? Mwomwo nganda yize vamwenesele Ezekele kayapwile natembeleko. Kaha nawa, eyi nganda kayemanyinyineko kala nganda yize vatungulwile mulifuchi lyaIsaleleko. Mwomwo vafunge vaze vakindulukile chipwe vana vavo vaze vakavangijileho kavatungile nganda yakufwana ngana yize valumbunwine muli echi chakumwenesako. Kaha nawa eyi nganda kayemanyinyineko nganda yamwiluko. Mwomwo ika? Mwomwo kavayitungililile hachihela chajila chakulemesela Kalungako, oloze vayitungililile hachihela “chavatu vosena.”—Ezeke. 42:20.

7. Nganda muka amwene Ezekele, kaha atela yemanyinako yika? (Talenu muvwimbimbi wakulivanga.)

 ⁷ Kaha eyi nganda amwene Ezekele yemanyinako ika? Anukenu ngwenu muchakumwenesa chochimwe Ezekele amwene nganda nalifuchi. (Ezeke. 40:2; 45:1, 6) Mazu aKalunga asolola nge lize lifuchi amwene Ezekele lyemanyinako lifuchi lyakushipilitu, shikaho neyi nganda amwene atela yemanyinako nganda yakushipilitu. Uno lizu lyakwamba ngwavo “nganda” lyalumbununa ika? Lyalumbununa vatu vaze navatwama hamwe nakuzata vyuma mujila yakulonga. Shikaho nganda yize amwene Ezekele atela yemanyinako fulumende yize valongesa kanawa.

8. Uno eyi fulumende yeji kuyulilanga kulihi, kaha mwomwo yika tunambila ngocho?

⁸ Uno eyi fulumende yeji kuyulilanga kulihi? Chakumwenesa chaEzekele chasolola nge eyi nganda yatwaminyinyinenga milimo mulifuchi lyakushipilitu. Shikaho makumbi ano, eyi fulumende yeji kutwaminyinanga milimo veji kuzatanga vangamba jaKalunga. Hakuwana nge eyi nganda vayitungililile hachihela chavatu vosena chize kachapwile chajilako, chatwanukisa ika? Echi chatwanukisa nge, eyi nganda kayemanyinako fulumende yamwiluko, oloze yahamavu yize yinakutwaminyinanga vatu mupalachise yakushipilitu mangana vanganyale.

9. (a) Veya vatwama muli eyi fulumende yahamavu makumbi ano? (b) Chuma muka mwakalinga Yesu mumyaka 1,000?

⁹ Veya veji kutwaminyinanga eyi fulumende yahamavu? Muchakumwenesa chize vamwenesele Ezekele, mutu uze apwile nakutwaminyina munganda vamuvulukilenga ngwavo “mwata wavaIsalele.” (Ezeke. 45:7) Ikiye apwile nakutwaminyinanga vatu, oloze kapwile kapilishitu chipwe kaLeviko. Ou mwata wavaIsalele eji kutulingisa tushinganyeke hali tulama muvikungulwilo vaze kavapwa vakuwavisako. Ava tufunga vakushipilitu vamulizavu ‘lyamikoko veka’ vapwa vangamba jaKulishitu vakulinyisa. (Yowa. 10:16) Muchiyulo chaYesu chaMyaka 1,000, Yesu mwakasakula tulama vakuhya kushipilitu chipwe ngwetu “vilolo” “hamavu hosena.” (Samu 45:16) Ava tulama navakavatwaminyina kuWangana wamwilu mangana vakazakame vatu jaKalunga haMyaka 1,000 yize mwakayula Yesu.

10. Yize nganda vayivulukile ngwavo yika, kaha lijina kana lyafwelelesele vafunge chuma muka?

¹⁰ Tangenu Ezekele 48:35. Eyi nganda vayivulukile ngwavo “Yehova Ali Muno,” kusolola nge Yehova apwilenga munganda kana. Omu Yehova alwezele Ezekele eyi nganda, chapwile kwijiva nge apwile nakulweza vafunge ngwenyi: ‘Nangukapwa cheka nayenu hamwe.’ Mazu kana avakolezezele chikuma.

11. Vyuma muka natulinangula kunganda yize vamwenesele Ezekele nalijina lyayo?

¹¹ Vyuma muka natulinangula kuchakumwenesa kanechi vamwenesele Ezekele? Lijina lyeyi nganda lyatufwelelesa nge, Yehova eji kutwamanga hamwe navangamba jenyi vakushishika hano hamavu oholyapwa nakumyaka yosena. Eli lijina lyasolola nawa nge eyi nganda vayihakako mangana yilingenga  vyuma eji kuhanjikanga Yehova keshi kuhana vatu ngolo jakuyulako. Chakutalilaho, Yehova kahana vatu jenyi vaze veji kutwaminyinanga ngolo jakupulila vatu misuka mujila yachifwanyisa ngana muze vashinganyeka vatuko. Oloze asaka vavumbike vyazano apulila chipwe ngwetu milimo yize Yehova ahana vangamba jenyi kuhakilako vene ‘navaka-kuhutwa.’—Vishi. 19:17; Ezeke. 46:18; 48:29.

12. (a) Eyi nganda yapwile nachuma muka chakulipwila, kaha chasolwele yika? (b) Chuma muka navalinangula tulama kuchakumwenesa kana?

¹² Eyi nganda vavuluka ngwavo “Yehova Ali Muno,” yapwile nachuma muka chikwavo chakulipwila? Jinganda jakushikulu japwile navikolo vyamweseke najikembwe jakuvakinga kuli vaka-kole, oloze eyi nganda yapwile navikolo 12. (Ezeke. 48:30-34) Hakuwana nge eyi nganda yapwile navikolo vyavivulu (kusali hisali kwapwile vikolo vitatu) chasolwele nge vaka-kuyula vamunganda kana vapwile vavashi kuhanjikisa kaha nawa vapwile vakulizanga kukafwa vangamba jaKalunga vosena. Yasolwele nawa nge vatu “vakuzuvo yaIsalele vosena,” vanahase kwingilamo. (Ezeke. 45:6) Tulama vatela kulinangula vishina vyavilemu kuli eyi nganda yapwile navikolo vyavivulu. Yehova asaka tulama vapwenga vavashi kuhanjikisa nakupwa vakulizanga kukafwa vatu vaze vatwama mupalachise yakushipilitu.

13. Yehova ahanjikile ngwenyi vatu navakazata milimo muka yakulisezaseza?

¹³ Tushimutwilenu nawa havyuma vikwavo vamwenesele Ezekele muli echi chakumwenesa. Muchakumwenesa kana, Yehova avulukilemo vyavatu vapwile nakuzata milimo yakulisezaseza. ‘Vapilishitu vaze vazachililenga kuchihela chajila’ vapwile nakuhana mawana nakupandama kuli Yehova vamuzachile. Kaha ‘vaLevi vaze vazachililenga kutembele’ vapwile ‘nakuzata milimo yapwileho navyuma vyosena vyamutembele.’ (Ezeke. 44:14-16; 45:4, 5) Kaha nawa vatu veka vapwile nakuzata milimo natwima kwakamwihi nanganda. Uno vatu kana vapwile veya?

14. Chuma muka natulinangula kuvatu vaze vazachililenga kwakamwihi nanganda?

¹⁴ Ava vatu vapwile nakuzachila kwakamwihi nanganda, vafumine “kumiyachi yosena yavaIsalele.” Vapwilenga namulimo wakulima jimbuto mangana jikapwe “kulya chavaka-kuzata munganda.” (Ezeke. 48:18, 19) Kutala tunahase kulinangulako vyuma vimwe kujila kaneyi valongeselelemo vyuma tahi? Eyo. Makumbi ano, vatu vosena vaze vatwama mupalachise yakushipilitu vatwama namulimo wakukundwiza vandumbu jaKulishitu vawavisa navatu ‘vamuliyongomena lyalinene’ vaze atongola Yehova mangana vatwaminyine vikungulwilo. (Kuso. 7:9, 10) Jila yayinene tweji kuvakundwijilangamo shina kukavangiza jindongi veji kutuhananga kuli ndungo wakushishika.

15, 16. (a) Chishina muka chikwavo tunahase kulinangula kuchakumwenesa vamwenesele Ezekele? (b) Milimo muka tunakuzata yize yinalifwane nayize vazachilenga vatu vaze kavapwile vaLeviko?

¹⁵ Ezekele vamumwenesele nawa chuma chikwavo chachilemu tunahase kulinangula kutalisa kumulimo wetu wakwambulula.  Chuma muka? Muchakumwenesa kana, Yehova ambile ngwenyi vatu vakumiyachi yavaIsalele 12 vaze kavapwile vaLeviko navakazata milimo kuvihela vivali. Vapwile nakuzachila kuchipango chatembele nakuweluka wanganda. Milimo muka vazachilenga kuvihela kana? Muchipango chatembele, miyachi yosena ‘yejilenga nakulemesa Kalunga’ hakumuhana mawana. (Ezeke. 46:9, 24) Kaha kuweluka wanganda, miyachi yosena yejilenga nakulima kuweluka wanganda. Vyuma muka natulinangula kuli ava vaka-kuzata?

¹⁶ Namakumbi ano, vatu vaze vatwama ‘muliyongomena lyalinene’ veji kuzatanga milimo nge yize vazachilenga vatu vaze amwene Ezekele muchakumwenesa. Veji kulemesanga Yehova “mutembele yenyi” hakumuhananga mawana akumwalisa. (Kuso. 7:9-15) Veji kulinganga ngocho hakwambulula mujimbu, nakusolola lufwelelo lwavo hakukunguluka omu veji kukumbululanga nakwimba myaso. Vamona kulemesa Yehova kupwa chuma chachilemu chikuma mukuyoya chavo. (Miji. 1, 16:29) Kaha nawa vangamba jaKalunga vavavulu veji kukundwizanga liuka lyenyi mujijila jajivulu. Chakutalilaho, veji kukafwanga mumilimo yakutunga nakulama jiZuvo jaWangana, namitango kaha nawa veji kukafwanga mumilimo  yeka yeji kwizanga muliuka lyaYehova. Veka veji kukundwizanga milimo kana hakuhana mawana. Shikaho veji kuzatanga milimo kaneyi chipwe ngwetu kulima mujila yachifwanyisa mangana ‘vamutohwesa Kalunga.’ (Koli. 1, 10:31) Veji kuzatanga milimo kaneyi natwima nakuwahilila mwomwo vatachikiza ngwavo Yehova “eji kwivwilanga kuwaha vimuna vakuvatula vangocho.” (Hepe. 13:16) Uno nayenu mweji kwazananga mumilimo kaneyi tahi?

17. (a) Chakumwenesa vamwenesele Ezekele nachikatesamo ngachilihi chikuma kulutwe? (b) Veya navakanganyala kufulumende yize nayikapwako hano hamavu muchiyulo chaYesu chaMyaka 1,000?

¹⁷ Uno echi chakumwenesa vamwenesele Ezekele chamusuka wawana wajila nachikatesamo chikuma kulutwe tahi? Eyo. Anukenu ngwenu, Ezekele amwene musuka wamavu uze vavulukile ngwavo ‘musuka wawana wajila.’ Musuka kana wapwililile hakachi kalifuchi. (Ezeke. 48:10) Chochimwe nawa, hanyima yaAlamangetone, Yehova mwakapwanga nayetu kala kwosena okwo natukatwama. (Kuso. 21:3) Muchiyulo chaYesu chaMyaka 1,000, fulumende yize nayikapwa hano hamavu chipwe ngwetu vatu vaze navakatongola mangana vakazakame vatu jaKalunga mukaye kosena, navakahana jindongi vatu vaze navakatwama ‘hamavu amahya,’ kulumbununa chitungilo chachihya.—Petu. 2, 3:13.

18. (a) Mwomwo ika tunafwelela ngwetu yize fulumende nayikapwa hano hamavu nayikazata kweseka najindongi navakatambula kuli Kalunga? (b) Lijina lyayize nganda lyatufwelelesa chuma muka?

¹⁸ Mwomwo ika tunafwelela ngwetu yize fulumende nayikapwa hano hamavu nayikazata kweseka najindongi navakatambula kuli Kalunga? Tunafwelela ngocho mwomwo Mazu aKalunga ahanjika ngwawo, yize nganda yapwile navikolo 12 yemanyinyineko nganda yamwilu yize yatwama navikolo 12 chipwe ngwetu Yelusalema Yayihya, muze mwatwama vatu 144,000 vaze navakayula naKulishitu. (Kuso. 21:2, 12, 21-27) Shikaho yize fulumende nayikapwa hano hamavu nayikakavangiza jindongi navakavahana kuWangana wamwilu. Chikupu vene, lijina lyayize nganda lyakwamba ngwavo, “Yehova Ali Muno” lyatufwelelesa nge kulemesa chamuchano nachikapwangako lika haya myaka yosena muPalachise. Chamuchano vene tuli nakutalilila vyuma vyamwaza chikuma kulutwe.