1, 2. (a) Para ha ano nga espesyal nga katuyoan iglalain an usa nga bahin han tuna? (Kitaa an retrato ha kobre.) (b) Ano nga pasarig an iginhatag han bisyon para ha mga distyero?

 HA ULTIMO nga bisyon ni Ezekiel, nahibaro hiya mahitungod han usa nga bahin han tuna nga iglalain para ha espesyal nga katuyoan. Ihahatag ito, diri sugad nga panurundon han usa nga tribo han mga Israelita, kondi sugad nga kontribusyon para kan Jehova. Nahibaro liwat hiya mahitungod ha makaruruyag nga syudad nga may makapainteres nga ngaran. Ini nga bahin han bisyon naghatag ha mga distyero hin importante gud nga pasarig: Makakaupod nira hi Jehova pakabalik nira ha ira hinigugma nga tuna.

² Detalyado nga iginhulagway ni Ezekiel ito nga kontribusyon. Hisgotan naton ini nga asoy nga puno hin kahulogan para ha aton sugad nga tinuod nga mga magsiringba ni Jehova.

3. Ano an lima nga parte han tuna nga iginlain ni Jehova, ngan ano an katuyoan han tagsa nga parte? (Kitaa an kahon nga “An Kontribusyon nga Sadang Niyo Iglain.”)

³ Ha sulod han iginlain nga bahin, may tuna nga an sukol 25,000 ka siko (13 kilometros) tikang ha norte ngadto ha sur ngan 25,000 ka siko tikang ha este ngadto ha weste. Inin kwadrado nga tuna gintawag nga “an bug-os nga kontribusyon.” Ginbahin-bahin ini ha  tulo nga pahilaba nga seksyon. An igbaw para ha mga Levita, ngan an butnga iginlain para ha templo ngan ha mga saserdote. Iton duha nga seksyon gintatawag nga “baraan nga kontribusyon.” An gutiay nga seksyon ha ubos, o “an nahibibilin nga lugar,” “para ha diri baraan nga paggamit.” Para ito ha syudad.​—Ezek. 48:15, 20.

4. Ano nga leksyon an aton hibabaroan mahitungod han kontribusyon para kan Jehova?

⁴ Hini nga asoy, ano nga leksyon an aton hibabaroan mahitungod han kontribusyon para kan Jehova? Iginlain anay an tuna para hinin espesyal nga kontribusyon ngan katapos, an nabibilin pa nga tuna iginhatag ha mga tribo. Salit iginpakita ni Jehova nga kinahanglan tagan hin prayoridad ini nga sentro han pagsingba ha tuna. (Ezek. 45:1) Sigurado nga nahibaro gud an mga distyero tikang hini nga pagkasunod-sunod han pagbahin han tuna. Kinahanglan unahon nira ha ira kinabuhi an pagsingba kan Jehova. Yana, prayoridad liwat naton an espirituwal nga mga buruhaton, sugad han pag-aram han Pulong han Dios, pagtambong ha mga katirok, ngan pagsangyaw. Kon ginsusubad naton hi Jehova ha pagkaada tama nga mga prayoridad, an aton pagkinabuhi pirme nakasentro ha pagsingba ha iya.

5, 6. (a) Kan kanay panag-iya an syudad? (b) Ano an diri gintutudlok han syudad, ngan kay ano?

⁵ Basaha an Ezekiel 48:15. Ano “an syudad” ngan an tuna ha palibot hito? (Ezek. 48:16-18) Ha bisyon, hi Jehova nagsiring kan Ezekiel: ‘An panag-iya han syudad magigin panag-iya han bug-os nga panimalay ni Israel.’ (Ezek. 45:6, 7) Kon sugad, an syudad ngan an tuna ha palibot hito diri lakip han “baraan nga kontribusyon” nga ‘iglalain para kan Jehova.’ (Ezek. 48:9) Tigamnan naton ini samtang aton gin-uusisa kon ano an maitututdo ha aton han kahikayan hito nga syudad.

⁶ Pero antes hito, kinahanglan hibaroan anay naton kon ano an diri mahimo ipasabot hito nga syudad. Diri ito mahimo magtudlok ha gintukod utro nga syudad han Jerusalem upod an templo hito. Kay ano? Kay an syudad nga nakita ni Ezekiel waray templo ha sulod hito. Diri liwat ito nagtutudlok ha iba nga syudad ha iginpahiuli nga tuna han Israel. Kay ano? Kay an binalik nga mga distyero o an ira mga tulin waray gintukod nga syudad nga pariho han iginhulagway ha bisyon. Dugang pa, an syudad diri mahimo magtudlok ha syudad ha langit. Kay ano? Kay gintukod ito ha “diri baraan” nga tuna, diri pariho ha mga istraktura nga gintukod ha tuna nga iginlain para ha sagrado nga pagsingba.​—Ezek. 42:20.

7. Ano an syudad nga nakita ni Ezekiel, ngan ano an posible nga ginrirepresentaran hito? (Kitaa an retrato ha tinikangan han kapitulo.)

⁷ Kon sugad, ano an syudad nga nakita ni Ezekiel? Hinumdumi nga nakita niya ito ha bisyon diin nakita niya an tuna. (Ezek. 40:2; 45:1, 6) Iginpapakita han Pulong han Dios nga an tuna nagtutudlok ha espirituwal nga tuna, salit an syudad sigurado nga nagtutudlok ha espirituwal nga syudad. Ha kabug-osan, ano an iginpapasabot  han pulong nga “syudad”? Mga tawo ito nga naukoy sugad nga grupo nga may kahikayan ngan organisado. Kon sugad, an mahapsay ngan kwadrado nga syudad nga nakita ni Ezekiel posible nga nagrirepresentar hin organisado gud nga sentro han administrasyon.

8. Ano an nasasakopan hini nga administrasyon? Isaysay.

⁸ Ano an nasasakopan hini nga administrasyon? Iginpapakita ha bisyon ni Ezekiel nga ini nga syudad nagios ha sulod han espirituwal nga tuna. Salit ini nga administrasyon nagios yana ha sulod han espirituwal nga paraiso​—nagdudumara han buruhaton han katawohan han Dios. Ngan ano an iginpapasabot han impormasyon nga an syudad aada ha “diri baraan” nga tuna? Nagpapahinumdom ito ha aton nga an syudad nagtutudlok ha administrasyon ha tuna, diri ha langit, ngan nagios para ha kapulsanan han ngatanan nga naukoy ha espirituwal nga paraiso.

9. (a) Hin-o an nagkukompwesto hini nga administrasyon ha tuna yana? (b) Ha Milenyo, ano an bubuhaton ni Jesus?

⁹ Hin-o an nagkukompwesto hini nga administrasyon ha tuna? Ha bisyon, an nagdudumara hini nga syudad gintatawag nga “lider.” (Ezek. 45:7) Paramangno hiya han katawohan, pero diri hiya saserdote o Levita. Ini nga lider nagpapahinumdom ha aton labi na han mga paramangno han kongregasyon yana nga diri dinihogan. Inin mahigugmaon nga mga paramangno nga tikang ha “iba nga mga karnero” mapainubsanon nga mga surugoon ha tuna han gobyerno han Kristo ha langit. (Juan 10:16) Ha maabot nga Milenyo, magpipili hi Jesus hin kwalipikado nga mga tigurang, o “mga prinsipe,” ha bug-os nga tuna. (Sal. 45:16) Ha paggiya han Ginhadian ha langit, aatamanon nira an katawohan han Dios ha panahon han Milenyo.

10. Ano an ngaran han syudad, ngan ano an iginpapasarig hito?

¹⁰ Basaha an Ezekiel 48:35. An ngaran han syudad “Aada hi Jehova.” Ini nga ngaran nagpapasarig nga an presensya ni Jehova aada ha syudad. Ha pagpakita kan Ezekiel han syudad nga nahimumutang ha sentro han tuna, sugad hin ginsidngan ni Jehova an mga distyero: ‘Makakaupod niyo ako utro!’ Makaparig-on gud ito nga pasarig!

11. Ano an aton hibabaroan ha bisyon ni Ezekiel mahitungod han syudad ngan ha ngaran hito?

¹¹ Ano an aton hibabaroan hini nga bahin han tagna? An ngaran hinin sugad-syudad nga administrasyon nagpapasarig ha aton nga hi Jehova naukoy kaupod han iya matinumanon nga mga alagad ha tuna yana ngan ha kadayonan. Ginpapabug-atan liwat hini nga ngaran an usa nga importante nga kamatuoran: An syudad naeksister, diri para maghatag hin gahum ha bisan hin-o nga tawo, lugod basi ipatuman an mahigugmaon ngan makatadunganon nga mga paagi ni Jehova. Pananglitan, waray tagi ni Jehova an administrasyon hin awtoridad nga bahin-bahinon an tuna, siring pa, uyon ha karuyag la han tawo. Lugod, naglalaom hiya nga irirespeto han mga administrador an mga bahín, o mga pribilehiyo, nga  hiya mismo an naghatag ha iya mga alagad, upod na ha mga “ubos nga tawo.”​—Prob. 19:17; Ezek. 46:18; 48:29.

12. (a) Ano an makatirigamnan hini nga syudad, ngan ano an iginpapakita hini? (b) Ano nga importante nga pahinumdom ha Kristiano nga mga paramangno an iginhahatag hini nga bahin han bisyon?

¹² Ano pa an makatirigamnan ha syudad nga “Aada hi Jehova”? An kadaan nga mga syudad may mga pader nga naghahatag hin proteksyon ngan pipira la nga ganghaan kon posible, pero ini nga syudad may 12 nga ganghaan! (Ezek. 48:30-34) Ini nga kadamu han ganghaan (tulo ha kada ligid han kwadrado nga syudad) nagpapakita nga an mga administrador hini masayon madaop ngan andam bumulig ha tanan nga alagad han Dios. Dugang pa, an 12 nga ganghaan nagpapabug-at nga abrido ito para ha ngatanan, ha “bug-os nga panimalay ni Israel.” (Ezek. 45:6) An pagin abrido han syudad importante nga pahinumdom ha Kristiano nga mga paramangno. Karuyag ni Jehova nga masayon hira madaop ngan andam pirme bumulig ha tanan nga naukoy ha espirituwal nga paraiso.

13. Ano an gin-unabi ni Jehova mahitungod han iba-iba nga pag-alagad nga bubuhaton han katawohan?

¹³ Balik kita ha panahon ni Ezekiel ngan kitaon kon ano pa nga detalye an iya iginrekord hini nga bisyon parte ha pagbahin-bahin han tuna. Nag-unabi hi Jehova hin mga tawo nga makikigbahin ha iba-iba nga klase hin pag-alagad. An mga saserdote​—“mga surugoon ha santuaryo”—​maghahalad ngan madaop kan Jehova basi magserbi ha iya. Ngan an mga Levita​—“mga surugoon ha templo”—​‘manginginano ha buruhaton ha pag-alagad dida hito ngan ha ngatanan nga sadang buhaton dida hito.’ (Ezek. 44:14-16; 45:4, 5) Dugang pa, may magigin mga trabahador ha syudad. Hin-o hira?

14. Ano an iginpapahinumdom ha aton han buruhaton han mga trabahador ha syudad?

¹⁴ An mga trabahador nga nasuporta ha syudad tikang ha “ngatanan nga tribo han Israel.” An ira trabaho amo an pag-uma basi ‘magtagana hin pagkaon para ha mga nagsiserbi ha syudad.’ (Ezek. 48:18, 19) Iginpapahinumdom ba hini nga kahikayan an aton pribilehiyo yana? Oo. Yana an ngatanan nga umurukoy ha espirituwal nga paraiso may pribilehiyo nga suportaran an pag-alagad han dinihogan nga kabugtoan han Kristo ngan an pag-alagad han kaapi han “daku nga grupo” nga ginpili ni Jehova basi manguna. (Pah. 7:9, 10) An nangunguna nga paagi nga maipapakita naton ini nga suporta amo an kinaburut-on nga pagsunod ha mga instruksyon han matinumanon nga uripon.

15, 16. (a) Ano pa nga detalye an aton hibabaroan ha bisyon ni Ezekiel? (b) May pribilehiyo kita nga makigbahin ha ano nga pariho nga mga buruhaton?

¹⁵ May usa pa nga detalye ha bisyon ni Ezekiel nga nagtututdo ha aton hin leksyon mahitungod ha aton ministeryo. Ano ito? Gin-unabi ni Jehova nga an mga kaapi han 12 nga tribo nga diri Levita magtatrabaho ha duha nga lokasyon: ha bungsaran han templo ngan ha panabsaban han syudad. Ano an ira buruhaton didto? Ha bungsaran han templo, an ngatanan nga tribo ‘nasulod basi magsingba’ pinaagi ha paghatag hin mga halad kan Jehova. (Ezek. 46: 9, 24) Ha panabsaban han syudad, an mga kaapi han ngatanan nga tribo nasuporta ha syudad pinaagi ha pagkultibar han tuna hito. Ano an aton hibabaroan ha ehemplo hini nga mga trabahador?

¹⁶ Yana, an mga kaapi han daku nga grupo may pribilehiyo nga makigbahin ha mga buruhaton nga pariho ha ginbubuhat ha bisyon ni Ezekiel. Nagsisingba hira kan Jehova “ha iya templo” pinaagi ha paghatag hin mga halad han pagdayaw. (Pah. 7:9-15) Ginbubuhat nira ito pinaagi ha pagsangyaw ngan pagpahayag han ira pagtoo pinaagi ha pagkomento ngan pagkanta ha Kristiano nga mga katirok. Para ha ira, ini nga klase han pagsingba kan Jehova an ira nangunguna nga responsabilidad. (1 Cron. 16:29) Dugang pa, damu ha katawohan han Dios an nakakasuporta ha iya organisasyon ha damu nga praktikal nga paagi. Pananglitan, nabulig hira ha pagtukod ngan pagmintinar han mga Kingdom Hall ngan mga pasilidad han sanga nga opisina, pati na ha damu pa nga proyekto han organisasyon ni Jehova. An iba nasuporta hini nga mga proyekto pinaagi han ira mga donasyon. Ha pagbuhat hini ngatanan, sugad hin ginkukultibar nira an tuna “para ha himaya han Dios.” (1 Cor. 10:31) Madasigon ngan malipayon nga ginbubuhat nira ito kay maaram hira nga hi Jehova ‘nalilipay gud ha sugad nga mga halad.’  (Heb. 13:16) Ginpapahimulosan mo ba hin bug-os ini nga mga pribilehiyo?

17. (a) Ano an mas daku nga katumanan han bisyon ni Ezekiel ha tiarabot? (b) Ha Milenyo, hin-o an makakabenepisyo ha sugad-syudad nga administrasyon?

¹⁷ May mas daku ba nga katumanan ha tiarabot an bisyon ni Ezekiel mahitungod han kontribusyon? Oo! Hunahunaa ini: Nakita niya nga an bahin han tuna nga gintawag nga “baraan nga kontribusyon” nakada ha sentro han tuna. (Ezek. 48:10) Sugad man, kahuman han Armagedon, diin man kita naukoy ha tuna, hi Jehova maukoy kaupod naton. (Pah. 21:3) Ha Milenyo, an sugad-syudad nga administrasyon​—karuyag sidngon, an aanhi ha tuna nga pipilion basi mag-ataman han katawohan han Dios—​magpapahaluag han nasasakopan hito ha bug-os nga globo pinaagi ha paghatag hin mahigugmaon nga giya ngan instruksyon ha tanan nga magkukompwesto han “bag-o nga tuna,” usa nga bag-o nga sosiedad han mga tawo.​—2 Ped. 3:13.

18. (a) Kay ano nga makakasiguro kita nga an sugad-syudad nga administrasyon magdudumara uyon ha pagmando han Dios? (b) Ano nga marig-on nga pasarig an iginhahatag ha aton han ngaran han syudad?

¹⁸ Kay ano nga makakasiguro kita nga an sugad-syudad nga administrasyon padayon nga magdudumara uyon ha pagmando han Dios? Kay ginklaro han Pulong han Dios nga an syudad ha tuna nga may 12 nga ganghaan pariho han syudad ha langit nga may 12 nga ganghaan, an Bag-o nga Jerusalem, nga ginkukompwesto han 144,000 nga igkasi-magmarando han Kristo. (Pah. 21:2, 12, 21-27) Nagpapasabot ini nga an administrasyon ha tuna magpapatuman han ngatanan nga desisyon han Ginhadian han Dios ha langit. Oo, an ngaran han syudad nga “Aada hi Jehova” nagpapasarig ha aton nga an putli nga pagsingba magpapabilin ngan mag-uuswag hin waray kataposan ha Paraiso. Makaruruyag gud nga kabubuwason an naghuhulat ha aton!