Adoraña arojj Diosar munasiña, respetaña sañwa munaspa. Bibliajj qellqaskäna uka arunakanjja, “adoraña” aru traduciñatak apnaqaski uka arunakajj maynir taqe chuyma respetaña taqe kunan istʼaña sañ muni (Mat. 28:9). Diosaru jan ukajj mä idolor adorañatakiw apnaqasirakispa (Juan 4:23, 24). Kamsañsa muni ukajj kuna toqettï parlki ukarjamaw amuyasispa.

Jehová Diosaw taqe kun Lurirejja, juparakiw Taqe Kunjjar Munañanejja, ukatwa jupa saparuk adorasiñapa (Apoc. 4:10, 11). Diosajj Taqe Kunjjar Munañanïtap respettan ukhasa sutipar respetompi uñjtan ukhasa, juparus adorksna ukhamawa (Sal. 86:9; Mat. 6:9, 10). Ezequiel libronjja Diosajj Taqe Kunjjar Munañanïtapasa sutipasa walja kutiw qhanañchasi. Sañäni, Ezequiel libronjja, Diosat parlkasajj 217 kutiw ‘Taqe Kunjjar Munañani’ sasin qhanañchi. 55 kutirakiw ‘Jehová Diosätaj yatipjjäta’ jan ukajj ukar uñtasita yaqha arunakajj uñsti (Ezeq. 2:4; 6:7).

Ukampis janiw aleqakejj Diosaruw adorta sañasäkiti, jan ukasti luratanakasanwa ukajj qhanäñapa (Sant. 2:26). Jehová Diosar vidas katuyasktan ukhajja, Taqe Kunjjar Munañani Diosarjamaw uñjäma, sutimsa respetompiw uñjarakëjja sasinsa sisksna ukhamawa. Ak amtañäni, Jesusajj kimsïr yantʼan Supayar kamsänsa ukajja, Diosar adorañajj ‘jupa saparuk serviñampi’ sasitapwa uñachtʼayäna (Mat. 4:10). Diosar adoririnakajj jupar serviñ wal muntanjja (Deut. 10:12). * Luratanakasamp Diosar adorañatak chʼamachasktan ukhajja, Dios saparuk servitaswa uñachtʼaytanjja. ¿Kuna lurañanakatsa parlasktanjja?

Jehová Diosarojj kunaymanitwa sirvsna, ukham luratas wali valoranit uñji. Predicasasa, tantachäwinakar sarasasa, ukan arstʼasasa, tantachasiñ utanak cuidasasa, tantachasiñ utanak lurañ yanaptʼasasa Dios saparukis sirvksna ukhamawa. Ukatsti familiampi Bibliat yatjjatasasa, jan waltʼäwinakan uñjasipki uka jilat kullakanakar yanaptʼasasa, asambleanakan yanaptʼasasa, Betelan yanaptʼasasa Dios saparukis sirvksna ukhamarakiwa (Heb. 13:16; Sant. 1:27). Diosar adorañajj jiwasatak nayrankki ukhajja, ‘uruy arumas Diosar sirvksna’ ukhamawa. ¡Jehová Diosaruk adorañajj walpun gustistu! (Apoc. 7:15).