An pagsamba puwedeng mangahulugan na “pagpahiling nin paggalang asin pagkamuot sa sarong diyos.” Sa Bibliya, an mga tataramon sa orihinal na lengguwahe na itrinadusir na “pagsamba” puwedeng nanunungod sa pagpahiling nin saro nin hararom na paggalang, o pagpapasakop, sa mga linalang. (Mat. 28:9) Puwede man iyan magpanungod sa pagsamba sa Diyos o sa sarong diyos. (Juan 4:23, 24) Depende sa konteksto an magigin kahulugan kaiyan.

Si Jehova sana, an Kaglalang asin Soberano kan Uniberso, an maninigo sa satong eksklusibong debosyon. (Kap. 4:10, 11) Sinasamba ta si Jehova paagi sa paggalang sa saiyang soberaniya asin pagtao nin onra sa saiyang pangaran. (Sal. 86:9; Mat. 6:9, 10) An duwang temang ini—an soberaniya ni Jehova asin an saiyang pangaran—an panginot na tampok sa libro nin Ezekiel. Sa Ezekiel pa sana, an fraseng “Soberanong Kagurangnan na Jehova” ginamit na nin 217 beses, asin an mga tataramon na “mamimidbid nanggad nindo na ako si Jehova” asin an iba pang porma kaini ginamit man nin 55 beses.—Ezek. 2:4; 6:7.

Pero an satong pagsamba bako sanang basta pagmati; imbes, an tunay na pagsamba may kaibang paghiro. (Sant. 2:26) Kan idusay ta an satong buhay ki Jehova, nanuga kita na sa gabos na aspekto kan satong buhay, susunudon ta siya bilang satong Soberano asin ipapahiling ta an satong hararom na paggalang sa saiyang pangaran. Tandaan na sa simbag ni Jesus sa ikatulong sugot, ikinonektar niya an pagsamba sa “sagradong paglilingkod.” (Mat. 4:10) Bilang mga parasamba ni Jehova, gustong-gusto ta siyang paglingkudan. * (Deu. 10:12) Itinatao ta an sagradong paglilingkod sa satong Diyos pag nakikikabtang kita sa mga aktibidad na direktang konektado sa satong pagsamba asin nangangaipo nin pagsasakripisyo sa sadiri. Anong mga aktibidad?

May dakul na paagi nin sagradong paglilingkod, pero gabos iyan mahalagang marhay para ki Jehova. Naggigibo kita nin sagradong paglilingkod pag naghuhulit kita sa iba, nakikikabtang sa mga pagtiripon sa satong Kingdom Hall, asin nagtatabang sa pagmentenar saka pagtugdok kan satong mga lugar nin pagsamba. Naggigibo man kita nin sagradong paglilingkod pag nagsasagibo kita nin pampamilyang pagsamba, nagtatabang sa gibuhon na pag-ayuda para sa mga kapagtubod na nangangaipo, nagboboluntaryo sa satong mga kumbensiyon, o pag naglilingkod kita sa Bethel. (Heb. 13:16; Sant. 1:27) Pag pirming nasa isip asin puso ta an dalisay na pagsamba, mapapahiro kita kaiyan na magtao nin “sagradong paglilingkod aldaw asin banggi.” Nauugma nanggad kitang sambahon an satuyang Diyos, si Jehova!—Kap. 7:15.