Sinsẹ̀n-bibasi sọgan zẹẹmẹdo “nuhe mẹde nọ wà nado do sisi po owanyi po hia yẹwhe de.” To Biblu mẹ, hogbe dowhenu tọn he yin lilẹdo “sinsẹ̀n-bibasi” sọgan dlẹnalọdo nuyiwa mẹhe to sisi sisosiso dohia nudida lẹ kavi to taliaina yé tọn. (Mat. 28:9) Hogbe ehelẹ sọgan sọ dlẹnalọdo sinsẹ̀nzọn de he yin wiwà hlan Jiwheyẹwhe kavi hlan yẹwhe de. (Joh. 4:23, 24) Lẹdo hodidọ lọ tọn wẹ nọ do aliho he mẹ hogbe lọ dona yin nukunnumọjẹemẹ te hia.

Jehovah, yèdọ Mẹdatọ podọ Nupojipetọ Wẹkẹ tọn lọ kẹdẹ wẹ jẹna mẹdezejo mlẹnmlẹn mítọn. (Osọ. 4:10, 11) Mí nọ basi sinsẹ̀n hlan Jehovah gbọn sisi nina nupojipetọ-yinyin etọn po gbégbigbòna oyín etọn po dali. (Salm. 86:9; Mat. 6:9, 10) Hosọ awe ehelẹ—yèdọ nupojipetọ-yinyin Jehovah tọn po oyín etọn po—yin nùzindeji taun to owe Ezekiẹli tọn mẹ. Hodidọ lọ “Oklunọ Nupojipetọ Jehovah” sọawuhia whla 217 to owe Ezekiẹli tọn kẹdẹ mẹ, bọ hodidọ lọ “yọnẹn dọ yẹn wẹ Jehovah” sọawuhia whla 55.—Ezek. 2:4; 6:7.

Ṣigba, sinsẹ̀n-bibasi mítọn ma yin numọtolanmẹ de poun; kakatimọ sinsẹ̀n-bibasi nujọnu tọn nọ bẹ nuyiwa hẹn. (Jak. 2:26) Whenue mí klan gbẹzan mítọn do wiwe na Jehovah, mí dopà dọ mí na setonuna ẹn taidi Nupojipetọ mítọn bo na nọ do sisi sisosiso hia oyín etọn to adà gbẹzan mítọn tọn lẹpo mẹ. Flindọ to gblọndo he Jesu na na whlepọn atọ̀ntọ lọ mẹ, e dohia dọ kanṣiṣa de tin to sinsẹ̀n-bibasi po “sinsẹ̀nzọn wiwe” po ṣẹnṣẹn. (Mat. 4:10) Taidi sinsẹ̀n-basitọ Jehovah tọn lẹ, mí nọ to jejeji nado sẹ̀n ẹn kavi wà sinsẹ̀nzọn hlan ẹn. * (Deut. 10:12) Eyin mí to mahẹ tindo to nuyiwa he gando sinsẹ̀n-bibasi mítọn go tlọlọ bosọ biọ mẹde-yido-sanvọ́ lẹ mẹ, be sinsẹ̀nzọn wiwe wà hlan Jiwheyẹwhe mítọn wẹ mí te. Nuyiwa tẹlẹ hodọ wẹ mí te?

Sinsẹ̀nzọn wiwe wunmẹ susu wẹ tin, podọ popolẹpo wẹ họakuẹ to nukun Jehovah tọn mẹ. Mí nọ wà sinsẹ̀nzọn wiwe to whenue mí to kunnudena mẹdevo lẹ, to mahẹ tindo to opli lẹ ji to Plitẹnhọ Ahọluduta tọn mẹ bosọ to nọtẹn sinsẹ̀n-bibasi tọn lẹ gbá kavi to nukunpedo yé go. Aliho devo lẹ nado wà sinsẹ̀nzọn wiwe wẹ nado nọ tindo mahẹ to sinsẹ̀n-bibasi whẹndo tọn mẹ, doalọ to alọgọ kọgbọ tọn hinhẹnwa na yisenọ hatọ mítọn he to nuhudo mẹ lẹ mẹ, ze míde jo to plidopọ mítọn lẹ ji kavi sẹ̀n to Bẹtẹli. (Heb. 13:16; Jak. 1:27) Eyin sinsẹ̀n-bibasi wiwe-ṣeke tin to otẹn tintan mẹ to ayiha po ahun mítọn po mẹ, mí na nọ “to sinsẹ̀nzọn wiwe basi . . . to okle po ozán po.” Sinsẹ̀n-bibasi hlan Jehovah, Jiwheyẹwhe mítọn, nọ hẹn awuvivi wá na mí!—Osọ. 7:15.