Ang pagsimba mahimo nagakahulugan sing “buhat nga nagapakita sing pagrespeto kag pagpalangga sa isa ka dios.” Sa Biblia, ang orihinal nga mga tinaga nga gin-translate nga “pagsimba” mahimo nagapatuhoy sa pagpakita sing tudok nga pagrespeto, ukon pagpasakop sa mga tinuga. (Mat. 28:9) Ini nga mga tinaga mahimo man nagapatuhoy sa relihioso nga buhat para sa Dios ukon sa diosdios. (Juan 4:23, 24) Nagadepende sa konteksto kon ano ang kahulugan sang mga tinaga.

Si Jehova ang Manunuga kag Soberano sang Uniberso, kag sia lamang ang dapat naton simbahon. (Bug. 4:10, 11) Ginasimba naton si Jehova paagi sa pagpakita naton sing pagtahod sa iya pagkasoberano kag pagpadungog sa iya ngalan. (Sal. 86:9; Mat. 6:9, 10) Ining duha ka tema—ang pagkasoberano kag ngalan ni Jehova, pirme ginasambit sa libro sang Ezequiel. Ang ekspresyon nga “Soberanong Ginuong Jehova” mabasa sing 217 ka beses sa libro lang sang Ezequiel kag ang ekspresyon nga “makilala . . . nga ako amo si Jehova,” mabasa sing 55 ka beses.—Ezeq. 2:4; 6:7.

Ang aton pagsimba, indi lang basta balatyagon kundi matuod ini nga pagsimba nga ginaupdan sang buhat. (Sant. 2:26) Sang gindedikar naton ang aton kabuhi kay Jehova, nanaad kita nga tumanon sia bilang aton Soberano sa tanan nga bahin sang aton kabuhi kag tudok nga tahuron ang iya ngalan. Sa sabat ni Jesus sa ikatlo nga pagsulay, gin-angot niya ang pagsimba sa “sagrado nga pag-alagad.” (Mat. 4:10) Bilang mga sumilimba ni Jehova, gusto gid naton nga alagaron sia. * (Deut. 10:12) Nagahatag kita sing sagrado nga pag-alagad sa aton Dios kon nagahimo kita sing mga hilikuton nga direkta nga naangot sa aton pagsimba kag nagasakripisyo kita. Ano ini nga mga hilikuton?

Madamo sing paagi nga makahimo kita sing sagrado nga pag-alagad, kag tanan ini ginapabaloran ni Jehova. Nagahimo kita sing sagrado nga pag-alagad kon nagapanaksi, nagapakigbahin sa mga miting sa aton Kingdom Hall, kag nagamentinar ukon nagapatindog sang aton duog tilipunan. Sagrado man nga pag-alagad ang pangpamilya nga pagsimba, pagbulig sa nagakinahanglan nga mga kauturan, pagboluntaryo sa kombension, ukon pag-alagad sa Bethel. (Heb. 13:16; Sant. 1:27) Kon importante gid sa aton ang putli nga pagsimba, magahimo kita sing “sagrado nga pag-alagad sa iya sa adlaw kag gab-i.” Nalipay gid kita sa pagsimba sa aton Dios, si Jehova!—Bug. 7:15.