Lusambu lenda tendula “kumonisa luzitu mpi zola sambu na nzambi mosi.” Na Biblia, bangogo ya ndinga ya kisina yina bo me balula na “lusambu” lenda tendula muntu yina ke monisa luzitu to bulemfu ya mingi na bigangwa. (Mat. 28:9) Bangogo yango lenda tendula mpi kusambila Nzambi to nzambi mosi buna. (Yoa. 4:23, 24) Mambu ya bo ke tubila ke sadisaka na kuzaba mutindu bo me sadila bangogo yango.

Yehowa, Ngangi mpi Mfumu ya zulu ti ntoto, mpamba me fwana nde beto kangama kaka na yandi. (Kus. 4:10, 11) Beto ke sambilaka Yehowa kana beto ke zitisa luyalu na yandi mpi kana beto ke pesa lukumu na zina na yandi. (Nk. 86:9; Mat. 6:9, 10) Mukanda ya Ezekiele ke tubilaka mingi bantu-diambu yai zole—luyalu ya Yehowa mpi zina na yandi. Mukanda ya Ezekiele mpamba ke sadilaka bangogo “Yehowa Mfumu ya Kuluta Nene” mbala 217, mpi bangogo “zaba nde mono kele Yehowa” mbala 59.—Ezek. 2:4; 6:7.

Ata mpidina, lusambu na beto kele ve kaka mawi; kansi yo kele lusambu ya kieleka yina ke lombaka kusala mambu mingi. (Yak. 2:26) Ntangu beto ke kudipesaka na Yehowa, beto ke silaka nde na mambu yonso ya luzingu na beto, beto ta lemfukilaka yandi bonso Mfumu mpi ta zitisaka mingi zina na yandi. Kuvila ve nde na mvutu yina Yezu pesaka na mpukumuna ya tatu, yandi wakanisaka lusambu ti “kisalu ya santu.” (Mat. 4:10) Beto bansadi ya Yehowa, beto ke sepelaka mingi na kusadila yandi. * (Kul. 10:12) Beto ke sadilaka Nzambi na beto kisalu ya santu ntangu beto ke salaka bisalu yina ke wakana kibeni ti lusambu na beto mpi yina ke lombaka kudipesa. Inki kele bisalu yango?

Beto lenda sala kisalu ya santu na mitindu mingi, mpi Yehowa ke bakaka bisalu yina yonso na valere mingi. Beto ke salaka kisalu ya santu ntangu beto ke zabisaka bantu ya nkaka nsangu ya mbote, ke vukanaka na balukutakanu na Nzo ya Kimfumu, ke taninaka mpi ke tungaka bisika na beto ya balukutakanu. Diaka, beto ke salaka kisalu ya santu ntangu beto ke salaka lusambu ya dibuta, ke sadisaka bampangi-Bakristu yina kele na mpasi, ke kudipesaka na luzolo yonso na balukutakanu na beto ya distrike, to ke salaka na Betele. (Baeb. 13:16; Yak. 1:27) Kana lusambu ya bunkete kele kima ya kuluta mfunu na mabanza mpi na bantima na beto, beto ta salaka “kisalu ya santu mpimpa ti mwini.” Beto ke vandaka na kiese ya kusambila Yehowa, Nzambi na beto!—Kus. 7:15.