ٴ‌بىر انىقتامادا «عيبادات» ٴ‌سوزى «قۇدايدى قۇرمەتتەيتىنىڭدى،‏ ونى سۇيەتىنىڭدى كورسەتۋ» دەپ تۇسىندىرىلگەن.‏ كيەلى كىتاپتىڭ ٴ‌تۇپنۇسقا تىلىنەن «عيبادات» دەپ اۋدارىلعان سوزدەر بىرەۋگە ۇلكەن قۇرمەت كورسەتۋدى نە باعىنۋدى بىلدىرەدى (‏مات.‏ 28:‏9‏)‏.‏ سونداي-‏اق قۇدايعا نە قانداي دا ٴ‌بىر تاڭىرگە قۇلشىلىق ەتۋدى دە بىلدىرەدى (‏جوح.‏ 4:‏23،‏ 24‏)‏.‏ ولاردىڭ ماعىناسىن ٴ‌مان-‏ماتىنگە قاراپ اجىراتۋعا بولادى.‏

جاراتۋشى ٵرى الەمنىڭ ٵمىرشىسى ەحوبا عانا ٴ‌بىزدىڭ قالتقىسىز بەرىلگەندىك تانىتۋىمىزعا لايىق (‏ايان 4:‏10،‏ 11‏)‏.‏ ٴ‌بىز بۇكىلالەمدىك بيلىگىنە قۇرمەت كورسەتىپ،‏ ەسىمىن كيەلى تۇتۋ ارقىلى وعان عيبادات ەتەمىز (‏ٴ‌زاب.‏ 86:‏9؛‏ مات.‏ 6:‏9،‏ 10‏)‏.‏ وسى ەكى تاقىرىپ —‏ ەحوبانىڭ بۇكىلالەمدىك بيلىگى مەن ونىڭ ەسىمى —‏ ەزەكيەل كىتابىنىڭ ٶن بويىندا التىن جىپتەي ٶرىلىپ جاتىر.‏ ەزەكيەل كىتابىندا «الەمنىڭ ٵمىرشىسى ەحوبا» دەگەن تىركەس 212 رەت،‏ ال «ەحوبا ەكەنىمدى بىلەتىن بولادى\بولاسىڭدار» دەگەن تىركەس 50 دەن استام رەت كەزدەسەدى (‏ەزەك.‏ 2:‏4؛‏ 6:‏7‏)‏.‏

شىنايى عيبادات —‏ سەزىمنەن ٵرى اسپايتىن عيبادات ەمەس،‏ وعان ٸس-‏ارەكەتىمىز دە كىرەدى (‏جاق.‏ 2:‏26‏)‏.‏ ٶزىمىزدى ەحوباعا باعىشتاعاندا،‏ الەمنىڭ ٵمىرشىسى رەتىندە وعان ٶمىردىڭ ٵر جاعدايىندا مويىنسۇنۋدى جانە ەسىمىنە تەرەڭ قۇرمەتپەن قاراۋدى ۋادە ەتتىك.‏ يسا شايتاننىڭ ٷشىنشى سىناعىنا جاۋاپ بەرگەندە،‏ عيباداتتى «قاسيەتتى قىزمەتپەن» بايلانىستىرعان (‏مات.‏ 4:‏10،‏ ٴ‌سىلت.‏)‏.‏ ٴ‌بىز ەحوبانىڭ عيبادات ەتۋشىلەرى بولعاندىقتان،‏ وعان قۋانا قىزمەت ەتەمىز * (‏مۇس.‏ 5-‏ج.‏ 10:‏12‏)‏.‏ ٴ‌بىزدىڭ قاسيەتتى قىزمەتىمىزگە عيباداتقا تىكەلەي قاتىسى بار ٸس-‏شارالارمەن اينالىسۋ جاتادى.‏ جانقيارلىقپەن اتقارىلاتىن بۇل ىستەرگە نە كىرەدى؟‏

قاسيەتتى قىزمەتتىڭ تۇرلەرى وتە كوپ.‏ ولاردىڭ ٴ‌بارى بىردەي ەحوبا ٷشىن اسا باعالى.‏ قاسيەتتى قىزمەتكە ادامدارعا كۋالىك ەتۋ،‏ قاۋىم كەزدەسۋلەرىنە قاتىسۋ،‏ كەزدەسۋ وتەتىن عيماراتتاردىڭ قۇرىلىسىنا اتسالىسۋ جانە ونى كۇتىپ ۇستاۋ جاتادى.‏ وتباسىلىق عيباداتقا قاتىسۋ،‏ جاپا شەككەن باۋىرلاستارعا كومەكتەسۋ مەن بەتەلدە قىزمەت ەتۋ دە —‏ قاسيەتتى قىزمەت (‏ەۆر.‏ 13:‏16؛‏ جاق.‏ 1:‏27‏)‏.‏ تازا عيبادات اقىل-‏سانامىز بەن جۇرەگىمىزدىڭ تورىنەن ورىن السا،‏ «كۇنى-‏ٴ‌تۇنى قاسيەتتى قىزمەت اتقاراتىن» بولامىز.‏ ٴ‌يا،‏ قۇدايىمىز ەحوباعا عيبادات ەتۋ ٴ‌بىز ٷشىن زور باقىت!‏ (‏ايان 7:‏15‏)‏.‏