Kupopwela bekulumbulula’mba ke “kumwesha mushingi ne byo mwatemwa lesa.” Mu milaka itanshi yanembejilwemo Baibolo, “kupopwela” kulumbulula kumwesha mushingi nangwa’mba kukookela bilengwa. (Mat. 28:9) Abino byambo byakonsha ne kulumbulula muntu ubena kulomba kwi Lesa nangwa ku ka lesa. (Yoa. 4:23, 24) Bino byambo tumvwa mo byatala kwesakana na kine kintu kyo babena kwambapo.

Twafwainwa kupopwelatu Mulenga kabiji Nkambo Walengele Bintu Byonse, aye Yehoba kwapwa. (Lum. 4:10, 11) Kupopwela Yehoba kulumbulula kumupa mushingi ne kunemeka jizhina janji. (Sala. 86:9; Mat. 6:9, 10) Bumfumu bwa Yehoba ne jizhina janji ke bishina bibiji byo baambapo bingi mu buku wa Ezikyo. Byambo bya kuba’mba, “Nkambo Mfumu Yehoba” bitanwamo bimye 217 mu buku wa Ezikyo kabiji ne byambo bya kuba’mba “mukayuka’mba amiwa yami Yehoba,” bitanwamo bimye 55.—Ezi. 2:4; 6:7.

Kupopwela kwetu kechi kwafwainwa kwikala kwa pa kanwatu ne. (Yako. 2:26) Inge twipana kwi Yehoba, tuchipa kuba’mba mu bwikalo bwetu bonse, tukamukookelanga ne kunemeka jizhina janji. Yesu byo akumbwile mu lweseko lwa busatu bimwesha’mba kupopwela Lesa kwavwangamo ne “kumwingijila aye yenka kwapwa.” (Mat. 4:10) Byo tuji bapopweshi banji, tukebesha bingi kwingijila Yehoba. * (Mpitu. 10:12) Twingijila Lesa inge twipana kwingila mingilo itundaika bupopweshi bwa kine na muchima yense. Ñanyi mingilo yo twafwainwa kwingilako?

Twakonsha kwingijila Yehoba mu mashinda apusana pusana, kabiji onse anema kwi aye. Tuba bino inge ke tusapwile ku bantu, kukumbulapo mu Nzubo ya Bufumu, kwiiwamisha ne kushimika mazubo a kumupopwelamo. Kabiji tuba ne bino inge tubena kwambapo pa kupopwela kwa kisemi, tubena kukwasha bena Kilishitu bakwetu baponenwa na bya malwa, kwingilako mingilo imo pa kushonkena nangwa kwingijila pa Betele. (Hebe. 13:16; Yako. 1:27) Kunemeka bupopweshi bwa kine kwitulengela “kumwingijila mwingilo wazhila mute ne bufuku.” Kupopwela Yehoba kwituletela bingi lusekelo.—Lum. 7:15.