Muaku kutendelela udi mua kumvuija “tshienzedi tshidi muntu wenza bua kuleja nzambi kanemu ne dinanga.” Bilondeshile Bible, muaku “kutendelela” udi kabidi uleja muntu udi unemeka bifukibua bikole anyi ubikokela. (Mat. 28:9) Udi mua kuleja kabidi tshintu tshidi muntu wenzela Nzambi mulelela anyi nzambi mukuabu bua kumukukuila. (Yone 4:23, 24) Tshidibu bakuila ke tshidi mua kuambuluisha muntu bua kuwumvua bimpe.

Anu Yehowa nkayende ke utudi ne bua kulamata bualu yeye ke Mufuki, ne Mutambe Bunene wa diulu ne buloba. (Buak. 4:10, 11) Tudi tutendelela Yehowa patudi tumuleja kanemu bua bumfumu buende butambe bunene ne tunemeka dîna diende. (Mis. 86:9; Mat. 6:9, 10) Mu mukanda wa Yehezekele, mbatambe kuakula bua Bumfumu butambe bunene bua Yehowa ne dîna diende. Mu mukanda eu nkayamu mudi tshiambilu tshia ne: “Mukalenge Mutambe Bunene Yehowa” misangu 217, ne tshia ne: “ku dimanya ne: meme ndi Yehowa” misangu 55.​—Yeh. 2:4; 6:7.

Kutendelela kakuena anu kuleja mudi muntu udiumvua patupu to, kudi kumuenekela mu tshienzedi. (Yak. 2:26) Patudi tudilambula kudi Yehowa, tudi tuditshipa ne: netumutumikile bu mudiye Mutambe Bunene ne netunemeke dîna diende bikole mu nsombelu wetu. Vuluka ne: pavua Yezu muandamune Satana mu diteta disatu, uvua muleje mudi ntendelelu upetangana ne “mudimu wa tshijila.” (Mat. 4:10) Bu mutudi batendeledi ba Yehowa, tudi basue kumuenzela mudimu. * (Dut. 10:12) Tudi tuenzela Nzambi mudimu wa tshijila patudi tudifila mu midimu idi itangila ntendelelu wetu, ne idi ilomba bua tudipangishe amue malu. Mmidimu kayi ayi?

Tudi mua kuenza mudimu wa tshijila mu mishindu ya bungi, kadi buonso buayi idi ne mushinga wa bungi kudi Yehowa. Tudi tuenza mudimu eu patudi tuyisha bantu, tuandamuna mu bisangilu, ne tudifila mu dibaka dia miaba yetu ya ntendelelu ne diyilongolola bimpe. Tudi kabidi tuwenza patudi tuenza ntendelelu wa mu dîku, tuambuluisha bana betu badi mu ntatu, tuenza mudimu wa budisuile mu mpungilu, anyi tuenza mudimu ku Betele. (Eb. 13:16; Yak. 1:27) Padi ntendelelu mukezuke upeta muaba mu lungenyi ne mu meji etu, netuenze “mudimu wa tshijila munya ne butuku.” Tudi tupeta disanka dia kutendelela Yehowa Nzambi!​—Buak. 7:15.