Lizu kulemesa linahase kulumbununa “kuvumbika kalunga nakumuzanga.” Lizu “kulemesa” vazachisa muMbimbiliya lyafuma kumazu amumalimi akulivanga aze anahase kulumbununa kuvumbika chipwe kuliluula kuchuma chakutenga. (Mateu 28:9) Awa mazu anahase nawa kulumbununa kulemesa Kalunga chipwe tulunga. (Yowa. 4:23, 24) Shikaho tunahase kwivwishisa mwalumbunukila mazu kana kweseka nachihande tuli nakushimutwilaho.

Yehova uze apwa Mwata Atengele Vyuma Vyosena, ikiye kaha twatela kuzachila namuchima wetu wosena. (Kuso. 4:10, 11) Tweji kulemesanga Yehova hakuvumbika wata wenyi nakujilika lijina lyenyi. (Samu 86:9; Mateu 6:9, 10) Evi vihande vivali vyakuvuluka wata waYehova nalijina lyenyi vavihanjika chikuma mumukanda waEzekele. Mazu akwamba ngwavo, “Mwata Wakulitulaho Yehova” namazu eka akulifwanako vawazachisa mapapa akuhambakana 214 mumukanda waEzekele. Kaha nawa mazu akwamba ngwavo, “navakatachikiza ngwavo ami yami Yehova” namazu eka akulifwanako, atwamamo mapapa akuzomboka 49.—Ezeke. 2:4; 6:7.

Kulemesa Yehova kachapwa chakuhanjika kaha hakanwako, oloze vilinga vyetu vyatela kusolola nge tweji kumulemesanga. (Yako. 2:26) Omu tweji kuhananga kuyoya chetu kuli Yehova, tweji kumushikanga ngwetu natumwononokanga hakupwa Mwata wetu, nakuvumbika chikuma lijina lyenyi. Mazu akumbulwile Yesu mucheseko chamuchitatu, asolola nge kulemesa Kalunga chatambukila hamwe nakumuzachila “mulimo wajila.” (Mateu 4:10) Etu vangamba jaYehova twafwila kumuzachila namichima yetu yosena. * (Lushi. 10:12) Tweji kuzachilanga Kalunga mulimo wajila hakwazana mumilimo yize yasakiwa kulisuula, yize yapandama kukulemesa chamuchano. Uno milimo muka vene eyi?

Milimo yajila yapwa yayivulu, kaha Yehova ayimona kupwa yayilemu. Tweji kuzatanga milimo yajila hakwambulila vakwetu, nakuyanga kukukunguluka, nakutunga vihela vyakukungulukila nakuviwahisanga. Jila yikwavo tweji kusolwelangamo ngwetu tuli nakuzata milimo yajila shina kwazananga mukulemesa Kalunga mwatanga, nakukundwiza mulimo wakukafwa vaze vali muukalu, nakuzata mulimo wakulisakila hakukunguluka changalila, chipwe kuzachila haMbetele. (Hepe. 13:16; Yako. 1:27) Nge natuzanga chikuma kulemesa chamuchano namichima yetu yosena, kaha natuzatanga “mulimo wajila musana naufuku.” Tweji kuwahililanga chikuma kulemesa Yehova Kalunga ketu.—Kuso. 7:15.