Ukukhonza kungatsho ‘ukuhlonipha lokuthanda loba yini umuntu ayibona ingunkulunkulu.’ EBhayibhilini amabala ahunyutshwe ngokuthi “ukukhonza” angatsho ukuzehlisa loba ukutshengisa ukuthi uyamhlonipha kakhulu omunye umuntu. (Mat. 28:9) Amabala la ayasetshenziswa lalapho kukhulunywa ngokukhonza uNkulunkulu. (Joh. 4:23, 24) Amavesi aseduze laleyo esiyabe siyibala yiwo angasinceda sizwisise ukuthi evesini leyo kukhulunywa ngakuphi ukukhonza.

UJehova nguye kuphela okufanele ukuthi akhonzwe ngoba unguMdali wethu loMbusi Wendawo Yonke. (Isam. 4:10, 11) Sitshengisa ukuthi siyamkhonza uJehova ngokuhlonipha ubukhosi bakhe langokudumisa ibizo lakhe. (Hubo. 86:9; Mat. 6:9, 10) Ubukhosi bukaJehova lebizo lakhe kukhulunywa ngakho kakhulu ebhukwini likaHezekheli. Amazwi athi ‘Nkosi Enkulu Jehova’ atholakala izikhathi ezingu-217 ebhukwini likaHezekheli kuphela, futhi amazwi athi “lizakwazi ukuthi mina nginguJehova” asetshenziswe ka-55.—Hez. 2:4; 6:7.

Kodwa ukukhonza akutsho nje ukuhlonipha loba ukuthanda. Kumele kukhanye ngezenzo. (Jak. 2:26) Nxa sizinikela kuNkulunkulu siyafunga ukuthi sizamlalela kukho konke esikwenzayo ngoba unguMbusi wethu njalo sizalihlonipha kakhulu ibizo lakhe. Impendulo kaJesu ngesikhathi elingwa nguSathane okwesithathu yatshengisa ukuthi ukukhonza kuyangenelana lokwenza “inkonzo engcwele.” (Mat. 4:10) Izinceku zikaJehova zizimisele ukumkhonza. (Dute. 10:12) Nxa sisenza lokho uJehova asicela ukuthi sikwenze kumbe sitshiya okuthile ukuze simkhonze siyabe sisenza inkonzo engcwele. Yikuphi okunye uJehova asicela ukuthi sikwenze?

UJehova usicela ukuthi sitshumayele, siye emihlanganweni yebandla eWolu yoMbuso njalo sincedise ekwakheni lasekunakekeleni izakhiwo esikhonzela kuzo. Kanti njalo ufuna senze ukukhonza kwemuli, siphathise abafowethu abehlelwe ngumonakalo njalo sincedise emihlanganweni yesabelo kumbe eBhetheli. (Heb. 13:16; Jak. 1:27) Konke lokhu kuqakathekile kuJehova futhi nxa sikwenza siyabe sisenza inkonzo engcwele. Nxa sikuqakathekisa ukukhonza kweqiniso sizakwenzela uJehova ‘inkonzo engcwele emini lebusuku.’ Kuyasithokozisa kakhulu ukukhonza uJehova uNkulunkulu wethu!—Isam. 7:15.