Famosumange tola mufoʼeluaha ia ”bua-bua sangoromaʼö faʼomasi hegöi famosumange khö zi samösa lowalangi”. Ba Zura Niʼamoniʼö, fehede nifoʼeluaha ”famosumange”, tola mutandrösaigö ia khö zi samösa niha samosumange mazui sangataʼufi niwöwöi tanö böʼö. (Mat. 28:9) Tola göi mufoʼeluaha ia famosumange Lowalangi mazui dewa. (Yoh. 4:23, 24) Tola taʼila hadia geluaha sabölö tefaudu na tabaso waö-waönia.

Ha Yehowa zinangea tafosumange, börö me yaʼia Zomböi ba Samatörö Banua si Yawa awö Danö. (Fam. 4:10, 11) Tafosumange Yehowa ba ginötö tafaduhuʼö dadaomania wa yaʼia andrö Fondrege Zalawa ba tafolakhömi döinia. (Si. 86:9; Mat. 6:9, 10) Dadaoma hegöi töi Yehowa, asese mutötöi ia ba mbuku Hezekieli. Ba daʼö, so 217 kali tesöndra ngawua wehede ”Yehowa Lowalangi Fondrege Zalawa”, simanö göi ngawua wehede ”aboto ba dödömi wa yaʼo Yehowa” so 56 kali hegöi ngawua wehede böʼö si fakhili-khili ba daʼö.​—Hez. 2:4; 6:7.

Famosumange satulö tenga ha ba dödö so ia, hizaʼi moguna muforomaʼö ia ba mbua-bua. (Yak. 2:26) Ba ginötö talulu waʼaurida khö Yehowa, no fawuʼu li ita wa hasambalö taʼoʼö linia ba waʼaurida me yaʼia Zamatörö yaʼita ba taforomaʼö wa sindruhu-ndruhu tafosumange döinia. Törö tödöu, fanema li nibeʼe Yesu ba wanandraigö si medölu, daʼö zangoromaʼö wa moʼamakhaita wamosumange andre ba ”halöwö niʼamoniʼö”. (Mat. 4:10) Börö me samosumange Yehowa ita, tatu terou dödöda wamosumange yaʼia. * (5 Mo. 10:12) Tola tafalua ”halöwö niʼamoniʼö” na so nitehegöda ba wamalua halöwö ba wamati. Hadia manö halöwö andrö?

Oya halöwö si farahu ba halöwö niʼamoniʼö, simane fanuriaigö, feʼamöi ba gangowuloa, mameʼe bua gera-era, mamazökhi hegöi mondrorogö nahia gangowuloa, mamalua famahaʼö ba zi sambua omo, manolo ira talifusö si sara lala wamati si göna bencana, tobali relawan ba gangowuloa hegöi mohalöwö ba Mbetieli. Iʼameʼegö tödö fefu daʼö Yehowa. (Heb. 13:16; Yak. 1:27) Na famosumange satulö zi oföna so ba dödöda hegöi ba wangera-ngerada, tola tafalua ”halöwö niʼamoniʼö khönia bongi maʼökhö”. Omuso sibai dödöda me tola tafosumange Lowalangida Yehowa!​—Fam. 7:15.