Borapeli bo ka bolela “eng kapa eng eo motho a e etsang ho bontša hore o rata le ho hlompha ntho eo a e nkang e le molimo oa hae.” Mantsoe a sebelisitsoeng ka Bibeleng ha ho buuoa ka “borapeli,” a ka bolela hore motho o hlompha ka tsela e tebileng kapa o ikokobeletsa ntho e ’ngoe e bopiloeng. (Mat. 28:9) A ka boela a bolela ntho eo motho a e etsang ha a rapela Molimo kapa molingoana. (Joh. 4:23, 24) Tsela eo mantsoe ao a sebelisitsoeng ka eona e re thusa ho bona hore na moo a sebelisitsoeng teng a bolela’ng.

Jehova ke eena feela ea tšoaneloang ke ho rapeloa hobane o bopile lintho tsohle ebile ke Morena ea Matla ka ho Fetisisa. (Tšen. 4:10, 11) Re rapela Jehova ka ho bontša hore re hlompha puso ea hae le lebitso la hae. (Pes. 86:9; Mat. 6:9, 10) Lintho tse peli tse kholo tseo ho buuoang ka tsona bukeng ea Ezekiele ke puso ea Jehova le lebitso la hae. Bukeng ea Ezekiele feela, poleloana e reng “Jehova ’Musi oa Lintho Tsohle” e hlaha ka makhetlo a 210 ebe e reng “tseba hore ke ’na Jehova,” e hlaha ka makhetlo a 61.—Ezek. 2:4; 6:7.

Borapeli ba ’nete ha se feela taba ea hore na re ikutloa joang empa hape ke taba ea hore na re itšoara joang. (Jak. 2:26) Ha re inehela ho Jehova, re itlama hore re tla mo mamela likarolong tsohle tsa bophelo ba rona le hore re tla hlompha lebitso la hae haholo hobane ke Morena oa rona. U hopole hore ha Jesu a ne a araba Satane ka mor’a hore a mo leke ka lekhetlo la boraro, o ile a amahanya borapeli le ‘ho sebeletsa’ Molimo. (Mat. 4:10) Kaha re barapeli ba Jehova, re ikemiselitse ho mo sebeletsa. a (Deut. 10:12) Re sebeletsa Molimo ha re etsa lintho tse amanang le borapeli ba rona ’me lintho tseo li hloka boiteko. Ke lintho life tseo?

Re ka sebeletsa Jehova ka litsela tse ngata empa kaofela ha tsona li bohlokoa ho eena. Litsela tse ling tsa ho sebeletsa Jehova ke ho ruta batho ba bang Bibele, ho ba teng libokeng le ho nka karolo ho tsona, ho haha le ho hlokomela libaka tseo re rapellang ho tsona, ho ba le borapeli ba lelapa, ho kenella mosebetsing o etsoang ho thusa bana ba bo rona ba hlokang thuso, ho ithaopa likopanong kapa ho sebetsa Bethele. (Baheb. 13:16; Jak. 1:27) Re tla be re “sebeletsa [Molimo] bosiu le motšehare” haeba re nka borapeli ba ’nete e le ntho ea bohlokoa ka ho fetisisa ka likelellong le ka lipelong tsa rona. Ho sebeletsa Jehova ho re thabisa haholo.—Tšen. 7:15.